1. Mâ ǃâitsâbab ge Josefa gere hōǃâ tsî matib ge tanisen?

 JAKOB di ǀgôab Josefi ge ǃgom mâsiba gere hōǃâ. “Hā, îts tita ǀkha ǁgoe re” dis ge tarekhoesa ge mî. ǁÎs ge ge ǁîb ǀhōnkhoeb, Potifari di tara i. Josefi ge ǁnāsa dīsa ge ǂkhā. Khoe-i ge ǀnîsi nētsē a ǂâi ǁkhā, ‘tae-i ǃaromab ge Josefa nē ǃâitsâba mâǃoa?’ Potifari ge ge ǀkhai i. Tsî ǁnās ǂam-aib ge Josefi ge ǃgā-i ǁnā oms ǃnâ. Nē khoes ge ǁîb ûiba ǀnîsi ga ǁgaiǁgai hâ, ǂkhāb ga o. ǁNās xōǀkhāb ge Josefa ge ǂkhā ǁîs ra ǂgao xū-e dīsa. Tae-i ǃaroma? ǁÎb ge ge mî: “Mati ta tita ǁnāti ǂkhaba xū-e dī tsî Elob ǃoagu nî ǁore.”​—Gen. 39:7-12.

2. Matib ge Josefa ǂan i ǃgamekhôas ge Elob aiǃgâ ǁore isa?

² Matib ge Josefa ǂan i ǁîb di Elob, ǀaiba “ǂkhaba xū-i” ase nî mûsa? Israelǁîn ge Moseb di ǂhanub hîna “ǃgamekhôats ge tide” di ra mîba, 200 kurigu khaoǃgâ ǀgui ge hō. (Eks. 20:14) Xaweb ge Josefa Jehovaba ǃgâise ge ǂan i. Tsî ǁnās ǀkha gere tsâ Jehovba nē-e mā-am tamasa. Aiǁgauseb ge Josefa ge ǂan i, Jehovab ge ǃgameba. ǀGui-aob tsî ǀgui taras ǁaegu ǀgui a ǂnûiǂgāsa. Tsîb ge ǀnîsi ǁnâus tsîna ge hî hâ i. Matib ge Jehovaba ǀgam ǃnāra ai ǁîb di aumas Sarasa ǁkhauba hâ isa. Îs ǂgomǂgomsase ǁîs di aob ǃoagu hâ. Tsî ǁkhā ǀgaub ǃnâb ge Jehovab tsîna Isaki di kaikhoes Rebekas tsîna ge ǁkhauba hâ i. (Gen. 2:24; 12:14-20; 20:2-7; 26:6-11) ǁNāti i xūn xab Josefa ra ǂâi hînab ge mâ i-a ǂhanus. Tsî mâ i Elob mûǁae ǂhanu tamas tsîna ge ǂan. Josefi ge ǁîb di Eloba ǀnam i amagab ge. Jehovab di ǂhanu-aisib di ǁgaragu tsîna ge ǀnam i. Tsîb ge ǁnās ǀkha ǁnā ǀgauga gere ǃkhōǀgara ǂgao.

3. Tae-e da nē ǃhoaǀhaos ǃnâ nî ǃhoaǃgao?

 ³ ǂHanu-aisiba du a ǀnam? ǂAn da ge a sadu tsîn a ǀnamsa. Xawe da ge sada hoada ǀoasa kurusa ūhâ tama hâ. Tsî da ga ǂanbasen tama io, o i ge ǃhūbaib ǂhanu-aisiba ra mû ǀgauba, a tsâǀkhā da ǁkhā. (Jes. 5:20; Rom. 12:2) ǁNā-amaga da ge ǂhanu-aisib a taes. Tsî mati da ǃgâiba ǁnāsa ǀnamsa xu a hō ǁkhāsa nî ǃhoaǃgao. Tsî da ge ǁnāpaxu ǃnona xūna nî ǃhoaǃgao hîna nî hui dana. Î da sida ǀnamma Jehovab ǁgaragu ǃnâ ǀgaiǀgai.

