1-2. (a) Armagedonsa tae-i ǃaroma a ǃgâiǂhôa khoesib amsi? (b) Mâ dîde da nē ǁkhāǁkhāǃâs ǃnâ nî ǃhoaǃgao?

KHOENA du ra ǁnâu hîna khoen xa ǃaroma-e hâ toroga ‘Armagedonsa’ ǃoa ra ǁnaeǁgauna? ǁNās ǂam-ai i ge Elobmîs Armagedons xa ra mî-e ǃgâiǂhôasa ǃkhōǂgā hâ nēs ge kaise ra ǃgâiaǂgao kai da. (J.ǂHa. 1:3) Armagedons ge khoena hîgāgā tide xawe khoesiba nî sâu. Mâ ǀgaub ǃnâ?

² Elobmîs ge ra ǁgau Armagedons ge khoesiba khoesi ǂgaeǂguisa xu nî ǃnōra kai di. Nē torob ge Eloxoresa khoena i ga hîgāgā tsî ǂhauǃnâ khoena sâu ǁaeb ai khoesiba nî sâu. Tsî sida ǃhūbaiba hîgāgāhesa xu sâus ǃnâ-us tsîna khoesiba nî ǁkhauba. (J.ǂHa. 11:18) Nēsa ǃgâise ǁnâuǃās ǃgao hā re ida haka dîde ǃhoaǃgao: Armagedonsa a tae-e? Tae-e Armagedons aiǃâ nî ī? Tae-e da nî dī îda Armagedons tawa sâuhe? Tsî mati da ǂgomǂgomsase nî hâ Armagedons ra ǀgū khami?

3. (a) Armagedon di hâ mîsa tae-e ra ǂâibasen? (b) ǂHaiǂhais 16:14, 16 tsîna mati ra ǁgau Armagedons ge ǃhūbaib ai hâ ǃkhai tamasa di?

³ Khomai re ǂHaiǂhais 16:14, 16. ‘Armagedon’ di hâ mîs ge Elobmîs ǃnâ ǀgui ǃnās ǀguisa hâ tsî nē mîs ge Hebregowab mîs hîna ‘Megidos ǃhōmmi’ di ra ǂâibasensa xu hâ. (J.ǂHa. 16:16.) Megidos ge Israeli ǃnâ ge hâ i ǃāsa ǃkharu ge ǁaeb ǃnâ. (Jos. 17:11) Xawe Armagedons ge ǃhūbaib ai hâ ǃā-i di ǀon tamasa. Nēs ge “ǃhūbaib di gao-aogu” hîna Jehovab ǃoa-ai ra ǀhaoǀhaosen gu ǃoa ra ǁnaeǁgau.  (J.ǂHa. 16:14) ǃHūbaib di gaogu nî ǀhaoǀhaosenba torob ǃoas tsîna da ge nē ǁkhāǁkhāǃâs ǃnâ nî ǃhoaǃgao hîna ‘Armagedon’ di ǂansaba. Mati da a ǂan Armagedons ǁgauǁgaus ǀguisa īsa? ǂGurose Megidos ǃhommi ge ama ǃhom tamaba. ǀGamǁîse Megidos ǃhommi ge kaise a ǂkhariro tsî “ǃhūbaib di gao-aogu” hoaga ǃkhōǂgā hō tide ǁîgu toro ǃkham-aon tsî toro ǃkham-ū xūn tsîna ǃkhōǂgā hâse. ǃNonaǁîse ega da nē ǁkhāǁkhāǃâs ǃnâ nî mû khami i ge Armagedons toroba nî tsoatsoa ǃhūbaib di “gao-aogu” ga Elob khoena ǁnāǂam o hîna ǃhūbaib ǂhawase hâna.

4. Eloba tae-i ǃaroma ǁîb di ǀuniga toroba Megidos ǀkha ge ǃgaeǀhaoba?

⁴ Jehovaba tae-i ǃaroma ǁîb di ǀuniga toroba Megidos ǀkha ge ǃgaeǀhaoba? Elobmîs ǁaeb ǃnâ i ge ǂgui toroga Megidos tsî Jesreels ǀgūses tsîna gere ǃkham-e. ǀNî ǁaegu aib ge Jehovaba ǁîb khoena gere hui nē toroga ǃkhams ǀkha. Aiǁgause, “Megidos di ǁgamgu” tawab ge Eloba Israelǁî ǂhanuǂhanu-aob Baraka ge hui îb Kanaanǁî toro ǃkham-aob Siseraba ǃkham ǃoa ǁkhā ga. Baraki tsî Deboras tsîn ge Jehovaba ge gangan. Tsî ge xoa: ‘ǀHomma xu di ge ge ǃkham, ǀgamirode.  . . Siserab ǃoagu ge ǃkham. ǃĀrob Kisonni ge ǁîga ge dâubē.’—ǂHǂh. 5:19-21.

