1. Tae-i ǃaroma da Jehovaba ǃnaga nî hâba?

JEHOVABA da ge ǃnaga nî hâba sada kuru-aob a amaga. * Nēs ǃaromab ge ǁgaraga a mā da ǁkhā tae-e da nî dīs diga. (J.ǂHa. 4:11) Xawe da ge ǀnîhâ ǂhâǂhâsa ǃaromas tsîna ūhâ Jehovaba ǁnâuǀnams diba. ǂGui kurigan ge khoena naun ǂamai gere ǂgaeǂgui. Xawe da ga ǁîn ǂgaeǂguis tsî Jehovab ǂgaeǂguis tsîna ǀgopeǀnō o, o da ge ra mû Jehovab a gā-ai, ǀnamxaǃnâ, ǀûbaǀnamxa tsî tsâbaǁhaoxasiba ūhâ ǂgaeǂgui-aosa.—Eks. 34:6; Rom. 16:27; 1Jhn. 4:8.

2. Hebreǁîn 12:9-11 sa mâ ǃaromadi Jehovaba ǃnaga hâbas dide ra mā da?

² Jehovab ge ǂhâba hâ i da ǁîba ǁnâuǀnam, ǃao bi da ra ǃkhais ǃaroma ǀguis ose xawe da a ǀnam bi tsî sada ǁgûb ase ra mû bi ǃkhais ǃaroma. Paulub sîǂkhanis hînab ge Hebreǁîna ǃoa a xoas ǃnâb ge ge ǁguiǃā hoaǁae ‘Îba.  . . ǃnaga hâba’ ǁîb sadu ‘ǂkhîxasib ǃaroma’ ra ǁkhāǁkhā du amaga.—Khomai re Hebreǁîn 12:9-11.

3. (a) Mati da ra ǁgau Jehovaba da ǃnaga ra hâba ǃkhaisa? (b) Mâ dîde da nî ǃhoaǃgao?

³ Jehovaba da ge ǃnaga ra hâba aitsama ǁhûibasens, tae-i ǃgâis tsî tae-i a tsūs turaba da ga ǃkhamǃoa o. (ǂKhm. 3:5) Jehovab ǀgaugu xa da ga ǁkhāǁkhāsen, o da ge a supubahe ǁîba ǃnaga hâbasa. Tae-i ǃaroma? Nē ǀgaugu ge ǁîb ra dī xūn hoan ǃnâ a mûhe ǁkhā. (Psa. 145:9) Jehovab xa ǁkhāǁkhāsens ǀkha da ra aiǃgû khami da ge  ǁîba ǀnamma nî omkhâiba. Tsî da ga Jehovaba nē ǀnamma omkhâiba, o da ge ǁgaragu tae-e da dī tide tsî tae-e dīs diga ǂhâ tide. Jehovab khami da ge ra ǂâi tsî tsâ ǂgao tsū xūna xu ǂgōsens ǃaroma. (Psa. 97:10) Xawe da ge ǁaen ai a ǃgombahe Jehovaba ǁnâuǀnamsa. Tae-i ǃaromasa ǁnāsa? Tsî tae-e gu ǀhaohâb ǃûi-aogu, ǁgûgu tsî ǁgûdi tsîna Nehemiab ǃhūǃkhōmâi-aob, Gao-aob Davib tsî Marias, Jesub di ǁgûs tsîn di aiǁgaude xu a ǁkhāǁkhāsen ǁkhā? Nē ǁkhāǁkhāǃâs ge nē dîde nî ǃhoaǃgao.

4-5. Romeǁîn 7:21-23 ǃoagu i tae-i ǃaroma a ǃgom ǁkhā Jehovaba ǃnaga hâbasa?

