1. Xristeǁîna tae-e nî dī ǃkhoeǀhûgusa ǀams kōse ǃkhoes ǃaroma?

XRISTEǁÎN ase da ge ǃkhoeǀhûgus ûib dis ǃnâ hâ. Nēsi da ga nēsi ǀgui ǃkhoe tsoatsoa tamas ka io kurina nē ǃkhoeǀhûgus ǃnâ hâ xawe da ge ǀams kōse nî ǃkhoe. Nē daoǁgaus hînab ge apostel Pauluba Xristeǁîn hîna Filipis ǃnâ hâna a mās ge nî huida î da nē ǃkhoeǀhûgusa ǀams kōse ǃkhoe. ǀNî Xristeǁîn ǀhaohâb ǃnâ ge hâ în ge Jehovaba ǂgui kuriga gere ǃoaba Paulub ge nē sîǂkhanisa a sîba nî ǁaeb ǃnâ. ǁÎn ge Jehovaba ǀnai ǂgomǂgomsase gere ǃoaba xaweb ge Pauluba ge ǂâiǂâiǃnâ nî în nē ǃkhoeǀhûgusa ǀûs ōse ǃkhoe. ǁÎb ge ge ǂhâba hâ i, în ǁîb aiǁgausa sao ‘aiǃâ hâna ǃoa ǀhōǂuisens’ ǃnâ-ū.​—Fil. 3:14.

2. Tae-i ǃaromas ge apostel Paulub di daoǁgausa Filipeǁîn ǃaroma ǃgâi i?

² Paulub di daoǁgaus ge Filipeǁîn xa ǂhanu ǁaeb ai ge ǃkhōǃoa-e. ǀHaohâb ge tsoatsoasa xu ǃgomsina gere hōǃâ. Nēs ge ge tsoatsoa ‘Masedoniaba ǃoa īs’ di ǁkhauǂuis ge tsoatsoa o, Paulub tsî Silab tsîkha ge 50ǁî kurib ǃnâ Filipis ǃnâ a ǀkhī ǁaeb ai. (ǃNǃkh. 16:9) ǁNāpa gu ge Lydia di ǀon hâ khoesa ge ǀhao-ū hîna Eloba ra ǃaoǃgâsa, ‘ǁîs ge ge ǃgâ tsîb ge Jehovaba ǁîs ǂgaoba ge ǁkhowa-am’ ǃgâiǂhôas ǃoa-ai. (ǃNǃkh. 16:14) ǁÎs tsî ǁîs omaris tsîn ge ge ǁāǁnâhe. Xaweb ge ǁGâuaba ge ǃâitsâ nî tsoatsoa. ǃĀs di aogu ge Paulub tsî Silab tsîna ǃās di ǂhanub aisi ge sī ū tsî ge ǂgā-am kha ǃgomsina kha ra ǃaroma di. Nēs xa ǃaromahe hâse kha ge Paulub tsî Silab tsîkha ǂnau-e, ǃkhōsis ǃnâ ū-e tsî ega ǃāsa xu ge ǃkhaeǂuihe. (ǃNǃkh. 16:16-40) Nēsa ge ǂkhabuǂâi kai kha? Hî-î.  O ǀasase ge tsoatsoa-e ǀhaohâb di ǃgâsana tae-e ge dī? ǁÎn ge ǃgâi aiǁgausa ge ǁgau, ǀams kōsen ge mâǀgai amaga. ǁÎn ge Paulub tsî Silab tsîkha di aiǁgaus xa kaise ge ǂkhâǃnâhe.

3. Pauluba tae-e ge mûǂan tsî mâ dîde da nî ǃhoaǃgao?

³ Paulub ge ge mîǁgui mâǀgaibesa. (2Kor. 4:16) Xaweb ge ǁîba ge ǂan i nē ǃkhoeǀhûgusa ǀams kōse ǃkhoes ǃaromab ǁîb ǂâisa Jehovab ai nî ǂnûisa. Paulub aiǁgausa xu da tae-e a ǁkhāǁkhāsen ǁkhā? Nētsēs aiǁgaude tae-e a ǁkhāǁkhā da ǁkhā ǃgomsigu ǃnâ mâǀgais xa? Tsî sada di ǃâubasens hānîǁaeb xa da ūhâsa mati a huida ǁkhā mâǀgaibes ǃnâ?

