1-2. Psalmdi 25:14 ǃoagu da tae-e nî dī Jehovab ǀkha da ga ǀgū ǀhōsagusisa ūhâ ǂgao o?

 MÂ ǀgauga a ǂhâǂhâsaba du, ǃgâi ǀhōsagusisa du ga Jehovab ǀkha a ūhâ ǀgara ǂgao o? ǀNîsi du ge nî mî, ǃgâi ǀhōsan ge ǀnam gu tsî ra mâxōǀkha gu. Xawe du ge a ǂâi ǁkhā, khoe ǀhōgun ǁaegus ǃaosa ǁnātikōse ǂhâǂhâsa tama hâsa. Nē ǁkhāǁkhāǃâs xoaǂams ge ra ǁgau, ǀgū ǀhōsagusisa da ga Jehovab ǀkha a ūhâ ǂgao. O da ge ǁîba nî “ǃao.”—Khomai re Psalmdi 25:14 sa.

² Nēsi da ga gaxuse Jehovaba a ǃoaba xawe da ge ǁîba eloǃaoǃgâxasiba nî ūhâba. Xawe Eloba ǃaosa tae-e ra ǂâibasen? Eloba ǃaosa da mati a ǁkhāǁkhāsen ǁkhā? Tae-e da eloǃaoǃgâxasiba ūhâsa Obajab, ǀGapi prister Jojadab tsî Gao-aob Joasi di aiǁgausa xus tsîna a ǁkhāǁkhāsen ǁkhā?

3. ǃAob ra ǁkhauba da ǀgauba ǁguiǃā re.

³ Tsûba da a hōǃâ ǁkhā di hâ mâsib xa da ga ǂan, o da ge ra ǃao. Nēs ge kaise a ǃgâi, nē ǃaob nî hui da xui-ao ǃgâi mîǁguiba dīsa. ǃAob ge ra ǁgarida î da tā ǃhommi di ǀams ai ǃgû, ǁnā ǂgao tama da hâ ǃkhais ǃaroma. ǃAo da ra ǃkhais ǃaromas tsîna da ge ǁkhōǁkhōsa mâsiba xu ra ǃkhoe. Khoe-i ǀkha da ūhâ ǀgū ǀhōsagusisa ǂoaǃnâsa da ra ǃao, ǃkhais ǃaroma da ge ǁî-e tsûtsû ǂgao tama hâ, mî tsî da ra dī xūn ǀkha.

4. ǁGâuaba mâ ǀgaub ǃnâ da Jehovaba nî ǃaosa ra ǂhâba?

 ⁴ ǁGâuab ge ǂhâba hâ în khoena Jehovaba ǂhanu tama hâ ǀgaub ǃnâ ǃao. Elifab ge mî xū-eb ge ǁGâuaba ra ǂkhâǃnâ. ǁGâuab ge ǂhâba hâ î da ǂgom, Jehovab hoaǁae ǁgaixa hâ, ǁkharada ǂgao tsî da tātsēs tsîna ǁîba ǂkhîǂkhîhō tidesa. (Job. 4:18, 19) ǁÎb ge ǂhâba hâ î da Jehovaba ǁnātikōse ǃao tsî ǃoaba ǀû. Xawe da ge tā Jehovaba nî ǃao. Dī ǁkhā da as ge ǁîba ǃgôasiba ǁgau tsî tā tsûtsû bisa.

