1. Hoa da tae-e sada ǀaokhoena ǂhâba ba hâ?

“AMABA ta ge ǁkhāǁkhāsensa xu ta ge hoa omaris khoen ti ǀkha paradais ǃnâ nî hâsa ge ǂhâba hâ i” dis ge Pauline di ǀon hâ ǃgâsasa ra mî. * “ǃGōsase ta ge ti kaikhoeb Wayne di ǀon hâb tsî sim ǂkham axarob tsîn nî tita ǀkha Jehovaba ǃoabasa ge ǂhâba hâ i.” ǀAokhoen hîna Jehovaba ǃoaba tama hâna du ūhâ? Sadu tsîn ge ǀnîsi Paulins khami ra tsâ.

2. Ma dîde da nē ǁkhāǁkhāǃâs ǃnâ nî ǃhoaǃgao?

² Sada di ǀaokhoena da ge a ǁgari ǁoa în ǃgâiǂhôasa ū, xawe da ge ǁîna a ǂkhâǃnâ ǁkhā în ǁîn di ǂâis tsî ǂgaob tsîna Elobmîs di haisi-ams ǃoa-ai ǁkhowa-am. (2Tim. 3:14, 15) Tae-i ǃaroma da sada ǀaokhoena nî aoǁnâba? Tae-i ǃaroma da ǁîn di tsâsiga nî ǁnâuǃā? Tae-e da a dī ǁkhā sada ǀaokhoena huisa în Jehovaba sada a ǀnam bi khami ǁîn tsîna ǀnam? Tsî sada di ǀhaohâb ǃgâsana mati nēs ǀkha a huida ǁkhā?

3. 2 Petrub 3:9 ǃoagu da tae-i ǃaroma sada di ǀaokhoena nî aoǁnâba?

³ ǀGūǁaeb ge Jehovaba nē ǁgai ǃhūbaiba nî hîkaka. ǁNān hîna “ǀamo ûiba ǃoa ǃkhōǂuibasenhe” hân ǀguin ge nî ûi ǃgau. (ǃNǃkh. 13:48) ǂGui ǁaeba ǁamaǂûi tsî da ge ǀū da a khoena ra aoǁnâba ǁnās ǃaroma î ge a ǂhanu sada ǀaokhoen tsîna da nî aoǁnâbasa în sada ǀkha Jehovaba ǃoaba. Sada ǀnamǀnamsa ǁGûb Jehovab ge “ǂgao tama, khoe-i nî  kāǁōsa, xawen nî hoana ǃhobasen ǃkhaisa.”—Khomai re 2 Petrub 3:9.

4. Sada ǀaokhoena da ga aoǁnâba o, o da tae-e ǂhanu tamase ra dī?

⁴ ǂÂis ǃnâ da ge ra ūhâ ǂgao ǂhanu ǀgaub tsî ǂhanu tama ǀgaub tsîn hâsa amaba da ga nau khoen ǀkha ǀgoragu o. ǀŪ da a khoena da ga aoǁnâba o, o da ge nēsa ǀnamxaǃnâ ǀgaub ǃnâ ra dī xawe da ga sada di ǀaokhoen ǀkha amab xa ǃhoa o, o da ge nēsa ǀā ǀgaub ǃnâ ra dī.

5. Sada ǀaokhoen ǀkha da ga amab xa ǃhoa o, o da tae-e ǂâis ǃnâ nî ūhâ?

⁵ ǂGui da âda ge sada di ǀaokhoen ǀkha da ge amab xa ǂguro a ǃhoa ǀgaub xa kaise ǃgâi tamase ra tsâ tsî ra ǂâi nēsa ta ge ǃgâi ǀgaub ǃnâ ga dī hâ. Apostel Paulub ge Xristeǁîna ge ǁnama: “As mîs âdo mâ ǁaeb hoab ai ǀnamǀnamsase ī, ǂō-i ǀkha tsoro-aihe hâse, ǂan du nîga, mati du nî mâ-i hoa-e ǃereamsa.” (Kol. 4:5, 6) Nē ǁnamasa da ge ǂâis ǃnâ ra ūhâ ǂgao sada ǀaokhoena da ga aoǁnâba o. Nēsa da ga dī tama io, o da ge ǁîna amaba xu a ǂhābē ǁkhā, hui nî ǂgao da ra hîna.

