1-2. Loti khamin Xrîsteǁîna mâ ǃgomsina ra hōǃâ?

 NĒ ǃHŪBAIB ra ǂkhâǃnâ ǁgai ǀgaugu xa da ga ǂgâi, o da ge ǂhanu-ai aob Loti khami ra tsâ. ǁÎb ge “tsēsa xu tsēs ǁga gere tsûtsûhe, ǁîn di ǂhanuo sîsengu xa.” ǂAn î ge i amaga Jehovab ǁgai tanisen ǀgauga ǃhui hâsa. (2Pet. 2:7, 8.) Loti ge Jehovabab ge ǀnam-i tsî gere ǃgôa amaga, ǁnā khoen ûhā ǁgai ǀgauga xu ge hâbe.Sîda tsîn ge Jehovab di ǀgauga ǃgôaǃgâ tama khoen ǁaegu hâ. Xawe da ge sîda tsîna ǁnā ǀgauga xu a ǂgōsen ǁkhā. Jehovaba da ga ǀnam tsî eloǃaoǃgâxasiba ūhâba o.—ǂKhm. 14:2.

² Jehovab ge ra hui da î da ǁnāsa dī, ǂkhoamîdi ǂkhanis ǃnâ-ū. Hoa Xrîsteǁî aorekhoegu, tarekhoedi, ǂkhaman tsî kairan tsîn ge ǃgâiba ra hō ga-ai ǁnamas ǁnāpa hâsan ga ūǃoa o.

3. ǂKhoamîdi 17:3 ǃoagu i mâ ǃaromade hâ sida ǂgaoga da nî ǁkhaubas dide? (Ai-īsiba mû re.)

³ Jehovab sida ǂgaoga ra ôaǃnâ amaga, î ge a ǂhâǂhâsa ǂgaoga da nî ǁkhaubasa. ǁÎb ge nau khoen da mûs xa ǃgamse ra mû tsî a ǂan mâ khoeda asa. (Khomai re ǂKhoamîdi 17:3 sa.) ǁÎb ge nî ǀnamda ǁîb di ǀapemādi xa da ga ǂâi o, hîna ǀamo ûiba nî mādate. (Jhn. 4:14.) ǁNā-amaga da ge nē ǃhūbaib di ǁgai ǀgaugu tsî ǁgâuab di ǂhumib xa tsâǀkhā-e tide. (1Jhn. 5:18, 19) Jehovaba da ra ǀgū khami î ge sida ǀnammi tsî ǃgôaǃgâsib ǁîba da ūba hâba nî kai. Sida ǁGûba da tsûtsû ǂgao tama hâ amaga da ge ǁoreb xa ǂâis tsîna nî ǃhui. ǃÂitsâhe da ga o tsū xū-e dīsa, o  da ge nî dîsen: ‘Mati ta ǂanapegase nēti go kai ǀnamma ra ǁgaute khoe-e ni tsûtsû?’—1Jhn. 4:9, 10.

4. Eloǃaoǃgâxasiba mati ǀgui ǃgâsasa ge hui îs tā ǃâitsâgu ǃnâ māǁnâsen?

⁴ Martas, ǃgâsas hîna Kroatiab ǃnâ ra hâs tsî ǃgâi tama hâ ǁgoe-ūgub ǀkha ge ǃâitsâhes ge ra mî: “Kaise ta ge ge ǃgombahe i ǃgâise ǂâisa. Tsî ǁnā ǁoreb tsâsiga dansa, ǁaerob di ǁkhoab ǀguisa î-i amaga. Xawe Jehovaba ǃaos ge ge huite.” b Eloǃaoǃgâxasiba nēsa mati ge īǁkhā kai? Martas ge ra mî, ǁîs nē mîǁguib ga hau hâ ǃgomsigu xa gere ǂâi. Sida ge ǁkhā xū-e a dī ǁkhā. Hoan xa a ǁgai xu-i ge, Jehovaba î ge ni tsûtsû. Tsî da ge ǁîba ǀamosib kōse ǃoaba tide.—Gen. 6:5, 6.

