1. Koloseǁîn 2:4, 8 ǃoagub ǁGâuaba sida ǂâiǀgauba mati ra ǂgaeǂhapu?

ǁGÂUAB ge ra ǂgao î da Jehovaba ǀnam ǀû. Nēsa dīǀoaǀoas ǃgaob ge sida ǂâiǀgauba ra dawa tsî ra dī î da ǁîba ǁnâuǀnam tsî ǁîb khami ǂâi tsoatsoa. ǁÎb ge ra ǂgaeǂhapu da î da ǁîba sao, sida a ǀnam xūna sîsen-ūs ǃnâ-ū.—Khomai re Koloseǁîn 2:4, 8.

2-3. (a) Tae-i ǃaroma da Koloseǁîn 2:8 tawa a xoasa ǃkhâikhoms ai nî ǃgaoǃgâ? (b) Tae-e da nē ǁkhāǁkhāǃâs ǃnâ nî ǃhoaǃgao?

² ǁGâuab xa ǂgaeǂhapuhes ǁkhōǁkhōsasib ǃnâ da amabes ǃnâ hâ? Îo, ǁnās ge a ama. Paulub ge Koloseǁîn 2:8 tawa a mā ǃkhâikhoms ge Jehovaba ǃoaba tama hâ khoen ǃgao xoasa tama hâ. ǁÎb ge Xristeǁîn hîna ǃanu gagab ǀkha a ǂkhauhesana ǃoa ge xoa. (Kol. 1:2, 5) ǁNā Xristeǁîn ge ǁkhōǁkhōsa mâsib ǃnâ ge hâ i tsî sida tsîn ge kai ǁkhōǁkhōsasib ǃnâ hâ. (1Kor. 10:12) Tae-i ǃaroma? ǁGâuab ge ǃhūbaiba ǃoa ge aoǁnâ-e tsî ǃgarise ra dītsâ Elob ǂgomǂgomsa ǃoaba-aona ǂgaeǂhapusa. (J.ǂHa. 12:9, 12, 17) Tsî ǁnās ǂam-ai da ge ǂkhabaxa khoen tsî ǂgaeǂhapu-aon “ǃaruǀîǀgui nî tsū” ǃhūbaib ǃnâ ǁan hâ.—2Tim. 3:1, 13.

³ Nē ǁkhāǁkhāǃâs ǃnâ da ge nî ǃhoaǃgao, ǁGâuab mati ‘ǁau ǂgaeǂhapusa’ ra sîsen-ūsa sida ǂâiǀgauba ǂgaeǂhapus ǃnâ. ǃNona ǀgaugu ǁîb digu, “ǂkhabadīb” tsî ‘gāxaǃnâsib’ digu tsîna da ge nî mû. (Efe. 6:11) Tsî sao ra ǁkhāǁkhāǃâs ǃnâ da ge nî mû, mati  da ǁGâuab ǀgaugu hîna sida ǂâiǀgauba ra tsâǀkhāga nî mâǃoa ǀgausa. ǂGurose, da ge nî mû tae-e da a ǁkhāǁkhāsen ǁkhāsa, ǁGâuab ge Israelǁîna mîmâisa ǃhūb ǃnân ge ǂgâs khaoǃgâ a ǂgaeǂhapu ǀgausa xu.

4-6. Deuteronomium 11:10-15 ǃoagun ge Israelǁîna mâ ǀkharaǀkharana ǂgārib ǃnâ dī mîmâisa ǃhūb ǃnân ge ǂgâ o?

⁴ ǁGâuab ge gā-ai ǀgaub ǃnâ Israelǁîna ge ǂgaeǂhapu ǁgôatsuiǁgoaǃoabas ǃnâ-ū. Nēsab ge mati dī? ǁÎb ge ge ǂan i ǁîn ǂû-e ǂhâ hâsa tsî nēsa ge sîsen-ū. Israelǁîn ge mîmâisa ǃhūb ǃnâ a ǂgâ o, on ge ǀasa ǀgaub ǂûna ǃhanas diba ge ǁkhāǁkhāsen. Egipteb ǃnân hâ hînan ge Israelǁîna Nylǃāb di ǁgammi ǀkha gere ǃhana. Xawe ǂgārib ge mîmâisa ǃhūb ǃnâ ǃāba xu ra hā ǁgammi ǀkha ge dī-e tama hâ i xawe ǀnanus ǁgammi ǀkha gere dī-e. (Khomai re Deuteronomium 11:10-15; Jes. 18:4, 5) ǁNās ǃaroman ge Israelǁîna ǀasa ǀgaub ǃhanas diba ge ǁkhāǁkhāsen. Nēs ge ge supu tama hâ i, ǁnān hîna ge ǃhanas ǃnâ ǂansa ūhâ în ge ǃgaroǃhūb ǃnâ a ǁō amaga.

