1. Apostel Johaneb di mâsib 95ǁî kurib ǀams aib gere hōǃâba ge tae-i?

APOSTEL Johaneb ge 95ǁî kurib di ǀams ai kai ǃgomsib ǃnâ ge hâ i. ǁÎb ge ǀguri kairase Patmos ailands ai ge ǁan hâ i tsî ǀguri apostelse ge ûitsama i. (J.ǂHa. 1:9) ǁÎb ge ge ǂan i ǂgaeǂkhabu-aon ama tama xūna ǁkhāǁkhā tsî ǀhaohâga ra ǀgora ǃkhaisa. ǂNubisa ge i Xristeǁi ǀhaohâgu ǀgūǁae nî hîgāgā-e khami i ge gere ǁgausen.—Jud. 4; J.ǂHa. 2:15, 20; 3:1, 17.

2. ǂHaiǂhais 7:9-14 ǃnâ i ra ǁgau-e khamib Johaneba mâ ǃgâi kēbosa ge mû? (Tsoatsoas ai hâ ai-īsiba mû re.)

² Johaneb ǁîb di ǁgâiǀāb ǃnâ hâ hînab ge Eloba ǃgâi kēbosa hānîǁaeb xa ge mā bi. Ne kēbos ǃnâ gu ge ǀhomǃgāga ra mîbahe i gu kai ǁgâiǀāb ǂoaba ǃkhō ǀgara saoǂûihe hân nî saohes kōse. (J.ǂHa. 7:1-3) Ne ǂnubis khoen ge 144 000 khoena xu a kuruǂûisa hîna Jesub ǀkha ǀhommi ǃnâ sī nî ǂgaeǂguise i na. (Luk. 12:32; J.ǂHa. 7:4) Tsîb ge Johaneba ǀnîhâ kaiǂnubis khoena ge mû tsî burub xa: ‘Kō’ ti ge mî. Johaneba tae-e ge mû? “Kai ǂnubis, khoe-i xare-i a ǃgôa ǁoas, ǀūbeǁaedi tsî ǃhaodi tsî ǁaedi tsî gowagu tsîn hoan dis ge trons tsî ǁKhaob aiǃâ ge mâ.” (Khomai re ǂHaiǂhais 7:9-14.) ǂÂi re Johaneb ge matikōse ǂkhî isa mûsa kai ǂnubis khoen hānîǁaeb ǃnâ ama ǃoabasa nî aiǃgû kai ǃkhaisa.

3. (a) Tae-i ǃaromas Johaneb di kēbosa sada ǂgomsa nî ǀgaiǀgai? (b) Tae-e da nē ǁkhāǁkhāǃâs ǃnâ nî ǃhoaǃgao?

³ ǂGomǃgâ ǁkhā da ge a ǁnā kēbos ge Johaneb di ǂgomsa a ǀgaiǀgai ǃkhaisa. Nē kēbos ge sada ǂgoms tsîna nî ǀgaiǀgai  nē kēbos ra dīǀoaǀoa-e ǁaeb ǀuni tsēdi dib ǃnâ da ûi hâ amaga. Sada ǁaeb ǃnân ge kai ǂnubis khoen hîna kai ǁgâiǀāba ûiǃkharu tsî ǀamose ǃhūbaib ai nî ûise îna ra ǀhaoǀhao-e. Nē ǁkhāǁkhāǃâs ǃnâ da ge matib ge Jehovaba 80 kurigu ǃkharu hâse kai ǂnubis khoena ǁîb khoen ǃoa-ai a ǂanǂan ǀgaus xa nî ǃhoa. ǁNāpaxū da ge ǀgam xūna nē kai ǂnubis khoen xa nî ǃhoaǃgao: (1) Nē ǂnubis khoen a kai ǀgaus (2) tsî nē ǂnubis khoen di ǃkharagagusib tsîna. Nēpa xu da ra ǁkhāǁkhāsen xūn ge nē ǂnubis ǀkhaega xu nî ǀamase i khoen hoana nî ǂkhâǃnâ.

4. Mâ amab hîna Elobmîsa xu ra ǂoaxaba di nau ǂgomde ge ǁnâuǃā tama hâ i tsî nēsa mati Elobmîs ǁkhāǁkhāsen-aona gere mâǂoa kai?

