1. 1 Petrub 5:2 ǃoagu ǀhaohâb ǃûi-aoga mâ ǁgaumâisa ūhâ?

 XRISTEǁÎ ǀhaohâb ǃûi-aogu ge ge ǁgaumâihe, î gu Jehovab di gūna kōǃgâ. Nē ǂgomǂgomsa aogu ge ǃgâsana kōǃgâs di ǁgaumâisa kaise ra ǃgôaǃgâ. Tsî ǃgarise ra sîsen îgu “ǃûi-aogu” hîna ra ǃûigu khami ī. (Jer. 23:4; khomai re 1 Petrub 5:2 sa.) Kaise da ge ra ǃgôaǃgâ, ǁnāti-ī aoga ǀhaohâb ǃnâ ūhâsa.

2. ǀHaohâb ûi-aoga mâ ǃgomsina a hōǃâ ǁkhā?

² ǁÎgu di ǁgaumâisa gu ra kōǃgâ ǁaeb ais tsîna gu ge ǀhaohâb ǃûi-aoga ǂgui ǃgomsiga ra hōǃâ. ǀHaohâba kōǃgâs ge ǂgui sîsen-e ǃkhōǂgā hâ. Tonib ǀhaohâb ǃûi-aob hîna Amerikab ǃnâ ra hâb ge ge ǁkhāǁkhāsen, îb tā ǁîb a dī ǁkhās xa ǃnāsa sîsen-e ūǃoa. ǁÎb ge ra ǁguiǃā: “Coronas ge tsoatsoa, o ta ge ǃnāsa sîsen-e ge ūǃoa. ǀHaohâb ǀhaodi tsî aoǁnâ sîsenni tsîna ǃkhōǂgā hâse. Matikōse ta ge re sîsen xawe î ge sîsen-e ge toa tama hâ i. Tsî ǁnās xa ǃaromahe hâse ta ge ǁaeba Elobmîsa khomai, ǁîsa ôaǃnâs tsî ǀgores ǃaroma ge ūhâ tama hâ i.” Iliri ti ǀon hâ ǃgâsab Kosvob ǃnâ ǀhaohâb ǃûi-aob ase ra ǃoabab ge ǀnî hâ ǃgomsiba ge hōǃâ. Torob ǁaeb ǃnâb ge hâ io, ob ge kaise ge ǃgombahe-i ǀapeǂhomis daoǁgaude saosa. ǁÎb ge ra mî: “Ti ǁkhoaǂgaosib ge ge ǃâitsâhe ǁnâub bēros ge nē ǁgaumâisa a māte o. Î ta ǁkhōǁkhōsa ǃkhais tawa ti ǃgâsana sī hui. Kaise ta ge gere ǃao tsîs ge ǁnā ǁgaumâisa ǁnâuǃāxase ge mûsen tama hâ i.” Tim ti ǀon hâ ǃgâsab Asiab ǃnâ sîsabese ra ǃoabab ge ǃgoma gere hōǃâ, tsēs hoasa nî dīhe xūna dītoasa. ǁÎb ge ra mî: “ǀNî ǁaegu ai ta ge kaise, tsau hâse gere tsâ.” Tae-e ǀhaohâb ǃûi-aogu hîna ǁkhā xūna ra ǃkharuǃnâga a hui ǁkhā?

3. Sida hoada mati Gideonni di aiǁgausa xu ǃgâiba a hō ǁkhā?

 ³ ǀHaohâb ǃûi-aogu ge Gideonni di aiǁgausa xu a ǁkhāǁkhāsen ǁkhā. (Heb. 6:12; 11:32) ǁÎb ge ge sâuǃkhai-i xawe ǁkhā ǁaeb ais tsîna Elob di khoena gere kōǃgâ. (ǂHǂh. 2:16; 1Kro. 17:6) Gideonni khami gu ge ǀhaohâb ǃûi-aoga ge ǁgaumâihe, î gu Elob di khoena ǃgom ǁaegu ǃnâ kōǃgâ ǁkhā. (ǃNǃkh. 20:28; 2Tim. 3:1) Gideonni di ǃgamǃgamsenxasib tsî ǁnâuǀnamxasiba xus tsîna da ge xū-e a ǁkhāǁkhāsen ǁkhā. ǁÎb di mâǀgais di ǁkhāsib ge ge ǃâitsâhe ǁîb ǁgaumâisab ra dī hîna. Nēsi da ga ǀhaohâb ǃûi-ao tamas ka io ǀnî hâ ǁgaumâisa ūhâ. Xawe da ge ǁîga da ūba hâ ǃgôaǃgâsib ǃnâ nî kai. Nē ǃgarise ra sîsen gagasi aoga da ge ǂkhâǃnâ ǁkhā.—Heb. 13:17.

