Ti ǁgûra ge 2ǁî torob ǃnâ Estoniaba xu Duitsǃhūba ǃoa ge doe tsî ta ge tita ǁnāpa ge ǃnaehe. ǁNā ǁaeb ǃnâ ra ge ge aiǂhomisen Kanadaba ǃoa doesa. Sida ge Kanadab ǃnâ Ottawa ti ǀon hâ ǃās ǃnâ gere hâ. Sida oms ge kaise ge ǂkhariro-i, anin tsîn ge ǁnāpa gere hâ. Sida ge kaise ge ǀgâsa-i xawe da ge ǁgoas hoasa ǃupu-e gere ǂû.

ǀGuitsē î ge Jehovab di ǃoaba-aona, ti mamasa ǂHaiǂhais 21:3, 4 ge khomaiba. ǁÎs ge ǁkhāǁkhāsens ge xūn xa kaise ge tsâǀkhāhe tsî ge ā tsoatsoa. Amab di ǃhomros ge ǃkhase ge kai. Tsî ra ge ti ǁgûra ge ǁāǁnâhe.

Ti ǁgûra ge Engelsa ǃgâise ge ǃhoa tama hâ i. Xawe ra ge amaba kaise ǂhâǂhâsa xū-i ase ge ū. Ti dadab ge mari-i gere kuru ǃnâ-e fabriks tawa Sudbury, Ontariob ǃnâ gere sîsen. Tsîb ge ǁnāpa ǃuis hoasa ge hâ i. Xaweb ge mâ satertaxtsēs hoasa tita tsî ti ǃgâs Sylvias tsîna aoǁnâ sîsen-e ǃoa gere ūsao. Tsî da ge mâ wekheb hoaba ǃKhē xu ǂgō-omma omaris ase gere dī. Ti ǁgûra ge Eloba ǀnamsa ti ǂgaob ǃnâ ge ǂgā. Tsîs ge ǁnāsa ge ǂkhâǃnâte î ta 10 kurixa ta a hîna, ti ûiba Jehovaba ǃoa 1956ǁî kurib ǃnâ māǁnâ. ǁÎra Jehovaba ūba hâ ǀnammi ge ti ûib ǃnâ kaise ge ǀgaiǀgaite.

Skola ta ge toa, os ge ti ǂâisa Jehovaba ǃoabas ai ge hâ tama hâ i. Tita ge ge ǂâi aimâba-ao kai ta ga, o ta ǂâusa mari-e kuru tidesa. Î ta nē ǃhūba xu naub ǀkha ǁhana mâ ǁkhā. Rados tawa ta ge ge sîsen tsoatsoa tsî ta ge ǃnaoǁnâsa mûsik-e gere ǀhuru. Nē sîsen î ge kaise ge ǁkhoaxabate ī. Xawe ta ge ǃuias tsîna gere sîsen. Tsîs ge ǁnāsa ge ǃaroma î ta ǂgui ǁaegu ai ǀhaode ǂoaǃnâ. Tsî ta ge ǁnān hîna Eloba ǀnam tama hân ǀkha ge hâ ǀhao tsoatsoa. Ti ǃgâiǂâis Elobmîs ai ǃgaoǃgaohe hâs ge ge ǂkhâǃnâte, î ta ǀkharaǀkharana ti ûib ǃnâ dī.

Tita ge Oshawa, Ontarioba ǃoa ge doe. ǁNāpa ta ge Ray Normani tsî ǁîb ǃgâs Leslis tsîn ǀkha ge ǀhao. Tsî ǀnî hâ aimâba-aon ǀkhas tsîna. ǁÎn hoan ge tita ǃnâ ǃgâiǃgâibasensa ge ǁgau. ǁÎn a ǂkhî ǀgausa ta ge mû, os ge ǁnāsa ge ǂkhâǃnâte î ta tî ûib ǃnâ ta ra dī ǂgao xūn xa ǂâiǃgâ. ǁÎn ge ge ǂkhâǃnâte î ta mîǁguiba dī tsî aimâba-ao kai. Tsî ta ge ǁnāsa September 1966ǁî kurib ǃnâ ge tsoatsoa. Kaise ta ge ge ǂkhî hâ i tsîb ge ûib tsîna kaise ge ǁkhoaxa-i. Xawe î ge xūna ti ûiba ge ǀkharaǀkhara ǃâubasen tama ta hâse.