4. Pauluba mati gere aiǃgû Jehovab di sîsenni ǃnâ ǃgomsinab gere hōǃâ xawe?

⁴ Paulub gere dī xūn hoan xa ǂâi re Filipeǁîna ǃoab ge sîǂkhanisa a xoa o. ǁÎb ge Romes ǃnâ ǃkhōsis ǃnâ ge ūhe hâ i tsî ǁnās ǀkha ǃnorasase ge aoǁnâ ǁoa i. ǁÎb ge sari bi ra khoena gere aoǁnâba tsî sîǂkhanide ǀhaohâga ǃoa gere xoa. Nētsēn ge ǂgui Xristeǁîn hîna ǃnorasase aoǁnâ ǁoana ǁîn omdi tawa ra hā sari khoena ra aoǁnâba. Tsîn ge sîǂkhanidi tsîna ra xoa aoǁnâ sîsenni ǃnâ da ǀhao-ū tama hâ khoena ǃoa.

5. Paulub mîdi hîna Filipeǁîn 3:12-14 ǃnâ hâde mati ge hui bi mâǀgaibes ǃnâ?

⁵ Paulub ge ge mā-am tama hâ i, în dīb ge ǃgâi xūn tsî tsū xūn tsîna ǁîb ǂâisa Jehovaba ǃoabasa xu ǂgaeǁnâ bi. ǁÎb ge ge mî ‘ǃkharuge xūna ǀuru’ tsî ta ‘aiǃâ hâna ǃoa ra ǀhōǂuisen’ î ta nē ǃkhoeǀhûgusa ǀams kōse ǃkhoe. (Khomai re Filipeǁîn 3:12-14.) Mâ ǃnôa xūna Paulub di ǂâisa ga ǂgaeǁnâ hâ? ǂGuroseb ge Pauluba ǀgapi ǁkhāǁkhāsensa Xristeǁî kaib nîs aiǃâ ge ūhâ i Jodeǁîn ǁaegu. Xaweb ge nēn hoana “ǀapon ase ge ǃgôa.” (Fil. 3:3-8) ǀGamǁîse Xristeǁînab gere saoǃgon ǃkhais ge tsūse ga tsâ kai bi hâ xaweb ge nēsa ge mā-am tama hâ i Jehovaba ǃoaba ǀû kai bisa. ǃNonaǁîse ǁîb ge ge ǂâi tama hâ i hoa ǃgâi xūn hînab ge Jehovaba dīban ǂâu hâ di tsîb Jehovaba nî ǃoaba ǀû di. Paulub ge ǃgâi aoǁnâ sîsen-e ge ūhâ i ǃkhōsis ǃnâ ūhe, ǂnauhe tsîb ge saran tsî ǂûn tsîna ūhâ tama hâ i xawe. (2Kor. 11:23-27) Xaweb ge Pauluba ge ǂan i dīb ge ǃgâi xūn tsî ǃkharu ǃnâb ge ǃgomsin hoan ǃnâb nî mâǀgaibesa ǀams kōse. Sada tsîn ge ǁkhā xū-e nî dī.

