1-2. Māǀgaub ǃnâ i,ī ǁkhā Jesub di daoga saosa? Aiǁgau-e mā re.

MÛNANAI re ǂoab ge ra ǃgom tsî du ge ǀgobadi ǃnâ ra ǃgû khoen ǀkha. Tsî du ge ǂansa ūhâ khoeb xa ra daoǁgauhe. Ais aib ǃgû garu amaga i ge ǁîb di ǁharodi di daoga ra ǁnāxusen. ǀNî ǁaega du ge ǁîba mûǁoa. Tsîts ge ǁnās ǃaroma ǃhuri tama hâ. Sadu hoadu ǁîb di ǂaide ǀgūse ra sao amaga.

² Nē da nētsē ûiǃnâ hâ ǃhūbaib ge ǁnā ǂoab khami i. Tsî ama Xristeǁîn ge ǁnā khoen hîna go khoeba sao hâ în khami i. Kaise da ge ra ǃgôaǃgâ Jehovab ge ǃgâi daoǁgau-aoba mā dasa, Jesu Xristuba. ǁÎb di daoga da ge ǃamkuse a sao ǁkhā. (1Pet. 2:21) Elobmîs di ôaǃnâde xu da ge ra mû Petrub ge nēba Jesuba ǁnā daoǁgau-aob ǀkha gere ǀgopeǀnōsa. ǁNā daoǁgau-aob ra daoga ǁnāxū khamib ge Jesub tsîna daoga ge ǁnāxuba da îda ǁnā ǀgaub ǃnâ saobi. ǀKhī da ǃnona dîde ǃhoaǃgao re. Mati da Jesub di daoga a sao ǁkhāsa. Tae-i ra ǂâibasen Jesub di daoga saosa? Tae-i ǃaroma da ǁnāsa nî dī? Tsî māǀgaub ǃnâ da ǁnāsa a dī ǁkhā?

3. Tae-i ra ǂâibasen khoe-i di daoga saosa?

³ Tae-i ra ǂâibasen nau khoe-i di daoga saosa? Elobmîs ǃnâ hâ mîdi ǃgû tsî ǂaidi ge ǀnî ǁaega. Khoe-i ǁî-i ûib ǃnâ ra dī xū-i xa ra ǃhoa. (Gen. 6:9; ǂKhm. 4:26) Aiǁgause khoe-i ǁî-i di ûiba ra ûi ǀgaub ge. Daogu hînab khaos ai ra xū gu ǀkha a ǀgopeǀnōhe ǁkhā. ǁNā-amaga da ga khoe-i di daoga ga ra sao o. Os ge ǁnāsa ra ǂâibasen ǁî-i di aiǁgausa ǁgaesa.

4. Tae-i ra ǂâibasen Jesub di daoga saosa?

 ⁴ Jesub di daoga saosa tae-e ra ǂâibasen? Supuse da ga ǁguiǃā o. O i ge ra ǂâibasen ǁîb di aiǁgaude ǁgaesa. Dana xoaǂams sida dis ǃnâb ge Petruba ǃnāsase ra ǃhoa. Jesub ge māǀgais ǃnâ u a mâiǃgâi aiǁgaus xa. (1Pet. 2:18-25) Amabes ǃnâ Jesub ge mî tsî gere dī xūn ge kaise sida ǃaroma a ǃgâi aiǁgau.

5. ǀOasa kurusa ūhâ tama khoena Jesub di aiǁgausa sao ǁkhā e? ǁGuiǃā re.

⁵ ǀOasa kurusa ūhâ tama khoeda ase. Jesub di aiǁgausa sao ǁkhā da a? Îo sao ǁkhā da ge a. ǂÂihō re Petrub ge mî tama ge hâ i. Î da ǀoasase Jesub di daoga sao. Xaweb ge ge mî îda ǀgūse sao. ǁÎb di daoga da ga ǃamkuse ǀoasa tama da hâ xawe ga ra sao. O da ge apostel Johanneb di mîde nî sao. “ǁÎb ge tanisens ǁkhās khami i nî ǁî-aitsama ǁkhāti tanisensa.”—1Jhn. 2:6.

6-7. Tae-i ǃaroma da nî mî Jesub di daoga da ga ra sao o, o da Jehovab ǀgūse nî hâsa?

