1. Jehovaba ǁîb ǂgomǂgomsa ǃoaba-aona tae-e ge mā?

JEHOVAB ge ǁîba ǂgomǂgomsase ra ǃoaba khoen hoanab a ǀnam amaga ǁîna ǁîb ǀhaohâb ǃnâ ǃâba mā hâ. ǃKharagaǃnâgu ǃâga da ra ǀhuru xawe da ge hoada a ǀō-aisa tsî da ge hoada ǂhâgu hâ. Apostel Paulub ge ra huida îda nē ǂhâǂhâsa ǁkhāǁkhāǃâsa ǁnâuǃā. Matib nēsa ra dī?

2. Efeseǁîn 4:16 ǃoagu tae-i ǃaroma da ǃgôagu tsî ǀguipa nî sîsen?

² Nē ǁkhāǁkhāǃâs di dana xoas ra ǂoaxa-ūseb ge Pauluba ge ǃgāsa kai, Jehovaba ra ǃoaba khoe-i ǀgui-i nau-e kō tsî “satsa ta ǂhâba tama hâ” ti a mî ǁoa ǃkhaisa. (1Kor. 12:21) ǀHaohâb ǃnâb ǂkhîba nî hâsa da ga ǂhâba-o, o da ge hoada nî ǃgôagu tsî ǀguipa nî sîsen. (Khomai re Efeseǁîn 4:16.) ǀGuiǃnâxase da ga ǀhaohâb ǃnâ a sîsen ǀhao on ge hoan hîna ǀhaohâb ǃnâ hâna ǀnammen hâsa nî hōǃâ tsîb ge ǀhaohâba nî ǀgai.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Ma ǀgaugu ǃnâ da ǀhaohâb ǁanina da ǃgôa hâ ǃkhaisa a ǁgau ǁkhā? Nē ǁkhāǁkhāǃâs ǃnâ da ge nî mû, mati gu ǀhaohâb ǃûi-aoga ǁîgu ǃgôagu hâ ǃkhaisa nî ǁgausa. ǁNāpa xu da ge nî mû ǃgamme tama hâ ǃgâsana da mati ǃgôasiba nî ǁgausa. ǀAms ai da ge nî ǁkhāǁkhāsen sida gowaba ǃamkuse ǃhoa tama khoena da mati ǀnamma nî ǁgausa.

4. Mâ ǁnamas hînab ge Pauluba Romeǁîn 12:10 ǃnâ a mā sa gu ǀhaohâb ǃûi-aoga nî sao?

⁴ Hoa ǀhaohâb ǃûi-aogu ge Jehovab ǃanu gagab ǀkha ǀhaohâb ǃnâ ǁgaumâihe hâ. Xaweb ge mâb hoaba ǃkharagaǃnâgu ǁkhāsiga ūhâ. (1Kor. 12:17, 18) ǀNî gu ge ǀnîsi ǀae ǀgui ge ǁgaumâihe tsî gu ge ǀnî ga ǀaeb tsî kurin xa ra ǃaromahese dī gu gere xūna a dī ǁoa. Xaweb ge ǀhaohâb ǃûi-aoba nauga ǃoa kō tsî “satsa ta ǂhâba tama hâ” ti a mî ǁoa. Nēsa dīs ǃâs ǃnâ gu ge Romeǁîn 12:10 ǃnâb Pauluba mā hâ ǁnamasa nî sao.—Khomai re.

5. ǀHaohâb ǃûi-aoga mati ǃgôasiba ra ǁgaugu tsî nēsa tae-i ǃaroma a ǂhâǂhâsa?