6-7. Aiǁgau-e mā re hîna i Xristeǁî-e ǁî-i di ǃgame khoe-i hîna Jehovaba ǃoaba tama hâ-e ǀnamma ra ǁgaus di-e.

⁶ Tsâbaǁhaoxasiba ǁgau re. Paulins hîna da ǀgapise goro ǃhoaǃgaos ge ra mî, “ǁÎs ge ǂguro Elob tsî Elobmîs tsîn xa ǀgui ǁîs aob ǀkha gere ǃhoa ǂgao di. Sim ge tātsē tsēkorobe ûib xūn xa ge ǃhoa tama hâ i.” Xaweb ge Paulins aob Wayna Elobmîs xa ǃnāsa ǂansa ge ūhâ tama hâ i tsî Paulins gere mîba bi xūna ge ǁnâuǃā tama hâ i. ǁÎb ge ǁîs, ǁîs di ǂgoms xa ǀgui ra ǂâi di gere ǂâi. ǁÎb ge gere ǂâi ǁîs ǁkhōǁkhōsa ǂgoms hîna ǁîsa ra gaxaǃnâ ǂgaos ǃnâ ra ǂgāsen di.

 ⁷ Paulins ge ra ǂanǃgâ ǁîs ǂgui ǁaeba ǁîs di gagasi ǃgâsan ǀkha gere ūhâsa, ǀhaodi tawas, aoǁnâ sîsenni ǃnâ tsî ǃgâi ǁaeba ūhâs ǃnâs tsîna. “ǀNî ǁaegu aib ga Wayna oms ǀkha oaǀkhī o, o i ge khoe-e oms tawa ge ǀkhai i,” dis ge Paulinsa ra mî. ǁNâuǃāxaseb ge Wayna ǁîb taras tsî ǀgôab tsîna gere ǁkhore. ǁÎb ge ǁîra gere hâ-ū khoena ge ǀū i tsî Paulins di ǀasa ǀhōsan ge ǁîsa ge ǂhâǂhâsaba i. Wayni ge Paulinsa ge mîba xūmâi sib nî di. ǀGaun hînas ge Paulinsa ǀnamma ǁgau ǁkhā în xa du a ǂâi ǁkhā?

8. 1 Petrub 3:1, 2 ǃoagu da mâ ǃgâi xū-e sada di ǀaokhoen ǃoa-ai a ǁgau ǁkhā?

⁸ Sada tanisen ǀgauba ab ǃnāsa-e sada xa mî. Sada ǀaokhoen ge dī da ra xūna ǃnāsase ra mû, mî da ra xūn xa. (Khomai re 1 Petrub 3:1, 2.) Paulins ge nēsa ega ge mûǂan. “Wayni ge sima kaise ge ǀnam i tsî amabes ǃnâ ge xū te ǂgao tama hâ i” dis ge ra mî. “Xawe ǁîb ge mî xū-i ge ge mûǂan kai te xūna ta Jehovab ǀgaub ai nî dī tsoatsoasa. Kaise i ge ge ǃgâi i ǃgâi xūna dīsa tsî tā hoaǁae ǁîba aoǁnâbasa.” Paulins ge ge ǀû Wayna ǁgarisa îb Elobmîsa ǁkhāǁkhāsen tsî ǁîb ǀkha tsēkorobe xūn xa ge ǃhoa tsoatsoa. Wayni ge ge mû ǁîb kaikhoes ge ǀnamxaǃnâ ǀgaub ǃnâ hâ-ūbi tsoatsaosa tsîb ge ǁîra ǀgôab tsîna ǃgâise tanisen tsoatsoasa. (ǂKhm. 31:18, 27, 28) Wayni ge ǃgâi sîsenǂûib hînas Elobmîsa ǁîb omaris ai ūhâbab ge mû o, o ǁîb ǂâis tsî ǂgaob tsîna Elobmîs ǃoa-ai ge ǁkhowa-am.—1Kor. 7:12-14, 16.

