1. Jehovaba tae-i ǃaroma xūna ge kuru?

ǁAEB ge ge hâ-i Jehovab ge ǀguri hâ-i ba. Xaweb ge ǁîba ge ǀguritsâsen tama hâ i. ǀGurib ge hâ-i xaweb ge Jehovaba ge ǂkhî-i. Tib gere tsâ xaweb ge Eloba nau khoen nî ûi tsî ǂkhîse hâsa gere ǂhâba. ǀNammi xa ǁgari-e hâseb ge Jehovaba xūna ge kuru tsoatsoa.—Psa. 36:9; 1Jhn. 4:19.

2. Jesub tsî ǀhomǃgāga mati gere tsâ Jehovab gere kuru xūn xa?

² ǂGuroseb ge Jehovaba ǁîb sîsenǁare-aob Jesuba ge kuru. ǁNapa xu i ge ǁîb ǂguro ǀGôab ǃnâ-ū ‘xūn hoana ge kuruhe,’ miliundi ǀhomǃgāna ǃkhōǂgāhase. (Kol. 1:16) ǁÎb ǁGûb ǀkha sîsens ge Jesuba kaise gere ǂkhî kai. (ǂKhm. 8:30) ǀHomǃgāgu tsîn ge kaise ge ǂkhî-i. ǁÎgu ge ge mû matib Jehovab tsî Jesub tsîna ǀhommi tsî ǃhūbaib tsîna ra kuru ǀgausa. ǀHomǃgāga tae-e ge dī? ǁÎgu ge Jehovaba ‘dâb’ ǀkha ge koa ǃhūbaibab ge kuru-o. Jehovab nau xūna ra kuru ǁaeb hoaba gu ge Jehovaba gere koa, ǃgōsase khoenab ge kuru-o. (Job 38:7; ǂKhm. 8:31) Nē gere kuruhe xūn hoan ge Jehovab ǀnammi tsî gā-aisib tsîna gere ǁgau.—Psa. 104:24; Rom. 1:20.

3. 1 Korinteǁîn 15:21, 22 ǃoagus Jesub xoremarib ǁguibasa tae-e ra ī ǁkhā kai?

³ Jehovab ge ge ǂhâba hâ i în khoena îxa ǃhūbaib hînab ge kurub ai ǁkhoaxase ǀamosib kōse ûi. Adammi tsî Eva hâra ge ǁîra ǀnamxaǃnâ ǁGûba mâǃoa-o, o ra ge  ǀamo ûiba ge ǂoaǃnâ. Nēs ge ǁîra tsî ǁîra ôan ai ǁōba ge hau. (Rom. 5:12) Jehovaba nēs xa tae-e ge dī? ǁNāǁaeb ǂûb aib ge ge mîmâi khoenab nî huisa. (Gen. 3:15) Jehovab ge xoremariba ge mā în Adammi tsî Evas di ǀgôana ǁoreb tsî ǁōba xu xore-e. ǁNāsǃnâ-ūb ge ǁîba ǃoabasa ra ǁhûi khoena ǀamo ûiba a mâ ǁkhā.—Jhn. 3:16; Rom. 6:23; khomai re 1 Korinteǁîn 15:21, 22.

4. Mâ dîde da nē ǁkhāǁkhāǃâs ǃnâ nî ǃhoaǃgao?

⁴ Elob mîmais ǁō hâna khâisa mās dis ge ǂgui dîna ra ǃaroma. Aiǁgause nē khâisa mati nî ī? ǁŌǂoa ge khoen hîna da a ǀnamna mûǃā îda nî khâisan ga māhe-o? Mâ ǀgaub ǃnâs nē khâisa ǂkhîba nî hauba da? Khâis xa ǂâisa mati nî huida îda Jehovab ǀnammi, gā-aisib tsî ǃnūǃnâxasib tsîna ǃgôaǃgâ? ǀKhīda nē dîde ǃhoaǃgao re.

