33ǁÎ ǁKHĀǁKHĀǃÂS
Jehovab ge ǁîb di khoena ra kōǃgâ
Jehovab “di mûs ge ǁnān ǁîba ra ǃaoǃgân ai hâ.”—PSA. 33:18.
4ǁÎ ǁNAETSANAS ‘Jehovab ge a ti ǃûi-ao’
ǃKHŌǀHAOS *
1. Tae-i ǃaromab ge Jesuba, Jehovaba ǂgan, îb ǁîb sao-aona kōǃgâ?
ǁŌB NÎ ǃoes aiǃâb ge Jesuba ǀō-aisa ǂgansa, ǁîb ǀhomsi ǁGûb dawa ge dī. Jehovabab ge ge ǂgan îb, ǁîb sao-aona ǁkhauba. (Jhn. 17:15, 20) Jehovab ge hoaǁae ǁîb khoena ǁkhauba tsî ra kōǃgâ. Xaweb ge Jesuba ge ǂan î, ǁGâuab ǁîb sao-aona nî mâǃoa ǃkhaisa. Jesub ge ge ǂan i, ǁîn Jehovab di huiba ǂhâba hâsa. În ǁGâuab di ǁnāǂamde mâǃoa.
2. Psalmdi 33:18-20 ǃoagu da tae-i ǃaroma, ǃgomsina ǃao tide?
2 ǁGâuab ǂgaeǂguis ge nētsē ǂgui ǃgomsina ama Xristeǁîna ra ǃaromaba. Nē ǃgomsin hîna da ra hōǃân ge ra ǂkhabuǂâi kai da. Tsî sida ǂhauǃnâsib Jehovab ǃoagu da ūhâba ra ǃâitsâ. Xawe nē ǁkhāǁkhāǃâs ǃnâ da nî mû khami, î ge ǃao da nî xū-e a ǀkhai. Jehovab ge ǃgomsin hîna da ūhâna ra mû tsî ra hui da ǂgao. ǀKhī da ǀgam Elobmîs aiǁgau ra ôaǃnâ. Hîna ra ǁgau ra, Jehovab ǁîba ra ‘ǃaoǃgâna ra kōǃgâsa.’—Khomai re Psalmdi 33:18-20 sa.
JEHOVAB GE RA HUI DA ǀGURITSÂSEN DA GA O
3. Mâ ǁaeb ai da a ǀguritsâsen ǁkhā?
3 ǀHaohâb ǃnâ da ga ǂgui ǃgâsana ūhâ. Xawe da ge ǀnî ǁaegu ai a ǀguritsâsen ǁkhā. Aiǁgausen ge ǂkhamkhoena skol ǀhōsanan ga ǁîn ǂgomsa ǁguiǃāba. Tamas ka ion ga ǀasa ǀhaohâba ǃoa doe o, a ǀguritsâsen ǁkhā. ǀNî da ge ra tsûaǂgao, tamas ka io ǃgâi tama tsâsigu ǀkha ǃgomsiba ūhâ ǁkhā. Tsî a ǂâi ǁkhā, nē ǃgomsiga da aitsama nî tani di. Tsî da ge sida ra tsâ ǀgaub xa ǃhoasa xu a ǃkhō-oasen ǁkhā. ǀNîsin nauna ǁnâuǃā da tide khami da ra tsâ amaga. ǀNî ǁaegu ai da ge ra dîsen, khoe-e sida tsâba i ra di. Mati ǀgui i ga ī tsî da ga ǀguritsâsen. Xawe da ge ǀnî ǁaega huio tsî a ǂâiǂhansen ǁkhā. Jehovab ge ǂgao tama hâ, î da di tsâ. Tae-i ǃaroma da, di a mî ǁkhā?
