1. 1 Tesalonikaǁîn 5:11 ǃoagu da hoa da mâ sîsenni ǃnâ ǃâ-e ūhâ?

 SADU ǀhaohâba ǀasa saala ge om. Tamas ka io ǀoroba ge dī-ūnuhe? ǁNāti i ga io du ge amabes ǃnâ ǂguro ǀhaos. Hîna du ge ǀasa saali dawa ūhâ īs xa ra ǂâihō. Kaise du ge Jehovaba gere gangan. ǀNîsi du ge kaise ge ǂkhî-i tsî ǁnās ǃaromas tsîna gere ā ǂgao. Tsî ǁnās xa ǃaromahe hâse tsoatsoas di ǁnaetsanas tsîna ge ǁnae hō tama hâ i. Sida di saal gu hîna ǃgâise omhe hâ gu ge koasa Jehovaba ra mā. Xawe da ge ǃnāsa koasa ǁîba ra mā, ǀnî hâ om sîsenni ǃnâ da ga ǃâ o. ǁNā sîsen-i ge ǃnāsa-e ǃkhōǂgā hâ, mû da ra om sîsenni xa. Nēs ge ǃoaba ǃkhaiga ǃoa ra ǀkhīna omkhâisa ǃkhōǂgā hâ. Apostel Paulub ge nēti i om programa ǂâis ǃnâ ge ūhâ i. 1 Tesalonikaǁîn 5:11 ǃnâ hâ mîdeb ge a xoa o. Sida dana xoas ge nēsa.​—Khomai re.

2. Tae-e da nē ǁkhāǁkhāǃâs ǃnâ nî ǃhoaǃgao?

² Apostel Paulub ge ǃgâi aiǁgaus ase i, hîna ge ǁîb ǃgâsana gere omkhâiba. ǁÎnab ge gere tsâba. Nē ǁkhāǁkhāǃâs ǃnâ da ge, ǁîb ge mati ǃgâsana gere hui ǀgauba nî ǃhoaǃgao. (1) ǃGomsin ǃnâ (2) ǂkhîba ǁîn ǁaegu ūhâs tsî (3) ǁîn di ǂgomsa Jehovab ǃnâ ǀgaiǀgais ǃnâ. Tsî ǀkhī da kō re mati ta ǁîba ǁgae. Tsî sida ǃgâsana nētsē a ǂkhâǃnâ ǁkhā ǀgauba.​—1Kor. 11:1.

3. Mâ ǀnōsa mûǂuibab ge Pauluba ūhâ i?

³ Paulub ge ǃgâsana kaise ge ǀnam i. ǁÎb tsîn ge ǃgomsina gere hōǃâ. Tsîb ge ǁnās ǀkhās tsîna ǀkhomxaǂgaosib tsî tsâbaǁhaoxasib tsîna. ǁÎb ǃgâsana ge ǁgau ǁkhā i, ǃgomsinan  gere hōǃâ o. ǀGui ǃnās aib ge Pauluba mari-e ge ūhâ tama hâ i. Tsîb ge sîsen-e ge ôa, îb aitsama kōǃgâsen. Tsî ǁîb ǀkha ge hâ în tsîna kōǃgâ. (ǃNǃkh. 20:34) ǁÎb ge tende kuru tsî gere ǁamaxu. Korintes ǃnâb ge sī, ob ge ǂgurose, Akwilab tsî Priskilas hâra ǀkha gere sîsen. Xaweb ge mâ ‘sâtsēs’ hoas ai Jodeǁîn. Tsî Grikeǁîn tsîna gere aoǁnâba. Silab tsî Timoteub ge sī, ob ge Pauluba ‘aoǁnâ sîsenni ǀkha ge ǀhabe i.’ (ǃNǃkh. 18:2-5) Paulub ge tātsē ge ǀuru tama hâ i, Jehovaba ǃoabas ge ǁîb ûib ǃnâ ǂgurose ǂhâǂhâsa isa. Paulub ge ǃgâi aiǁgausa aoǁnâ sîsenni. Tsî aitsama kōǃgâsens ǃnâ ge ūhâ i. ǁNā-amagab ge nau ǃgâsana ge ǂkhâǃnâ ǁkhā i. ǁÎb ge ge ǂâiǂâiǃnâ nî, în tā ûib di ǁgâiǀāgu. Tsî omarisa ǂûmās xa ǃaromahe hâse, “ǃgâi xūna”​—ūǃoabasensa ǀuru. Tsî nēn hoan ge Jehovab di ǃoabasa ǃkhōǂgā hâ.​—Fil. 1:10.