Skoli ai ta ge hâ i ǁaeb ǃnâ ta ge ǀnai, Toronto Kanadab di betels ai ge xoaǂgāsen. Ēga ta ge 4 kurigu ǁkhauǂuisa ge hō, î ta ǁnā betels tawa sī ǃoaba. Kaise ta ge Leslis xa ge ǃgâibahe-i tsî ta gere ǃao, nē ǁkhauǂuisa ta ga ūǃoa o ta ǁkhawa ǁîsa mû tide ǃkhaisa. Xawe ta ge gaxu tsî ǃgamse nēs xa gere ǀgore. Tsî ta ge ǁnāpaxu betels ǁkhauǂuisa ge ūǃoa. Leslisa xu ta ge ī, o ta ge kaise ǁgaise gere tsâ.

ǂGurose ta ge betels tawa saran ra ǁā-e ǃkhais tawa gere sîsen. Tsî ta ge ēga sekretareb ase ge ǁgaumâihe. ǁNā ǁaeb ǃnâs ge Leslisa Gatineau, Quebeki ǃnâ ǀō-aisa aimâba-aos ase ge ǁgaumâihe. Tita ge ǁîs tae-e ra dīs xa hoaǁae gere ǂâi tsî amase ta ge ǃgâi mîǁguiba a dīs tsîna. ǁNapaxū î ge ǃâubasen tama ta hâ xū-e ti ûib ǃnâ ge ī. Rayb Leslis kai abutib ge betelsa ǃoa ge ǁkhauhe. Tsîkham ge ǀgui kamers ǃnâ gere hâ. ǁNās ge ge ǃaroma î ta ti ǀhōsagusisa Leslis ǀkha ǁkhawa omkhâi. Tsîm ge sîma ti 4 kurigu di ǁgaumâis ǀams ai ge ǃgamme. ǁNās ge Febraurib 27 1971ǁî kurib ǃnâ.

Tita tsî Leslis tsîn ge Quebeki ǃnâ frans gowab di ǀhaohâba ǃoa ge ǁgaumâihe. ǁNāpaxum ge kuriga ǃkharu tsî ǃâubasen tamam hâ ǁgaumâisa ge hō. ǃNarimâra mûǂam-aob ase ta ge 28 kurixa ta a hîna ge ǁgaumâihe. Kaise ta ge ǂkham tsî ǂansa ta ūhâ tama hâ khami gere tsâ. Xawe î ge Jeremiab 1:7, 8 ǃnâ ra hō-e mîde tita kaise ge ǂkhâǃnâ. Leslis ge ǂgui audo tsūkhēǃgâgu ǃnâ ge hâ i tsî ǁnās xa ǃaromahe hâse ǁoms ǀkha ǃgomsiba ge ūhâ i. ǁNās ǀkham ge ge dîsen, matim nēsa nî dīho? Xawes ge ǁîsa hoaǁae gere mî, “Jehovab ga ǁkhauǂuimi o xū-e dīsa, om ǁnāsa dī tide?” ǁNā ǁgaumâisam ge ge ūǃoa tsîm ge 17 kuriga ǃnarimâra ǁgaumâisa ge dī.

