1. Tae-e da ni dī î da Jehovab di tsēsa ûiǃkharu?

 ELOBMÎS ga ‘Jehovab tsēs’ xa ǃhoa, os ge ǁaeb ǁîb di khākhoenab nî dīkākās tsî ǁîb di khoenab ni sâus xa ra ǃhoa. ǃKharuge ǁaeb ǃnâb ge Jehovaba, ǁaegu ai ǀnî ǃhaode gere ǁkhara. (Jes. 13:1, 6; Ese. 13:5; Sef. 1:8) Sida tsēdi ǃnâs ge ‘Jehovab tsēsa’ Babilons kais di ǁgāǂams ǀkha nî tsoatsoa. Tsî Armagedons tawa nî ǀam. ǁNā “tsēsa” ûiǃkharus ǃaroma da ge nēsi ǀnai nî aiǂhomisen. Jesub ge ge ǁkhāǁkhā “kai ǁgâiǀāb” ǃaroma da ge aiǂhomisens ǀguisa di tide. Xawe da ge “ǂhomisen hâse nî hâ.”—Mat. 24:21; Luk. 12:40.

2. Tae-i ǃaroma da 1 Tesalonikaǁîna xū ǃgâiba a hō ǁkhā?

² ǁÎb di ǂguro sîǂkhanis Tesalonikaǁîna ǃoab ge xoas ǃnâb ge Pauluba ǂgui ǁgauǁgaude gere sîsenū. Îb Xristeǁîna hui în Jehovab di kai tsēs ǃaroma aiǂhomisen. Paulub ge ge ǂan-i Jehovab di tsēs ǁnā ǁaeb ai hā tidesa. (2Tes. 2:1-3) Xaweb ge ǁîb di ǃgâsana ge ǂkhâǃnâ în ǁnā tsēs ǁari nî hā khami aiǂhomisen. Sida tsîn ge ǁkhā ǀapemāsa a sao ǁkhā. Hā re î da ǁîb ge saora xūna a ǁguiǃā ǀgauba ôaǃnâ: (1) Jehovab di tsēs mati nî hāsa, (2) ham-e ǁnā tsēsa ûiǃkharu tide tsî (3) mati da a aiǂhomisen ǁkhā î da ǁnā tsēsa ûiǃkharu.

3. Jehovab di tsēsa mati ǃnari-aob khami ǃui-a nî hā? (Ai-īsiba mû re.)

³ ‘ǃNari-ao-i khami tsuxub ǃnâ.’ (1Tes. 5:2) Nē di ge  ǃnona mîdi hîna Jehovab di kai tsēs di hāsa ra ǁguiǃāde. ǃNari-aogu ge ǃkhaese xū-e ra dī tsî ǃnāsa ǁaeba ǁnāsa ǃuia ra dī. Khoen ǁnā ǁaeb ai ǁîga ǃâubasen tama hâ amaga. Jehovab di tsēs tsîn ge ǃkhaese khoen ǃâubasen tama hâ ǁaeb ai nî hā. Ama xristeǁîn tsîn ge ǀnîsi nî buru xūn ǃkhaese ra ī amaga. Xawe eloxoresan khami da ge sida dīkākāhe tide.

4. Mâ ǀgaub ǃnâs Jehovab di tsēsa ǁora tsûb khami ī?

⁴ “ǁOratsûb ǀgamǀkhā taras dib khami.” (1Tes. 5:3) ǀGamǀkhā kaikhoes ge a ǂan, mâ tsēs ǀgôaro-e nî hōsa. Xawes ge ǁaeba a ǀū. ǂAns ge a ǁnā ǁaeb nî hāsa. ǁNā ǁaeb ga hā o, os ge kai tsûb hîna mâ tama hâba nî hōǃâ. ǁKhā ǀgaub ai da ge ǀū Jehovab di tsēs mâ tsēs tamas ka io īri ǃnâ nî hāsa. Xawe da ge a ǂan, Elob di ǀgoraǃgâs tsēs eloxoresa khoen ǃoagu hâs ge ǃkhaese nî hā. Tsîn ge ǁîsa xū ǃkhoebe hō tide.