⁴ ǀGui ǃaromas hîna Jehovaba ǃnaga hâbasa ra ǃgom kais ge hoa da ge ǁoreba ge ǀumi tsî ǀoasa kurusa ūhâ tama hâ. Nēs ǃaroma i ge supu tama hâ Eloba hoaǁae ǁnâuǀnamsa. Adammi tsî Evas tsîra ge Eloba ǁnâuǀnamoǃnâ tsî ǂkhāsa haisa xu a ǂû o, o ra ge aitsama tae-i ǃgâi tsî tae-i tsūs mîǁguiga ge dībasen tsoatsoa. (Gen. 3:22) Nētsēs tsînan ge ǂgui khoena Adammi tsî Evas khami Eloba ǁnâuǀnam tama hâ tsî tae-i tsū tsî ǃgâisa aitsama ra mîǁguibasen.

⁵ ǁNān hîna Jehovaba ǀnaman tsîn ge ǁaen ai a ǃgomba-e ǁîba ǁnâuǀnamsa. Apostel Paulub tsîn ge nēsa ge hōǃâ. (Khomai re Romeǁîn 7:21-23.) Paulub khami da ge Jehovab mûǁae a ǂhanu xūna ra dī ǂgao. Xawe da ge hoaǁae ǂhanu tama xūna dīs di turaba nî ǃkhamǃoa.

6-7. ǀGamǁî ǃaromas Jehovaba ǃnaga hâbasa ra ǃgom kaisa a tae? Aiǁgau-e mā re.

⁶ ǀNîhâ ǃaromas Jehovaba ǃnaga hâbasa ra ǃgom kais ge sada ge kaikhâi ǀgaub tsî sada ǂharis ǃnâ ra hâ khoen ra ǂâi ǀgaub tsîn xa ra tsâǀkhāhe. ǂGui khoen ge Jehovab ǂâi ǀgaub ǀkha ǃgûǀhao tama hâ xūna ra mîba da, nēs ǃaroma da ge nî dītsâ i da tā nē khoen khami ǂâi. ǀGui aiǁgausa ǃoa kō re.

⁷ ǂKham khoen ge ǂgui mari-e kurus di ǁgâiǀāba ra hōǃâ. Mary di ǀon hâ ǃgâsas ge nēsa ge hōǃâ. * Jehovab xas nî ǁkhāǁkhāsens aiǃâs ge ǁîn ǃhūb ǃnâ a ǀgapi skoli tawa ge hâ i. Marys omaris khoen ge ǁîsa gere ǁgari is ǂgui mari-e ra matare sîsen-e ôa tsî nau khoen xa ǃgôasiba ǁgau-e. ǁÎs tsîn ge nēsa ge ǂhâba hâ i. Xawes ge Jehovab xa ǁkhāǁkhāsen tsî ǁîba ǀnamma omkhâiba o,os ge ǁîs ǂâi ǀgauba ge ǀkharaǀkhara. Xawe i ge noxoba ge supu tama hâ i dis ge ra mî: “ǀNî ǁaen ai ta ge ǂgui mari-e ta a kuru ǁkhā ǀgauna ra hō xawes ge nēsa Jehovaba ta ra ǃoaba ǀgausa nî tsâǀkhā. Kaikhâi ta ge ǀgaub xa tsâǀkhā-e hâse ta ge ǁaen ai noxoba hî-î di a mî ǁoa. Jehovaba ta ge ra ǀkhoma îb hui te i ta tā sîsen-i ǁîba ǃoabasa xu nî ūbē te-e ūǃoa.”—Mat. 6:24.

8. Tae-e da nēsi nî ǃhoaǃgao?

⁸ ǁKhāǁkhāsen da go khami i ge a ǃgâi sida ǂkhîxasib ǃgao Jehovaba ǃnaga hâbasa. Xawe ǁnān hîna aiǂhanuga ūhân, ǀhaohâb ǃûi-aogu, ǁgûgu tsî ǁgûdi tsîn ga Jehovaba ǃnaga hâba o, on ge nau khoena nēsa xu a ǀama ǁkhā. Hā re i da Elobmîs aiǁgaudi hîna aiǂhanuga ǃgâise sîsen-ū tsî Jehovab ǂgaoba ǂkhîǂkhîs ǀkha a huida ǁkhā ga ǃhoaǃgao.