5. Tae-i ǃaroma da hoa khoen ǀgui ǁaeb ai khâisa nî māhesa ǃâubasen tide?

⁵ ǃÂubasen ǁkhā da ge a Jehovab ga ǁîb ǀGôab ǃnâ-ū khoena khâisa mā-on miliundi khoena ǀgui ǁaeb ai khâi tide ǃkhaisa. Tae-i ǃaroma? ǀGui ǁaeb ai i ga khoena khâisa a māhe-o, o i ge kaise nî ǀhomaxa tsî Jehovab ge ǀhomaxa ǀgaub ǃnâ xūna dī tama hâ. ǁÎb ge a ǂan xūn ga ǃamkuse dīhe o, o ǀguin khoena ǂkhîb ǃnâ a ûi ǁkhā ǃkhaisa. (1Kor. 14:33) Jehovab ge ǁîb gā-aisib tsî ǃnūǃnâxasib tsîna ge ǁgau Jesub ǀkhab ge ǂause ǃhūbaiba a aiǂhomi-o khoenab nî kurus aiǃâ. Jesub tsîn ge gā-ai tsî ǃnūǃnâxa ǀgaub ǃnâ ǁîb ǀoadisi kurigu ǂgaeǂguis ǃnāka, Armagedonsa ge ûiǃkharu khoen ǀkha nî sîsen ǀhao, în ǃhūbaiba khâisa nî māhe khoen ǃgao aiǂhomi.

6. ǃNaeǃkhaidi 24:15 ǃoagu hâmna khâisa nî hō?

 ⁶ Hoanǂam-ai i ge a ǂhâǂhâsa Armagedonsa ge ûiǃkharu khoen khâisa nî hō khoena Elob Gaosib tsî Jehovab ǂgaoǀkhādi xa nî ǁkhāǁkhā ǃkhaisa. Tae-i ǃaroma? ǃNāsa khoen hîna khâisa nî mā-en “ǂhanuoǃnân” ǃnāka ra ǁnā amaga. (Khomai re ǃNaeǃkhaidi 24:15.) ǁÎn ge ǂgui xūna nî dawa în Xristub di xoremarib ǁguibasa xu ǀama. ǂÂis ǀguisa hî re matikō sîsen-e i ǃkhōǂgā hâsa miliundi khoen hîna Jehovab xa xū-e a ǀūna ǁkhāǁkhāsa. Nētsē da Elobmîs ǁkhāǁkhāde ra dī khami i mâ khoe-i hoa-e ǁî-e ra ǁkhāǁkhā khoe-e nî ūhâ? Nē khoena ǀhaohâgu ǃnâ ǀgora ǂgāhe tsî ǁîn khaoǃgâ khâisa nî māhe khoena nî ǁkhāǁkhā ǀgauba nî ǁgauhe? ǁNapa da ga sī-o ǀgui da ge nî mû. Xawe ǂan da ge a Xristub ǀoadisi kurigu ǂgaeǂguis khaoǃgâb ‘ǃhūb-aiba ǃKhūb di ǂans xa nî ra ǀoa’ ǃkhaisa. (Jes. 11:9) Kaise ǂûǂûsa sîsen-e da ge ǀoadisi kurigu ǁaeb ǃnâ nî ūhâ.

7. Elob khoena tae-i ǃaroma tsâbaǁhaoxasiba nî ūhâ khâisa ra māhe khoenan ga ǁkhāǁkhā o?

⁷ Xristub di ǀoadisi kurigu di ǂgaeǂguis ǃnân ge Jehovab di ǃoaba-aon hoana nî aiǃgû ǀkharaǀkharana dīsa în Jehovaba ǃgâiaǂgao kai. ǁNā-amagan ge ǁîn hoana tsâbaǁhaoxasiba nî ūhâ tsî khâisa ra māhe khoena nî hui în ǃgâi tama ǂâiǀgaugu tsî turagu tsîna ǃkham ǃoa tsî Jehovab di ǁgaragu ǃoagu ûi. (1Pet. 3:8) Nēs ǀkha da ge a ǂgom ǁkhā khâisa nî māhe khoen Jehovab di ǃgamǃgamsenxa khoen di ǀgaub xa nî ǂgaehesa ǁîn tsîn ǁîn di ‘ǃgâiǃōsiba ra sîsenba’ xui-ao.—Fil. 2:12.

