Elobmîs ge xū-e mî tama hâ. Xawe î ge ǀnî ǂûǂûsa xūn xa ra ǃhoa, tae-i ǃaroma ra ge Nasaretsa ǃoa oa tama hâ is xa.

ǀHomǃgāb ge Mariasa ge mîba, ǁîs ǀgamǀkhā tsî ǀgôa-e nî hōsa. ǀHomǃgāb ge nē haisi-amsa mîba ra o, o ra ge Marias tsî Josefi tsîra Nasarets ǃnâ ge ǁan hâ i. ǁNās ge Josefi ge ǃnae ǃnâ omsa, Galileab ǃnâ. (Luk. 1:26-31; 2:4) Ēga ra ge Egipteba xu oaǀkhī, o ra ge Nasaretsa ǃoa ge oa. Jesub ge ǁnāpa ge kai tsî ǁnās ǀkha ge Nasareǁî kai. (Mat. 2:19-23) ǁNā-amaga da ge mî ǁkhā, Jesub, Josefi tsî Marias tsîn a Nasareǁî ti.

Marias ge Elisabet ti ǀon hâ ǀaokhoesa ge ūhâ i, Judab ǃnâ gere ǁansa. Elisabets ge Saxaria ti ǀon hâ pristeri tara ge īsa. Tsî ǁîs ǀgôab ge Johanneb aoǁnâ-aoba. (Luk. 1:5, 9, 13, 36) Marias ge Elisabetsa sari tsî ǁîs ǀkha ǃnona ǁkhâga Judab ǃnâ ge ǁan. ǁNās khaoǃgâs ge Mariasa Naretsa ǃoa ge oa. (Luk. 1:39, 40, 56) ǁNā-amagas ge Mariasa Judaba kaise ǃgâise ge ǂan i.

Josefi ge ‘xoakhâis’ di mîmāsa ge ǁnâuǀnam. Josefi ge Nasaretsa xu Betlehemsa ǃoa ge ī, ǁnās ge ‘Davib ǃāsa.’ Kēbos ǃoagu î ge Mesiaba ǁnā ǃās ǃnâ nî ǃnae ge ī. (Luk. 2:3, 4; 1Sam. 17:15; 20:6; Mix. 5:2) Jesub ge ǃnae toas khaoǃgâb ge Josefa ge ǂgao tama hâ i, îs Mariasa ǁnātikōse gaxu daob ai ǃgû ǀâ babakirob ǀkha. ǁÎra ge Betlehems ǃnâ ge hâ, 9 kilometerga ge Jerusalemsa xu ǃnū îsa. Kaises ge ǁnāsa ge ǃgâi i, î ra babakiroba tempela ǃoa ī-ū tsî ǁguibade sī dī. ǂHanub ǂgaoǀkhās ǃoagu.—Lev. 12:2, 6-8; Luk. 2:22-24.

Elob ǀhōmǃgāb ge Mariasa ge mîba hâ i, ǁîs ǀgôab ‘Davib di gaosisa’ nî ūsa. Tsîb ‘gao-aob’ ase nî ǂgaeǂguisa. ǀNîsi ra ge Josefi tsî Marias tsîra ge ǂâi, kaise î a ǂhâǂhâsasa îb Jesuba Davib di ǃās ǃnâ ǃnaehe. (Luk. 1:32, 33; 2:11, 17) ǀNîsi ra ge ge ǂâi, ǃgâi i nîsa ǁnāpa hâ tsî ra nî ǃâusa Elob ǀkhara daoǁgaude nî mās kōse.

ǀŪ da ge a matiko gaxuse ra ge Betlehems ǃnâ hâ isa, ǀgamiroǂansegu nî sīs aiǃâ. ǁNā ǁaeb ais ge omarisa ǀnai oms ǃnâ gere hâ. Tsîb ge Jesuba ge babakiro tama hâ i xawe ǀnai ge ‘ǀgôaro-i.’ (Mat. 2:11) Nasaretsa ǃoa ra nî īs xa ra ge, Betlehems ǃnâ ge hâ tsî ǁnāpa ge om ǂnûi.

Herodeb ge ge mîmā î-i: ‘Betlehems tsî ǂnamipeb ǃnâ hâ ǀgam kurixa tsî ǁnās ǃnaka hâ axarogu hoaga ǃgamhe.’ (Mat. 2:16) Nēs xab ge ǃkhâikhomsa a ǁnâu ǀhomǃgāba xu, o ra ge Josefi tsî Marias tsîra Egipiteb ǃoa Jesub ǀkha ge ī. Tsîn ge Herodeb nî ǁōs kōse ǁnāpa ge hâ. Josefi ge ǁîb omaris ēga Nasaretsa ǃoa ge ī-ū. Tae-i ǃaroman ge Betlehemsa ǃoa oa tama hâ îba? ǁNā ǁaeb aib ge Herodeb ǁgai ǀgôab Arxelauba gere ǂgaeǂgui. Tsîb ge ǀhōmǃgāba ǁnās xas tsîna ǁîra ge ǃkhâikhom. Nasarets ǃnâb ge Josefa, kaise ǃgâi ǀgaub ǃnâ Jesuba ga kaikai hâ.—Mat. 2:19-22; 13:55; Luk. 2:39, 52.

Josefi ge Jesub nauna ǀhomma ǃoa īs di daoba nî ǁkhowambas aiǃâ ge ǁō. Josefi ge ǃhūbaib ai khâisa nî hō. ǂGuin ge ǁîb ǀkha ǀhao tsî ǃnāsase ǁîba xūs tsîna a ǁkhāǁkhāsen ǁkhā. ǁÎb tsî Marias tsîn ge tae-i ǃaroma Jesub ǃnaes khaoǃgâ, Betlehems ǃnâ ǁans xas tsîna du ge ǁkhāǁkhāsen ǁkhā.