Hî-î, Elobmîs tamas ka io, ǃkharu ge ǁaeb Xristeǁîn ǂkhanidi ǃnâ i ge xoa-e tama hâ ǁō hâ khoen ǃgao i gere ǁāǁnâhesa.

Nē xoas Elobmîs ǃnâ ǂnûiǃkhunisa ǀgaus ge khoena ra ǂâi kai ǁāǁnâs ge ǁō hâ khoen ǃgao ǂgurokam ǁaeb ǃnâ gere dīhe di. Aiǁgause: “Tarexan kha ǁō hân ǂama ra ǁāǁnâkaisen?”—New International Version.

Nēba ǃgaoǃgâ re ǂansa ūhâ ǀgam khoega gere mî ǀgausa. Dr.  Gregory Lockwoodi ge ra mî: “ǁÔ hân ǂama ra dihe” ǁāǁnâ di ge Elobmîs tamas ka io aibekam khoen, ǃnâ ge hō-e tama hâ-i. ǁNās ǁkhās khamib ge ǂansa ūhâ Gordon D Feeba ge xoa: “ǃKharu ge ǁaeb tamas ka io Elobmîs ǃnâ i ge, nēti ī ǁāǁnâ-e a ǀkhai. ǁÎb ge ra mî ǀasa testaments ǃnâ i ge nēti i xū-e ge xoa-e tama hâ-i. Xū i ge a ǀkhai ǁgau ra-e, nēs ge ǀnîsi ǂgurokam Xristeǁîn tamas ka io Elobmîs ǃnâ hâsa apostelgu ge ǁōs khaoǃgâ.”

Elobmîs ge ra mî, Jesub ǁkhāǁkhāsaben ǃoa ‘ǃgûǂoa, tsî hoa ǁaede ǁkhāǁkhāsabedī, î ǁîna ǁāǁnâ, tsî ǁkhāǁkhā sago ta gere mîmān hoana ǃkhōǀgaipesa.’ (Mat. 28:19, 20) Khoe-i ge ǁkhāǁkhāsabe kai-i nîs aiǃgâ, aibe ǁkhāǁkhāsen tsî nî ǂgom. Jesub tsî Jehovab tsîna i ge nî ǁnâuǀnam. ǀNai ǁō tsî ǀhobas ǃnâ hâ khoe-i ge nēsa a dī ǁoa. Tsî i ge ûitsama Xristeǁî i tsîna nēsa a dība bi ǁoa.—Aoǁn. 9:5, 10; Jhn. 4:1; 1Kor. 1:14-16.

Nēs ǀkhab ge Pauluba tae-e gere ǂâibasen?

ǀNî Korinteǁîn ge gere mî khoen khâisa hō tide ti. (1Kor. 15:12) Paulub ge ǁîna ge ǁgau nē ǂâiǀgaub ǃgâi tama hâsa. Mati? ǁÎb ge ge mî ‘tsēkorobeb ǁōba ra’ mû di. Ûitsamab ge ge i. ǁÎb ge ra mîǃā, tsēs hoasab ǁkhōǁkhōsa mâsib ǃnâ hâ, xaweb ge ǂgomǃgâsiba ūhâ ǁōb ga ob khâisa hō tsî ǀhomma ǃoa nî īsa.—1Kor. 15:30-32, 42-44.

Korinteǁîn ge nî ǁgauǃā ǂkhauhesa ǃgâsan tsîn ǃgomsiba nî hōǃâsa ǁōn nîs aiǃâ. ‘Xristub Jesub ǃnâ ǁāǁnâhes’ ge “ǁîb di ǁōb ǃnâ” ǁāǁnâhesa ǃkhōǂgā hâ. (Rom. 6:3) Nēs ge ra ǂâibasen ǁîn tsîn Jesub khami ǃgomsiba hōǃâ tsî ǀgui ǀhomma ǃoa nî īsa.

ǀGam kurina ǁîb ǁāǁnâs khaoǃâb ge Jesuba ǁîb ǁkhāǁkhāsabega ge mîba: “Tita ra ǁāǁnâ-ūhe ǁāǁnâs ǀkha kho nî ǁāǁnâhesa.” (Mrk. 10:38, 39) Jesub ge ǁnā ǁaeb ai ge ǁgammi ǃnâ ǁāǁnâhe tama hâ i. ǁÎb gere ǂâibasens ge ǁîb ga ǂgomǂgomsase Elob ǃoa ga ra hâ o, ob nî ǁōsa. Paulub ge ge xoa ǂkhauhesa ǃgâsan ‘ǁîb ǀkha ǁkhāti nî ǂkhaiǂkhaihe’ di. (Rom. 8:16, 17; 2Kor. 4:17) ǁÎn tsîn ge ǁō tsî ǀhomma ǃoa nî ī.

Paulub ge mî mîdi ge ra ǂâibasen: “ǁŌ hân ga khâi tama io, tae-i ǃaroman ǁōn nî ga ra ǁāǁnāhe? ǁŌ hân ga khâi tama io, tae-i ǃaroman ǁnā ame ǁāǁnâsa ra hō?”