5. Jehovaba ǃaosa tae-e ra ǂâibasen?

⁵ Khoe-i hîna ǂhanu ǀgaub ǃnâ, eloǃaoǃgâxasiba ūhâ î ge Eloba a ǀnam. Tsî ǁîb ǀkha î ūhâ ǀhōsagusisa ǁgaiǁgai ǁkhā xū-e xu ra ǂgōsen. Jesub tsîn ge ǁkhā ‘eloǃaoǃgâxasiba’ ge ūhâ i. (Heb. 5:7) ǁÎb ge tātsē Jehovaba ge ǃao tama hâ i. (Jes. 11:2, 3) Xaweb ge ǁîba ge ǀnammi tsî hoaǁae gere ǁnâuǀnam. (Jhn. 14:21, 31) Jesub khami da ge hoada Jehovaba ǃgam ǃgôasiba ūba hâ. ǁÎb a ǀnamxaǃnâ, gā-ai, ǂhanu-ai tsî a ǀgaisa xui-ao. Tsî da ge a ǂan Jehovab kaise a ǀnamdasa. Sida ǁîb daoǁgaude ra sao ǀgaub kaise ǁîba ra tsâǀkhā. Jehovaba da ga ǁnâuǀnamoǃnâ, ob ge ra tsû. Xawe da ga ǁîba a ǁnâuǀnam, ob ge kaise ǂkhî.—Psa. 78:41; ǂKhm. 27:11.

6. Mâ ǀgaub ǃnâ-ū da Eloba ǃaosa ǁkhāǁkhāsen ǁkhā? (Psalmdi 34:11)

⁶ Jehovaba ǃaos di ǁkhāsib ǀkha da ge ǃnaehe tama hâ, nēsa da ge aitsâma nî omkhâi. (Khomai re Psalmdi 34:11 sa.) ǀGui ǀgaub nēsa da a dī ǁkhāb ge, kurusa ôaǃnâsa. Elob di gā-aisib, ǀgaib tsî ǀnammi tsîna da “ǁîb ge kuru xūn” ǃnâ ra mû khami, î ge ǁîba da ūba hâ ǀnammi tsî ǃgôasib tsîna nî kai. (Rom. 1:20) Adrienne ti ǀon hâ ǃgâsas ge ra mî: “Jehovab ge kuru xūna da ga kō tsî a mû o, ǁîb a gā-ai ǀgauba. Os ge nēsa ra hōhōǃnâte ǁîb tita kaise ǃamkuse a ǂansa.” ǁÎs nēs xa kaise ra ǂâiǃgâ ǃkhais ǃaromas ge ra mî: “Tita tsî Jehovab ǁaegu hâ ǀhōsagusisa nî ǁgaiǁgai xū-e ta ge ǂgao tama hâ.” ǁÎb ge tita ûiba a mā amaga. Nē wekheb ǃnâ ǁaeba ǁamaǂui tsî ǁîb ge kuru xū-i xa ǂâiǃgâ re. Nēsa dīs ge nî hui du, î-i Jehovaba du ūba hâ ǃgôasib tsî ǀnammi tsîna ǀgai.—Psa. 111:2, 3.

7. ǀGoresa mati a hui da ǁkhā, î da ǀnōsa eloǃaoǃgâxasiba Jehovaba ūhâba?

⁷ ǀNî ǀgaub Eloba ǃaosa da omkhâi ǁkhāb ge hoaǁae ǀgoresa. ǀGore da ra ǃnās hoasa da ge Jehovaba ǃnāsase ra ǂan. ǃGomsina da ga hōǃâ o da ga Jehovab ai huiba ǂan, o da ge ra ǂâiǂâiǃnâhe matikōseb ǀgaisasa. Jehovaba da xoremarib ǀkhaeb ǃaroma ra gangan ǃnās hoasa da ge ra ǂâihō matikōseb a ǀnamdasa. Tsî da ga Jehovaba hōǃâ da ra ǃgomsin ǃaroma ǀkhoma o. O da ge ra ǂâihō matikōseb gā-aisa. Nēti i ǀgoredi ge Jehovaba da ūba hâ ǃgôasiba ra ǀgaiǀgai. Tsî î ge ra hui mîǁguisa, î da tā xū-e dī Jehovab ǀkha da ūhâ ǀhōsagusisa a ǁgaiǁgai ǁkhā-e.