5. Leob di aiǁgausa xu du tae-e ra ǁkhāǁkhāsen?

⁵ Jehovaba da ga ǃao, o da ge ǁnān hîna ǁgai xūna ra dīn ǀkha ǀhōgu tide. Leob hîna Kongob ǃnâ ra hâb ge ǁnā-e ge ǁkhāǁkhāsen. Haka kurina ǁîb ǁāǁnâs khaoǃgâb ge, ǁgai xūna ra dī khoen ǀkha ge ǀhōsagu tsoatsoa. ǁÎb ge ge ǂâi ǁgai xūnab ga dī tama io, ob Jehovab ǃoagu ǁore tama hâsa. ǁNā ǁgai ǀhōsan ge ge ǃaroma îb xûi-e kaise ā tsî ǃâi tama ǁgoe-ūgun ǃnâ ǁhao. ǁÎb Xrîsteǁî ǁgûn xab ge ǁkhāǁkhāhe xūn xab ge ge ǂâiǃgâ. Tsî ǂkhîb hînab ge ǂoaǃnâb xas tsîna. ǀAmǂoasa ge tae-i? ǃGâiseb ge ge ǂâi tsoatsoa tsî ǂhanu xūn tsîna ge dī. ǀHaohâb ǃûi-aogu di huib ǀkhab ge ǁkhawa Jehovaba ǃoa ge oaǀkhī. Nētseb ge ǂkhîse ǀhaohâb ǃui-aob ase ra ǃoaba tsî ǀō-aisa aimâba-aob ases tsîna.

6. Mâ ǀgam tarekhoera di aiǁgausa da nēsi nî ǃhoaǃgao?

⁶ Hā re î da ǂKhoamîdi di 9ǁî danaǃâsa ǃhoaǃgao. ǁNāpa da ge gā-aisib tsî  gâresib xa ra khomai, ǀgam tarekhoera xa ra ǂnûǁkhaebahese. (ǀGopeǀnō re Rom. 5:14; Gal. 4:24.) ǁNāsa da ra dī khami ǂâis ǃnâ ūhâ re, ǁgâuab di ǃhūbaib ge ǃgâi tama ǁgoe-ūgudi tsî ǀōǀkhā khoen xūna kōs xa a ǃgâibahe. (Efe. 4:19) ǁNā-amaga î ge a ǂhâǂhâsa, î da aiǃgû eloǃaoǃgâxasiba ūhâsa tsî ǁgai xūna xu ūdawasen. (ǂKhm. 16:6) Hoa da ge nē danaǃâs ra mā xūna xu ǃgâiba a hō ǁkhā, nēsi da ga aore tamas ka io tare xawe. Nē ǀgam tarekhoera ge ǁkhauǂuisa ra māse ra ǁguiǃāhe, ǀgaisa ǂansa ūhâ tama hân tsî “ǁnâuǃāoǃnân” ǃoagu. Mâ khoes hoas ge ǀnî mîdi ǃnâ ra mî: ‘Ti omsa ǃoa hā re î da ǂûǀhaosa ūhâ’. (ǂKhm. 9:1, 5, 6, 13, 16, 17) Xawe ǁnān hîna nē ǁkhauǂuisa ra ǃkhōǃoan di ǀamǂoas ge a ǃkharagagu.

7. ǂKhoamîdi 9:13-18 ǃoagu, tae-e ǁnān hîna gâre khoes di ǁkhauǂuisa ra ūǃoan ǀkha ra ī? (Ai-īsiba mû re.)

