1, 2. Mâ ǃkharagaǃnâgu ǂâi ǀgauga paradais xa hâ?

NĒS GE kaise ge tsûtsûsa i. ǁKhauhe hâ ǃgâsan ǀkharib kai ǀhaos hîna ge Seoul, Koreab ǃnâ hâ isa xu ra ī, hînan ge nau ǃgâsana ǁîn ǂnamipe ge mâ i. ǂGuin ge gere tawede tsî “Paradais ǃnâ ta ge nî mû du” di gere mî. ǁÎna mâ paradais ǃoa gere ǁnaeǁgau?

² Paradais ge ǃkharagaǃnâgu xūna ǃkharagagu khoena a ǂâibasen ǁkhā. ǀNîn ge ra mî “paradais” ge a ǁhapo di. Tsî ǀnîn ge ra mî paradais ge ǃgâiaǂgaob tsî ǂkhîb hâba a hō-e ǁkhā. ǃÂ hâ aob hîna ǂûǀhaos tawa hâb ge a mî ǁkhā paradais ǃnâb hâ di. ǃGarob hain xa ǀoa hâ ǃkhaiba mû tsîs ge ǃkharu ge ǁaeb ǃnâ sari-aosa ge mî “kaise îsa paradais ge” di. Nē ǃkhaib ge noxoba Paradais di ra ǂgaihe, 15 metergu sneeuba i kuri korobese ra hō xawe. Paradaisa sadu ǃgao tae-e ra ǂâibasen? Nēsa du ra ǃâubasen?

3. Elobmîsa mati paradais xa ra ǂâi kai da?

³ Elobmîs ge ǃkharu ge ǁaeb ǃnâ ge hâ i paradais tsî hānîǁaeb paradais tsîn xa ra ǃhoa. Paradais di ǂâis ge ǂgurose  Elobmîs ǃnâ hâ. Catholic Douay Versions hîna ge Latin gowaba xu a ǂnûiǃkhunihes ge Genesis 2:8 tawa ra khomai: “Tsîb ge ǃKhūb Eloba ǁkhāti ǃhanaba ge ǂgā, Edenni ǃnâ aiǂoas ǀkhāb ai, tsîb ge ǁîba khoeba ǁnāpa ge ǂnûi, ǁîb ge ǂnubiba.” Hebre xoadi ge ‘Edenni ǃhanab’ xa ra ǃhoa. Edenni ge “turaba” ǃoa ra ǁnaeǁgau tsî ǁnā ǃhanab ge amabes ǃnâ kaise ge îsa i. ǂGui ǂûn, îsa mûhe ǁkhā xūn tsî xamanin tsîn ge ge hâ i.​—Gen. 1:29-31.

4. Tae-i ǃaroma da Edenni ǃhanaba paradais ǀkha a ǀgopeǀnō ǁkhā?

⁴ Grikegowab mîs hîna Hebregowab mîs “ǃhanab” di hâsa ra ǂnûiǃkhunis ge pa·raʹdei·sos di hâ. Cyclopaedias hîna M’Clintock tsî Strong hâ kha xa xoahe hâs ge pa·raʹdei·sos xa ra mî: “ǂHaba ǃhūbaib hîna tsū khoena ūhâ tamab tsî îsasib âb ǁgaiǁgaihe tideb. Îsa kai haidi ǀkha hîna ǃāb ǁgammi xa ra ǂnâhede tsî nî ǂû tanide tsîn ge gūna ǁnāpa nî ǃgû. Nēs ge ǃnari-aon ǂâidi ǃnâ ge hâ i.”​—Genesis 2:15, 16 ǀgopeǀnō re.

5, 6. Paradaisa mati ge ǂoaǃnâhe tsî nēsa mâ dîs ǀkha ge ǁnāxū da?

⁵ Elob ge Adammi tsî Evas tsîna nēti ī paradais ǃnâ ge mâi xawe ra ge ǁnāpa ge hâhâ tama hâ i. Tae-i ǃaroma? ǁÎra ge aitsama ge ǂoaǃnâ kaisen Eloba ǁnâuǀnamoǃnâs ǃnâ-ū. ǁNās ǀkha î ge ǁîra tsî ǁîra surib tsîna paradaisa ge ǂoaǃnâ. (Gen. 3:23, 24) ǁNā ǃhanab ge khoen ge ǀkhai i xawe, kai ǁgammi dâub Noab tsēdi dib kōse ge hâ.

