ǁKHĀǁKHĀǃÂS 38
“Tita ǃoa hā re. . . o ta ge tita nî khoakhoa du”
“Tita ǃoa hā re ǀhupu hâdu tsî ǃhaohe hâdu hoado, o ta ge tita nî khoakhoa du.”—MAT. 11:28.
17ǁÎ ǁNAETSANAS “ǂGao ta ra”
ǃKHŌǀHAOS *
1. Mateub 11:28-30 ǃnâ da ra mû khamib ge Jesuba mâ mîmâisa dī?
JESUB ge ǂoaǂamsa mîmâisa ǁîba gere ǃgâ ǂnubis khoena ge mîmâiba. “Tita ǃoa hā re” “o ta ge tita nî khoakhoa du” tib ge ge mî. (Khomai re Mateub 11:28-30.) Nē di ge mîs ǀguisa ge hî tama hâ i. Aiǁgause ǂâi re tae-eb ge ǀaesen ge hâ i kaikhoesa a dībasa.
2. Jesuba ǀaesen hâ kaikhoesa tae-e ge dība?
2 Kaikhoes ge ǁgariǁgarisase huiba ge ǂhâ hâ i. ǁÎs ge ǂgui ǀaeǃkhō-aoga ǃoa gere ī ǂgauǂgauhe ǂgaos gere amaga. ǁÎs ge 12 kuriga nē ǀaeba ge ūhâ i xawe noxoba huiba ge hō tama hâ i. Moseb ǂhanub ǃoagus ge ǁîsa ge ǃanuoǃnâ i. (Lev. 15:25) Xawes ge ge ǁnâu Jesub ge ǁnān hîna ǀaesen hâna ra ǂgauǂgau di os ge ǁîba sī gere ôa. ǁÎbas ge ǀhao-ū o, os ge ǁîb sarab ti ǃâro-e ge tsâǀkhā tsîs ge ǃhaese ge ǂgau. Jesub ge ǁîsa ǂgauǂgaus ǀguisa ge hî tama hâ i xawes ge ǀnam-es a tsî ǃgôaǃgâsiba ūbahe hâ khami ge tsâ tsoatsoa. Aiǁgause Jesub ge ǁîs ǀkhab gere ǃhoa o, o ‘ǀgôase’ di mîs ǃnâ-ū ǃgôaǃgâsiba ge ǁgau. Nē kaikhoes ge khoakhoahe tsî ǀgaiǀgaihe hâse gere tsâ.—Luk. 8:43-48.
3. Mâ dîde da nî ǃeream?
3 Mû da rases ge kaikhoesa Jesuba ǃoa ge ī. ǁÎs ge ǂgurose ge ǁgūtsâ ǁîba ǃoa sīsa. Nēs ge sida ǀkhas tsîna a ǀgui sida tsîn ge nî ǁgūtsâ Jesuba ǃoa ‘ǀgūsa.’ Jesub ge nēsi khoen hîna ǁîba ǃoa ra ‘ǀgū’ hîna ǀaesen hâna ǂgauǂgau
tama hâ. Xaweb ge ǁîna ra mîba: “tita ǃoa hā re. . . o ta ge tita nî khoakhoa du.” Nē ǁkhāǁkhāǃâs ǃnâ da ge koro dîde nî ǃeream: Mati da Jesuba ǃoa nî ‘ǀgū’? Jesuba tae-e gere ǂâibasen: ‘Ti ǃnaoba ūkhâi re’ tib ge mî o? Tae-e da Jesuba xu nî ǁkhāǁkhāsen? Tae-i ǃaroma i sîsenni hînab ge Jesuba a mā da-e ra khoakhoa da? Tsî mati da nî aiǃgû Jesub di sîsenni ǃnâ khoakhoahesa?“TITA ǃOA HĀ RE”
4-5. Mâ ǀgaugu ǃnâ da Jesuba ǃoa a ‘ǀgū’ ǁkhā?
4 ǀGui ǀgaub Jesuba ǃoa da a ‘ǀgū’ ǁkhāb ge ǁîb gere mî tsî dī xūna ǁkhāǁkhāsens ǃnâ-ū. (Luk. 1:1-4) Elobmîs tae-e Jesub xa ra mîba da ǃkhaisa da ge aitsama nî ôaǃnâ. Jesuba ǃoas tsîna da ge ra ‘ǀgū’ ǁāǁnâhesa da ga mîǁgui tsî Xristub di ǁkhāǁkhāsabe kai o.