ǃNarimâra sîsenni ge ǂgui xūna ge ǃkhōǂgā hâ i. Tsî ta ge ǃnāsa ǁaeb ai Leslisa ǁaeba ge ūba tama hâ i. ǀKhara xū-e ta ge ge ǁkhāǁkhāsen. ǀGui mantaxtsēs ai ǁgoagam ge sîm di dao-ams tawa xū-e ge ǁnâu. ǁNāpa î ge khoe-e ǃauga ge ǀkhai-i xawe î ge pikniks di ǁharusa ge hâ i. ǁNā ǁharus ǃnâ î ge lapib, kās-i, ǂûn tsî xûi-i tsîna ge hâ i. Xawe î ge sîkhaniros tsîna ge hâ i, nēti ra mîsa: “Sadu kaikhoesa pikniksa ǃoa ī-ū re.” Sores ge ǁnā tsēs ai kaise îxase ge ǂoaxa hâ i. Xawe ta ge Leslisa ge mîba, īǁoam asa ǃhoade ta nî aiǂhomi amaga. Nēsas ge ge ǁnâuǃā xawes ge ǁgairose gere tsâ. ǃHoade aiǂhomis ǃaroma ta ge sī a ǂnû ǁaeb ais ge ti ǃanu ǃgâiǂâisa ge ǂhanite. Tsî ta ge Efeseǁîn 5:25 tsî 28 ǃnâ hâ mîdi xa ge ǂâi tsoatsoa. ǁNā mîde ge ge ǂkhâǃnâte î ta ti kaikhoes emosioneele tsâsaga ǂâis ǃnâ ūhâ. ǀGore toa ta ge o, o ta ge Leslisa ge mîba “ǀkhîm ī,” ǁîs ge kaise ge ǂkhî. Kaise īsa ǃkhaisa ǃoam ge ge ǃnari tsîm ge ǁnāpa ǂnû tsî ǀguiba ǁkhoaxa ǁaeba ge  ūhâ. ǁNās khaoǃgâ ta ge noxoba ǁaeba ge ūhâ i, ti ǃhoade aiǂhomisa.

Sim gere di ǃnarimâra sîsenni ǃnâm ge kaise ǃgâi ǁaeba ge ūhâ i.  ǁNās ge Britsa xu Newfoundlandi kōse. ǃNarimâ ta gere ǃkhais ǃaroma ta ge ǁnās ǀkha ti ǂkhamsis turaba nēsi ge ûiǂui ǁkhā ī. Gilead skoli xa ta ge gere ǂâi xawe ta ge sîsabese ǁgaumâihes turaba ge ūhâ tama hâ i. Sîsaben ge ǀō-aisa khoen khami gere mûsen tsî ta ge tita ǁnāti ge tsâ tama hâ i. ǁNās ǀguis ose xawe ta ge gere ǃao Afrikab ǃhūga ǃoa ta nî sîhe ǃkhaisa. Hîna ǀaen tsî torogu tsîna ge ūhâ i ga. Hâm ge hâ i ǃkhais xam ge kaise ge ǃgâibahe i.

Tsî 1992ǁÎ kurib ǃnâ î ge Soviet Unions ǃnāga ge hâ i ǃhūga ge ǁkhowamhe tsoatsoa. Tsîm ge ge ǂganhe îm sîsabe ra ase Estoniab ǃnâ sī ǃoaba. ǁNāsam ge ǃaubasen tama ge hâ i xawem ge ǀgore tsî nēs xa ge ǂâi, ‘Jehovab ga ǁkhauǂui mî o xu-e dīsa, tae-i ǃaromam dītsâ tama hâ?’ ǁNā ǁkhauǂuisam ge ge ūǃoa tsî ta ge nēti ge ǂâi. ‘ǃGâi ǃkhaisam ge Afrikaba ǃoa sîhe tama hâ.’

Estonia gowabam ge, ge ǁkhāǁkhāsen tsoatsoa. Tsîm ge ǀnî ǁkhâgu khaoǃgâ ge ǂganhe îm, ǁnā ǃhub ǃnâ ǃnarimara sîsenhe dī. Sîm ge 46 ǀhaohâgu tsî groep ti tsîna ga sari hâ. Estoniab, Lativiab, Lithuaniab tsî Russiab di Kaliningradi ǃnâs tsîna. ǁNās ge gere ǂâibasen, îm ǁnā ǃnona ǃhūgu di gowagu tsînam nî ǁkhāǁkhāsen. ǁNās ge ge ǃgom i. Xawen ge sîm di ǀhōsana ǁgūtsândi xa ge tsâǀkhāhe. Tsîn ge sîma ge hui. Tsî î ge 1999ǁÎ kurib Estoniab ǃnâ ǁnâub berosa ge ǁkhowamhe. Tsî ta ge saora ǃgâsagu ǀkha ǁnâub beros komites ai ge ǁgaumâihe. Tomas Eduri, Lembit Reile tsî Tommi Kaukob tsîna.