⁵ Jehovab ge khoena ge ǁguiǃāba ǁîn mâsib ge dawasa. Tsîb ge sao ra ǃkhâikhomsa ge mā, nēs ge ǂguro ǂgārib ǀkha i ǃgûǀhao tama hâ khami gere ǁnâuǃāhe: “ǂAnbasen îb sadu di ǂgaoba tā ǂgaeǂhapuhe, î du tā ǂgō, î du ǀkhara eloga tā ǃoaba, î du ǁîgu aiǃâ tā ǃhon.” (Deu. 11:16, 17) Jehovaba tae-i ǃaroma ǁgôatsuiǁgoaǃoabasa ge ǃkhâikhom, ǀasa ǀgaub ǃhanas dib xab ra ǃhoa hîna?

 ⁶ Jehovab ge ge ǂan i, Israelǁîn nî ǃâitsâhe ǃkhaisa ǀasa ǀgaub ǂgārib diba ǁîn ǂnāmipe ge hâ i khoena xu ǁkhāǁkhāsensa. ǁÎn ǂnāmipe ge hâ i khoen ge ǂansa ǂgārib xa ge ūhâ i tsîn ge Elob khoena ǁîna xu ǂhâǂhâsa xūna ge ǁkhāǁkhāsen xawe i ge ǁkhōǁkhōsasiba ge hâ i. Kanaanǁî ǂgāri-aon ǂâiǀgaub ge ǁîn ǂgoms Baali ǃnân ge ūhâ is xa gere tsâǀkhāhe. ǁÎn ge Baali a ǀhommi ǀhōnkhoe tsî ǀnanus mā-ao di gere ǂgom. Jehovab ge ǁîb ǃoaba-aon nē ǂâiǀgaub xa nî ǂgaeǂhapuhesa ge ǂgao tama hâ i. Xawen ge Israelǁîna Baala noxoba gere ǃoaba. (Num. 25:3, 5; ǂHǂh. 2:13; 1Gao. 18:18) Kō re ǁGâuab ge mati Israelǁîna a ǂgaeǂhapu ǀgausa.

7. Israelǁîn ǂgomsa mati ge ǃâitsâhe mîmâisa ǃhūb ǃnân ge ǂgâ o?

⁷ ǂGuro ǀgaub hînab ge ǁGâuaba a sîsen-ūb ge tsēkorobe ǂhâsiga, ǁîna mûsa ǁîn ǃhanagu ǀnanu ǁgammi xa ra ǂnâ-esa. Mîmâisa ǃhūb ǃnâ i ge ǀoro ǁgam-e ge hâ i Aprili ǁaeguba xu Septemberi kōse mâ kurib hoaba. Israelǁîn ǃhanaga ǁîna ǂû-e mās ǃaroman ge ǀnanuba ge ǂhâ hâ i. ǁGâuab ge Israelǁîna ge ǂgaeǂhapu ǁîna ǂgom kais ǃnâ ǁîn nē ǁanǂgāsaben di ǂgom ǀgauga nî ūǃoasa xūn hoana ǃgâise ǃgûǁnâs ǃaroma. ǁNā ǁanǂgāsaben ge gere ǂgom, ǀnî ǁaxasigu ge ge ǂhâbasa i ǁîn eloga ǀnanuba mā nîs ǃaroma. ǁNān hîna ge Jehovab ǃnâ gere ǂgom an ge gere mî nēs ge a ǂhâbasa gaxu ǃâtsūǀkhāba xu ǂgōsens ǃaroma, ǁnās ǀkhan ge ǁaxasiga Baali ǃgao gere ūhâ.