5 ǀNîhâ ǀgaub Jesuba ǃoa da ra ‘ǀgūb’ ge ǀhaohâb ǃûi-aoga ǃoa da ga ī o huiba da ga ǂhâ ǁaeb ai. Jesub ge “khoena māde ge mā” nē aogu ǃnâ-ū îgu ǁîb gūna kōǃgâ. (Efe. 4:7, 8, 11; Jhn. 21:16; 1Pet. 5:1-3) Sida ge ǂgurose nî ǁgūtsâ ǁîgu huiba ǂgansa. Tā da ge nî ǂâi ǀhaohâb ǃûi-aogu sida ra ǂâi xūn tsî sida ǂhâsigu tsîna a ǂan ǃkhaisa. Julian di ǀon hâ ǃgâsab ge ra mî: “Betelsa xu ta ge ǀaeb mâsib ǃgao ge ī xaweb ge ti ǀhōsab ǀguiba ge mî î ta ǀhaohâb ǃûi-aoga ǂgan îgu sari te tsî ǂkhâǃnâ te. ǂGuro ta ge nēsa ta ǂhâ tama hâ khami gere tsâ. Xawe ta ge ega huiba ge ǂgan tsî i ge nē sarisa kaise ge ǂoaǂamsa ǀkhae i hîna ta ge hōba.” ǂGomǂgomsa ǀhaohâb ǃûi-aogu Juliana ge sari hâ îgu khami īgu ge nî huida i da ‘Xristub ǂâisa ǂan’ tsî ǁîb khami ǂâi tsî tanisen tsoatsoa. (1Kor. 2:16; 1Pet. 2:21) Nē ǀgaub ǃnâ gu ga huida o, ob ge nēba kaise ǂoaǂamsa ǀkhae hîna gu ra mā daba.
‘TI ǃNAOBA SADU AI TANI RE’
6. Jesuba tae-e gere ǂâibasen: ‘ūkhâi ti ǃnaoba’ dib ge mî o?
6 Jesub ge “ūkhâi ti ǃnaoba” di a mî o, ob ge ǀnîsi gere ǂâibasen i da ǁîb “ǂgaeǂguisa ūǃoa.” Tamas ka iob ge ǀnîsi gere ǂâibasen ‘ūkhâi ti ǃnaoba îda ǀguiba Jehovaba ǃoaba’ di. Nē ǀgam ǂâibasen ra hoara ge sîsen-e ǂgaoǀkhā hâ.
7. Mateub 28:18-20 ǃoagu da mâ sîsen-e mā-e hâ dīsa tsî nēsa xu da tae-e nî ǃâubasen?
7 Jesub ǁkhauǂuisa da ge ra ūǃoa sida ûiga da ga Jehovaba ǃoa māǁnâ tsî ǁāǁnâhe o. Nē ǁkhauǂuis ge hoa khoen ǃaroma hâ Jesub ge Jehovaba ǂgaoba xu ra ǃoaba ǂgao khoe-e ǂkhābē tide. (Jhn. 6:37, 38) Xristub saosaben hoan ge aiǂhanuba ūhâ Jehovab ge Jesuba a mā sîsenni ǃnâ ǁhaos diba. ǂGomǃgâsiba da ge nî ūhâ Jesub hoaǁae sida ǀkha nî hâsa nē sîsen-e dīǀoaǀoas ǃnâ.—Khomai re Mateub 28:18-20.
“Î TITA XU ǁKHĀǁKHĀSEN”
Nau khoena khoakhoa re Jesub gere dī khami (8ǁÎ-11ǁî xoaǀgorade mû re) *
8-9. ǃGamǃgamsenxa khoena tae-i ǃaroma Jesuba ǃoa ra ǀgū ǂgao tsî mâ dîde da nî dîsen?