4. Mâ ǃgâi tama ǂâiǀgaugan ǂguina ǂhanu-aisib xa ūhâ?

⁴ ǂHanu-ai khoe-i xa da ga ǂâi, o da ge khoe-i hîna ǀgapiǂâixa. Tsî naun ǀkha ǁae tama i. Hîna ǁî-i a ǃgâi di ra ǂâisen i xa ra ǂâi. Xawe Elob ge ǁnā ǁgaraguxa ǃgâibahe tama hâ. Jesub ge ǃhūbaib ai hâ iob ge ǀgaisase ǂgomdi ǂgaeǂgui-aogu. Hîna ge ǁîb di tsēdi ǃnâ hâ î ga gere ǁnama. ǁÎgu ge ǂhanu-aisib ǁîgu diba aitsama a ǂnûiǂgā ǃkhais ǃaroma. (Aoǁn. 7:16; Luk. 16:15) Khoe-i hîna Jehovab ǂhanu a di ra mî-e ra dī i ge, tātsē nau khoe-i xa i-a ǃgâi di ǂâi tama hâ.

5. Elobmîs ǃoagu ǂhanu-aisiba a tae? Aiǁgau-e mā re.

⁵ ǂHanu-aisib ge kaise ǃgâi ǀgauba. Mî da ga, o i ge ra ǂâibasen Jehovab ǃgâi a di ra mî-e dīsa. Elobmîs ǃnâ i ge “ǂhanu-aisib” ǃaroma ra sîsenūhe mîsa. ǂHanu ǀgaub ai ûisa ǃoa ra ǁnaeǁgau, Jehovab di ǁgaraguǃoagu. Aiǁgauseb, ge Jehovaba ǁamaxu ra khoena ge mîba, în ǂhauǃnâ. Tsî ǂhanu-aise ra ‘ǀnō ūhe xūna sîsenū.’ (Deu. 25:15) Hebreǁî mîs ‘ǂhauǃnâs’ ǃaroma ra sîsenūhes ge. ‘ǂHanu-ai’ dis tsîna a ǂnûiǃkhunihe ǁkhā. ǁNās ǃaroma i ge Xristeǁî i hîna Elob mûǁae ra ǂhanu-ai ǂgao-e. Hoa xūn hîna i ra dīn ǃnâ nî ǂhauǃnâ. Khoeb hîna ǂhanu-aisiba ǀnammi ge, ǃgâi tamase ra hâ-ūhe khoena mûsa ǃhui hâ. ‘Jehovaba ǂkhîǂkhîs’ ǃaroma i ge khoe-i hîna, amabes ǃnâ a ǂhanu-aihe nî ǂâiǃgâ. Mati i ǁî-e ra tsâsa, mîǁguigu hîna i ra dīgu xa.​—Kol. 1:10.

6. Tae-i ǃaroma da ǂgomǃgâsiba ūhâ ǁkhā, Jehovab ǃgâi-i tsî tsū-i ǁaegub ǃnâ ūhâ ǁgaragu ǃaroma? (Jesajab 55:8, 9)

⁶ Elobmîs ge Jehovaba, ǂhanu-aisib di mā-aob ase ra ǁguiǃā. ǁNā ǃkhais ǃaromab ge ǁîba “ama hâǃkhaib” di ra ǂgaihe. (Jer. 50:7) Sida kuru-aob aseb ge Jehovaba ǃamkuse a ǂan, tae-i a ǃgâis tsî tae-i a tsūsa. Jehovab ǀoasa kurusa ūhâ amaga i ge. ǁÎb ǃgâi-i tsî tsū-e ra mû ǀgauba sida mûǂuib xa a ǃgāsa. (ǂKhm. 14:12, Khomai re Jesajab 55:8, 9 sa.) Xawe da Elob di īsib ǃnâ kuruhe hâ amaga da ge. Sida tsîna ǁîb di ǂhanu-aisib di ǀgaub ǃnâ a ûi ǁkhā. (Gen. 1:27) Tsî da ge kaise a ǀnam ǁnāsa dīsa. Sida ǀnammi hîna da sida ǁGûba ūba hâb ge ra ǁgari da. Î da ǁîba ǁgae, ǁkhā da a ǀgaub hoab ai.​—Efe. 5:1.

