1. ǁŌb nîs aiǃâb ge Jehovaba Petruba mâ sîsen-e mā?

 APOSTEL Petrub ge ge ǂan i, ǁîb ûib ǀgūǁae nî ǀamsa. Tsîb ge ǂgomǂgomsase Jehovaba ǂgui kuriga ge ǃoaba. Tsî Jesub ǀkha ǀguipa aoǁnâ sîsenne gere dī. Aoǁnâ sîsen-eb ge Jodeǁî taman ǁaegu ge dī tsoatsoa. Tsî ega ge ǂgaeǂguira soros ǁani kai. ǁÎb ûib ǀams aib ge Jehovaba ǃnāsa sîsen-e ge mābi. 62-64ǁÎ kurigu ǃnâb ge Jehovaba ǁîba ge sîsenū îb 1Petrub tsî 2Petrub sîǂkhani ra xoa. Petrub ge gere ǃâubasen î-i nē sîǂkhanide Xristeǁîna ǁîb ǁōb khaoǃgâ hui.—2Pet. 1:12-15.

2. Tae-i ǃaroma î ge Petrub ge xoa sîǂkhinide ǂhâǂhâsa i?

² Petrub ge nē sîǂkhanide ge xoa, ǃgâsan ge ‘ǃkharagaǃnâgu ǃâitsâna’ gere hōǃâ ǁaeb ǃnâ. (1Pet. 1:6) ǂKhabadī-aogu ge ama tama ǁkhāǁkhādi tsî ǃgâi tama tanisen ǀgaugu tsîna ǀhaohâb ǃnâ gere ǂgâxa-ū ǂgao. (2Pet. 2:1, 2, 14) Jerusalems ǃnâ gere hâ Xristeǁîn ge gere ǃâubasen ǀgūǁaen ǃās di hîkākās tsî Jodeǁîn ǂhanub “ǀams xūn hoan” disa nî hōǃâsa, Romeǁî toroǂnubis xa ǃaromahe hâse. (1Pet. 4:7) Petrub di sîǂkhani di ge Xristeǁîna ge hui în mûǂan, tae-en a dī ǁkhāsa. Tsî ǂgomǂgomsase ǁnān gere hōǃâ ǃgomsin ǃnâ mâǀgai. Tsî hāni ǃgomsin ǃaromas tsîna aiǂhomisen. b

3. Tae-i ǃaroma da Petrub di sîǂkhinide nî ôaǃnâ?

 ³ Petrub ge nē sîǂkhanide ǁnā ǁaeb ǃnâ ge ûi hâ i Xristeǁîna ǃoa ge xoa. Xaweb ge Jehovaba ǁîb mîs ǃnâ nē sîǂkhanide ge ǃkhōǂgā. ǁNā-amaga da ge ǁîde xu ǃgâiba a hō ǁkhā. (Rom. 15:4) ǁNā Xristeǁîn khami da ge sida tsîna ǃgâi tama ǀgauga ūhâ khoen ǁaegu ûi hâ. Tsîs ge ǁnāsa ra ǃgom kai Jehovaba ǃoabasa. ǁNās xōǀkhā da ge ǀgūǁae kai ǁgâiǀāba nî hōǃâ, hîna ge Jodeǁîn ǂhanuba a dīkākāb khami ība. ǀNî ǂhâǂhâsa xūna da ge Petrub di 2 sîǂkhini ra ǃnâ ra hō. ǁNā ǂkhini ra ge nî huida î da Jehovab di tsēsa ǂâis ǃnâ ūhâ ǀgara, khoena ǃaosa dan tsî ǀaexa ǀnamma nau khoena ūhâba. Nēti i hōhōǃnâdi ge ǀhaohâb ǃûi-aoga hui ǁkhā, î gu mû mati gu ǁîgu ǀhaohâb ǃnâ hâ ǃgâsana hui ǁkhāsa în gagasise ǀgai.

4. 2 Petrub 3:3, 4 ǃoagu i tae-e sida ǂgomsa a ǂkhabu kai ǁkhā?

⁴ Nē ǃhūbaib ǃnâ da ge Elobmîs kēbodi ǃnâ ǂgom tama khoen ǁaegu ûi hâ. ǃKhō-aon ge ra mîǁgaiǁgai da ǂgao, ǂgui kuriga da ǀams nî hāsa ra mî xawe î noxoba hā tama hâ amaga. ǂGui ǃhō-aon ge ra mî ǀams tātsē hā tidesa. (Khomai re 2 Petrub 3:3, 4 sa.) Nēti-i xūna da ga aoǁnâba da ra khoena xu ǁnâu, os ge sida ǂgomsa ǂkhabu ǁkhā. Petrub ge tae-i a huida ǁkhāsa ra ǁguiǃā.