⁷ ‘Gâre tarekhoes’ di ǁkhauǂuis xa khomai re. (Khomai re ǂKhoamîdi 9:13-18 sa.) ǁÎs ge ǁkhoaǂgaoxase ǁnâuǃāoǃnâna ra ǁkhau, “hā” ī tida ǀkha ǂûǀhao. ǀAmǂoasa ge tae-i? “ǁŌb ǁnāpa hâ ǃkhaisan ge a ǀū.” ǁKhā xū-e du ge ǀnîsi ra ǂâiho, ǂkhoamîdi ǂkhanis ǃnâ ra ǃhoaǃgaohe-e. ‘ǂGaeǂkhapuxa ǀgai-aosa’ xu da ge ra ǃkhâikhom-e. Mîbahe da ge ra “ǁîs ǁkhausaben ǃgamse ǁōhan hâǃkhaib ǃnâ hâsa.” (ǂKhm. 2:11-19) ǂKhoamîdi 5:3-10 ge ǀnî hâ ǃkhâikhomsa ūhâ ǂgaeǂkhapu ra ǀai-aos xa, “ǂaira âs ge ǁob ǃoa ra ǂgaeǂgui.”

8. Tae-e da nî ǁhûi?cb

⁸ ǁNān hîna ‘gâre khoes’ di ǁkhauǂuis xa ra ǁnâun ge nî ǁhûi. Nē ǁkhauǂuisan da ūǃoa tamas ka io ūǃoa tama hâsa. Sida tsîn ge ǁnāti-i mîǁguiba ǀnîsi nî dī. Tae-e da nî dī ǃgâi tama hâ ǁgoe-ūgu ǀgaub ǀkha da ga ǃâitsâhe-o? Tamas ka io da ga ǀōǀkhā khoen di ai-īsiga mû o?

9-10. Mâ ǃaromadi ǃgao da ǃgâi tama hâ ǁgoe-ūgu ǀgauga xu nî ǂgōsen?

⁹ Kaise ǃgâi ǃaroma di ge hâ, î da ǃgâi tama hâ ǁgoe-ūguba xu ǂgōsen. ‘Gâre khaikhoes’ ge ra ǁguiǃāhe nētis da mîse: “ǃNarihe hâ ǁgam-i ge ra ǁkhoa.” “ǃNarihe hâ ǁgamna” a tae? Elobmîs ge ǃgamme hâ khoe-aogu ra di ǁgoe-ūguba, khoakhoa ra ǁgammi ǀkha ra ǀgopeǀnō. (ǂKhm. 5:15-18) ǃGamme hâ khoe-aogu ra ge Elobmîs ǃoagu mā-amhe hâ îra sorosi ǁgoe-ūguba xu ǃgâiba hō. ǁNā î ge “ǃnarisa ǁgamme” xu a ǀkhara, hîna ǃgâi tama hâ ǁgoe-ūguba ǃoa ra ǁnaeǁgauba. ǁNān hîna ǃgâi  tama hâ ǁgoe-ūgu ǀgaugu ǃnâ ra ǃân ge ra sâu, ǃnari-aob hîna ǃnarib go xūna ra sâub khami. ǁNā ‘ǃnarisa ǁgammi’ ge kaise ǂhense ra ǁkhoa, ǁnân hîna nēn ǃnâ ǃâ-e ūhân ǃaroma. ǁÎn ra ǂâi xui-ao, khoen tae-en go dīsa ǂanǂuihō tidesa. Kaise tsûtsû gāxaǃnâ ǂâi ǀgaub ge ǁnāpa, Jehovab ge hoana ra mû. Tsî ǁîb di ǀhōsagusisa ǂoaǃnâs ge kaisa a au. ǁNā î ge tātse ǂhen tamas ka io “ǁkhoaxa” tama hâ. (1Kor. 6:9, 10) Xawe î ge ǃnāsa-e hâ.

