1-2. Jesuba Johaneb 4:35, 36 ǃnâ mâ mîde tae-i amsi ge mî?

JESUB ge ǀnîsi ǃhoro ǃhanagu hîna gere kai tsoatsoagu ǁaegu gere ǃgûmâ. (Jhn. 4:3-6) Nē ǃhanagu ge haka ǁkhâgu khaoǃgâ ǀgui nî ǃgaohe. Jesub ge supuse ǁnâuǃāhe tama hâ xū-e ge mî: “ǃGapakhâi, î ǃhanaga kōǀî, ǀnai gu kom go ǃurio, ǃgaohe gu nîse.” (Khomai re Johaneb 4:35, 36.) Nēs ǀkhab tae-e gere ǂâibasen?

² Jesub ge nēsa khoena ǀhaoǀhaos ǁgauǁgaus ase ge sîsen-ū. Tae-i ge īsa ǃoa kō re. Jodeǁîn ge dīxū-e Samaritanǁîn ǀkha ūhâ tama hâ i xaweb ge Jesuba Samaritanǁî khoesa ge aoǁnâba tsîs ge ǁîsa ge ǃgâ. Jesub ge ǃgaohes amsi ‘ǃuri’ ǃhanagu xa gere ǃhoa ǁaeb ain ge ǂnubis Samaritanǁîn hîna Jesub xa Samaritanǁî khoesa xu ge ǁnâuna Jesuba ǃoa ge ǃgoaxa i în ǁîb xa ǃnāsa xūna ǁkhāǁkhāsen. (Jhn. 4:9, 39-42) Elobmîs ôaǃnâ-aob ǀguib ge ge mî: “Nē khoen ge ǃhaese Jesuba ǃoa a hā ǃkhais ge ra ǁgau ǃhanab ge ǃgaohes amsi ǂhanu i ǃkhaisa.”

3. Jesub ge khoena gere mû khami da ga aoǁnâba da ra khoena mû o, ob sada aoǁnâ sîsenna mati nî ǃgâiǃgâisen?

³ Aoǁnâba da ra khoen ǃoa-ai da mati ra tanisen? ǁÎna da ǃgaohes amsi ǂhanu ǃhanab ase ra mû? Nēs ga ama o, on ge ǃnona xūna nî ī: ǂGurose, ǁgariǁgarisasib ǀkha du ge nî aoǁnâ. ǃGaos ǁaeb ge ǃnupu tsî da ge ǁae-e ǁore ǂgao tama hâ. ǀGamǁîse, ǃgâiaǂgao da ge nî khoen ga ǃgâiǂhôasa ǃoa  ǃgâ o. Elobmîs ge ra mî: “Khoen ra ǃgaos ǃnâ ǃgâiaǂgao.” (Jes. 9:2) Tsî ǃnonaǁîse, mâ khoe-i hoa-e da ge Jesub ǁkhāǁkhāsabe-i ase a mû ǁkhā. Nēs ǃaroma da ge sada aoǁnâ sîsenni haisi amasa khoen ǂgaoga i nî tsâ ǀkha ǀgaub ǃnâ nî dawa.

4. Apostel Pauluba xu da tae-e nē ǁkhāǁkhāǃâs ǃnâ nî ǁkhāǁkhāsen?

⁴ Jesub saosaben ǀnîn ge gere ǂâi Samaritanǁîn tātsē Jesub ǁkhāǁkhāsabe kai tide di. Xaweb ge Jesuba nēti i ǂâiǀgauba ge ūhâ tama hâ i. ǁÎb ge ǁîna ǁkhāǁkhāsaben ase gere mû. Sada tsîn ge sada ǂharidi ǃnâ hâ khoena Xristub ǁkhāǁkhāsaben ase nî mû. Apostel Paulub ge ǃgâi aiǁgausa ge ǁgau hîna da a ǁgae ǁkhāsa. Tae-e da ǁîba xu a ǁkhāǁkhāsen ǁkhā? Nē ǁkhāǁkhāǃâs ǃnâ da ge matib ge ǁîba (1) aoǁnâbab gere khoen ǂgomdi xa tae-e ǂan i ǃkhais, (2) ǁîn ǃgâiǃgâibasensa ūǃnâ hâ xūna gere ôaǃnâ ǀgaus tsî (3) matib ǁîna Jesub ǁkhāǁkhāsaben ase gere mû ǀgaus tsîna nî ǃhoaǃgao.

