1-2. (a) Jesub mîmās hîna Mateub 28:18-20 ǃnâ hâs ǃoagub Xristeǁîn ǀhaohâba mâ ǁgaumâisa ūhâ? (b) Mâ dîde da nē ǁkhāǁkhāǃâs ǃnâ nî ǃhoaǃgao?

APOSTELGU ge kaise ge ǂkhî i ǃhommi ai gu ge ǀhao hâ io. Jesub ge ǁîb ǁōb khaoǃgâ ge ǂgangu îgu ǁnāba ǁîb ǀkha sī ǀhao. (Mat. 28:16) ‘ǁNās khaoǃgâb ge ǀgui ǃnās ai korokaidisisa ǃnā hâ ǃgâsan xa ge mûhe.’ (1Kor. 15:6) Tae-i ǃaromab ge Jesuba ǁîb ǁkhāǁkhāsabega ǁnāǀî ǂgai? ǁÎga sîsen-e mās ǃaroma: “ǁNā-amaga ǃgûǂoa, î go hoa ǁaede ǁkhāǁkhāsabedī.”—Khomai re Mateub 28:18-20.

² ǁKhāǁkhāsabegu hîna ge Jesub mîde a ǁnâugu ge ge ǂguroǁaeb Xristeǁîn ǀhaohâb ǃâ kai. Nē ǀhaohâb di ǂâibasens ge ge i ǁkhāǁkhāsabedīsa. * Nētsē î ge ǂgui ǀhaohâga hâ hîna ama Xristeǁîna ūhâga tsî nē ǀhaohâgu ǂâibasens ge noxoba a ǀgui. Nē ǁkhāǁkhāǃâs ǃnâ da ge haka dîde nî ǃhoaǃgao: ǁKhāǁkhāsabedīsa tae-i ǃaroma a ǂhâǂhâsa? Nēsa tae-e ǃkhōǂgā hâ? Hoa Xristeǁîna ǁkhāǁkhāsabedīs ǃnâ ǃâ-e ūhâ? Tsî tae-i ǃaroma da ǃnūǃnâxasiba ǂhâ hâ nē sîsen-e dīsa?

3. Johaneb 14:6 tsî 17:3 ǃoagus ǁkhāǁkhāsabedīsa tae-i ǃaroma a ǂhâǂhâsa?

³ ǁKhāǁkhāsabedīsa tae-i ǃaroma a ǂhâǂhâsa? ǁKhāǁkhāsaben ǀguin ge a Elob ǀhō kai ǁkhā. ǁNān hîna Xristuba ra saon ge nēsi ǂkhî ûiba a ūhâ ǁkhā tsî ǀamo ûiba hānîǁaeb ǃnâ nî hō. (Khomai re Johaneb 14:6; 17:3.) Jesub ge ǂhâǂhâsa sîsenni ǀkha ge ǁgaumâi da xawe da ge nē sîsen-e ǀguri dī tama hâ. Apostel Paulub ge ǁîb tsî ǁîb ǀhōsan tsîn xa ge xoa: “Elob di ǀhaosîsenao khom ge sikhoma.” (1Kor. 3:9) Kaise ǃgâi aiǂhanub ge Jehovab tsî Jesub tsîn ge ǀoasa kurusa ūhâ tama hâ khoena a māba.