8. Tae-i ǃaroma da a ǃâubasen ǁkhā sida omaris khoen tsî ǀhōsan hîna khâisa nî hōna da nî mûǃā ǃkhaisa?

⁸ ǃAromadi ge hâ ǂgomǃgâ kai da ra de khâisa māhe hâ khoena ra ǀhao-ū khoen, ǁîn ǀnamsabena nî mûǃā ǃkhaisa. Aiǁgause, ǃkharuge ǁaeb ǃnâ ge khâisa a māhe khoen ge ǁōn nîs aiǃân gere mûsen ǀgaub, ǃhoa ǀgaub tsî ǂâi ǀgauba ūhâse khâisa ge māhe. ǁNā-amaga da ge a ǃâubasen ǁkhā Jehovab ǁkhā xū-e nî dīsa. ǂÂis ǃnâ ūhâ re Jesub ge ǁōba ǁoms ǀkha ge ǀgopeǀnō tsî khâisa ǁomsa xu ǂkhaiǂkhaihes ǀkha. (Mat. 9:18, 24; Jhn. 11:11-13) ǁOmsa xu ra khâi khoe-i ge ǂkhaikari i go i ǁaeb ai i goro ǃhoa tsî mûsen ǀgaub-ai ǀgui i tsî i ge ǁnā khoe-e ǁî-i ûib ǃnâ ge ī xūn hoana noxopa ra ǂâihō. Lasarub di aiǁgausa kō re. ǁÎb ge haka tsēde ge ǁō hâ-i tsîs ge ǁîb sorosa gere ǀō tsoatsoa. Xaweb ge Jesuba khâisa a mābi o, ob ge ǁîb ǃgâra xa ge mûǃāhe tsîb ge ǁîb tsîna ge ǂan-i ǁîra a ham ǃkhaisa.—Jhn. 11:38-44; 12:1, 2.

9. Khâisa nî māhe khoena tae-i ǃaroma ǀoasa kurusa ūhâ ǁnâuǃāb tsî sorodi ǀkha oaǀkhī tide?

⁹ Jehovab ge ra mîmâi Xristub ǂgaeǂguis ǃnāka i khoe-e “tita ge ǀaesen hâ” ti mî tidesa. (Jes. 33:24; Rom. 6:7) ǁNā-amaga i ge ǁōba xu khâisa ra māhe khoena ǂuru sorode nî ūhâ, xawen ge ǁîna ǁnā ǁaeb ai ǀoasa kurusa ūhâ tide. ǀOasa kurusan ga ūhâ o, on ge ǁîn di omaris ǁanin tsî ǁîn ǀhōsan tsîna ǁîna mûǃā tide. Xristub di ǀoadisi kurigu di ǂgaeǂguis ǃnāka i hoa khoena ǂaub ǀkha ǀoasa kurusa nî hō khami i ge ra mûsen. ǀOadisi kurigu khaoǃgâ ǀguib ge Jesuba Gaosiba  ǁîb ǁGûba nî mā-oa. ǁNā ǁaeb aib ge Gaosiba khoena ǀoasa kurusa mā tsî nau xūn hoan hînab ge Jehovaba ǂâibasen hâ i na nî dīǀoaǀoa.—1Kor. 15:24-28; J.ǂHa. 20:1-3.

10. Khâisa sado mati nî tsâǀkhā?

¹⁰ ǂÂis ǀguisa hî re mati du ni tsâsa sadu ǀnamsabena du ga ǁkhāba a mû-o. ǂKhîb xa du ǀnîsi nî âi tamas ka io du nî ā? Dâb xa ǀoahâse du Jehovaba koa tsîra karese nî ǁnae? ǂAn da ge a sida ǀnamxaǃnâ ǁgûb tsî ǁîb ǀGôab tsîna da kaise nî ǀnam ǃkhaisa, ǁîkha ge khâisa a ī ǁkhā kai xui-ao.