⁶ ǀNîn ge ǀnîsi gere ǂhâ ‘aob, taras tsî ǀgôan tsîna paradaisa ǃhūbaib ai a ūhâ ǁkhā?’ Xawe ôaǃnâsa tae-e ra ǁgau? Sadu ǀnamsaben ǀkha du ga paradais ǃnâ sī hâ ǂgao o, ǃâubasensa ū î du hâ? ǁGuiǃā ǁkhā î du a paradais amabes ǃnâ nî hāsa?

7, 8. (a) Eloba Abrahamma tae-e ge mîmâiba? (b) Elob mîmâisa Abrahamma tae-e ge ǂâi kai?

⁷ Nē ǃereamde da ge Paradais kuru-aob ǂkhanis ǃnâ a hō ǁkhā. ǂÂi re Elob ge tae-e ǁîb ǀhōsab Abrahamma a mîbasa. Elob ge Abrahamma ge mîba ǁîb suribab ge “ǀgopab hurib amǃgâ ǁgoeb khami” nî ǂguiǂgui. Tsîb ge Jehovaba nēti ge mîmâi: “Tsî sa surib ǃnâ di ge ǃhūbaib di ǁaedi hoade nîra ǀkhaehe, ti dommats go ǁnâuǀnam hâ i amaga.” (Gen. 22:17, 18) Elob ge nē mîmâisa Abrahammi ǀgôab tsî ǁnurisab tsîna ge mîba.​—Khomai re Genesis 26:4; 28:14.

⁸ Elobmîs ge ǁgau tama Abrahammi gere ǂgomsa khoen ǀhommi ǃnâ hâ paradaisa ǃoa nî īsa. ǁNā-amagab ge Abrahamma Elob ge ‘ǃhūbaib di ǁaedi hoadi’ hîna nî ǀkhaehe di xa gere ǃhoa o, o ǀnîsi ǃhūbaib ai nî hā ǀkhaegu xa gere ǂâi. Nē mîmâis ge Eloba xu gere hā ǁnā-amaga î ge “ǃhūbaib di ǁaedi hoade” ǃgâi mâsiba nî hō. Elob khoen ǁaegu ge hâ i ǀguiǃnâxasiba nē ǂâi ǀgauba gere ǂkhâǃnâ?

9, 10. Mâ mîmâide ega nî hā ǀkhaeb ǃâubasensa ge mā da?

⁹ Davib hîna a Abrahammi di surib ge “tsūdī-aon” tsî “eloxoresasib” nî ǀkhai ǁaeba ǃoa ge ǁnaeǁgau. Nēs ǀamǂoasa a tae? ‘Eloxoresab ge nî ǀkhai.’ (Psa. 37:1, 2, 10) “Xawe tsamtsiǃnân ge ǃhūbaiba nîra ǀumi, tsî kai ǂkhîb ǃnâ nîra ǃgâiǃgâisen.” Davib tsîn ge ge ǂkhâǃnâhe îb xoa: “ǂHanu-ain ge ǃhūbaiba nîra ǀumi,  tsî ǀamose ǁîb ai nîra ǁan.” (Psa. 37:11, 29; 2Sam. 23:2) Nēsa khoen hîna ge Elob di ǂâisa gere dī ǂgaona mati ge tsâǀkhā? ǁÎn ge ga ǂgom hâ ǂhanu-ai khoen ǀguin ga ǃhūbaib ai hâ hâ o, o î ge paradais hîna Edenni ǃhanab khami īsa ga hâ hâ.

¹⁰ ǂGui Israelǁîn hîna ge Jehovaba gere ǃoaban ge ega ǁîba ge ǃoaba ǀû. Elob ge Babilonǁîna ge mā-am în ǁîb ǃoaba-aona mâǃoa, ǁîn xūna ū tsî ǂguina ǃkhōsis ǃnâ ū. (2Kro. 36:15-21; Jer. 4:22-27) Elob kēbo-aogu ge ge mî 70 kurigu khaoǃgân ge ǁÎb khoena ǁîn omde ǃoa nî oa. Nē kēbodi ge ge dīǀoaǀoahe. Xawe sida ǃgaos tsîna ǂâibasensa ūhâ. Nē kēbodi xa da ra ǃhoa hîna, hānî paradais ai ǂâisa ǂnûi re.