⁴ Nau ǂgomdi ge Elobmîsa xu ra ǂoaxa amab khoen ǀamose ǃhūbaib ai nî ûis diba ǁkhāǁkhā tama hâ. (2Kor. 4:3, 4) Nau Xristeǁî ǂgomdi ge ra ǁkhāǁkhā hoa ǃgâi khoen ǀhomma ǃoa ra ī di. Xawes ge nēsa ǂkhari ǃgôarob khoen hîna Elobmîsa gere ǁkhāǁkhāsen an ǃaroma ge ǀkhara i hîna Watch Tower ǂkhaniba 1879ǁî kuriba xu gere ǁgâina. ǁÎn ge gere ǁnâuǃā Elob ǁkhawa ǃhūbaiba nî paradai kai ǃkhaisa tsîn ǂgui khoen ǁnâuǀnam rana ǃhūbaib ai nî ûisa ǀhommi ǃnâs ose. Xawe i ge ǁîn tsîna ǁaeba ge ū ǁnâuǃāsa nē ǁnâuǀnamxa khoen a ham ǃkhaisa.—Mat. 6:10.

5. Elobmîs ǁkhāǁkhāsen-aona tae-e 144 000 khoen xa gere ǂgom?

⁵ Elobmîs ǁkhāǁkhāsen-aon ge ge mûǂan ǀnîn “ǃhūbaiba xu ǁamaǂuibasenhe” hâsa tsî Jesub ǀkha ǀhommi ǃnâ sī nî ǂgaeǂguisa. (J.ǂHa. 14:3) Nē 144 000 ǂgomǂgomsa ǁāǁnâsa Xristeǁîn ge ǁnān hîna Eloba ǂgomǂgomsase ra ǃhūbaib ai ǃoabana xu hâ. Tae-en kai ǂnubis khoen xa gere ǂgom?

6. Elobmîs ǁkhāǁkhāsen-aona tae-e kai ǂnubis khoen xa gere ǂgom?

⁶ ǁÎb di kēbos ǃnâb ge Johaneba ‘trons tsî ǁKhaob aiǃân mâse’ nē ǂnubis khoena ge mû. (J.ǂHa. 7:9) Nē mîdi ge Elobmîs ǁkhāǁkhāsen-aona ge ǂgom kai ǂnubis khoen 144 000 khoen khami ǀhommi ǃnâ sī nî hâ di. Kai ǂnubis khoen tsî 144 000 khoen tsîn hoan ga ǀhomma ǃoa ī o, o i mâ ǃkharagagusi-e ǁîn ǁaegu nî hâ? Elobmîs ǁkhāǁkhāsen-aon ge gere ǂgom kai ǂnubis khoen ge ǁnān hîna ǃhūbaib ain ge hâ io Eloba ǀoasase ge ǁnâuǀnam tama hâ îna xū a kuruǂûisa di. Elobmîs daoǁgauden gere sao xawen ge ǁîna noxoba ge nau ǂgomdi ǁani i. Elobmîs ǁkhāǁkhāsen-aon ge ge mûǂan nē ǃnôa khoen Eloba ǀnama ūba hâ xawe Jesub ǀkha ǂgaeǂgui ǁoa ǃkhaisa. Nē kai ǂnubis khoen di ǀnammi ge Elob ǃoa-ai ǀgaisa tama hâ i xawen ge ǀhommi ǃnâ hâs tsî trons aiǃâ hâs tsîna ge mā-amsa i xawe trondi ai ǂnûs ose.

7. Elobmîs ǁkhāǁkhāsen-aon ǃoagun hamna Xristub di ǂgaeǂguis ǁaeb ai ǃhūbaib ai nî hâ tsî ǂgomǂgomsa aogu hîna ge ûi hâ i gu xan tae-e gere ǂgom?