4. Tae-i ǃaromab ge Eliaba mî: “Tita ǀguita ge ǃgau hâ” di?
4 ǂGomǂgomsa-aob, Eliab di aiǁgausa du kō re. Isabels ge ge mîǁgui, ǃgambis nî ǃkhaisa. ǁNā-amagab ge 40 tsēde ǁîb ûiba ge ǃkhoeba. (1Gao. 19:1-9) ǀUigu ǃnâb ǀguri hâ hînab ge Jehovab ǃoa nēti ge mî: “Tita ǀguita ge ǃgau hâ.” (1Gao. 19:10) ǀNî kēbo-aogu tsîn ge ǁnā ǃhūb ǃnâ ge hâ i. Aiǁgauseb ge Obadjaba 100 kēbo-aoga ge sâu, î gu tā Isabels xa ǃgamhe. (1Gao. 18:7, 13) Eliaba tae-i ǃaroma gere ǀguritsâsen? ǁÎba gere ǂâi, Obadjab ge sâu kēbo-aogu hoagu ge ǁō hâ i di? ǁÎba ǀnîsi gere ǀguritsâsen, naun ge ǁîb ǀkha ǀguiba Jehovaba ǃoaba tama hâ io. Ama Elob a ǃkhaisab ge Jehovaba ǁgau xawe? ǀNîsib gere tsâ khoe-i ge ǀū īsa, matikō tsūkēǃgâb ǃnâb hâsa tsî i khoe-e ǁae tama di? Nē ǃnaeǃkhaidi ge hoase Eliab gere tsâ ǀgauba ǁguiǃā tama hâ. Xawe da ge a ǂan Jehovab gere ǁnâuǃāsa. Tae-i ǃaromab ge Eliaba gere ǀguritsâsensa. Tsîb ge ge ǂan i matib ǁîba nî huisa.
ǀGuritsâsen da ga, o da mâ ǁkhaeǂgao ra xū-e a ǁkhāǁkhāsen ǁkhā Jehovab ge Eliaba a hui ǀguib xa? (5-6ǁÎ xoaǀgora ra khomai re)
5. Jehovaba mati Eliaba ge ǁgau, ǀgurib ge hâ tama hâ isa?
5 Jehovab ge Eliaba ǂgui xūn ǃnâ ge hui. ǁÎb ge Eliaba ge ǂkhâǃnâ îb ǃhoa. ǀGam ǃnārab ge Eliaba ge dî: “Tae-ets nēpa ra dī?” di (1Gao. 19:9, 13) Mâ ǃnās hoasab ge Jehovaba Eliaba gere ǃgâ, ǂgaoba xub gere ǀgore o. Jehovab ge Eliab ǀgoresa ge ǃeream. ǁÎb ǀgaib tsî ǁîb ǀkhāb hâsa ǁgaubis ǃnâ-ū. ǂGui Israelǁîn ǁîba ra ǃoaba ǃkhaisab ge ge ǂgomǃgâ kaibi. (1Gao. 19:11, 12, 18) ǂGom ǁkhā da ge a Eliab ge ǃgâise gere tsâsa. ǁÎb di ǂgaobab ge Jehovab dawa ǁhōǂui tsî ǃereamhe o. Jehovab ge ǀnî ǂhâǂhâsa ǁgaumâide Eliaba ge mā. ǁÎb ge Eliaba ge ǂgan îb Hasaela, Siriab di gaob ase ǁgaumâi. Jehuba Israeli gaob ase tsî Elisaba kēbo-aose. (1Gao. 19:15, ) Nē ǁgaumâideb ge Eliaba gere mā, ob ge gere hui bi. Îb ǃgâi xūn ai ǁîb ǂâisa ǂnûi. Tsîb ge ǀgū hui-ao i tsîna ge mā bi, Elisaba. Mati du huiba Jehovaba xu hō ǁkhā ǀguritsâsen du ga o? 16
6. Tae-e du a ǀgoreba ǁkhā, ǀguritsâsen du ga o? (Psalmdi 62:8)
6 Jehovab ge ra ǁkhau du, î du ǁîba ǃoa ǀgore. ǁÎb ge ra mû, mâ ǃgomsina du ūhâsa. Tsîb ge ra mîba du, sadu ǀgoredeb mâ ǁaeb hoab ai nî ǃgâsa. (1Tes. 5:17) ǁÎb ǃoaba-aon ǀgorede ǃgâs xab ge a ǃgâibahe. (ǂKhm. 15:8) Tae-i xa du a ǀgore ǁkhā ǀguritsâsen du ga o? Jehovab ai du sadu ǂgaoba ǁhōǂui re, Eliab ge dī khami. (Khomai re Psalmdi 62:8 sa.) Jehovaba sadu ǃgomsina mîba re, tsî matin ra tsâ kai dusa. ǂGan re îb hui du, î du ǂan tae-e du ǁnā tsâsigu ǀkha a dī ǁkhāsa. Aiǁgause du ga sadu skol ǀhōsan xa, sadu ǂgoms xa dîhe sa ǃao o. Jehovaba mîba re îb ǁkhoaǂgaosiba mā du, î du ǃgâise ǁguiǃāsen ǁkhā. ǁÎba du ge a ǂgan ǁkhā îb gā-aisiba mā du, î du gā-ai ǀgaub ǃnâ sadu ǂgomsa ǁgûiǃā. (Luk. 21:14, 15) ǃGâi tama tsâsigu ǀkha du ga ǃgomsiba ūhâ o. Jehovaba ǂgan re, îb hui du î du gagasise ǀgaisa Xristeǁî-i ǀkha ǃhoa. Tsî du ge Jehovaba a ǂgan ǁkhā, îb sado ra ǃgâ khoe-e hui î-i ǁnâuǃā du. Sadu ǂgaoba Jehovab ai ǁhōǂui re. Mû re matib sadu ǀgorede nî ǃeream ǀgausa. Tsî naun di huiba ūǃoa re, o du ge ǀorose nî ǀguritsâsen.