11. Jesajab 11:6-9 sa mâ ǀgaub ǃnâ ge dīǀoaǀoahe tsî mâ dîs ǀkha ra ǁnāxū da?

¹¹ Khomai re Jesajab 11:6-9. Elob ge Jesajab ǃnâ-ū ǁîb khoena ge mîba omsa ǃoan ga oa o, on ge ǃgâi mâsiba nî hōǃâ tsî xamanin tsî ǁkhōǁkhōsa khoen tsîna ǃao tide. ǂKhaman tsî kairan hoan ge ǃnōrasasib ǃnâ nî hâ. Nēsa Elob ge Edenni ǃhanab ǃnâ mā hâ i mâsigu ǀkha ǀgui tama hâ? (Jes. 51:3) Nē kēbos hîna ge Jesajab ǃnâ-ū a māhes ge ge ǁgau hoa ǃhūbaib ge “ǃKhūb di ǂans xa nîra ǀoa xui-ao, ǁgamgu huriba ra ǃgū-ais ǁkhās khami.” Nēsa mâǁae nîra ī?

12. (a) Khoen hîna ge Babilons di ǃkhōsisa xu a hāna tae-i ǀkhaega ge hōǃâ? (b) Tae-e ra ǁgau Jesajab 35:5-10 ge noxoba nî dīǀoaǀoahe di?

¹² Khomai re Jesajab 35:5-10. Jesajab ge noxoba ge ǁgau oa sī ga khoen ge xamanin tsî khoen tsîna ǃao tide. ǁÎn ǃhūb ge nî ǂûtani, nēs ge ǂgui ǁgammi hîna hâ i xa nî ǃaromahe Edenni ǃhanas ge ǃgâise gere ǂnâhe khami. (Gen. 2:10-14; Jer. 31:12) Nēs ǀguisa ge dīǀoaǀoahe? ǁGauǁgau î ge a ǀkhai ǁgau ra-e khoen hîna ge ǃkhōsisa xu a hān ge a ǂgauǂgauhesa. Aiǁgause ǂgī hân ge ge mû tsoatsoa tama hâ i. Elob ge gere ǂâibasen nē xūn ge noxoba nî ī di.

13, 14. ǃKhōsis ǃnâ ge hâ i khoena mati Jesajab 65:21-23 di dīǀoaǀoasa ge mû tsî mâ ǃâba noxoba nî dīǀoaǀoahe? (Tsoatsoas ǃnâ hâ ai-īsiba mû re.)

¹³ Khomai re Jesajab 65:21-23. Jodeǁîn ge ǃgâi mâsib ǃnâ hâ omdi tsî ǃhanagu tsîna ǃoa ge oa sī tama hâ i. Xawe nēs ge Elob ra ǀkhae nî khami ge dawa. Kai ǃgâiaǂgaob ge ge i omde om tsî ǁîdi ǃnâ ǁansa. ǁÎn ge ge ǃhana ǁkhā i tsî nē ǃhanab ǂûna gere ǂû.

¹⁴ Nē kēbos ǂhâǂhâsa ǃâb hîna ra dīǀoaǀoaheba kō re. ǁAeba hâ î nî sida tsēdi ‘tsēdi hais didi khami nîra īsa’? ǀNî haidi ge ǀoadisi kuriga ra ûi. Khoesib ge ǂurusiba ǂhâ hâ ǁnātikō gaxuse ûisa. ǁÎn ga Jesajab ge mîmâi mâsigu ǃnâ ûi hâ o, os ge ǁnāsa ǁhapos khami ga ī hâ. Nē kēbos ge nî dīǀoaǀoahe.

15. Mati du Jesajab ǂkhanis ǃnâ hâ ǀkhaega a ǁguiǃā ǁkhā?

¹⁵ ǂÂi re nē mîmâidi mati hānî paradaisa ǃoa ra ǁnaeǁgau ǀgausa: Khoen hoan ge ǃhūbaib ai Elob xa nî ǀkhaehe. Khoen ge xamanin tsî ǁkhōǁkhōsa khoen tsîna ǃao tide. ǂGī hâ khoen, ǃgomen tsî ǃhora hân tsîn ge nî ǂgauǂgauhe. Khoen ge ǁîn omde nî om tsî ǂûtani ra ǃhanaga nî ūhâ. ǁÎn ge haidi xa gaxuse nî ûi. Elobmîs ǃnâ da ge ǁgauǁgaude ra mû hîna ra ǁgaude nē ǁaeb ge a ǀgū di. ǀNîn ge ra mî nē kēbodi xa da ge ǃnāsase ra khomai di. Mati du nî ǃeream? Mâ ǃaromasa du ūhâ  paradais ǃhūbaiba ǃoa mûǂuisa? Khoexaǃnâ khoeb ge ǃaromasa ge mā.