5. Kai ǁgâiǀāba mati ǁgoas khami ī?

⁵ ǁGoas khami. Paulub di ǃnonaǁî ǁgauǁgaus ge ǃnari-aogu, hîna ǃuia ra ǃnarigu xa hâ. Xaweb ge Pauluba dawa tsî Jehovab di tsēsa ǁgoas ǀkha ra ǀgopeǀnō. (1Tes. 5:4) ǃUia ra ǃnari khoegu ge ǁnātikōse hoaǁae xūna ra dī. Tsî ǁnā-amaga ǀnî ǁaegu ai ǁaeba kō tama hâ. ǁGoas di ǃnâb ge ǁîgu ǃâubasen tama hâ ǁaeb ai, a ǃnâ ǁkhā. Tsî gu ge a mûhe ǁkhā. Kai ǁgâiǀāb ge ǁkhā ǀgaub ǃnâ, ǁnān hîna ǃnari-aogu khami ǃkhaeb ǃnâ Elob ǃhui hâ sîsenga ra dīna nî mûsen kai. Xawe da ge sida nēsi Elob ǃhui hâ xūna xu nî hâbe. Tsî da ge aiǃgû tsî “ǃgâisib, ǂhanu-aisib tsî ǂgomǃgâsib” tsîna nî ôa. (Efe. 5:8-12) Saoraseb ge Pauluba 2 ǁgauǁgaude ra sîsenū, hîna ǁnā tsēsa ûiǃkharu tidena ra ǁguiǃāde.

6. Mâ ǀgaub ǃnân khoena ǁom hâ? (1 Tesalonikaǁîn 5:6, 7)

⁶ ‘ǁNān ǁom hâna.’ (Khomai re 1 Tesalonikaǁîn 5:6, 7 sa.) Paulub ge ǁnān hîna Jehovab di tsēsa ûiǃkharu tidena ǁom ra khoen ǀkha ra ǀgopeǀnō. ǁÎn ge ǁaeb tamas ka io tae-i ǁîn ǂnamipe ra īsa a ǀū. ǁNās ǀkhan ge ǂhâǂhâsa xū-i ga īo a ǀū tsî xū-e ǁnās xa a dī ǁoa. ǂGui khoen ge nētsē gagasise ǁom hâ. (Rom. 11:8) ǁÎn ge “ǀuniga tsēdi” ǃnâ da ûi hâsa ǂgom tama hâ. Tsîb kai ǁgâiǀāba ǀae nî hās tsîna. Kai ǀkharaǀkharan hîna ǃhūbaib ǃnâ ra īn ge ǀnîna a ǂkhâǃnâ ǁkhā. În Gaosib di haisi-amsa ǃgâ tsoatsoa. Xawen ge ǀnîna ǁoms ǀguisa ra di. ǀNîn hîna ǀgoraǃgâs di tsēs ǃnâ ra ǂgoman ge ra ǂâi, ǁnās kaise a ǃnūsa. (2Pet. 3:3, 4) Xawe da ge sida a ǂan, mâ tsēs hoas ra ǃkharu khami i haisi-amsa ra ǂhâǂhâsa kai ǃkhaisa.

7. ǁNān hîna Jehovab di tsēs ai nî dīkākāhena mati ǀhoro hâ khoen khami ī?

⁷ “ǁNān hîa ra ǀhoron.” Apostel Paulub ge ǁnān hîna Elob xa nî dīkākāhena ǀhoro hâ khoen ǀkha ra ǀgopeǀnō. ǀHoro hâ khoen ge tae-i ǁîn ǂnamipe ra īsa a ǀū. Tsî ǁnā amaga ǃgâi tama mîǁguiga ra dī. ǁKhā ǀgaub ǃnân ge eloxoresa khoena Elob ra mā ǃkhâikhomte ǃgâ tama hâ. ǁÎn ge dīkākāhe ǁkhān a ûi ǀgauba ra ǁhûi. Xawe Xristeǁîn ge ra mîbahe, în ǂkhaikarise tsî ǃgāsases tsîna hâ. (1Tes. 5:6) ǀGui Elobmîs ôaǃnâ-aob ge ǃgāsasiba nē ǀgaub ǃnâ ra ǁguiǃā: “Khoe-i hîna a ǃgāsa-i ge a ǃnomsa tsî ǂhanuse ra ǂâi. Î-i ǃgâi mîǁguiba dī ǁkhā.” Tae-i ǃaroma da ǃnomasa tsî ǃgāsase nî hâ? Nēs ge nî hui, î da tā nē ǃhūbaib di xūn tsî politiks tsîn ǃnâ ǃâ-e ǁhûi. Nē xūn ǃnâ ǃâ-e ūhâs di ǁgâib ge ǀgaisas ǀguisa nî di, Jehovab di tsēs ra ǀū khami. Xawe da ge ǁîna da nî ǃeream ǀgaub xa ǂâiǂhansen tide. Jehovab di gagab ge nî hui, î da ǃnomsase hâ tsî ǃgāsa ǃgâiǂâis tsîna ūhâ tsî ǃgâi mîǁguiga dī.—Luk. 12:11, 12.