5. Tae-e nî huida î da ǂhanu mûǂuiba ūhâ nē ǃhūbaib ǀams xa? (2 Petrub 3:8, 9)

⁵ ǀNîn ǃaroma i ge mûsen ǁkhā, Jehovab a ǂausa nē eloxoresa ǃhūbaiba dīkākāsa. Petrub di mîdi ge ra hōhōǃnâ da, Jehovab mûǂui ǀgaub ǁaeb dib khoen diba xu ra ǀkharasa. (Khomai re 2 Petrub 3:8, 9 sa.) Jehovab ǃoagu î ge duisend kuriga, ǀguitsēs khami ī. Elob ge a ǃnūǃnâxa tsîb ge khoe-i nî dīkākāhesa ǂgao tama ǁîb tsēs ga hā, o î ge nē ǃhūbaiba nî ǀam. Kai aiǂhanub ge ū da hâ ǁaeba sîsenū tsî ǃhūbaib ǂhawase hâ khoena aoǁnâbasa.

6. Mati da Jehovab tsēsa ra “ǃâu” ǀgara? (2 Petrub 3:11, 12)

⁶ Petrub ge ra ǀkhoma da, î da Jehovab tsēsa ǃâu ǀgara. (Khomai re 2 Petrub 3:11, 12 sa.) ǁNāsa da mati a dī ǁkhā? Mâ tsēs hoasa da ge, ǀasa ǃhūbaib mati nî īsa a ǂâiǃgâ ǁkhā. Mûnain-ai re mati du ǃanu ǂoaba ra ǀomǂgā, ǁkhoaxa ǂûna ra ǂû, ǀnamasabe-e ǁōba xu ra ǁkhoreǁhare ǀgaus. Tsî Elobmîs kēbodi ge dīǀoaǀoa ǀgauba, kuriga ǃkharu tsî ge uitsâma i khoena ra ǁkhāǁkhāsa. Nēs xa ǂâiǃgâs ge nî hui du, î du ǁnā ǁaeba ǃâu ǀgara tsî ǁnā ǂgomǃgâsiba ūhâ ǀams nî hāsa. Hānîǁaeb ǃnâ nî ī xūn ‘ǂansa’ ūhâs ge nî huida, î da tā ǂhumi ǁkhāǁkhā-aon xa “ǂgaeǂhapuhe.”—2Pet. 3:17.

7. Khoena ǃaosa mati a tsâǀkhā da ǁkhā?

⁷ Jehovab di tsēsa ǂâis ǃnâ ūhâs ge, nî ǂkhâǃnâ da nau khoen ǀkha amab ǃgâiǂhôasa ǀgoragusa. Xawe da ge ǀnî ǁaega aoǁnâsa îganǀgē ǁkhā. Tae-i ǃaroma? ǀNî ǁaega da khoena ra ǃao amaga. ǁNās ge Petrub ǀkha ge ī. Jesub nî ǃgamhe ǃoes aib ge Petruba gere ǃao, Jesub di ǁkhāǁkhāsabeb ase ǂanhesa tsîb ge ge ǀūxu bi. (Mat. 26:69-75) Xaweb ge ega Petruba ǁîb di ǃaoba dan tsî  ge xoa: “ǁÎn di ǃaoǃaosa tā ǃao, î ǁkhāti tā ǂâiǂhansen.” (1Pet. 3:14) Petrub di mîdi ge ra ǂgomǃgâ kai da, khoena ǃaosa da a dan ǁkhāsa.

8. Tae-e a huida ǁkhā î da khoena ǃao ǀû? (1 Petrub 3:15)

⁸ Tae-e huida ǁkhā, î da khoena ǃaosa dan? Petrub ge ra mî ba da: “Xawe sadu ǂgaogu ǃnâ Xristuba ǃaoǃgâba ūhâba.” (Khomai re 1 Petrub 3:15 sa.) Tsî nēs ge sida ǃKhūb tsî Xristub, ūhâ ǃkharos tsî ǀgaib xa ǂâiǃgâsa ǃkhōǂgā hâ. ǃGâiǂhôasa naun ǀkha ra ǀgoragus ǃēsa, du ga ūhâ ǁaeb ai du ga ǃao, o sida Gao-aob xa ǂâi re. Mûnanai re ǁîb ǂgui ǀhomǃgāgu ǀkha ǀhommi ǃnâ ra ǂgaeǂgui ǀgausa. ǂÂihō re ǁîb ge, “hoa ǁkhāsiba ǀhommi ǃnâ tsî ǃhūbaib ai māhe hâ.” Tsîb ge “hoaǁae sago ǀkha nî hâ, ǃhūbaib di ǀunis kōse.” (Mat. 28:18-20) Petrub ge ra ǀkhoma, î da ‘hoaǁae ǂhomisase’ hâ tsî sida ǂgoms xa ǃhoa ǁkhā. Khoe-e du sîsenni, skoli tamas ka io ǀnî hâ ǃkhai-i tawa ra aoǁnâba ǂgao? ǁAeb aiǃâ ǂâi re mâǁae du ǀnîsi nēsa dī ǁkhāsa tsî ǁnāpaxū tae-e du nî mîsa aiǂhomi re. ǁKhoaǂgaosiba ǀgoreba tsî ǂgomǃgâ re Jehovab nî huidusa, khoena ǃaosa dansa.—ǃNǃkh. 4:29.