7. Tae-i ǃaroma da ǂgomǃgâ ǁkhā da a ǀgauga ǂhâba hâ? ǂKhō re.

⁷ ǃGâiba da ge ra hō, Jehovab di ǁgaragu ǃgâi-i tsî tsū-i xa hâ gu ǃoagu da ga ûi o. Mû ǁkhā i du a tae-i ǃaroma i ǁnāti isa? Mûnanais ǀguisa hî re tae-i a ī ǁkhāsa. Hoa bank di ga matikō mari-i nî ǂgā-esa ga ra mîǁgui o. ǀAmǂoas ge kaise ǃgâi tide. Tsî i ga dokterna ǀaeǃkhōs di ǂhanuga sao tama io, khoenan ga hui ǁaeb ai. Os ge ǁnāsa a ǃaroma ǁkhā, i ǀaeǃkhōhe ra khoen ǀnîna ǁō. Khoen ga ǂnûiǂgāhe hâ ǀgauga ūhâ o, o i ge ǁnāsa ǁkhaubas ase i. ǁNās khami ǀgui i ge Elob di ǀgaugu, ǃgâin tsî tsūn dina ra ǁkhauba da.

8. Tae-e ǁnān hîna ǃgâiba dīsa a ǀnamna ǃâu hâ?

 ⁸ Jehovab ge ǁnān hîna ra dītsâna ra ǀkhae, în ǁîb di ǁgaragu ǃoagu ûi. ǁÎb ge ra mîmâi: “ǂHanu-ai khoen ge ǃhūba ǀumi tsî ǀamose ǁîb ǃnâ nî ǁan.” (Psa. 37:29) Mûnanai ǁkhā î du a, matikōse i nî ǀguiǃnâxa tsî ǂkhîsa. Khoen hoan ga Jehovab di ǀgauga ga ra sao o? Jehovab ge ra ǂhâba î du ǁnāti i ûiba ūhâ. Hoa da ge ǃgâi ǃaromasa ūhâ, î da ǀnam Jehovab ǃgâi a di ra mîna. Mati da sida ǀnamma a ǀgaiǀgai ǁkhā, nē ǀgaub ǃoagu? ǀKhī da ǃnona xūn hîna da a dī ǁkhāna ǃhoaǃgao re.

9. Tae-e a hui da ǁkhā î da ǂhanu-aisiba ǀnam?

⁹ ǂGurose: ǁGaraga ra mā khoe-e ǀnam re. ǂHanu-aisiba ǀnams ǃaroma da ge Jehovaba ǃnāsase ǀnamma nî ǁgau tsoatsoa. ǁÎb hîna ǃgâi-i tsî tsū-i di ǂhanuga ra māba. ǃNāsase da ga Jehovaba ǀnam, o da ge ǃnāsase. ǁÎb di ǂhanu-aisib di ǁgaragu ai nî ûi ǂgao. Sao ra aiǁgausa kō re: Adammi tsî Eva hâra ga Jehovaba ǀnam hâ o. O ra ge tātsē Jehovab di ǂhanuba ga ǁnâuǀnam-oǃnâ tama hâ.​—Gen. 3:1-6, 16-19.

