1. Hoada tae-e nî dī?

KAISE a ǃgom di du a ǂan ǃkhoeǀhûgus ǃnâ du nî ǁhao ǂgao, ǃgōsase du ga tsausa o? Nēsa du ge dī ǂgao tide. Xaweb ge apostel Pauluba ge mî hoa ama Xristeǁîn ǃkhoeǀhûgus ǃnâ hâ di. (Heb. 12:1) Tsî hoada ǂkhaman tamas ka io kairan, ǀgaisan, ǂkhabusan hoan ge ǀams kōse Jehovab da mā ǀkhaeban ga ǃkhōǃoa ǂgao o, o nî ǃkhoe.—Mat. 24:13.

2. 2 Timoteub 4:7, 8 ǃnâ i a xoamâisa khamib Pauluba tae-i amsi ǃhoas aiǂhanuba ge ūhâ i?

² Paulub ge ǃhoas aiǂhanuba ge ūhâ i ‘ǃkhoeǀhûgusab ǀams kōse’ ge ǃkhoe xū-i ao. (Khomai re 2 Timoteub 4:7, 8.) Xawe tae ǃnôa ǃkhoeǀhûgus xab Pauluba gere ǃhoa?

3. Paulub gere ǃhoaǃgao ǃkhoeǀhûhusa a tae?

³ Paulub ge ǀnî ǁaen ai xūn hîna ǃkharu ge ǁaeb Greece ǃnâ gere īn xa gere xoa ǂhâǂhâsa xū-e ǁkhāǁkhās ǃaroma. (1Kor. 9:25-27; 2Tim. 2:5) ǁÎb ge ǃkhoeǀhûgusa ge sîsen-ū Xristeǁî ûiǀgauba ǁguiǃās ǃaroma. (1Kor. 9:24; Gal. 2:2; Fil. 2:16) Khoe-i ge nē ‘ǃkhoeǀhûgus’ ǃnâ ra ǂgâ ǁāǁnâs ǃnâ i ga Jehovab ǃoa-ai māǁnâsen o. (1Pet. 3:21) ǁÎ-i ge nēsa nî dan Jehovab ga ǀkhaeb ǀamo ûib diba mā i o.—Mat. 25:31-34, 46; 2Tim. 4:8.

4. Tae-e da nē ǁkhāǁkhāǃâs ǃnâ nî ǃhoaǃgoa?

⁴ Xristeǁî ûi ǀgaub tsî ǃkhoeǀhûgus tsîn ǁaegun tae xūn hîna ra ǃgûǀhaona hâ? ǂGui xūn hîna ra ǃgûǀhaon ge hâ. Hā re i da ǃnona xūna ǃhoaǃgao. ǂGurose da ge ǂhanu  ǀgauba nî sao; ǀgamǁîse da ge nēsa dans ai ǂâisa nî ǂnûi; tsî ǃnonaǁîse da ge hōǃâ da ra ǃgomsin ǃnâ nî mâǀgai.

5. Mâ daoba da nî sao tsî tae-i ǃaroma?

⁵ ǃHūbaib ǃkhoeǀhûgus ǃnâ dans ǃaroma i ge khoe-e daob hînan ǃkhoe ai kaihe hâb ai nî ǃkhoe. ǁKhā ǀgaub ai da ge ǀamo ûib di ǀkhaeba da ga dan ǂgao o, o Xristeǁî ûiǀgauba nî sao. (ǃNǃkh. 20:24; 1Pet. 2:21) Xawe ǁGâuab tsî ǁnān hîna ǁîba ra saon ge Xristeǁî ûiǀgauba da nî sao ǃkhaisa ǂgao tama hâ; ǁîn ge ǂhaba hâ i da ǁîn ǀkha ‘ǃkhoeǀhûgu.’ (1Pet. 4:4) ǁÎn ge sada ra sao daob xa ama tama xūna ra mî tsî ra mî ǁîn da ǃgû ai daob ge a ǃgâi tsî ǃnōrasasiba ǃoa ra ī di. Xawe nēs ge ama tama.—2Pet. 2:19.

