ELOBMÎS GE ‘sada khami ī khoen’ tsâsiga ūhân ǂâidi xa ǀoa hâ. (Jak. 5:17) Paulub mîdi hîna Romeǁîn 7:21-24 ǃnâ hâ di ǀkha da ge a ǀguiǂâixa ǁkhā: “ǃGâiba ta ga dī ǂgao-o, ob ge ǂkhababa ra ǁgoeǀgara te . . . Ti tsūǀkhāxa khoeta!” Nē ǃnôa ǂâiǀgaugu ge ra huida sada di ǀoasa-oǃnâsib tsâsigu ǀkha da ga ǃkham o.

Paulub ge ǀnî hâ tsâsigu tsîn xa ge ǃhoa. Galateǁîn 2:20 ǃnâb ge Jesub xa ge mî “tita ge ǀnam hâ ib, tsî ǁî-aitsama tita ǃaroma ge māsenna.” Nēsa ‘sada’ tsâsigu khami i tsâsiga ra ǁgau? Nēs ge hoaǁae ǃgûǀhao tama hâ.

ǃKharu ge ǁaeb ǃnâ da ge dī ǁgai xūn xa da ga ǃgâi tamase tsâ o, o da ge Jehovab ǀnammi tsî ǀûbaǀnamxasib tsîna ūǃoas xa kaise nî ǃgombahe tsî xoremarib tsîna ǀkhaeb ase mû tide. Jesuba ǂhâba hâ i da xoremariba ǀkhaeb ase mû? Nēs ga ama o, o tae-e da a dī ǁkhā? Hā re î da nē ǀgam dîra ǃhoaǃgao.

Î, Jesub ge ǂhâba hâ i da ǁîb xoremariba ǀkhaeb ase mû. Mati da nēs ǃnâ ǂgomǃgâsiba a omkhâi ǁkhā? ǂÂi re Lukab 23:39-43 ǃnâ xoamâisa ǃnaeǃkhais xa. Jesub xōǀkhāb ge khoeba ǃgâuhaib ai mâ. ǁÎb ge ra ǂanǃgâ ǁoreb ge ǃkhaisa. ǁÎb ge ǀnîsi ǁgai ǁore-e ge dī ǃgâuheb nîsa ge ǃaroma-e. ǁÎb ge ǁîb ǁoreb xa ǂkhabuǂâi tsî Jesuba ǃoa ge mî: “ǂÂi te re, ǃKhūtse, sa gaosib ǃnâts ga sīo.”

Jesuba mati ge ǃeream? ǂÂi re ǁîb ge tsûb ǃnâb ge hâ i xawe ǁîb danasa ge dawa îb khoeba mûdi ǃnâ kō ǁkhā. Kai tsûb ǃnâb ge hâ i xaweb ge Jesuba ǀnom tsî khoeba ǃoa ge mî: “Amase, ta ra mîba tsi, nētsēts ge tita ǀkha paradais ǃnâ nîra hâ.” Aiǁgauseb ge Jesuba ge mî ǁkhā i ‘Khoen Ôab . . . ge ǁîb ûibab ǂguin di orehes ǃoa nî māse ge hā.’ (Mat. 20:28) Xawe du ra mû matib ge Jesuba khoexaǃnâsib ǀkha a ǃereamsa? ǁÎb ge tsaura dommi ǀkha ǃeream tsî sao ra mîde ge sîsen-ū “nētsēts ge” tsî “tita” di hâra. Tsîb ge ǁnā khoeba ǃoa ge mî sats ge paradais ǃhūbaib ai nî hâ di.

Jesub ge ǁnā khoeb ǁîb xoremarib ǀkhaeba nî ūbāsen ǃkhaisa ge ǂhâba hâ i. Jesub ge nēti nē ǁore-aob hîna Eloba ge ǃoaba tama hâ îb xa gere tsâ o, ob mati ǁāǁnâsa Xristeǁîn hîna Eloba ra ǃoaban xa ra tsâ? Tae-e nî huida Xristub ǀkhaeba ūǃoasa ǁore-ao da a xawe?