5. Mâ ǂhâǂhâsa ǀgaub ǃnâs Armagedonsa Baraki ge ǃkham ǃkhamsa xu nî ǀkhara?

⁵ Baraki tsî Deboras tsîn ge ǁîra mîde sao rase ge ǀam kai: ‘Nētin ge sa khākhoen hoana nîra ǀkhai, Jehovatse, Xawe ǁîba ǀnam hân, ǁîn ge sores ra ǀgaib âs ǃnâ ǁhai khami nîra ī.’ (ǂHǂh. 5:31) Armagedons tawan ge Elob di khākhoena nî hîgāgāhe xawe ǁnān hîna Eloba ǀnam hân ge nî sâu-e. Xawe ǀgui ǂhâǂhâsa xū-i ge nē ǀgam torokha ǁaegu nî ǀkhara. Armagedons tawan ge Elob khoena ǃkham tide. ǁÎn ge ǃkham-ū xūn tsîna ūhâ tide. ǁÎn di ǀgaib ge “ǃnōsase hâs” tsî Jehovab tsî ǁîb di ǀhomsi toro ǃkham-aon ai ǂgomaiǂnûisa xu nî hâ.—Jes. 30:15; J.ǂHa. 19:11-15.

6. Jehovaba tae-e a sîsen-ū ǁkhā ǁîb khākhoena Armagedons tawa hîgāgās ǃnâ?

⁶ Jehovaba tae-e a sîsen-ū ǁkhā ǁîb khākhoena Armagedons tawa hîgāgās ǃnâ? ǁÎb ge ǂgui ǃnâgu ǀgauga a sîsen-ū ǁkhā. Aiǁgauseb, ge ǃhūǂgubigu, ǃnareti tsî nabab tsîna a sîsen-ū ǁkhā. (Job. 38:22, 23; Ese. 38:19-22) ǁÎb ge ǁîb khākhoena ǁîn ǁaegu a ǃkham kai ǁkhā. (2Kro. 20:17, 22, 23) ǁÎb ǀhomǃgāgab ge sîsen-ū ǁkhā Eloxoresa khoena ǃgams ǃgao. (Jes. 37:36) Sîsen-ūb ra xū-i hoa-i ǃnâb ge Eloba nî dan. ǁÎb khākhoen hoan ge nî hîgāgā-e. Tsî ǂhanu-ain hoan ge nî sâu-e.—ǂKhm. 3:25, 26.

7-8. (a) 1 Tesalonikaǁîn 5:1-6 ǃoagu gu ǃhūbaib ǂgaeǂgui-aoga mâ ǂanǂansa nî dī? (b) Nē ǂanǂansa tae-i ǃaroma nî ǁkhōǁkhōsa i?

⁷ “ǂKhîb ge hâ tsî tsūǃgâ-i a ǀkhai” di hâ ǂanǂans ge ‘Jehovab di tsēs’ aiǃâ nî hâ. (Khomai re 1 Tesalonikaǁîn 5:1-6.) 1 Tesalonikaǁîn 5:2 tawa i ge ‘Jehovab di tsēsa’ “kai ǁgâiǀāba” ǃoa ra ǁnaeǁgau. (J.ǂHa. 7:14) Mati da nē ǁgâiǀāb go tsoatsoasa ǃkhaisa nî ǂan? Elobmîs ge ra mi ǂanǂans ge nî hâ i di. Nē ǂanǂans ge nî ǁgau kai ǁgâiǀāb go ǀgū ǃkhaisa.

⁸ Nē ǂanǂans ge “ǂkhîb ge hâ tsî tsūǃgâ-i a ǀkhai” di hâ ǂanǂansa. ǃHūbaib ǂgaeǂgui-aoga tae-i ǃaroma di nî mî? ǂGomdi ǂgaeǂgui-aogu tsîna nēs ǃnâ ǃâ-e nî ūhâ?  Nēs ge a īǁkhā. Sida ge a ǂan ǃhūbaib di ǂgaeǂgui-aogu ga ǂkhîb ge hâ tsî tsūǃgâ-i ge a ǀkhai di ǂanǂan o, ob nēba a demonga xu ra hâ ǂhumisa. Nē ǂhumib ge kaise a ǁkhōǁkhōsa khoena i ǃnōrasase ra tsâ kai amaga kai ǁgâiǀāb ǀgūǁae nî hâ hîna. ‘ǃHae ǁgaoǁgaosi i ge ǁîn ǂama nîra hā, ǀgamǀkhā hâ taras ǂaman ǁoratsûna ra hās ǁkhās khami.’ ǁNān hîna Jehovaba ǂgomǂgomsase ra ǃoaban ǀkha i tae-e nî ī? ǁÎn ge mâ ǁaeb kai ǁgâiǀāba nî tsoatsoasa a ǀū, ǁnā-amaga nî buru xawen ge nî aiǂhomisa i.

