1-2. Mateub 5:11 ǃoagu da mati ǃgomsina nî mû?

JESUB ge ǁîb di sao-aona ge mîba ama ǂkhîban nî hōǃâ ǃkhaisa. Tsîb ge ǁîna ge mîba ǁnān hîna ǁîba a ǀnaman nî ǃgomsina hōǃâ ǃkhaisa. (Mat. 10:22, 23; Luk. 6:20-23) Sida ge a ǂkhî Jesub di ǁkhāǁkhāsabe da a amaga. Xawe mati da ra tsâ sida di ǀaokhoen xa da ra mâǃoahe o? Tsî da ga ǂhanub xa mâǃoahe. Tsî sîsen ǀhao u da ra khoen tsî skoli ǀhōsan xa ǃgâi tama xūna ga ra dī kaihe o? Nē xūn xa da ga ǂâi o, o da ge a ǂâiǂhansen tsoatsoa ǁkhā.

² ǂGui khoen ge ǃgomsinan ga hōǃâ o nēs ǃnâ-ūn ǂkhîba nî hō ti ǂâi tama hâ. Elobmîs tsîn ge ǁnāsa ra mî. Aiǁgauseb ge ǁkhāǁkhāsabeb Jakobuba ge a xoa ǃgomsina da ga hōǃâ o, o da ge nî ǃgâiaǂgao ti. (Jak. 1:2, 12) Jesub tsîn ge ge mî ǃgomsina da ga hōǃâ o, o da ge nî ǃgâiaǂgao ti. (Khomai re Mateub 5:11 sa.) Mati da ǃgomsin ǃnâs tsîna ǂkhîba a ūhâ ǁkhā? ǂGui xūna da ge a ǁkhāǁkhāsen ǁkhā. Jakobub ge ǂguro Xristeǁîna ǃoa a xoa sîǂkhanisa xū. ǂGurose da ge ǁîn gere hōǃâ ǃgomsin xa nî ǃhoa.

3. Tae-e ge ī Jakobub ge a Jesub di ǁkhāǁkhāsabe kai toas khaoǃgâ?

³ Jakobub hîna a Jesub di ǃgâb ge ǁkhāǀǀkhāsabe kai toas khaoǃgâ. În ge Jerusalems ǃnâ ge hâ i Xristeǁîna ge ǁnāǂgamhe. (ǃNǃkh. 1:14; 5:17, 18) Stefanub ge ǃgamhes khaoǃgân ge ǂgui Xristeǁîna ǃāsa xu ge doe. Tsîn ge ‘hoatsama ge ǀgaruǀgaruhe Judeab tsî Samariab ǃhūkha ǃnâ.’ Siprus tsî Antioxias kōse ǃnū ǃkhaigu ai. (ǃNǃkh. 7:58–8:1; 11:19) ǂÂi re ǁkhāǁkhāsabegu gere hōǃâ ǃgomsin xa. Xawe gu ge ǁkhoaǂgaose gere aoǁnâ. Tsî i ge ǂgui ǀhaohâga ge  omhe Romes ǃnâ. (1Pet. 1:1) Xawe ǁnās khaoǃgân ge ǂgui ǃgomsina gere hōǃâ.

4. Mâ ǃgomsin tsînan ge ǂguro ǁaeb di Xristeǁîna gere hōǃâ?

⁴ ǂGuro ǁaeb di Xristeǁîn ge ǂgui ǃgomsina gere hōǃâ. Aiǁgause 50ǁî kurib ǃnâb ge Romes di ǂgaeǂgui-aob Claudiusa, Jodeǁîna ge mîba în Romesa xū doe. Jodeǁîn hîna ge Xristeǁî kain ge ǁîn di omde ǁnāxū tsî ge doe. (ǃNǃkh. 18:1-3) Apostel Paulub ge 61ǁÎ kurib ǃnâ ge xoa ǁîb di ǃgâsan ge trokhedi ǃnâ a ǂgāhesa. Tsî ǁîn di xūna a ū xu-e ǃkhaisa. (Heb. 10:32-34) Nau khoen khamin ge Xristeǁîna ǀaeb tsî ǀgâsib tsîna gere hōǃâ.—Rom. 15:26; Fil. 2:25-27.