8. ǀNî hâ ǀgaub ǁGâuab ra sîsen-ūba a tae? ǁGuiǃā re.

⁸ ǁGâuab ge ǀgamǁî ǃâitsâba Israelǁaes ǃoa-ai ge sîsen-ū. Sorosi ǂhâsigu ǁîn di gab ge ge sîsen-ū. Nau eloga gere ǃoaba ǃhaodi ge ǁgai ǁgoe-ūgu ǀgauga ge ūhâ i. Nēs ge tarekhoedi tsî aorekhoegu tsîna ǁgoe-ūgusa ge ǃkhōǂgā hâ i tempelgu ǃnâ. Aorekhoegu tsî tarekhoedi tsîna ǁgoe-ūgus tsî ǀnî ǁgai xūna dīs ge aiǃgûs ǀguisa ge dī tama hâ i xawe ge hoaǃnâ-aixa. (Deu. 23:17, 18; 1Gao. 14:24) Nē khoen ge gere ǂâi nē ǁgai xūn ǁîn ra dīn ǃaromagu ǁîn eloga ǃhūba ǀnanuba nî mā di. ǂGui Israelǁîn ge nē ǁgai ǁgoe-ūgu ǀgaugu xa ge ǃgâibahe i tsî nēs ǃaroma nē eloga ge ǃoaba tsoatsoa. Amabes ǃnân ge ǁGâuab xa ǃkhōsis ǃnâ ge ūhe hâ i.

9. Hoseab 2:16, 17 ǃoagub ge ǁGâuaba mati Israelǁîna Jehovab a ham ǃkhaisa ǀuru kai?

⁹ ǁGâuab ge ǃnonaǁî ǀgauba ge sîsen-ū. ǁÎb ge Israelǁîna Jehovab ǃoa-ai ge ǂgī kai. Kēbo-aob Jeremiab tsēdi ǃnâb ge Jehovaba ge ǂanǂan ǂhumi kēbo-aogu ge ǁîb khoena ‘Baali’ xa ǃaroma-e hâse ǁÎb ǀonsa nî ǀuru kai. (Jer. 23:27) Elob ǃoaba-aon ge ǁîb ǀonsa ge sîsen-ū ǀû tsî nēsa Baali dis ǀkha ge ǃkhōǃkhuni, nē ǀons ge “ǀhōnkhoeb” tamas ka io “ǂamkhoeb” di ra ǂâibasen. Nēs ge Israelǁîna ge ǃgomba i Jehovab tsî Baali tsîn ǁaegu ǃkharagagusiba mûsa tsî nēs ǀkha Jehovab tsî Baali tsîn ǃoabasa gere ǀguiǀgui.—Khomai re Hoseab 2:16, 17.

10. Tae ǃnoa ǃâitsanab ǁGâuaba nētsē ra sîsen-ū?

¹⁰ ǁGâuab ge nētsēs tsîna khoena ǁkhā ǀgaub ǃnâ ra ǂgaeǂhapu. ǁÎb ge khoena  ǁgoe-ūgus turagu tsî Jehovab xa ǁîna ǀuru kais ǃnâ-ū ra ǂgaeǂhapu. Hā re î da ǁnā ǀuniga ǀgaub xa ǂgurose ǃhoa.

11. ǁGâuaba mâ ǀgaub ǃnâ khoena Jehovaba ra ǀuru kai?

