1. Petruba mati ge tsâ buruxa ǀgaub ǃnâb ge ǁauna ǃkhō o?

 PETRUB ge hoa ǃoesa ǁau-e ge ǃkhō tama hâ i. Buruburuxaseb ge Jesuba ǁîb ǃoa ge mî: ‘ǂGausa ais ǀkha ǁgammi a ǃgam ǀkhāba ǃoa ǁgôa kai î sago ǀûide aoǂgā.’ (Luk. 5:4) Petrub ge gere îganǀgē ǁauna gu a ǃkhō ǁkhā ǃkhaisa, xaweb ge mîbahe gu ge khami ge dī. Tsî gu ge kaise ǂgui ǁauna ge ǃkhō, ǀûidi ge doa ǁkhās kōse. Buruxa dī-e gu ge mû, o gu ge Petrub tsî ǁîb ǀkha gere sîsen gu tsîna kaise ge “burugâ.” Petrub ge ge mî: “Bēxute ǃKhūtse! ǁOre-aota a xuige!” (Luk. 5:6-9) Petrub ge Jesub ǁîb ǂnamibe nî hâsab anu tama khama gere tsâ.

2. Tae-i ǃaroma i a ǃgâi Petrub di aiǁgausa ǃgaoǃgâsa?

² Petrub ge ge ǂhanu i, ǁîb ge ge “ǁore-ao” i. Xoadi ge ra ǁgau ǁîb ge ǀnî ǁaegu ai ega nî ǃkhausen kaibi xūna mî tsî gere dīsa. Sadu tsîna ǀnî ǁaegu ai Petrub khami ra tsâ? ǂKhabusasi i hîna du gaxu ǁaeba ra sîsenu-e du ūhâ? Ti i nî īs ga, o du ge Petrub di aiǁgausa ǁkhāǁkhāsens ǃnâ-u ǁkhaeǂgaosa a hō ǁkhā. Mati du ǁnāsa a dī ǁkhā? Nēs xa ǂâi re: Petrub di ǃnubusigu ge Elobmîsa xu ga ūǂuihe hâ, xawe i ge sida ǁîna xu nî ǁkhāǁkhāsen ga hâ. (2Tim. 3:16, 17) Petrub gere ǃkharuǃnâ xūna ǁkhāǁkhāsens ge ra huida, î da ǁnâuǃā Jehovab sida xu ǀoasasiba ǃâubasen tama hâ ǃkhaisa. ǁÎb ge ra ǂhâba î da mâǀgai tsî dītsâ ǂhabusasiga da ga ūhâ xawe.

3. Tae-i ǃaroma da nî mâǀgai?

³ Tae-i ǃaromas mâǀgaisa ǂhâbasa? Xū-e ǂgui ǃnāde dīs ge ra huida, î da ǁnā xū-e ǃgâiǃgâi. Aiǁgause: ǀŌ-e ra ǀhuru khoe-i ge kitarsa ǀhurusa ǂgui ǃnāde a ǁkhāǁkhāsen ǁkhā. ǁNā ǁaeb ǃnâb ge ǀnîsi ǂgui dīsārona a dī ǁkhā, xaweb  ge ǀûsen tama tsî ǁnāsa ra ǃgâiǃgâi. Nēsib ga ǃamkuse kitarsa ǀhuru ǂan, xaweb ge ǀnî ǁaegu ai dīsā ǁkhā. ǀÛsen tama i tsîb ge ra aiǃgû ǁkhāǁkhāsensa, îb ǁîb ǂansa ǃgâiǃgâi. ǁKhā ǀgaub ǃnâ da ge ǀnî ǁaegu ai ū da hâ ǂkhabusasiga ǃoa a ǁnā-oa ǁkhā. Xawe da ge ra dītsâ î da aiǃgû tsî sida di ǂkhabusasigu ai sîsen. Hoada ge ǀnî ǁaegu ai ega ra ǃkhausen kai da xūna mî tsî ra dī. Xawe da ga ǀûsen tama i, ob ge Jehovaba nî huida î da aiǃgû tsî ǀnai da koro dīs xa ǃgâise dī. (1Pet. 5:10). Hā re i da Petrub di aiǁgaus mâǀgais disa kē. ǃNubusigab ge ūhâ i xaweb ge Jesuba ǁgaubi ǀhomxaǂgaosib ge sida a ǂkhâǃnâ ǁkhā, î da aiǃgû tsî Jehovaba ǃoaba ǀgara.