5. Mâ dîde da nî ǃeream?

⁵ Jakobub ge nē sîǂkhanisa a xoa o 62ǁî kurib ǃnâ. Ob ge ǁîba ǀnai ge ǂan i ǁîb ǃgâsan ra ǃkharuǃnâ ǃgomsina. Jehovab ge Jakobuba ǁîb di ǃanu gagab ǀkha ge hui. Îb xoa tsî Xristeǁîna hui în ǃgomsinan ga hōǃâ ǁaeb ais tsîna ǃgâiaǂgao. Hāre i da Jakobub di sîǂkhanisa kō tsî sao ra dîde ǃeream: Mâ ǂkhîb xab ge Jakobuba xoa? Tae-e nî ǃaroma în Xristeǁîna ǂkhîba ǂoaǃnâ? Tsî matib gā-aisib, ǂgoms tsî ǁkhoaǂgaosib tsîna ra hui, ǃgomsin ǃnâs tsîna ǂkhîba ūhâsa?

6. Lukab 6:22, 23 ǃoagu i tae-i ǃaroma ǃgâsa-e ǂkhîba a ūhâ ǁkhā ǃgomsin ǃnâs tsîna?

⁶ ǀNî khoen ge ra ǂâi ǁîn ga ǃgâi ǂgurusib, ǂgui mari-i tsî ǂkhî omarisa ūhâ o, on a ǂkhî ti. Xawe Jakobub ge xoa ǂkhîb ge gagab di ǂûb di ǃâ. Tsî khoe-i di mâsigu ai ǃgaoǃgaosa tama hâ. (Gal. 5:22) Xristeǁîn ge ǃgam ǂkhîba ra hōǃâ Jehovaba ǂan tsîn ga ǁîba ǃoaba o. Tsî Jesub di aiǁgausa ga ra  sao o. (Khomai re Lukab 6:22, 23; Kol. 1:10, 11) Lams ǃnâ ra khau flami khami i ge sida ǂkhîba ra khau ǂgaob ǃnâ. Tsîda ge ǁnās ǀkha ǂkhîba a ūhâ ǁkhā ǃgomsin ǃnâs tsîna. ǀAesen da ga ra o, os tsîna da ge sida ǂkhîba ǂoaǃnâ tide. Tamas ka io ǀoro mari-e da ga ūhâ os tsîna. ǁNās ǁkhas khamis tsîna da ge sida di omaris ǁanin ga mâǃoada os tsîna ǂkhîba ǂoaǃnâ tide. Sida di ǂkhîb ge ra ǀgaisa mâ ǁaeb hoab hîna da ǃgomsin ǃnâ ra mâǀgaib ǃnâ. Sida di ǂgoms ǃaroma da ra hōǃâ xūn ge ra ǁgau Jesub di ama ǁkhāǁkhāsabe da a ǃkhaisa. (Mat. 10:22; 24:9; Jhn. 15:20) ǁNā-amagab ge Jakobuba nēti ge xoa: “ǃGâiaǂgaob ǀguib ase ūhâ re, ti ǃgâsago, ǂguiǃnâgu ǃâitsâdi ǃnâ du ga ǁnāo.”—Jak. 1:2.

7-8. Tae-i ǃaromas sida ǂgomsa ra ǀgai ǃgomsin ǃnâ da ga hâ o?