9. Tae-i ǃaroma da nî dītsâ ǀgara sada ǀaokhoena huis ǃnâ?

⁹ Tā da ge nî ǀûsen sada ǀaokhoena huisa.  Jehovab ge nēs xa aiǁgausa ge mā da. ‘Mâ ǁaeb’ hoabab ge khoena ǃēsa ra mā în ǃgâiǂhoasa ūbasen tsî ǀamo ûiba hō ǁkhā. (Jer. 44:4) Apostel Paulub tsîn ge Timoteuba ge mîba îb nau khoena huis ǃnâ mâǀgâi. Tae-i ǃaromab nēsa ge dī? Nēsab ga dī o, ob ǁnān hîna ǁîba ǃoa ra ǃgân tsî ǁîb tsîna nî ǃgâiǃō xui-ao. (1Tim. 4:16) Sada ǀaokhoena da ge a ǀnam tsî da ge ǂhâba hâ Elobmîs amaban nî ǂan ǃkhaisa. ǁAeb ge ǃkharu khami di ge Paulins mîdi tsî tanisen ǀgaub tsîna ǃgâi sîsenǂûiba ǁîs kaikhoeb ai ge ūhâ i. ǁÎs ge nēsi kai ǂkhîba ra hōǃâ ǁîs kaikhoeb ǀkhas Jehovaba ra ǃoaba amaga. Hoara ge aimâba-ao sîsen-e ra dī tsî Wayni ge a ǀhaohâb di ǃûi-ao.

10. Tae-i ǃaroma da ǃnūǃnâxasiba ǂhâ hâ?

¹⁰ ǃNūǃnâxa re. Jehovaba ǁnâuǀnam tsî da ga sada di ǂgoms tsî ûib ǃnâ ǀkharaǀkharana dī tsoatsoa o, on ge sada ǀaokhoena nēsa ūǃoas xa a ǃgombahe ǁkhā. ǂGuro ǀkharaǀkharan hînan da mûǂan i ge ǁîn ǀkha da kai tsēde tsēdī tama tsî ǂgīǂgōsi xūn ǃnâs tsîna ǃâ tama hâ ǃkhaisa. Tsoatsoas ǃnân ge ǀnî ǀaokhoen sada dina sada ǀkha a ǁaixa ǁkhā. (Mat. 10:35, 36) Xawe da ge tā nî ǂâi ǁîn ǀkharaǀkharasen tide di. Tā da ge ǁîna hui ǀû tsî ǀamo ûiba hō tide khoen ase nî ǀgoraǃgâ nî. Jehovab ge sada ǀgorasǃgâs sîsena mā tama hâ xawe ǁnāsa Jesuba ge mā. (Jhn. 5:22) ǃNūǃnâxasiba da ga ūhâ o, on ge sada ǀaokhoena ega ǃgâiǂhôasa a ǃgâ ǁkhā.—Boksisa mû re “ Sada internets ǂhaweba sîsen-ū re ǁkhāǁkhās ǃgao.”

11-13. Alice ǁgûra ǀkha gere hâ ǀgauba xu da tae-e ra ǁkhāǁkhāsen?

¹¹ ǃGôasiba ǁgau xawen tā sa ǀaokhoena sa ǂâiǀgauba ǀkharaǀkhara. (ǂKhm. 15:2) Alice aiǁgaus xa ǂâi re. ǁÎs ge ǁîs ǁgûra hîna Elob ǃnâ ǂgom tama tsî ǂgīǂgōsi xūn ǃnâ ǃâ ra ǀkhas ra hâ hîna Jehovab xa ge ǁkhāǁkhāsen tsoatsoa. ǁÎs ge ge mûǂan ǁkhāǁkhāsens gere ǃgâi xūn xas ǁîs ǁgûra nî mîbasa. “ǁAebats ga ǃkharu kai o ǁkhāǁkhāsents ra ǀasa xūn xa sa ǀaokhoena mîbasa on ge kaise sa ǀkha nî ǁaixa” tis ge Alice sa ra mî. ǁÎs ge sîǂkhanide ǁîs ǁgûra ǃoa gere xoa xūn hîna ra ǃgâiǃgâibasensa nî ūhâ ǃnâ tis gere ǂâin xa aiǁgause ǀnammi xa tsî Elobmîs mûǂuiba nēs xa xoa tsî gere dî ra mati ra nēs xa ra ǂâisa. (1Kor. 13:1-13) ǁÎs ge ǁîs ǁgûra ǁîsa ra ge kaikai tsî gere kōǃgâ ǃkhais amsi ge gangan tsî ǀkhaexūn tsîna gere sîba ra. ǁÎras ga sī sari o, os ge hoa xūna gere dī ǁîs ǁgûsa oms sîsengu ǀkha huis ǃnâ. ǂGuros ge Alicesa ǁîs ǁgûra ǁîs di ǀasa ǂgoms xa a mîba o, o ra ge ǁîs ǀkha ge ǂkhîǂâixa tama hâ i.