4. Ivani tsî Matildes tsîra di aiǁgausa xu da tae-e ra ǁkhāǁkhāsen?

⁴ ǁKhāǁkhāsabedīs ge ǂkhîba a mā da ǁkhā. Ivani tsî ǁîb taras Matildes tsîra aiǁgausa kō re hîna Colombiab ǃnâ ra hâra. ǁÎra ge ǂkhamkhoeb hîna Davier di ǀon hâba ge aoǁnâba, ǁîb ge ǁîra ge mîba: “Ti ûib ǃnâ ta ge ǀkharaǀkharana ra dī ǂgao xawe ta ge dīhō tama hâ.” Davieri ge ge ǃkham-ao i hîna ge ǀhubuǀhubu xūna sîsen-ū, ā-ao i tsî ǁîb tare ǀhōsas, Erikas ǀkha gere hâ. Ivani ge ra ǁguiǃā: “ǁÎbam ge Elobmîsa ge ǁkhāǁkhā tsoatsoa. ǁÎb gere hâ ǃgaroǃās ge kaise ge ǃnū i tsîm ge ǀhapese gere ū ǁnāpa sīsa. Davieri tanisen ǀgaub ǃnâs ge ǀkharaǀkharana mû o, os ge Erikas tsîna Elobmîsa ge ǁkhāǁkhāsen tsoatsoa.” ǁAerob khaoǃgâb ge Daviera ās tsî ǃkhams tsîna ge ǀû. Tsîb ge Erikas tsîna ge ǃgame. Matildes ge ra mî: “Davieri tsî Erikas tsîra ge 2016ǁî kurib ǃnâ ge ǁāǁnâhe, ǂâihō ta ge ra Davieri hoaǁae gere mîsa, ‘ti ûib ǃnâ ta ge ǀkharaǀkharana ra dī ǂgao xawe ta ge dīhō tama hâ.’ Kaise da ge ge ǂkhî i tsî gere ā.” Kai ǂkhîba i ge ra hao-ū ba da khoena da ga hui o in Xristub ǁkhāǁkhāsabe kai.

5. Tae-e a ǂguro xū hîna da nî dī-e ǁkhāǁkhāsabedī da ga o?

⁵ ǂGuro xū-i ǁkhāǁkhāsabedī da nîs aiǃâ da ra dī i ge khoena ‘ôasa’. (Mat. 10:11) ǀHao-ū da ra khoen hoana da ga amab xa mîba o, o da ge ra ǁgau Jehovab di ǀHûǀguitimî-ao da a ǃkhaisa. Ama Xristeǁî da a ǃkhaisa da ge ra ǁgau Xristub ǁgaumâisa da ga sao o.

6. Tae-e da nî dī în khoena sada ra mî xūna ǃgâ?

⁶ ǂGui khoen ge Elobmîsa ra ǁkhāǁkhāsen ǂgao xawen ge ǀnîna ǁae tama khami ra tanisen. Hui nî ǁkhā da ge a Elobmîsa ǁkhāǁkhāsens ǀkha. ǃGâise sada di aoǁnâ sîsenni ǃnâ dīs ǃaroma da ge nî aiǂhomisen. Khoen ǃgâiǃgâibasensa ūǃnâ hâ xūn xa ǃhoa re. Tsî ǂâiǃgâ re xoaǂamsa du mati nî mâi-aiǃâsa.

7. Mati da khoen ǀkha a ǃhoa tsoatsoa ǁkhā tsî tae-i ǃaroma da ǁîna ǃgâ tsî ǃgôasiba nî ǁgau?

⁷ Aiǁgause, du ge oms khoena a dî ǁkhā: “Xū-e ta a dî du ǁkhā? ǃGomsin hîna da nētsē ra hōǃân ge ǂgui khoena ra tsâǀkhā. ǃHūbaib ǂhanuga nē ǃgomsina a ūbē ǁkhā?” ǁNāpaxū Danieli 2:44 sa ǃhoaǃgao re. Tamas ka io du ge a  dî ǁkhā: “Tae-e a huida ǁkhā ǃgâi ǂūga ūhâ ǀgôana kaikais ǃnâ?” Tsî ǁnāpaxū Deuteronomium 6:6, 7 sa ǃhoaǃgao re. Tae-i ǀgui-i kas ǃhoaǃgao du ra-e xawe khoena ǂâis ǃnâ ūhâ re. ǂÂi re Elobmîsan ga ǁkhāǁkhāsen on nēs xa nî hui-e ǀgaub xa. ǁÎn ǀkha du ga ǃhoa o ǁîn ra ǃhoa xūna ǃgâ re tsî mîn ra xūn ǃoa-ai ǃgôasiba ǁgau re. ǁNā ǀgaub ǃnâ du ge ǃgâise a ǁnâuǃā nî ǁkhā tsîn ge sada ra mî xūn tsîna nî ǃgâ.