⁵ ǀHaohâb ǃûi-aogu ge ǃgôasiba ra ǁgaugu ǃamkuse gu ga ǃgâgu-o. Nēs ge kaise a ǂhâǂhâsa ǀhao tsîgu ga ǃgomsina a ǃhoaǃgao ǁaeb-ai. Tae-i ǃaroma? ǂGuro Oktoberi 1988ǁî kurib di The Watchtower ǂkhanib ge ra mî: “ǀHaohâb ǃûi-aogu ge nî mûǂan Xristub ǃanu gagaba ra sîsen-ūse ǁîgu ǀguiba Elobmîs tsoatsoas hîna ǃgomsib hîna gu ra hōǃâb tamas ka io mîǁguib hîna gu nî dīb ǀkha nî huigusa a ǂâihō kai ǁkhā ǃkhaisa. (ǃNǃkh. 15:6-15) ǃAnu gagab ge ǀgui ǀhaohâb ǃûi-aob ǀguiba hui tama hâ xawe hoaga a hui ǁkhā.”

6. ǀHaohâb ǃûi-aoga mati ǀguiǃnâxase nî sîsen ǀhao tsî ǀhaohâba nēsa xu mati nî ǀama?

⁶ ǀHaohâb ǃûi-aob hîna nau ǀhaohâb ǃûi-aoga ǃgôahâb ge ǀhaosa gu ga ūhâ ǁaeb hoaba ǂgurose ǃhoa ǂgao tama. ǁÎb ge hoaǁae ǃhoa tama hâ tsî ǁîb ra mî xūn ǀguin a ǂhanu ti ǂâi tama hâ. Xaweb ge ǁîba ǃgamǃgamsen hâ ǀgaub ǃnâ ǁîb ra ǂâi xūna ra mî. Nau ǃgâsagu ra mî xūnab ge ǃamkuse ra ǃgâ. ǁNân hoan ǂamaib ge ǁîba Elobmîsa xu hâ tsoatsoadi xa ra ǃhoa tsî ‘ǂgomǂgomsa tsî gā-ai ǃgāba’ xu hâ daoǁgaude ra sao. (Mat. 24:45-47) ǀHaohâb ǃûi-aogu ga ǀnammi tsî ǃgôasib ǃnâ ǃgomsina a ǃhoaǃgao, ob ge Elob ǃanu gagaba ǁîgu ǀkha hâ tsî nî huigu îgu  ǀhaohâba ra ǀgaiǀgai mîǁguiga dī.—Jak. 3:17, 18.

7. Jesuba ǃgamme tamase hâsa mati gere mû?

⁷ Nētsē gu ge ǀhaohâga ǃgamme hâ khoen tsî ǀgôana ūhâ omaridi tsîna ūhâ. Xawen ge ǃgamme tama hâ ǃgâsan tsîna ǀhaohâgu ǃnâ hâ. Nē ǃgamme tama hâ ǃgâsana da mati nî mû? Jesuba ǁgae tsîda ge ǁîb ge ǃgamme tama hâ khoen xa ūhâ i ǂâiǀgauba nî ūhâ. Jesub ge ǃhūbaib aib ge hâ io ge ǃgamme tama hâ i. ǁÎb ge ǃgamme tamase hâ tsî ǁîb ǁaeb tsî ǂâis tsîna ǁîb ǁgaumâis ai ge ǂnûi hâ-i. Jesub ge ǃgamme, tamas ka io tā ǃgamme ti ge mî tama hâ i. Xaweb ge ǁîba ge mî ǀnî Xristeǁîn ǃgamme tamase hâsa nî ǁhûisa. (Mat. 19:11, 12) Jesub ge ǃgamme tama hâ khoena ge ǃgôa hâ i. ǁÎb ge ǃgamme tama hâ khoena ge ǃgôaǁnâ tama hâ i, tamas ka ion ǃnubusi-e ūhâ khama ge tsâ kai nî tama hâ i.

8. 1 Korinteǁîn 7:7-9 ǃoagub Pauluba Xristeǁîn tae-e nî ǂâiǃgâsa gere ǂhâba?