6. Briani aiǁgausa xu da tae-e ra ǁkhāǁkhāsen?

⁶ ǁNān hîna ǁGâuab xa tsâǀkhāhe hâ ǂâiǀgaugâ ūhân ǀkhā ra ǃkhoen ge nî mûǂan nē daob ǃnōrasasiba ǃoa ī tama hâsa xawe ǃgāsisa ǃoa ra īsa. (Rom. 6:16) Briani aiǁgaus xa ǂâi re. ǁÎb ǁgûra ge gere hui bi îb Xristeǁî ûiǀgauba sao. Xaweb ge kaib ge o, o gere dîsen nē daob ǂkhîba nî hauba bi ǃkhaisa. Briani ge ge mîǁgui ǁnān hîna Satanni ûiǀgauba ra saon ǀkha ǃkhoeǀhûgusa. “Mûǂan tama ta ge ge hâ i nē ǃnōrasa di ra mîhe ûiǀgaub ǃgâi tama xūna nî dī kai tesa,” tib ge ra mî. “ǁAero i khaoǃgâ da ge ǀhubuǀhubusen xūn tsî xûi-i tsîna ge sîsen-ū tsoatsoa tsî ǃgâi tama ûiǀgauba ge ūhâ i. Sao ra kurigu ǃnâ ta ge ǀgaisa ǀhubuǀhubusen xūna ge sîsen-ū tsoatsoa tsî ǂgui xūn ǃnâs tsîna ge māǁnâsen. . . . ǀHubuǀhubusen xūna ta ge ge ǁamaxū tsoatsoa i ta kōǃgâsen.” Briani ge Jehovab daoǁgaudi ǃoagu ûisa ge mîmâi. Briani ge ǁîb ûiǀgauba ǀkharaǀkhara tsî 2001ǁî kurib ǃnâ ge ǁāǁnâhe. ǁÎb ge nēsi ama ǂkhîba ra hōǃâ Xristeǁî ûiǀgauba saosa xu. *

7. Mateub 7:13, 14 ǃoagu da mâ ǀgam daokha ūhâ?

⁷ Kaise i ge a ǂhâǂhâsa ǂhanu daoba da nî ǁhûisa. Satanni ge ǂhaba hâ i da hoada ǂō daob ai ǃkhoe ǀû hîna “ûib ǃoa garuba” tsî hara daob hînan ǃhūbaib khoen hoana ra ǃkhoe-aib ai ǃkhoe. Nē daob ge supuse a ǃkhoe-aihe ǁkhā. Xaweb ge ‘kāǁōsib ǃoa garu.’ (Khomai re Mateub 7:13, 14.) ǂHanu daob ai hâ ǀgara tsî nēsa xu tā ǂgaeǂhabuhes  ǃaroma da ge Jehovab ai ǂgomaiǂnûi tsî ǁîba nî ǃgâ.

8. ǃKhoeǀhûgus ǃnâ hâ khoe-i ga ǁnā o, o i tae-e ra dī?

⁸ ǃKhoe-aon ge ǁîn ǂâisa daob ai ra ǂnûi în da xūn ai ǃnôa tsî ǁnā. Xawen ge noxoba ǃkhoeǀhûgu-ūn ra khoen tamas ka io daob ǃnâ hâ ā-i xa ǃaromahe hâse a ǁnā ǁkhā. ǁNān ga o, on ge khâi tsî ǃkhoes ǀkha ra aiǃgû. Xawen ge ǁnā kai nî ra xūn ai ǁîn ǂâisa ǂnûi tama hâ xawe ǃkhoe toa tsî dans ai ǁîn ǂâisa ra ǂnûi.

9. ǃNôa da ga o, o da tae-e nî dī?