¹¹ ǁGâuab ge khoena Jehovab xa ra ǀuru kai. Jesub apostelgu ǁōb khaoǃgân ge ǀnîn hîna ge Xristeǁîn a di gere mîna ǂhumiba ge ǁkhāǁkhā tsoatsoa. (ǃNǃkh. 20:29, 30; 2Tes. 2:3) Nē mâǃoa-aon ge ama-ai Eloba ge ǀuru. Aiǁgause, ǁîn ge Elob ǀonsa Elobmîs ǃnâ ge sîsen-ū ǀû tsî nēsa “ǃKhūb” tsî ǀnî hâ ǂgai ǀondi tsîn ǀkha ge ǃkhōǃkhuni. Elob ǀonsan ge ūǂui tsî nēsa “ǃKhūb” ǀkha a ǃkhōǃkhuni o, o i ge ge ǃgom mûsa Jehovab mati nau Eloga xu ra ǀkharasa. (1Kor. 8:5) ǁÎn ge Jehovab tsî Jesub tsîna “ǃkhūb” di gere ǂgai, nēs ge ge ǃgom kai Jehovab tsî ǁîb ǀgôab ǁaegu hâ ǃkharagagusiba ǁnâuǃāsa. (Jhn. 17:3) Nēs ge ge ǃaroma î-i ǃnonaǀgui ra Eloba hâ, nēs ge Elobmîs ǁkhāǁkhādi ǃâ tama hâ. Nēs xa ǃaroma-e hâsen ge ǂgui khoena ra ǂgom Eloban ge a ǂan ǁoa di. Nēb ge a ǂhumi.—ǃNǃkh. 17:27.

12. Ama tama ǂgomde tae-e ra aiǃgû kai tsî mâ ǀamǂoas ǀkha, Romeǁîn 1:28-31 ǃoagu?

¹² ǁGâuab ǁgâiǀāb ǁgansi turagu ǃoa-ai. ǃKharu ge ǁaeb Israelǁîn tsēdi ǃnâb ge ǁGâuaba ama tama ǂgomde gere sîsen-ū ǁgansi turaga aiǃgû kais ǃaroma. Nētsēs tsîna i ge ama tama ǂgomde ǂhanu tama ǁgoe-ūgusa ra mā-am tsî nēs tsîna ra aiǃgû kai. ǂGuin hîna Eloban ge ra ǃoaba di ra mîn ge ǁÎb ǁgaraga sao tama hâ. Apostel Paulub ge nēs di ǀamǂoasa Romeǁîna ǃoab ge xoa sîǂkhanis ǃnâ ge ǁguiǃā. (Khomai re Romeǁîn 1:28-31.) “Anu tama hâ” xūn ǁaegu i ge ǂgui ǀgaugu ǁgoe-ūgus diga hâ, nēs ge aorese ǁgoe-ūgus tsî tarese ǁgoe-ūgus tsîna ǃkhōǂgā hâ. (Rom. 1:24-27, 32; J.ǂHa. 2:20) Kaise i ge a ǂhâǂhâsa Elobmîs ǁkhāǁkhāde da nî ǁnâuǀnamsa.

13. ǀNî hâ ǀgaub ǁGâuab da sîsen-ūba a mâ?

¹³ ǁGâuab ǁgâiǀāb hoaǃnâ-aixa turagu ǃoa-ai. Hoada ge ǂansa ra ūhâ ǂgao hîna a huida ǁkhāsa sida omaride kōǃgâs ǃnâ. (1Tim. 5:8) Nē ǂansa da ge skoli tawa a hōǁkhā tsî ǃgâise  da ga skoli tawa ǁkhāǁkhāsen o. Xawe da ge nî ǂanbasen. ǂGui ǃhūgu ǃnâ i ge hoaǃnâ-aixa xūn ǀguina ǁkhāǁkhā-e tama hâ xawe ǃhūbaib khoen gā-aisib xas tsîna ra ǁkhāǁkhā-e. Skolgu ge ǀgôana Elob a ǀkhai ǃkhaisa ra ǂgom kai tsî ra ǁkhāǁkhā în tā Elobmîsa ǃgôaǃgâ. ǀGôan ge ra ǁkhāǁkhā-e hoa gā-ai khoen ra ǂgomsa xūn ge aitsamaba xu a hāsa. (Rom. 1:21-23) Nē ǁkhāǁkhā-ain ge ‘Elob gā-aisiba’ ra mâǃoa.—1Kor. 1:19-21; 3:18-20.

14. ǃHūbaib khoen gā-aisiba tae-e ra omkhâi?