4. Mati kha ge Paulub tsî Timoteub tsîna ǃgâsana hui, în mâǃoade mâǃkharu?

⁴ Tesalonikas ǃnâ i ge ǀhaohâba a tsoatsoahe o, on ge. ǀAsa ǃoaba-aona ǀgaisa mâǃoasa gere hōǃâ. Mâǃoa-aon ge Silab tsî Paulub tsîna hō tama i, on ge “ǀnî ǂgomsaben ǁnāpa ge hâ ina ǃkharaǂoaxa. Tsî ǃās di dana ǂgaeǂguis tawa ge sī-ū.” Tsîn ge gere mî: Nē gu ge “Kaesari di ǂnûiǂgāde” ra ǃûǂam ga. (ǃNǃkh. 17:6, 7) Mûnanai ǁkhā i du a, matin ge ǀasa Xristeǁîna ǃkhuri hâ isa. ǃĀs di khoegu ge ǁîn ǃoagu a khâi o? ǁÎn ge ǁnā ǁaeb ai Jehovaba ǃoabas ǃnâ ǀorose ga dī hâ. Xaweb ge Pauluba ǁnāsa ge ǂgao tama hâ i. ǁÎb tsî Silasi tsîn nî ī, xawe kha ge ge dītsâ. Î-î nē ǀasa ǀhaohâba ǃgâise kōǃgâhe. Paulub ge Tesalonikaǁîna ge hōhōǃnâ: “Tsî khom ge Timoteub sikhom di ǃgâsaba ge sî . . . , ǁîb nî sado ǀgaiǀgaiǃnâ tsî ǁnamase sadu ǂgoms ǃaroma. ǀGui-i âdu tsîn nē ǃgôaǃgondi xa ǃaromahe hâse ǁnobeǁnobehe tidega.” (1Tes. 3:2, 3) Timoteub tsîn ge aitsama ǁgaiǀāba, ǁîb ge ǃnaeǃnâ ǃās Listras ǃnâ gere hōǃâ. Tsîb ge ge mû matib ge Pauluba, ǁnāpa ge hâ i ǃgâsana gere ǀgaiǀgai ǀgausa. Jehovab ra mā ǀamǂoasab ge mû amagab ge. Timoteuba ǀasa ǃgâsana ge ǂkhâǃnâ ǁkhā i, hoa xūn nî ǃgâi ǃkhaisa.​—ǃNǃkh. 14:8, 19-22; Heb. 12:2.