5. Pauluba tae-i ǃaroma sinagogegu ǃnâb gere aoǁnâba khoena gere ǁnâuǃā?

⁵ Paulub ge Jodeǁîn di sinagogegu ǃnâ hoaǁae gere aoǁnâ. Tesalonikab di sinagogegu ǃnâb ge aiǁgause, ‘ǃnona sâtsēde [Jodeǁîna gere] dîǃnâ, xoade xu.’ (ǃNǃkh. 17:1, 2) Paulub ge ǀnîsi sâsase nē sinagogegu ǃnâ gere tsâ. ǁÎb ge Jodeǁîn ǂgoms ǃnâ ge kaikhâi. (ǃNǃkh. 26:4, 5) Paulub ge Jodeǁîna gere ǁnâuǃā. Nēs ǃaromab ge ǂgomǃgâsib ǀkha ǁîna ge aoǁnâba ǁkhā i.​—Fil. 3:4, 5.

6. Atenes ǁamaxū ǁgaugu khoena mati sinagogegu khoen hînab ge Pauluba gere aoǁnâbana xu gere ǀkhara?

⁶ Mâǃoa-aon xa ǁgarihe hâseb ge Pauluba Tesalonikas tsî ǁnāpaxū Bereasa xu ǃkhoe tsî Atenes ǃnâ ge sī. Tsîb ge ǁkhāba “sinagogeb ǃnâ Jodeǁîn tsî eloǃaoǃgâxan ǀkha gere dîǃnâgu.” (ǃNǃkh. 17:17) ǁAmaxū ǁgaugu dawab da aoǁnâ hînab ge Pauluba ge mûǂan nē ǃgâ-aon tanisen ǀgaub a ǀkharasa. Nē khoen ǁaegun ge ǀgapi ǂansa ūhâ khoen tsî ǀūbeǁaes khoen tsîna ge hâ i hîna Paulub haisi amasa “ǀasa ǁkhāǁkhā-ai-i” ase gere mûna. ǁÎn ge ǁîba ǃoa ge mî: “Ama ǃhao xūnats kom go ǁnâu kai” da o.​—ǃNǃkh. 17:18-20.

7. ǃNaeǃkhaidi 17:22, 23 ǃoagub Pauluba mati ǁîb di haisi-amsa ge dawa?

⁷ Khomai re ǃNaeǃkhaidi 17:22, 23. Paulub ge Jodeǁînab sinagogegu ǃnâ gere aoǁnâba khami Atenes ǃnâ ge hâ  i ǀūbeǁaes khoena ge aoǁnâba tama hâ i. Paulub ge ǀnîsi ge dîsen, ‘Atenes khoena taen ǃnâ ra ǂgom?’ ǁÎb ge ǁîn ûiǀgaub tsî ǁîn ra ǂgomǃnâ xūn ǃoas tsîna ǃgâise gere kō. Saoraseb ge Pauluba ǁîb tsî ǁîn ǁaegu ǃgûǀhaora xūna gere ôa. “Jodeǁî Xristeǁîb aseb ge Pauluba ge mûǂan Grikeǁîn ama Eloba ǃoaba tama hâ ǃkhaisa,” tib ge Elobmîs ôaǃnâ-aoba ra mî. “Xaweb ge gere ǁgau ǂgao ǁîb da ǃoaba Elob ǀūsabe tama hâ ǃkhaisa Ateneǁîn ǃoa-ai.” Nēs ǃaromab ge Pauluba ǁîb di aoǁnâ ǀgauba ge ǀkharaǀkhara. ǁÎb ge Ateneǁîna ge mîba ǁîb haisi ams ‘ǂAnsa tama Elob’ hînan ra ǃoababa xu ra hā ǃkhaisa. Nē ǀūbeǁaes khoen ge xoade ǃgâise ǂan tama hâ i xaweb ge Pauluba nēs xa ge ǂkhabu ǂâi tama hâ i. Xaweb ge ǁîna ǃgaohes amsi ǂhanu ǃhorob khami gere mû tsî ǁîb aoǁnâ ǀgauba ge dawa.