ǂGui ǃgâsan hîna Siberiaba ǃoa ge sîhen xa ta ge ge ǁkhāǁkhāsen tsoatsoa. ǁGaisen gere hâ ūhe xawen ge ǁnā ǃgâsana tātses tsîna, ǁgaixa hâse ge hâ ǀgara tama hâ i. ǁÎn aoǁnâ sîsenni ǃaroman ūhâ ǂkhîb tsî ǁkhoaǂgaosib tsînan ge ge ūhâ ǀgara. Nēs ge ge hui, îm mûǂan sîm tsîn ǃgâiaǂgaob ǀkha ǃgom mâsigu ǃnâ a mâǀgara ǁkhāsa.

ǂGui kurigam ge kaise ǃgarise gere sîsen tsî ǀorose gere sâ. Tsî ǁnās ǃaromas ge Leslisa tsau hâse ge tsâ tsoatsoa. Sîm ge ge ǀū-i ǁîs ǀaeba ūhâsa hîna ra ǃaromaba îs tsauhâse hoaǁae tsâ. Nē ǀaeb ge tsûba hoa soros ǃnâ ge ǃaroma. Tsîs ge ǁnās xas tsîna ge ǁomǁoa i. Nēs ge ge ǃaroma îm Kanadaba ǃoa oas xa ǂâi tsoatsoa. Tsîm ge ge ǁkhauhe îm ǁNâub beros skola Amerikab ǃnâ sī hâǃnâ. Nēsam nî hâǃnâs ǁkhās xam ge ge ǀū-i. ǀGore toam ges khaoǃgâm ge ǁnā ǁgaumâisa ge ūǃoa. Jehovab ge ǁnā mîǁguiba ge ǀkhae. Nē skoli aim hâ hînas ge Leslisa ǂhâs ge hâ i sōǀôan tsî ǀaeǃkhōs tsîna ge hō. Tsîm ge ǁnās xa ǃaromahe hâse ǀnaim gere dī xūna ge dī ǁkhā i.

ǀGui ǃui-a 2008 xi ǃnâm Estoniab ǃnâ hâ hîna ta ge, danaberosa xu ge bel-e tsî ge dî-e Kongoba  ǃoam a īǁkhāsa. Kaise ta ge ge buru hâ-i, saora tsēs aim ǃereamsa nî mā amaga. Leslisa ta ge ǁnās xa ge mîba tama hâ-i, ǂan ta ge ī amaga ǁî-i xas ǁom hō tidesa. Xawe tita ge ge ǁom tama hâ i, ǁnā ǃuis hoasa ta ge Afrikab ǃaroma ta ūhâ ǂâiǂhansendi xa gere ǀgore.

Saora tsēs ai ta ge Leslisa ge mîba tsîm ge nē ǀgaub ai gere ǂâi: “Jehovab ge ra ǁkhaumî îm Afrikaba ǃoa ī. Matim a ǂan nēsam a dīǁoasa? Tsîm ǁî-i ǃnâ ǃgâiba a hōǁoasa dītsâ tamam ga īo?” Estoniaba xum ge 16 kurigu khaoǃgâ, Kongoba ǃoa ge doe. ǁNâub bēros ge kaise ǃnomsa tsî îsase ge ǃam-i. ǂGuro xū-i Leslis ge sîm kamers ǃnâ a mâi î ge, karkiros hînam ge Kanadab ǃnâ ūhâ isa. ǁNāpa î ge saora mîde ge xoahe hâ i: “Hâ du ra ǃkhai-i hoa-i ǃnâ ǃgâiaǂgao re.” ǃGâsana ta ge ǀhao-ū, Elobmîs ǁkhāǁkhādi dī tsî sîsabese ǃoabas khaoǃgâm ge ǀasa ǂkhîba ge hō. ǁAeb ǀkham ge aiǂhanuba ge ūhâ-i, îm ǁnâub berode 13 ǃhūga Afrikab ǃnâ sari. ǁNās ge ge huimî îm ǃkharagu îsa khoen tsî ǃhaodi tsîna mû. ǂGuro ta gere ǃao xūn ge ge bē. Tsîm ge Jehovaba gere gangan, ǁîb ge sîma Afrikaba ǃoa a sî amaga.