9. Nehemiaba mâ ǃgomsina gere hōǃâ?

⁹ Jehovab ge ǀhaohâb ǃûi-aoga ǂhâǂhâsa aiǂhanuba ge mā, îgu ǁîb gūna  ǃûi. (1Pet. 5:2) ǀHaohâb ǃûi-aogu ge Nehemiab Jehovab khoen ǀkha gere hâ ǀgauba xu a ǁkhāǁkhāsen ǁkhā. Nehemiab ge Judab di ǃhūǃkhōmâi-aob ase ǂgui sîsen-e ge ūhâ i. (Neh. 1:11; 2:7, 8; 5:14) Nehemiab gere hōǃâ ǃgomsin xa ǂâi re. ǁÎb ge ge mûǂan khoen ge ǃgôasiba tempela ge ǁgau tama hâ i tsî Leviǁîn tsîna marisise ǂkhâǃnâ tama hâ i ǃkhaisa, ǂhanub gere ǂgao ǀkha khami. Jodeǁîn ge Jehovab di ǂhanub sâtsēs xa ge hâ ib tsîna ge ǁnâuǀnam tama hâ i tsî gu ge aoga nau ǃhaodi khoedi hîna Jehovaba ǃoaba tama di ǀkha gere ǃgame. ǃHūǃkhōmâi-aob Nehemiab ge nē ǃgomsiga nî kōǃgâse ge īs ge.—Neh. 13:4-30.

10. Nehemiaba ǃgomsin hînab gere hōǃâna mati ge sîsenǂam?

¹⁰ Nehemiab ge ǁîb di aiǂhanuba ge sîsen-ū tama hâ i khoena ǁgâiǀās ǃnâ, în ǁîb ǀgauba sao. ǁÎb ge Jehovaba ǃoa ǀgore tsî ǁîb huiba ǂgan tsî khoena Jehovab ǂhanuga gere ǁkhāǁkhā. (Neh. 1:4-10; 13:1-3) Nehemiab ge ǁîb ǃgâsan ǀkha gere sîsenǀhao tsî Jerusalems mirga oms ǀkha gere hui nî.—Neh. 4:15.

11. 1 Tesalonikaǁîn 2:7, 8 ǃoagu gu ǀhaohâb ǃûi-aoga, ǀhaohâb ǃgâsan ǀkha mati nî sîsen?

¹¹ ǀHaohâb ǃûi-aogu ge Nehemiab gere ǃkharu ǃnâ ǃgomsina hōǃâ tide xawe gu ge ǁîb di ǀgauga a sao ǁkhā. Aiǁgause gu ge ǃgarise ra sîsen ǃgâsana huis ǃnâ. ǁÎgu ge nau khoen xa gu ǀgapi di ǂâi tama hâ ǁîgu aiǂhanugu ǃaroma. Xawe gu ge ǀhaohâba ǀnammi ǀkha ra sîsen-ū. (Khomai re 1 Tesalonikaǁîn 2:7, 8.) ǁÎgu ge ǃgamǃgamsenxa tsî ǃgâsana a ǀnam, nēs ǃaroma gu ge ǃgâi ǀgaub ǃnâ ǁîn ǀkha ra ǃhoa. Andrewb hîna ǂgui kuriga a ǀhaohâb ǃûi-aob ge ra mî: “ǀHaohâb ǃûi-aogu ga ǃgamǃgamsenxa tsî khoexaǃnâ o, os ge nēsa ǃgâsan ǂgaoga ra tsâǀkhā. Nē ǀgaugu ge ǃgâsana ra ǂkhâǃnâ tsîn ge ǀhaohâb ǃûi-aogu ǀkha ra sîsenǀhao.” ǀNîhâ ǀhaohâb  ǃûi-aob Tony di ǀon hâb ge ra mî: “Filipeǁîn 2:3 ǃnâ hâ daoǁgausa ta ge ra sao tsî nau ǃgâsana ti xa ǂhâǂhâsase ra mû. Nēs ge ra hui te i ta tā ǃgâsana ǁgari în tita ǁnâuǀnam.”