9. Matib ge Petruba ǀgui ǃnâ-i ai ǀnamma ǁgausa ǀuru? (Ai-īsiba mû re.)

⁹ Petrub ge ge ǁkhāǁkhāsen, matib khoena ǀnamma nî ǁgausa. ǁÎb ge Jesub ge saora mîde mî, o ge hâ i: “O ta ge nēsi ǀasa mîmā-e ra mā du: ǀNamgu re. Tita ge ǀnam du i khami sadu tsîna ǀnamgu re.” (Jhn. 13:34) ǁNās ǂam-aib ge Petruba Jodeǁî ǃgâsan ǀkha ge ǂû ǀû. Apostel Paulub ge Petrub ge dī-e ai ǁamas tamas ka io ‘hînaxa’ ǀgaub ti ge mî. (Gal. 2:11-14) Petrub ge ǁnā ǁnamasa ūǃoa tsî ǁnāpaxū ge ǁkhāǁkhāsen. ǁÎb ǀgam sîǂkhani ra ǃnâb ge Petruba ge xoa î da sida ǃgâsana tā ǀnamma tsâbas ǀguisa dī. Xawe ǁîna da a ǀnamsa ǁgau.

10. “ǂGaoba xu ǀaexase” ǀnamsa tae-i xa ra ǃaromahe? ǁGuiǃā re. (1 Petrub 1:22)

¹⁰ Petrub ge ge mî, î da sida ǃgâsana “ǃanu ǂgaoba xu ǀaexase” ǀnam. (Khomai re 1 Petrub 1:22 sa.) Nēti-i ǀnammi ge ‘amaba ǁnâuǀnams’ ǀkha ra ǃgûǀhao. Nē amab ge ra ǁgau sida “Elob khoen ǁaegu ǀgora-e ūhâ tama” ǃkhaisa. (ǃNǃkh. 10:34, 35) Jesub di mîmāsa da ge ǁnâuǀnam tama hâ, ǀnî khoen ǀguina da ga ǀnamma ǀgau o. Ama i ge Jesub khami da ge ǀnîn ǀgūse a tsâǁkhā. (Jhn. 13:23; 20:2) Petrub ge ra hōhōǃnâ da î da hoa “ǂgomsabena ǀnam”, sida omaris ǃân a amaga.—1Pet. 2:17.

11. Nauna ‘ǂgaoba xu ǀnamsa’ taena ǃkhōǂgā hâ?

¹¹ Petrub ge ge ǀkhoma da, î da “ǂgaoba xu ǀaexase ǀnamgu.” Nē xoas ǃnâ-i “ǀaexase” ǀnam ti ra mîhe, o î ge ra ǂâibasen î da khoe-e ǀnamma ǁgau kaise î ga ǃgom xawe. Aiǁgause, ǃgâsa-i ga kaise a tsûtsûda o da mati nî dī? Khoe-i ase da ge ra dīǃoa ǂgao, ǁî-e ǀnamma ǁgaus xa. Xaweb ge Petruba Jesuba ge ǁgae, dīǃoas Eloba ǂkhîǂkhî tama ǃkhais ǃaroma. (Jhn. 18:10, 11) Petrub ge ge xoa: “Tā ǂkhaba-e ǂkhaba-i ama mādawa . . . î du ǁnās ǃoagu ǀkhae.” (1Pet. 3:9) ǀAexa ǀnamma du ga ūhâ, o du ge nî khoexaǃnâ tsî du ge tsûtsû du ran tsîna ǀnamma ǁgau ǁkhā.

12. (a) ǂGaoba xu ǀaexase ǀnamsa tae-e dīsa nî ǂkhâǃnâ da? (b) Vidiob ǃnâ i ra ǁgauhe khami du tae-e ra dī ǂgao?