⁷ Hamna ǁnâi ǃhūbaib ai nî ǁan? Elobmîs ǁkhāǁkhāsen-aon ge gere ǂgom 144 000 khoen tsî kai ǂnubis khoen tsîn ga ǀhomma ǃoa ī toa on nau khoena ǃhūbaib ai hâ tsî Xristub ǂGaeǂguis ǀkhaega xu nî ǀama ǃkhaisa. Elobmîs ǁkhāǁkhāsen-aon ge ge ǂgom tama hâ i nē ǂgui khoen Jehovaba Xristub ǂGaeǂguis aisi nî ǃoaba tsoatsoa ǃkhaisa. Xawen ge gere ǂgom nē khoen Jehovab xa Xristub ǂgaeǂguis ǁaeb ǃnâ nî ǁkhāǁkhā-e di. Nēs ǃaroman  ge ǁnān hîna ǁnâuǀnamxasiba ra ǁgauna ǀamo ûiba ǃhūbaib ai nî ūhâ tsî ǁnān hîna ǁnâuǀnam tama hâna nî hîkākā-e. Elobmîs ǁkhāǁkhāsen-aon ge ge ǂâi hâ i ǀnîn nî ‘gaosise’ ǂgaeǂgui tsîn ǁnān hîna Xristub aiǃâ ge ǁōna kâisa hō tsî ǀnîn âna ǀhomma ǃoa nî ī di.—Psa. 45:16.

8. Mâ ǃnona ǃâdi khoena Elob ǂâibasens ǃnâ ǃâ-e ge ūhâ i?

⁸ Elobmîs ǁkhāǁkhāsen-aon ge ra ǂâi ǃnona ǃâde ra kuruǂûi khoen hâ di: (1) ǂGuron ge 144 000 khoen hîna Jesub ǀkha ǀhommi ǃnâ nî ǂgaeǂguise īna; (2) ǀgamǁîse, kai ǂnūbis khoen hîna kai ǀnamma Xristuba ūhâba tama hân hîna Jesub trons aiǃâ ǀhommi ǃnâ nî mâse īn; (3) ǃnonaǁîse, ǂgui khoen hîna nēpa ǃhūbaib ai Jehovab ǀgaugu ǃnâ nî ǁkhāǁkhā-ese în Xristub di duisend kurigu ǂGaeǂguis ǁaeb ǃnâ. * Xaweb ge Jehovaba ega ǁîb khoena ge hui nē xūna ǃgâise ǁnâuǃāsa.—ǂKhm. 4:18.

9. (a) Kai ǂnubis khoena mâǀgaub ǃnâ nēpa ǃhūbaib ai ‘trons tsî ǁKhaob aiǃâ nî mâ’? (b) ǂHaiǂhais 7:9 mîdi ǁnâuǃā ǀgauba tae-i ǃaroma a ǃgâi?

⁹ Jehovab di ǀHûǀguitimî-aon ge 1935ǁî kurib ǃnâ ǃgāsase ge a ǁnâuǃā kai ǂnubis khoen a ham ǃkhaisa. Jehovab di ǀHûǀguitimî-aon ge ge mûǂan kai ǂnubis khoen ‘trons tsî ǁKhaob aiǃâ mâs’ ǃaroma ǀhommi ǃnâ hâsa ǂhâsa tama hâsa. ǁÎn di aiǂhanub ge ǁgauǁgaus ase i. ǃHūbaib ain ǁan hâ xawen ge kai ǂnubis khoena ‘trons.  . . aiǃâ nî mâ’ Jehovab hoaraga ǃhūbaiba ra ǂgaeǂguis ǃnâ ǂgoms tsî ǃgôasib tsî ǁnâuǀnamxasib tsîna ǁîba ǁgaus ǃnâ. (Jes. 66:1) ǁÎn ge ‘ǁKhaob aiǃâ nî mâ’ Jesub di xoremarib ǃnâ ǂgoms ǃnâ-ū. Mateub 25:31, 32 ǃnâ i ra ǁgau-e khami di ge “hoa ǁaede” tsū khoen tsîna ǃkhōǂgā hâse Jesub trons “aiǃâ nîra ǀhaoǀhaohe.” Nēs ge ǃgāsase ra ǁgau nē ǁaedi hoadi ǀhommi ǃnâ hâ tama tsî ǃhūbaib ai hâ ǃkhaisa. Nē ǃgāsasib hîna 1935ǁî kurib ǃnâ ge ǃgāǃgā-eb ge a ǁnâuǃāxa. Nes ge ra ǁguiǃā tae-i ǃaromas Elobmîsa kai ǂnubis khoena ǀhommi ǀkha ra ī khoen ase ǁnaeǁgau tama hâsa. ǀGui ǃâb khoen ǀguin ge ǀhommi ǀkha ra ī khoen ase a ǂansa 144 000 khoena hîna ‘gao-aose tsî pristerse.  . . ǃhūbaib ai nî gaosîsena’ Jesub ǀkha.—J.ǂHa. 5:10.