ǀGauga ôa î du ra î du ǃnāsase sadu aoǁnâ sîsenni ǃnâ dī Tsî naun ǀkha ǀgoragu? (7ǁÎ xoaǀgorasa khomai re)
7. Tae-e du Mauriciob aiǁgausa xu ra ǁkhāǁkhāsen?
7 Jehovab ge hoa da, ǂâibasensa ūhâ sîsenne mā hâ. ǂGomǃgâsiba du ge a ūhâ ǁkhā. ǁÎb ǀhaohâb tsî aoǁnâ sîsenni ǃnâ du ra dī sîsenga ra mû tsî ǃgôaǃgâsa. (Psa. 110:3) Nē sîsenni ǃnâ ǀhapesa, mati nî hui du ǀguritsâsen du ga o? Mauricio di ǀon hâ ǂkham ǃgâsab di aiǁgausa kō re. * ǃNubu ǁaerobab ǁāǁnâhe toa hâ, hînab ge ǁîb ǀhōba amaba ge ǁnāxu. “ǁÎb Jehovaba xu ra ǃnūsa ta ge mû, o ta ge ge ǂkhabuǂâi tsoatsoa.” tib ge Mauricioba ra mî. “Dîsen ta ge gere, ti mîmâis hîna ta ge dīsa ta nî dīǀoaǀoa hō ǃkhaisa. Tsî ta Jehovab omaris ǃâse nî hâ ǀgara ǁkhāsa. ǀGuritsâsen tsî ta ge gere ǂâi, khoe-i ti tsâsiga ǁnauǃā tide ti.” Tae-e Mauricioba ge hui? “ǃNāsa ǁaeba ta ge gere aoǁnâ,” tib ge ra mî. “ǁNās ge ge huite, i ta tā tita tsî ti tsâsigu xa ǀgui ǂâi. Nau khoen ǀkha ta ge aoǁnâ sîsenni ǃnâ gere sîsen, amaga da ge ǂkhîba ge ūhâ i. Tsî ge ǀguritsâsen tama hâ i.” Nēsi da ga sida ǃgâsan ǀkha, ǀnai da gere aoǁnâ khami aoǁnâ tama i. Xawe da ge ra ǀgaiǀgaihe, ǁîn ǀkha ǀguiba sîǂkhinide xoa. Tsî telefonni ǃnâ-ū ga ra aoǁnâ o. Tae-i tsîna Mauricioba ge hui? ǀAro tsîb ge ra mî: “ǀHaohâb ǃnâ ta ge ge ǀhape i, ǁkhā ta a-i hoa-e dī. Tsî da ge aiǂhomisen tsî māhe ta gere ǃâga ǀhaodi dawa gere dī. Nē ǁgaumâidi ge gere tsâ kaite Jahovab tsî naun tita ra ǃgôaǃgâsa.”
JEHOVAB GE RA HUI DA, ǂKHABUǂÂI DA GA O
8. ǃGomsina mati a tsâǀkhā da ǁkhā?
8 ǀUniga tsēdi ǃnâ da, ǃgomsina nî hōǃâsa da ge ra ǃâubasen. (2Tim. 3:1) Xawe da ge a buru ǁkhā, ǃâubasen tama da hâ ǃgomsina da ga hōǃâ o. Aiǁgause marisi ǃgomsin, ǁkhōǁkhōsa ǀaeb. Tamas ka io da ge ǁōb ǃnâ ǀnam da a khoe-e a ǂoaǃnâ ǁkhā. Nē xūn ge a ǂkhabuǂâi kai da ǁkhā. ǃNāsase da ga, nē ǃgomsiba xu nau ǃgomsiba ǀgui ǁaeb ai ga ra hōǃâ o. Xawe ǂâis ǃnâ du ūhâ re, Jehovab ge ra kōǃgâ da. Tsî da ge ǁîb di huib ǀkha, hâ ga ǃgomsi-i hoa-e. ǂGomǃgâsib ǀkha a mâǃkharu ǁkhā.