4. Lukab 5:5-10 ǃoagub ge Petruba ǁîb xa mati mî? Xaweb ge Jesuba mati ǂgomǃgâsiba mābi?

⁴ Xoadi ge mî tama hâ tae-i ǃaromab ge Petruba ‘ǁore-aob a’ ti gere mîsa. Tamas ka io mâ ǁorenab ge ǂâis ǃnâ ūhâ isa. (Khomai re Lukab 5:5-10 sa.) Xaweb ge ǀnîsi ǀnî kai dīsāna ge dī. Jesub ge Petrub ǃaoba ge hōǃâ. ǀNîsib ge Petruba aitsâma gere ǃgôaǁnâsen amaga. Jesub ge ge ǂan i Petrub tsîn ǂgomǂgomsase a hâ ǁkhā ǃkhaisa. ǁNā-amagab ge Jesuba, Petruba ge mîba îb “tā ǃao.” Jesub ge Petrub ǃnâ ūhâ i ǂgomǃgâsib ge Petrub di ûiba ge dawa. Petrub tsî ǁîb ǃgâb Andreab tsîkha ge ega ǁîkha di ǁauǃkhō sîsen-e ǁnāxu, tsî ǀoasase Mesiaba ge sao tsoatsoa. Tsîb ge Jehovaba ǁîkha ǂgui ǀgaugu ǃnâ ge ǀkhae.—Mrk. 1:16-18.

5. Jesub di ǁkhauǂuisa ǃkhōǃoas ǃnâ-ub ge Petruba ǁîb di ǃaoba mati dansa hōba? Tsî mâ ǀkhaegu ǀkha?

⁵ Petrub ge ǂgui ǃgâi xūna ge hōǃâ, Xristub di sao-aob ase. Jesub ǀaehana ǂgauǂgau, demonga ǃkhaeǂui tsî ǁō hana khâisa gere mâ ǃkhaisab ge ge mû. b (Mat. 8:14-17; Mrk. 5:37, 41, 42) Petrub ge Jesub hanîǁaeb di Gao-aoseb nî ǂgaeǂgui ai-īsiba ge mû. ǁÎb ge tatsē nēsa ge ǀuru tama hâ i. (Mrk. 9:1-8; 2Pet. 1:16-18) Petrub ge Jesubab ga sao tama hâ, ob ga mû tama hâ xūna ge mû. Kaiseb ge ge ǂkhî i, ǃgâi tama ǂâiǀgauga sîsenǂam tsîb ge nē ǀkhaega a hōǃâ o.

6. Petruba ǁîb di ǂkhabusasiga ǃkhaese dansa ge hōba? ǁGuiǃā re.

⁶ Mû tsîb gere ǁnâu xūn ǂam-aib ge Petruba, noxoba ǁîb khoesi ǂkhabusasigu ǀkha ǃgomsiga gere hōǃâ. Saora aiǁgaudi xa ǂâi re. Jesub ge a ǁguiǃā o, matib ǃgomatsâ tsî nî ǁōsa î-î Elobmîs kēbode dīǀoaǀoahe. Ob ge Petruba ǁîba ge mîba,  nēs Jesub ǀkha ī tidesa. (Mrk. 8:31-33). ǃNākōrobe i ge Petrub tsî nau Apostelgu tsîna ham-i a kais xa gere ǂnôagu. (Mrk. 9:33, 34) Jesub di ǀuniga ǃoes, ǁōb nîs aiǃâb ge Petruba khoeb di ǂgaesa ge ǁhāǁnâ. (Jhn. 18:10) ǁKhā ǃoeb ge Petruba ǃaob ǃnâ māǁnâsen tsî Jesub di ǀhōb a ǃkhaisa ǃnona ǃnāde ge ǀūxu. (Mrk. 14:66-72) ǁNās khaoǃgâb ge Petruba tsûaǂgaoxase ge ā.—Mat. 26:75.

7. Petruba mâ ǃēsa ge māhe Jesub di khâis khaoǃgâ?

⁷ Jesub ge ǂkhabuǂâi hâ ǁkhāǁkhāsabeb ai ge ǀûsen tama hâ i. Jesub ge khâib ges khaoǃgâ Petrubab kaise a ǀnam ǃkhaisa ge ǁgau. Tsîb ge Petruba ge ǁkhau, îb ǃgamǃgamsenxa ǃûi-aob ase ǁîb gūna ǃûi. (Jhn. 21:15-17). Petrub ge nē ǁkhauǂuisa ǃgâise ge ǃkhōǃoa. Tsîb ge Jerusalems ǃnâ Pinkstertsēs ai, ǃanu gagab ǀkha ǂguro ǂkhauhegen ǁaegu ge hâ i.