5. Bryanta mati ǀhaohâb ǃûi-aob xa ge huihe?

⁵ Mâ ǀnî hâ ǀgaub ǃnâb ge Pauluba ǁîb ǃgâsana ǂkhâǃnâ? ǁÎn ge Listrasa ǃoa a oaǀkhī ǁaeb ain ge Ikoniums, Antioxias, Paulub tsî Barnabas hâna. ǀHaohâb ǃûi-aoga mâ ǀhaohâb ‘hoab ǃnâ ge ǁgaumâi.’ (ǃNǃkh. 14:21-23) ǂGomǃgâ ǁkhā da ge a, ǁnā ǀhaohâb ǃûi-aogu ge. ǁKhaeǂgaos ase ǁnā ǀhaohâga ība īsa, nētsēs digu khami. Kō re tae-eb ge ǀgui ǃgâsab Bryant di ǀon hâba mîsa: “15 Kurixa ta a hînab ge ti paba omsa xu ge doe. Tsîs ge timasa Jehovaba ge ǃoaba ǀû. ǁNāxuhe tsî ǂkhabuǂâi hâse ta ge gere tsâ.” Tae-e Bryant da ge hui îb mâǃkharu? ǁÎb ge ra mî: “Toni di ǀon hâ ǀhaohâb ǃûi-aob ge tita ǀkha ǀhaos tawas. Tsî ǀnî hâ ǁaegu ai gere ǃhoa. ǁÎb ge ǃgomsinan gere mâ ǃkharu, xawe ge ǂkhî-i ǃgâsan xa gere mîbate. Tsîb ge Psalmdi 27:10 sa tita ǀkha ge ǀgoragu. Tsî ǃnāsase Hiskiab xa gere ǃhoa. Hîna ge, ǁîb di ǁgûb ge ǂgomǂgomsase hâ tama i xawe ǂgomǂgomsase gere ǃoababa.” Matis ge nē ǂkhâǃnâsa Bryanta hui? “Tonib di huib ǀkha ta ge, Jehovaba ǀoasase ge ǃoaba tsoatsoa” tib ge Bryanta ra mî. ǀHaohâb ǃûi-aogo kō re, î go ǁnān hîna. Bryanti khami ina “ǃgâi mîdi” ǀkha hui, tsî ǁîna omkhâi.​—ǂKhm. 12:25.

6. Matib ge Pauluba nau ǃgâsan aiǁgaudi ǀkha nau ǃgâsana gere ǂkhâǃnâ?

 ⁶ Paulub ge ǃgâsana ge ǂkhaǃnâ ‘kai ǂnubis di ǃkhō-amaon’ ǃgomsina nî mâ ǃkharusa. Jehovab ge ǁîna ǀgaiba mā ǃkhais ǃaroma. (Heb. 12:1) Paulub ge ge ǁnâuǃā, ǃkharuge ǁae ge ûi hâ i khoen ge ǁîn di ǃgomsina mâ ǃkharu, ǀgaub ǃgâsana nî ǂkhâǃnâsa. În ǁîn tsîna ǁkhoaǂgaoxa tsî ǁnās xa huihe. Tsî ǁîn di ǂâisa “ûitsama Elob di ǃās” ai mâi. (Heb. 12:22) ǁNās ge nētsēs tsîna a ama. Kaise da ge ra ǂkhâǃnâhe khomai da ga o, matib ge Jehovaba. Gideonni, Baraki, Davidi, Samueli tsî ǀnîn tsîna a hui ǀgaus xa. (Heb. 11:32-35) Mati du nētsēs aiǁgaudi xa ra tsâ? ǃNāsa ǁaeba da ge sîǂkhinide dana beros tawa, ǃgâsana xu ra hō. Hîna ra ǁguiǃāde matin nētsē Jehovaba ra ǃoaba ǃgâsan di aiǁgaude, ǁîn ǂgomsa ra ǀgaiǀgai ǀgausa.