9. ǁGuiǃā re mâ ǃgomsinab ge Joba gere hōǃâ sa.
9 ǂÂi re matib ge Jehovaba, ǂgomǂgomsa-aob Joba hui ǀgauba. ǁÎb ge kaise ǁkhōǁkhōsa ǃgomsiga ǃnubu ǁaerob ǃnâ ge hōǃâ. ǀGui tsēs ǃnâb ge Joba ge mîbahe, ǁîb xamanin ge ǃgamhe tamas ka io ǃnarihesa. Tsîn ge ǁîb ǃgān tsî ǀgôana ǃgamhesa. (Job. 1:13-19) Noxobab ra ǃoa hînab ge Joba tsûtsûsa ǀaeba ge hō. (Job. 2:7) ǁÎb di mâsib ge kaise ge ǁgai i, ǁnā-amagab ge nēti ge mî: “ǂGao tama ta hâ; ǀamosib kōse ta ûi ǂgao” tama hâ ti.—Job. 7:16.
Jehovab ge Joba ra mîba matib hoa xūna ra kōǃgâ ǀgausa, hînab ge kuruna. Îb Joba ǁnās ǃaroma mû Jehovab a ǀnambi sa. Tsî nî kōǃgâ bi ǃkhais tsîna (10ǁÎ xoaǀgorasa khomai re)
10. Matib ge Jehovaba, Joba ǂhâb hâ xūna mā îb ǁîb ǃgomsigu ǃnâ mâǀgai? (tsoatsoas ai hâ ai-īsiba kō re)
10 Jehovab ge Joba gere kōǃgâ. Jehovab Joba a ǀnam amagab ge, ǂhâb hâ xūn hoana gere mā bi. Îb ǂgomǂgomsase ǃâitsâ ga mâǀgai. Jehovab ge Jobi ǀkha ǃhoa tsî ge ǂâiǂâi bi gā-aisib. Tsî ǀnammi hînab ǁîb kurusabena ūba hâba. Tsîb ge ǂgui buruxa xamanin xa gere ǃhoa. (Job. 38:1, 2; 39:9, 13, 19, 27; 40:15; 41:1, 2) Jehovab ge ǂgomǂgomsa ǂkhamkhoeb Elihub tsîna ge sîsenū, îb Joba ǀgaiǀgai tsî ǁkhaeǂgao. Elihub ge ra mîba bi, Jehovab hoaǁae ǁîb ǃoaba-aona ra mā dawa-amsa, mâǀgain gara o. Jehovab ge Elihuba ǂkhâǃnâs tsîna ge hî, îb Joba ǀnammi ǃnâ ǀapemā. Elihub ge Joba ge hui, îb ǁîb xa kaise ǂâi ǀû. Tsîb ge ge ǂâiǂâiǃnâ bi, Jehovab hoa xūn di Kuru-aob aiǃâ da a ǂkharirosa. (Job. 37:14) Jehovab ge Joba ǁgaumâisa ge mā, îb ǁîb ǃnona ǀhōgu hîna ge ǁorega ǀgoreba. (Job. 42:8-10) Jehovaba mati nētsē ra ǂkhâǃnâ da, ǃgomsiga da ga hōǃâ o?
