1. Mâ aiǂhanuba da ūhâ?

JEHOVAB di ǀhaohâb di ǃâda a ǃkhais ge kaise a kai aiǂhanu. Kaise da ge ra ǃgâiaǂgao tsîda ge ǂkhîb ǃnâ sada ǃgâsan ǀkhā ǀhaohâb ǃnâ Jehovaba ra ǃoaba. Sado mâ ǃâ-e ra ǀhuru ǀhaohâb ǃnâ?

2. Apostel Pauluba ǁîb sîǂkhanidi ǃnâ mâ ǂkhōsa ge sîsen-ū?

² Apostel Paulub ge ǁîb sîǂkhanidi ǃnâ a sîsen-ū ǂkhōsa xu da ge a ǁkhāǁkhāsen ǁkhā, mâ ǃâ-e da ǀhaohâb ǃnâ ūhâsa. Nē sîǂkhanidi ǃnâb ge Pauluba ǀhaohâba khoe-i soros ǀkha ge ǀgopeǀnō. ǀHaohâb di ǃgâsan tsînab ge soros di ǁanin ǀkha ge ǀgopeǀnō.—Rom. 12:4-8; 1Kor. 12:12-27; Efe. 4:16.

3. Mâ ǃnona xūna da nē ǁkhāǁkhāǃâs ǃnâ nî ǁkhāǁkhāsen?

³ Nē ǁkhāǁkhāǃâs ǃnâ da ge ǃnona ǂhâǂhâsa xūn hîna da Paulub ǂkhōsa xu a ǁkhāǁkhāsen ǁkhāna nî kō. ǂGurose da ge nî ǁkhāǁkhāsen hoada Jehovab di ǀhaohâb ǃnâ ǃkhai-e ūhâ tamas ka io ǃâba ra ǀhuru * ǃkhaisa. ǀGamǁîse da ge nî mû tae-e da a dī ǁkhāsa sida ǀhaohâb ǃnâ ra ǀhuru ǃâba da ga mûǃā tama io tsî ǃnonaǁîse da ge nî mû mati  da Elob ǀhaohâb ǃnâ da māhe hâ sîsen-e ǀoasase nî dīsa.

4. Romeǁîn 12:4, 5 tsîna tae-e ra ǁkhāǁkhā da?

⁴ ǂGuro xū-i hîna da Paulub ǂkhōsa xu ra ǁkhāǁkhāsen i ge Jehovab omaris ǃnâ da hoada ǂhâǂhâsa ǃâba ra ǀhurusa. Paulub ge nē ǂkhōs xab ge ǃhoa o, o nēti ge tsoatsoa, “ǀGui soros ǃnâ da ǂgui uniǁaede ūhâ khami, tsî hoa uniǁaedi ǁkhā sîsenna ūhâ tama khami, ǁnās ǁkhās khami da ge ǂguida a ǀgui soro, tsî ǀguiǀguibe da ge nē-e, nau-i di uniǁae.” (Rom. 12:4, 5) Pauluba tae-e gere ǂâibasen? Hoada ǃkharagaǃnâgu ǃâga ǀhaohâb ǃnâ ra ǀhuru xawe i ge mâ khoe-i hoa-e kaise a ǂhâǂhâsa.

5. Jehovaba mâ “māde” ǀhaohâba ge mā?

⁵ ǀHaohâb ǃnâ ǃâ-e ra ǀhuru ǃgâsan xa i ga ǃhoahe o, o du ge ǀnîsi mûǂam-aogu xa nî ǂâi. (1Tes. 5:12; Heb. 13:17) Jehovab ge Xristub ǃnâ-ū ǁîb ǀhaohâba ‘khoen māde ge mā.’ (Efe. 4:8) Nē ‘khoen mādi’ ge ǂgaeǂguira soros ǁanigu, ǂgaeǂguira sorosa ra hui ǃgâsagu, ǁnâub komites ǁanigu, ǃnarimâra mûǂam-aogu, Elobmîs skolgu tawa ra ǁkhāǁkhā ǃgâsagu, ǀhaohâb ǃûi-aogu, tsî ǀhaohâb hui-aogu tsîna ǃkhōǂgā hâ. Nē ǃgâsagu hoagu ge ǃanu gagab ǀkha ǁgaumâihe hâ i gu Jehovab di gūna kōǃgâ tsî ǀhaohâba ǀgaiǀgai.—1Pet. 5:2, 3.

6. 1 Tesalonikaǁîn 2:6-8 ǃoagu gu ǃgâsagu hîna ǃanu gagab ǀkha ǁgaumâihe hâ ga tae-e ra dī ǂgao?

⁶ ǃGâsagu ge ǃanu gagab ǀkha ra ǁgaumâihe îgu ǃkharagagu sîsen-e dī. Hoa soros nî ǀama gan soros di ǁanina ra sîsenǁare khami gu ge ǃanu gagab ǀkha ǁgaumâisa ǃgâsaga ǃgarise ra sîsen îb hoaraga ǀhaohâba ǁnapa xu ǀama. Khoen xa gu nî koahe ga gu ge nē sîsen-e dī tama hâ. Xawe gu ge ǃgâsana omkhâi tsî ra ǀgaiǀgai ǂgao. (Khomai re 1 Tesalonikaǁîn 2:6-8.) Jehovaba da ge ra gangan nē gagasise ǀgaisa ǃgâsagu hîna nau khoen di ǂhâsiga ǁîgu din ǀgapise ra mâi gu ǃaroma.