8. Tae-e da nî dī, î da eloǃaoǃgâxasiba ūhâ ǀgara?

⁸ Eloǃaoǃgâxasiba da ge a ūhâ ǁkhā, Elobmîsa da ga ǁkhāǁkhāsen o. Î da ǃgâi tsî ǁgai aiǁgaudi Elobmîs ǃnâ hâde xu ǁkhāǁkhāsen. Jehovab di ǀgam ǂgomǂgomsa ǃoaba-aon di aiǁgausa da ge nî ǃhoaǃgao. Obajab Gao-aob Axab ommi ǃnâ gere sîsenni tsî ǀGapi pristeri Jojadab tsîn xa. Tsî da ge nî mû tae-e da Gao-aob Joasi, Judab diba xus tsîna a ǁkhāǁkhāsen ǁkhāsa. ǁÎb ge Jehovaba gere ǃoaba xawe ēga ǁîba ge ǃoaba ǀû.

9. Eloǃaoǃgâxasiba Obajaba mati ge hui? (1 Gao-aogu 18:3, 12)

⁹ Elobmîs ge Obajaba b saora mîdi ǀkha ra mâi-aiǃâ: “Obadjab ge ǃKhūba ǂgomǂgomsase gere ǃoaba.” (Khomai re 1 Gao-aogu 18:3, 12 sa.) Nē eloǃaoǃgâxasiba mati Obajaba ge hui? ǂGurose Obajab ge kaise ǂhauǃnâ tsî ge ǂgomǃgâhe ǁkhā ī. ǁNās ǀkhab ge gao-aoba ǁîba oms xūn hoan ǂam-ai ge ǁgaumâi. (Neh. 7:2) Obajab di eloǃaoǃgâxasib ge ǁîba ǁkhoaǂgaoxasiba ge mā. ǁÎb ge eloxoresa Gao-aob Axab ǁaeb ǃnâ ge ûi hâ-i. Nē Gao-aob ge “ǁîb aiǃâ ge hâ i gao-aogu hoagu ǃgâ-ai ǃKhūb ǃoagu ge ǁore.” (1Gao. 16:30) Axab di taras Isabels hîna ge Baala ǀgoreǀîs ge Jehovaba kaise ge ǃhui hâ i. ǁÎs ge Jehovab ǃoaba-aon hîna noordes gaosis ǃnâ gere ǁanan tsîna gere ǃgam ǂgao. Tsî ǁîs ge ǂgui kēbo-aogu Elob digu tsîna ge ǃgam. (1Gao. 18:4) Amase ǂgomǃgâ ǁkhā da ge a Obajab ge Jehovaba ǃgom ǁaegu ǃnâ ǃoabasa.

10. Obajaba ǁkhoaǂgaosiba mati ge ǁgau?

¹⁰ Obajaba ǁkhoaǂgaosiba mati ge ǁgau? Isabels ge Elob di kēbo-aoga gere ǃgam ǂgao, ob ge Obajaba 100 kēbo-aoga ū tsî “korodisiga nau ǁhoab ǃnâ gaugau tsî ǁîga ǂû-i tsî ǁgam-i tsîna gere mā.” (1Gao. 18:13, 14) Isabels ga ǂanǂui hâ o, Obajab ge tae-e dīsa ob ge ga ǃgamhe hâ. Khoeb ge a amagab ge Obajaba ǁōsa gere ǃao. Obajab ge Jehovaba kaise ge ǀnam ī. Tsîb ge ǁîba ǁnān hîna Jehovaba ra ǃoaban tsîna ǁîb ûib xa kaise ge ǀnam-i.