⁸ Jesub khamib ge Pauluba ǃgamme tamase ǁîb ǁgaumâisa ge dīǀoaǀoa. Paulub ge Xristeǁî-e ǃgammesa tsū xū-i ase ge mû tama hâ i. ǁÎb ge ge mûǂan mâ khoe-i hoa-i ǁî-i mîǁguiba nî dīsa. Xaweb ge Pauluba Xristeǁîna gere ǂkhâǃnâ în ǃgamme tamase Jehovaba ǃoabasa ǂâiǃgâ. (Khomai re 1 Korinteǁîn 7:7-9.) Amaseb ge Pauluba ǃgamme tama Xristeǁîna ge ǃgôaǁnâ tama hâ i. ǂKham khoeb Timoteub hîna ǃgamme tama hâbab ge Jehovab ǃoabas ǃnâ ǂhâǂhâsa xūna a dī kais ge nēsa ra ǃgāsa kai. * (Fil. 2:19-22) ǁNā-amaga i ge ǃgâsaba ǃgammeb hâ tamas ka io ǃgamme tamab hâ ǃkhais ai ǀgui kō tsî ǁgaumâisa ǂhanu tama hâ.—1Kor. 7:32-35, 38.

9. Tae-e da ǃgammeb tsî ǃgamme tamase hâs xa a mî ǁkhā?

⁹ Jesub tsî Paulub tsîkha ge Xristeǁî-i nî ǃgamme, tamas ka io ǃgamme tamase nî hâ ti ge mî tama hâ i. O tae-e da ǃgammeb tsî ǃgamme tamase hâs xa a mî ǁkhā? ǂGuro Oktoberi, 2012ǁî kurib di The Watchtower ǂkhanib ge nē dîsa ǃamkuse ra ǃeream. ǁNāpa i ge ra mî: “Amabes ǃnâ [ǃgamme tsî ǃgamme tama is tsîra] hoara ge Eloba xu hâ ǀkhae. . . . Jehovab  ge [ǃgamme taman hâ] amagan khoena nî tao tamas ka io ǁgaise nî tsâ ǃkhaisa ǂgao tama hâ.” Nēsa ǂâis ǃnâ ūhâse da ge ǀhaohâb ǃnâ hâ khoen hîna ǃgamme tama hâna nî ǃgôa.

10. Mâ ǀgaub ǃnâ da sida ǃgâsan hîna ǃgamme tama hâna ǃgôasiba a ǁgau ǁkhā?

¹⁰ Mati da nî ǁgau ǃgamme tama hâ ǃgâsan di mâsigu tsî tsâsigu tsîna da ra ǃgôasa? ǂÂis ǃnâ da ge nî ūhâ ǀnî ǃgâsan hîna ǃgamme tama hân ge aitsama nē mîmaisa a dīsa. ǀNîn ge ra ǃgamme ǂgao xawe ǁîn a ǃgâiba khoe-e hō tama hâ tsî ǀnîn ge ǁî-i ge ǃgamme hâ i khoe-i xa ge ǁōxū-e. Matib ga mâsiba i xawen ge ǀhaohâb ǃnâ hâ ǃgâsana ǃgamme tama hâ ǃgâsana tā nî dî, tae-i ǃaroman ǃgamme tama hâsa, tamas ka ion ǃgamme-ūn nî khoe-e ra ôahui-e ǂgao ǃkhaisa. Ama as ge ǀnî khoen hîna ǃgamme tama hân huiba nî ǂgansa. Xawe huiban ǂgan tama hâ hîna da ga ǃgammen nî khoe-e ǁîna ôaba on, nē ǃgâsana mati nî tsâ? (1Tes. 4:11; 1Tim. 5:13) ǀKhīda ǃgamme tama ǃgâsan hîna Jehovaba ǂgomǂgomsase ra ǃoaban ta mî xūna kō.

11-12. Tae-e da ga dī o da ǃgamme tama khoena ǁgaise a tsâ kai ǁkhā?

¹¹ ǃGamme tama ǃnarimâra mûǂam-aob hîna ǁîb ǁgaumâisa kaise ǃamkuse ra dīb ge ra mî ǃgamme tamase hâsa xuts kaise a ǀama ǁkhāsa. Xaweb ge ǁgaise ra tsâ ǃgâsan ga hui ǂgaon ra amaga “mati iots ǃgamme tama hâ?” ti a dî o. ǃGamme tama hâ ǃgâsab hîna ǁnâub beros ai ra sîsen nî ge ra mî: “ǀNî ǁaegu ain ge ǃgâsana ǃgamme tama hâ khoen a ǀkhomǀkhomsa khami ra tsâ kai te. Nēs ge ǃgamme tamase hâsa ǀkhaeb ase mûsen kai tama xawe ǃgomsib khama ra tsâ kai.”