8. (a) Sada ǂharis ǃnâ hâ khoen taen ǃnâ ra ǂgom ǃkhaisa da mati a ǂanǂui ǁkhā? (b) ǁÎ-i tsîn ǁî-i ǂgomsa ūhâ di i ga khoe-e mî o, o da tae-e a mî ǁkhā?

⁸ Paulub khami ǃgaoǃgâxa re. Sadu ǂharis ǃnâ hâ khoen ra ǂgom xūna nî ǃgāsa kai xūna ǃoa kō re. Oms khoe-i hâ ǃkhaib tsî ǁî-i audos tsîna mati ī? ǁÎ-i ǀons, sara ana ǀgaub, tsî ǃhoaǀgaub tsîna ǁî-i ra ǂgomǃnâ xūn xa tae-e ra mî? ǀNîsi i ge ǃhaese ra mîba du ǁî-i tsîn ǁî-i ǂgomsa ūhâ ǃkhaisa. Flutura di ǀon hâ ǀō-aisa aimâba-aos ǀkhas ge nēsa ī o, os ge ge ǃeream, “ti ǂgomsa ta sado nî ǁkhāǁkhā ga ta ge ǀkhī tama hâ xawe ta ge nē ǂhâǂhâsa xū-i xa ra ǃhoa ǂgao . . . ”

9. Elob ǃnâ ra ǂgom khoe-i ǀkha du taen ai a ǀgau ǁkhā?

⁹ Elob ǃnâ ra ǂgom khoe-i ǀkha da tae-e a ǃhoaǃgao ǁkhā? ǀGau ai du ra xūna ǃoa kō re. ǀGui Elob ǀguiba ǃoaba tsî i ge Jesuba khoen ore-aob ase a mû ǁkhā. ǁÎ-i ge tsū ǁaeb ǀgūǁae nî ǀamse īb ǃnâ da ûi hâ ǃkhaisa ra ǂgom. Nē xūna sîsen-ū re tsî Elobmîsa ǃgâi ǀgaub nē khoe-i ǂgaob nî tsâǀkhā-eb ǃnâ sîsen-ū re.

10. Tae-e dīsa da nî dītsâ tsî tae-i ǃaroma?

¹⁰ ǂÂis ǃnâ ūhâ re khoen hoa xūn ǁîn ǂgomdi ǂgaeǂgui-aogu ra ǁkhāǁkhānin ǃnâ ǂgom tama hâsa. Nēs ǃaroma khoe-i hâ ǃnâ ǂgoms xa da ga ǂanǂui toas khaoǃgâ ǁî-i ǃgōsase ra ǂgomǃnâ xū-e ôaǃnâ re. “ǂGuin ge kurus ǂans tsî ǂgomdi tsîna ra ǃgaeǀhao,” tib ge Davidi hîna Australiab ǃnâ a ǀō-aisa aimâba-aoba ra mî. Donaltas, hîna Albaniab ǃnâ ra hâs ge ra mî, “ǀNî khoen hîna da ra ǀhao-ūn ge ra mî ǁîn ǂgomden ūhâ di xawe ega ra ǂanǃgâ Elob ǃnân ǂgom tama hâsa.” Argentinab ǃnâ hâ  sîsabe ǃgâsab ge ge mî khoen ge ǃnona ǀguira elob ǃnân da ǂgom di ra mî, xawen ge ǁGûb, ǀGôab tsî ǃanu gagab a ǀgui khoesa ǂgom tama hâ. “Nēsa ta ga mûǂan o, o i ge a supu nē khoe-i ǀkha ǁgamǀhaosa,” tib ge ra mî. Nēs ǃaroma khoe-i tae-e amabes ǃnâ ra ǂgomsa ôaǃnâ re. O da ge Paulub khami ‘hoana a hū kaiba’ ǁkhā ǂguin âna da nî hōse.​—1Kor. 9:19-23.

11. ǃNaeǃkhaidi 14:14-17 ǃoagub Pauluba mati Listras ǃnâ hâ khoena ǃgâiǀgaub ǃnâ ge aoǁnâba?