8 ǃGamǃgamsenxa khoen ge Jesuba ǃoa gere ǂgae-e. (Mat. 19:13, 14; Luk. 7:37, 38) Tae-i ǃaroma? Jesub tsî Farisegu tsîn ǁaegu hâ ǃkharagagusib xa ǂâi re. Nē ǂgomdi ǂgaeǂgui-aogu ge ge ǀnamoǃnâ tsî ǀgapiǂâixa i. (Mat. 12:9-14) Farisegu ge ge kai ǂgaoxa i tsî ǀgapi ǃkhaiga ǀhûhâsib ǃnâ gere ôa. Jesub ge ge mî nē ǀgaub ge ǃgâi tama hâ di tsî ǁîb ǁkhāǁkhāsabega ge ǁkhāǁkhā îgu ǃgamǃgamsenxa tsî nau khoena ǃnaga hâba. (Mat. 23:2, 6-11) Farisegu ge khoena gere gaoǂam, ǂan gu ge i amaga khoen ge gere ǃao tae-i ǁîn ǀkha nî īsa Farisegan ga ǁnâuǀnam tama io. (Jhn. 9:13, 22) Jesub ge ǀnamxaǃnâ tsî khoexaǃnâ mîdi ǃnâ-ū khoena gere khoakhoa.
9 Sao ra xūna du ge Jesuba xu ǁkhāǁkhāsen? Dîsen re: Khoena tsauraǂgaoxa tsî ǃgamǃgamsenxa khoe-i ase ra mû te? Nau khoena ǃnaga ra hâba sîsena ta ra dī? Nau khoen ǃoagu ta a khoexaǃnâ?
10. Jesub ǀkha gere sîsen khoena mati gere tsâ ǁîb ǀkha sîsens xa?
10 Jesub ge ǃnomsa tsî ǃgâi ǀgaub ǃnâ khoen ǀkha gere sîsen tsî ǁîna ǁkhāǁkhās xa ge ǃgâibahe i. (Luk. 10:1, 19-21) Jesub ge ǁîb ǁkhāǁkhāsabega gere ǂkhâǃnâ îgu dîde dî tsî ǁîgu ra ǂâi ǀgauba gere ǁnâu ǂgao. (Mat. 16:13-16) Haidi hîna ǁgai ǂoab mâsiba xu ǁkhaubahe tsî ra kai di khami i ge Jesub ǁkhāǁkhāsabena ge kai. ǁÎn ge Jesub gere ǁkhāǁkhā xūna ǃgaoǃgâ tsî ǃgâi ǂûna ge tani.
11. Mâ dîde da nî dîsen?
11 Khoena mûǂams di aiǂhanuba du ūhâ? Ūhâ du ga o, o dîsen re: ‘Nau khoena ta mati ra hâ-ū sîsenni tawas tamas ka io oms tawa? ǀGuiǃnâxasiba ta ra omkhâi? Khoena ta ra ǂkhâǃnâ în dîde dî? Tsî ǁîn ra ǂâi ǀgauba ra ǃgâ?’ Farisegu khami da ge ī ǂgao tama hâ. ǁÎgu ge gere ǁaixa khoen ge ǁîgu ra mî xūna ǂgom tama i tsî ǁîn ra ǂâi ǀgauba gere ǁgâiǂnûisen o.—Mrk. 3:1-6; Jhn. 9:29-34.
Nau khoen xa supu ǀgaub ǃnâ ǃhoa-ūhe re
ǁKhoaǂgaosiba ūhâ re
ǃGamǃgamsenxasiba ūhâ re tsî ǃgarise sîsen re *
‘KHOAKHOAHE DU GE NÎ’
12-14. Tae-i ǃaroma i Jesub ge mā da sîsen-e ra khoakhoa da?
12 Tae-i ǃaroma da Jesub ge mā da sîsen-e da ga dī o, o ra khoakhoahe? ǂGui ǃaromadi ge hâ xawe da ge ǀoro di ǀguide nî ǃhoaǃgao.