10. Tae-eb ge Abrahamma dī, îb Jehovab di ǂâiǀgauba ǁnâuǃā?

¹⁰ Sida ge tātsē Adammi tsî Eva hâra ge dīsā, dīsāde dī ǂgao tama hâ. ǁNā ǀamǂoasa xu da ge a ǂgōsen ǁkhā, aiǃgû tsî da ga Jehovab xa ǁkhāǁkhāsen o. Tsî ǁîb di ǁgaraga ga ra ǃgôaǃgâ o. Tsî ǁnās ǀkhas tsîna ga ra ǁnâuǃā o, ǁîb di ǂâiǀgauba. ǁNāsa da ra dī khami i ge sida ǀnammi hîna da ǁîba ūba hâba nî kai. Abrahammi xa ǂâi re. ǁÎb ge amabes ǃnâ Jehovaba ge ǀnam i. Jehovab di mîǁguibab ge ǁnâuǃā tama hâ i. Xawes tsînab ge Abrahamma ge mâǃoa tama hâ i. Xaweb ge dītsâ tsî Jehovaba ǃgâise gere ǂan. Aiǁgauseb ge ǂanǂui o, Jehovab di mîǁguib Sodoms tsî Gomorasa dīkākās xa. Ob ge ǂguro Abrahamma ge ǃao. “Hoaraga ǃhūbaib di ǀGoraǃgâ-aob” ra ǂhanu-aina, ǂhanu-ōǃnân ǀkha dīkākāsa. Abrahammi ǃaroma i ge ge ǃgâi ǂâi tama hâ i. ǁNā-amagab ge ǃgamǃgamsenxase Jehovaba, ǃkharagagu dîna ge dî. Jehovab ge ǃnūǃnâxase ǁîba ge ǃeream. ǀAms aib ge Abrahamma ge mûǂan, Jehovab hoa khoen di ǂgaoga ra ôaǃnâsa. Tsîb tātsē ǂhanu-aina, ǂhanu-ōǃnân ǀkha ǁkhara tidesa.—Gen. 18:20-32.

11. Matib ge Abrahamma ǀnammi tsî ǂgomǃgâsib tsîna Jehovab ǃnâ ǁgau?

¹¹ Abrahammi ge ǀgaisase ge tsâǀkhāhe. ǃHoaǀhaos hînab ge Jehovab ǀkha ūhâ is xa, Sodoms tsî Gomoras ǃoagu. ǁÎb ge amabes ǃnâ ǃnāsase nēsisa ǁîb di ǁGûba ǀnam. Tsî gere ǃgôaǃgâ ǀnais xa. Xawe kuriga ǃkharu tsîb ge Abrahamma ǀnî hâ mâsib ǃnâ ge hâ i. Hîna gere ǃgom kaiba îb Jehovab ǃnâ ǂgomǃgâsiba ǁgau. Jehovab ge ǁîba ge ǂgan îb ǁîb di ǀgôab Isaka ǁguiba. Xawe Abrahammi ge nēsi ǃgâise ǁîb di Eloba ge ǂan i. ǁNā-amagab ge nē ǃnās ai dî-e ǁîba ge ūhâba tama hâ i. Abrahammi ge aiǃgû tsî Jehovab ge ǂganbi-e sī gere dī. ǂÂis ǀguisa dī re matikōse i ge tsûtsûsa isa. ǁÎba aiǂhomisensa ǂgan-eb ge xū-e dīs ǃaroma. Abrahammi ge ǀnîsi ǃgamse gere ǂâi Jehovab xab ge ǁkhāǁkhāsen xūn xa. ǁÎb ge ge ǂan i Jehovab tātsē ǂhanu-ōǃnâ tamas ka io ǀnamoǃnâ xū-e dī tidesa. Apostel Paulub ǃoagub ge Abrahamma ge ǂan i. Jehovab ǁîb di ǀnamǀnamsa ǀgôab Isaka ǁōba xu khâisa nî māsa. (Heb. 11:17-19) Nēn hoan ǂamai Jehovab ge ge mîmâi hâ i, Isaki  nî ǃhaos di ǁgû kai ǃkhaisa. Xawe ǁnā ǁaeb aib ge Isaka ǀgôa-e ge ūhâ tama hâ i. Abrahammi ge Jehovaba kaise ge ǀnam i. Tsî ǂgomǃgâsiba ge ūhâ i ǁîb di ǁGûb hoaǁae ǂhanu xū-e nî dīsa. ǃGom i ge ī xaweb ge, ǂgoms xa ǃaromahe hâse ge ǁnâuǀnam.​—Gen. 22:1-12.