4. Gideonna mati ǃgamǃgamsenxasiba ge ǁgau?

⁴ Gideonni ge kaise ge ǃgamǃgamsenxa-i aoba. b Jehovab di ǀhomǃgāb ge Gideonna ge mîba, ǁîb ge ǁhûihesa îb Jehovab di khoena ǀgaisa Mîdiaǁîna xu sī ore. Ob ge ǁîba nē ǀgaub ǃnâ ge ǃeream: “Ti ǀaokhoen ge hoan xa Manaseb ǃhaos ǃnâ a ǂkhabusa khoena, tsî tita ge ti ǀaokhoen mûǁae xū tama khoeta.” (ǂHǂh. 6:15) ǁÎb ge ǁnā ǁgaumâisab anu tama hâ khami gere tsâ. Xaweb ge ge ǂan-i Jehovab huib ǀkhab ǁnāsa a dīhō ǁkhāsa. Jehovab di huib ǀkhab ge Gideonna ǁnā ǁgaumâis ǃnâ ge ǃgâiǃgâ.

5. ǀHaohâb ǃûi-aogu di ǃgamǃgamsenxasiba mati a ǃâitsâhe ǁkhā?

⁵ ǀHaohâb ǃûi-aogu ge ra dītsâ hoaǁae ǃgamǃgamsenxasiba ǁgausa. (Mix. 6:8; ǃNǃkh. 20:18, 19) ǁÎgu ge dī gu ge xūn tsî ǁgaumâidi ǃaroma koasen tama hâ. Xawe ǁkhā ǁaeb ai gu ge mā-am tama hâ. Î gu ǁîgu dīsadi xa ǃaromahe hâse xū tama gu hâ khami tsâ. ǀHaohâb ǃûi-aob ge ǃâitsâga nî hōǃâ. Aiǁgause, ǁîb ge ǂgui ǁgaumâide a hō ǁkhā tsî ēga a mûǂan ǁkhā ǁîde dīǀoaǀoas kaise a ǃgomsa. Tamas ka iob ge ǀgui ǁgaumâisab ge dī ǃkhais ǃaroma a koahe ǁkhā. Tsî naunab ge dī ǀgaub xa a mîǁgaiǁgaihe ǁkhā. ǁNāti-i mâsigu ǃnâ gu ǀhaohâb ǃûi-aoga tae-e Gideonna xu a ǁkhāǁkhāsen ǁkhā?

6. ǀHaohâb ǃûi-aoga Gideonna xu ǃgamǃgamsenxasib xa, tae-e a ǁkhāǁkhāsen ǁkhā? (Ai-īsiba mû re.)

 ⁶ Huiba ǂgan. ǃGamǃgamsenxa khoe-i ge a ǂan hoa xūna î a dīǁoasa. Gideonni ge ge ǃgamǃgamsenxa-i naun aib ge huiba ǂgan amaga. (ǂHǂh. 6:27, 35; 7:24) Gā-ai ǀhaohâb ǃûi-aogu ge ǁkhā xū-e nētsē ra dī. Tonib hîna go ǀnai a ǃhoaǃgaoheb ge ra ǁguiǃā: “Kaikaihe ta ge ǀgaub xa ǃaromahe hâse ta ge ǁnaetība ūhâ. Dī ǁkhā ta a sîsenni xa ǃnāsa-e ūǃoasa. ǁNā-amaga da ge sida omaris ǃoabas ǃnâ ǃgamǃgamsenxasib xa ge ôaǃnâ. Tsî ta ge ti tarasa ge dî, ǁîs tae-e nēs xa ra ǂâisa. Train, Trust, and Empower Others, as Jesus Does ti ǀon hâ vidiob tsîna ta ge jw.org’s ai ge kō.” Tonib ge nauna ge ǂgan tsoatsoa, în ǁîba sîsenni ǀkha hui. ǀAmǂoasa ge tae-i? Tonib ge ra mî: “ǀHaohâb di sîsenni ge ra kōǃgâ-e tsî ta ge nēsi kai ǁaeba ūhâ gagasise kōǃgâsens ǃaroma.”