8. Antioxias ǃnâb ge Petruba tae-e dīsā?

⁸ ǂKhauhesa Xristeǁî kaib ge xaweb ge Petruba noxoba, ǁîb di khoesi ǂhabusasigu ǀkha ǃgomsiba ge ūhâ i. 36ǁÎ kurib ǃnâb ge Eloba Petruba Korneliuba ǃoa ge sî, hîna ge Jodeǁî tama ība. ǁNābab ge Korneliuba ǃanu gagab ǀkha ge ǂkhauhe. ǁNās ge ge ǃgāsa i, ‘Elob ǀgorahe ūhâ tamasa.’ Tsîn Jodeǁî taman tsîna a Xristeǁî ǀhaohâb di ǃâ kai ǁkhā ǃkhaisa. (ǃNǃkh. 10:34, 44, 45). ǁNās khaoǃgâb ge Petruba Jodeǁî tama khoen ǀkha ǂûǀhaosa harase gere tsâ. ǁNāti-i xū-eb ge ais ai ge dīǁoa i. (Gal. 2:12) Xawen ge ǀnî Jodeǁîna gere tsâ, Jodeǁîn tsî Jodeǁî taman tsîn ǀguipa a ǂûǁoasa. ǁNāti i ǂâiǀgauba ūhân ge Antioxias ǃoa a ǀkhī, ob ge Petruba Jodeǁî tama ǃgâsan ǀkha ge ǂû ǀû. Jodeǁî Xristeǁînab nî tao kaisab gere ǃao amaga. Apostel Paulub ge Petrub gere dī xū-e mû tsî ǁîba nau khoen aiǃâ ge mî-unuba. (Gal. 2:13, 14) Nē dīsās ǂamaib ge Petruba ge mâǀgai. Tae-e ǁîba ge hui?

9. Johanneb 6:68-69 mati Petrub di ǂgomǂgomsasiba ra ǁgau?

⁹ Petrub ge ge ǂgomǂgomsa i, mā-am tamab ge ge hâ i, î-i xū-e ǁkhae bi Jesuba saosa xu. Aiǁgauseb ge ǁîb ǂgomǂgomsasiba ge ǁgau, Jesub ge ǁîb ǁkhāǁkhāsabegu ǁnâuǃā tama hâ xū-e mî o. (Khomai re Johaneb 6:68, 69 sa.) ǃAroma-e ǂanǂui tamasen ge ǂgui khoena Jesuba ge sao ǀû. Xaweb ge Petrub aiǃgû tsî Jesuba ge sao. ǁÎb ge ge ǂgomǂgomsa i tsî ge mî Jesub ǀguib ge “mîdi ǀamo ûib dide ūhâo.”

10. Jesuba mati ǂgomǃgâsiba Petrub ǃnâ ge ǁgau? (Ai-īsiba mû re.)

¹⁰ Jesub ge Petruba ge ǁnāxu tama hâ i. ǀUniga tsēs ǃhūbaib aib ge hâ īs aib ge Jesuba ge ǂan î, Petrub tsî nau Apostelgu ǁîba nî ǀūxusa. Xaweb ge Jesuba, Petruba ge mîba ǂgomǃgâsibab ǁîb ǃnâ ūhâsa tsîb ǀguitsē oaǀkhī tsî ǂgomǂgomsase nî hâsa. (Luk. 22:31, 32) “Gagas ge amase a māsenxa xawes ge sorosa a ǂkhabusa” ǃkhaisab ge Jesuba gere ǁnâuǃā. (Mrk. 14:38) ǁNā-amagab ge Jesuba, Petrub nî ǀūxu bi ǃkhaisab ge ǂan-i xawe ǁîb Aposteli ǃnâ ge ǀûsen tama hâ i. ǁÎb khâis khaoǃgâb ge Jesuba Petrub dawa ge ǂkhai, ǀgurib hâ hîna. (Mrk. 16:7; Luk. 24:34; 1Kor. 15:5) Nēs ge matikōse Petruba a ǀgaiǀgais xa ǂâiǃgâ re tsûaǂgao ge hâ ība, dīb ge xū-i ǃaroma.