8. 1 Tesalonikaǁîn 5:8 ǃoagu da mati ǂkhaikarise nî hâ? (Ai-īsiba mû re.)

⁸ “Î da ǁkhaiǁkhausarab. . . tsî . . . toroǀgapas” tsîna ana. Paulub ge soldagu hîna ǂkhaikarise ra hâ gu tsî torob di sarana ana hâ gu ǀkha ra ǀgopeǀnō da. (Khomai re 1 Tesalonikaǁîn 5:8 sa.) Soldab ge ra ǂgaoǀkhāhe îb hoaǁae ǃkhams ǃaroma aiǂhomisen. ǁNās ge sida ǀkha a ǀgui. Jehovab di tsēs ǃaroma da ge aiǂhomisen hâse ra hâ. ǂGoms tsî ǀnammi di ǁkhaiǁkhausaraba da ga ana o. Tsî ǃâubasens di toroǀgapas tsîna. Nē ǀgaugu ge kaise a huida ǁkhā.

9. Sida ǂgomsa mati ra ǁkhauba da?

⁹ ǁKhaiǁkhausarab ge soldab ǂgaoba ra ǁkhauba. ǂGoms tsî ǀnammi tsîn ge sada di ǂgaoba ra ǁkhauba. ǁÎn ge ra hui da, î da aiǃgû Eloba ǃoabas ǃnâ tsî Jesub tsîna sao. ǂGoms ge ra ǂâiǂâiǃnâ da ǂgomǃgâsiba da a ūhâ ǁkhāsa, Jehovab ǁîba da sida ǂgaob hoab ǀkha ra ôa amaga nî mādawamsa. (Heb. 11:6) Tsî î ge nî hui da, î da Jesub ǃoagu ǂhauǃnâse hâ ǃgomsina da ga hōǃâ xawe. Sida ǂgomsa da ge a omkhâi ǁkhā naun di aiǁgaude xu ǁkhāǁkhāsens ǃnâ. Aiǁgause, ǃgâsan hîna ge mâǃoahen tamas ka io marisi ǃgomsina gere hōǃâna. Xawe noxoba ǁîn di ǂgomsa ǀgaisase ra ūhâna xus tsîna. Tsî da ge mari ǀnamsa xu a ǂgōsen ǁkhā, ǁnān hîna  ge Gaosib ǃaroma ǀgui ǃgupu ûiga ra ûin di aiǁgaude ǁgaes ǃnâ-ū. b

10. Elob tsî sida ǁanǁare-aon tsîna ǀnamsa mati ra hui da î da mâǀgai?

¹⁰ ǀNammi ge kaise ǂhâǂhâsa, ǂkhaikari tsî ǃgāsase da ga hâ ǂgao o. (Mat. 22:37-39) Eloba da ūba hâ ǀnammi ge ra hui da, î da aoǁnâ sîsenni ǃnâ mâǀgai ǃgomsina da ga hōǃâ xawe. (2Tim. 1:7, 8) ǁNān hîna Jehovaba ǃoaba tama hân tsîna da a ǀnam amaga da ge aiǃgu tsî ǁîn di ǂkharis ǃnâs tsîna ra aoǁnâ. Selfongu tsî sîǂkhanidi ǃnâ-ūs tsîna. ǃÂubasen da ge ra sida ǁanǁare-aon tsîn ǀgui tsē ǀkharaǀkharana dī tsî ǂhanu xūna nî dīsa.—Ese. 18:27, 28.