¹² ǃGamme tama ǃgâsas hîna Bethels tawa ra sîsens ge ra mî: “ǀNî ǃgâsan ge hoa khoen hîna ǃgamme tama hân ǃgammen nî khoe-e ra ôa tamas ka io mâ ǁâudib hoab ai ra kē ôa ti ra ǂâi. ǀNî ǃnâs ai ta ge Bethels di sîsen-i ǀkha ǃnari ǂoa hâ io, o ta ge ǀhaos ra ūhâ-e ǃuis ai ǁnapa ge sī. ǁGoeǃkhai-e ge mā te ǃgâsas ge ge mîba te ǀhaohâb ǃnâ kha ǀgam ǃgâsakha hîna tita ǀkha ǀgui kuriga ūhâ ga hâsa. ǃGamme ta nî khoe-es ôa huite tama hâ tis ge ǁîsa ge mî, xawes ge ǁnā ǃgâsasa ǀhû-ommi tawam ge sī khami, ǁnā ǀgam ǃgâsakha hâ ǃkhaiba ǃoa ge ī-ūte is mâi-ai ǃâte. Tita tsî nē ǀgam ǃgâsakha ge kaise ge tao.”

13. Mâ aiǁgaude ǀgui ǃgâsas hîna ǃgamme tama hâsa ge ǂkhâǃnâ?

¹³ ǀNî ǃgamme tama ǃgâsas hîna Bethels ai ra sîsens ge ra mî: “ǁKhara aimaba-ao ǃgâsan hîna ǃgamme tama hâna ta ge a ǂan. ǁÎn ge ǃgâise ra dī tsî a māsenxa tsî a ǂkhîǂâixa ǁîn ǃoabas ǃnâ. ǁÎn ge ǀhaohâba kaise ra hui. ǁÎn ge ǃgâi ǂâiǀgauba ūhâ ǁîn ǃgamme tama-is xa tsîn ge ǁîna nau ǃgâsan xan a ǀgapi ti ǂâi tama hâ. ǁÎn ge a ǂkhî ǃgamme taman hâ tsî ǀgôanan ūhâ tama hâ xawe.” ǁNā-amaga i ge kaise a ǁkhoaxa hoa khoen ra ǃgôagu ǀhaohâb ǃnâ hâsa. ǂAnts ge a sa ǃgâsan xats ǀkhomhe tama i tsî surihe tama hâsa tsîts ǀgapiǀgapihe tamas ka io mûhe tamats hâ khama tsâ kaihe tama hâsa. Sa ǃgân a ǀnam tsi ǃkhaisast ge a ǂan.

14. Mati da ǃgamme tama hâ ǃgâsana ǃgôasiba a ǁgau ǁkhā?

¹⁴ Sida ǃgâsan hîna ǃgamme tama hân ge kaise nî ǃgôaǃgâ ǁîna da ga ǁîn ūhâ ǃgâi ǀgaugu ǃgao a ǃgôa o tsî ǃgamme taman hâ ǃkhais ǃgao ǀkhom tama io. ǁÎna ǀkhom tama i tsî da ge Jehovaban ǂgomǂgomsase ra ǃoaba ǃkhais ǃgao nî  ǃgôa nî. Nēti da ga dī on ge sida ǃgâsan hîna ǃgamme tama hâna “satsa ta ǂhâba tama hâ” di da ra mî khama tsâ tide. (1Kor. 12:21) On ge ǁîna nî ǂan ǃgôa nî da ra sa tsî ǁîn ǀhaohâb ǃnâ ra ǀhuru ǃâb tsîna da ra ǃgôaǃgâsa.