8. Tae-i ǃaroma da khoena ǃoa nî oa?

⁸ Khoe-i ǀkha du Elobmîsa nî ǁkhāǁkhāsens aiǃâ du ge ǁaeba ǁamaǂui tsî ǁnā khoe-e nî sari. Tae-i ǃaroma da nēsa ra dī ǂgao? Khoen sada ǁîna ra sari ǁaeb ai ǁae-e ǀnîsi ūhâ tide amaga. ǂÂis ǃnâ ūhâ re hais ge ǁgam-es ga māhe o, o nî kai. ǁKhā ǀgaub ǃnâ i ge khoe-i Jehovaba ūba hâ ǀnamma nî kai hoaǁae da ga ǁîn ǀkha Elobmîs xa ǃhoa o.

9-10. Tae-i ǃaroma da a mî ǁkhā hoa Xristeǁin ge ǁkhāǁkhāsabedīs ǃnâ ǃâ-e ūhâ di?

⁹ Mâ Xristeǁî-i hoa-i ge nēs ǃnâ ǃâ-e ūhâ. Nēsa da ge kā hâ ǀgôa-e ôas ǀkha a ǀgopeǀnō ǁkhā. Mâ ǀgaub ǃnâ? ǂÂi re tae-i ge ǃnona kurixa axarob hîna ge omsa xu a kāb ǀkha a īsa. 500 Xa a ǃnāsa khoen ge ǁîba gere ôa. Hoa tsēsab ôa-e hâ hînab ge axaroba māsenxase gere ôa bi khoe-i xa ǃhanab ǃnâ sī ge hō-e. Axaroba ge hō khoe-i ge nēs ǃgao khoen xa ge koa-e ǂgao tama hâ i. ǁÎb ge ge mî: “ǂGui khoena i ge go ū axaroba hōsa.”

¹⁰ ǂGui khoen ge nē axarob khami  ra tsâ, kā hâse. ǁÎn ge ǃâubasen-e ūhâ tama hâ xawe ra hui-e ǂgao. (Efe. 2:12) 8 Miliuns xa a ǃnāsa ǀHûǀguitimî-aon ge ǀguiba ra sîsen, kā hâse ra tsâ khoena ôas ǃnâ. Sadu ge ǀnîsi Elobmîsa sadu ǀkha ra ǁkhāǁkhāsen ǂgao khoe-e hō tide. Xawe i ge ǀnî hâ aoǁnâ-ao-i hîna sadu ǂharis ǃnâ ra sîsen-e khoe-e a hō ǁkhā hîna Elobmîs amaba ra ǂan ǂgao-e. ǃGâsa-i ga khoe-e ga ra hui o, î-i Xristub ǁkhāǁkhāsabe kai, o i ge ôas sîsenni ǃnâ ǃâ-e ūhâ ǃgâsan hoana ra ǃgâiaǂgao kai.

11. Khoe-e da ga nēsi Elobmîsa ǁkhāǁkhā tama i xawe da mâ ǀgaugu ǃnâs tsîna a ǁkhāǁkhāsabedī ǁkhā?

¹¹ Nēsi du ga khoe-e Elobmîsa ǁkhāǁkhā tama i xawe du ge ǀnî hâ ǀgaugu ǃnâs tsîna a ǁkhāǁkhāsabedī ǁkhā. Aiǁgause, ǀasase Gaosib ǀHû-ommi tawa ra sī khoena da ge nî ǁkhoreǁhare tsî ǁîn ǀkha ǀhōsagusisa nî kuru. Nē ǀgaub ǃnâ da ga ǀnamma ǁgau o, o da ge ǁîna ra ǁgau ama Xristeǁî da a ǃkhaisa. (Jhn. 13:34, 35) ǀHaodi tawa da ra mā ǃereamdi ge ǀasase ǀhaodi tawa ra sī khoena a ǂkhâǃnâ ǁkhā în ǁîn ǂgoms ǃnâ ǁgâiǂuisen. ǀAsa aoǁnâ-ao-i ǀkhas tsîna da ge aoǁnâ sîsenni ǃnâ a sîsen ǁkhā tsî ǁî-e a hui ǁkhā mati i Elobmîsa nî sîsen-ūsa khoe-e ǁkhāǁkhās ǃnâ. Nēsa da ga dī o, o da ge ǁî-e nî hui Xristuba ǁgaesa.—Luk. 10:25-28.