¹⁰ ǃGâi tama hâ ǁgoe-ūgu ǀgaugu ge taoba a ǃaroma ǁkhā. ǁGaise a tsâ kai du ǁkhā tsî ǂhâbasa tama hâ ǀgamǀkhan tsî omaridi tsîna a ǀgora ǁkhā. Amase î ge nî gā-ai gâre khoes di ǁkhauǂûisa ūǃoa tama-i tsî ǁîs ǀkha ǂûǀhao tama īsa. ǃGâi tama hâ ǁgoe-ūgun ǃnâ ra ǁhao khoen ge gāgāsise ǀgui ǁō tama hâ. Xawen ge ǀaegu tsîna a hōǁkhā ǃgaman ǁkhā ana. (ǂKhm. 7:23, 26) 18ǁÎ ǁaraǃās 9ǁî danaǃâs dis ge sao rase ra ǀam kai: “ǁÎs ǁkhausaben ǃgamse ǁōhân hâǃkhaib ǃnâ hâsa.” Tae-i ǃaroman ǂgui khoena, ǁîs di gāxaǃnâ ǁkhauǂuisa ra ūǃoa hîna kai tsûba ra ǃaromasa?— ǂKhm. 9:13-18.

11. Tae-i ǃaroma i kaise a ǁkhōǁkhōsa ǀōǀkhā khoen xūna kōsa?

¹¹ ǀGui kai xū-i hîna da nî ǂgōsen î ge, ǀōǀkhā khoen xūna kōsa. ǀNî khoen ge ra ǂâi ǀōǀkhā khoen xūna kōs ge tsū tama di. Xawe î ge ǀōǀkhā khoen xūna kōsa, khoena a tsûtsû ǁkhā tsî ǃgôasiba a ǂoaǃnâ kâisen ǁkhā. Tsî du ge nau khoen tsîna ǃgôasiba ūhâba tide, kaise î ge a ǃgom nē xūna kō ǀûsa. ǀŌǀkhā khoen ai-īsigu ge khoen di ǂkhûdi ǃnâ ra hâ ǀgara tsî ǃgomse ra ǀuruhe. Tsî ǃnāsa î ge ǀōǀkhā khoen xūna kōs ge sida ǃnâ hâ, ǃgâi tama turaga ǃgam tama xawe ra ûiûi. (Kol. 3:5; Jak. 1:14, 15) Îo, nē xūna ra kō khoen ge ǃgâi tama hâ ǁgoe-ūgun ǃnâ ra ǁhao.

12. Mati da ra ǁgau ǁgoe-ūgub tsâsiga ra omkhâi ai-isiga xu da ra ǂgōsensa?

¹² Xrîsteǁîn ase da tae-e nî di, ǀōǀkhā khoen di ai-īsigu ga sida selfongu ai ǁgau o? ǃKhaesa da ge nî ûbe tsî kō tide. Nēsa dīs ǀkha da ge nî hui-e ǂâiho da ga a o, sida di ǀhōsagusis Jehovab ǀkha da ūhâs a ǀō-aisa ǃkhaisa. ǀNî ai-īsin ge ǀōǀkha khoen di tama hâ xawe ǃgâi tama ǂâi ǀgauba sida ǃnâ a omkhâi ǁkhā. Tae-i ǃaroma da ǁîna xu nî hâbe? Sida di ǂgaoga ǃnâs tsîna da ge ǃgamme khôas xa ǂâi ǂgao tama hâ. (Mat. 5:28, 29) ǀHaohâb ǃûi-aob Thailandi ǃnâ ra hâb Davib ti ǀon hâb ge ra mî: “Dîsen ta ge ra: ‘Ai-īsigu ga ǀōǀkhā khoena ǃkhoǂga tama i xawe ta ga ǁîna a kō o, Jehovaba mati ǁnās xa nî tsâ?’ Nē ǂâi ǀgaub ge ra huite î ta gā-aise tanisen.”

