HOADA ge khoen xa ǃgâi khoen ase ra mûhe ǂgao. Xawe nē tsēdi ǃnâ i ge a ǃgom ǃgâisiba ǁgausa. ǂGui khoen ge “ǃgâina ǃoa ǀnamoǃnâ.” (2Tim. 3:3) ǁÎn ge Jehovab ǁgaraga sao tama hâ tsî “ǂkhababa ǃgâi ti ra mî tsî ǃgâiba ǂkhaba ti.” (Jes. 5:20) Tsî ǃgâisiba ǁgaus ge sida khaoǃhūgu tsî ǀoasa kurusa da ūhâ tama hâ ǃkhais tsîn xa a ǃgom kaihe ǁkhā. ǁNās ǀkha da ge Annes khami a tsâ ǁkhā, * ǁîs ge Jehovabas ge ǂgui kuriga a ǃoaba xawe ra mî “tita ge ǃgomsiba ge ūhâ i ǃgâi khoe-i ase mûhesa.”

Xawe hoada ge ǃgâixasiba a omkhâi ǁkhā. ǃGâixasib ge Elob ǃanu gagaba xu ra hā tsî nē ǃanu gagab ge hōǃâ da ra ǃgomsin ǃgâ-ai a kai. Hā re î da ǃgâixasib xa ǃgāsase ǃhoa tsî mû nē ǀgauba da mati a ǁgau ǁkhāsa.

ǃGâixasib ge ǁgai xū-i di ǂnao-e ūhâ tama isa ǃoa ra ǁnaeǁgau. ǃGâixasib ge nau khoen ai i ūhâ ǃgâi sîsenǂuiba xu ra mû-e. Tsî ǃgâi khoe-i ge nau khoena hoaǁae ra ǃgâidī.

ǀNîsi du ge ra mû khoen hîna ǁîn ǀhōsan tsî omaridi ǁanin tsîna ǃgâi xūna ra dībana, xawe ǃgâixasiba ǁnāpa ra toa? Hoada ge nē ǀgaub ǃgâixasib diba ǁgausa dīhō tama hâ, “khoe-i xare-i . . . ǃhūbaib ai a ǀkhai, ǃgâidīs ǀguisa hî tsî ǁore tama-e” amaga. (Aoǁn. 7:20) Apostel Paulub ge ge mî: “ǂAn ta a xui-ao, tita ǃnâ, ǁnās ge ti ǁgans ǃnâ i ge ǃgâi-i xare-e ǁan tama ǃkhaisa.” (Rom. 7:18) ǁNā-amaga î ge a ǂhâǂhâsa ǃgâixasib di mā-aoba ǃoa kōsa nē ǀgauba da ga ôa o.

Jehovab ge ǃgâixasib di ǁgaraga ra mā. Elobmîs ge Jehovab xa ra mî: “Sats ge a ǃgâi tsîts ra ǃgâidī; ǁkhāǁkhā te re sa ǂnûiǂgāde.” (Psa. 119:68) Hā re î da ǀgam ǀgaukha Jehovab ǃgâisib dikha ǃhoaǃgao hîna nē ǁaraǃās ǃnâ a māsa kha.