7. Tae-e du Paulub ǀapemāsa xu ra ǁkhāǁkhāsen, Romeǁîn 14:19-21 ǃnâ?

⁷ Sida di ǃgâsana da ge ra omkhâi. Dītsâ tsî da ga ǀhaohâb ǃnâ ǂkhîba ga ra ūhâ o. ǃKharagagu ǂâiǀgauga da ge mā-am tama hâ i gu ǀgorada. Tsî da ge ǁnās ǀkhas tsîna sida ǂâiǀgaugu ai ǀgui hâ tama hâ. Elobmîs ǀapemās ga khôahe tama io. Aiǁgau-e kō re. Romes ǃnâ ge hâ i ǀhaohâb ge, Jodeǁî Xristeǁîn tsî Jodeǁî taman tsîna xu ge hâ i. Moseb di ǂhanub ge ūbēhe o. Î ge ǀnî ǂûn ǀguina ǂûs di ǂhanuba ge bē. (Mrk. 7:19) ǁNā ǁaeba xun Jodeǁî Xristeǁîna, ǃnorasase ǂhâban ra ǂûna ge ǂû ǁkhā i. Xawe ǀnî Jodeǁîn ge gere ǂâi ǂhanu tama i ge hâ isa, ǁnā ǂûna ǂûsa. ǁNās xa ǃaromahe hâseb ge ǀhaohâba ge ǀgora. Paulub ge ǂkhîba ūhâs ǂhâǂhâsasiba nēti ge mî: “Xawe i ge ǂkhaba ǀnî khoe-i di ǃnôasa nî ǃaromaba xū-e ǂûsa.” (Khomai re Romeǁîn 14:19-21 sa.) ǁNās ǀkhāb ge Pauluba ǃgâsana ge hui în mûǂan, ǂnoagus ǃgâi tama hâsa. Tsî ǁnāti ī mâsib ǀhaohâga a ǀgora ǁkhāsa. ǁÎb tsîn ge ǁîb tanisen ǀgauga ge dawa, îb tā nauna ǃnôa kai. (1Kor. 9:19-22) Sida tsîn ge nauna omkhâi tsî ǂkhîba a ūhâ ǁkhā. Nau khoen ǃkharagagusigu xa da ga ǂnoagu tama io.

8. Pauluba tae-e ge dī, ǀhaohâb ǃnâ ge hâ i mâsib xa?

⁸ Paulub ge ǂkhîba ūhâs ǃnâ, ǃgâi aiǁgausa ge mâi. ǁNān hîna ge ǂhâǂhâsa xūn ǀkha ǀguiǂâixa tama hâ în ǀkha. Aiǁgause i ge ǂguro ǁaeb Xristeǁîn ǀhaohâb ǃnâ ge hâ îna. Jodeǁî tama khoen hîna ge Xristeǁî kain nî ǃgaohe ǃkhaisa gere ǂhâba. În tā mîǁgaiǁgaihe. (Gal. 6:12) Paulub ge ǁnā mûǂuib ǀkha ge ǀguiǂâixa tama hâ i. ǁÎb di ǀgaub nî sao-aihesa ǁgari tama i tsîb ge ǀapemāde apostelgu. Tsî ǀhaohâb ǃûi-aogu hîna Jerusalems ǃnâ hâgu ai gere ôa. (ǃNǃkh. 15:1, 2) Paulub ge nēti i ǀgaub ǃnâ mâsiga gere sîsenǂam. Amaga i ge Xristeǁîna ǀhaohâb ǃnâ ǂkhîba ge ūhâ ǁkhā i.​—ǃNǃkh. 15:30, 31.

9. Mati da Paulub di aiǁgausa a sao ǁkhā?

⁹ ǂNoagu i ga hâ, o da ge ǂkhîba ra ūhâ ǂgao. Tsî Jehovab ǀhaohâb ǃnâ, ǁgaumâi hân daoǁgaude ra ôa ǂgao. ǃNāsa ǁaeba da ge Elobmîs ai ǃgaoǃgaosa daoǁgaude. Sida ǂkhinin tamas ka io ǀapeǂhumis xa ra māhe, daoǁgaudi ǃnâ hō ǁkhā. Dītsâ tsî da ga ǁnā ǀapemāde sao o. Tsî sida dib ose, o da ge ǂkhîb hîna ǀhaohâb ǃnâ hâb ai nî ǀaro.