12. Mati da Abrahamma a ǁgae ǁkhā? (Psalmdi 73:28)

¹² Mati da Abrahamma a ǁgae ǁkhā? ǁÎb khami da ge sida tsîna nî aiǃgû, î da Jehovab xa ǃnāsase ǁkhāǁkhāsen. ǁNāsa da ga dī, o da ge ǁîb ǀgūse nî sī tsî ǃnāsase nî ǀnam bi. (Khomai re Psalmdi 73:28 sa.) Sida ǃgâiǂâis ge nî ǁkhāǁkhāhe, îs ǁnās ǀkha Jehovab ǂâiǀgauba ūhâ. (Heb. 5:14) Tsî da ge ǁnās xa ǃaromahe hâse khoe-i ga ǃâitsâ da o. Î da tsū xū-e dī ,o nî ǂkhā. ǂÂis tsîna da ge dī tide î da xū-e dī, hîna tsûba sida di ǁGûb ai nî ǀkhī-ūhe. Tsî ǁnās ǀkha sida ǀhōsagusis hîna da ǁîb ǀkhā ūhâsa nî khôa-e. Mâ ǀgaub ǃnâs tsîna da a ǁgau ǁkhā, ǂhanu-aisiba da a ǀnamsa?

13. Mati da ǂhanu-aisiba a ôa ǁkhā? (ǂKhoamîdi 15:9)

¹³ ǀGamǁîse: Dītsâ re î tsēs hoasa ǂhanu-aisiba ǀnam. Sida tsîn ge Jehovab ǂhanu- aisib ǃoagu da ūhâ ǀnamma a ǀgaiǀgai ǁkhā. ǁKhā ǀgaub hîna da sida sorosa ǃamkuse ra ūhâb ǃnâ. Nē i ge kaise ǃgomba du tide tsēs hoasa dīsa. Tsî Jehovab ge a ǂan da. Tsî tātsēs tsîna ǃâubasen tama hâ, ǁkhā da as xa ǃnāsase dīsa. (Psa. 103:14) ǁÎb ge ǂkhâǃnâ da tsî ra mî “ǂhanu-aisiba ra sauruǃgon” khoenab a ǀnam di. (Khomai re ǂKhoamîdi 15:9 sa.) Mîǁgui-e da ga Jehovab ǃoabas ǃnâ ga ra sīǃnâ ǂgao o. O da ge ra dītsâ tsî ra aiǃgû î da sīǃnâ. Tsî ǁnās tsîn ge a ǀgui, ǂhanu-aisiba sīǃnâs ǃnâ. Tsî Jehovab ge ǃnūǃnâxase nî hui da. Î da aiǃgû tsî ǁnāsa ǁaeb ǀkha ǃgâiǃgâi.—Psa. 84:5, 7.

14. “ǁKhaiǁkhausarab ǂhanu-aisib” diba a tae. Tsî tae-i ǃaroma da ǁîba ǂhâ hâ?

¹⁴ Jehovab ge ǀnamxaǃnâse ra ǂâiǂâiǃnâ da, ǂhanu-aisib ǃgom tama hâsa. (1Jhn. 5:3) Xawe i ge ra ǁkhauba da tsî da ge  ǁnā ǁkhaubasa tsēs hoasa ǂhâba hâ. ǂÂihō î du ra gagasi ǁâtanin hînab ge apostel Pauluba gere ǁguiǃāna? (Efe. 6:14-18) Mâ ǃâba soldab di ǂgaoba gere ǁkhauba? “ǁKhaiǁkhausarab ǂhanu-aisib” diba o. ǁNās ge Jehovab di mîǁguigu, mâ i-a ǂhanus diga ǃkhōǂgā hâ. ǁKhaiǁkhausarab ǂgaoba ra ǁkhauba khami i ge. Jehovab di ǂhanu-aisib di ǀgauga sida di ǂgaoga a ǁkhauba ǁkhā. ǁNās ge khoesi ǂgânagasiba, ǁnā-amaga i ge kaise a ǂhâǂhâsa î da ǁâtanina ūhâ. Tsî nēs ge ǁkhaiǁkhausarab ǂhanu-aisib diba ǃkhōǂgā hâ.​—ǂKhm. 4:23.