Paulub aoǁnâ sîsenni ge ǁîb mûǂuib Jesub xoremarib ǃoa-aib ge ūhâ îba ge dawa. Mâ ǀgaub ǃnâ? ǁÎb ge ra ǁguiǃā: “Tsî ta ra  gangan ǁîb tita ge ǀgaiǀgaib Xristub Jesub sada ǃKhūba, ǂgomǂgomsaseb ge tita ǃgôa, tsî ǃoabas ǃnâ ǂnûiǂgā te ǃkhaisa; tita aibe ǃkhāǃkhā-ao tsî ǃgôaǃgonao tsî ǁgâiǀā-ao ge i ta.” (1Tim. 1:12-14) Jesub ge mā bi sîsenni ge Pauluba Jesub ǀkhomxaǂgaosib, ǀnammi tsî ǁîb ǃnâb ūhâ ǃgâiǃgâibasens xa ge mûǂan kai. Jesub ge ǁkhā ǀgaub ǃnâ sada tsîna aoǁnâ sîsen-e ge mā. (Mat. 28:19, 20) Nēsa tsâǀkhā da ǁkhā?

Alberti hîna ge 34 kurigu ǂnûiǂuihes khaoǃgâ Jehovaba ǃoa a oaǀkhīb ge ra mî: “Ti ǁoren hîna ta ge dīna ta ge a ǀūru ǁoa. Xawe ta ga aoǁnâ sîsenni ǃnâ ǂoa o, o ta ge apostel Paulub khami ra tsâ, Jesub ge tita nē sîsena ge mā î ta dī. Nēs ge tita ra omkhâi tsî ǃgâise ra tsâ kai tsî ta ge hānîǁaeba ǃoa ra mûǂui.”—Psa. 51:3.

Allani hîna ǁgai ûiba amabab nî ǂans aiǃâ gere ûib ge ra ǂanǃgâ: “Khoen ǃoa-ai ta ge dī ǁgai xūn xa ta ge noxoba ra ǂâi. ǁAen ai ta ge kaise ǃgâi tamase ra tsâ. Xawe ta ge Jehovaba ra gangan ǁore-ao ta a hînab ǃgâiǂhôasa ta nau khoena nî aoǁnâbasa ra mā-am tesa. Khoen ǃgâiǂhôas ǃoa-ai ra tanisen ǀgauba ta ga mû o, o ta ge Jehovab ǃgâib tsî ǀnammi tsîna ra hōǃâ. Tita ge ǁîb tita ra sîsen-ūsa ra mû nau khoen hîna tita ge ǃkharu ǃnâ xūna ra ǃkharu ǃnâ na huis ǃaroma.”

Aoǁnâ sîsenni ǃnâ da ga ǂoa o, o da ge ǃgâi xū-e ra dī tsî ǃgâi ǂâide ūhâ. Nēs ge Jesub ǀkhomxaǂgaosib tsî ǀnammi tsîn ǃnâ ǂgomǃgâsiba ra omkhâi kai da.

ǁGâuab di ǃhūbaib hîkakahe tama hâs kōseb ge sada ǂgaoba ǁoren hîna da ge dīn ǃgao ǃgâi tamase nî tsâ kai da. Tae-e nî huida nē tsâsiga ǃkhamǃoas ǃnâ?

“Elob sada ǂgaob ǃgâ-ai kai” ǃkhais ge ra ǂkhî kai te tis ge Jeansa ra mî, hîna ǀgamǃnâgu ûikhas ge ūhâ î ǃkhais ǃaroma ǃgâi tamase gere tsâsa. (1Jhn. 3:19, 20) Sada tsîn ge Jehovab tsî Jesub tsîn ǁore-ao da a ǃkhaisa ra ǁnâuǃā amaga ǂkhîba nî ūhâ. ǂAnǃgâ re ǁîkha ge ǀnammi ǀkha xoremariba ǁore-aon ǃaroma a mā ǃkhaisa.—1Tim. 1:15.

Xoremarib mâ khoe-i hoa-i ǃaroma ge mā-esa da ge nî ǂgom. ǀGore hâse da ge xoremarib xa nî ǂâiǃgâ tsî nî ǂan nēs ge ǁore-aon ǃaroma a mā-e ǃkhaisa. Nēsa da ga dī o, o da ge Paulub khami nî mî: Jesub “tita ge ǀnam hâ ib, tsî ǁî-aitsama tita ǃaroma ge māsenna.”