⁶ Jesub di daoga da ga sao o, o da ge Jehovab ǀgūse nî hâ. Tae-i ǃaroma da ǁnāti a mî ǁkhā? ǂGurose, Jesub ge māǂoa ra aiǁgausa ge ǁgauda. Mati da ǃgâi ǀgaub ǃnâ nî ûisa î da Jehovaba ǂkhîǂkhî. (Jhn. 8:29) ǁNā-amaga da ga Jesub di daoga ga ra sao o. O da ge Jehovaba ra ǂkhîǂkhî. Tsî da ge ǂgomǃgâsiba ūhâ Jehovab ǁnān hîna ra ǁkhān a. ǀGaub ǃnâ ra dītsân ǀgūse nî sīsa.—Jak. 4:8.

⁷ ǀGamǁîse Jesub ge ǁîb di dadasaba ǃamkuse ra ǁgae. ǁNā-amagab ge Jesuba nēti ge mî ǁkhā i: “Tita ra mû-i kom ǁGûba ra mû-eo.” (Jhn. 14:9) Jesub ge nau khoen ǀkha gere hâ ǀgauba da ga sida tsîna ǁgae o. Aiǁgauseb ge Jesuba ǃomamaxa ǁōsa ge ūhâ i khoeba ge ǀgom. Tsîb ge khoes hîna ǂkhauhe ǁoa ǀaeba ge ūhâ  is tsîna ǀgomxasiba ge ǁgau. Tsîb ge ǁnān hîna ge ǁîn di ǀnamsabena gere ǂoaǃnân tsîna ǀgomxasiba ge ǁgau. ǁNās ǃaroma da ga Jesuba ǁgae o, o da ge Jehovab tsîna ra ǁgae. (Mrk. 1:40, 41; 5:25-34; Jhn. 11:33-35) Jehovab di ǀgauga da ga ǁgae o. O da ge ra ǁîb di ǀgū ǀhōsa kai.

8. ǁGuiǃā re Jesub di daoga da ga sao o, o i tae-e nî hui da sa îda ǃhūbaiba ‘dan’.

⁸ Jesub di daoga da ga sao, o da ge nē ǁgai ǃhūbaib xa ǂkhaeǂhapuhe tsî Jehovaba ǃoaba ǀû tide. ǀUniga ǃuis hînab ge ǃhūbaib ai khoese ūhâ is. Aib ge Jesuba ge mî ǁkhā i: “Tita ge ǃhūbaiba ge dan.” (Jhn. 16:33) ǁÎb ge gere ǂâibasen mā-amsen tamab ge hâ isa. Khoen di ǂâiǀgaub tsî ǃhūbaib xa ǂkhaeǂhauhesa. Jesub ge tatsēs tsîna ge ǀuru tama hâ i. Tae-i ǃaromab ge ǃhūbaiba ǃoa a sî-e sa. ǁNās ge îb Jehovab di ǀonsa ǃanuǃanu hā. O sida xa matis? Nē ǃhūbaib ǃnâ i ge ǂgui xūna hâ ǂkhabuǂâi kai da ǁkhā na. Î da Jehovaba ǃoaba ǀû. Xawe da ga Jesub khami aiǃgû o, Jehovab di ǂâisa dīsa. O da ge sida tsîna ‘ǃhūbaiba nî dan’.—1Jhn. 5:5.

9. Tae-e da nî dī î da ǀamo ûib di daob ai hâ ǀgara?

⁹ Jesub di daoga da ga sao o, o da ge ǀamo ûiba nî ǃkhōǃoa. ǂKham ǃkhū hâ khoeb ge ge dî. Tae-eb a dī ǁkhāsa îb ǀamo ûiba ǃkhōǃoa. Ob ge Jesuba ǃeream tsî ge mî: “Î hā, î sao te re.” (Mat. 19:16-21) ǀNî Jodeǁîn hîna ge ǂgom tama hâ în ǁîb a Xristu sa. Ob ge Jesuba ǁîna ǃoa ge mî: ‘Ti gūn ge tita ra sao’ tsî tita ge ǁîna ǀamo ûiba ra mā.’ (Jhn. 10:24-29) Nekodemub hîna ge ǀapema ra ǃnâns di ǁanib ge ǃgâiǃgâibasensa Jesub di ǁkhāǁkhādi ǃnâ ǁgau o. Ob ge Jesuba ge mî: “ǁÎb ǃnâ ra ǂgomn” ‘nî ǀamo ûiba ūhâsa.’ (Jhn. 3:16) Sida ǂgomsa da ge Jesub ǃnâ ra ǁgau. ǁÎb ge ǁkhāǁkhā xūna da ga ûiǂui o. Tsî ǁîba ǁgae o. ǁNāsa da ga dī o, o da ge ǀamo ûib di daob ǃnâ nî hâ ǀgara.—Mat. 7:14.