11. Johaneb 5:28, 29 ǃnâb Jesuba mî hâ mîdi ǃoagu i Eloba ra ǁnâuǀnam khoen ǀkha tae-e nî ī?

¹¹ ǂÂis ǀguisa hî re khâisa nî māhe khoen matiskōse nî ǂkhîsa, Jehovaban nî ǁnâuǀnam gan ǀkhaǀkharana ǁîn ûib ǃnâra dī hîna. Xawe Jehovab ge mā-am tide în khoen hîna ǀkhaǀkharana dī ǂgao tama hâna paradais ǃnâ hâ tsî ǂkhîba ūbē.—Jes. 65:20; khomai re Johaneb 5:28, 29.

12. ǃHūbaib ai nî hâ khoen hoana mati Jehovab xa nî ǀkhae-e?

¹² Gaosib ǂgaeǂguis ǃnākan ge Elob khoen hoana nî mû ǂKhoamîdi 10:22 ǃnâ hâ mîdi a ama ǃkhaisa. “ǀKhaeb ǃkhūb dib ra ǃkhū kai tsî tsû-i xare-eb ǁîba dī ǀaro tama.” Jehovab gagab huib ǀkhan ge Elob khoena gagasise nî kai. Nēs ge ra ǂâibasen ǁîn ge ǂaub ǀkha Xristub khami nî tanisen tsî ǀoasa kurusa nî hō. (Jhn. 13:15-17; Efe. 4:23, 24) Tsēdi ra ǃkharu khaman ge ǁîn sorode on ra ǀgai o nî ǀgai tsîn ge nî ǁnâuǀnamxa khoe kai. Amaseb ge ǁnāǁaeb ai ûiba kaise nî ǁkhoaxa. (Job 33:25) Xawe ǁō hân di khâis xa ǂâisa mati nî huida?

13. Psalmdi 139:1-4 sa mati ra ǁgau Jehovab ǃamkuse a ǂan da ǃkhaisa tsî khâisa mati nēs a ama ǃkhaisa nî ǁgau?

¹³ ǃHoa da go khamib ge Jehovaba ǁîna ǁîn ǂâis tsî īn ge ī ǀgaub tsîna nî mā-oa. ǂÂis ǀguisa hî re nē-i tae-e ra ǂâibasensa. Jehovab ge kaiseb a ǀnam du amaga sadu ra ǂâi, tsâ, mî tsî dī xūn hoana mû tsîra ǃkhōmâi. ǁNā-amagab ge ǁîba khâisab ga mādu o ī du ge ī ǀgaub ǃnâ nî hau-oa du. Gao-aob Davib ge ge ǂan-i Jehovab hoada ǃamkuse a ǂan ǃkhaisa. (Khomai re Psalmdi 139:1-4.) Jehovab ǃamkuse a ǂan da ǃkhaisa da ra ǁnâuǃā o, o da mati ra tsâ?

14. Jehovab sida ǃamkuse a ǂan ǀgaub xa da ga ǂâi o, o da mati nî tsâ?

¹⁴ Jehovab ǃamkuse a ǂan da ǃkhais xa da ga ǂâi-o, o da ge tā tsūse nî tsâ. Tae-i ǃaroma? ǂÂis ǃnâ ūhâ re Jehovab ge kaise ǃgamse ra tsâba da. Jehovab aiǃâ da ge sida hoada a ǀō-aisa. Sida ûib ǃnâ ge ī xūn hîna nēsi da a ī ǀgauba ra ǃaromanab ge ǁîba ǁîb ǂâis ǃnâ ūhâ. Nēs ge kaise ra ǁkhaeǂgaoda. Tā da ge ǀguri da hâ khama nî tsâ. Mâ minuti tsî mâ tsēs hoas aib ge Jehovaba sida hâba tsî huidab nî ǀgau-e ra ôa.—2Kro. 16:9.