7. Mîǁgaiǁgaihe gu ga, o gu ǀhaohâb ǃûi-aoga mati Gideonni aiǁgausa a ǁgae ǁkhā? (Jakobub 3:13)

⁷ Khoe-i ga mîǁgaiǁgai du o, tā ǁaixa. ǀHaohâb ǃûi-aogu ra hōǃâ ǀkhara ǃâitsâb ge mîǁgaiǁgaihesa. Gideonni aiǁgaus ge ǁkhawa a hui ǁkhā. ǁÎb ge ge ǂan-i ǀoasa kurusab ūhâ tama hâ ǃkhaisa. Tsîb ge ǁnās ǀkha Efraimǁîgu ge ǁîba a mîǁgaiǁgai, o khoexaǃnâse ge ǃeream. (ǂHǂh. 8:1-3) Gideonni ge ǁgaib ǀkha ge ǃeream tama hâ i. ǁÎb ge ǃgamǃgamsenxasiba ge ǁgau, ǁîga gere ǂhani xū-e ǃgâs ǃnâ-ū. Tsîb ge ǃgâi ǀgaub ǃnâ ge ǃhoa-ūgu hîna ge ǃaromasa î gu ǁîgu tsîna ǃnomsa tsoatsoa. Gā-ai ǀhaohâb ǃûi-aogu ge Gideonna ra ǁgae, ǂōrisase ǃgâs ǃnâ-ū. Tsî mîǁgaiǁgaihe gu ga o khoexaǃnâxase ǃereams ǃnâ-ū. (Khomai re Jakobub 3:13 sa.) ǁNāsa gu ga dī, o gu ge ǀhaohâb di ǂkhîb ai ra ǀaro.

8. ǁGaumâihe hâ ǃgâsaga tae-e nî dī koahe gu ga o? Aiǁgausa mā re.

⁸ Koas hoasa Jehovaba mā. Gideonni ge gere koahe Mîdiaǁînab ge dan amaga. Xaweb ge ǁîba hoa koasa Jehovaba gere mā. ǀHaohâb ǃûi-aogu tsîn ge ǁnāsa a dī ǁkhā. (ǂHǂh. 8:22, 23) ǁGaumâisa ūhâ ǃgâsaga mati Gideonni aiǁgausa a ǁgae ǁkhā? ǁÎgu ra dī xūn hoan ǃnâ gu ge Jehovaba koasa nî mā. (1Kor. 4:6, 7) Aiǁgause, ǀhaohâb ǃûi-aob ga ǁîb ra ǁkhāǁkhā ǀgaub xa koahe o. Ob ge ǁîba ǂâisa Elobmîs tamas ka io Jehovab ǀapeǂhomis ra ǁkhāǁkhāda ǀgaub ai ǂnûi ǁkhā. ǀHaohâb ǃûi-aogu ge nî ôaǃnâsen ǀnîsi gu ǂâisa ǁîgu ai ra ǂnûi ǃkhaisa. Timoteub ti ǀon hâ ǀhaohâb ǃûi-aob di aiǁgausa kō re. ǀAsaseb ge ǀhaohâb ǃûi-aob ase ǁgaumâihe, ob ge kaise ǃhoade māsa ge ǀnam i. ǁÎb ge ra mî: “Kaise ta ge ǃgom ǁgauǁgaute gere sîsenū. Tsî nēs ge ge ǃaroma în nauna ǂgui ǁkhaegu ai koate. Tsûtsûsase î ge ǂâisa tita ai ge hâ i Elobmîs tamas ka io Jehovab ais ose.” ǁAeb ǀkhab ge Timoteuba ǁîb ǁkhāǁkhā ǀgauba ge tawa. Îb tā ǁîb xa ǀgui ǂâi. (ǂKhm. 27:21) ǀAmǂoasa ge tae-i? ǁÎb ge ra ǁguiǃā: “ǃKharagagu ǃgâsan ge ra mîbate, ti ǃhoas ge mati ǁîna a huisa în ǃgomsi-i ǃnâ mâǀgai. Tamas ka io Jehovab ǀgūse tsâ. ǁNāti-i mîdi ge ra ǂkhîǂkhîte. Tita ge ǂgui kuriga ǃkharu tsî gere koahe mîdi xa.”