10. Tae-i tsînab ge Pauluba gere dī, îb ǂkhîba ūhâ ǀhaohâb ǃnâ?

 ¹⁰ Paulub ge ǂkhîba gere kuru. Tsî ǁnās ǀkha ǁîb ǃgâsan ǃgâi ǀgaugu, ǀguiga gere kō. ǁÎn ǃgâi tama ǀgaugu ose. Aiǁgause, Romeǁîna ǃoab ge xoa sîǂkhinis ǀams aib ge ǂguina ǁîn ǀondi ai ge ǂgai. Tsî ǃgâi xūna ǁîn xa gere mî. Pauluba da ge a ǁgae ǁkhā. ǃNorasase da ga sida ǃgâsan ǃgâi ǀgauga mî o. ǁNāsa da ga dī, o da ge ǀgū ǀhōsagusisa ǁîn ǀkha ra omkhâi. Tsî ǀhaohâb ǃnâ hâ ǀnamma ra ǀgaiǀgai.

11. Mati da ǂkhîba a kuru ǁkhā?

¹¹ ǀNî ǁaegu ain ge ǂansa ūhâ Xristeǁîn tsîna. ǁNausagu tamas ka io a ǂnoagu ǁkhā. Tsî ǁnās ge Paulub tsî ǁîb ǀgū ǀhōsab, Barnabab ǀkha ge i. Nē ǀgam khoega ge ǀgaisase ge ǁnâusāgu. Markuba kha ǁîkha di saora sîsabe sîsenni ǃnâ nî ūsao sa. “Nēs ai kha ge ge ǁnâuǃāgu” ǁoa i. Tsî kha ge ǀguiba ge ǃnarima ǀû (ǃNǃkh. 15:37-39) Xawe gu ge Paulub, Barnabab tsî Marku hâga ǂkhîba ge kuru. Tsî ǁnās ǃnâ-ū ge ǁgau ǂkhîb. Tsî ǀguiǃnâxasib tsîna ǀhaohâb ǃnâ ūhâs, ǂhâǂhâsa ǃkhaisa. Paulub ge ega Barnabab tsî Marku hâkha xa ǃgâise gere ǃhoa. (1Kor. 9:6; Kol. 4:10) Sida tsîn ge nî dītsâ î da ǃkharagagusigu, hîna da naun ǀkha ūhâ ga ǃgâiǃgâi. Tsî ǁîn ǃgâiǀgaugu ai sida ǂâisa ǂnûi. ǁNāsa da ga dī, o da ge ǂkhîb tsî ǀguiǃnâxasib tsîna nî ūhâ.—Efe. 4:3.

12. Mâna ǀnî ǃgomsin hînan sida ǃgâsana ra hōǃâna?

¹² Sida ǃgâsana da ge ra omkhâi, ǁîn ǂgomsa da ga Jehovab ǃnâ ǀgaiǀgai o. ǀNîn ge Jehovaba ǃoaba tama omaris ǁanin, sîsenǁae-ūn ra khoen. Tsî skol ǀhōsan xa ra mîǁgaiǁgaihe. ǀNîn ge ǂūrusib ǃgomsina ūhâ tamas ka io, ǃgomsiba ra hōǃâ tsûtsûhen ge amaga. Xawe ǀnî Xristeǁîn ge gaxuse ǁāǁnâsa. Tsî ǂgui kurina ǃhūbaib nî ǀamsa ǃâu hâ. Nē mâsigu ge nētsē Xristeǁîn ǂgomsa ǃâitsâ ǁkhā. ǂGurokam ǁaeb Xristeǁîn ǀhaohâb tsîn ge nē ǃgomsina gere hōǃâ. Pauluba tae-e ge dī, îb ǁîb ǃgâsana ǂkhâǃnâ?