15. Mati du ǁKhaiǁkhausarab ǂhanu-aisib diba a âna ǁkhā?

¹⁵ Mati du ǁKhaiǁkhausarab ǂhanu-aisib diba nî âna? ǁNāsa tsēs hoasa du ra dī mîǁguigu ǃnâ dī re. Elob di ǁgaraga ǂâis ǃnâ ūhâse. Mîǁgui du ga o tae-i xa du nî ǃhoas, mâ ǃnôa musik-e du nî ǃgâs. Mâ xūna du TVs ai nî kōs. Tamas ka io mâ ǂkhinina du nî khomais xa. O ǂguro dîsen re: ‘Tae xūna ta ti ǂgaoba nî ǂûma? Jehovaba nē xūna ūǃoahe i nî? Tamas ka io i ǀaib, ǂkhaba dīb, xūǃgūnuxasib, ǁîǃgôasens xūn hînab Jehovaba ǂhanu-ōǃnâse ra mûna ra ǂkhâǃnâ?’ (Fil. 4:8) Sadu ra dī mîǁguigu ga Jehovab di ǂâis ǀkha ga ra ǀgui o. O du ge ǁîb di ǂhanu-ai ǁgaraga ra mā-am. Îb sadu ǂgaoba ǁgai xūna xu sâuhe.

16-17. Jesajab 48:18 sa mâ ǂgomǃgâsiba ra mā da?

¹⁶ ǂÂiǂhansen î du ra Jehovab di ǂhanu-ai ǁgaragu ǃoagu du aiǃgû tsî a ûi ǁkhāsa? Kō re Jehovab ra sîsenū aiǁgausa Jesajab 48:18 ǃnâ. (Khomai re) Jehovab ge ra mîmâi sida di ǂhanu-aisib “hurib ǃgabigu khami” nî īsa. Mûnanai re hurib xōǀkhā mâ tsî du. Hurib ǃgapigu toa tamase nēba xu naub ǀkha ra saogu ǀgauba ra kōsa. ǁNā ǂkhîsa mâsib ǃnâ ǂâiǂhansen î du nî, ǀguitsē gu nē ǃgapiga nî toasa? Hî-î. ǂAn du as ge nē ǃgapigu duisende kuriga hurib ai hâsa. Tsî gu ǀû tamase nî hā ǀkharasa.

¹⁷ Sadu di ǂhanu-aisib ge hurib ǃgapigu khami a ī ǁkhā. Matis ǁnāsa a ī ǁkhā? Dī du nî mîǁguiga du ga ūhâ o. ǂGuro kō re Jehovab tae-e du nî dīsa ǂhâba hâsa. Tsî ǁnāpaxu dī re. Matikōse gu ga mîǁguiga ǃgom. Xaweb ge sadu di ǀnamxaǃnâ ǁGûba hoaǁae hâ, îb ǀgaiba mā du. Î du tsēs hoasa ǂhanu xū-e dī ǀgara.—Jes. 40:29-31.

18. Tae-i ǃaroma da nau khoena sida di ǂhanugu ǃoagu ǀgoraǃgâsa xu nî ǂgōsen?

¹⁸ ǃNonaǁîse: ǀgoraǃgâsa Jehovaba ǁnāxuba re. Jehovab ǂhanu-ai ǁgaragu ǃoagu da ra dītsâ tsî ûi. Hîna da ge nau khoena ǀgoraǃgâsa xu nî ǂgōsen. Tsî tā aitsama nî ǂhanu-ai kaisen. Jehovab ǂhâba hâ xūna da ǃgarise ra dītsâ hîna da ge, dī da ra xūna tā nau khoen ǀkha nî ǀgopeǀnō. Tsî nî ǂâi ǁîn xa da a ǃgâi di. Sida ge mîǁguis di ǀgaiba ūhâ tama hâ. Nau khoen Jehovab ǂhâba hâ khami ra dīsa. ǂÂis ǃnâ ūhâ re, Jehovab ge “hoaraga ǃhūbaib di ǀgoraǃgâ-aoba.” (Gen. 18:25) Jehovab ge ǀgoraǃgâs di ǃereamsa mā da tama hâ. Jesub ge ra mîmā da: “Tā ǀgoraǃgâ, îb Eloba tā ǀgoraǃgâ tsi.”—Mat. 7:1. *