9. Jehovaba Satanni ǃhūbaiba mâ ǀgaugu ǃnâ nî hîgāgā?

⁹ Jehovab ge Satanni ǃhūbaiba hoase hîgāgā tide ǀgui ǁaeb ai Noab tsēdi ǃnâb ge dī khami. Xaweb ge ǀgui ǃâb Satanni ǃhūbaib diba ǂgurose hîgāgā tsî ega nau ǃâba nî hîgāgā. ǂGurob ge Babilons Kaisa nî hîgāgā nēs ge hoa ama tama ǂgomde ǃkhōǂgā hâ. Armagedons tawab ge nau ǃâb Satanni ǃhūbaib diba nî hîgāgā nēs ge ǂgīǂgōsi ǁaxasigu, torogu tsî ǁamaxū ǁaxasigu tsîna ǃkhōǂgā hâ. Hā re i da nēsi nē ǀgam ǂhâǂhâsa ǁaxasikha mati nî īsa ǃhoaǃgao.

10. ǂHaiǂhais 17:1, 6 tsî 18:24 ǃoagub Jehovaba tae-i ǃaroma Babilons Kaisa nî hîgāgā?

¹⁰ ‘Kai ǀai-aos.  . . di ǀgoraǃgâs.’ (Khomai re ǂHaiǂhais 17:1, 6; 18:24.) Babilons Kais ge kai ǃgôaoǃnâsiba Elob ǀons ai ra hau. ǁÎs ge ǂhumiba Elob xa ra ǁkhāǁkhā. ǁGauoǃnâ kaikhoes khami i ge ama tama ǂgomde Jehovab ǃoa-ai a ǂhauoǃnâ tsî khoesi ǂhanuga ra ǂkhâǃnâ. Ama tama ǂgomdi ge khoena ra ǁgâiǀā tsî ǁîn marina ra ū. Nē ǂgomdi ge ǂgui khoena ge ǃgam, Elob ǃoaba-aon tsîna ǃkhōǂgā hâse. (J.ǂHa. 19:2) Jehovaba mati Babilons Kaisa nî hîgāgā?

11. ‘Skarlakǀapa ǀguruba’ a tae tsî Eloba mati nē ǀguruba nî sîsen-ū Babilons Kaisa hîgāgās ǃnâ?

¹¹ Jehovab ge ‘kai ǀai-aosa’ “disi ǁnâgu” ‘Skarlakǀapa ǀgurub’ digu ǀkha nî hîgāgā.  Nē ǀgurub ge United Nationsa ra ǂnûǁkhaeba. Tsî disi ǁnâgu ge ǂhanugu hîna ǂgīǂgōsi ǃnande ra ǂkhâǃnâga ra ǂnūǁkhaeba. Elob ǁaeb ai i ge nē ǂgīǂgōsi ǃnande Babilons Kaisa nî ǁnāǂam. ǁÎn ge ǁîsa “ǁkhan tsî nîra ǀguriǃgâ kai tsî ǀōǀkhā kai” tsî ǁîs ǃkhūsis hoasa ū tsî hoa khoena nî ǁgau ǁîs a ǁgauoǃnâ ǃkhaisa. (J.ǂHa. 17:3, 16) Nē hîgāgās ge ǀgui tsēs ǃnâ nî ī tsîn ge ǁîsa ra ǂkhâǃnâ khoena kaise nî buru. Ama tama ǂgomdi ge ra mî: “Gao-aose ta ǂnôa, tsî ta ǃoatara tama, tsî ta ge tātsē ǃoa-e mû tide.”—J.ǂHa. 18:7, 8.