16, 17. Jesuba mâ mâsib ǃnâ paradais xa ge ǃhoa?

¹⁶ Jesub ge xū-eb ge dī tama hâ i xawe mâǃoa-e tsî ge ǃgam-e tsî Jodeǁî tsūdī-aob xōǀkhā ge mâ i. ǁŌb nîs aiǃgâb ge ǀgui tsūdī-aoba ge mûǂan Jesub a gao-aosa tsî ge mî: “ǂÂi te re, ǃKhūtse, sa gaosib ǃnâts ga sīo.” (Luk. 23:39-42) Sadu tsîn ge Jesub ge Lukab 23:43 tawa a mā ǃereams xa ra tsâǀkhāhe. ǀNî ǁkhāǁkhā-aon ge nēsa sao rase ra ǂnûiǃkhuni: “Amase, ta ra mîba tsi, nētsēts ge tita ǀkha paradais ǃnâ nîra hâ.” “Nētsē” di hâ mîsa ǃgaoǃgâ re. Jesuba tae-e gere ǂâibasen? Nēs ge ǃkharagaǃnâgu ǀgaugu ǃnâ ra ǁnâuǃāhe.

¹⁷ ǂGui gowagu ge nētsē ǀomsaosa ra sîsen-ū ǂâibasensa ǃgâise ǂoaxa-ūs ǃgao xawe ǃkharu ge ǁaeb ǃnâ î ge Grike manuscriptka khomaisaoǂnûide ǁnātikōse ge sîsen-ū tama hâ i. Dîs ge hâ: Jesuba ge mî “Mîba tsi ta ra, nētsēts ge tita ǀkha paradais ǃnâ nîra hâ?” Tamas ka iob gere mî, “nētsē ta ra mîba tsi tita ǀkhats ge paradais ǃnâ nîra hâ”? ǂNûiǃkhuni-aon ge Jesub ge ǀnîsi a mî ǀgaub ǃoagu ra ǂnûiǃkhuni, nēsa da ge nētsē Elobmîs ǃnâ a hōǁkhā.

18, 19. Mati da Jesub ge tae-e gere ǂâibasensa a ǁnâuǃā ǁkhā?

¹⁸ Jesub ge ǁîb saosabena ge mîba: ‘Khoen Ôab ge ǃnona tsēdi tsî ǃnona tsuxugu tsîna ǃhūb di ǂgaob ǃnâ nî hâ.’ Tsî ge ǀaro: “Khoen Ôab nîra khoen ǃomgu ǃnâ māǁnâhe ǃkhais ge nî ī. Tsîn ge ǁîba nîra ǃgam, xaweb ge ǃnonaǁî tsēs ai nîra khâi” (Mat. 12:40; 16:21; 17:22, 23; Mrk. 10:34) Apostel Paulub ge ge ǁgau nēs ge a īsa. (ǃNǃkh. 10:39, 40) Jesub tsî ǁîb xōǀkhā ge mâ i khoeb tsîn ge Paradaisa ǃoa ge ī tama hâ i ǁō kha ge o. Jesub ge “ǀhobas ǃnâ” ge hâ i Elob ge khâisa a mā bi tsēs kōse.​—ǃNǃkh. 2:31, 32. *

¹⁹ ǁNā-amaga da ge ra mû Jesub ge khoeba ge mîba nēti ra tsoatsoase: “Amase, ta ra mîba tsi.” Nē ǃhoa ǀgaub ge Moseb ǁaeb ǃnâs tsîna ge hâ i. ǁÎb ge ge mî: “Tsî nē mîdi nētsē ta ra mîmā tsidi, ǁîdi ge sa ǂgaob ǃnâ nî hâ.”​—Deu. 6:6; 7:11; 8:1, 19; 30:15.