Jehovab ge a ǃgâi. Jehovab ge a ǃgâi tsî ǁnās ǀkha ǃgâi xūn ǀguina ra dī. ǂÂihō re tae-i ge īsa Jehovab ge Moseba a mîba o: ‘Tita ge ti ǃgâixasib hoaba sa ais aiǃâ ra ǃgû-ī kai.’ Jehovab ǂkhaisib ge ǃgû īs khaoǃgâb ge Moseba domma ge ǁnâu mî rase: “ǃKhūtse, ǃKhūtse Elots ǀkhomxaǂgaoxa tsî ǀkhomxaǃnâts, ǃnūǃnâxa tsî ǃgâidīb tsî amab tsîkha ǃnâ a kaits. ǃGâidība ra sâuts, ǂgui ǀoadisi ǃhaodi kōse, ǂhanuoǃnâsib tsî ǃûǂams tsî ǁoreb tsîna ra ǀûbats; ǀhapixa-e ǀhapiose ūhâ tamats, ǁgûgu di ǂhanuoǃnâsiga ra ôaǃnâts, ǃnonaǁî tsî hakaǁî ǃhaos kōse.” (Eks. 33:19; 34:6, 7) ǁNās ǀkha da ge a ǁnâuǃā ǁkhā Jehovab ge mâ ǀgaub hoab ǃnâ a ǃgâi. Jesub ge hoa khoen ǃoagu ǃgâixasiba gere ǁgau xaweb ge noxoba ge mî: “Khoe-i xare-i kom ǃgâi tamao, Elob ǀguib.”—Lukab 18:19.

Jehovab ge ra ǃgâidī. Jehovab ra dī xūn hoan ge a ǃgâi. “ǃKhūb ge hoana a ǃgâiba; tsî ǀkhomxaǂgaosigu âb ge ǁîb di sîsengu hoagu  ǂama hâ.” (Psa. 145:9) Jehovab a ǃgâi amagab ge khoesib hoaba ûib tsî ǂhân hâ xūn tsîna ra mā în ûi ǁkhā. (ǃNǃkh. 14:17) ǃGâixasibab ūhâ ǃkhaisab ge ra ǁgau khoena ǀûbas ǃnâ-ū. Psalmdi xoa-aob ge ge xoa: “Sats ǃKhūts ge a ǃgâi tsî a ǀûbaǀnam.” (Psa. 86:5) ǂAnǃgâ da ge nî Jehovab “ge ǃgâi-i xare-e ūdawa tide ǁnān, ǂhauǃnâse ra tanisenna xu.”—Psa. 84:11.

Jehovab īsib ǃnâ da ge a kurusa ǁnās ǀkha da ge sida tsîna ǁkhāsiba ūhâ ǃgâi xūna dīsa. (Gen. 1:27) Elobmîs ge ǁîb ǃoaba-aona ra ǂkhâǃnâ în “ǃgâidīsa ǁkhāǁkhāsen.” (Jes. 1:17) Xawe mati da nē ǀgauba a omkhâi ǁkhā? ǃNona ǀgaugu nēsa da a dī ǁkhāgu xa ǂâi re.

ǂGurose, ǃanu gagaba ǀgoreba re, nēs ge Xristeǁîna nî hui în ǃgâixasiba ūhâ. (Gal. 5:22) Elob gagab ge nî hui da ǃgâi xūna ǀnam tsî ǁgaina ǃhuisa. (Rom. 12:9) Elobmîs ge ra mî Jehovab ge nî ‘ǀgaiǀgai da hoa ǃgâi mîs tsî dīb tsîra ǃnâ.’—2Tes. 2:16, 17.

ǀGamǁîse da ge Elobmîsa nî khomai. Nēsa da ga dī o, ob ge Jehovaba ‘mâ ǃgâi tanisen-i hoa-i’ ǃnâ nîra ǁkhāǁkhā da tsî “mâ ǃgâi sîsenni hoab” ǃgao ra aiǂhomi da. (ǂKhm. 2:9; 2Tim. 3:17) Elobmîsa da ga khomai tsî ǂâiǃgâ o, o da ge sida ǂgaoga ǃgâi xūn ǀkha ra ǀoa kai, Elob tsî ǁîb Gaosib tsîn xa hâna. Elobmîsa da ga khomai o, o da ge sida ǂgaogu ǃnâ ǃgâi xūna ra ǂkhā, ega da a ǂâiǃgâ ǁkhāna.—Luk. 6:45; Efe. 5:9.