⁹ Sada ǃkhoeǀhûgus ǃnâ da ge ǂgui ǃnâde a ǁnā ǁkhā ǃhoa tsî da ra mî xūn ǃnâ. Tamas ka ion ge sada ǀkha ǃkhoeǀhûgus ǃnâ hâ ǃgâsana dīsa tsî nēs ǃnâ-ū a tsûtsû da ǁkhā. Nēsa da ge a ǃâubasen ǁkhā. Hoada ge ǀoasa kurusa ūhâ tama hâ tsî ǂō daob ûib dib ai ra ǃkhoe. Nēs ǃaromada da ge ǁaen ai nî “dā-aigu.” Paulub ge ge ǂanǃgâ nē-i “nau-i ǃoagu ǀauxū-e” nî ūhâsa. (Kol. 3:13) Xawe ǃnôa kai da ra xūn ai ǂâisa ǂnûis xa hā re i da ǀkhaeb hîna da nî ǃkhōǃoab ai ǂâisa ǂnûi. ǃNôa da ga o, a da khâima tsî ǃkhoeǀhûgus ǃnâ aiǃgû. Tsau tsî da ga ǁaixa tsî khâimâ ǂgao tama io, o da ge ǀams kōse ǃkhoe tide. ǃKhoe-ao i hîna ǁnā tsî khâisa ǂō daob ai ra ǂkhā i ge nauna ǃnôa-ai xū-i ase a ība ǁkhā.

10. Mati da nî ǂgōsen i da tā ‘ǃnôa-ai’ xū-i ase nau ǃgâsana ība?

¹⁰ ‘ǃNôa-ai’ xū-i ase sada ǃgâsan ǃoa-ai ī tama is ge, ǁaen ai mā-am nîsa în xūna ǁîn ǀgaub ai dī tsî hoaǁae sada ǀgaub ais ose. (Rom. 14:13, 19-21; 1Kor. 8:9, 13) Nē ǂhâǂhâsa ǀgaub ai da ge ǃhūbaib di ǃkhoe aon khami i tama hâ. ǁÎn ge ǁîn ǁaegu ra ǃkhoeǀhûgu tsî mâ ǃkhoe-ao i hoa-i ge ǁî-i ǀgui-i dansa nî hōsa ra ǂgao. Nē ǃkhoe-aon ge ǁîn ǃgâib xa ǀgui ra ǂâi. Tsî nēs ǃaroma nau ǃkhoe-aona a ǂhābē ǁkhā în ǁîna ǂgurose ǂoaxa. Xawe sada ge sada ǁaegu ǃkhoeǀhûgu tama hâ. (Gal. 5:26; 6:4) Sada ge ǂguina ra hui ǂgao în ǁîn tsîna ǀams kōse ǃkhoe tsî  ǀamo ûib ǀkhaeba ǃkhōǃoa. Nēs ǃaroma da ge Paulub daoǁgausa ra sao ǂgao “a i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.”—Fil. 2:4.

11. ǃKhoe-ao-e tae-i ai ǁî-i ǂâisa ra ǂnûi tsî tae-i ǃaroma?

¹¹ Daob ai ǁîn ǂâisa ǂnûis ǃnâ-ūn ge ǃhūbaib ǃkhoeǀhûgus ǃnâ hâ khoena dans xa ǀgui ra ǂâi. Daob ǀamsan ga mû tama i xawen ge ǁîna nēsa ra mûnan-ai tsî matin dansa ra ǃkhōǃoa ǃkhaisa ra mû. ǁÎn ge dansa hoaǁae ǂâis ǃnâ ūhâs xa ra ǂkhâǃnâhe în ǃkhoe ǀgara.