13 ǂOaǂamsa mûǂam-aoga da ge ūhâ. Jehovab sida ǀGapi mûǂam-aob ge ǁîb ǃoaba-aon ǀkha ǃgâi tama ǀgaub ǃnâ hâ tama hâ. ǁÎb ge sida ra dī sîsen-e ra ǃgôaǃgâ. (Heb. 6:10) Tsîb ge ǀgaiba ra mā da î da ǁîb ge mā da sîsen-e dīǀoaǀoa ǁkhā. (2Kor. 4:7; Gal. 6:5) Jesub sida Gao-aob ge ǃgâi aiǁgausa ge mā da mati da nau khoen ǀkha nî hâ ǀgaus ǃnâ. (Jhn. 13:15) Tsî ǀhaohâb ǃûi-aogu hîna sida ra kōǃgâ gu ge Jesuba ra ǁgae ‘kai ǃûi-aoba.’ (Heb. 13:20; 1Pet. 5:2) ǁÎgu ge ra dītsâ khoexaǃnâsib, ǂkhâǃnâs tsî ǁkhoaǂgaosib tsîna ǁgausa sida gu ra kōǃgâ tsî daoǁgau hîna.
14 ǂOaǂamsa ǀhōsana da ge ūhâ. Khoe-i ge a ǀkhai hîna sida khami ǀnamxaǃnâ ǀhōsan tsî ǂâibasensa ūhâ sîsenni tsîna ūhâ-e. ǃGâsan hîna ǃgâi tanisen ǀgauba ūhâ tsî ǀgapiǂâixa tama hân ǀkha da ge ǀguiba ra sîsen. ǁÎn ge ǂgui ǁkhāsigu tsî ǂans tsîna ūhâ xawen ge nēs ǀkha koasen tama hâ. ǁÎn ge sida sîsenǀhao-aon ase ǀgui mû tama hâ xawe ǀhōsan ases tsîna. ǁÎn sida ūba hâ ǀnammi ge kaise a ǀgaisa ǁîn ûigan sida ǃgao nî mās kōse.
15. Sîsen-i hîna da ra dī i xa da mati nî tsâ?
15 Kaise ǂoaǂamsa sîsen-e da ge ūhâ. Jehovab xa hâ amaba da ge khoena ra ǁkhāǁkhā tsî ǁGâuab di ǂhumiba ǁîna ra ǂanǂan. (Jhn. 8:44) ǁGâuab ge khoena ǂhumib ǀkha ra ǁgâiǀā hîna ǁîna xūose ra tsâ kaiba. Aiǁgauseb ge ǁîba ra ǂgom kai da Jehovab sida ǁoren ǃgao ǀûba da tide tsîb ǁîba sida ǀnam tama hâ di. Nē ǂhumib ge kaise a ǁgai tsî khoena ra ǂkhabuǂâi kai. Xristuba ǃoa da ga ‘ǀgū’ o, on ge sida ǁorena ra ǀûbahe. Tsî Jehovab ge hoa da kaise a ǀnam. (Rom. 8:32, 38, 39) Kaise da ge ra ǃgâiaǂgao khoena da ga hui o în Jehovab ai ǂgomaiǂnûi tsî ǁîn ûigu ǃnâ ǀkharaǀkharana dī.
AIǃGÛ RE JESUB DI ǃNAOB ǃNĀGA KHOAKHOASA HŌS ǀKHA
16. Jesub ge mā da ǁgaumâisa mâǀgaugu ǃnâ nau ǁgaumâide xu ra ǀkhara?
16 Jesub ge mā da ǁgaumâis ge ǂgui ǀgaugu ǃnâ nau ǁgaumâide xu ra ǀkhara. Aiǁgause tsēs ǀams ai sîsen-e xun ga ǀkhī o, on ge ǂgui khoena tsauhâses tsî ǂkhîoǃnases tsîna ra tsâ. Xawe sida ge Jehovab tsî Xristub tsîna da ga ǃoaba o, o kaise ra ǃgâiaǂgao. Kaise da ge ra tsau i tsēs ǀams ai xawe da ge ra ǁgūtsâ i da ǀhaohâb ǀhaode ǃoa ī. ǂGui ǁaegu ai da ge nē ǀhaode xu khoakhoahe hâse ra oaǀkhī. Nēs ge aoǁnâ sîsen i tsî Elobmîsa ôaǃnâs ǀkhas tsîna a ǀgui nēsa da ga dī o, os tsîna da ge khoakhoahe hâse ra tsâ.