ǃNonaǁîse, sida ǁkhāsib ǃnâ hân hoana da ge ra dītsâ ‘ǃgâiba ǁgaes’ ǃnâ-ū. (3Jhn. 11) ǁGae ǁkhā da a aiǁgaude da ge Elobmîs ǃnâ ra hō. ǂHâǂhâsa aiǁgaudi ge Jehovab tsî Jesub tsîn dide. Xawe da ge ǀnî hâ khoen aiǁgaude ǃoas tsîna a kō ǁkhā hîna ge ǁîn ǃgâixasib ǃgao ǂansa ina. ǀGam khoera hîna da a ǂâi ǁkhā ra ge Tabitas tsî Barnabab tsîna. (ǃNǃkh. 9:36; 11:22-24) ǁÎra aiǁgausa xu da ge a ǀama ǁkhā, Elobmîs ǁîra xa xoa hâ xūna khomais ǃnâ-ū, nēs ge ǁîra ge nau khoena gere hui ǀgaub tsîna ǃkhōǂgā hâ. Aiǁgaun xa ǂâi re mati du sado ǂgurose sadu omaridi tamas ka io ǀhaohâb khoena a hui ǁkhā ǀgaus xa. Tsî tā ǀuru re nē ǀgam khoera ge mati nē ǀgauba xu gere ǀamasa. Sadu tsîn ge ǁkhā ǀgauba xu a ǀama ǁkhā.

Nē ǁaeb khoen hîna ra ǃgâidīn aiǁgaude xūs tsîna da ge a ǀama ǁkhā. Aiǁgause ǀgaisase ra sîsen ǀhaohâb ǃûi-aogu xas tsîna ǂâi re hîna ‘ǃgâina ǀnamga.’ ǀUruhe tama hâ di  ge ǂgomǂgomsa ǃgâsadi hîna sîsenni tsî aiǁgaus tsîn ǃnâ “ǃgâi ǁkhāǁkhā-aose ī” de. (Titub 1:8; 2:3) Roslyn di ǀon hâ ǃgâsas ge ra mî: “Ti ǀhōsas ge ǁîs daoba xu ǂoa tsî nau khoena ǀhaohâb ǃnâ hui tsî ra ǂkhâǃnâ. ǁÎs ge ǁîn ǃgomsin xa ǂâi tsî ǁaen ai ǀkhae xūrona ra mā nî hui rana. ǁîsa ta ge kaise ǃgâi khoe-i ase ra mû.”

Jehovab ge ǁîb khoena ra ǂkhâǃnâ în “ǃgâina” ôa. (Amo. 5:14) Nēs ge nî hui î da Jehovab ǁgaraga ǀnam tsî ǃgâina dī.

ǂÂis ǃnâ da ge nî ūhâ, ǃgâina dīs ge nau khoena ǂkhî kais tamas ka io ǂgui mari-e ra ǂgan xūna mās di ǂâibasen tama hâ. ǂKhōs: Ai-īsiga ra xoa khoe-i xa du ra ǂâi, hîna ǀgui tamas ka io ǀgam xoa-ū haikha ra sîsen-ū-e? Xoa-ao i ge ǀgui tamas ka io ǀgam haikha ǀkha ǀgui a xoa ǁoa xawe ǂgui haiga a sîsen-ū ǁkhā. ǁNās ǁkhās khami i ge xūna da ga khoena dība o, o ra mû-e ǃgâi khoe da a ǃkhaisa.

Elobmîs ge ra ǂkhâǃnâ da î da “aiǂhomisen” ǃgâi xūna dīs ǃgao. (2Tim. 2:21; Tit. 3:1) Nau khoen di ǃgomsina ǃgaoǃgâs ǃnâ-ū da ge ǁîn ra hōǃâ ǃgomsina nî mû tsî ǁîna ‘ǃgâib ǃoa nî ǂnubikhâi.’ (Rom. 15:2) Nēs ge ū da hâ xūna ǀgoragus tsîna ǃkhōǂgā hâ. (ǂKhm. 3:27) Khoe-e da ge ǂûǀhaos tamas ka io ǂkhâǃnâgus ǃgao a ǁkhau ǁkhā. ǀNîsi i ga khoe-e ǀaesen o, o da ge ǁî-e sari tsî ǂû-e sī a mā ǁkhā tamas ka io ǁî-e a ǁkhammi ǁkhā. Nēs ge nî hui da î da “ǃgâi mî-i ǂnubikhâigusa ǃoa ǂhâbasa-e ǂoa kai, ǁnâu ran nî ǀkhomma hōse.”—Efe. 4:29.