6. Mâna ‘ǃkharu ge xūn’ hîna da nî ǀuruse īna?

⁶ Mati da Paulub di aiǁgausa a ǁgae ǁkhā ‘ǃkharuge xūna ǀurus’ ǃnâ? ǀNî da âda ge ǃkharu ge ǁaeb ǃnâ da ge dī tsū xūn di tsûaǂgaoba nî ǀurus ge. Nē ǃgomsiba da ga hōǃâ o, o da tae-i ǃaroma Xristub Xoremarib ǁguibasa ôaǃnâ tama hâ? Ôaǃnâ, ǂâiǃgâ tsî da ga ǂkhâǃnâ ra xūn xa ǀgore o, o da ge nē tsâsiga nî tani hō. Tsî da ge dī da ge ǁorena da Jehovab xa ǀûbahe hâ ǃkhaisa nî ūǃoa. ǀNî hâ xū-i hîna da Pauluba xu a ǁkhāǁkhāsen ǁkhā i ǃoa kō re. ǀNîn ge ǀgapi mari-e ra matare sîsenga ge xu Jehovaba ǃoaba ǀgaras ǃaroma. ǁNās nî amas ga o, o da ge tā ū da ga hâ ǃkhūsisa ǃoa nî kō-oa. (Num. 11:4-6; Aoǁn. 7:10) ‘ǃKharu’ ge xūn ge dī da ge ǃgâi xūn tamas ka io ǃkharu ǃnâ da ge ǃgomsin tsîna ǃkhōǂgā ǁkhā. Jehovab ge ǁgau da ǀkhaegu tsî huib tsîn ai da ga kō oa o, o da ge ǀgū ǀhōsagusisa ǁîb ǀkha  ra omkhâi. Xawe da ge tātsē Jehovaba da go ǂâu hâse sîsenba di mî ǂgao tama hâ.​—1Kor. 15:58.

7. 1 Korinteǁîn 9:24-27 tawa i ra ǁgauhe khami da tae-e ǂhâ hâ nē ǃkhoeǀhûgusa dans ǃaroma? ǂKhō re.

⁷ Paulub ge Jesub mîde ge ǁnâuǃā hîna ra mîde: “ǂNoagu ǀgaisase.” (Luk. 13:23, 24) Paulub ge ge ǂan i Xristub khamib ǀams kōse nî mâǀgaibesa. Nēs ǃaromab ge Xristeǁî ûiba ǃkhoeǀhûgus ǀkha ge ǀgopeǀnō. (Khomai 1 Korinteǁîn 9:24-27.) ǃKhoe-aob ge ǃkhoeǀhûgus ǃnâ ǁîb ǂâisa ǂnûi tsî mā-am tama hâ în ǀnî hâ xūna ǁîb ǂâisa ǂgaeǁnâ. Aiǁgause, ǃkhoe-aon hîna dorpi ǃnâ ǃkhoeǀhûgusa ūhân ge ǂgui xūn hîna ǁîn ǂâisa a ǂgaeǁnâ ǁkhāna ūhâ, ǁamaxū ǃkhaigu tsî ǀnî hâ ǂgui xūn tsîna. ǂÂi ǁkhāts a ǃkhoe-ao i hîna ǃkhoe ǀû tsî nē xūna ǃoa ra kō tsoatsoa i xa. ǁÎ-i ge nēsa dī tide ǁî-i ga dan ǂgao o. Ûib di ǃkhoeǀhûgus ǃnâs tsîna da ge sada ǂâisa ra ǂgaeǁnâ xūna xu ra ǂgōsen ǂgao. Sada ǂâisa da ga ǃkhōǃoa da nî ǀkhaegu ai ǂnûi o, o da ge Paulub khami ǀams kōse a mâǀgaibe ǁkhā.

8. Mâ ǃnona ǃgomsiga da nî ǃhoaǃgao?

⁸ ǀKhī da ǃnona ǃgomsin hîna sada ǂâisa a ǂgaeǁnâ ǁkhān xa nēsi ǃhoa re. Nēn ge ǃâubasendi dīǀoaǀoa-e tama di, ǀaeb mâsigu tsî ǃâitsâgu hîna da gaxuse ra tanigu tsîna. Nau ǃgâsan hîna ge nē ǃnôa ǃgomsigu ǃnâ ǃkharun di ǃgâi aiǁgaude xu da ge a ǁkhāǁkhāsen ǁkhā.​—Fil. 3:17.