12. Jehovaba tae-e ge mā da?

¹² Sada hâ ǃnâ ǃkhoeǀhûgus ǃnâb ge Jehovaba mîmâiba da hâ sada ǀams ǀkhaeba da nî ǃkhōǃoasa ǀhommi ǃnâs kas tamas ka io paradais ǃhūbaib ai. Xoadi ge nē ǀkhaeb nî īse i ǀgausa ra ǁgau da i da nēsa mûnan-ai tsî mû ûib mati nî ǁkhoaxase i ǃkhaisa. Sada ǃâubasensa da ga ûitsamase ūhâ o, o da ge xū-e supuse mā-am tide în ǃnôa kai da.

13. Mâ ǃgâi xūn hînan ǃhūbaib di ǃkhoe-aona ūhâ tama hâna da sada ūhâ?

¹³ Greece ǃnâ gere ǀhuruhe gamedi ǃnâ gere ǁhao khoen ge tsausasib tsî tsûs ǃgomsin tsîna gere hōǃâ. Xawen ge ǁîn di aiǂhomisens tsî ǀgaib ai nî ǂgomaiǂnûi ge is ge. Sada ge nē ǃkhoe-aon khami i, ǃkhoeǀhûgus amsi da ra aiǂhomihe amaga. Xawe da ge ǃgâi xū-e ǃhūbaib di ǃkhoe-aon xa ūhâ. Sada ge ǀgaiba Jehovaba xu a hō ǁkhā. Jehovab ai da ga ǂgomaiǂnûi o, ob ge aiǂhomi tab nî di ǀgui mî tama hâ xaweb nî ǀgaiǀgai da dis tsîna ra mî.—1Pet. 5:10.

14. 2 Korinteǁîn 12:9, 10 sa mati ra hui da ǃgomsin ǃnâ mâǀgaisa?

¹⁴ Paulub ge ǂgui ǃgomsina gere hōǃâ. Mî ǁgaiǁgaihe, mâǃoahe tsîb ge ǁaen ai gere ǂkhabuǂâi tsî “ǀā ǁkhū-e ti ǁgans ǃnâ” tib gere mî tsûba gere hôǃâ. (2Kor. 12:7) Xawe nē ǃgomsina Jehovaba nî ǃoaba ǀû kai bi ǃgomsin ase mûs xab ge nē ǃgomsin ǃnâ Jehovab ai gere ǂgomaiǂnûi. (Khomai re 2 Korinteǁîn 12:9, 10.) Nē mûǂui ǀgaubab ge Pauluba ūhâ i ǃkhais ǃaromab ge Jehovaba nē ǃgomsin ǃnâ ge hui bi.

15. Pauluba da ga ǁgae o, o da tae-e nî hōǃâ?

¹⁵ Sada tsîn ge mîǁgaiǁgaihe tsî sada ǂgoms ǃaroma a mâǃoahe ǁkhā. Tamas ka io da ge ǂkhabusa ǀaeb masiba hōǃâ tsî tsausase a tsâǁkhā. Xawe da ga Paulub aiǁgausa a ǁgae o, on ge sada ǃgomsina Jehovab ai ǂgomaiǂnûis ǀkha a hui da ǁkhā.

16. ǃGâi ǂurusib mâsiba da ga ūhâ tama i xawe da tae-e a dī ǁkhā?

¹⁶ ǀAeb xa du karob ǃnâ ǁgoe tamas ka io rolstoels ǃnâ ǂnôa? ǂKhabusa ǁgoadi tamas ka io mûde du ūhâ? Nēs ga ama o, o du Jehovaba ǁnān hîna ǂkham tsî a ǀgaisan ǀkha a ǃoaba ǁkhā? Î, nēsa du ge a dī ǁkha. ǂGui khaira ǃgâsan ge nē daob ai ra ǃkhoe. ǁÎn ge nē sîsenna ǁîn ǀgaib ai a dīhō ǁoa. Xawen ge Jehovab ǀgaib ai ra ǃgāsen ǀhaode ǃoa ǁâǁawab ǃnâ-ū tamas ka io vidiob ǃnâ-ū kōs ǃnâ. Tsîn ge aoǁnâ sîsenni ǃnâ ra ǁhao ǁîn ǀaeǃkhō-aon tsî ǀaokhoen tsîna aoǁnâbas ǃnâ.