17. Tae-e da sida mâsib xa nî mûǂan tsî nēs xa da tae-i ǁkhōǁkhōsasiba ǂâis ǃnâ nî ūhâ?
17 Mûǂan da ge nî hoa da ge ǀgui ǃnôa ǁkhāsiga ūhâ tama hâ di. ǁNās ǃaroma da ge xū-e da nî dīs aiǃâ aibe ǃamkuse nî ǂâiǃgâ. Aiǁgause da ge sida ǁkhāsiba a sîsen-ū ǁkhā ǃhūbaib xūna ôas ǃnâ. Kō re Jesub ge tae-e ǂkham ǃkhū hâ khoeba a mîbasa dîb ge o: “Tare-e dī tsî ta ǀamo ûiba nî ǀumi?” Nē ǂkhamkhoeb ge ǀnai ǂhanuba gere ǁnâuǀnam. Nē khoeb ge ǀnîsi ge ǃgâi khoe-i Markub di ǃGâiǂhôas ǂkhanis ǃnâ i a xoasa amaga Jesub ge ǁîba ge “ǀnam” di. Jesub ge nē ǂkham ǂgaeǂgui-aoba ǁkhauǂuisa ge mā. Jesub ge ge mî, “ǃGû, î ūts hân hoana ǁamaxū” “î tita sao.” Nē khoeb ge Jesuba gere sao ǂgao xaweb ge ǁîb ‘ǂgui xūn’ hoana ge ǁnāxū ǂgao tama hâ i. (Mrk. 10:17-22) Nēs xa ǃaroma-e hâseb ge Jesub di ǁkhauǂuisa ge ǂkhā tsî ‘ǃkhūsisa ge ôa ǀgara.’ (Mat. 6:24) Sado mâ mîǁguiba ga dī hâ?
18. Tae-e da ǁaeba xu ǁaeb ǀkha nî dī tsî tae-i ǃaroma?
18 ǁAeba xu ǁaeb ǀkha tae-e da sida ûigu ǃnâ ǂgurose ra mâis xa ǂâis ge a ǃgâi. Tae-i ǃaroma? Nēs ge nî huida i da sida ǁkhāsib hîna da ūhâba ǃgâise sîsen-ū. Kō re ǂkhamkhoeb hîna Mark di ǀon hâb tae-e ra mîsa: “Tita ge ǂgui kuriga ge ǂâi hâ i ǀguiǃgupu ûiba ta ūhâ ti. Aimâba-ao sîsen-e ta ge gere dī xawe ta ge hoaǁae mari i xa ǀgui gere ǂâi tsî mati ta ǃgâi ûiba nî ūhâs tsîna. Ti ûib ge tae-i ǃaroma nēti a ǃgomsa ta ge gere ǂâi. Xawe ta ge ge mûǂan ti ǂhâsiga ta ǂgurose ra mâisa tsî Jehovaba nau ra ǃgau ǁkhāsiba ra mā ǃkhaisa.” Marki ge ǀkharaǀkharana ǁîb ǂâiǀgaub tsî ûib tsîn ǃnâ ge dī îb ǃnāsase Jehovab di ǃoabas ǃnâ dī ǁkhā. Marki ge ra mî “ǀnî ǁaegu ai ta ge ra ǂkhabuǂâi” xawe “Jehovab tsî Jesub tsîn di huib ǀkha ta ge ti ǃgomsina a sîsenǂam ǁkhā.”
19. Tae-i ǃaroma i ǂhanu ǂâiǀgauba ūhâsa a ǂhâǂhâsa?
19 Jesub ǃnaob xa da ge nî khoakhoahe ǃnona xūna da ga dī ǀgara o. ǂGurose ǂhanu ǂâiǀgauba ūhâ re. Jehovab sîsen-e da ge ra dī ǁnās ǀkha i ge Jehovab ǀgaub ai nî dī-e. Sida ge sîsen-ao tsî Jehovab ge a ǀhōnkhoe. (Luk. 17:10) ǁÎb sîsen-e da ga sida ǀgaub ai dī o, o da ge nēsa sida ǃgao nî ǃgom kai. ǀGaisa gomab tsîn ge kaise ra tsau kaisen ǁîb di ǀhōnkhoeb di daoǁgausab ga sao tama io. Xawe da ga Jehovab ǀgaub ai ǁîb sîsen-e dī o, o da ge dīhō ǁoa da go i xūn tsîna a dīhō ǁkhā tsî ǃgomsin tsîna a mâǃoa ǁkhā. ǂÂis ǃnâ ūhâ re khoe-i ge Jehovab ǂâisa dīǀoaǀoahesa a ǁkhae ǁoa di.—Rom. 8:31; 1Jhn. 4:4.