9. Mati di dīǀoaǀoa-e tama hâ ǃâubasende a tsâǀkhā da ǁkhā?

⁹ Dīǀoaǀoa-e tama hâ ǃâubasendi. Hoaǁae da ge Jehovab ge mîmâiba da ǃgâi ǀkhaega ǃoa ra mûǂui. Jehovab di kēbo-aob Habakuki ge Jehovaba ǂgan o îb Judab di tsū xūna ǀam kai, ob ge Jehovaba ǁîba ge mîba îb “ǃâu” hâse hâ. (Hab. 2:3) ǃÂubasen da ra ǀkhaega da ga hōǃâ tama i o, o da ge ǁkhoaǂgaosiba  a ǂoaǃnâ ǁkhā. Tsî da ge a ǂkhabuǂâi ǁkhā. (ǂKhm. 13:12) Nēs ge 1914ǁî kuriba ra sao kurigu ǃnâ ǀnî ǃgâsan ǀkha ge ī. Nē ǁaeb ǃnân ge ǂgui ǂkhauhesa Xristeǁî ǃgâsana ǀhomma ǃoa gere ī ǂgao 1914ǁî kurib ǃnâ. Nēs ge ī tama i o, on ge ǃgâsana mati nē ǃâubasens hîna ge dīǀoaǀoahe tama hâ is xa tsâ?

10. ǃÂubasen ra hâ xū-i ge dīǀoaǀoahe tama i o, o ra ge khoe-aogura tae-e dī?

¹⁰ ǀGam ǂgomǂgomsa Xristeǁî ra di aiǁgausa ǃoa kō re hîna ge nē ǃnôa ǃgomsib ǃnâ a mâǀgai ra. ǃGâsab Royal Spatzi ge 1908ǁî kurib ǃnâ 20 kurixab a hîna ge ǁāǁnâhe. ǁÎb ge ǀgaisa ǂgomǃgâsiba ge ūhâ i ǀgūǁaeb ǀhomma ǃoa nî īsa. 1911ǁÎ kurib ǃnâb ge ǃgâsas hîna Pearl di ǀon hâsa ǁîba ǃgames ǃgao a ǂgan, ob ge ǁîsa ge mîba: “ǂAns kom a o 1914ǁî kurib ǃnâ i tae-e nî īsa. ǃGamem nîs ga ra io, om ge nēsi nî ǃgame.” Nē khoe-aogura 1914ǁî kurib ǃnâ ra ge ǀhomma ǃoa ī tama io ǁîra di ǃkhoeǀhûgusa ge ǀam kai? Hî-î, ǁîra ge Jehovaba ǃoabas ai ǁîra ǂâisa ge ǂnûi hâ i tsî ǀhommi ǀkha īs ōse. ǁÎra ge nē ǃkhoeǀhûgusa ǀams kōse ǃkhoesa ge mîǁgui. Royali tsî Pearls tsîra ge ǂgomǂgomsase ǁō ra nîs kōse ge ǃoaba. Hoa da ge ra mûǂui ǁaeb hînab Jehovaba ǁîb ǀonsa nî ǃanuǃanus tsî ǁîb di ǀkhaegu hînab ge mîmâiga nî dīǀoaǀoaba ǃoa. ǂÂis ǃnâ ūhâ re nē xūn hoan Jehovab mîmâi hâ ǁaeb ai nî īsa. ǁNā ǁaeb kōse a da Eloba ǃoaba ǀgara tsî dīǀoaǀoahe tama hâ mîmâiga tā mā-am îgu ǂkhabuǂâi kai da.

11-12. Tae-i ǃaroma da Jehovaba nî ǃoaba ǀgara ǂkhabusa ǀaeb mâsiga da ga ūhâ xawe? Aiǁgau-e mā re.

¹¹ ǀAeb mâsigu. ǃKhoeǀhûgus ǃnâ ra ǁhao khoe-i ge sorosi ǀgaiba ǂhâ hâ xawe da ge sada sorosi ǀgaiba ǂhâ tama hâ gagasise kais ǃaroma. ǂGuin hîna nētsē ǀaesen hân ge noxoba Jehovaba ǃgâi ǀgaub ǃnâ ra ǃoaba ǀgara. (2Kor. 4:16) Aiǁgause, ǃgâsab Arthur Secordi hîna 88 kurixab, Betels tawa ge 55 kuriga ǃoabab ge ǂkhabusa ǀaeb mâsiga ge hōǃâ tsoatsoa. * ǀGui tsēs ge ǀaedī-aosa ǁîba gere kōǃgâ. ǁÎs ge ǁîba ǃoa kō tsî ge mî: “ǃGâsa Secord kaise du ge ǂgui xūna Jehovaba dība hâ.” Arthuri ge dīb ge xūn ai ge kō tama hâ i. ǁÎb ge ǁîsa ǃoa ǀnom rase kō tsî ge mî: “ǁNās ge a ama. Xawen ge dī da ge xūna ǁnātikōse ǂhâǂhâsa tama hâ. Nēsi da gagasise ǀgaisase nî hâs ge a ǂhâǂhâsa.”