9. Gideonni ǁnâuǀnamxasib tsî ǁkhoaǂgaosib tsîna mati ge ǃâitsâhe? (Tsoatsoas ai hâ ai-īsiba kō re.)

⁹ Gideonni ge ǂhanuǂhanu-aob ase ǁgaumâihes khaoǃgâ. Î ge ǁîb di ǁnâuǀnamxasib tsî ǁkhoaǂgaosib tsîna ge ǃâitsâhe. ǁÎb ge kaise ǁkhōǁkhōsa ǁgaumâisa ge māhe, îb ǁîb ǁgûb di Bali altarsa dīkākā. (ǂHǂh. 6:25, 26) Gideonni ge ǁîb di khoega ǀhaoǀhaos  khaoǃgâb ge Jehovaba 2 ǃnâde ge mîba bi îb toroǂnûbisa ǀoroǀoro. (ǂHǂh. 7:2-7) ǀAms aib ge ge mîbahe îgu tsuxub ǃnâ ǁnāǂam.—ǂHǂh. 7:9-11.

10. ǀHaohâb ǃûi-aob ǁnauǀnamxasiba mati a ǃâitsâhe ǁkhā?

¹⁰ ǀHaohâb ǃûi-aogu ge “ǃgâidīgu xa ǀoa hâ.” (Jak. 3:17) ǁNâuǀnamxa ǀhaohâb ǃûi-aob ge hoaǁae, xoadi tsî Jehovab ǀapeǂhomis tae-e ra mîs xa a ǂhâǂhâsabahe. ǁNā ǀgaub ǃnâb ge nauna ǃgâi aiǁgausa ra ǁgau. Xawe î ge ǁîb ǁnâuǀnamxasiba noxoba a ǃâitsâhe ǁkhā. ǀNîsib ge daoǁgaude saos xa a ǃgombahe ǁkhā. Tsîb ge ǀnî ǁaegu ai a ǂâi ǁkhā, nē daoǁgausa amabes ǃnâ gā-ai tsî a ǃgâi ti. Tamas ka iob ge ǀnîsi ǁgaumâisa ra hō, hîna nî ǃaromasa îb ǃkhōsis ǃnâ ǂganamǂgāhe. ǀHaohâb ǃûi-aoga mati Gideonni aiǁgausa ǁnāti-i mâsigu ǃnâ a ǁgae ǁkhā?

11. Tae-e ǀhaohâb ǃûi-aoga a hui ǁkhā, î gu ǁnauǀnamxasib xa ǁkhāǁkhāsen?

¹¹ Daoǁgaude ǂōrisase ǃgâ tsî sîsenū. Elob ge Gideonna ge mîba matib ǁîb ǁgûb di altarsa nî dīkākā ǀgausa. Tsî mâpab Jehovaba ǀasa altarsa nî omba ǃkhaisa. Tsî mâ xamanin tsînab ǁguibas ase nî sîsenūsa. Gideonni ge ǁnā daoǁgausa ge dîǃnâ tama hâ i. Xaweb ge Jehovab ge mā daoǁgausa ge dī. Nētsē gu ge ǀhaohâb ǃûi-aoga Jehovab di ǀapeǂhomisa xu daoǁgauna sîǂkhanidi, ǂanǂandi tsî ǀkhara ǀgaugu ǃnâs tsîna ra hō. Hîna sida gagasi tsî sorosi ǂurusib xa hâna. Sida ǀhaohâb ǃûi-aoga da ge a ǀnam, ǁîgu daoǁgauna ra sao amaga. Tsîb ge hoa ǀhaohâba ǁnāpaxu ǃgâiba ra hō.—Psa. 119:112.

12. ǀHaohâb ǃûi-aoga mati Hebreǁîn 13:17 sa a sîsenū ǁkhā ǀpaeǂhomis ga ǀkharaǀkharana dī o?