12. Jehovaba tae-e ǃhaode mā-am tide dīsa tsî tae-i ǃaroma?

¹² Elob ge ǃhaode ǁîb khoena hîgāgāsa mā-am tide. ǁÎb khoen ge ǁîb ǀonsa ra tani tsî Babilons Kaisa xu ǃkhoe ti hâ mîmāsa ge ǁnâuǀnam. (ǃNǃkh. 15:16, 17; J.ǂHa. 18:4) Tsîn ge nau khoen tsîna ra hui în Babilons Kaisa xu ǃkhoe. ǁNās ǀkhan ge Jehovab ǃoaba-aona ‘ǁîs di tsûtsû-aide’ hōǃâ tide. Xawe i ge ǁîn ǂgomsa noxoba nî ǃâitsâhe.

13. (a) Goga a ham? (b) Esegieli 38:2, 8, 9 ǃoagub Goga mati Elob khoena nî ǁnāǂam?

¹³ Gogi ǁnāǂams. (Khomai re Esegieli 38:2, 8, 9.) Jehovab ga ama tama ǂgomdi hoade hîgāgā o, o i ge ǀgui ǂgoms ǀguisa ǃhūbaib ai nî hâ. Jehovab ǃoaba-aon ǀguin ge nî ǃgau. Satanni ge kaise nî ǁaixa. ǁÎb ge nē ǁaiba nî ǁgau ‘ǃanuoǃnâ gagaga’ sîsen-ūs ǃnâ-ū îgu ama tama ǃnāsa ǃgāsasiba sîsen-ū hîna demonga xu ra hāba nēs ge nî ǃaroma î di ǃhaode Jehovab khoena ǁnāǂam. (J.ǂHa. 16:13, 14) Nē ǃhaodi ge “Gogi, ǃhūb Magogi dib” di ra ǂgai-e. ǃHaodi ga Jehovab khoena ǁnāǂam o, o i ge Armagedonsa nî tsoatsoa.—J.ǂHa. 16:16.

14. Goga tae-e nî mûǂan?

¹⁴ Gogi ge ǁîb di ‘ǁgansi ǁôab’ ai nî ǂgomaiǂnûi. (2Kro. 32:8) Sida Elob Jehovab ai da ge nî ǂgomaiǂnûi nēs ge ǃhaodi  xa gâresib ase nî mû-e. Babilons Kais di elogu ge ǁîsa ǃgarob “ǀgurub” tsî “disi ǁnâgu” tsîna xu ge sâu tama hâ i. (J.ǂHa. 17:16) ǁNās ǀkha di ge ǃhaode nî ǂâi sidan supuse nî hîgāgā di. ‘ǀNanudi hîna ǃhūba’ ra ǃgū-aidi axase i ge Jehovab di ǃoaba-aona nî ǁnāǂam-e. (Ese. 38:16) Xawe i ge ǃhaode nî mûǂan nēsa xūn sâusen hō tidesa. Faraob ge ǂĀxahurib tawa mûǂan khamib ge Goga nî mûǂan ǁîb Jehovab ǃoagu ra ǃkham ǃkhaisa.—Eks. 14:1-4; Ese. 38:3, 4, 18, 21-23.

15. Jesuba tae-e nî dī Armagedons tawa?

¹⁵ Xristub tsî ǁîb di ǀhomsi toro ǃkham-aogu tsîn ge Elob khoena nî ǁkhauba tsî ǃhaodi tsî ǁîn toro ǃkham-aon tsîna hoase nî hîgāgā. (J.ǂHa. 19:11, 14, 15) Tae-e Jehovab khākhoeb Satanni ǀkha nî ī hîna ge ǃhaode a ǂhumibaba tsî a dība î di ǃhaode Jehovab khoena ǁnāǂam Armagedons tawa. Jesub ge ǁîb tsî ǁîb demongu tsîna duisend kurigu ǀgaiba ǃkhōsis ǃnâ nî ū.—J.ǂHa. 20:1-3.

16. (a) Mati da nî ǁgau ‘Eloba da ǂan’ ǃkhaisa? (b) Jehovaba ǂansa mati ǀkhaeb ase nî ī Armagedons tawa?

¹⁶ Nēsi da ga amab ǃnâ ǀasa i tamas ka io ǀhapese amab ǃnâ hâ xawe da ge Armagedons tawa sâuhes ǃaroma nî ǁgau ‘Eloba da a ǂan’ tsî ‘sada ǃKhūb Jesub Xristub di ǃgâiǂhôasa ra ǁnâuǀnam’ ǃkhaisa. (2Tes. 1:7-9) ‘Eloba da ge a ǂan’ ǁîba a ǃgâiba xūn, ǁîba ǃgâiba tama xūn tsî ǁîb ǁgaragu tsîna da ga ǂan o. Tsî ǀnîhâ ǀgaub ǁîba da a ǂansa da ra ǁgaub ge ǁîba da ga ǀnam, ǁîba ǁnauǀnam tsî ǁîb ǀguiba ǀguri ǃoaba o. (1Jhn. 2:3-5; 5:3) Eloba da a ǂan ǃkhaisa da ga ǁgau o, o da ge ‘Elob xa sada tsîna nî ǂan-e’ tsîs ge nēsa Armagedons tawa nî sâu da. (1Kor. 8:3) Mâ ǀgaub ǃnâ? ‘Elob xa ǂanhes’ ge Elob xa ūǃoahes tsîna ǃkhōǂgā hâ.