10. Tae-e da nî dī î da Jesuba ǃnāsase ǂan? (Jhn. 17:3)

¹⁰ Jesub daoga da nî sao tsoatsoas aisi da ge aibe. ǁÎba ǂgurose nî ǂan tsoatsoa. (Khomai re Johaneb 17:3 sa) Jesuba ‘ǂans’ ge hoaǁae da nî dī xū-e. Hoaǁae da ge nî dītsâ î da tsēs hoasa ǁîba ǃnāsase ǂan. ǁNās ge ǁîb di ǀgaugu, ǁîb di ǂâiǀgaub tsî ǁîb di māǃkhaidi tsîna da ge nî ǂan. Nēsi da ga gaxuse amab ǃnâ ga ra hâ. Xawe da ge nî aiǃgû Jehovab tsî Jesub tsîn xa ǃnāsase ǂansa.

11. Nē haka ǂkhanide tae-e ǃkhōǂgā hâ?

¹¹ Jehovab ge ge hui da î da Jesuba ǃnāsase ǂan. Tsî ǁnās ǀkha haka ǂkhanide ge mā da ǁîb di mîs ǃnâ. Î da Jesub di ûib tsî aoǁnâ sîsenni hînab gere dī i xa ǃnāsase  ǂan. Nē ǂkhanidi ge ra ǁgau da Jesub ge tae-e gere dīs. Matib gere tsâs. Tsî taenab gere mîs tsîna. Nē haka ǂkhanidi ge ra hui da î da Jesub di aiǁgausa ǀgūse sao. (Heb. 12:3) ǀNî mîdi ǃnâ i ge ra mîba da Jesub ge ǁnāxu daoga. ǁNā-amaga da ga nē ǂkhanide ga ra ôaǃnâ o. O da ge ǃnāsase Jesuba a ǂan ǁkhā. Tsî da ge ǁnās ǀkha Jesub di daoga ǃamkuse a sao ǁkhā.

12. Tae-e da a dī ǁkhā î da nē ǂkhanide xu ǃnāsa xūna hō?

¹² Nē ǂkhanide xu da ga ǃnāsase ga ra ǂan ǂgao o. O da ge khomais ǀguisa hî tide. ǁAeba da ge nî ǁamaǂui î da ǁîn xa ǁkhāǁkhāsen. Tsî ǃgamse ǁîn xa nî ǂâiǃgâ. (ǀGopeǀnōre Josuab 1:8 di, ǀgamiros ǀkha) ǀKhī da ǀgam xūn xa ǃhoaǃgao re hîna hui da ǁkhāna îda. Nē ǂkhanidi xa ǂâiǃgâ tsî khomai da ra xūna ûiǂui ǁkhā.

13. Mati du Jesub ûib xa xoahe hâ ǂkhanide a ûi ûi ǁkhā?

¹³ ǂGurose, nē ǂkhanide ûi ûi re. ǁNāpa gere ī xūna ǁnâu, mû tsî hōǃgâ re. ǁNāsa dīs ǃaroma ôaǃnârode dī re. Sida di ǂkhanin ǃnâ. Jehovab di ǀapeǂhumis xa aiǂhomi-e hâ na. Tae-i ge tsoatsoas ai īs tsî khaos ai īsa. ǁNā xū-i hîna du ra ǁkhāǁkhāsen i xa ôaǃnâ re. ǁNā ǂkhanis ǃnâ du ra khomai khoe-i di khaoǃhūb tsî xūn hoan xa ǂanǂui re. ǃKharaga ǂkhanin hîna ǀgui xū-e ra ǃhoa ra ǀgopeǀnō re. ǀNî ǁaega i ge ǀgui ǂkkhanis di xoa-aoba ǃāsase xūna ra ǁguiǃā. Naub ǀnîsi ǁguiǃā tamana.

14-15. Mati da nē ǂkhanide xu da go ǁkhāǁkhāsen xūna sida ûib ǃnâ nî sîsenū?

¹⁴ ǀGamǁîse, ǁnā ǂkhanide xu du go ǁkhāǁkhāsen xūna ûiǂui re. (Jhn. 13:17) ǁNā-amaga nē ǂkhanide du ga khomai toa o. O dîsen re: Māǂoa ra xū-e nē ǂkhanisa xu go ǂoaxa hîna da ti ûib ǃnâ a sîsenū ǁkhā e? Mati da nē ǂkhanisa xu ra ǂoaxa ǂhâǂhâsa xūn ǀkha nau khoe-e a hui ǁkhā? Khoe-i hîna du a hui ǁkhā i xa ǂâi re. Tsî ǁnāpaxu ǃgâi ǁaeba ôa.  Tsî ǁnāpaxu ǀnamxaǃnâ, ǃamku ǀgaub ǃnâ ǁkhāǁkhāsen du go xūna ǀgoragu re.