¹² ǀKharaǀkharasens ǃaroma aiǂhomisen. Jehovab ge Gideonna ge ǂgan, îb ǁîb di khoega 99 persents ǀkha ǀoroǀoro. (ǂHǂh. 7:8) ǁÎb ge ǀnîsi gere ǂâi: ‘Nē ǀkharaǀkharana amase ǂhâbasa-e? Sîsen-i nî?’ Xawe Gideonni ge ge ǁnâuǀnam. ǀHaohâb ǃûi-aogu tsîn ge nētsē Gideonna ra ǁgae, ǁîgu ga ǀapeǂhomis daoǁgausa ga ra dawa xawe sao-ais ǀguisa ga di o. (Khomai re Hebreǁîn 13:17 sa.) Aiǁgause, 2014 nî ǃnâs ge ǂGaeǂguira sorosa salgu tsî kai ǀhaodi ra dī ǃnâ-e salgu ǃgao î mari-e ra māhe ǀgausa ge ǀkharaǀkhara. (2Kor. 8:12-14) ǃKharuge ǁaeb ǃnâs ge ǀapeǂhomisa ǀhaohâga mari-e gere mā, în salga om tsî marisa matare oa. Xawes ge nēsi ǀapeǂhomisa ǀhaohâgu ra mā mari-e ra sîsenū în ǃhūbaib ǂhawase ǂhâbahe hâ salga om. ǀHaohâgu ǂgui mari-e a mā ǁoa xawes tsîna. Joseb ge nē ǀkharaǀkharan xab ge ǁnâu, o gere ǂâi nēs tātsē sîsen tidesa. ǁÎb ge gere mî: ‘ǀGui sali tsîn ge omhe tide. Nē ǀgaub ǃnân ge xūna nēba dīhe tama hâ.’ Tae-e Joseba ge hui îb daoǁgausa sao-ai? ǁÎb ge ra mî: “ǂKhoamîdi 3:5, 6 ǃnâ ra hō-e mîdi ge ge ǂâiǂâiǃnâte, î ta hoaǁae Jehovab ai ǂgomaiǂnûi. Tsî ǀamǂoas ge kaise ge ǃgâi i. ǂGui salgu ǀguiga da ge om tama hâ xawe da ge mari-e  da mati ǂgui ǀgaugu ǃnâ a matare ǁkhā ǀgaub tsîna ge ǁkhāǁkhāsen. Hîna ra ǃaromana î-i mari-e ǃgâise sîsenūhe ǁkhā.”

13. (a) Gideonna mâ ǂgomǃgâsiba ge ūhâ i? (b)  Tsî ǀhaohâb ǃûi-aoga mati Gideonna ǁgae ǁkhā? (Ai-īsiba mû re.)

¹³ ǁKhoaǂgaoxase Jehovab ǂâisa dīs. Gideonni ge Jehovaba ge ǁnâuǀnam, ǁgaumâis ge ǃkhōǂgā hâ i xūnab gere ǃao xawe. (ǂHǂh. 9:17) Jehovaba ge xub ǂkhâǃnâ ra mîsa a hō toas khaoǃgâb ge Gideonna ge ǂan-i, Jehovab nî hui bisa ǁîb di khoenab ra ǁkhauba hîna. Sida sîsenni mā-amhe tama hâ ǃhūgu ǃnâ ra ǁan ǀhaohâb ǃûi-aogu ge Gideonna ra ǁgae. ǁÎgu ge ǁkhoaǂgaoxase aiǁgausa, aoǁnâ sîsenni tsî ǀhaodi dawa ra ǁgau. ǁÎgu ge a ǂan ǀnîsi gu nî ǂganamǂgāhe, ǂnauhe tsî ǁîgu sîsen-e nî ǂoaǃnâ ǃkhaisa. c Kai ǁgâiǀāb ǃnâ gu ge ǀhaohâb ǃûi-aoga ǁkhoaǂgaosiba nî ǂhâ, î gu ǀapeǂhomisa xu gu ra hō daoǁgaude sao. Matikōseb ga ǁnā mâsiba a ǁkhōǁkhōsa xawe. ǁNā daoǁgaudi ge ǀnîsi ǃgom haisi-ams aoǁnâ da nîsa ǃkhōǂgā hâ. Tsî mati da Gogi tsî Magogi di ǁgāǂamsa nî ûiǃkharus tsîna.—Ese. 38:18; J.ǂHa. 16:21.

14. Gideonni di mâǀgaisa mati ge ǃâitsâhe?

¹⁴ Gideonni ǁgaumâis ge sorosi sîsen-e kaise ge ǃkhōǂgā hâ i. Mîdiaǁîn ge ǃui-a gu ra ǃkham hîna a ǃkhoebē o, ob ge Gideonna ǁîna Jesreelsa xu Jordan ǃāb kōse ge sauru. Hîna ge ǁkhūn tsîna ǀnîsa ūhâ îba. (ǂHǂh. 7:22) Gideonna Jordanni tawa ge mâ? Hî-i. ǁÎgu ge tsauhâ î xaweb ge Gideonni tsî ǁîb 300 khoega ǃāba ǃkharu tsî ge aiǃgû saurus ǀkha. ǁNāpaxū gu ge Midiaǁîna ǀhao-ū tsî ǁîga ge dan.—ǂHǂh. 8:4-12.

15. ǀHaohâb ǃûi-aogu mâǀgaisa mâǁae a ǃâitsâhe ǁkhā?