17. ‘ǃKhūb Jesub.  .  .di ǃgâiǂhôasa ǁnâuǀnamsa’ tae-e ra ǂâibasen?

¹⁷ “ǃKhūb Jesub.  .  .di ǃgâiǂhôas” ge Jesub  gere ǁkhāǁkhā amab hoaba ǃkhōǂgā hâ Elobmîs ǃnâ da ra khomai khami. ǃGâiǂhôasa da ge ra ǁnâuǀnam nēsa da ga sida ûigu ǃnâ ûiǂui o. Nēs ge Gaosiba ǂgurose mâis, Elob ǁgaragu ǃoagu ûis tsî Gaosib ǃgâiǂhôasa aoǁnâs tsîna ǃkhōǂgā hâ. (Mat. 6:33; 24:14) Xristub ǂkhauhesa ǃgâsagu tsîna da ge nî ǂkhâǃnâ ǁîgu ǂhâǂhâsa ǁgaumâide gu ra dī hîna.—Mat. 25:31-40.

18. Xristub ǂkhauhesa ǃgâsaga mati ǁîgu tsîna khoexaǃnâsiba nî ǁgau?

¹⁸ Nē ǂkhauhesa ǃgâsagu ge ǀgūǁae ‘ǀnî gūna’ ǁîn di khoexaǃnâsib ǃgao nî mādawa-am. (Jhn. 10:16) Mâ ǀgaub ǃnâ? Armagedons nî tsoatsoa aiǃâ i ge 144 000 ǂkhauhesa ǃgâsana ǀhomma ǃoa gagab ase nî ī. ǁÎn ge nî ǀhommi di ǃâ i hîna Goga ra hîgāgāna tsî ‘kai ǂnubis’ Jehovab ǃoaba-aona nî ǁkhauba. (J.ǂHa. 2:26, 27; 7:9, 10) Kai ǂnubis Jehovab ǃoaba-aon ge kaise nî ǂkhî ǂkhauhesa ǃgâsanan ge ǃhūbaib ain hâ hîna gere ǂkhâǃnâ ǃkhais ǃgao.

19-20. ǃGomsina da ra hōǃâ xawe da mati ǂgomǂgomsase nî hâ Armagedons ra ǀgū khami?

¹⁹ Nē ǀuni tsēdi ǃnân ge ǂgui Jehovab ǃoaba-aona ǃgomsina ra hōǃâ. Nēs ǂamai da ge ǂkhîb ǀkha ra mâǀgai. (Jak. 1:2-4) ǀGui xū-i hîna nî huida i ge ǀgore hâse da ga hâ o. (Luk. 21:36) ǀGores ǀguisa da ge dī tide xawe Elobmîs tsîna tsēs hoasa nî ǁkhāǁkhāsen tsî ǁkhāǁkhāsen da ra xūna nî ǂâiǃgâ nēs ge hānîǁaeb xa kēbo-e hâ xūna ǁkhāǁkhāsens tsîna ǃkhōǂgā hâ. (Psa. 77:12) Nē xūna da ga dī tsî ǀoasase aoǁnâ sîsenni ǃnâ ǁhao o, o da ge sida ǂgoms tsî ǃâubasens tsîna ǀgaisase nî ūhâ.

²⁰ ǂÂi re, mati du nî ǃgâiaǂgaosa Babilons Kais ga hîgāgā-e tsîs ga Armagedonsa toa o. Tsîs ga Elob ǀons tsî ǂgaeǂguis tsîna khoen hoan xa ǃgôaǃgâsiba ǁgau-e o, os tsîna da ge kaise nî ǃgâiaǂgao. (Ese. 38:23) ǁNās ǀkhan ge ǁnān hîna Eloba a ǂan, ǁîb ǀgôaba ra ǁnâuǀnam tsî ǀams kōse ra mâǀgaina Armagedons xa a ǃgâiǂhôaba-e.—Mat. 24:13.