11. Elobmîsa mati ra ǁkhaeǂgao da, ǃgomsina da ga ra hōǃâ o?
11 Jehovab ge sida ǀkha ǃoa ǃhoa tama hâ, Jobi ǀkhab gere dī khami. Xaweb ge sida ǀkha Elobmîs ǃnâ-ū ra ǃhoa. (Rom. 15:4) ǁÎb ge hānîǁaeb xa ǃâubasensa mādas ǀkha ra ǁkhaeǂgao da. ǂÂi re ǀnî xūn Elobmîs ǃnâ hân, hîna a ǁkhaeǂgao da ǁkhān xa ǃgomsiga da ga ǃkharuǃnâ o. Elobmîs ǃnâb ge Jehovaba ra mîmâiba da, xū-i xare i. “Sada ǁîb di ǀnama xu a ǀgora ǁoasa.” ǁNās ge ǁgai ǁgâiǀāgu tsîna ǃkhōǂgā hâ. (Rom. 8:38, 39) ǁÎb ge mîmâiba das tsîna ra dī ǀgores ǃnâ “ǁîba ra ǂgaiǀîn hoan” ǀgūseb hâsa. (Psa. 145:18) Jehovab ge ra mîba da, ǁîb ai da ga ǂgomaiǂnûi. O da mâ ǃâitsâ-i hoa-i ǃnâ nî mâǀgai ǁkhā ǃkhaisa. Tsî ǂkhîba nî hōsa, ǃgomsina da ga hōǃâ xawe. (1Kor. 10:13; Jak. 1:2, 12) Elobmîs ge ra ǂâiǂâiǃnâ da, sida ǃgomsin ǃnubu ǁaerob dis ǀguisa īsa. ǀAmo ûib di ǀkhaeb ǀkha da ga ǀgopeǀnō, o. (2Kor. 4:16-18) Jehovab ge ama ǃâubasensa ra mā da, ǁnān hîna hoa ǃgomsina ra ǃaromanab nî dīkākāsa. ǁNāb ge ǁGâuab tsî ǁîb ǁgai ǀgauga ra saon tsîna ǃkhōǂgā hâ. (Psa. 37:10) ǁKhaeǂgao ra Elobmîs xoade du ǃkhōmâi hâ. Hîna hânîǁaeb ǃgomsigu ǃnâ mâǀgais ǀkha nî hui du de?
12. Jehovaba tae-e sada xu ra ǂgaoǀkhā?
12 Jehovab ge ǂhâba hâ, î da ǁaeba ǁamaǂui. Tsî Elobmîsa ǁkhāǁkhāsen tsî khomai da ra xūn xa ǃgamse ǂâiǃgâ. ǁKhāǁkhāsen da ra xūna da ga ûiǂui, os ge sida ǂgomsa ra ǀgai. Tsî da ge sida ǀhomsi ǁGûb ǃoa ra ǀgū. ǁNās xa ǃaromahe hâse da ge ra ǀgaiǀgaihe, î da ǃgomsigu ǃnâ mâǀgai. Jehovab ge ǃanu gagab tsîna, ǁnān hîna ǁîb mîs ai ra ǂgomǃgâna ra mā. Tsî nē gagab ge ‘kai ǀgaiba’ a mā da ǁkhā, î da mâ ǃgomsi-i hoa-i ǃnâ mâǀgai.—2Kor. 4:7-10.
13. “ǂGomǂgomsa tsî ǁnâuǃāxa ǃgāb” ra mā da gagasi ǂûna, mati ra hui da?
13 Jehovab ge “ǂgomǂgomsa tsî ǁnâuǃāxa” ǃgāba ra hui. Î-i ǂgui ǂkhinin, vidion tsî musik-i tsîna kuruhe. Hîna a hui da ǁkhāna, î da sida ǂgomsa ǀgaiǀgai, omkhâi tsî gagasise ǂkhaikari hâ. (Mat. 24:45) Jehovab ra mā da xūn, hoana da ge ǃgâise nî sîsenū. Amerikab ǃnâ ra hâ ǃgâsas ge kaises hoa gagasi ǂûn, ǃaroma ra gangan di ge mî. ǁÎs ge ge mî: “Nē 40 kurigu hîna ta Jehovaba ra ǃoabagu ǃnâ, î ge ti ǂgomǃgâsiba ǃnās hoasa gere ǃâitsâhe.” ǂGui ǃgomsigas ge gere hōǃâ. ǁÎs di aupab ge ǀhoro hâ ǃnari-aob xa ge ǃgamhe. Tsî ra ge ǁîs ǁgûra kaise ǀaesen tsî ge ǁō. ǀGam ǃnāra tsînas ge kankersa ge ūhâ i. Tae-e ǁîsa ge hui îs mâǀgai? ǁÎs ge ra ǁguiǃā: “Jehovab ge hoaǁae tita gere kōǃgâ. Gagasi ǂûn hînab ge ǂgomǂgomsa. Tsî ǁnâuǃāxa ǃgāb ǃnâ-ū gere māten ge ge huite, î da mâǀgai. ǁNās xa ǃaromahe hâse ta ge Jobi khami a mî ǁkhā. Hîna ge mîba: ‘ǁŌ ta nî tsēs kōse ta ǀhapio ta asa nî mî.’”—Job. 27:5.