¹¹ Khomai re ǃNaeǃkhaidi 14:14-17. Paulub ge ǁîb ǃgâ-aon taen ǃnâ ǃgâiǃgâibasensa ūhâsa ge ǂan i tsî nēs ǀkhā ǁîb aoǁnâ sîsenna gere ǀkharaǀkhara. Aiǁgause, Listras ǃnâb gere ǃhoa-ū khoen ge xoas xa ǂansa ge ūhâ tama hâ i. Nēs ǃaromab ge Pauluba ǁîn nî ǁnâuǃā ǀgaub ǃnâ gere ǃhoa. ǁÎb ge ǃgâise ra kai ǃhanagu tsî ǃgâiǁaeba ūhâs tsîn xa gere ǃhoa. ǁÎb ge mîn tsî ǂkhōdi ǁîb ǃgâ-aon nî ǁnâuǃāde gere sîsen-ū.

12. Mâti da khoe-i di ǃgâiǃgâibasensa ǂanǂui tsî sada aoǁnâǀgauba a ǀkharaǀkhara ǁkhā?

¹² Sada ǁnâuǃāba da ge ra sîsen-ū ǂgao sada ǂharis ǃnâ hâ khoena ǁnâuǃās ǃaroma tsî sada aoǁnâ ǀgauba ǁnās ǃoa-ai ra ǀkharaǀkhara ǂgao. Mati da a ǂanǂui ǁkhā khoe-i tae-i ǃnâ ǃgâiǃgâibasensa ūhâsa ǁî-i ǀkha ǃhoas ǃnâ-ū tamas ka io ǁî-i oms ǂnamibeba xu? ǃGaoǃgâxa re. Aiǁgause i ge ǃhanaba ra kōǃgâ, ǂkhani-e ra khomai, audosa ra kuru tamas ka io ǀnî hâ xū-e ra dī. ǁÎ-e du ga ǀgū o, o du tae-i amsi nē xūn ǀgui-e sîsen-ū tama hâ ǁî-i ǀkha ǁgam tsoatsoas ǃaroma? (Jhn. 4:7) Khoe-i sara ana ǀgaub tsîn ge ǁî-i xa xū-e a mî ǁkhā—aiǁgause, mâ ǃhao-i a ǃkhais, tae sîsen-e i ra dī ǃkhais tamas ka io tae-i xa i a ǃgâibehe ǃkhaisa. “Tita ge 19 kurixa khoeb ǀkha ge ǃhoa tsoatsoa hîna ǂanǂansa ǁnae-ao i ai-īsiba ūhâ hemsa ge ana hâ iba,” tib ge Gustavoba ra mî. “Nēs xa ta ge ge dî bi ob ge tae-i amsib nē hemsa ana hâ ǃkhaisa ge mîba te. Nē ǁgam ǀhaos ge Elobmîs  ǁkhāǁkhās ǃnâ ge ǃgûǁnâ, nē khoeb ge nētsē a sada di ǃgâsa.”

13. Mati du Elobmîs ǁkhāǁkhāsa ǃgâiǀgaub ǃnâ a mā ǁkhā?

¹³ Khoe-e du ga Elobmîsa ǁkhāǁkhāsa mâi-aiǃâ o, o nēsa ǁkhoaxa ǀgaub ǃnâ dī re tsî mîba i re nēs mati ǁî-e nî huisa. (Jhn. 4:13-15) Poppy di ǀon hâ ǃgâsas ge aiǁgause, khoes xa ǁîs oms ǃnâ ge ǁkhau ǂgāhe. Poppys ge ǀgapi ǁkhāǁkhā ǃgaib tawas ra ǁkhāǁkhā ǃkhaisa ra ǁgau ǂkhaniba mirri ai a mû o, os ge sada tsîn khoena Elobmîs amaba ra ǁkhāǁkhā ǃkhais tsî sada ǀhaodi xas tsîna ge ǃhoa. Nē khoes ge Elobmîs ǁkhāǁkhāsa ūǃoa tsî saora tsēs ai ǀhaosa ǃoa ge ī tsî ǂharis kai ǀhaos tsîna ge ǁhaoǃnâ. ǁÎs ge kurib khaoǃgâ ge ǁāǁnâhe. Dîsen re: ‘Tita Elobmîsa sī ǁkhāǁkhās amsi ra sari khoena tae-i ǃnâ ǃgâiǃgâibasensa ūhâ? Elobmîs ǁkhāǁkhāsa ta ǃgâiǀgaub ǁî-e a tsâǀkhā ǁkhāb ǃnâ a dī ǁkhā?’