¹² ǁÎb di ǂguro sîǂkhinis ǃnâb ge Petruba “ǀaexase ǀnamgu” ti hâ mîsa ge sîsenū. ǁNāti-i ǀnammi ge “ǂgui ǁorena” ra ǃgū-ai. (1Pet. 4:8) ǀNîsib ge Petruba kurin ǃkharu hâseb ge Jesuba ǀûbab xa ǁkhāǁkhābi xū-e ge ǂâihō. ǁNā ǁaeb aib ge Petruba ǀnîsi gere ǂgom khoexaǃnâsibab ge ūhâ isa, mîb ge o ǁîb ǃgâsa-eb “hû ǃnādi” kōse a ǀûba ǁkhāsa. Jesub ge ǁîb tsî hoada tsîna ge mîba î da “hûdisi ǃnādi di hû ǃnāde” ǀûbagu. (Mat. 18:21, 22) Tā ǂhabuǂâi re nē ǀapemāsa du ga dī ǁoa o. Jehovab ǃoaba-aon ǀoasa kurusa ūhâ tama hân ge ǀnî ǁaeb ai a ǃgombahe ǀûbasa. Nēsi ǂhâǂhâsas ge î du dī ǁkhā du a, xū-i hoa-e dī sadu ǃgâsa-e ǀûba tsî ǂkhîba kuru. c

13. Tae-e ǀhaohâb ǃûi-aoga ǃgomba ǁkhā ǃgâsana ǂkhâǃnâs ǃnâ?

¹³ Petrub ge ǀnîsi tātsē ge ǀuru tama hâ i, Jesub ge khâis khaoǃgâ: “ti gūna ǃûi” ti a mî o. (Jhn. 21:16) ǀHaohâb  ǃui-ao du ga, o du ge a ǂan nē daoǁgaus sadu ǃoas tsîna hâsa. ǀNî ǁaega î ge a ǃgom ǁkhā ǀhaohâb ǃûi-aoga ǁaeba hōsa, ǂhâǂhâsa ǁgaumâide kōǃgâsa. ǀHaohâb ǃûi-aogu ge ǂgurose nî kōǃgâ, ǁîgu omaris ǂhân hâ xūn hoana ūhâsa. Tsîn hoana ǀnam-e hâse ra tsâsa. Tsî gu ǁîgu omarisa ra huisa în Jehovaba ǀgū. ǁÎgu ge ǃgâi aiǁgause omaris ǃnâ ī. Tsî gu ge ôasase aoǁnâ sîsen-ē dī, ǀhaos ǃâga ǃamkuse aiǂhomi tsî ǂharis kai ǀhaodi tsî ǀkharib kai ǀhaodi tsîna ra hâǃnâ. ǀNî gu ge saora ǁgaumâidi ǃnâ ǃereamsa tani hâ, ǀaeǃkhōdi ǀkha ra sîsen ǁae komites tsî dī-unus tsî om sîsen-i departements tsîna. Amase gu ge ǀhaohâb ǃûi-aoga kai sîsen-ē ūhâ.

14. Tae-e ǀhaohâb ǃûi-aoga hui ǁkhā î gu gūna ǂkhâǃnâ? (1 Petrub 5:1-4)

¹⁴ “Elob di gūn sago ǂgomǃgâbahe hâna ǃûi,” tib ge Petruba ǀhaohâb ǃûi-aoga ge ǀkhoma. (Khomai re 1 Petrub 5:1-4 sa.) ǀHaohâb ǃûi-aogo, ǂan da ge a ǃgâsana go a ǀnam tsî ǁîna ra ǃûi ǂgao ǃkhaisa. Xawe go ge ǀnîsi kaise ǂgui xūna ra dī tsî tsau hâ tsî ǁnā ǁgaumâisa go a dī ǁoa khami ra tsâ. Tae-e go a dī ǁkhā? Tsâ go ra ǀgauba Jehovaba mîba. Petrub ge ge xoa: “Tsî khoe-i ga ǃoaba, a i Elob ra ǀkhae ǀgaiba xus ase ǃoaba.” (1Pet. 4:11) Sadu ǃgâsan ge nē ǃhūbaib ǃnâ ǀnîsi, dī-unuhe ǁoa ǃgomsina ūhâ. Xawe ǂâis ǃnâ ūhâ re Jesub Xristub “ǂAmǃûi-aob” ge, sago a hui ǁkhās xa ǃnāsase hui ǁkhā. Nēsis tsî hānîǁaeb ǃnâs tsîna. Jehovab ge ǀhaohâb ǃûi-aoga ra ǂgan, î gu ǃgâsana ǀnam, ǃûi tsî “gūn di aiǁgause” ī.