11. Jesuba mati Petruba ǂgomǃgâsiba ge ǁgau Jehovab xab nî ǂkhâǃnâhesa?

 ¹¹ Jesub ge Petruba ge ǁapoǁapo ba, Jehovab ǁîb di ǂhâsiga nî kōǃgâ ǃkhaisa. Jesub ge ǁîb khâis khaoǃgâ Petrub tsî ǁîb sao-aogu tsîna buruburuxa ǀgaub ǃnâ ǁau-e ge ǃkhōba. (Jhn. 21:4-6) Nē buruburuxa dīs ge Petruba ge ǂgomǃgâ kai, Jehovab supuse ǂhâb hâ xū-i hoa-e nî mā bi ǃkhaisa. ǀNîsib ge Apostela ra ǂâi-oa Jesub ge mî mîde, Jehovab ǂhâsib ǃnâ hân hoana ‘ǂgurosen ga Elob gaosiba ôa,’ o nî kōǃgâsa. (Mat. 6:33) Nēn hoan ge Petruba ge hui, îb aoǁnâ sisenne ǂgurose ǁîb ûib ǃnâ mâi, ǁîb di ǁauǃkhō sîsenni ose. 33ǁÎ kuri Pinkstertsēs aib ge ǁkhoaǂgaoxase ǂgui khoena ge hui, în ǃgâiǂhôasa ūǃoa. (ǃNǃkh. 2:14, 37-41) ǁNās khaoǃgâb ge Samariaǁîn tsî Jodeǁî tamana ge hui în ǁkhāǁkhāsen tsî Xristuba sao. (ǃNǃkh. 8:14-17; 10:44-48) Jehovab ge Petruba kai ǀgaub ǃnâ ge sîsenu, îb hoa ǃhaodi khoena ǀhaohâb ǃnâ ǂgâxa-u.

12. Petrub aiǁgausa mati a huida ǁkhā, toa tama ǂkhabusasib ǀkha da ga ǃgomsiba ūhâ o?

¹² Jehovab ge a huida ǁkhā î da mâǀgai. Hoaǁae i ge supu tide ǃgōsase da ga ǀgui ǂhabusasiba gaxu ǁae-e a ūhâ o. ǀNî ǁaegu ai da ge a tsâ ǁkhā sida di ǃgomsin, Petrub gere ǃkharu ǃnân xa a kai khami. Jehovab ge ǀgaiba a mā da ǁkhā î da tā ǀûsen. (Psa. 94:17-19) Aiǁgause ǀgui ǃgâsab ge mofin ǀgauba ǂgui kuriga ge ūhâ i, amabab nî ǁkhāǁkhāsens aiǃâ. ǁÎb ûibab ge ge dawa tsîb ge Elobmîs ǃoagu ge ûi tsoatsoa. Xaweb ge ǀnî ǁaegu ai ǃgâi tama turagu ǀkha ǃgomsiba ge ūhâ i. Tae-e ge huibi îb mâǀgai? “Jehovab ge ra ǀgaiǀgai da.” “Jehovab di ǃanu gagab ǀkha . . . , ta ge ge ǁkhāǁkhāsen, īǁkhā i asa amab di daob ǃnâ aiǃgûsa . . . . Jehovab ge ge sîsenute ǀoasa kurusa ta ūhâ tama xawe, tsîb ge hoaǁae aiǃgû tsî ra ǀgaiǀgaite” tib ge ra mî.

13. ǃNaeǃkhaidi 4:13, 29, 31 ǃoagu da mati Petrub aiǁgausa a ǁgae ǁkhā? (Ai-īsiba mû re.)

¹³ Mû da go khamab ge Petruba ǂgui dīsāde ge dī, khoenab gere ǃao amaga. Xaweb ge ǀgaiba a ǂgan, ob ge ǁkhoaǂgaoxase ge tanisen. (Khomai re ǃNaeǃkhaidi 4:13, 29, 31 sa.) Sida tsîn ge ǃaoba a dan ǁkhā. Horst ti ǀōn hâ ǂkhâm ǃgâsab hîna Nazi Germanib ǃnâ ra hâb ǀkha i ge  tae-e a īsa kē re. ǂGui ǃnādi aib ge skoli tawab gere hōǃâ ǁgâib ǃnâ māǁnâsen tsî “hail Hitler!” ti ge mî. ǂKhā bi tama i tsîn ge Horst ti ǁgûna ǁîb ǀkha ǀguiba ǀgōre. Tsî Jehovaba ge ǂgan îb ǁkhoaǂgaosiba mābi. ǁÎb ǁgûn di huib tsî Jehovab ai ǂgomaiǂnûis ǃnâ-ub ge Horsta ǀgaiba ge hō tsî ge mâǀgai. Egab ge ge hōǃâ: “Jehovab ge tātsēs tsîna ge ǁnāxuǃnâte tama hâ i.” c