13. Tae-e ra huida î da gā-aise tanisen?

¹³ Jehovaba ǃaos ge nî hui da î da tā ǁîba nî ǂkhî-oǃnâ kai xu-e dī. ǁNās ge nî huida î da gā-aise tanisen. ǃKhūba ǃaoǃgâs ge ǂans di ‘tsoatsoasa’ tamas ka io ǃanub di ǂans ge “ǁnâuǃāba hōsa.” (ǂKhm. 9:10) Nēs ge ǃgāsa ǀgaub ǃnâ ǂKhoamîdi 9ǁî danaǃâs ǃnâ ra ǁguiǃāhe. ǁNāpa da ge tare khoes xa ra khomai, ǁîs ge ama “gā-aisib” ase ra ǁguiǃāhe.

14. Mâ ǀkhara ǁkhauǂuisa da ǂKhoamîdi 9:1-6 ǃnâ ra hō?

¹⁴ Khomai re ǂKhoamîdi 9:1-6 sa. ǁNāpa da ge Jehovaba xu ra hā ǁkhauǂuis xa ra khomai, Kuru-aob tsî gā-aisib di Tsoatsoa-aoba. (ǂKhm. 2:6; Rom. 16:27) Nēpa da ge kai oms hû pillarde ûhâs xa ra khomai. Jehovab ge māxa tsî hoana ra ǁkhoreǁhare în ǁîb di gā-aisiba sîsen-ū.

15. Eloba tae-e ra ǁkhauǂuida, dī ta nî-e?

 ¹⁵ Jehovab ge a māxa tsî ǃnâsase ra mā da. Tarekhoes ‘ama gā-aisiba’ ra ǂnûǁkhaebas ǂKhoamîdi 9ǁî danaǃâs ǃnâ hâsa xu da ge ra ǁkhāǁkhāsen, Jehovaba a māxa ǃkhaisa tsîb sida ǂgui ǃgâi xūna ra māsa. Nē xoas ge ra mî nē tarekhoes ǃhaokhoena ǁkhauǂui hâsa în ǁîs oms ǃnâ ǂâxa. Tsî ǁkhoaxase ǁgan-e ra ǂûsa, ǁîs go aiǂhomi ǂâuxûi-i ǀkha. (ǂKhm. 9:2) Aiǃgû tsî î ge 4 tsî 5ǁî ǁaraǃādi ǃnâs ge ǁnâuǃāoǃnâba ǃoa ra mî: ‘Hā i ti pereba ǂû.’ Tae-i ǃaroma da nē tare khoes di ǁkhauǂûisa nî ūǃoa? Jehovab ge ǁîb ǀgôan nî gā-ai tsî ǃnōrasase nî hâsa ra ǂhâba. ǁÎb ge ǂhâba tama hâ î da, dīsā tsî tsûtsûhe. ǁNā amagab ge “ǂhauǃnâ khoena hui tsî ra ǃgâiǃgâxa kai”. (ǂKhm. 2:7) ǀNōsa eloǃaoǃgâxasiba da ga ūhâ, o da ge ǁîba nî ǂkhîǂkhî ǂgao. ǁÎb di gā-ai ǁnamasa da ge ra ǃgâ tsî ǁîsa ra ûiǂûi.—Jak. 1:25.

16. Eloǃaoǃgâxasiba mati Alaina ge hui, îb ǃgâi mîǁguiba dī? Tsî nēs di ǀamǂoasa ge tae-i?

¹⁶ Kō re mati î ge eloǃaoǃgâxasiba, Alaina a huisa îb ǃgâi mîǁguiga dī. Alaini ge a ǀhaohâb ǃûi-ao tsî a ǁgauǃnâ-ao, ǁîb ge ra mî: “ǂGui sīsenǁhare-aon tîn ge ǀōǀkha khoen xuna gere kō tsî gu ge ǁnāsa xu gu, xū-e ra ǁkhāǁkhāsen ti gere mî.” Xaweb ge Alaina ge ǂgan-i nē-i ama tama hâsa. ǁÎb ge ge mî: “Jehovabab a ǀnam tsî ra ǃgôaǃgâ amagab ge ge ǂkhā ǁnāti-i movina kōsa. Tsî ta ge ǁnā ǃaromasa ti sīsenǁhare-aogu tsîna ge mîba.” ǁÎb ge saora ǀapemāsa gere sao, “ǁnâuǃāxa daoba sao.” (ǂKhm. 9:6) Alaini di sîsenǁhare-aogu ǀnî gu ge ǁîb ge dī mîǁguiba xa ge ǃgâibahe i. Tsî nēsi Elobmîsa ra ǁkhāǁkhāsen tsî ǀhaode ra hâǃnâ.