¹⁵ Aiǁgau-e kō re mati du nē ǀgam xūna a sîsenǂui-ū ǁkhā na. Jesub ge tempeli ǃnâ mû ǃoataras xa da ge nî ǃhoaǃgao.

16. Markub 12:41 ǃnâ i ra ǂoaxa khami, mûnanai re tae-i ge ǁnāpa gere īsa.

¹⁶ ǃNaeǃkhaisa ûi ûi re. (Khomai re Markub 12:41.) Mûnanai re nē ra ī xūn xa. Nisanni 11, 33ǁî kurib ge tsî i ge wekheba ǃkhau hâ Jesub nî ǁōs xa. ǁÎb ge ǂgui tsēde tempeli ǃnâ ra ǁkhāǁkhā. Xawegu ge xoaǂansabega ǁîba kaise ra ǃgomǃgomba. ǀNî gu ge ǁîba gere dîǃnâ. Tae ǂhanu-eb ūhâsa ǁîb nē xūna ra dīsa. ǀNî gu ge Jesuba ǃgom dîna gere dî ǁîgu ge ǂâi hâ i amaga ǁîb ǃereamhō tide di. (Mrk. 11:27-33; 12:13-34) Nēsib ge Jesuba ǀnîa ǀkhab tempeli diba ǃoa go ī. Nēb go sī ǂnû ǀkhab ge ǃoataradi di oms di ra ǂgaihe. Tsîb ge mari-i ra aohe ǃkhais ǃoagu ǀgui ǂnôa. ǁÎb ge ǁnāpa ǂnû tsî ra kō matin ra khoena marina aosa. ǁÎb ge ǃkhū hâ khoena ra mû matin ǂgui marina ra aoǂgāsa. ǀNîsib ge ǀgūse ǂnôa tsîb ge marin ra aoǂgāhen ra o ra ǀōǀgauba a ǁnâu ǁkhā.

17. ǀGâsa ǃoataras hîna Markub 12:42 ǃnâ ra mî-esa tae-e ge dī?

¹⁷ Khomai re Markub 12:42. ǁAero-i khaoǃgâb ge Jesuba ǀgui kaikhoesa gere kō. Nēs ge “ǀgâsa ǃoataras.” (Luk. 21:2) Ûib ge kaise ǁîsa a ǃgomba. Tsîs ge ǁîsa ǂâusa mari-e ūhâ tama hâ ǂhâs hâ xūna ǁamasa. Xawes ge aiǃgû tsî marin ra aoǂgāhe ǃkhais tawa sâusase ǀgam marirora ra aoǂgā. Jesub ge a ǂan tae-es go ǁnāpa aoǂgāsa. ǀGam mariroras ge ge aoǂgā hîna ge kai ǁkhāsi-e ūhâ tama hâ i ra. ǃGôaǀgaohe i ga ra o. ǁNā maris ge ǂkhari anirodi hîna ge ǂû i ǃaroma gere ǁama-e di tsîna ǂâu tide.

18. Markub 12:43, 44 ǃoagub ge Jesuba tae-e mî ǁnā ǃoataras di mās xa?

¹⁸ Khomai re Markub 12:43, 44 sa. Jesub ge kaise ge tsâǀkhahe nē taras xa. ǁNā-amagab ge ǁîb di ǁkhāǁkhāsabega ǂgai ǁîba ǃoa. Tsî ǁîga ǁnā ǃoatarasara kō kai. Tsî ra mî: “Amase ta ra mîba go, nē ǀgâsa ǃoataras ǁuiǂgaes ǃnâ go aoǂgān hoan xa ǃnāsase go aoǂgā ǃkhaisa.” Tsîb ge ǁnāpaxu ra ǁguiǃā: “Hoan ge ǁîn di ǃnāǂamsiga xu go aoǂgā, xawes kom nēsa ǁîs di tôasiba xu ūs hân hoana go aoǂgāo, ǁîs di ûixū-i hoa-e.” ǁNā ǃoataras ge hoa-i hînas ge ūhâ i e a mā o. Os ge ǁîs di ûiba Jehovab di ǃomman ǃnâ gere ǁnāxu.—Psa. 26:3.