10. Tae-i ǃaroma i a ǂhâǂhâsa kai ǂnubis khoen Xristub ǂGaeǂguis aiǃâ Jehovab ǀgaugu ǃnâ nî ǁkhāǁkhā-e ǃkhaisa?

¹⁰ 1935ǁÎ kuriba xūn ge Jehovab di ǀHûǀguitimî-aona ge a ǁnâuǃā kai ǂnubis khoen Johaneb ge ǁîb di kēbos ǃnâ mûn a ǂgomǂgomsa Xristeǁîsa hîna ǃhūbaib ai ǀamose ûis aiǂhanuba ūhâna. Kai ǁgâiǀāba ûi ǃkharus ǃaroman ge kai ǂnubis di khoena Jehovab ǀgaugu ǃnâ nî ǁkhāǁkhā-e Xristub di ǂGaeǂguis aiǃâ. ǁÎn ge ǀgaisa ǂgomsa nî ǁgau ‘ī nî xūn hoana’ ûi ǃkharus ǃaroma Xristub ǂGaeǂguis nî tsoatsoas aiǃâ.—Luk. 21:34-36.

11. Tae-i ǃaroman Elobmîs ǁǀkhāǁkhāsen-aona gere ǂgom ǀnîn nî ǀhommi khâisa Xristub ǂGaeǂguis tsoatsoas aiǃâ hōsa?

¹¹ Mati da ǀnîhâ ǂgomǂgomsan hîna Xristub ǂGaeǂguis ǀams ai khâisa nî hōn xa ra ǂâi? Nē ǂâiǀgaub ge 1913ǁî kurib di The Watch Tower ǂkhanib, 15 Februarib dib ǃnâ ge ǃhoaǃgao-e. ǂÂi ǁkhā da ge a, tae-i ǃaroman ǃkharu ge ǁaeb di ǂgomǂgomsa Xristeǁîna ǃhūbaib khâisa nî hō tsî ama ǀnammi tsîna ge ǁgau tama hâ i Xristeǁîna ǀhommi khâisa? Nē ǂâiǀgaub  ge ǀgam ama tama ǂâiǀgaukha xa gere ǂkhâǃnâ-e: (1) kai ǂnubis khoen ge ǀhommi khâisa nî hō (2) tsî nē ǂnubis khoen ge ǀgaisa ǂgomsa ūhâ tama hâ Xristeǁîna xu nî hâ.

12-13. Tae-en ǂkhauhesa ǃgâsan tsî kai ǂnubis khoen tsîna ǁîn di mādawa-ams xa a ǂan?

¹² Mû da go khami 1935ǁî kurib ǃnân ge Jehovab di ǀHûǀguitimî-aona ge ǁnâuǃā Armagedons ûi ǃkharu-aon Johaneb ge ǁîb kēbos ǃnâ a mû kai ǂnubis khoe ǃkhaisa. ǁÎn ge “kai ǁgâiǀāba” nēpa ǃhūbaib ai nî ûi ǃkharu ‘tsîn ge kai dommi ǀkha ǂgai tsî nî mî: ǃGâiǃōba ab sida Elob, trons ai ǂnôab di, tsî ǁKhaob di.’ (J.ǂHa. 7:10, 14) Xoadi ge ra ǁgau ǁnān hîna ǀhomsi khâisa nî hōse īn “ǃgâi xū-e” ra hōsa ǂgomǂgomsa khoen ǃkharu ge ǁaeb din xa. (Heb. 11:40) Sada ǃgâsan ge ǁkhoaǂgaosib ǀkha khoena ge ǁkhau tsoatsoa în Jehovaba ǃoaba ǃhūbaib ai ǀamose ûis di mûǂûib ǀkha.