12. ǀŌ-aisa ǁkhāsiga da ǂhâ hâ ǁkhāǁkhāsabedīs ǃgao? ǁGuiǃā re.

¹² Tā da ge nî ǂâi ǀō-aisa ǁkhāsiga da ǂhâ hâ di ǁkhāǁkhāsabedīs ǃgao. Tae-i ǃaroma da tā di nî ǂâi? Faustina di ǀon hâ khoes aiǁgaus xa ǂâi re hîna Boliviab ǃnâ ra hâsa. ǁÎs ge ge khomai ǁoa i Jehovab di ǀHûǀguitimî-aon ǀkhas ge ǀhao o. Nēsis ge ǂkharirose a khomai ǁkhā. ǁÎs ge ge ǁāǁnâhe tsî nau khoena ǁkhāǁkhās xa a ǃgâibahe. ǁÎs ge koro khoena mâ wekheb hoaba Elobmîsa ra ǁkhāǁkhā. Faustinas ge noxoba ǃgâise a khomai ǁoa xawes ge ǃnani khoena ge hui în ǁāǁnâhe.—Luk. 10:21.

13. Kaise da ga ǀhawe xawe da mâ ǀkhaega nî hō ǁkhāǁkhāsabedī da ga o?

¹³ ǂGui Xristeǁîn ge ǂhâǂhâsa xūn hînan ra dīna ūhâ. Xawen ge nē Xristeǁîna ǁaeba ra ǁamaǂui khoena Elobmîsa ǁkhāǁkhāsa tsî kai ǂkhîba nēsa xu ra hō. Melanies aiǁgaus xa ǂâi re. ǁÎs ge ǁkhaisa kurixa ǀgôasa ǀguri gere kaikai Alaskab ǃnâ. ǁÎs ge ǀoasase gere  sîsen tsî ǁîs ǁgûs hîna ge kankersa ūhâ is tsîna gere kōǃgâ. Melanies ge ǀguri ge ǀHûǀguitimî-ao i ǁîs gere hâ ǃās ǃnâ. ǁÎs ge ǁkhoaǂgaosiba gere ǀgoreba îs ǃkhaib ǃnâ sī aoǁnâ, Elobmîsas nî ǁkhāǁkhā khoe-es gere ôa amaga. ǁÎs ge Saras ǀkha ge ǀhao hîna ge Elob ǀons a Jehova ǃkhaisa gere ǁkhāǁkhāsen ǂgaosa. ǁAeb ǀkhas ge Sarasa Elobmîs ǁkhāǁkhāsa ge ūǃoa. Melanies ge ra mî: “Fraitaxtsēdi ai ta ge kaise gere tsau xawe ta ge ti ǀgôas ǀkha gere ī ǁnā Elobmîs ǁkhāǁkhāsa sī dīsa. Saras dîdi ǃereamde ôaǃnâs xam ge ge ǃgâibahe i tsî kaise gere ǃgâiaǂgao ǁîs ge Jehovab ǀhō kai o.” Saras ge gere mâǃoahe tsî ǁîs kerkheba ǁnāxū tsî ge ǁāǁnâhe.

14. (a) ǁKhāǁkhāsabedīsa mati ǁauǃkhōs ǀkha a ǀgui? (b) Paulub mîdi hîna 2 Timoteub 4:1, 2 ǃnâ a xoasade mâ sîsenǂuiba sada ai ūhâ?