17-18. Ama “gā-aisib” ǁkhauǂuisa ra ūǃoana mâ ǃgâiba nî hō? Tsîn tae-e ǃoa a mûǂui ǁkhā? (Ai-īsiba mû re.)

¹⁷ Jehovab ge ǁnā ǀgam tarekhoera di aiǁgausa ra sīsen-ū, îb ǁgauda mati da ǂkhîxa hānîǁaeba nî ūhâsa. ǁNān hîna “gâre tarekhoes” di ǁkhauǂuisa ra ūǃoan ge ǁoaxa xūna ra ôa, ǃgai tama hâ ǁgoe-ūgu ǀgaub ǃnâ. ǁÎn ge mûǂan tama hâ, ǁnān ra dī xūn ǁîn ǀkha hâna nî ǁaeb ǀkha tsâǀkhāsa. ǁÎn di ǀamǂoas ge “ǃgamse ǁōhân hâǃkhaib ǃnâ hâ.”—ǂKhm. 9:13, 17, 18.

¹⁸ ǁNān hîna tarekhoes ama “gā-aisiba” ra ǂnûǁkhaebas, di ǁkhauǂuisa ra ūǃôan ge ǃgâi hānîǁaeba nî ūhâ. Tsî ǁîs ǃhaokhoen ge a ǂkhî, ǁîn Jehovab ǀgūse nî tsâ kain xūna ūhâ amaga. (Jes. 65:13) Kēbo-aob Jesajab ǃnâ-ūb ge Jehovaba ra  mî: “ǂŌrisase ǃgâ te, î ǃgâi a-e ǂû, tsî ǂoaǂamsa ǂû-i ǀkha ǃgâiǃgâisen.” (Jes. 55:1, 2) ǁKhāǁkhāsen da ge ra, î da Jehovab a ǀnam xūna ǀnam tsî ǁîb ǁkhân hâna ǁkhân. (Psa. 97:10) Tsî da ge a ǁkhoaxabahe nauna huisa în, ǃgâiba hō ama “gā-aisiba” xu. Sida ge ǁnā ǃoaba-aon khami ī hîna ǃās di ǀgapiseba xu ra ǂgaiǂuina: ‘ǁNâuǃāoǃnâna ân nēpa ǂâxare.’ Sida tsî ǁnān hîna nē ǁkhauǂuisa ra ūǃoan ǃaroma hâ ǃgâib ge nēsi ǀgui hâ tama hâ. ǁÎn ge ra ‘hâhâ’ tsî ra mā-am da î da ǀamosib kose hâ, ‘ǁnâuǃāxa daoba ra saose.’—ǂKhm. 9:3, 4, 6.

19. Aoǁnâ-aob 12:13, 14 ǃoagu da tae-e nî mîǁgui dīsa? (Mû re boksisa “ Eloǃaoǃgâxasiba xu da ge ǃgâiba ra hō.”)

¹⁹ Khomai re Aoǁnâ-aob 12:13, 14 sa. Ab eloǃaoǃgâxasiba aiǃgû tsî sadu ǂgaoba ǁkhauba. Tsî hui du î du gāgāsise ǀgaisase hâ nē ǀuni tsēdi ǃnâ. Aiǃgû tsî da ge ǂguina nî ǁkhau în ama “gā-aisiba” ôa tsî Jehovaba xu ǁkhāǁkhāsen. ǁÎba da a ǀnam tsî ra ǃgôaǃgâ amaga, sida di ǂgaogu hoagu ǀkha da ge nēsa ra dī.