 ¹² ǀNîsi du ge Jehovaba ǂgui kuriga ǃoaba hâ tsî nēsi ǀaeb mâsiga ra hōǃâ hîna īǁkhā kaiba du tama hâ ga dī du gere xūna Jehovaba dībasa. Nēs xa tā ǂkhabuǂâi kaihe re. ǂAn da ge nî Jehovab dī da ge ǃgâi xūna ǂâihō tsî ra ǃgôaǃgâsa. (Heb. 6:10) Tsî dī da ra ǂgui xūn ge Jehovaba da ūba hâ ǀnammi ǀkha a ǀgopeǀnōhe ǁoa. Xawe da ge Jehovaba da ūba hâ ǀnamma ǃgâi ǂūgu tsî dī da ra ǃgâi xūn ǃnâ-ūs tsîna a ǁgau ǁkhā. (Kol. 3:23) Jehovab ge sada di ǃnubusiga ra ǁnâuǃā tsî ǃnāsa-e sada xu ǃâubasen tama hâ.​—Mrk. 12:43, 44.

13. Anatoly tsî Lidiya hāra ǀkha î tae-e ge ī tsî ǁîra di aiǁgausa mati a ǂkhâǃnâ da ǁkhā Jehovaba ǃoaba ǀgarasa ǃgomsina da ga hōǃâ xawe?

¹³ ǃÂitsâgu hîna da gaxuse ra tanigu. ǀNî ǃoaba-aon Jehovab din ge ǁgâiǀāgu tsî ǂgui ǃgomsin tsîna ge ǃkharuǃnâ. Aiǁgause, Anatoly Melniki ge ge 12 kurixa i ǁîb ǁGûb ge ǃkhōsis ǃnâ ū-e tsî Siberiaba ǃoa a sîhe o, 7 000 km ga Moldovasa xu. * ǀGui kuriba ǃkharu tsîb ge Anatoly, ǁîb ǁgûs tsî ǁîb oumara tsîna Siberiaba ǃoa ge sîhe. ǁAeroba ǃkharu tsîn ge ǀhaode ge ǁhaoǃnâ tsoatsoa ǀnî hâ ǃās ǃnâ xawen ge 30 km ga kaise ǃkhai mâsib ǃnâ gere ǃgû. ǃGâsab Melniki ge ǃnona kuriga ǃkhō oms ǃnâ ge hâ i, ǁîb taras tsî ǀgui kurixa ǀgôas tsîna xu ǃnūse. ǂGui kurigan ge ǃgoma tsâ xaweb ge Anatoly tsî ǁîb omaris tsîna ge aiǃgû Jehovaba ǃoabasa. Anatoly ge nēsi 82 kurixa tsî a ǁNâub ǀapeǀhaos ǁani Asiab ǃnâ. Anatoly tsî Lidiyas aiǁgaus tsîna da ge ra sao ǂgao, mâǀgaibe tsî Jehovaba ǃoaba ǀgaras ǃnâ.—Gal. 6:9.

14. Pauluba tae-e ge mûǂan dīb nîse ge ī-e îb ǁîb di mîǁguiba dīǀoaǀoa ǁkhā?

¹⁴ Paulub ge ǂgomǃgâsiba ge ūhâ i, nē ǃkhoeǀhûgusa dan tsîb nî ǁîb di mîǁguiba dīǀoaǀoa ǃkhaisa. ǂKhauhesa Xristeǁîb aseb ge ‘ǀgapiseba ǃoa ra ǂgai’ ǀkhaega ǃoa gere mûǂui. ǁÎb di mîǁguiba sīǃnâs xab ge ge mûǂan aisǀkhāba ǃoab nî “ǀhōǂuisen” ǃkhaisa. (Fil. 3:14) Paulub ge ǃgâi ǂkhōsa ge sîsen-ū Filipeǁîna huis ǃnâ în ǁîn di mîǁguiga dīǀoaǀoa ǁkhā.