20. Tae-i xa ǂkhâǃnâ-e hâse da Jesuba ǃoa nî ǀgū?
20 ǀGamǁîse ǂhanu ǃaromas ǃgao nē sîsen-e dī re. Sida mîǁguib ge Jehovab Jhn. 6:25-27, 51, 60, 66; Fil. 3:18, 19) Xawe ǁnān hîna ge Eloba ǀnam i tsî ǁîn di ǀgūkhoen tsîna ǀnam în ge nē sîsenni ǃnâ ge hâ ǀgara ǁîn ûib hoaba ǃhūbaib ai tsî ǀhommi ǃnâ Xristub ǀkha ǂgaeǂguis ǃâubasensa ge ūhâ i. ǁÎn khami da ge sida tsîna ǂkhîba nî ūhâ Jesub ge mā da sîsen-e da ga ǃgâi ǃaromas ǃgao dī o.
sida ǀnamxaǃnâ ǁGûba ǂkhaisiba māsa. Jesub tsēdi ǃnâ ge hâ i khoen ge kaiǂgaoxasib tsî ǁîǀnamsenxasib tsîn xa gere ǂkhâǃnâhe tsî nēs xa ǃaroma-e hâse Jesuba xu ge ī. (21. Mateub 6:31-33 ǃoagu da Jehovaba xu tae-e nî ǃâubasen?
21 ǃNonaǁîse ǂhanu ǃâubasensa ūhâ re. Sida ge aitsama māǁnâsens tsî ǃgarise ra sîsen-e ûiba ge ǁhûi. Jesub ge ge ǃkhâikhom da mâǃoa-e da nî di. Xawe da ge a ǂan Jehovab ge ǂhâ da hâ ǀgaiba nî mā da nē ǃgomsina mâǃoas ǃnâ. Mâǀgai da ra khami da ge ǀgaiba nî hō. (Jak. 1:2-4) ǂÂis ǃnâs tsîna da ge nî ūhâ Jehovab ge ǂhâ da hâ xūna nî mā da, Jesub ge nî kōǃgâ da tsî sida ǃgâsan ge nî ǂkhâǃnâ da di. (Khomai re Mateub 6:31-33; Jhn. 10:14; 1Tes. 5:11) ǂHâ da hâ xūn hoana da ge ūhâ sida ǃgomsin hoan ǃnâ mâǀgaisa.
22. Tae-e da nî ganganxaba?
22 Jesub ge ǂgauǂgau kaikhoes ge ǁnā tsēs ai khoakhoahe hâse gere tsâ. Xawes ge ǀamosib kōse khoakhoahes ǃgao nî Xristub di ǂgomǂgomsa ǁkhāǁkhāsabe kais ge ge ī. ǁÎsa tae-e ge dī? ǁÎs ga Jesub di ǁkhāǁkhāsabe kai hâ o, os ge kaise ǂoaǂamsa aiǂhanuba ga ūhâ ǁîb ǀkha ǀhommi ǃnâ ǃoabas tiba. Jesuba ǃoabas ǃgaos ge māǁnâ xūn hoan ge ǂâibasen-e ga ūhâ. Nēsi da ga ǀhommi tamas ka io ǃhūbaib ǃâubasensa ūhâ xawe da ge kaise ra ǃgâiaǂgao Jesub ǁkhauǂûis “Tita ǃoa hā re” di hâsa da ge ūǃoa o.
13ǁÎ ǁNAETSANAS Xristub ge a sida di aiǁgau
^ par. 5 Jesub ge ra ǁkhau da i da ǁîba ǃoa ǀgū. Tae-e da nî dī ǁîb di ǁkhauǂûisa ǃkhōǃoas ǃaroma? Nē ǁkhāǁkhāǃâs ǃnâ da ge ǁnā dîsa nî ǃeream tsî nî mû mati da nî khoakhoahesa Jesub ǀkha ǀguiba sîsens ǃnâ-ū.