15. Khâisa mâ ǀgaub ǃnâ Jehovab di gā-aisiba ra ǁgau?

¹⁵ Khoen ga ǁōba ǃao o, on ge ǁîn khākhoena ǁōb ǀkha a ǃaoǃao nî ǁkhā tsîn ge dī taman ga hâ xūna a dī ǁkhā. ǁGâuab ǂgaeǂguis ǃnāka hâ khoen ge nē ǃaob gagasa ra sîsen-ū tsî khoena ra ǁgari în ǁîn ǀhōsana ǀapexū tsî ǂhanu tama  xūna dī. Xawen ge ǁîna sida a ǁgari ǁoa. Sida ge a ǂan sida khākhoen ga ǃgam da xaweb Jehovaba sida ûiba nî mā-oa ǃkhaisa. (J.ǂHa. 2:10) Tae-i ǀgui-en ga dī xawen ge ǁîna sida Jehovab ǀkha ūhâ ǀhōsagusisa khôa hō tide. (Rom. 8:35-39) Jehovab ge ǁîb gā-aisiba ge ǁgau khâis di ǃâubasensab ge mā da o. Nē ǃâubasensa da ūhâ amaga da ge Satanni ǀkhāb ai hâ khoen ga ǁōb ǀkha ǃaoǃao da, xawe ǁîn ra mî xūna dī tide tsî i ge ǁnās xōǀkhā ǁkhoaǂgaosiba ra mā da i da Jehovab ǀkhāb ai ǂgomǂgomsase mâǀgara.

16. Mâ dîde da nî dîsen tsî ǁnā dîdi ǃereamde mati nî ǁgauda Jehovaba da ǂgomǃgâ hâ ǃkhaisa?

¹⁶ Jehovab khākhoen ga sado ǁōb ǀkha a ǃaoǃao o, sadu ûiba du Jehovab ǃomǁae nî xū? Mati du nî ǂan ǁnā ǁaeb ai du Jehovaba nî ǂgomǃgâsa? Dîsen re, ‘tsēs hoasa ta ra dī mîǁguiga ra ǁgau Jehovab ai ta ra ǂgomǃgâsa?’ (Luk. 16:10) ǀNî dîs ge, ‘ti ǁaeb tsî mari-e ta ra sîsen-ū ǀgauba ra ǁgau, Gaosiba ta ga ǂgurose mâi ob Jehovaba nî kōǃgâ te ǃkhaisa ta ra ǂgomsa?’ (Mat. 6:31-33) Nē dîra du ga î ti-a ǃeream-o, o du ge a ǂan Jehovaba du ra ǂgomǃgâsa tsî du hā nî ǃgomsi i hoa i ǃgao a aiǂhomisa ǃkhaisa.—ǂKhm. 3:5, 6.

17. (a) Khâisa mati Jehovab a ǃnūǃnâxa ǃkhaisa ra ǁgau? (b) Mati da ǃgôaǃgâsiba a ǁgau ǁkhā Jehovab di ǃnūǃnâxasib ǃgao?

¹⁷ Jehovab ge ǀnai mîmâi hâ mâ ǁaeb nē eloxoresa ǃhūbaiba nî hîkākāsa. (Mat. 24:36) ǁÎb ge ǃâuǁkhui tsî ǁaeb aisi xū-e dī tide. ǁÎb ge kai ǁkhoreb ǀkha ǁō hâ khoena khâisa ra mā ǂgao xaweb ge ǁîba a ǃnūǃnâxa. (Job 14:14, 15) ǂHanu ǁaeb hînab khoena khâisa nî mābab ge ǃâu hâ. (Jhn. 5:28) ǃGâi ǃaromade da ge ūhâ Jehovab ǃnūǃnâxasiba da nî ǃgôabade. ǂÂis ǀguisa hî re, Jehovab ǃnūǃnâxasib ge sida tsî ǂgui khoen tsîna ǁaeba ge mā îda “ǃhobasen.” (2Pet. 3:9) Jehovab ge ǂhâba hâ în ǂgui khoena ǀamo ûiba hō. ǁNā-amaga da ge ǁîb ǃnūǃnâxasiba da ra ǃgôaǃgâ ǃkhaisa nî ǁgau. Mati? ‘ǀAmo ûiba ǃoa ǃkhōǂuibasen’ hâna ôa tsî Jehovaba ǀnam tsî ǃoabas ǀkha huis ǃnâ-ū. (ǃNǃkh. 13:48) On ge ǁîn tsîna sida ge ǀama khami Jehovab di ǃnūǃnâxasiba xu nî ǀama.

