ǀHAOHÂB ǃNÂ i kaise du ra dī ǂgao xū-e hâ xawe du nēsi a dīhō ǁoa-e? ǀNîsi i a aiǂhanu hîna i ǀnî hâ ǃgâsa-e ūhâ-e. Tamas ka io i a aiǂhanu ǂgurots gere dī-e. Xawe gu ge kurigu, ǀaeb masigu, mari ǃgomsin tamas ka io omaris mâsiba nēsa dīsa mā-am tsi tama hâ. Tamas ka iots ge ǀapeǂhomis ǀkharaǀkharan xa ǃaroma-e hâse ǂgui kurinats dī hâ ǁgaumâis ǀkha a aiǃgû ǁoa. Mân ǀguin ga ǃgomsi xawe da ge Jehovab di ǃoabas ǃnâ da ǀorose ra dī di a tsâ ǁkhā. Nē ǃnôa mâsigu ǃnâ i ge a ǁnâuǃāxa ǁaen ai tsūse tsâsa. Nēs ga ama xawe da mati ǂkhabuǂâis, ǁaib tsî surib tsîna xu a ǂgōsen ǁkhā? Mati da ǂkhîba a ūhâ ǀgara ǁkhā?

ǂKhîba da mati nî ūhâ ǀgara ǀgausa da ge Johaneb ǁĀǁnâ-aob di aiǁgausa xu a ǁkhāǁkhāsen ǁkhā. Johaneb ge ǂoaǂamsa aiǂhanuga ge ūhâ i xaweb ge Jehovab di ǃoabas ǃnâ ge ǁîb ûib ǃnâ a ī xū-e ge ǃâubasen tama hâ i. Johaneb ge kurib ǀgaiba khoena Jesub xa gere aoǁnâba tsî kurib tsîna ǃkhō-oms ǃnâ ge hâ i. Johaneb ge noxoba ǂkhîba ge ūhâ ǀgara ǁîb ûib hoaba. Tae-e ǁîba ge hui? Tsî mati da ǂkhîba a ūhâ ǀgara ǁkhā, ǂkhabuǂâi da ga xawe?

29ǁÎ kurib ǃnâb ge Johaneba ǁîb di ǁgaumâis Jehovab ge mā bisa ge tsoatsoa mî rase: “ǃHowasen du, gaosib ǀhomi dib ǀgūse hā hâ xuige.” (Mat. 3:2; Luk. 1:12-17) ǂGuin ge nēsa ǃgâise ge ǃkhōǃoa. Tsî ǂguin ge ǃnūseba xu gere hā, ǁîb mîsa ǁnâusa tsî nēs ǃgao ǃhobasen tsî ge ǁāǁnâhe. Johaneb ge ǁkhoaǂgaosib ǀkha ǁîǀnamsenxa ǂgomdi ǂgaeǂgui-aoga ge ǃkhâikhom hānî ǀgoraǃâs xa hîna ǁîga ǃâu hâsa ǀkharaǀkharasen tama gu ga io. (Mat. 3:5-12) Johaneb ge ǁîb aoǁnâ sîsenni ǃnâ kaise ǂhâǂhâsa xū-e ge dī 29ǁî kurib ǃnâb ge Jesuba a ǁāǁnâ o. ǁNāsa xub ge Johaneba khoena gere mîba în Jesuba sao, mîmâisa Mesiaba.—Jhn. 1:32-37.

Jesub ge Johaneb xa ge mî: “Taradi xa ge ǁorahen xa i ge Johaneb ǁĀǁnâ-aob ǃgâ-ai kai-e hâ tama hâ.” (Mat. 11:11) Johaneb ge ǀkhaegu hînab ge hōgu xa gere ǃgâiaǂgao.  Johaneb khamin ge ǂgui khoena nētsē Jehovaba xu ǀkhaega ra hō. Terry di ǀon hâ ǃgâsab aiǁgausa ǃoa kō re. ǁÎb tsî ǁîb taras Sandras tsîn ge 50 kurigu xa ǃnāsase ǀoasase ge ǃoaba. Terryb ge ra mî: “Tita ge kaise ǂgui ǃgâi aiǂhanuga ge ūhâ i. Aimâba-aoses, betel omaris ǁanises, ǀō-aisa aimâba-aoses, !narimâra mûǂam-aoses tsî ǀkharib mûǂam-aoses tsîna ta ge gere ǃoaba tsî nēsi ǁkhawa ǀō-aisa aimâba-aose.” Jehovab ǃoabas ǃnâ da ǁgaumâisa ra hō o, o da ge kaise ǂkhî xawe i ge ǁgūtsâsa ǂhâ hâ nē ǂkhîba ūhâ ǀgaras ǃaroma Johaneb aiǁgausa xu da nî mû khami.