¹³ Kai ǂnubis khoen ge ǁîn di ǃâubasens ǃnâ kai ǂkhîba ūhâ. ǁÎn ge ra ǁnâuǃā Jehovab ra ǁhûisa ǁîb ǂgomǂgomsa ǃoaba-aon ǁîba māpaxū nî ǃoaba ǃkhaisa ǀhommi ǃnâs kas ǃhūbaib ais kas hoasa. ǂKhauhesa ǃgâsan tsî kai ǂnubis khoen hoan tsîn ge ra mûǂan ǁîn di aiǂhanub Jehovab ūba nî hâ kai ǀnammi hînab ge Jesub Xristub di xoremarib ǃnâ-ū a ǁgaub xa ra īǁkhā kaihesa.—Rom. 3:24.

14. 1935ǁÎ kurib ǀams ain tae-i ǃaroma ǂguina gere ǂhâ kai ǂnubis xa hâ kēbos mati nî dīǀoaǀoahe ǃkhaisa?

¹⁴ 1935ǁÎ kurib ǃnân ge Jehovab di khoena ǃgāsa ǁnâuǃāba hōs khaoǃgân ge ǂguina noxoba gere ǂhâ, ǃhūbaib ai hâs aiǂhanuba ūhâ khoen mati nî ǂguiǂguisensa. Aiǁgause, Ronald Parkini ge ge 12 kurixa i kai ǂnubis khoen ǃgāsasib ge ǂoaxa o. ǁÎb ge ra mî “ǁnā ǁaeb ain ge 56 000 aoǁnâ-aona ǃhūbaib ǂhawase ge hâ i tsî ǂguin ân ge ge ǂkhauhesa ǃgâsa i. Nēs ǃaroman ge kai ǂnubis khoena ge ǂgui tama hâ i.”

15. Kai ǂnubis khoena ǀhaoǀhaos di sîsenna mati ge aiǃgû?

¹⁵ Sao ra kurigu ǃnân ge sîsabena ǃkharagagu ǃhūga ǃoa ge sîǂûihe tsîn ge Jehovab di ǀHûǀguitimî-aona ǁaeb ǀkha ge kai. Tsî 1968ǁî kurib ǃnân ge Elobmîs ai ǃgaoǃgaosa ǁkhāǁkhāde ge mā tsoatsoa The Truth That Leads to Eternal Life di hâ ǂkhanisa xu. ǃGāsa ǀgaub Elobmîs amab diba ǁguiǃās dib ge ǂgui khoena Jehovaba ǃoa ge ǂgae. Haka kurigu ǃnân ge 500 000 xa ǃnāsa ǁkhāǁkhāsabena  ge ǁāǁnâhe. Katolik Kerkheb ge ǁîb di ǃgaeǀhaode Latin Amerikab tsî nau ǃhūgu tsîn ǀkha ǂoaǃnâ tsoatsoa o, ob ge sada sîsena Europi tsî Afrikab tsîn ǃnâ ge mā-amhe tsoatsoa tsîn ge miliun di khoena ge ǁāǁnâhe. (Jes. 60:22) Jehovab ǀapeǂhumis ge ǂgui ǃgâi ǂkhanina ge māǂûi hîna khoena Elobmîsa ǁkhāǁkhāsens ǀkha ra huina. ǃGāsa i ge a kai ǂnubis khoen ǁkhaisa miliuns din ge ǀhaoǀhaohe ǃkhaisa.

16. Mâpa xūn nē kai ǂnubis khoena ra ǀhaoǀhaohe?

¹⁶ ǁÎb kēbos xab gere xoa o, ob ge Johaneba ge mî nē kai ǂnubis khoen ge hoa ‘ǃhaodi tsî ǁaedi tsî gowagu tsîn’ hoana xū nî hâ di. Kēbo-aob Saxariab tsîn ge nēs xa ge mî: “ǁNā tsēdi ai i ge nîra ī, disi khoegu mâ gowa-i ǃhaodi di-i hoa-i digu nî saraǀam-i Jodeǁî khoeb di-e ǃkhō tsî mî ǃkhaisa: Sige ge sadu ǀkha nî ǃgû, Elob sadu ǀkha hâ, ti ge go ǁnâu xui-ao.”—Sax. 8:23.