11. Jehovab ǃoaba-aona nētsē mati Obajaba ra ǁgae? (Ai-īsiba mû re.)

¹¹ Nētsēn ge Jehovab di ǃoaba-aon ǀnîna, sida sîsenni mā-amhe tama hâ ǃhūgu ǃnâ ǁan hâ. ǁÎn ge ǂhanuba anub hâ ǃgôasiba ra ǁgau. Xawen ge nē ǃgâsana Obajab khami Jehovaba anub hâ ǃgôasiba ra mā. (Mat. 22:21) ǁÎn ge Eloban ra ǃaosa ra ǁgau, khoena ǃaos xa. (ǃNǃkh. 5:29) ǁÎn ge aoǁnâ sîsen-e dī tsî ǀhaodi tsîna ǂanǃgâsib ǃnâ ra ūhâ. (Mat. 10:16, 28) ǁÎn  ge ra dītsâ ǃgâsana gagasi ǂûna ǂhanu ǁaeb ai māsa. Henri ti ǀon hâ ǃgâsab aiǁgausa ǃgaoǃgâ re, Afrikab ǃnâ ra hâba. ǁNā ǃhūb ǃnâ î ge sida sîsen-e ge mā-amhe tama hâ i. ǁNā ǁaeb ǃnâb ge Henriba māsenxase gagasi ǂûna ǁîb ǃgâsana māǂuibas ǁgaumâisa ge ūhâ i. ǁÎb ge ge xoa: “Tita ge kaise a taoxa. ǁNās ǀkha ta ge ǂgomǃgâsiba ūhâ, Jehovaba ta ūba hâ ǃgam ǃgôasib ge tita ǂhâ ta hâ ǁkhoaǂgaosiba māsa.” Henrib khami du ǁkhoaǂgaosiba ǁgau ǁkhā? Sadu tsîn ge ǁkhoaǂgaosiba a omkhâi ǁkhā, eloǃaoǃgâxasiba du ga ūhâ o.

12. ǀGapi pristeri Jojadab tsî ǁîb taras tsîna mati Jehovaba ǂhauǃnâsiba ge ǁgau?

¹² ǀGapi pristeri Jojadab ge Jehovaba gere ǃao. Tsîs ge ǁnāsa ǁîba ge ǂkhâǃnâ îb ǂhauǃnâ tsî ama ǃoabasa aiǃgû kai. Nēs ge ge mûhe ǁkhā i, Isabels ǀgôas Atalias ge ǂhanu tama ǀgaub ǃnâ gao-aos ase a ǂgaeǂgui tsoatsoa o Judab ǃnâ. Khoen ge ǃgâi ǃaromasa ge ūhâ i, Ataliasa ǃaosa. ǁÎs ge kaise ge eloxoresa i. Tsî ǂgaeǂgui ǂgaos gere ǃkhais ǃaroma ǁîs di ǁnuriǀgôagu tsîna ge ǃgam. (2Kro. 22:10, 11) ǁÎs di ǁnurisagu di ǀguib ge ge ûi. Jojadab tsî ǁîb taras Jehosebas tsîn ge ǁîba a sâu ǃkhais ǃaroma. ǁÎra ge sâubi tsî gere kōǃgâbi. Nē ǀgaub ǃnâ ra ge Jojadab tsî ǁîb taras Jehosebas tsîna ge dī, î-i Gao-aob Davib di surib ǃnâ-ū nî hā gaoba ǁkhaubahe ǁkhā. Jojadab ge Jehovab ǃoagu ge ǂgomǂgomsa i tsî Ataliasa ge ǃao tama hâ i.—ǂKhm. 29:25.

13. Joasi ge 7 kurixa io, ob ge Jojadaba ǁkhawa mati ǁgau Jehovab ǃoagub a ǂhauǃnâsa?

¹³ Joasi a 7 kurixa hînab ge Jojadaba ǁkhawa ǂhauǃnâsiba Jehovaba ge ǁgau. ǁÎb ge ǀapesa ge dī. Nē ǀapes ga sîsen ob ge Joasa ga ǂhanumâ gao-ao kai hâ, Davib suriba xu. Tsî nē ǀapes ga sîsen tama i, ob ge Jojadaba nî ǁō. Jehovab huib ǀkhas ge nē ǀapesa ge sîsen. Jojadab ge ǃhūb di ǂamkhoegu tsî Leviǁîgu tsîn di ǂkhâǃnâs ǀkha Joasa Gao-aob ase ge ǁgaumâi. Tsî Ataliasa ge ǃgam. (2Kro. 23:1-5, 11, 12, 15; 24:1) “Jojadab ge ǃKhūb tsî Gao-aob tsî ǁaes tsîn ǁaegu ǃgaeǀhao-e ge dī, în ǁîna ǃKhūb di ǁae kai.” (2Gao. 11:17) Tsî “Jojadab ge ǁkhāti ǃûi-aoga Tempeli di dao-amdi tawa ge mâi, ǃanuoǃnâ khoe-i xare-i ǁnāpa ǂgâ tidese.”—2Kro. 23:19.