⁷ Jakobub ge ǃaromasa ra mā tae-i ǃaroman ǃgâsana māsenxase ǃgomsina a hōǃâ ǁkhāsa. ǁÎb ge ge mî: “Î du ǂan, sadu ǂgoms di ǃâitsâhes taniǀnamxasiba ra hā-ū ǃkhaisa.” (Jak. 1:3) ǃGomsin ge ǀaes di ǀgammi hîna blaida ra khauūheb ǀkha a ǀgopeǀnōhe ǁkhā. Nē blaidi ga ǀgamǀgamhe tsî ǁnapaxu a ǃkhaiǃkhaihe o, ob ge ra ǀgaisa. ǁNās khami da ga sada tsîna ǃgomsina hōǃâ o, os ge sida di ǂgomsa kaise ra ǀgai. Tsî ǁnā-amagab ge Jakobuba ge xoa tsî mî: “Tsî taniǀnamxasiba ab dīǀoaǀoasase sîsenni âba dī, î du dīǀoaǀoasa tsî hoaragase ǂhau, î du xū-i xare-i ǃnâ tā tôasi.” (Jak. 1:4) Sada ga mû o ǃgomsin ra ǀgai kai da sa o. O da ge ǂkhîb ǀkha hoa ǃgomsina a mâǃkharu ǁkhā.

⁸ Jakobub ge ǁîb di sîǂkhanis ǃnâ, xūn hîna sida ǂkhîba a ūbe ǁkhān xa ge ǃhoa. Mâ ǃgomsina ǁnāna? Tsî mati da ǁîna a sîsenǂam ǁkhā?

9. Tae-i ǃgao da gā-aisiba ǂhâ hâ?

⁹ Tae-e a ǃaroma ǁkhā î da sida ǂkhîba ǂoaǃnâ? Dī da nî xū-e da a ǀū ǁaeb. ǃGomsina da ga hōǃâ ǁaeb ǃnâ da ge Jehovaba ǃoa ra kō ǂgao ib hui da. Î da ǃgâi mîǁguiga dī ǁkhā. Tsî ǁîba ǂkhîǂkhî tsî sida ǃgâsan hoan tsîna. Tsî ǁnās ǀkha hoada di ǂgomsa ǀgaiǀgai. (Jer. 10:23) Gā-aisiba da ge ǂhâ hâ î da ǂan tae-e da nî dīsa. Tsî tae-e da nî ǃereamsa ǁnân hîna ra māǃoadan ǃoagu. ǀŪ da ga o tae-e da nî dīsa, o da ge ǁgaise a tsâ ǁkhā. Tsî ǂkhabuǂâi tsî sida ǂkhîba a ǂoaǃnâ ǁkhā.

10. Gā-aisiba hōs ǃaromas Jakobub 1:5 sa tae-e ra mî dī da nî-e?

¹⁰ Tae-e da nî dī î da sida ǂkhîba ūhâ ǀgara? Jehovab ai gā-aisiba ǂgan re. Sida di ǃgomsina da ga mâǃkharu ǂgao o, o da ge ǂgurose Jehovaba ǀgores ǃnâ-ū nî ǂgan ib  hui da. Tsî gā-aisiba mā da, î da ǃgâi mîǁguiga dī. (Khomai re Jakobub 1:5 sa.) Mati da nî tanisen Jehovab ga ǁaeb ai sida ǀgorede ǃeream tama io? Jakobub ge ra mî ‘i da Elob tawa ǂganbasen’ ti. Jehovab ge tātsēs tsîna tsauda tide ǁîb ai da ga gā-aisiba ǂgan o. ǁÎb ge sida ǀkha ǁaixa tide. Sida di ǀhomsi ǁGûb ge hoada “ǀguiǃnâxase ra māb.” ǁÎba ǃoa ǀgore tsî da ga gā-aisiba ǂgan o, î da ǃgomsina sîsenǂam ǁkhā. (Psa. 25:12, 13) ǁÎb ge sida ǃgomsina ra mû tsî ra tsâba da. Tsîb ge amabes ǃnâ ra hui da ǂgao. ǁNā-amaga da ge a ǃgâiaǂgao ǁkhā. Xawe matib Jehovaba sada gā-aisiba ra mā?