11. ǃGâsana da ūba hâ ǀnamma mati ra hui da? (1 Tesalonikaǁîn 5:11)

¹¹ ǁAnǁare-aona da ūba hâ ǀnammi ge sida xristeǁîn tsîna ǃkhōǂgā hâ. Tsî da ge ǁnā ǀnamma ra ǁgau, ǁîna da ga ‘ǀgaiǀgaiǃnâ tsî ǂkhâkhâi’ o. (Khomai re 1 Tesalonikaǁîn 5:11 sa.) Soldagu hîna ǀguiba torob ǃnâ ra ǃkhamgu khami da ge sida tsîna nî ǂkhâǃnâ gu. Ama as ge soldab ge ǀnîsi ǃkhamgu ra hîna nau soldaba a tsûtsûgu ǁkhā xaweb ge nēsa ǂanapegase dī tide. ǁNās ǁkhās khami da sida tsîna tātsē ǃgâsana ǂanapegase tsûtsû tide. Tamas ka io ǁî-i go tsûtsû da ǃkhais ǃaroma dī ǃoa tide. (1Tes. 5:13, 15) Sida ǀnammi tsîna da ge ra ǁgau, ǃgâsagu hîna ǀhaohâba ra ǃûiga ǁnâuǀnams ǃnâ-ū. (1Tes. 5:12) Paulub ge nē sîǂkhanisa xoa o, ob ge Tesalonikaǁîn di ǀhaohâba kurib ǀguiba ge hâ i. Tsî ǁnās ǀkha î ge ǁgaumâihe hâ ǃgâsaga ǂansa ge ūhâ tama hâ i tsî gere dīsā. Xawe gu ge ǃgôahesa ge anu hâ i. Kai ǁgâiǀāb ra hā khami da ge sida ǀhaohâb ǃûi-aogu daoǁgausa nēsi da ǂhâhâs xa ǃnāsase nî ǂhâ. ǀNîsi da ge dana bēros tsî ǁnâub berosa xus tsîna daoǁgaude hō tide. ǁNā-amaga î ge a ǂhâǂhâsa, nēsi ǀnai ǀhaohâb ǃûi-aoga ǁnâuǀnam tsî ǃgôaǃgâsa. Mâsib ga mati ī xawe a da ǃgāsase hâ ǀgara tsî tā ǁîgu ǂkhabusasigu ai sida ǂâisa ǂnûi. Xawe a da  ǂâis ǃnâ ūhâ re Jehovab, Xristub ǃnâ-ū nē ǂgomǂgomsa khoega ra sîsenūsa.

12. ǃÂubasensa mati sida ǂâiǀgauba ra ǁkhauba?

¹² Toroǀgapas soldab di danasa ra ǁkhauba khami, î ge sida ǃâubasensa sida ǂâiǀgauba ra ǁkhauba. ǀGaisa ǃâubasens ǀkha da ge ra mûǂan, nē ǃhūbaib a mā ǁkhā xūn hoan ǁgais ǀguisa īsa. (Fil. 3:8) ǃÂubasens ge ra hui da, î da ǃnomsase tsî aiǂhomisen hâse hâ. Nēs ge Wallace tsî Laurinda tsîn ǀkha ge ī, hîna Afrikab ǃnâ gere ǃoaba ra. ǃNona wekhegu di ǁaeb ǃnâ ra ge hoara ǁîra di ǁgûra ǁōb ǃnâ ge ǂoaǃnâ. Coronas xa ǃaromahe hâse ra ge ge oaǁoa ī, îra ǁîra omaris ǀkha sī hâ nē ǃgom ǁaeb ǃnâ. Wallacesi ge xoa tsî ra mî: “Khâis di ǃâubasens ge tita ge hui, î tā ǁîra ge nē ǀuniga tsēdi ǃnâ ge ī-i ǀgaub xa ǂâi. Xawe mati ra ǀasa ǃhūbaib ǃnâ nî ī ǀgaub xa. Nē ǃâubasens ge ge huite, î ta tsûaǂgao hâse ta ga tsâ o ǃnomsase hâ.”

13. Tae-e da a dī ǁkhā, î da ǃanu gagaba hō?

¹³ “Gagaba tā ǀari.” (1Tes. 5:19) Paulub ge ǃanu gagaba ǀaes hîna sida ǃnâ hâs ǀkha ge ǀgopeǀnō. Elob di gagaba da ga ūhâ, o da ge ǂhanu-ai xū-e dīs tsî Jehovab di sîsen-e dis di turab tsîna ūhâ. (Rom. 12:11) Tae-e da a dī ǁkhā î da ǃanu gagaba hō? ǁÎ-e da ge a ǀgoreba ǁkhā, Elobmîsa nî ǁkhāǁkhāsen tsî ǁîb di ǀapeǂhomis ǀkha nî sîsenǀhao. ǁNāsa da ga dī, o î ge nî hui da ‘gagab di ǂûba’ omkhâisa.—Gal. 5:22, 23.