14. Mâ ǀgaugu ǃnâb ge Jojadaba ǃgôasiba ǁgau-e Jehovabab ge ǃgôasiba a ǁgau ǃkhais ǃaroma?

¹⁴ Jehovab ge ge mî: “Tita ge tita ra ǃgôana nî ǃgôa.” Amaseb ge ǁîba Jojadaba ge mādawa-am. (1Sam. 2:30) Aiǁgauseb ge Jehovaba ge īǁkhā kai, î da Jojadab xa khomai tsî ǁîb aiǁgausa xu ǁkhāǁkhāsen. (Rom. 15:4) ǁŌb ge ob ge Jojadaba ǀō-aisa aiǂhanuba māhe tsîb ge “gao-aogu di ǀhobadi ǃnâ Davidi ǃās ǃnâ ge ǁkhōhe, ǁîb ge Israelǁîn tsî Elob tsî Tempeli tsîna gere dība ǃgâi ǃoabadi ǃaroma.”—2Kro. 24:15, 16.

15. Tae-e da Jojadab aiǁgausa xu ra ǁkhāǁkhāsen? (Ai-īsiba mû re.)

¹⁵ Jojadab aiǁgaus ge hoada nî hui, î da eloǃaoǃgâxasiba omkhâi. ǀHaohâb ǃûi-aogu ge hoaǁae Jojadaba a ǁgae ǁkhā, ǀgauga ôa tsî ǀhaohâba ǁkhaubas ǃnâ-ū. (ǃNǃkh. 20:28) Kairan ge Jojadab aiǁgausa xu ǁkhāǁkhāsen ǁkhā, Jehovaban ga ǃaoǃgâxasiba ūhâba o. Tsî ǁîb ǃoagun ga ǂgomǂgomsase hâ, ob nî sîsenūnîsa în ǁîb ǂâibasensa dīǀoaǀoa. ǁÎb  ge kairana ǂhābe tama hâ. ǂKhamkhoen ge a ǃgaoǃgâ ǁkhā, matib ge Jehovaba Jojadaba a hâ-ū ǀgausa. Tsîn ge Jehovaba ǁgae tsî ǁkhara khoena ǃgôasiba a ǁgau ǁkhā. ǃGōsase ǁnān hîna Jehovaba gaxuse ǃoaba hâna. (ǂKhm. 16:31) ǀAms ai da ge hoada ǂamkhoegu tsî Leviǁîgu aiǁgausa xu a ǁkhāǁkhāsen ǁkhā, hîna ge Jojadaba gere ǂkhâǃnâna. Hā re î da ǂgomǂgomsase, sida ‘aiǃgû-aoga’ ǂkhâǃnâ tsî aiǃgû ǁîga ǁnâuǀnamsa.—Heb. 13:17.