11. Tae-i tsîna da a dī ǁkha î da gā-aisiba hō?

¹¹ Jehovab ge gā-aisiba Elobmîs ǃnâ-ū ra mā da. (ǂKhm. 2:6) ǁNā gā-aisiba da ga hō ǂgao o, o da ge Elobmîsa nî khomai. Tsî Elobmîs ai ǃgaoǃgaosa ǂkhanin tsîna. Xawe da ge ǃnāsa-e nî dī Elobmîsa khomai tsî ǁnâuǃāba hōs xa. Sida ra khomai xūna da ge sida di ûigu ǃnâ nî sîsenǂui kai. Jakobub ge xoa tsî ge mî: “Mîs di dī-ao kai re, î du tā ǁnâus ǀguisa hî.” (Jak. 1:22) Elobmîs ǃnâ da ra khomai xūna da ga ûiǂui o. O da ge ǂkhîxaǃnâ, tsauraǃnâ, mîbakaisenxa, ǀkhomxaǂgaoxa ǀgauga nî ǃkhōǃoa. (Jak. 3:17) ǁNā ǀgaugu ge ra hui da î da mâ ǃgomsi-i hoa-e ǂkhîb ǀkha mâǃoa.

12. Tae-i ǃaroma i a ǂhâǂhâsa Elobmîsa ǃgâise ǂansa?

¹² Elobmîs ge spils khami i, tsî ra hui da î da mû mapa da ǀkharaǀkharana nî dīsa. (Jak. 1:23-25) Aiǁgause Elobmîsa da ga khomai toa o. O da ge ra mû sida di ǁaiba da nî ǃkhō-oasa. Tsî Jehovab di huib ǀkha da ge ra ǁkhāǁkhāsen mati da khoen ǀkha nî tsaurasa. Tsî ǃgomsin tsîna da ra hōǃâ ǁaeb ai. Tsaura da a amaga da ge ǃgomsina da ga hōǃâ o ǃgâise ra tanisen. Tsî da ge ǃgâise a ǂâi ǁkhā. Tsî ǁnās ǀkha  ǃgâi mîǁguiga a dī ǁkhā. (Jak. 3:13) ǁNā-amaga i ge ǂhâǂhâsa Elobmîsa ǂansa.

13. Mati io da Elobmîs di aiǁgaude xu nî ǁkhāǁkhāsen?

¹³ ǀNî ǁaeb ai da ge ra ǁkhāǁkhāsen taena xū da nî ǂgosensa. Tsū xū-e da dītoa hâ hîna. Xawe ǁnāb ge a ǃgom ǀgau ǁkhāǁkhāsens diba. ǃGâi ǀgaub hîna da hoada a ǁkhāǁkhāsen ǁkhāb ge nau khoen di ǃgâi dīgu tsî tsūga xū ǁkhāǁkhāsensa. ǁNā-amagab ge Jakobuba ge ǂkhâǃnâ da î da Elobmîs di aiǁgaude xū ǁkhāǁkhāsen. Aiǁgause Abrahammi, Raxas, Jobi tsî Elia hân aiǁgaude xū. (Jak. 2:21-26; 5:10, 11, 17, 18) ǁNā ǂgomǂgomsa ǃoaba-aon Jehovab din ge ǁîn ǂkhîba ga ūbe hâ ǃgomsinan gere hōǃâ xawe ge mâǀgai. ǁÎn di aiǁgaudi ge ra ǁgauda Jehovab huib ǀkha da sida tsîna ǁnāsa a dīǁkhāsa.

14-15. Tae-i ǃaroma da ū da hâ dîde ǃereamde nî hōba?