20. Tae-e sida ǁnâuǃāb Jesub ge mî mîdi diba ra ǂkhâǃnâ?

²⁰ Elobmîs ǂnûiǃkhuni-aob hîna aiǂoas ǀkhāba xu ra hāb ge Jesub xa ge mî: “Hoa xoaǀgoras ge “nētsē” di hâ mîs ai a ǃgaoǃgaosa ǁnā-amaga î ge, ‘nētsē ta ra mîba tsi tita ǀkhats ge paradais ǃnâ nîra hâ’ di nî khomai-e. Mîmâis ge ǁnā tsēs ai ge dī-e tsî ega ge dīǀoaǀoahe. Nēs ge khoen ǃhoa ǀgaub ǃoagu ge hâ i ǁnā-amaga gere ǂâibasen mîmais ge ge dī-e tsî nî ǃkhō ǀgarahe.” ǃKharu ge ǁaeb Syriac versions ge Jesub ǃereamsa sao rase ra mî: “Amen, nētsē ta ra mîba du tita ǀkha du ge Edenni ǃhanab ǃnâ nî hâ.” Hoa da ge nēs xa nî ǂkhâǃnâhe.

21. Tae-e tsūdī-aob ǀkha ge ī tama hâ i tsî tae-i ǃaroma?

²¹ ǁNā khoeb ge ge ǀū i Jesub ge ǁîb ǁkhāǁkhāsabega a mîmâisa ǁîb ǀkha gu ge ǀhommi Gaosib ǃnâ nî hâ di. (Lukab 22:29) ǁNā khoeb ge ge ǁāǁnâhe tama hâ i. (Jhn. 3:3-6, 12)  ǁNā-amaga da ge a ǁnâuǃā ǁkhā Jesub ge ǃhūbaib di paradaisa a mîmâisa. Kurigu ǃkharu hâseb ge apostel Pauluba khoeb hîna ‘paradais ǃnâ ǂgaeǃapahe’ hâb xa ge ǃhoa. (2Kor. 12:1-4) Paulub tsî nau ǂgomǂgomsa apostelgu tsîn ge ge ǁhûihe îgu Jesub ǀkha Gaosib ǃnâ ǂgaeǂgui. Xaweb ge Pauluba noxoba nî hā xū-e ǃoa gere ǁnaeǁgau—hānîǁaeb “paradaisa.” * kNēsa ǃhūbaiba ǃkhōǂgā hâ? Sadu tsîna ǁnāpa a hâ ǁkhā?

22, 23. Tae-e da nî ǃâubasen?

²² ǂÂis ǃnâ ūhâ re Davib ge ‘ǂhanu-ain ǃhūbaiba nîra ǀumi’ ǁaeba ge aimûǀgaru. (Psa. 37:29; 2Pet. 3:13) Davib ge ǃhūbaib ai hâ khoen Elob ǂhanu-ai ǀgaugu ǃoagu nî ûi ǁaeba ǃoa gere ǁnaeǁgau. Jesajab 65:22 tawa hâ kēbos ge ra mî: ‘Tsēdi ti ǁaes didi hais tsēdi khami nîra ī xui-ao.’ Nēs ge ra ǂâibasen khoen ge ǂgui kuriga nî ûi di. Nēsa du ra ǃâubasen? ǂHaiǂhais 21:1-4 ǃoagub ge Eloba khoesib ǃnâ ǃgâiǃgâibasensa nî ūhâ tsî ge mîmâi “ob ge ǁōba ǃaruǀî hâ tide”, Elob ǂhanu-ai ǀgaugu ǃoagu ǁîba nî ǃoaba khoen ǃaroma.

²³ Nēs ge kaise a ǃgāsa. Adammi tsî Evas tsîn ge Paradaisa ge ǂoaǃnâ Edenni ǃhanab ǃnâ xawe nēs ge ǀamosib kōse ge ǂoaǃnâhe tama hâ i. Elob ge mîmâi khamin ge khoena ǃhūbaib-ai noxoba nî ǀkhaehe. Davib ge ǂkhâǃnâhe hâse ge mî ǂhanu-ai khoen ge ǃhūbaiba nî ǀumi tsî ǁnāpa ǀamosib kōse nî ǁan. Jesajab ǂkhanis ǃnâ māsa kēbodi ge nî tura kai da ǁnā mâsib ǃnâ ûi ǂgaosa. Mâǁae? Jesub ge Jodeǁî tsūdī-aoba a mā mîmâis ga dīǀoaǀoahe o. Sadu ge ǁnā Paradais ǃnâ a hâ ǁkhā. ǁNā ǁaeb ai î ge sari hâ ǃgâsan ge Koreab ǃnâ hâ ǃgâsan xa a mîbahe mîde nî mûǂanhe: “Paradais ǃnâ ta ge nî mû tsi.”