12. Tae-i ǃaroma i a ǂhâǂhâsa i gu ǀhaohâb ǃûi-aoga ǃgamǃgamsenxasiba ūhâ?

¹² ǀHaohâb ǃûi-aogu ge ǃgamǃgamsenxasiba nî ūhâ, Jehovab ǃgamǃgamsenxasiba ūhâ khami. Jehovab a hoa xūn di kuru-ao xaweb ge ǃhūbaiba ǃoa kōǁnâ tsî “ǃharaxūsaba tsaraba xu ra “ǃkhōkhâi.” (Psa. 18:35; 113:6, 7) Jehovab ge ǁîǃgôasenxa tsî ǀgapiǂâixa khoena a ǃhuisa.—ǂKhm. 16:5.

13. Tae-i ǃaromagu ǀhaohâb ǃûi-aoga ‘ǁîgu namde nî ǃkhōǀgara?’

¹³ ǀHaohâb ǃûi-aob hîna Jehovaba ra ǁnâuǀnami ge ‘ǁîb namsa nî ǃkhōǀgara.’ Nēsab ga dī tama i o, ob ge ǁîba ǃgôasiba ǁgau tama hâ ǃgâsa i ǀkha ǃgâi tamase a ǃhoa ǁkhā. (Jak. 1:26; Gal. 5:14, 15) Andrewb hîna da ǀgapise goro ǃhoaǃgaob ge ra mî: “ǁAeb ai i ge a ǃgomba te ǃgôaǃgâsiba ǁgau te tama ǃgâsan ǀkha ǃgâi ǀgaub ǃnâ ǃhoasa. Xawe ta ge Elobmîs ǃnâ hâ ǂgomǂgomsa khoen aiǁgaudi xa ra ǂâiǃgâ tsîs ge nēsa ǃgamǃgamsenxasiba ūhâs ǀkha ra hui te.” ǀHaohâb ǃûi-aogu ge Jehovaba gu ra ǁnâuǀnam ǃkhaisa ra ǁgau ǃgâsan tsî nau ǀhaohâb ǃûi-aogu tsîn ǀkha gu ga ǀnamxaǃnâ ǀgaub ǃnâ ǃhoa o.—Kol. 4:6.

14. Jehovaba mâ aiǂhanuba ǁgûga ge mā tsî ǁîga xub tae-e ra ǃâubasen?

¹⁴ Jehovab ge ǁgûga oms danigu ase ge ǁgaumâi tsî ǂhâba hâ îgu ǁîgu ǀgôana ǁkhāǁkhā, daoǁgau tsî ǁnama. (1Kor. 11:3; Efe. 6:4) Nēs ge ǂâibasen tama hâ ǁgûgu ǁîgu aiǂhanuba mâ ǀgau i hoa-i ǃnâ a sîsen-ū ǁkhā di, ǁîgu ge Jehovab omaridi ǂnūbi-aob ǃoa-ai nî ǃeream. (Efe. 3:14, 15) ǁGûgu ge Jehovaba gu ra ǃnaga hâba ǃkhaisa ra ǁgau ǁîgu aiǂhanuba gu ga Jehovaba ra ǂkhîǂkhî ǀgaub ǃnâ sîsen-ū o. ǁÎgu ge ǂgui xūna Gao-aob Davib ûiba ôaǃnâsa xu a ǁkhāǁkhāsen ǁkhā.