17. Jehovaba mati ǁnān hîna ǀaeb mâsiga ūhân xa ra tsâ?

¹⁷ Hoa xūn hîna du Jehovaba ra dība ǂgaona du ga dīho tama i xawe tā  ǂkhabuǂâi tsî ǂâi re ǀams kōse ta ge ǃkhoe hō tide di. Jehovab ge sadu ǂgoms tsî kurugu ǃnâ du ge ǁîba dība xūn amsi a ǀnam du. Sadu ge ǁîb huiba nēsi ǃnāsase ǂhâ hâ tsî ǁîb ge ǁnāxū ǃnâ du tide. (Psa. 9:10) Xaweb ge sadu ǀgūse nî hâ. ǃGâsas hîna ǀaeb mâsiga ra hōǃâs ra mî xū-e ǃoa ǃgâ re: “ǀAeb mâsigu ra ǀarosen khami ta ge nau khoen ǀkha amaba ǀgoragusa ǀorose ra dī. Xawe ta ge a ǂan ti dītsâdi Jehovab ǂgaoba ra ǂkhî kai ǃkhaisa tsîs ge nēsa tita tsîna ǂkhîba ra hauba.” ǂKhabuǂâi du ga o, o ǂan re ǀguri du hâ tama hâsa. Paulub aiǁgaus xa ǂâi tsî ǁîb ǂkhâǃnâ ra mîde ǂâihô re: “ǁNā-amaga ta ǃgâiǃgâisen-e ūhâ ǂkhabusasigu ǃnâ, tsî . . . ǂkhabusa ta ka, ǃnubai ta a ǀgaisa xui-ao.”—2Kor. 12:10.

18. Mâ kaise ǃgom mâsiban ǀnîna ra hōǃâ?

¹⁸ Ûib ǃkhoeǀhûgus ǃnâ hâ ǃgâsan ǀnîn ge ǀnîhâ ǃgomsina ra hōǃâ. ǁÎn ge nau ǃgâsan a ǀū ǃgao tsî ǁnâuǃā tama ǃgomsina ra hōǃâ. Aiǁgausen ge ǂkhabuǂâis tsâsin tsî ǂâiǂhâsendi tsîna ra hōǃâ. Tae-i ǃaroman nē ǃgâsana nē ǃgomsina ra hōǃâ? Khoe-i ga khôahâ ǁôaba ūhâ tamas ka io rolstoels ǃnâ ǂnû o, o da ge nēsa mû tsî ǁî-e a hui ǁkhā. Xawe da ge emosionele ǃgomsiba ūhâ khoen di ǃgomsina a mû ǁoa ǁgausen tama i hâ amaga. ǁÎn di ǃgomsin ge mûhe ǁkhā ǃgomsina ūhâ khoen ǃgomsin khami ǃgom ǁkhā xawes nēsa mûhe tama hâ amagan ge khoena ǀnammi tsî ǂkhâǃnâs tsîna mā nî tama hâ.