13. Pauluba mati ǁîn ǂgoms ǃaroma gere mâǃoahena ge hui?

¹³ Paulub ge xoade gere sîsenū, îb ǃgâsan di ǂgomsa ǀgaiǀgai. Aiǁgausen ge ǀnîsi Jodeǁî Xristeǁîna ge ǀū i, matin nî ǃeremasa. Jehovaba ǃoaba tama omaris ǁanin gere mî o, Jodeǁîsis ge Xristeǁîsis xa kai isa. Paulub di sîǂkhinis hîna ge Hebreǁîna ǃoa hâ is ge. ǁNā Xristeǁîna ge ǀgaiǀgai. (Heb. 1:5, 6; 2:2, 3; 9:24, 25) ǁÎb di ǀgaisa mîdi ge ge hui nî în ǂan. Tae-en Jehovaba ǃoaba tama omaris ǁanina nî mîbasa. Nētsē da ge sida di ǃgâsan, hîna ra mâǃoahena a ǂkhâǃnâ ǁkhā în. Elobmîs ai ǃgaoǃgaosa ǂkhinina sîsenū. Tsî ǁnās ǀkha ǁîn di ǂgomsa ǁguiǃā. Sida di ǂkhamkhoen ga kurus ǃnân ǂgom tama amaga mâǃoahe. O da ge ǁîna a hui ǁkhā în Was Life Created? di ǀon hâ ǂkhiniba xu ǃnāsa ǃgāsasiba hō. Tsî Ûib di tsoatsoas​—tsî koro dîdi hîna da a dî ǁkhādi di ǀon hâ ǂkhiniba xus tsîna. În ǁguiǃā ǁkhā tae-i ǃaroman kurus ǃnâ ra ǂgomsa.

14. Pauluba aoǁnâs tsî ǁkhāǁkhās ǀkhab ge ǀhabe i, xawe tae-e gere dī?

¹⁴ Paulub ge ǃgâsana gere ǂkhâǃnâ, în ǀnamma ‘ǃgâi sîsengu’ ǃnâ-ū ǁgaugu. (Heb. 10:24) ǁÎb di ǃgâsanab ge ge hui mîb gere xūn ǃnâ ǀguis ose, xawe dīb gere xūn ǃnâ-ūs tsîna. Aiǁgausen ge Judab ǃgâsana ǀkhuruba gere hōǃâ, ob ge  Pauluba ǂhân ge hâ i xūna ge sī-ūba nî. (ǃNǃkh. 11:27-30) Aoǁnâs tsî ǁkhāǁkhās sîsenni ǃnâb ge ǀhabe i. Xaweb ge Pauluba ǀgauga hoaǁae gere ôa, îb ǂhâsib ǃnâ hâna hui. (Gal. 2:10) ǁNātib gere dī amagab ge, ǃgâsan ǂgomǃgâsiba gere omkhâi. Jehovab nî kōǃgâ nîsa. Nētsē da ga sida ǁaeb, ǀgaib. Tsî ǂandi tsîna sîsenū o, î da tsūkēǃgâb ǃnâ hui. O da ge sida ǃgâsan ǂgomsa ra omkhâi. Tsî ǁnāsa da ge a dī ǁkhā, ǃhūbaib ǂhawase ra dīhe aoǁnâ sîsen-e ǂkhâǃnâs ǃnâ-ū. Nēn tsî ǀnî hâ ǀgaugu ǃnâ da ga sida ǃgâsana hui. O da ge ǂgomǃgâsiba ra mā nî, Jehovab tātsē ǁnāxu nî tidesa.

15-16. Mati da ǂgoms ǃnâ ǂkhabu hâna nî hui?