15. Tae-i ǃaromab Gao-aob Daviba a ǃgâi aiǁgau hîna gu ǁgûga nî ôaǃnâ ba?

¹⁵ Jehovab ge Daviba ǁîb omaris danab ase ǀgui ge ǁgaumâi tama hâ i xawe hoa Israelǁaes di danab ases tsîna. Gao-aob Davib ge kai ǀgaiba ge ūhâ i. ǁAen aib ge ǁîb di ǀgaiba gere sîsen-ū tsî ǃgâi tama xūna gere dī. (2Sam. 11:14, 15) Xaweb ge ǁîba Jehovaba ǁnâuǀnam tsî ǁîb di daoǁgausa  ge ūǃoa. ǁÎb ge ǁîb di ǂgaoba ǀgores ǃnâ-ū Jehovab ǃoa-ai ge ǁkhowa-am. Tsîb ge ǃgarise gere dītsâ Jehovab di daoǁgaude ǁnâuǀnamsa. (Psa. 51:1-4) ǁÎb ge ǃgamǃgamsenxasib tsîna ge ūhâ i tsî aorekhoegu tamas ka io tarekhoedi xab gere mā-e daoǁgaudi tsîna gere ūǃoa. (1Sam. 19:11, 12; 25:32, 33) Davib ge ǁîb di dīsāde xu ge ǁkhāǁkhāsen tsî Jehovaba ǃoabasa ǁîb ûib ǃnâ ǂhâǂhâsa xū-i ase gere mû.

16. ǁGûga Daviba xu tae-e a ǁkhāǁkhāsen ǁkhā?

¹⁶ ǀNîhâ xūn hîna gu ǁgûga Gao-aob Daviba xu a ǁkhāǁkhāsen ǁkhān ǃoa kō re: Tā Jehovab mā du hâ aiǂhanuga ǃgâi tama ǀgaub ǃnâ sîsen-ū re. Sadu dīsāde ǂanǃgâ tsî ǁnamasa ūǃoa re. Nēsa du ga dī o, on ge sadu omaris khoena sadu ǃgamǃgamsenxasib amsi ǃgôasiba nî ǁgau du. Sadu omaris ǀkha du ga ǀgore o, Jehovaba tsâ du ra ǀgausa mîba re, nēs ǃnâ-ūn ge sadu omaris khoena nî mû Jehovab huiba du ǂhâ hâ ǃkhaisa. Hoan ǂamai sadu ǃoabas Jehovab ǃoa-ai du ūhâsa as sadu ûib ǃnâ ǂhâǂhâsa. (Deu. 6:6-9) Sadu ǃgâi aiǁgaus ge ǀkhaeb ase sadu omaris ǃgao a īǁkhā.

17. Mâ aiǂhanubab Jehovaba ǁgûde ge mā?

¹⁷ Jehovab ge mâ ǁgûs hoasa omaris ǃnâ aiǂhanuba ge mā, ǁîs di ǀgôana kōǃgâs diba. (ǂKhm. 6:20) ǁGûdi ra mî tsî dī xūn ge ǁîdi ǀgôana ǁîn di ûigu hoaga a tsâǀkhā ǁkhā. (ǂKhm. 22:6) ǁGûdi Marias Jesub di ǁgûs aiǁgausa xu a ǁkhāǁkhāsen ǁkhā xūna ǂâis ǃnâ ūhâ re.

18-19. ǁGûde tae-e Marias aiǁgausa xu a ǁkhāǁkhāsen ǁkhā?

¹⁸ Marias ge xoade ǃgâise ge ǂan i. ǁÎs ge ǃgam ǃgôasiba Jehovaba ge ūbā hâ i tsî ǃgâi ǀhōsagusis tsîna ǁîb ǀkha ge omkhâi. ǁÎs ge māsenxase Jehovab daoǁgaude ge ūǃoa, ǁîs ûiba i nî ǀkharaǀkhara se ge ī xawes tsîna.—Luk. 1:35-38, 46-55.