¹⁴ Tae-e a ǃaroma ǁkhā î da sida ǂkhîba ǂoaǃnâ? ǀNî xūn hîna du ge ǁkhāǁkhāsena ūǃoas ga ǃgomba du o. ǀNî ǁaegu ai da ge Elobmîs ǃnâ da ra ǁkhāǁkhāsen xūna ǁnâuǃā tama hâ. Tamas ka iob ge ǀnîsi Jehovaba sida ǀgoreda ǂhâba da hâ ǀgaub ǃnâ ǃeream tama hâ. Nēs ge dîdi ǀkha a xū du ǁkhā. Nē dîde du ga ǃereamde hōba tama io. Os ge sadu ǂgomsa nî ǂkhabu. Tsî du ge Jehovab ǀkha du ūhâ ǀhōsagusa nî ǂoaǃnâ. (Jak. 1:7, 8) Tsî da ge hānîǁaeb ǃaroma da ūhâ ǃâubasens tsîna a ǂoaǃnâ ǁkhā.

¹⁵ Apostel Paulub ge hānîǁaeb ǃgao da ūhâ ǃâubasensa. ǃGom ǀuris hîna ǂgausa hurib ǃnâ ǀgui ǃkhais ai ra ūhâs ǀkha ge ǀgopeǀnō. (Heb. 6:19) Nē ǀuris ge ǂgausa ra ǁkhae is tā ǀuidi ǃnâ ǂgâusen. Tsî ra hui is tā ǂoab xa ǃgom mâhe. Xawe nē ǀuris ge ǂgaus ais ǃgae-ūhe hâ khedeb ga ǃgâu tama io ǀgui nî sîsen. Rūsi hâ khedeb a ǂkhabusa. Khamis ge sida ǂgomsa nî ǂkhabu. Ū da hâ dîde da ga ǃeream tama io. Tsî da ge ǃgomsina da ga hōǃâ o. Jehovab mîmâib hâ xūna nî dīǀoaǀoasa ǂgom tide. Sida di ǂgomsa da ga ǂoaǃnâ o. O da ge sida di ǃâubasens tsîna nî ǂoaǃnâ. Jakobub tsîn ge ge mî “îganǀgē ra-i hurib ǃgabi-i, ǂoab xa ra doeǁgarihe tsî ǂnapimahe-i khami ī” di. (Jak. 1:6) Nēti ī ǀgaub ǃnâ ra tsâ khoe-i ge ǂkhîba hōǃâ tide.

16. Tae-e du nî dī îganǀgē kai du ra dîde du ga ūhâ o?

¹⁶ Tae-e da nî dī î da sida ǂkhîba ūhâ ǀgara? Îganǀgē kai du ra dîde ǃereamde hōba re. ǃHaese dîdi ǃereamde ôa re. Eliab di tsēdi ǃnân ge Jehovab di khoena. ǁÎn di ǂgoms xa ge înganǀgē tsoatsoa. Eliab ge ǁîna ge mîba: “Matikōse du kha ǀgam ǂaira ai ra ǀī? ǃKhūb ga Elo io, ǁnâi ǁîba sao, tsî Baali ga ǁî io, ǁnâi ǁîba sao.” (1Gao. 18:21) Nētsēs tsîna da ge ǃhaese nî mîǁgui. Ôaǃnâde da ge nî dī. Î da ǂan Jehovab a Elo sa. Tsîs Elobmîsa ǁîba xu ra hāsa. Tsîn Jehovab di ǃoaba-aona a ǁîb di khoesa. (1Tes. 5:21) ǁNā xūn hoana da ga dī o. O da ge sida îgnaǀgēba nî ǀoroǀoro. Tsî sida ǂgomsa nî ǀgaiǀgai. Huiba da ga ǂhâ o î da sida ǂgomsa ǀgaiǀgai. O da ge ǀhaohâb ǃûi-aogu ai huiba a ǂan ǁkhā. ǃHaese da ge xū-e nî dī. Î da Jehovaba ǂkhîb ǀkha ǃoaba ǀgara.

17. ǁKhoaǂgaosiba da ga ǂoaǃnâ o i tae-e nî ī?