15. ǀGui ǀhaohâb ǃûi-aoba mati gūna ra kōǃgâ? (Ai-īsiba mû re.)

¹⁵ Williammi, ǂgui kurina ǀhaohâb ǃûi-aob ge, ǃgâsana gagasise ǂkhâǃnâs ǂhâǂhâsasiba ra ǁnâuǃā. Coronas ge tsoatsoa ǁaeb ǃnâb ge ǁîb tsî nau ǀhaohâb ǃûi-aogu tsîna ge mîǁgui, î gu ǁîgu aoǁnâ groeps ǃnâ hâ ǃgâsa-i hoa-e mâ wekheb hoaba ǁkhami. Tae-i ǃaroma gu ge nēsa gere dīsab ge saorase ra ǁguiǃā: “ǂGui ǃgâsan ge ǁîn omdi ai ǀguri hâ tsî gere ǂâiǂhansen. Tsî î ge ǁnās ǀkha  ǁîn ǂâiǀgauba ǃkhaese ǃgâi tama ǀgaub ǃnâ gere dawa.” ǃGâsa-i ge ǃgomsiba gere ūhâ, ob ge Williama ǃgâise ǃgâ tsî gere ǂanǂui tae-i ǁî-e ra ǂâiǂhansen kaisa. Tsîb ge ǁnāpaxu ǂkhini-i tamas ka io vidio-e sida internetsa xu ū tsî ǁnā ǃgâsa-e ra ǂkhâǃnâ. ǁÎb ge ra mî: “ǃGâsana nēsi ǂkhâǃnâs ge kaise a ǂhâbasa. Jehovaba ǃoaba tama khoena huis ǃaroma da ge ra ǁguiǂgāsen. ǁKhā ǀgaub ai da ge nî ǁguiǂgāsen, î da gūna ǃûi. Tsî ǁîna hui în amab ǃnâ hâ ǀgara.”

16. Mâ ǀgaub ǃnâ i Petrub sîǂkhinide xu ra hā ǀapemāde a sîsenūhe ǁkhā?

¹⁶ ǀOro xūn hîna da Petrub di ǂkhanisa xu a ǁkhāǁkhāsen ǁkhān ǀguina da ge go ǃhoaǃgao. ǀNîsi du ge ǀnî xūn hîna du ra ǃgâiǃgâi ǂgaona go mû. Aiǁgause, ǀasa ǃhūbaib ǃnâ nî hâ ǀkhaegu xa du ra ǂâiǃgâ ǂgao? Sîsen aib, skoli tamas ka io ǀkhara ǃkhai-i ai aoǁnâs mîǁguiba du dī hâ? ǀGauga du ra mû, mati du ǀaexa ǀnamma sadu ǃgâsana ǃnāsase a ǁgau ǁkhā ga? ǀHaohâb ǃûi-aogo māsenxase go turaxasib ǀkha Elob gūna ǃûisa ra mîǁgui? ǂHauǃnâ-usen tsî mû mapa go ǀkharaǀkharana a dī ǁkhāsa, xawe tā ǂkhabuǂâi re. ǃKhūb di ‘ǃgâisib’ ge nî hui go, ǀkharaǀkharana dīsa. (1Pet. 2:3) Petrub ge ra ǃgomǃgâ kai da: ‘ǀKhommi di Elob, ǁîb . . . ǃoa ǂgai du hâb ǀgaiǀgai, ǁapoǁapo tsî nî ǃgaoǃgao gosa.’—1Pet. 5:10.

17. Mâǀgai tsî da ga Jehovaba mā-am o îb ǁkhāǁkhāda, o da mâ ǀamǂoasa nî ūhâ?

¹⁷ Petrub ge Jesub ǀkha hâsab anu tama hâ khami gere tsâ. (Luk. 5:8) Xawe Jehovab tsî Jesub tsîn di ǀnamxaǃnâ ǂkhâǃnâs ǀkhab ge ǂgomǂgomsase Xristuba ge sao. ǁNās ǀkhab ge Petruba ge mā-amhe îb “ǃKhūb tsî ǃGâiǃōdī-aob, Jesub Xristub di ǀamo Gaosib ǃnâ” ǂgâ. (2Pet. 1:11) ǁNās ge kaise ge kai mādawa-amsa. Petrub khami mâǀgai tsî du ga Jehovaba mā-am îb ǁkhāǁkhā du, o du ge sadu tsîna ǀamo ûib mādawa-amsa ǃkhōǃoa ǁkhā. Tsî du ge ǂgoms di ǂâibasensa nî ǃkhōǃoa.”—1Pet. 1:9.