14. Mati da sada Elobmîs ǁkhāǁkhā ǀgauba mâ khoe-i hoa-i ǂhâsigu ǃoa-ai a ǀkharaǀkhara ǁkhā?

¹⁴ Elobmîs ǁkhāǁkhās ǀkha du ga tsoatsoa o, o ǀguri hâse nē ǁkhāǁkhāǃâdi amsi aiǂhomisen re nē khoen di khaoǃhûb tsî ǃgâiǃgâibasendi tsîna ǂâis ǃnâ ūhâse. Aiǂhomisen du ra ǁaeb ai kō re mâ xoade du nî khomais, mâ vidioga du nî ǁgaus tsî mâ ǂkhōdi tsîna du nî sîsen-ūsa Elobmîs amaba ǁguiǃās ǃaroma. Dîsen re, ‘tae-i xa i nē khoe-e nî ǃgâibahe tsî tae-e ǁî-i ǂgaoba nî tsâǀkhā?’ (ǂKhm. 16:23) Albaniab ǃnâ Flora di ǀon hâ aimâba-aos ǀkha Elobmîsa gere ǁkhāǁkhāsen khoes ge ge mî, “khâis xa hâ ǁkhāǁkhāsa ta ge tita a ūǃoa ǁoa.” Floras ge nē khoesa nēsa ūǃoas ǀkha ge ǁgari tama hâ i. ǁÎs ge ra mî: “Mûǂan ta ge ge khâis ǃnâs nî ǂgoms aiǃâs ge khâisa ge mîmâi Elob xa nî ǁkhāǁkhāsen ge īs ge.” Nēs khaoǃgâs ge Florasa Jehovab ǀnammi, ga-aisib tsî ǀgaib tsîn ai ǁîs ǂâisa gere ǂnûi. Egas ge nē khoesa khâis ǃnâ ge ǂgom tsoatsoa. ǁÎs ge nēsi a ôasa Jehovab di ǀHûǀguitimî-ao.

15. ǃNaeǃkhaidi 17:16-18 ǃoagub mâ tanisen ǀgaub Grikeǁîn diba Pauluba gere ǂhani xaweb tae-i ǃaroma Ateneǁîna ge ǀûǃnâ tama hâ i?

¹⁵ Khomai re ǃNaeǃkhaidi 17:16-18. Nē khoen ge ǁgôatsuiǁgoa eloga gere ǃoaba ǃgâi tama ǁgoe-ūgu ǀgaugu ǀkha gere aiǃgû tsî kuris ǂans ǃnâ gere ǂgom. Xaweb ge Pauluba nē khoena ge ǀûǃnâ tama hâ i tsî ǁîna noxoba gere aoǁnâba. Paulub tsîn ge ge Xristeǁî kai ‘ǃkhāǃkhā-ao tsî ǃgôaǃgonao tsî ǁgâiǀā-aob’ ge ī xawe. (1Tim. 1:13) Jesub ge Paulub di ǃgâiǃgâibasensa mû khamib ge Pauluba Atenes khoen ǃgâiǃgâibasensa ge mû. Tsî ǁîb di ǂgomǃgâsib ge ge ǃgâi i.​—ǃNǃkh. 9:13-15; 17:34.

16-17. Tae-e ra ǁgau hoa ǃhaodi khoen a Xristeǁî kai ǁkhā ǃkhaisa? Aiǁgau-e mâ re.