Kongob ǃnâm ge ǃkharagagu ǂûna ge mā-e, aiǁgause xoxorona. Sîm ge gere ǂâi tātsēs tsînam ǁîna ǂû hō tidesa. Xawem ge mû o ǃgâsan mati ǁîna ǂûs xa ǁkhoaxabahe isa. Om ge sîm tsîna tsâ tsî ge ǁkhoaxabahe-i.

ǃHūb di aiǂoas ǃnâm ge ǃgâsana gagasi ǂûn tsî tsēkōrobe ǂhâsib ǃaroman ǂhâhâ xūna ge sī-ūba. ǁNāpas ge gorillas ti ǀon hâ ǃnūbisa ge hâ i, hîna ge khoen ra ǁan ǃkhaidi tawa sī tsî ǁîna gere ǁgāǂam ga. ǂGui ǃgâsan ge marisise ge ǀgâsa-i. Xawe ǁîn di ǀgaisa ǂgoms ge ǁō hân di khâis, Jehovaban ūba hâ ǀnammi. Tsî ǀapeǂhomis ǃoagun ūhâ ǂhauǃnâsib xa ge ǀgaiǀgai-e. ǁNās ge sîma ge ǂkhâǃnâ îm, Jehovabam ra ǃoaba ǃaromasa ôaǃnâ. ǀNî ǃgâsan ge ǁîn di omdi tsî ǃhanagu tsîna ge ǂoaǃnâ. ǁNās ge ge ǁgaute marisi ǃhūsib mati ǃkhaesa a bē ǁkhāsa. Xawe î gagasi ǃhūsiba mati a ǂhâǂhâsa. ǂGui ǃgomsin ge hâ-i xawen ge ǃgâsana nēs xa ge ǃgae tama hâ-i. ǁÎn xūna gere mû ǀgaub ge sîma ge ǂkhâǃnâ, îm sîm ǃgomsigu tsî ǀaeb mâsigu tsîna ǀnî hâ ǀgaub ǃnâ mû.

ǃÂubasen tamam ge hâ-i xū-i ge ǁkhawa ge ī. Sîm ge ge ǂgan-e îm Hong Kongi ǁnâub berosa ǃoa doe. Asiab ǃnâ ǁans xam ge ge ǂâi tama hâ-i. Jehovab di ǀkhaebam ge nau ǁgaumâidi ǃnâ a mû amagam ge, ne ǁgaumâisa ge ūǃoa. Tsîm ge 2013 nî ǃnâ ārase sîm ǀnamǀnamsa ǀhōsana Afrikab ǃnâ ge ǁnāxū. ǀŪm ge ge ī tae-i aisǀkhāb ai nî hâsa.

Hong kongi ǃnâ hâs ge kaise ge ǃgom-i, ǂgui khoen ǁnāpa ra ǁan amaga. Tsî nē khoen ge ǃkharagagu ǃkhaide xu ra ǀkhī. Chinese gowaba ǁkhāǁkhāsens ge kaise ge ǃgom-i. Xawen ge ǃgâsana ǃgâise ge ǁkhoreǁharemî, ǁîn ǂûn xas tsînam ge ge ǃgâibahe-i. ǂGui sîsenan ge ǁnâub bēros tawa gere dīhe xawe î ge hâ ǃkhaide kaise ǀgapi marisa gere ǂgan. ǁNā-amagas ge ǂgaeǂguira sorosa gā-aise ǁîs di ǂgui hâ ǃkhaiga ge ǁamaxū. ǁAeroba ǃkharu tsîm ge 2015 nî ǃnâ Suid-Koreaba ǃoa ge sîhe tsîm ge ǁnāpa ge ǃoaba ǀgara. ǁKhawam ge ǁnāpa ǀnî hâ ǃgomsiba ge hōǃâ, ǁnās ge gowaba ǁkhāǁkhāsensa. Xawem ge kaise ge ǂkhî-i sîm di ǀhōsan gere ǃgôaǃgâsa, ǁkhām a ǀgaub ǃnâm gere ǃhoa tsâ o.