19. Matib ge Josefa ǁgau Jehovab di ǀgoraǃgâsab ra ǂgomǃgâ ǃkhaisa?

¹⁹ Hā re da ǁkhapa, ǂhanu-ai khoeb Josefi aiǁgausa ǃhaoǃgao. ǁÎb ge nau khoena  ǀgoraǃgâsa xu gere ǂgōsen. ǁNān hîna ge ǁîba ǃgâi tama ǀgaub ǃnâ gere hâ ūn tsîna. ǁÎb ǃgâsagu ge ǁîba mîǁgaiǁgai, ǃgāse ǁamaxu. Tsî ǁîgu paba ge ǂgom kai Josefi ge ǁō di. ǀGaisa ǂgaeǂgui-aob aseb ge Josefa ǁîb ǃgâsaga ǀgoraǃgâ tsî ga ǀhao ǃoa hâ. Josefi di ǃgâsagu ge gere ǃao, ǁîb ǁkhā xu-e ǁîga nî dī ǃkhaisa. Xawe gu ge kaise gere ǃhausen dī gu ge xū-i xa. Xaweb ge Josefa ǂgomǃgâ kai gu tsî ge mî: “Tā ǃao re, tita ge Elob di soasa a ū ǁoa.” (Gen. 37:18-20, 27, 28, 31-35; 50:15-21) Josefi ge ǃgamǃgamsens ǀkha ǀgoraǃgâsa Jehovaba ge ǁnāxuba.

20-21. Mati da aitsama ǂhanu-ai kaisensa xu a ǂgōsen ǁkhā?

²⁰ Josefi khami da ge ǀgoraǃgâsa Jehovaba ra ǁnāxuba. ǂAn da a di da ge ū ǂgao tama hâ. Tae-i xan sada ǃgâsana ra ǂkhâǃnâhesa în di tanisen. Sida ge ǂgaoga a khomai ǁoa. Jehovab ge “ǂâidi hoade ra ôaǃnâba.” (ǂKhm. 16:2) ǁÎb ge hoa khoena a ǀnam ǃkharagagu ǁnaetigu, tsî ǃhaoǃnâbe ǁnaetiga ūhâ na. Tsî Jehovab ge ra ǂkhâǃnâ da î da sida “ǂgaoga ǁkhāti harase ǁkhowa-am.” (2 Kor. 6:13) Sida di gagasi ǃgâsan hoana da ge nî ǀnam, tsî tā nî ǀgoraǃgâ nî.

²¹ Nēs tsîn ge ra ǂâibasen ǀhaohâb ǃauga hâ khoena da ge tā nî ǀgoraǃgâ. (1Tim. 2:3, 4) Sadu ǀhaokhoe-i hîna sadu ǀkha ǀgui ǂgoms ǃnâ hâ tama hâ-e. ǀGoraǃgâ tsî du nî mî, “nē khoeb ge tātsē amab ǃnâ ǂgâxa tide di”? Hî-î, ǁnās ge aitsama ǃgôasen tsî ǁî aitsama ǂhanu-ai. Jehovab ge ‘mâ khoe-i hoa-e ǃhōbasens’ ǃēsa ra mā. (ǃNǃkh. 17:30) ǂÂis ǃnâ ūhâ re Jehovab ge nau khoen xan a ǂhanu-ai di ra ǂâi khoena, ǂhanu-ōǃnâse ra mû.

22. Mati io da ǂhanu-aisiba a ǀnam?

²² Jehovab ǁgaragu ǂhanu-aisib diba da ūba hâ ǀnammi ge ǂkhîba ra ǂkhâǃnâ. Tsî nau khoena ra hui în sida tsî Jehovab ǀgūse sī. Tā ǀû re ‘ǂhanu-aisiba ǃâ tsî ǁgâsa.’ (Mat. 5:6) ǂÂis ǃnâ ūhâ re, Jehovab ge ra mû sadu di dītsâde. Tsî hoaǁae sadu di aiǃgûs ǀkha a ǂkhî. Nē ǃhūbaib ǃgamse ǂhanu-ōǃnâsib ǃnâ ra ǂgâ khami, ǁkhaeǂgaosen re. Hoaǁae ǂâis ǃnâ ūhâ re, Jehovab ge “ǂhanu-ai khoena a ǀnam.”​—Psa. 146:8.