¹⁴ Khoe-i hîna da Elobmîsa nî ǁkhāǁkhā-e da ga nēsi hō tama i xawe da ge tā nî ǂkhabuǂâi. Jesub ge ǁkhāǁkhāsabedīsa ǁauǃkhōs ǀkha ge ǀgopeǀnō. ǁAuǃkhō-ao i ge ǂgui ǁaeba ǁauǃkhōs ǃnâ ra ūhâ ǁau-eb nî ǃkhōs aiǃâ. ǁNaen ai gu ge ǂgui ǁaeba ǁauǃkhōs ǃnâ ra ūhâ tsî ǀnî ǁae ǁgoaga tamas ka io ǃui karab kōse ra ǁauǃkhō. (Luk. 5:5) ǁKhā ǀgaub ǃnân ge ǀnî Xristeǁîna ǂgui ǁaeba aoǁnâ sîsenni ǃnâ ra ǁhao tsî ǃkharagagu ǁaegu ai ra ǁauǃkhō. Tae-i ǃaroma? În khoena  ǀhao-ū ǁkhā. ǃGâsan hîna nēsa ra dīn ge ǂgui ǁaena khoena ra ǀhao-ū hîna ǃgâiǂhôas ǃnâ ǃgâiǃgâibasensa ūhâna. Khoena du ǃnāsase ra hō ǁaen tsî ǃkhain ai du ǁaeba ǁamaǂui tsî aoǁnâ ǂgao tama hâ?—Khomai re 2 Timoteub 4:1, 2.

15. Khoe-e da ga Elobmîsa ǁkhāǁkhā o, o da tae-i ǃaroma ǃnūǃnâxasiba ǂhâ hâ?

¹⁵ Elobmîsa ǁkhāǁkhāsa tae-i ǃaroma ǃnūǃnâxasiba ǂhâ hâ? ǀGui ǃaromas ge khoena da ra hui ǂgao amaga în Elobmîs tsî Elobmîs amab tsîna ǀnamma omkhâiba. Elobmîs xoa-aoba ǀnamma omkhâibas ǀkhas tsîna da ge ra hui nî ǂgao. Tsî da khoe-e Jesub tae-e ǁî-e xu ra ǃâubasens xa nî ǁkhāǁkhās aiǃâ da ge ra hui i ǂgao î-i ǁkhāǁkhāsen mati i ama Xristeǁî-i ase nî tanisensa. Elobmîs ǃnân ra ǁkhāǁkhāsen xūnan ra ûiǂui hîna da ge ǃnūǃnâxasib ǀkha ra hui nî ǂgao. ǀNîn ge ǃhaese ǀkharaǀkharana a dī ǁkhā. ǀNîn ge gaxu ǁaeba ra ū.

16. Tae-e da Raúli di aiǁgausa xu ra ǁkhāǁkhāsen?

¹⁶ Sîsabeb hîna Perub ǃnâ ge hâ îb ge ǃnūǃnâxasib di ǀkhaega ge hōǃâ. “ǀGam Elobmîs ai ǃgaoǃgaosa ǂkhanira ta ge Raúl di ǀon hâ khoeba gere ǁkhāǁkhā,” tib ge sîsabeba ra mî. “Xaweb ge ǁîba noxoba ǂgui ǃgomsina ge ūhâ i. ǁÎb ge ǃgomsina ǃgameb ǃnâ ge ūhâ i tsî ǁgai gowaba gere sîsen-ū tsî ǃgôasiba ǁîb ǀgôan xa ge ǁgauhe tama hâ i. Xaweb ge ǀhaode ǃoa gere hā tsî ta ge nēs ǃaroma hoaǁae ǁîba ǃoa gere oa î ta ǁîb tsî ǁîb omaris tsîna hui. ǃNona kurin ǃkharu hâse ta ge ge ǀhao-ūbi tsîb ge ǁae-e ǃkharu hâse ge ǁāǁnâhe.”

17. Sao ra ǁkhāǁkhāǃâs ǃnâ da tae-e nî ǃhoaǃgao?

¹⁷ Jesub ge ge mîba da “ǃgûǂoa, î go hoa ǁaede ǁkhāǁkhāsabedī.” Nēsa dīǀoaǀoas ǃaroma da ge sada ǂâiǀgauga xu ra ǀkhara ǂâiǀgauga ūhâ khoen, ǃoaba i ǁani tama khoen tsî Elob ǃnâ ǂgom tama hâ khoen tsîn ǀkha nî ǃhoa. Sao ra ǁkhāǁkhāǃâs ǃnâ da ge mati da ǃkharagagu khaoǃhūga ūhâ khoen ǀkha nî ǃhoa ǀgausa nî ǃhoaǃgao.