15. ǀNî ǃgâsan hîna aoǁnâ sîsen-i ǃnâ ǃnāsase ra dī ǂgaona mâ ǀkharaǀkharana ge dī?

¹⁵ Nētsēn ge ǂgui aoǁnâ-aona ge mîmai în ǀnî hâ gowaba ǁkhāǁkhāsen tsî ǃnâsase dī aoǁnâ sîsen-i ǃnâ. Nēsa dīs ǃaroman ge ǂgui ǀkharaǀkharana nî dī. Nē ǃgâsan ge ǁîn gowab ra ǃhoa ǃnâ-e ǀhaohâba xu doe tsî ǀkhara gowab ra ǃhoa ǃnâ-e ǀhaohâb hîna ǂhâsiba ūhâba ǃoa ra doe. (ǃNǃkh. 16:9) Nē mîǁguiban ge nē ǃgâsana aitsama ge dī Jehovaban ǃnāsase ra ǃoaba ǂgao amaga. Gowaba ǃamkuse ǂans kuriga ra ū, xawen ge nē ǃgâsana ǀhaohâba ǂgui ǀgaugu ǃnâ ra hui. ǁÎn ǃgâi ǂūb tsî ūnhâ ǂans ge ǀhaohâb ǃnâ hâ ǃgâsana ra omkhâi. Nē māsenxa ǃgâsana da ge ra ǃgôaǃgâ.

16. ǀHaohâb ǃûi-aoga tae-i ai ra kō ǃgâsaba gu ga ǀhaohâb ǃûi-aob tamas ka io ǀhaohâb hui-aob ase ǁgaumâi ǂgao-o?

¹⁶ ǀHaohâb ǃûi-aogu ge ǃgâsaba ǃkhō-oa tide, ǀhaohâb ǃûi-aob tamas ka io ǀhaohâb hui-aob ase ǁgaumâihesa xu, ǁîb hâ ǃnâ ǀhaohâb ra sîsen-ū gowabab ǃamkuse ǃhoa tama hâ amaga. ǀHaohâb ǃûi-aogu ge ǃgâsaba Elobmîs ǂgaoǀkhadi ǃoa-ai ǀhaohâb ǃûi-aob tamas ka io ǀhaohâb hui-aob ase nî ǁgaumâi tsî ǁîb ǀhaohâb ǃnâ ra sîsen-ūhe gowaba ra ǃhoa ǀgaub ai tā nî kō.—1Tim. 3:1-10, 12, 13; Tit. 1:5-9.

17. ǁGûna mâ mîǁguiga nî dī ǁîn omariden ga ǀkhara ǃhūba ǃoa a doe-ū o?

¹⁷ ǀNî Xristeǁî omaridi ge ǁîn ǃhūb ǃnân ǁgai xūna ra ī amaga ǀkhara ǃhūba ǃoa ge doe. ǁNā-amagan ge ǁîn ǀgôana ǁnân go doesi ǃhūb di gowab ǃnâ skoli ai ra ǁkhāǁkhāhe. Sîsen-en ga ôa on ge ǁgûn tsîna nē gowaba nî ǁkhāǁkhāsen. Xawe ǁîn ǁgûsigowab ra ǃhoa-e ǀhaohâb tamas ka io ǃgūbis ga hâ os? Omarisa mâ ǀhaohâba nî ǁkhao? ǃHūb di gowab ra ǃhoaǃnâhe ǀhaohâba ǃoan nî ī? Tamas ka ion ǁgûsigowab ra ǃhoaǃnâ-e ǀhaohâba ǃoa nî ī?

18. Galateǁîn 6:5 ǃoagu da mâ ǀgaub ai oms dana-e ǃgôasiba nî ǁgau?

¹⁸ Oms dana-i ge nî mîǁgui ǁî-i omaris mâ ǀhaohâba ǃoa nî īsa. ǁÎ-i ǀgui-i nē mîǁguiba a dī ǁkhā amaga i ge ǁî-i omaris nî ǀama ǀgaub xa nî ǂâi. (Khomai re Galateǁîn 6:5.) Sida ge nē oms di dana-i nî dī mîǁguiba nî ǃgôa. Mâ mîǁguiba i ga dī xawe da ge nēsa nî ǃgôa tsî ǁî-i omarisa ǁkhoreǁhare tsî ǀnamma nî ǁgau.—Rom. 15:7.