Jehovab khami da ge sida tsîna khoen ǃoa-ai ǃgâi xūna ra dī ǂgao. ǁNās ǀkha da ge ǀgorasa ūhâ tama hâ. ǀGui ǀgaub ǀgorasa da ǁgau tama hâb ge ǃgâiǂhôas Gaosib disa aoǁnâs ǃnâ-ū. Jesub ge mîmā khami da ge ǁnān hîna ǃhui da hân ǃoagus tsîna ǃgâina ra dī. (Luk. 6:27) Tsū tama i ge hâ khoexaǃnâsiba ǁgau tsî ǃgâi xūna nau khoena dībasa, “nēti īn ǃoagub ge ǂhanuba hâ tama hâ” amaga. (Gal. 5:22, 23) Khoen ǃgâi tama ǀgaub ǃnâ ra hâ-ū da xawe da ga ǃgâi ǀgaub ǃnâ hâ-ū nî o, o da ge khoena Elob amaba ǃoa nî ǂgae în ǁîba ǂkhaisiba mā.—1Pet. 3:16, 17.

“ǁNāǁgôasa ǂgaoba ūhâb ge daogu âb xa nîra ǁâ, xawe ǃgâi khoeba ǁîb dīb ǂhanib xa.” (ǂKhm. 14:14) Tae-e da a ǀama ǁkhā? Khoena da ga khoexaǃnâsiba ǁgau o, on ge ǁîna ǃgâi ǀgaub ǃnâ nî hâ-ū da. (ǂKhm. 14:22) Khoen ga ǃgâise hâ-ū da tama i xawes tsîna da ge ǁîna ǃgâi xūna nî dība, nēs ge ǁîn tanisen ǀgaub tsîna a ǀkharaǀkhara ǁkhā.—Rom. 12:20.

ǂGui ǃgâsan ge ra mî ǃgâi xūna dī tsî tsū xūna xu ǂgōsensa xun ge ge ǀama di. Nancy di ǀon hâ ǃgâsas aiǁgaus xa ǂâi re. “Kai khâi ta gere o, o ta ge kaise ǁgai ûiba ge ūhâ i tsî ǃgôasib tsîna ge ǁgau tama hâ i” dis ge ra mî. “Xawe da ge Elob ǁgaragu tae-i ǂhanus tsî tae-i ǂhanu tamas tsîn diga sîsen-ū tsoatsoa o, o ta ge gere ǃgâiaǂgao. Nēsi ta ge ǃgôasiba ra ǁgau.”

ǂHâǂhâsa ǃaromas ǃgâisiba da nî omkhâibas ge, Jehovaba i ra ǂkhî kai amaga. ǂGui khoen ga dī da ra xūna mû tama i xaweb ge Jehovaba ra mû. ǁÎb ge ǃgâi xūna da ra dī ǁaeb hoaba a ǂan tsî ǃgâi ǂâide ūhâ. (Efe. 6:7, 8) Matib ra ǀkhae da? “ǃGâib ge ǃKhūba xu ǃgâiǂâisa nîra hō.” (ǂKhm. 12:2) ǁNā-amaga da ge ǃgâisiba nî omkhâi. Jehovab ge ra mîmâi “ǂkhaisib tsî ǃgôasib tsî ǂkhîb tsîn ge ǃgâi-e ra dī-i hoa-i ǂama nîra hā.”—Rom. 2:10.