¹⁵ Paulub ge ǂgoms ǃnâ ge ǂkhabuna, ǀûs ose gere ǂkhâǃnâ. ǁÎb ge ǁîna ǁkhaeǂgaosa gere ǁgau tsî ǁnās ǀkha ǃgâi. Tsî omkhâi ra, ǀgaub ǃnâ ǁîn ǀkha gere ǃhoa. (Heb. 6:9; 10:39) Aiǁgause ǁîb di sîǂkhinis Hebreǁîna ǃoab ge xoas ǃnâb ge ǃnāsa ǁaeba “sada” tsî “sida” di hâ mîde gere sîsenū. Tsîb ge ǁnās ǀkha gere ǁgau, ǁîb tsîn nē ǀapemāde nî sîsenū ǃkhaisa. (Heb. 2:1, 3) Paulub khami da ge sida tsîna, ǂgoms ǃnâ ge ǂkhabuna ǁnāxuǃnâ tide. Xawe da ge aiǃgû tsî ra omkhâi nî. Tsî ǃgâiǃgâibasensa ra ǁgau nî. Nēs ǀkha da ge ra ǁgau ǁîna da a ǀnamsa. Sida ǃgâi tsî ǃnomsa ǃhoaǀgaub ge ǁîna a omkhâi ǁkhā.

¹⁶ Paulub ge ǃgâsana ge ǂâiǂâiǃnâ, Jehovab ǁîn ǃgâi sîsenga a ǂan ǃkhaisa. (Heb. 10:32-34) Sida tsîn ge ǁnāti i xū-e a dī ǁkhā. Sida ǃgâsan hîna ǂgoms ǃnâ ǂkhabu hâna da ga hui o. ǀNîsi da ge ǁî-e a dî ǁkhā, mati i ge amab ǃnâ ǂgâsa. Tsî ǁî-e a ǂâiǂâiǃnâ ǁkhā, î-î ǂâi-ao. Mati i gere tsâsa Jehovab ge ǁî-e gere ǂkhâǃnâ o. ǁNā ǃēsa da ge a sîsenū ǁkhā, î da ǁgau. Jehovab  ǀuru tama hâsa, ǁîn ge ǃkharu ge ǁaeb ǃnâ ǁgau ǀnamma. Tsîb Jehovaba hānîǁaeb ǃnâ ǁî-e ǁnāxu tidesa. (Heb. 6:10; 13:5, 6) Nēti i ǁgamǀhaodi ge ǃgâsana a omkhâi ǁkhā, în ǁîn ǃoabas ǃnâ aiǃgû.

17. Aiǃgû tsî da mâ ǂansa omkhâi ǁkhā?

¹⁷ Om kuru-aob ǁîb ǂansa ǁaeb ǀkha ra ǃgâiǃgâi. Khami da ge sida tsîna a ǃgâiǃgâisen ǁkhā, omkhâigu da ga ra o. Nauna da ge a hui ǁkhā în ǀgaiba ūhâ tsî ǁîn ǃgomsina mâǃkharu. ǁÎn ǀkha da ga aiǁgaudi hîna ge ǃkharu gere ǁaeb ǃnâ, ǃgomsina mâǃkharun xa ǀgoragu o. Nau khoen ǃnâ da ra mû ǃgâi xūna da ga mî, o da ge ǂkhîba a omkhâi ǁkhā. Tsî da ge ǂkhîba a ūhâ ǁkhā ǃkharagagusigu. Tsî ǃgom mâsigu ǃnâ. Tsî da ge aiǃgû tsî sida ǃgâsan ǂgomsa omkhâi ǁkhā. ǁÎn ǀkha da ga Elobmîs amaba ǀgoragu o. Tsî ǂhân hâ huiba ga ra mā nî o. Tsî ǁnās xōǀkhā gagasise ǂkhabu hâna ga ra ǂkhâǃnâ o.

18. Tae-e du aiǃgû tsî ra dī ǂgao?

¹⁸ ǁNān hîna omsîsengu dawa ra huin ge kaise a ǂkhî. ǂKhîba ga ge a ūhâ ǁkhā, sida ǃgâsan ǂgomsa da ga ǀhaodi dawa ǀgaiǀgai o. Nētsē da ra om, omdi ge ega a ǁgai ǁkhā. Xawe i ge sida sîsenga ǀamose a hâ ǁkhā. “ǁNā-amaga a da ǀgaiǀgaiǃnâgu, tsî ǂkhâǃnâgu re.”​—1Tes. 5:11.