19. Omaris dana-e tae-e ǂâis ǃnâ ūhâse nî ǀgore?

¹⁹ ǀNî omaridi ge ǁgûsigowab ra ǃhoaǃnâhe ǀhaohâgu ǃnâ hâ, xawen ge ǀgôana  nē gowaba ǃgâise ǁnâuǃā tama hâ. ǃHūb di gowab ǃnāsase ra ǃhoahe ǃkhaib aib ga ǁnâ ǀhaohâba hâ on ge ǀgôana ǀhaodi ai ra ǃhoahe xūna ǁnâuǃā tide tsî gagasise kai tide. Tae-i ǃaroma? ǀGôan skoli ai ǃhūb di gowab ǃnâ ra ǁkhāǁkhāhe tsî ǁîn ǁgûsigowab ǃnâ ǁkhāǁkhāhe tama amaga. ǁNāti i ga io, o i ge oms dana-e ǃgâise ǂâi tsî gā-aisiba nî ǀgoreba î-i ǁî-i ǀgôana Jehovab tsî ǁîb khoen ǀgūse nî ūhâ mîǁguiba dī. ǁGûn ge ǀnîsi ǁîn ǀgôana nî hui în ǁîn ǁgûsigowaba ǃamkuse ǁnâuǃā, tamas ka ion ge ǁîn ǀgôan ra ǁnâuǃā gowaba ra sîsen-ū ǀhaohâba ǃoa nî doe. Tae-i ǀgui-e i ga oms dana-e dī, xaweb ge ǁnā omaris hâ ǃnâ ǀhaohâba ǁîna nî ǃgôa.

20. Mati da ǃgâsan hîna ǀasa gowaba ra ǁkhāǁkhāsena da ǃgôa hâ ǃkhaisa a ǁgau ǁkhā?

²⁰ Nē da go ǃhoaǃgao ǃaromadi amsi i ge ǂgui ǀhaohâgu ǃnâ ǃgâsana nî hâ ǀasa gowaba ra ǁkhāǁkhāsena. ǁÎn ge supuse ǁgâiǂuisen hō tama hâ. Xawe ǁîn ǀasa gowaba ra ǃhoa ǀgaub ai ǀgui da ga kō tama io, da ge nî mû ǁîn Jehovaba a ǀnamsa tsî ǂgaoba xū ǁîba ra ǃoabasa. ǁÎn îsa ǂūb xa da ga ǂâi-o, o da ge nē ǃgâsana nî ǃgôaǃgâ tsî da ge sida gowaban ǃgâise ǃhoa tama hâ amaga “satsa ta ǂhâba tama hâ” ti ǁîna ǃoa mî tide.

21-22. Mâ aiǂhanuba da ūhâ?

²¹ Kaise da ge Jehovaba ra gangan mâ ǀguiǀguibe ǃgâsa i hoa-eb ǂhâǂhâsa sîsen-e ǁîb ǀhaohâb ǃnâ mā hâ amaga. Nēsi da ga aore, tare, ǃgamme, ǃgamme tama i, ǂkham, kaira, gowaba ǃhoa ǁkhā, tamas ka io ǃgâise ǃhoa tama i, xawe da ge hoada Jehovab mûǁae tsî sida ǃgân mûǁae a ǀō-aisa.—Rom. 12:4, 5; Kol. 3:10, 11.

²² A da Paulub di ǂkhōsa xu da go ǁkhāǁkhāsen xūna sîsen-ū re. Nēsa da ga dī o, o da ge nî mû mati da sida ǃgâsana a ǂkhâǃnâ ǁkhā ǀgausa tsî da ge ǁîna hoaǁae ǀnam tsî nî ǃgôa.