¹⁶ ǃKharu ge ǁaeb ǃnân ge ǃkharagagu khaoǃhūga ūhâ khoena ge Jesub saosabe kai. Grikeǁî Xristeǁîna ǃoab ge Pauluba sîǂkhanisa a xoa o, ob ge ge mî ǀnî ǁanin ǀhaohâb din ge ǁaen ai ge ǃnari-ao i tamas ka io ǃgâi tama ûiǀgauga ge ūhâ i. ǀAro tsîb ge ge mî: “Tsî ǁnātin ge ǀnîn âdo ge ī i; xawe du ge ge ǁāhe.” (1Kor. 6:9-11) Nē khoen nî ǀkharaǀkharasen ǃkhaisa du ge mû ǁkhā i?

¹⁷ ǂGuin ge nētsē māsenxase ǀkharaǀkharana ra dī în Jesub di ǁkhāǁkhāsabe kai. Aiǁgause, Australiab ǃnâs ge ǀō-aisa aimâba aos Yukina di ǀon hâsa ge mûǂan hoa khoen Elobmîs haisi amasa ra ǃgâ ǃkhaisa. ǀGui ǃnās ais ge ǁaxasigu ǁgâub  dawa khoesa ge ǀhao-u hîna tatoete ūhâ tsî supuse nî ǃhoa-ūhe khoe-i khami ge mûsen tama hâ isa. “ǁAero-e da ge ge ǃkhō-oasen” tis ge Yukinasa ra mî, “xawe da ge ǁnās khaoǃgâ ge ǃhoa-ū si tsoatsoa. Mûǂan ta ge ge ǁîs Elobmîs xa kaise a ǃgâibahe ǃkhaisa tsî di ǁîs tatoeti ǀnîde Psalmdi xoade ūhâsa.” ǁÎs ge Elobmîsa ǁkhāǁkhāsen tsoatsoa tsî ǀhaodi tsîna ge ǁhaoǃnâ tsoatsoa. *

18. Tae-i ǃaroma da khoena ǀgoraǃgâ tide?

¹⁸ ǂGui khoen ǁîba nî sao dib gere ǂâi ǃkhais ǃaromab Jesuba ǃhanagu ǃgaohes amsi ǂhanu di gere mî? Hî-î di tama ge is ge. Xoadi ge ge ǁgau ǀoro khoen nî ǂgomsa ūhâsa. (Jhn. 12:37, 38) Tsî Jesub ge khoen ǂgaoga khomais ǁkhāsiba ge ūhâ i. (Mat. 9:4) Xaweb ge ǁnā ǀoro khoen hîna ǁîb ǃnâ nî ǂgomsa ūhân ai ǁîb ǂâisa ge ǂnûi tsî ôasase gere aoǁnâ. Nēs ǃaroma da ge sada hîna ǂgaoga a khomai ǁoada ǀgui khoe-i tamas ka io ǂharis khoena ǀgoraǃgâsa xu nî ǂgōsen. Tsî khoen di ǃgâiǃgâibasensa nî mû. Marki, Burkina Fasob ǃnâ hâ sîsabeb ge nēti ra mî: “Khoen hîna nî aiǃgû di da tita ra ǂâin ge hoaǁae ra ǀûsen. Xawe khoen hîna da tita aiǃgû tide di ra ǂâin ge haoǁae ra aiǃgû. Tita ge ge mûǂan Jehovab gagaba ta nēsa dīsa nî mā-amsa.”

19. Sada ǂharis ǃnâ hâ khoena da mati nî mû?

¹⁹ Kōs ǀguisa da ga hî o, o i ge ǂgui khoen ǂharis ǃnâ ǀkhai khami a ǁgausen ǁkhā hîna ǃhorob khami īna. Xawe ǂâis ǃnâ Jesub ge ǁîb ǁkhāǁkhāsabena mîba xū-e ūhâ re. ǃHanagu ge a ǃuri tsî ǃgaohes amsi a ǂhanu. Khoen ge ǀkharaǀkharasen tsî a Jesub di ǁkhāǁkhāsabe kai ǁkhā. Jehovab ge nē khoena ‘ǃkhūsib’ ase ra mû. (Hag. 2:8) Khoena da ga Jehovab tsî Jesub tsîkha khami mû o, o da ge ǁîn khaoǃhūgu tsî ǃgâiǃgâibasensan ūǃnâhâ xūn tsîna nî ǂanǂui. ǁÎna da ge ǃhaokhoen ase mû tide xawe sada ǃgâsa kai ǁkhā a khoen ase.