¹⁷ Tae-e a ǃaroma ǁkhā î da sida ǂkhîba ǂoaǃnâ? ǂKhabuǂâi du ga o. “ǃOposasets ga ǂōǂōsib di tsēs ai ǁgauseno, ob ge ǀgaib âtsa ra toa,” tis ge Elobmîsa ra mî. (ǂKhm. 24:10) Hebregowab mîs hîna ‘ǃoposase ǁgausen’ di ǂnûiǃkhunihe hâs ge “ǁkhoaǂgaosiba ǂoaǃnâ” dis tsîna a ǂâibasen ǁkhā. ǁKhoaǂgaosiba du ga ǂoaǃnâ o du ge kaise ǃhaese sadu ǂkhîb tsîna nî ǂoaǃnâ.

18. Taniǀnamxasiba tae-e ra ǂâibasen?

 ¹⁸ Tae-e da nî dī î da sida ǂkhîba ūhâ ǀgara? Jehovab ai huiba ǂan re î du ǁkhoaǂgaose ǃgomsin ǃnâ mâǃkharu. ǁKhoaǂgaosiba da ge nî ūhâ. ǃGomsin ǃnâ da ga mâǃkharu ǂgao o. (Jak. 5:11) Jakobub ge mî mîs “taniǀnamxasib” di hâs ge. Khoeb hîna ǀgui ǃkhais ai mâba ǃoa ra ǁnaeǁgau. Nēb ge soldab hîna ǁnāǂamheb ga xawe. ǀGui ǃkhais ai mâ tsî ǃoabē tamaba ra ǂâi kai da.

19. Tae-e da apostel Paulub di aiǁgausa xu a ǁkhāǁkhāsen ǁkhā?

¹⁹ Apostel Paulub ge ǃgâi aiǁgausa ge mā da. ǁKhoaǂgaosib tsî taniǀnamxasib tsîn xa. ǀNî ǁaegu aib ge ǁîb tsîna ǂkhabusase gere tsâ. Xaweb ge nē ǃgomsin hoan ǃnâ ge mâǃkharu ǁkhā i. Jehovab ai ǂgomǃgâ tsîb ge ǂhâb ge hâ-i ǀgaiba gere māhe amaga. (2Kor. 12:8-10; Fil. 4:13) Sida tsîn ge ǀgaib tsî ǁkhoaǂgaosiba nî ūhâ. Mûǂan da ga o Jehovab huiba da ǂhâ hâ ǃkhaisa.—Jak. 4:10.

20-21. Tae-i di ǂgomǃgâsiba da a ūhâ ǁkhā?

²⁰ ǂGomǃgâ ǁkhā da ge a ǃgomsin hîna da ra hōǃân Jehovaba xū ǀkhī tamasa. Jakobub ge ge mîba da: “Elob ge ǂkhabab ǀkha a ǃâitsâhe ǁoa xuige, tsîb ge ǁîb ǂûba khoe-i xare-e ǃâitsâ tama hâ.” (Jak. 1:13) ǁNā amaba da ga ǂgomǃgâ o, o da ge sida di ǀhomsi ǁGûb Jehovab ǀgūse ra sī.—Jak. 4:8.

²¹ Jehovab ge ǀkhara tamas ka io, ‘dawaǃkhupusen’ tama hâ. (Jak. 1:17) ǁÎb ge ǂguro ǁaeb ai ge ûi hâ i Xristeǁîna ge hui. Tsîb ge nētsēs tsîna sida ǃgomsin ǃnâ nî hui da. Jehovaba ǀgaisase ǂgan re. Îb gā-aisib, ǂgoms tsî ǁkhoaǂgaosib tsîna mā du. ǁÎb ge sadu di ǀgorede nî ǃeream. ǂGomǃgâsiba du ge ūhâ ǁkhā. Jehovab nî hui du sa i du ǂkhîba ūhâ. Sadu ǃgomsina du ra mâǃkharu hîna.