15. Pauluba mati ǁanisis ǂkhōsa ge sîsen-ū Filipeǁî Xristeǁîna huis ǃnâ în “ǀhōǂuisen”?

¹⁵ Paulub ge Filipeǁîna ǁîn di ǀhomsi  ǁanisis xa ge ǂâiǂâiǃnâ. (Fil. 3:20) Tae-i ǃaroman nēsa nî ǂâiǂâiǃnâ-e ge īsa? ǁNā tsēdi ǃnân ge khoena gere Romeǁî ǁani kai ǂgao ǂgui ǃgâi xūnan gere ǁnāba xu ǀama amaga. * Xawen ge ǂkhauhesa Xristeǁîna ge ǀhomsi Gaosib di ǁani i hîna ǃgâi ǀkhaega nî mā nî ba. ǀHomsi Gaosib ǀkha i ga ǀgopeǀnō-e o, on ge Romeǁî ǁanina ǂgui ǀkhaega ge ūhâ tama hâ i. Nēs ǃaromab ge Pauluba Filipeǁîna ge ǂkhâǃnâ “nēs ǀguisa dī, î du anuse tanisen Xristub di ǃgâiǂhôasa ǃoa.” (Fil. 1:27) Nētsēs ǂkhauhesa Xristeǁîn ge ǃgâi aiǁgausa ra ǁgau ǀhōǂuisens ǃnâ ǁîn di ǀhomsi ǁgaumâisan nî hōs kōse.

16. Nēsi da ga ǀhomsi ǃâubasensa ūhâs tamas ka io ǃhūbaisi ǃâubasensa ūhâ xawe da Filipeǁîn 4:6, 7 ǃoagu tae-e nî dī?

¹⁶ Nēsi da ga ǀhomsi ûib ǃâubasensa ūhâ tamas ka io ǃhūbaib di ǃâubasensa ūhâ paradais ǃnâ da nî ûise īsa xawe da ge ra aiǃgû ǂgao mâǀgaibes ǃnâ. Matikō ǂgui ǃgomsina da ga ǃkharu ǃnâ xawe da ge tātsē khaosǀkhāba ǃoa kō-oa tide tsî xūna mā-am tide în Jehovaba ǃoabasa xu ūbe da. (Fil. 3:16) ǀNîsi da ge Jehovab di ǀkhaega gaxu ǁaeba ǃâu hâ tamas ka io ǂkham da ge ī khami ǂkham tama hâ tsî ǀaena ra hōǃâ. ǀNîsi da ge ǃâitsâgu tsî ǃgomsin tsîna ǂgui kuriga ra hōǃâ. Tae-i ǀgui i ga ǃgomsi xawe “xū-i xare-i xa tā ǂhansen.” Xawe ǀgores tsî ǀkhomas tsîra ǃnâ gangans ǀkha Elob aiǃâ ǂhai kaisen ob ge kai ǂkhîba nî ra mā du.​—Khomai re Filipeǁîn 4:6, 7.

17. Tae-e da nē ǁkhāǁkhāǃâs ǃnâ nî ǁkhāǁkhāsen?

¹⁷ ǃKhoe-ao i hîna ǀuniga ǃâba ǃgarise ra ǃkhoe-i khami da ge sada ǀkhaegu ai ǂâisa ǂnûi tsî sada di ǃkhoeǀhûgusa ǀams kōse ra ǃkhoe ǂgao. Sada ǀgaib tsî mâsigu tsîn ra mā-am das kōse da ge ra aiǃgû ǂgao sada di ǀkhaega da nî ǃkhōǃoas kōse. Tae-e da nî dī ǂhanu daob ai mâǀgaibes ǃaroma? Sao ra ǁkhāǁkhāǃâs ge nî huida mûsa mati da ǂhanu daob ai nî hâsa “ǁîsa xu ra ǀgora xūna du nî ǃâitsâ ǁkhāse.”​—Fil. 1:9, 10.