¹⁵ ǀNî ǁaeb aib ge ǀhaohâb ǃûi-aoba sorosise, emosioneelse tamas ka io ǁîgu ǂâiǀgaub ǃnâ tsau hâse a tsâ ǁkhā. ǁÎgu omardi tsî ǀhaohâb tsîna gu ra kōǃgâ amaga.  ǁNāti-i mâsigu ǃnâ gu ǀhaohâb ǃûi-aoga mati Gideonna a ǁgae ǁkhā?

16-17. Tae-e Gideonna ge hui îb mâǀgai? Tsî ǀhaohâb ǃûi-aoga mâ ǂgomǃgâsiba ūhâ? (Jesajab 40:28-31) (Ai-īsiba mû re.)

¹⁶ ǂGomǃgâ re Jehovab nî ǀgaiǀgai dusa. Gideonni ge ge ǂgomǃgâ Jehovab nî ǀgaiǀgaibisa. Tsîb ge Jehovaba amabes ǃnâ ǁnāsa ge dī. (ǂHǂh. 6:14, 34) ǀGui ǃnās aib ge Gideonni tsî ǁîb khoegu tsîna Mîdiaǁîn gao-aoga ǁîgu di ǂaidi ǀkha gere sauru. ǁNā gao-aogu ge ǀnîsi ǃnaiga ge ūhâ i. (ǂHǂh. 8:12, 21) Xaweb ge Jehovaba ge hui gu, î gu ǁîkha sīǃnâ tsî sī ǃkhō ǁkhā. ǀHaohâb ǃûi-aogu ge ǁkhā ǀgaub ǃnâ, Jehovab ai a ǂgomaiǂnûi ǁkhā. ǁÎb hîna ‘tsau tamas ka io ǂkhabu tamaba.’ ǁÎb ge ǁîga ǂkhâgu hâ ǀgaiba nî mā.—Khomai re Jesajab 40:28-31 sa.

¹⁷ Mateub di aiǁgausa kō re, hîna Hospitals ǀkha ra sîsenǁae komites ǁaniba. Tae-e ǁîba ra hui îb mâǀgai? Mateub ge ra mî: “Tita ge Filipeǁîn 4:13 ǃnâ ra hō-e mîde ge hōǃâ. ǂGui ǁaegu ai ta ge kaise tsau hâse ra tsâ. Tsî ta ge kaise Eloba ǃoa gere ǀgore tsî ge ǀkhommabi. Îb soros tsî ǂâis di ǀgaib tsî ǁkhāsib tsîna māte. Î ta ti ǃgâsana hui ǁkhā. ǁNā ǁaeb ǃnâ ta ge Jehovab ǃanu gagaba ge hōǃâ hîna ge ǀgaiba a māteba î ta aiǃgû.” Gideonni khami gu ge sida ǀhaohâb ǃûi-aoga ǃgâsana ra kōǃgâ, ǁîgu ǃgomsina ra hōǃâ xawe. ǁÎgu ge ǃgamǃgamsenxa tsî nî mûǂan hoa xūna gu a dī ǁoasa. ǁKhā ǁaeb ais tsîna gu ge nî ǂgomǃgâ Jehovab ǁîga ǀgaiba nî māsa î gu mâǀgai ǁkhā.—Psa. 116:1; Fil. 2:13.

18. ǃKhōǀhaos ase, ǀhaohâb ǃûi-aoga tae-e Gideonna xu a ǁkhāǁkhāsen ǁkhā?

¹⁸ ǀHaohâb ǃûi-aogu ge ǂgui xūna Gideonna xu ǁkhāǁkhāsen ǁkhā. ǁÎgu ge ǃgamǃgamsenxasiba nî ǁgau, sîsenni hîna gu ra ūǃoa-i ǃnâ. Tsî koahe tamas ka io gu ra mîǁgaiǁgaihe ǁaeb ais tsîna. Nē ǃhūbaib di ǀams ra ǀgū khami gu ge, ǃnāsase ǁnâuǀnamxasib tsî ǁkhoaǂgaosib tsîna nî ǁgau. Tsî gu ge nî ǂgomǃgâ mâ ǃgomsi-i hoa-e gu ga hōǃâ xaweb Jehovaba nî ǀgaiǀgai gu sa. Ama as ge sida ǀnamxaǃnâ ǃûi-aoga da ge kaise ra ǃgôaǃgâ. Tsî da ge ‘ǁîb khami īna ǃgôasiba ra mā.’—Fil. 2:29.