¹⁹ ǁGûdi ge Mariasa ǃkharagagu ǀgaugu ǃnâ a ǁgae ǁkhā. Mati di nēsa a dī ǁkhā? ǂGurose ǃgâi ǀhōsagusis Jehovab ǀkha du ūhâsa ūhâ ǀgara re, Elobmîsa ôaǃnâ tsî ǀgores ǃnâ-ū. ǀGamǁîse māsenxase ǀkharaǀkharana sadu ûigu ǃnâ dī re Jehovaba ǂkhîǂkhîs ǃaroma. Aiǁgause du ge ǃhaese ǁaixa tsî ǃgâi tama ǀgaub ǃnâ ǁîn ǀgôan ǀkha gere ǃhoa ǁgûn xa ge kaikaihe. Nēs ǃaroma du ge a ǂâi ǁkhā nēb ge a ǂhanu ǀgau ti ǀgôana kaikais diba di. ǀGôan ǀkha du nî hâ ǀgauba du ge Jehovaba xu a ǁkhāǁkhāsen xawe i ge ǁaen ai a ǃgom ǁkhā, ǃnomsa tsî ǃnūǃnâxasiba ūhâsa ǃgōsase ǀgôan ga ǃhoa du ra xūna ǃgâ ǂgao  tama i o. (Efe. 4:31) Nēti i mâsigu ǃnâ du ga hâ o, o du ge Jehovab ai ǀgores ǃnâ-ū nî ǃgâsen. Lydia di ǀon hâ ǁgûs ge ra mî: “ǀNî ǁaen ai ta ge hoaǁae gere ǀgore i ta tā ti ǀgôaba ǃoa ǁaixasa ǀgaub ǃnâ ǃhoa ǃgâ te tamab ga io. ǃHoa ta garu hîna ta ge gere ǃnō tsî ǂause gere ǀgore îb Jehovaba hui te. ǀGores ge ǃnomsasiba ra mā te.”—Psa. 37:5

20. Mâ ǃgomsina di ǀnî ǁgûde ra hōǃâ tsî nē ǃgomsina di mati a sîsenǂam ǁkhā?

²⁰ ǀNîhâ ǃgomsib hîna di ǁgûde a hōǃâ ǁkhāb ge ǁîdi ǀgôana ǁgausa ǀnam nî di a ǃkhaisa. (Tit. 2:3, 4) ǀNî ǁgûdi ge omaridi hînan ǁgûna ǃgâi ǀhōsagusisa ǀgôan ǀkha ūhâ tama hâdi ǃnâ ge kai. Sadu tsîn ga nēti kaikaihe o, tā sadu ǁgûn ge dī dīsāde sao re. ǁGûs hîna Jehovaba ǃnaga ra hâbas ge nî ǁkhāǁkhāsen mati ǀnamma ǁîs ǀgôana ǁgausa. Kaise i ge ǁîsa a ǃgomba ǁkhā ǁîs ǂâi ǀgaub, tsâsib tsî tanisen ǀgaub tsîna ǀkharaǀkharasa. Xawe nē ǀkharaǀkharan ge a dīhe ǁkhā tsî ǁîs tsî ǁîs omaris tsîna ǂkhîba a hauba ǁkhā.

21-22. Jesajab 65:13, 14 ǃoagu da Jehovaba da ga ǃnaga hâba o mâ ǀkhaega ra hōǃâ?

²¹ Gao-aob Davib ge ge ǂan i Jehovaba ǃnaga hâbas ǀkhaega ra hā-ūsa. ǁÎb ge ge xoa: “ǃKhūb di mîmādi ge a ǂhanu, tsî di ge ǂgaoba ra dâ kai. ǃKhūb di ǂnûiǂgās ge a ǃanu, tsîs ra mûde ǃnâǃnâ. Sa ǃgāb on ge ǁîna xu ra ǁnamahe; ǁîna ra ǃkhōǀgaipe-i ge kai amǃnâ-e ūhâ-e.” (Psa. 19:8, 11) Nētsē da ge ǃkharagagusib ǁnān hîna Jehovaba ra ǃnaga hâban tsî ǁnān hîna ǃnaga hâba bi tama hân ǁaegu hâba a mû ǁkhā. ǁNān hîna Jehovaba ra ǃnaga hâban ge “ǃgâiaǂgaoba xu nîra dâ.”—Khomai re Jesajab 65:13, 14.

²² ǀHaohâb ǃûi-aogu, ǁgûgu tsî ǁgûdi tsîn ga Jehovaba ǃnaga hâba o, on ge ǁîna ǃgâi ûiga ūhâ, ǁîn omaride a ǂkhî tsî ǀhaohâga ǀguiǃnâxasib tsîna ūhâ. Hoan xa a ǂhâǂhâsasen ge Jehovab ǂgaoba ra ǂkhî kai. (ǂKhm. 27:11) Nēb ge kai ǂkhîb hîna da a ūhâ ǁkhāba.