18. Tae-i ǃaroma da nau khoen ǀkha ǃnūǃnâxase nî hâ?

 ¹⁸ Jehovab ge ǀoadisi kurigu nî ǃkharus kōse nî ǃâu ǀoasa kurusab sida xū nî ǃâubasens aisi. ǁNā ǁaeb kōseb ge Jehovaba sida ǁorena nî ǀûba da. Sida tsîn ge ǁîb aiǁgausa sao tsî khoen ǃnâ ǃgâi xūna nî ôaǂui tsî ǁîn ǀkha ǃnūǃnâxase nî hâ. ǀGui ǃgâsas di aiǁgausa kō re. ǁÎs aob ge kaise ge ǂâiǂhansen tsoatsoa tsî ǀhaode ǃoas tsîna ge ī ǀû. “Kaise i ge ge ǃgom-i” tis ge ra mî. “Sîm ûib ge kaise ǃhaese ge dawa tsîm ge omaris asem ge ūhâ i ǀapedi tsîna ge sīǃnâ hō tama hâ i.” Xawe nēn hoan ǃnâs ge nē ǀnamxaǃnâ tarasa ǃnūǃnâxase ǁîs kaikhoeb ǀkha ge hâǀgara. ǁÎs ge Jehovab ai kō tsî ge ǀûsen tama hâ i. Jehovab aiǁgausa sao tsîs ge ǁîsa ǃgomsib ai kō tama i tsî ǁîs kaikhoeb ǃnâ hâ ǃgâi xūn ai ǂâisa ge ǂnûi. “Ti kaikhoeb ge kaise ǃgâi ǂūba ūhâ tsîb ge ǁkhāb as kōse nē ǂâiǂhânsens di tsâsiga ra ǃkhâmǃoa” tis ge ra mî. Kaise i ge a ǂhâǂhâsa sida omaris ǁanin tamas ka io ǀhaohâb ǃnâ hâ khoen hîna ǃgomsina ra hōǃan ǀkha da ǃnūǃnâxase nî hâ ǃkhaisa.

19. Tae-e da nî dī?

¹⁹ Jesub tsî ǀhomǃgāgu ge kaise ge ǂkhî-i ǃhūbaib ge kuruhe o. Xawe gu ge ǁîga ǁnās xa ǃnāsase nî ǂkhî ǃhūbaib ǀoasa kurusa ūhâ khoen hîna Jehovaba ǀnam tsîra ǃoaban xa ǀoahe hâsa gu ga mû-o. ǂÂis ǀguisa hî re ǁnān hîna ǀhommi khâisa māhe tsî Xristub ǀkha sīra ǂgaeǂguin nî ǂkhî ǀgausa, ǃhūbaib ai hâ khoen ǁîn sîsenga xu ra ǀama ǃkhaisan ga mû o. (J.ǂHa. 4:4, 9-11; 5:9, 10) Mûnanai re ǂkhîb di ǁgamrogu, tsûb xa ra ǃaromahe ǁgamroga ǃkhōǃkhuni tsî ǀaeb, tsûaǂgaob tsî ǁōb tsîn nî ǀkhai ǁaeb ai ûisa. (J.ǂHa. 21:4) ǁNā ǁaeb nî hās kōse sadu ǀnamxaǃnâ, gā-ai tsî ǃnūǃnâxa ǁGûba ǁgae re. Ti du ga dī o, o du ge sadu ǂkhîba nî ǃkhōǀgara hā nî ǃgomsin hoan ǃnâ. (Jak. 1:2-4) Kaise da ge ra gangan Jehovab ge mîmâi-o “ǁō hâna xu khâi-i nîra hâ ti.”—ǃNǃkh. 24:15.