17. Tae-e ge dī-e hoa ǃhaodi tsî gowagu khoena huis ǃaroma?

¹⁷ Jehovab di ǀHûǀguitimî-aon ge ge mûǂan hoa ǃhaodi khoena ǀhaoǀhaohes ǃaromas ǃgâiǂhôasa hoa gowagu ǃnâ nî aoǁnâ-e ǃkhaisa. Elobmîs ai ǃgaoǃgaosa ǂkhanina da ge 130 kuriga gere dī  xawe da ge nēsi nēsa kaise kai ǀgaub ai ǂgui gowagu ǃnâ ra dī. ǃGāsaseb ge Jehovaba sada ǁaeb ǃnâ buruxa sîsen-e ra dī kai ǂnubis di khoena hoa ǃhaode xu ǀhaoǀhaos ǃnâ. Elobmîs tsî Elobmîs ai a ǃgaoǃgaosa ǂkhanin ǂgui gowagu ǃnâ hâ amagan ge nē ǂnubis khoena Jehovaba ǀguiǃnâxasib ǃnâ a ǃoaba ǁkhā ǃkharagagu ǃhaode xūn ǃhūbaib ǂhawase ra ǀkhī xawe. Tsî Jehovab di khoen ge ǁkhoaǂgaosib ǀkha aoǁnâs tsî ǁîn di ǃgâsa ǀnamgusib tsîn ai a ǂansa. Nēs ge sada ǂgomsa ra ǀgaiǀgai.—Mat. 24:14; Jhn. 13:35.

18. (a) Jesajab 46:10, 11 ǃoagu da tae-i ǃaroma buru tama hâ Jehovab kai ǂnubis di kēbosa ge dīǀoaǀoa o? (b) ǁNān hîna ǃhūbaib ǃâubasensa ūhâna tae-i xa xū-en ra ǂoaǃnâ khami tsâ tama hâ?

¹⁸ Kaise da ge a ǂkhî kai ǂnubis di kēbos xa. Buru tama da ge hâ Jehovab ge nē kēbosa nēti i ǃgâi ǀgaub ǃnâ dīǀoaǀoa o. (Khomai re Jesajab 46:10, 11.) Kai ǂnubis khoen ge ǃâubasens hînab ge Jehovaba a mā nîs xa a ǂkhî. ǁÎn ge xū-en ra ǂoaǃnâ khami tsâ tama hâ ǂkhauhesa ǃgâsan hîna Elob xa ǁhûihe hân Jesub ǀkha ǀhommi ǃnâ ǃoabas ǃaroman di ǃâ taman hâ xawe. Xoadi ǃnâ da ge ǂgomǂgomsa aogu tsî taradi tsîn xa ra khomai hîna ǃanu gagab xa gere daoǁgau-ena xawe ge ǁîna 144 000 ǃgâsan di ǃâ tama hâna. Johaneb ǁĀǁnâ-aob di aiǁgaus ge a ǀgui. (Mat. 11:11) Davib dis ge a ǀnî. (ǃNǃkh. 2:34) ǁÎkha tsî ǀnî hâ ǂguin tsîn ge paradais ǃhūbaib ai khâisa nî hō. ǁÎn tsî kai ǂnubis khoen hoan tsîn ge aiǂhanuba nî ūhâ ǂgomǃgâsiba Jehovab ǂgaeǂguis ǃoa-ai ǁgaus diba.

19. Johaneb kēbos kai ǂnubis khoen dis xa hâsa da ga ǁnâuǃā o, o da tae-e nî dī?

¹⁹ Nēs ge a ǂguro ǃnā hînab Eloba ǀguiǃnâxasib ǃnâ hoa ǃhaode xū khoena ǀhaoǀhao hâsa. Nēsi da ga ǀhommi tamas ka io ǃhūbaib ǃâubasensa ūhâ xawe da ge hoa da ǂgui khoena ra hui ǂgao în ‘nau gūn’ di ǃâ kai. (Jhn. 10:16) ǀGūǁaeb ge Jehovaba kai ǁgâiǀāb hînab ge mîmâiba nî hau ǂhanugu tsî ama tama ǂgomdi hîna khoena kai ǃgomsiba ra ǃaromabade hîgāgās ǃaroma. ǂOaǂamsa aiǂhanub ge kai ǂnubis di khoena ǃâu hâ Jehovaba ǀamose ǃhūbaib ai ǃoabas diba.—J.ǂHa. 7:14.