¹² ǁÎs ǁgûra ǀkhas gere oms ai hâ o, os ge Alicesa tsēkōrobe ǁîs di Elobmîsa khomais ǀkha gere aiǃgû. “Nēs ge ti ǁgûsa ge hui mûǂansa mati kōse ta Elobmîsa a ǀnamsa” tis ge Alicesa ra mî. Alice ǁgûb tsîn ge Elobmîsa aitsama ge ôaǃnâ tsoatsoa îb ǁnâuǃā ǁkhā tae-i ǃaromas ǁîb ǀgôasa nē ǀkharaǀkharana ra dīsa tsî tsū xū-e ǁîs di ǂgoms xa hōs ǃaromas tsîna. “Elobmîsa ta ge ge mā bi” tis ge Alicesa ra mî “tsî xū-i tsîna Elobmîs ǃnâ ge xoa mâiba bi.” Nēsa mati ge ǀamǂoa? Alice ǁgûb ge tsū xū-e ǁîb ǀgôas ti ǂgoms xa ge hō tama hâ i xawe kaise Elobmîs mîdi xa ge tsâǀkhāhe.

¹³ Sada ǂgoms ǃnâ da ra mâ ǀkhara ǂgao xawe da ge ǃgôasib tsîna ra ǁgau ǂgao ǃgomsina da ga hōǃâ xawe. (1Kor. 4:12) Aiǁgauses ge Alicesa ǁîs ǁgûs xa gere mâǃoahe. “ǁÂǁnāhe ta ge o, os ge ti ǁgûsa  ‘tsū ǀgôas ti gere ǂgaide.’” Alicesa tae-e nēs xa ge dī? “Ti ǂgoms xa ta ge ge ǃhoa ǀû tama hâ i xawe ǀnamxaǃnâ ǀgaub ǃnâ ge ǁgau tita Jehovab di ǀHûǀguitimî-ao kaisa ge mîmâisa. Ti ǁgûsa ta ge gere mûǂan kai ǂgao kaise ta a ǀnam si ǃkhaisa. Hoam ge ge ā tsî ta ge ǁnāpaxū ǁkhoaxa ǂû-e ge sâiba si. Nēs khaoǃgâs ge ti ǁgûsa ge mûǂan Elobmîs amab tita ra ǃgâi khoe kai ǃkhaisa.”

14. Tae-i ǃaroma da sada ǀaokhoena mā-am tide în sada ǂâiǀgauba ǀkharaǀkhara Jehovaba ǃoabas ǃnâ?

¹⁴ ǁAeba i ge nî ū sada ǀaokhoena mûǂansa sada ti mîǁguib Jehovaba ǃoabas dib khoe-i xa ǀkharaǀkharahe tide ǃkhaisa. Aiǁgause, Alice ge aimâba-ao sîsen-e dī tsoatsoa o ǀgapi ǁkhāǁkhās ǃoa-ai os ge ǁîs ti ǁgûsa nēs xa ǃaroma-e hâse gere ā. Xawes ge Alicesa ge mâǀgai. Alice ge ra mî “sa omaris khoenats ga mā-am o ǀnî hâ xūn ǃnâ sa ǂâiǀgauba dawasa on ge nēsa hoaǁae nî dītsâ. Xawets ga ǀnamxaǃnâ tsî hoaǁae mâǀgaibe o, on ge sa ǀaokhoen ǀnîna a ǃgâ tsi tsoatsoa ǁkhā.” Nēs ge Alice ǀkha ge a ī. ǁÎs ǁgûra haora ge a aimâba-ao tsî ǁîs ǁgûb ge a ǀhaohâb ǃûi-ao.