19. Mefiboseti di aiǁgausa xu da tae-e ra ǁkhāǁkhāsen?

¹⁹ ǃNūbusiga du ga ūhâ tsî nau ǃgâsan xa ǁnâuǃāhe tama khami tsâ o, o du ge Mefiboseti aiǁgaus xa a ǀgaiǀgaihe ǁkhā. (2Sam. 4:4) ǁÎb ge ge ǃhōra i tsî ǃgâi tamases tsîna Gao-aob Davib xa ge hâ-ūhe. Mefiboseti ge nē ǃgomsina aitsama ge ǃaroma tama hâ i. Xaweb ge nēs xa ge ǂkhabuǂâi tama hâ i tsî ǁîb ûib ǃnâ ge hâ i ǃgâi xūna gere ǃgôaǃgâ. ǁÎb ge Davib ge ǃkharu ge ǁae ǁgaubi ǃgâixasiba gere ǃgôaǃgâ. (2Sam. 9:6-10) Nēs ǃaromab ge Mefiboseta Davib ge ǂhanu tama ǀgaub ǃnâ hâ-ū bi o, o nēsa ge ǁnâuǃā. ǁÎb ge Davib dīsadi xa ǂkhabuǂâi kaihesa ge mā-am tama hâ i. Tsîb ge Jehovaba Davib ge dī xū-i amsi ge ǂgā-am tama hâ i. Mefiboseti ge ǀgauna ǃoa gere kō îb Jehovab di ǂkhauhesa Gaoba ǂkhâǃnâ. (2Sam. 16:1-4; 19:24-30) Jehovab ge Mefiboseti di mâǂoa ra aiǁgausa ǁîb mîs ǃnâ ge xoamâi kai.—Rom. 15:4.

20. ǂÂiǂhansende mati ǀnî ǃgâsana a tsâǀkhā ǁkhā xawen tae ǂgomǃgâsiba nî ūhâ?

 ²⁰ ǂGui ǂhansendi xa ǃaromahe hâsen ge ǂgui ǃgâsana nau ǃgâsan ǂnamipe ǃgâi tamase ra tsâ. ǃGombahe ǁkhān ge a ǂgui khoen ǂnamipe hâsa xawen ge ǀhaohâb ǀhaodi, ǂharis ǀhaodi tsî ǀkharib kai ǀhaodi tsîna ǁhaoǃnâs ǀkha ra aiǃgû. ǀŪn a khoen ǀkha ǃhoas xan ge a ǃgombahe xawen ge aoǁnâ sîsenni ǃnâ nēsa ra dī. Nēs ga sadu xa ama o, o ǂan re ǀguri du hâ tama hâ ǃkhaisa. ǂGuin ge nē ǃnôa ǃgomsina ra hōǃâ. ǂÂis ǃnâ ūhâ re Jehovab sadu ǁgûtsâde ra ǃgôaǃgâ ǃkhaisa. Nēs ǃnâ du māǁnâsen tama hâ ǃkhais ge ra ǁgau ǁîb ra ǀkhae du tsî ǀgaib hîna du ǂhâhâba mā du ǃkhaisa. * (Fil. 4:6, 7; 1Pet. 5:7) Jehovaba du ga emosionele ǃnūbusigu tsî sorosi ǂkhabusasigu ǃnâ ǃoaba ǀgara o, o du ge a ǂgomǃgâ ǁkhā ǁîb xa du ra ūǃoahe ǃkhaisa.

21. Jehovab huib ǀkha da hoada tae-e nî dīhō?

²¹ ǃHūbaib di ǃkhoeǀhûgus tsî ǁnās hînab ge Pauluba a ǃhoaǃgaos ǁaegub ge ǃkharagagusiba hâ. Elobmîs ǁaeb ǃkhoeǀhûgudi ǃnâ i ge ǀgui khoe-i ǀgui-e gere dan. Xawe hoan hîna Xristeǁî ǃkhoeǀhûgus ǃnâ ra mâǀgain hoan ge ûib di ǀkhaeba nî ǃkhôǃoa. (Jhn. 3:16) ǃHūbaib di ǃkhoeǀhûgus ǃnân ge hoa khoena ǃgâi ǂurusiba nî ūhâ nēsan ga dī tama ion dan tide amaga. Xawe Xristeǁî ǃkhoeǀhûgus ǃnâ da ge hoada ǃgâi sorosi ǂurusiba ūhâ tama hâ. (2Kor. 4:16) Jehovab di huib ǀkha da ge hoada ǀams kōse nî ǃkhoe.