¹⁴ Khoen ǂansa ūhâ gā-ai khoen ge Jehovab di ǂhanu-ai gā-aisiba ra mâǃoa. ǁÎn ge Elob ǃanu gagab ǂûga sao tama hâ xawe “ǁgans di sîsenga” ra sao. (Gal. 5:19-23) Nēs ge ǁîǂâixa tsî ǁîǃgôasenxasiba ra ǃaroma, nēs ǀamǂoas ge “khoen nîra ǁîǀnamsenxa.” (2Tim. 3:2-4) Nē ǀgaugu ge Elob khoen ǃgamǃgamsenxa gagab hînan ra ǂkhâǃnâ-e ūhâsaba ra mâǃoa. (2Sam. 22:28) ǀNî Xristeǁîn hîna ge ǀgapi ǁkhāǁkhāsa a ôan ge ǃhūbaib khoen ǂâiǀgauba ge omkhâi, Elob dib ose. Hā re i da kō tae-i a īǁkhāsa nēsa da ga ǃgaoǃgâ tama io.

15-16. Tae-e da ǀnî ǃgâsas aiǁgausa xu ra ǁkhāǁkhāsen?

¹⁵ ǃGâsas hîna ge 15 kuriga ǀoasase gere ǃoabas ge ra mî: “ǁĀǁnâsa Xristeǁî-i ase ta ge ǁkhōǁkhōsasib ǀgapi ǁkhāǁkhāsensa ôas dib xa ge khomai tsî ǁnâu xawe ta ge nēsa ge ǃgaoǃgâ tama hâ i. Tita ǃgao i ge nēsa hâ tama hâ di ta ge ge ǂâi hâ i.” Tae-i ǃgomsinas  gere hōǃâ? ǁÎs ge ra mî: “Tita gere ǁkhāǁkhāsen xūn ge ti ǁaeb tsî ǁkhāsib hoaba gere ū tsî ta ge nēs ǀkha Jehovaba ǃoa ge ǀgore tama hâ i tsî kaise ge tsau hâ i nau khoen ǀkha Elobmîs xa ǃhoa tsî ǀhaodi ǃgao ǂōrisase aiǂhomisens tsîna. Xawe ta ge mûǂan o ǀgapi ǁkhāǁkhāsensa ôas ge ti ǀhōsagusisa Jehovab ǀkha ra khôa di, o ta ge nēs xa xū-e nî dīs ge ge i. Tsî ta ge xū-e ge dī.”

¹⁶ ǀGapi ǁkhāǁkhāsensa mâ sîsenǂuiba nē ǃgâsas ǂâiǀgaub ai ge ūhâ i? ǁÎs ge ra mî: “ǁKhāǁkhāsens hîna ta ge ôas ge ge dī, î ta nau khoena ǀgoraǃgâ ǃgōsase ti ǃgâsana xu ǃnāsa-e ǃâubasen tsî ǁîna xu ǂgae-oasen. Kaise gaxu ǁaeba i ge ge ū nē ǂâiǀgauba xu ǂgōsensa. Nēs ge ǁkhōǁkhōsasiba ge ǁgau te sida ǀhomsi ǁGûb ǀapeǂhumisa xu ra hā ǃkhâikhomde sao tama īs diba. Jehovab ge tita ǃamkuse ge ǂan i. ǁÎba ta ge ga ǃgâ hâ.”

17. (a) Tae-e da nî mîǁgui dīsa? (b) Tae-e da sao ra ǁkhāǁkhāǃâs ǃnâ nî ǃhoaǃgao?

¹⁷ ǁGūtsâ da ge nî ǁGâuab ǃhūbaib di “khoesi gā-aisib tsî ǁau ǂgaeǂhapus” xa tā ǂgaeǂhapuhesa. Tā ǁGâuab xa ǂgaeǂhapuhesa mā-am re. (1Kor. 3:18; 2Kor. 2:11) Tā ǁGâuaba mā-am re Jehovab xa ǀuru kai du sa. Jehovab ǀgapi Elobmîs daoǁgaudi ǃoagu da ge nî ûi. Tsî da ge tā nî mā-am îb ǁGâuaba Jehovab ǀapemāde xu ǂgōsen kai da. Xawe da ga ǀnai ǃhūbaib ǂâiǀgauba omkhâi os? Sao ra ǁkhāǁkhāǃâs ge nî ǁgau matis Elobmîsa nî huida sa ‘ǀgaisase’ ǃhanasa ǂâiǀgaugu tsî dīxūn tsîna xu ǂgōsensa.—2Kor. 10:4, 5.