15. Mateub 5:14-16 tsî 1 Petrub 2:12 ǃoagun ‘ǃgâi sîsengu’ sada ǃgâsan dina mati sada ǀaokhoena a hui ǁkhā?

¹⁵ Jehovab ge khoena ǁîba ǃoa ra ǂgae ‘ǃgâi sîsengu’ Xristeǁî ǀhaohâb digu ǃnâ-ū. (Khomai re Mateub 5:14-16; 1 Petrub 2:12.) Sa ǃgame khoe-i ga Jehovab di ǀHûǀguitimî-ao tama io, sa ǀhaohâb ǁanin ǀkha ǀnai i ge ǀhao hâ i? Paulines  hîna da ǀgapise goro ǃhoaǃgaos ge ǃgâsana ǁîs di omsa ǃoa ge ǁkhau îb ǁîs di aob Wayna ǁîn ǀkha ǂangusa kuru. Wayni ge ra mî ǀgui ǃgâsab ge hui bisa Jehovab di ǀHûǀguitimî-aona ǁnâuǃās ǃnâ: “ǁÎb ge sîsena xū ǂganǁnâsen tsî ti ǀkha sokersa gere kō. Nēs ge Wayna ge mûǂan kai ǃgâsab ǀnî hâ xūn ǃnâs tsîna ǃgâiǃgâibasensa ūhâsa ǁîb ǂgoms ǀguis ose.”

16. Tae-i ǃaroma da sada ǀoakhoena ǀhaode ǃoa nî ǁkhau?

¹⁶ ǀGui ǀgaub hîna da sada ǀaokhoena a hui ǁkhāb ge ǀhaode ǃoa ǁîna ǁkhausa. (1Kor. 14:24, 25) Wayni ge ǁîb ǂguro ǀhaosa Jesub di ǁōb ǂâiǂâisens disa ge hâǃnâ. ǁÎb sîsenni khaoǃgâ i ge hâ i tsî i ge ǃnūburo i amaga. “ǃHoas ge tae-i xa hâ isa ta ge ge ǀū i.” Dib ge ra mî, “xaweb ge khoen ǃgâi tanisen ǀgauba ge ǀuru tama hâ i. ǁÎn ge tawede te tsî gere ǁkhoreǁhare te. ǁÎn a ǂhanu-aisa ta ge gere mû.” ǀGam khoe-aogura ge Paulins ǃoa-ai kaise ge ǃgâi i. Tsî sîm ǀgôab ǀkha ǀhaodi tsî aoǁnâ sîsenni ǃnâ gere hui. Wayni ge ge mîǁgui Paulins di ǀasa ǂgomsa ôaǃnâsa. Tsî ǃgâsaba ge ǂgan îb Elobmîsa ǁkhaǁkhā-e.

17. Tae-i ǃaroma da ǀhapiǂgā-amsen tide tsî tae-i ǃaroma da sada ǀaokhoena ǁnāxūǃnâ tide?

¹⁷ ǂGom da ge ra sida ǀaokhoen Jehovaba sida ǀkha nî ǃoabasa. Hoa xūna da ge a dī ǁkhā xawen ge sida ǀaokhoen ǀnîna amab ǃnâ ǂgâxa tide. Nēs ga sida ǀkha ī o, o da ge tā nî ǀhapitsâsen. Khoena da ge a ǁgari ǁoa sida ǂgomsa ūǃoasa. Xawen ge sida ǀaokhoena a mû ǁkhā kaise da a ǂkhîsa Jehovaba da ra ǃoaba amaga. Tsîn ge nēs xa a tsâǀkhā-e ǁkhā. ǁÎna ǀgoreba re. ǃGâi ǀgaub ǃnâ ǁîn ǀkha ǃhoa re. Tā ǀûsen re, ǁîna huisa. (ǃNǃkh. 20:20) ǂGomǃgâ re, Jehovab sadu dītsâde nî ǀkhaesa. Tsî sada ǀaokhoen ga ǃgâ da o, on ge nî ǃgâiǃō.