ǀAsa ǀhōsana dīs ge supu tama hâ. Xawem ge ge ǁkhāǁkhāsen khoen ǀkhats ga hâ ǀhao o, ots ge ǃhaese ǁîna ra ǂan. ǃGâsan sîm khami ǀgui îsam ge ge mû. Tsîb Jehovab ǁnā ǀgaub ǃnâ a kuru dasa, î da sida ǂgaoga ǁkhowam tsî ǃgâsana ǀnam ǁkhā.—2Kor. 6:11.

ǁKhāǁkhāsenam ge ge îm Jehovab khoena ra ūǃoa khami ǁîna ūǃoa. Tsî Jehovab daoǁgaus tsî ǀnammi tsîna sim ûigu ǃnâ ôaǃnâ. ǂKhabuǂâi tamas ka iom ge naun sîm ǀkha ǁae tama hâ khami gere tsâ o, om ge sîm ǀhōsana xūm ge hō sîǂkhanide ǁkhawa gere khomai. Amasem ge ge mû Jehovab mati sîm ǀgorede ra ǃeream ǀgausa. Sîma ǂkhâǃnâs tsî ǀgaib tsîna mās ǃnâ-ū.

Nē hoa kurigu ǃnâm ge sîma ge ǁkhāǁkhāsen, îm ǁaeba ǁamaǂuiba gu. Matikōsem kaise ǂgui dī xuna ūhâ-i xawe. Tsîm ge ge ǁkhāǁkhāsen dīsam ga tamas ka iom ga gowaba ǂans ǃnâ gara dīsa xawem ge nî âi. ǃUis hoasam ge tsēs ǃnâm go dī ǁkhoaxa xū-i xa ǂâi tsî Jehovaba nēs ǃgao ra gangan.

Tita ge gere ǂâi, tātsēs tsînam sîsabe-i tamas ka io ǀnî hâ ǃhūb ǃnâ sī a hâ ǁoasa. Xawe ta ge ra ǃgâiaǂgao, ǁkhāǁkhāsen ta ge amaga Jehovab hoa xūna īǁkhā kaisa. Jeremiab di mîdi xa ta ge ra ǂâi: ‘Jehova sats ge ge gāxaǃnâ te.’ (Jer. 20:7) Îo, ǁîb ge ǃâubasen tamam ge hâ i ǃgâi xūna ge mā mî. Tsî ǂgui ǀkhaegu tsîna. Ti turab tsînab ge ge ǀoaǀoa flikens ai ǂoa tsâsa. ǀGôarob ase ta gere ǁhapos xa ta ge ǂgui ǃhūga mû tsâ hâ. ǁNâub berode ta ge ǂgui ǃhūgu ǃnâ sari tsâ hâ. Nē ǁgaumâidi ǃnâ ta ge kaise Leslis di ǂkhâǃnâsa ra ǃgôaǃgâ.

Hoaǁaem ge ra ǂâiǂâiǃnâgu ham-em nē sîsen-e ra dībasa. Tsî Tae-ǃaromam nēsa ra dīs tsîna. Nēsim ra hōǃâ ǀkhaegu ge ǀamosib kōsem, ǀasa ǃhūbaib ǃnâ nî ûiǀgaub di tsâsib ǀguiba. ǁNā ǁaeb aib ge Jehovaba ‘ǁîb di ǃomma. . . ǁkhowa-am, tsî ûitsaman hoana ǂhâban hân ǀkha nî ǁâǁâ.’—Psa. 145:16.