14. Mati gu ǀnamxaǃnâ ǃûi-aoga ǂkhabuǂâira na ǂgomǃgâsiba a ǁgau ǁkhā?

¹⁴ Jehovab tsî Jesub tsîn ge tātsē ǁnāxū da tide. Jesubab ge ǀūxus khaoǃgâb ge Petruba ǂhâǂhâsa mîǁguiga ge dī. ǀÛsen îb nî tamas ka iob Xristub di ǁkhāǁkhāsabe i khama nî mâǁgai? Jesub ge Jehovaba ge ǀkhoma î-i Petrub di ǂgomsa tā toa. Jesub ge ǁnā ǀgores xa Petruba ge mîba tsî ǁîb ǃgâsaga ǀgaiǀgais di ǂgomǃgâsib tsîn xa ge mîba. (Luk. 22:31, 32) Nēs ge ǀnîsi Petruba gere ǂkhâǃnâ, Jesub di mîdi xab gere ǂâi-oa o. ǂHâǂhâsa mîǁguiga da ga sida di ûib ǃnâ dī, ob ge Jehovaba ǀnamxaǃnâ ǃûi-aoga a sîsenū ǁkhā î gu ǂhâ da hâ ǂgômǃgâsiba mā da, î da ǂgomǂgomsase hâ ǀgara. (Efe. 4:8, 11) Gaxu ǁaeba ǀhâohâb ǃûi-aose ǃoaba hâ ǃgâsab Paul ti ǀon hâb ge ǁkhā ǁkhaeǂgaosa ra mā. ǀÛsen ǂgao ra khama ra tsânab ge ra ǂâiǃgâ kai, Jehovab ge ǂgurose mati amaba ǃoa a ǂgae nî ǀgausa. Tsîb ge ra ǂgômǃgâ kai nî Jehovab ǂgomǂgomsa ǀnammi mā-am tidesa îb ǁîna ǀûsen. ǀAms aib ge ra mî “ǂguin hîna ra ǂkhabuǂâinab ge ge mû, Jehovab ǀgaib ǀkhan ta mâǀgaisa.”

15. Petrub tsî Horsti di aiǁgausa mati Mateub 6:33 ǃnâ hâ amaba ra ǁgau?

 ¹⁵ Jehovab ge Petrub tsî nau ǁkhāǁkhāsabegu tsîna a hui, khamib ge Jehovab tsîna sida nî hui aoǁnâ sîsenne da ga ǂgurose sida di ûib ǃnâ mâi o. (Mat. 6:33). ǀGamǁî torob khaoǃgâb ge Horst ti ǀon hâ ǃgâsab hîna da go ais ai ǃhoaǃgâoba, aimâba-aosisa ge ǂâiǃâ tsoatsoa. Kaiseb ge ge ǀgâsa i tsîb ge gere ǂâiǂhânsen ǂâusa mari-eb nî ūhâsa, îb aitsama kōǃgâsen tsî ǀoasa ǁaeba aoǁnâ sîsenni ǃnâ hâ. Tae-eb ga dī hâ? Jehovabab ge ge ǃâitsâ tsîb ge hoa wekheba aoǁnâ sîsenni ǃnâ ge hâ i, ǃnarimara mûǂam-aob saris wekheb ǃnâ. Wekheb ǀams aib ge ge buru ǃnarimara mûǂam-aob ge mari-e ūhâ koevertsa mābi o. Xaweb ge Horsta ge mîba tama hâ i, hâm i ge ǁnā marisa a māsa. ǁNā maris ge ǂâusa ǁkhâna ge huibi îb aimaba-ao sîsenne dī ǁkhā. Nē ǀkhaeb ge Horsta ge hōhōǃnâ Jehovab ǁîba nî kōǃgâ ǃkhaisa. ǁÎb ûib hoabab ge Gaosiba ǂgurose gere mâi.—Mal. 3:10.

16. Tae-i ǃaroma i a ǃgâi Petrub xa ǃnāsase ǁkhāǁkhāsensa?

¹⁶ Petrub ge ǀnîsi kaise ge ǂkhî hâ i, Jesub ge ǁîba xu bē tama hâ io mîb ge khami. Jesub ge aiǃgû tsî Petruba ge ǁkhāǁkhā îb ǂgomǂgomsa Apostel kai tsî Xristeǁîna ǃgâi aiǁgause ība. ǂGui ǀō-aisa xūna da ge ra ǁkhāǁkhāsen Petrub ge ǁkhāǁkhā-e ǀgauba xu. Petrub ge ǁkhāǁkhāsenni ge xūna ǀgam sîǂkhani ra ǃnâ ge xoa hînab ge ǀhaohâga ǃoa a sîra tsî Elobmîs ǃnâ nētsē ra hōhe ra. Saora ǁkhāǁkhāǃâs ge ǀnî hōhōǃnâdi nē sîǂkhanidi ǃnâ hâde nî ǁgau tsî mati da ǁîde nētsē a sîsenu ǁkhāsa.