19. Tae ǂhâǂhâsa xū-e da ra ǁkhāǁkhā Jesub di mîdi ǃoataras xab ge mîde xū?

¹⁹ ǁKhāǁkhāsen du go xūna sadu ûib ǃnâ sîsenū re. Dîsen re. Tae-e ta Jesub ge ǃoataras xa a mî mîde xu a ǁkhāǁkhāsen ǁkhā? ǁNā ǃoataras xa ǂâi re. ǂGom ǁkhā da ge a ǁîs ge ǀnîsi Jehovaba ǃnāsase gere māǂgaosa. Xawes ge Jehovaba ǁkhās a xū-i hoa-e ge mā. Tsî Jesub ge ge ǂan i ǁnās go mā mariros. ǁÎb di ǁgûb di mûdi ǃnâ kaise a ǀō-aisa sa. Nēpa i ge ǂhâǂhâsa xū-e sada ǃaroma ra ǂoaxa: Jehovab ge ra ǂkhî ǁkhā da a e da ga ǁîba mā o. Tsî da ga sida ǂgao hoab tsî ǀoms hoas ǀkha ǁnā xū-e dī o. (Mat. 22:37; Kol. 3:23) Jehovab ge ra ǂkhî dī ǁkhā da a xū-i hoa-e da ga ǁîba dība o. ǁNās ge sida ǁaeb tsî ǁkhāsib hîna da ǁîba ǃoabas ǃnâ ra sîsenūb tsîna ǃkhōǂgā hâ. Aiǁgause ǀhaodi tsî aoǁnâ sîsen-i hîna da ra dīn.

20. Mati du ǃoatarasa xu du go ǁkhāǁkhāsen xūna a sîsenū ǁkhā? Aiǁgau-e mā re.

²⁰ Mati du ǃoatarasa xu du ra ǁkhā-ǁkhāsen  xūna a sîsenū ǁkhā? Khoen xa ǂâi re hîna du a mîba ǁkhāna ǁîn ra dī xūnab Jehovaba kaise ra ǃgôaǃgâ di. Tsî ǁnā mîdi hîna du ra mîdi xa a omkhâihe ǁkhāna. Aiǁgause kaira hâ ǃgâsas xa ǂan i du a. Hîna ǂkhabusase ra tsâ tsî ra ǀkhabi māsensa ǁîs nēsisa ǂurusib xa ǃaromahe hâse. ǁKhāsi-e ūhâ tama hâ tsî aoǁnâ sîsen-i ǃnâ ǃgâise a dīǁoasa? Tamas ka io ǃgâsab hîna tsûtsûsa tsî ǁkhōǁkhōsa ǀaeba ūhâb xa ǂâi re. Hîna ra ǂkhabuǂâiba ǁîb mā ǀhaos hoasa sala ǃoa a ī ǁoa amaga. ǁÎn ǀkha ‘ǃgâi mî-e’ ǀgoragu re. (Efe. 4:29) Nē ǀgâsa ǃoatarasa xu du go ǁkhāǁkhâsen-e. ǂÂiǂâiǃnâ nî re Jehovab ge kaise ra ǃgâiaǂgao ǁkhān a xū-i hoa-en ga ǁîba mā o. (ǂKhm. 15:23; 1Tes. 5:11) Nau khoena du ga koa o ǁîn Jehovaba ra mā xūn ǃaroma. Matikōse i ga ǂkharirose mûsen xawes tsîna. O du ge Jesub di daoga ǀgūse ra sao.

21. Tae-e du amabes ǃnâ ra dī ǂgao?

²¹ Kaise da ge ra gangan nē ǂkhanidi Jesub xa ǃnāsase ra mîba dasa. Tsî ǁnās ge ra ī ǁkhā kai î da ǁîba ǁgae. Tsî ǁîb di daoga ǀgūse sao ǁkhā. Tae-i ǃaroma du nē ǂkhanis di ǃâga sadu di omaris ǃoabas ǃnâ sîsenū tsî ǃnāsase ǂanǂui tama? Ada hoaǁae ǂâihō re ǁnā ǁkhāǁkhāsa xu da ga ǃgâiba ga ra hō ǂgao o. O da ge ǁnā ǃâga nî ûi ûi tsî sida di ûib ǃnâ nî sîsenū. Jesub gere dīna da ga ra ǁgae ǂgao o. O da ge ǁîb ge mî xū-e nî ǁnâu. Sao ra ǁkhāǁkhāǃâs ǃnâ da ge nî ǃhoaǃgao tae-e da ǁkhāǁkhāsen ǁkhāsa. Jesub ge ǀuniga se a mî mîde xu khoeb ase.