14. Tae-e da nî dī Elob di ǃanu gagaba da ga ūhâ ǀgara ǂgao o? (Ai-īsiba mû re.)

¹⁴ Elob ga ǃanu gagaba mā da, o da ge nî ǂan i da tā “gāgaba ǀari.” Elob ge ǁîb di gagaba ǁnān hîna ǃanu ǂâis tsî tanisen ǀgauba ra ūhâ ǀgaran ǀguina ra mā. ǁÎb ge ǃanu gagaba māda tide ǁgai xūna da ga ǂâi tsî dī o. (1Tes. 4:7, 8) Elob ǃanu gagaba da ga ǃkhōǃoa ǂgao, o da ge ‘kēbode tā nî ǃharaxū.’ (1Tes. 5:20) “Kēbodi” di hâ mîs ge, Jehovab di ǃanu gagab ra mā haisi-amde ǃoa ra ǁnaeǁgau. Nēs ge ǁîb tsēs tsî sîda ûiǃnâ hâ ǁaeb di ǂhâǂhâsasib xas tsîna ra ǃhoa. ǁNā tsēsa da ge ǂhābe tama  hâ, ǂâi rase Armagedons sida ûiǁaeb ǃnâ hā tidesa. Xawe da ge hoaǁae ǁîsa sida ǂâis ǃnâ ra ūhâ ǂgao. ǁNās ǀkha da ge tsēs hoasa “ǃanu tanisens tsî eloǃaoǃgâxasib ǃnâ nî ûi.”—2Pet. 3:11, 12.

15. Tae-e da nî dī, î da tā ama tama ǂhôan tsî demongu ǂhumib xa ǂgaeǂhapuhe? (1 Tesalonikaǁîn 5:21)

¹⁵ ǀGū ǁaeb ǃnâ î ge Eloba ra mâǃoa khoena, “khîb tsî ǃnorasasib ge hâ” ti nî mî. (1Tes. 5:3) Demongu ǂhumib ge ǃhūbaib hoaragab ǃnâ nî ǀoa tsî ǂguina nî ǂgaeǂhapu. (J.ǂHa. 16:13, 14) O sida? Sida ge tātsēs tsîna gâre mûhe tide, ‘xūn hoana ǃâitsâ tsî da ga ǃgâina ǃkhōǀgara o.’ (Khomai re 1 Tesalonikaǁîn 5:21 sa.) Grikegowab mîs hîna “kōǃgâ” tamas ka io “ǃâitsâ” ti hâs ge, khoen ǃhuniǀurib tsî ǀhaiǀuriba gere ôaǃnâ ǀgaub ǀkha ra ǀgopeǀnōhe. ǁNā-amaga da ge nî kōǃgâ, khomai tsî da ra ǁnâu xūn a amasa. ǁNās ge Tesalonikaǁîn ǃaroma ge ǂhâǂhâsa i. Tsî î ge sida ǃaroma tsîna a ǂhâǂhâsa, kai ǁgâiǀkhāba da ra ǀgū khami. Khoen ra mî xūn hoana ǂgom tamase da ge sida ǂâi ǀgauba sîsenū tsî ǁî-i ra mî xū-e Elobmîs tsî Jehovab ǀapeǂhomis ra mî xū-i ǀkha nî ǀgopeǀnō. ǁNāsa da ga dī, o da ge demongu di ǂhumib xa ǂgaeǂhapuhe tide.—ǂKhm. 14:15; 1Tim. 4:1.

16. Mâ ǃâubasensa da ūhâ? Tsî da tae-e nî dī?

¹⁶ Jehovab di ǃoaba-aon ge ǂnubis ase kai ǁgâiǀāba nî ûiǃkharu. Xawe î ge mâ khoe-i hoa-e a ǀū ǁgari-i tae-e nî īsa. (Jak. 4:14) Nēsi da ga kai ǁgâiǀāba ûiǃkharu tamas ka io kai ǁgâiǀāb nî hās aiǃgâ ga ǁō. Xawe da ge a ǂan ǂgomǂgomsase da ga hâ, o da ǀamo ûib ǀkha nî ǀkhaehesa. ǂKhauhesan ge ǀhommi ǃnâ Jesub ǀkha sī nî hâ. Nau gūn ge paradais ǃnâ ǃhūbaib ai nî hâ. A da hoada sida îsa ǃâubasens ai ǂâisa ǂnûi. Tsî aiǂhomisen hâse Jehovab di tsēs ǃaroma hâ ǀgara.