16. Tae-e ra ǁgau Gao-aob Joasi ge ǂkhabusa īsa?

¹⁶ Gao-aob Joasi ge Jojadab aiǁgausa xu ǃgâiba ge hō. (2Gao. 12:2) Nēs xa ǃaromahe hâseb ge gao-aoba ǂkhamsis ǃnâ Jehovaba gere ǂkhîǂkhî ǂgao. Xaweb ge Joasa, Jojadab ge ǁō o Eloba ǃoaba tama ǁgai ǂgaeǂgui-aoga gere ǃgâ. ǀAmǂoasa ge tae-i? ǁÎb tsî ǁîb saosabegu tsîn ge “ǁgôa-elo-īgu tsî Aseras īgu tsîna ge ǀgoreǀî tsoatsoa.” (2Kro. 24:4, 17, 18) Nēs xab ge tsûtsûhe hâ-i xaweb ge Jehovaba “kēbo-aoga ǁîna ge sîba, ǁîna gu nî ǂgōǀause, xawen ge ǃgâ ǂgao tama ge i.” ǁÎn ge Saxariab, Jojadab ǀgôab tsîna ge ǃgâ tama hâ. Hîna ge Jehovab di kēbo-ao tsî pristers ǀguisa ī tama hâ îba xawe Joasi ǃgâba. Gao-aob Joasi ge Saxariaba ge ǃgam kai. Saxariab omaris xab ge huihes xawes tsîna.—2Kro. 22:11; 24:19-22.

17. Joasi ûiba mati ge ǀamǂoa?

¹⁷ Joasi ge eloǃaoǃgâxasiba ge ūhâ ǀgara  tama hâ i. Tsîb ge ǁgai ǀamǂoasa ge ūhâ i. Jehovab ge ge mî: ‘Tita ra ǃharaxūn ge nî ǃharaxūhe.’ (1Sam. 2:30) Siriaǁîn ǂkhari toroǂnubis ge Joasi di “kai toroǂnubisa” ge dan. Tsî kaise ge tsûtsûbi. Siriaǁîna xub ge oas khaoǃgâb ge Joasa ǁîb di ǃgāgu xa ge ǃgamhe, Saxariabab ge ǃgam ǃkhais ǃaroma. Khoen ge ǁnātikōseb ge ǁgai-i ǃkhais ǃaroma ǁîba “gao-aogu ǀhobadi” ǃnâ ge ǁkhō tama hâ i.—2Kro. 24:23-25; Mateub 23:35 ǃnâ “son of Barachiah” di hâ study note sa mû re.

18. Jeremiab 17:7, 8 ǃoagu da mati Joasi khami īsa xu nî ǂgōsen?

¹⁸ Joasi aiǁgausa xu da tae-e a ǁkhāǁkhāsen ǁkhā? ǁÎb ge ǂhēre ǃnomaga ūhâ hais khami ge ī-i, hîna ge ǁnâub ai ǃkhōbasen hâ îba. Jojadab hîna ge ǁîba gere ǂkhâǃnâb ge ǁō, ob ge Joasa Eloba ǃoaba tama khoena ge ǃgâ tsoatsoa. Tsîb ge Jehovaba ge ǁnâuǀnâm ǀû. Nē aiǁgaus ge ra ǁgau, î da tā Jehovaba sida omaris tamas ka io ǀhâohâb ǃnâ hâ khoen ǃgâi aiǁgaude ra ǁgauda, ǃkhais ǃaroma ǀgui ǁnâuǀnam. Jehovab ǀgūse da ga hâ ǂgao, o da ge ǁîba da ūba hâ ǀnammi tsî ǃgôasib tsîna nî ǀgaiǀgai. Elobmîsa tsēs hoasa khomais, ǂâiǃgâs tsî ǀgores ǃnâ-ū.—Khomai re Jeremiab 17:7, 8 sa; Kol. 2:6, 7.

19. Jehovaba tae-e ra ǂgaoǀkhā da?

¹⁹ Jehovab ge ǂgui xūna da nî dīsa ǂgaoǀkhā tama hâ. ǁÎb ra ǂgaoǀkhā da xūn ge Aoǁnâ-aob 12:13 ǃnâ ǃkhōǀhaohe hâ, mî rase: ‘Eloba ǃaoǃgâ î mîmādi âba ǁnâuǀnam . . .nēs di ǃaromas khoesib ge ǂnubibahes a ǁî xuige.’ Eloǃaoǃgâxasiba da ga ūhâ, o da ge ǂgomǂgomsase ǁîb ǃoagu nî hâ. Tsî ǃâitsâna nî mâǀgai, Obajab tsî Jojadab khami. Xū-i xare î ge Jehovab ǀkha da ūhâ ǀhōsagusisa khôa hō tide.