Johaneb ǁĀǁnâ-aob ge ǁîb di ǁgaumâidi ǃnâ kai ǂkhîba gere hōǃâ ǁîb di ǁgaumâideb gere ǃgôaǃgâ amaga. Sao ra aiǁgaus xa ǂâi re. Jesub di ǁāǁnâs khaoǃgân ge Johaneb di saosabena ge ǀoro tsî Jesub saosabena ge ǀarosen. Johaneb ǁkhāǁkhāsaben ge nēs xa ǂkhabuǂâi tsî ge mî: “Mû, ǁîb ge ra ǁāǁnâ, tsîn ge hoana ǁîb tawa ra sī.” (Jhn. 3:26) Johaneb ge ǃeream tsî ge mî: ‘ǃGame-aosa ūhâb ge ǃgame-aoba. Tsî ǃgame-aob di ǀhōb mâ tsî ra ǁnâu bib ge ǃgame-aob di dommi xa kaise ra ǃgâiaǂgao. ǁNātib ge nē ǃgâiaǂgaob tiba go ǀoa.’ (Jhn. 3:29) Johaneb ge Jesub ǀkha ge ǀgopeǀnōsen tama hâ i tsî ge ǂâi tama hâ i Jesub sîsenni ǁîb di ī xa a ǂhâǂhâsa di. Johaneb ge ǁîb di ǂkhîba ge ūhâ ǀgara tsî gere ǃgâiaǂgao ‘ǃgame-aob di ǀhōsab ase hâsa.’

Johaneb mûǂûib hînab ge ūhâ îb ge ge hui bi îb ǂkhîba ūhâ ǀgara ǁîb ǁgaumâis ǃnâ ǃgomsinab gere hōǃâ xawe. Johaneb ge ge Nasireǁî-i ǃnaesa xu tsî ǁnās ǀkha xûi-e āsa ge ǂkhāsa i. (Luk. 1:15) “Johaneb ge ge hā, ǂû tama tsî ā tamase” dib ge Jesuba ge mî Johaneb ǀguiǃgupu ûiba ǃoa ra ǁnaeǁgause. Jesub tsî ǁîb ǁkhāǁkhāsebegu tsîn ge Nasireǁî ǁgui-ais ǃnāga ge hâ tama hâ i tsî nau khoen khami gere ûi. (Mat. 11:18, 19) Johaneb ge buruxa dīga dīho tama hâ i xaweb ge ge ǂan i Jesub ǁkhāǁkhāsabegu ǀnîgu ǁîba gere saogu tsîn nē ǀgaiba ūhâsa. (Mat. 10:1; Jhn. 10:41) Johaneb ge ǁîb saosaben tsî Jesub saosaben tsîn ǁaegu ge hâ i ǃkharagagusigu ai ǁîb ǂâisa ge ǂnûi tama hâ i xawe Jehovab xab ge mā-e ǁgaumâis ai gere ǂgomaiǂnûi.

Sida ǁgaumâis Jehovab ǃoabas ǃnâ da ūhâsa da ga ǃgôaǃgâ o, o da ge sida ǂkhîba nî ūhâ ǀgara. Terryb hîna da go ǀgapise goro ǃhoaǃgaob ge ra mî, “tita ge ti ǂâisa mā-e ta gere ǁgaumâis hoas ai gere mâi.” ǀOasaseb gere ǃoaba ǁaeba ǃoab ra kō-oa o, ob ge ra mî “tita ge ǃhausen tama hâ xawe ǁkhoaxa ǁaegu xa ǀgui ra ǂâi ū ta ge hâ i ga.”

Sida tsîn ge kai ǂkhîba a ūhâ ǁkhā sada ǁgaumâis Jehovab ǃoabas ǃnâ da ūhâs mâ ǀgaub ǃnâ a ǀō-aisa ǀgaus xa da ga ǂâiǃgâ o. Kai aiǂhanub ge “Elob di ǀhaosîsenao” īsa. (1Kor. 3:9) Sado kaise a ǀō-aisaba xū-i ge ǃgâise du ga ǃûi-i o, o ǁnā ǀgaub ǃnâ ǀgui nî hâ. ǁKhā ǀgaub ǃnâ da ge ǂkhîba nî ūhâ ǀgara Jehovab ǀkha da ūhâ ǃgâi ǀhōsagusis xa da ga ǂâi ǀgara o. Sida ra dī xūna da ge nau khoen ra dīn ǀkha ǀgopeǀnō tide. Nau khoen ǁgaumâidi sida ǁgaumâidi xa a ǀgapi ti da ge tā nî ǂâi.—Gal. 6:4.