Mati da ǃgâsana ǀhaohâb ǃnâ a hui ǁkhā? (14ǁÎ xoaǀgorasa khomai re)
14. Jehovaba mati ǃgâsan ǃnâ-ū ra ǂkhâǃnâ da? (1 Tesalonikaǁîn 4:9)
14 Jehovab ge ǁîb khoena ge ǁkhāǁkhā, în ǃgom ǁaegu ǃnâ ǀnamgu tsî ǁkhaeǂgaogu. (2Kor. 1:3, 4; Khomai re 1 Tesalonikaǁîn 4:9 sa.) Elihub khamin ge sida ǃgâsana, māsenxase ra hui da. Î da ǂgomǂgomsase mâǀgai ǃgomsiga da ga hōǃâ o. (ǃNǃkh. 14:22) Kō re Dianes aiǁgausa. Matis ge ǀhaohâb xa, ǁîs aob ge kaise ǀaesens khaoǃgâ, ǂkhâǃnâhe. Tsî a huihesa, îs gagasise ǀgaisase hâ ǀgara. ǁÎs ge ra mî: “Kaise i ge ge ǃgom i, xawe ta ge Jehovab di ǀgaisa. Tsî ǀnamxa ǁôaga, nē ǃgom ǁkhâgu ǃnâ gere hōǃâ. Sida ǃgâsan ge ǂgui ǀgaugu ǃnâ ge ǂkhâǃnâte. ǃGâsan xa bel-e, sarihe tsî ǁnamǂgāhes ge ge huite î ta mâǀgai. ǃNari ǁoa ta a amagan ge ǃgâsana gere huite, î ta ǀhaode ǃoa ī. Tsî aoǁnâ sîsenni ǃnâs tsîna ǂoa ǁkhā.” Kaise i ge ra ǂkhî kai da, ǁnāti ī ǀnamǀnamsa ǃgâsana da ǀhoahâb ǃnâ ūhâsa.
GANGAN DA GE RA JEHOVAB DI KŌǃGÂS ǃAROMA
15. Tae-i ǃaroma da ra ǂgomǃgâ, ǃgomsin ǃnâ da a mâǀgai ǁkhāsa?
15 Hoada ge ǃgomsina ra hōǃâ. Xawe ǁkhāǁkhāsen da go khami da ge tātsē. ǀGuri hâ tide ǃgomsina da ga hōǃâ o. ǀNamxaǃnâ ǁgûb khamib ge Jehovaba hoaǁae sada ra kōǃgâ. ǁÎb ge sida ǀgūse hâ tsî sida ǀkhomade ra ǁnâu. Tsî māsenxase ra hui da. (Jes. 43:2) ǂGomǃgâ da ge ra, ǃgomsina da tani tsî a mâǀgai ǁkhāsa. Jehovab ǂhâ da hâ xūn hoana ra mā da amaga. ǁÎb ge ǀkhaeb ǀgores dib, Elobmîs, ǂgui gagasi ǂûn. Tsî ǀnamǀnamsa ǃgâsan tsîna ge mā da, în ǂhâsib ǃnâ hui da.
16. Mati da a hâ ǀgara ǁkhā Jehovab ǀnamxaǃnâ kōǃgâs ǃnaga?
16 Kaise da ge ra gangan, kōǃgâ da ra ǀhomsi ǁGûba ūhâsa. “Sida ǂgaogu ge ǁîb ǃnâ ra ǃgâiaǂgao.” (Psa. 33:21) Jehovaba da ge a ǁgau ǁkhā, ǁîb ǀnamxaǃnâse ra kōǃgâ ǀgauba da ra ǃgôaǃgâ ǃkhaisa. Hoa xūn hînab sida huis ǃaroma ra mā da na sîsenūs ǃnâ-ū. Sida tsîn ge sida xu ǂgaoǀkhāsa xūna nî dī, î da Jehovab kōǃgâs ǃnaga hâ ǀgara. ǀNî mîdi ǃnâ, aiǃgû tsî da ga Jehovaba ga ra ǁnâuǀnam. Tsî ǁîb mûǁae ǂhanu xūna ga ra dī o. Ob ge ǀamosib kōse nî kōǃgâ da.—1Pet. 3:12.
30ǁÎ ǁNAETSANAS Ti ǁGû, ti Elo tsî ti ǀhōsa