Johaneb ge ge ǂan i gaxuseb aoǁnâ sîsenni ǃnâ ǁhao tidesa xaweb ge ge ǀū-i ǁîb aoǁnâ sîsenni ǃgâi tama ǀgaub ǃnâ nî ǀamsa. (Jhn. 3:30) 30ǁÎ kuri ǃnani ǁkhâga Jesub ǁāǁnâhe hâs khaoǃgâb ge Johaneba ǃkhōsis ǃnâ ge ū-e Gao-aob Herodeb xa. ǁNās ǂam-aib ge Johaneba noxoba ge aiǃgû aoǁnâsa. (Mrk. 6:17-20) Tae-e ǁîba ge hui ǂkhîba ūhâ ǀgarasa nē ǀkharaǀkharan ǃnâ? ǁÎb ge gagasi xūn ai ǁîb ǂâisa gere ǂnûi.

Johaneb ge ǃkhōsis ǃnâb hâ hîna Jesub aoǁnâ sîsenni mati ra kai ǀgauba gere mîbahe. (Mat. 11:2; Luk. 7:18) Johaneb ge ǂgomǃgâsiba ge ūhâ i Jesub a Mesia ǃkhaisa xawe gere ǂhâ Jesub mati xoadi Mesiab xa ra mî  xūn hoana nî dīǀoaǀoasa. Mesiab nî gao-ao ī ǃkhais ǃgaob Jesuba ǀgūǁae nî ǂgaeǂgui tsoatsoa? Nēsa Johaneba ǃkhōsisa xu ga ūǂui hâ? Johaneb ge Jesub hāb ga ra o tae-e hā nî dis xa ǃnāsase ǂan ǂgaos ǃaroma ǁîb ǁkhāǁkhāsabega Jesuba ge dî kai: “Satsa koma hā nîtsa?” tamas ka io “ǀkharaba da nî ǃâu?” (Luk. 7:19) ǁÎgu ge oaǀkhī o, ob ge Johaneba ǃgaoǃgâxase ǀnîsi gere ǃgâ ǁîgu ge mati gere mîba bisa Jesub ge buruxa dīga gere dī tsî ǁîga ge sî îgu Johaneba sī mîba: “ǂGī hân ra mûsa, ǃhoran ra ǃgûsa, ǃomamaxan ra ǃanuǃanuhesa, ǂganaǂgae hân ra ǁnâusa, ǁō hân ra ǂkhaiǂkhaihesa, ǀgâsan ra ǃgâiǂhôasa aoǁnâbahesa.”—Luk. 7:20-22.

Johaneb ge ǁîb ǁkhāǁkhāsabegu ge mîba bi xū-i xa ge ǂkhâǃnâ-e. Nēs ge ge ǁgau Jesub ge Mesiab xa ge kēbo-e xūna a dīǀoaǀoasa. Jesub ge Johaneba ǃkhōsisa xū ūǂui tama i xaweb ge Johaneba ǂgomǃgâsiba noxoba ge ūhâ i ǁîb sîsen i ǁau tama hâsa. ǁÎb mâsigu ǂam-aib ge ǃaromasa ge ūhâ i ǃgâiaǂgaosa.

Johaneb khami da ga gagasi xūn ai sida ǂâide ǂnûi o, o da ge ǂkhîb tsî ǃnūǃnâxasib tsîn ǀkha nî mâǀgai. (Kol. 1:9-11) Nēsa da ge Elobmîsa khomai tsî ǂâiǃgâs ǃnâ-ū a dī ǁkhā tsîs ge nēsa nî ǂâiǂâiǃnâ da sida Jehovab ǃoabas ǃnâ ra dī xūn ge ǁau tama hâ di. (1Kor. 15:58) Sandras ge ra mî: “Elobmîs ǃâ-e tsēs hoasa khomais ge ge hui te i ta Jehovaba ǃoa ǀgū. Nēs ge ge hui te i ta Jehovab ai ǂgomaiǂnûi tita ais ose.” Sida ǃgâsan Jehovaba ra dība sîsenni ais tsîna da ge ǂâisa a ǂnûi ǁkhā nēs ge nî huida i da tā sida xa ǀgui ǂâi. “ǁKhâb hoaba hâ JW Broadcastings ge ra huida i da ǀapeǂhomis ǀgūse tsâ” tis ge Sandrasa ra mî, “tsî ra huida i da ǂkhîba sida ǁgaumâidi ǃnâ ūhâ.”

Johaneb ge ǁîb di ǁgaumâisa ‘Eliab di gagas tsî ǀgaib’ tsîn ǀkha gere dī tsî Eliab khamib ge ǁîb tsîna ge ‘khoe-i’ tsâsigu ǀkha. (Luk. 1:17; Jak. 5:17) ǁÎb aiǁgausa ǁgae tsî da ga ǃgôasiba ǁgau tsî gagasi xūn ai sida ǂâide ǂnûi o, o da ge ǂkhîba nî ūhâ Jehovab ǃoabas ǃnâ ǃgomsin ǂam-ai.