7. Jehovaba ǀoasase ra ǃoaba ǃgâsana mâ ǀkhaega ra hōǃâ?

⁷ ǀHaohâb ǃnâ hâ ǃgâsan ǀnîn ge sîsaben, ǀō-aisa aimâba-aon tamas ka io aimâba-aon ase ǁgaumâisa. ǃHūbaib ǂhawase hâ ǃgâsan ge ge mîǁgui în ǀoasase aoǁnā, nēs ǀkhan ge ǂgui khoena ge hui în Xristub di ǁkhāǁkhāsabe kai. Jehovaba ǀoasase ra ǃoaba ǃgâsan ǂgui mari-i tsî ǂgui xūn tsîna ūhâ tama hâ xaweb ge Jehovaba ǁîna ǂgui ǀkhaega ra mā. (Mrk. 10:29, 30) Sida ǃgâsana da ge kaise a ǀnam tsîda ge ra ǃgâiaǂgao ǁîn a ǀhaohâb di ǃâ ǃkhaisa.

8. Tae-i ǃaroma i ǃgâi ǂhôasa ra aoǁnâ khoe-i hoa-e Jehovab mûǁae a ǀō-aisa?

⁸ ǁGaumâisa ǃgâsagu tsî ǀoasase ra aoǁnâ ǃgâsan ǀguina ǀhaohâb ǃnâ ǃâba ra ǀhuru? Hî-i. Mâ ǃgâsa i hoa i hîna ǃgâi ǂhôasa ra aoǁnâ i ge Elob mûǁae tsî ǀhaohâb ǃnâ a ǂhâǂhâsa. (Rom. 10:15; 1Kor. 3:6-9) Kaise i ge a ǂhâǂhâsa îb ǀhaohâba Jesub Xristuba ǁkhāǁkhāsabena dība. (Mat. 28:19, 20; 1Tim. 2:4) ǁĀǁnâsa tsî ǁāǁnâsa tama aoǁnâ-aon hoan ge nē sîsen-e ǂgurose ǁîn ûib ǃnâ ra mâi ǂgao.—Mat. 24:14.

9. Tae-i ǃaroma da sida Xristeǁî ǃgâsade ra ǃgôaǃgâ?

⁹ Jehovab ge ǂhâǂhâsa sîsen-e ǃgâsade mās ǃnâ-ū ra ǁgau ǁîdeb ra ǃgôasa. ǁÎb ge nē ǃgamme taradi, ǁgûdi, ǃoataradi  tsî ǃgamme tama ǃgâsadi hîna ǁîba ǂgomǂgomsase ra ǃoabade ra ǃgôaǃgâ. Elobmîs ge ǂgui taradi hîna ge Eloba gere ǂkhîǂkhîdi xa ra ǃhoa. ǁÎdi ge gā-aisib, ǂgoms, ôasasib, ǁkhoaǂgaosib, māǀnamxa tsî di ge ǃgâi sîsenga gere dî ǃkhais ǃgao gere koahe. (Luk. 8:2, 3; ǃNǃkh. 16:14, 15; Rom. 16:3, 6; Fil. 4:3; Heb. 11:11, 31, 35) Kaise da ge Jehovaba ra gangan Xristeǁî taradi hîna ǀhaohâgu ǃnâ hâ di ǃgao. ǁÎdi tsîn ge nē îsa ǀgauga ūhâ.

10. Tae-i ǃaroma da kaira ǃgâsana ra ǃgôaǃgâ?

¹⁰ Kaise da ge ra ǃgâiaǂgao kaira ǃgâsan tsîna da ǀhaohâgu ǃnâ ūhâsa. ǀNî ǀhaohâgu ǃnân ge kaira ǃgâsana hâ hîna ge ǁîn ûib hoaba ǂgomǂgomsase Jehovaba a ǃoabana tsî ǀnî kaira ǃgâsan ge amaba nēsi ǀgui ge ǁkhāǁkhāsen. Ī as ge nē ǃgâsan kurigu ra ī khama ra ǀaeǂgâ ǃkhaisa. Nē ǀaeb mâsigu xa ǃaromahe hâsen ge aoǁnās tsî ǀhaohâb ǃnâs tsîna ǀgaisase a sîsen ǁoa. Xawen ge nē ǃgâsana ǁkhān as kōse ra aoǁnā tsî ǁîn ǀgaiba ra sîsen-ū în nau khoena ǂkhâǃnâ tsî ǁkhāǁkhā. Tsî da ge sida hoada ǁîn ge ǁîn ûib ǃnâ a ǁkhāǁkhāsen xūna xu ra ǀama. ǁÎn ge Jehovab tsî sida mûǁae kaise a îsa.—ǂKhm. 16:31.

11-12. Sadu ǀhaohâb ǃnâ hâ ǂkham ǀgôan xa du ge mati ǂkhâǃnâ-e?

¹¹ Sida ǂkham khoen xas tsîna ǂâi re. ǁÎn ge ǁGâuab tsî ǁîb eloxoresa ǂâiǀgaub xa ǀoa hâ ǃhūbaib ǃnâ ra kai tsî ǂgui ǃgomsina ra hōǃâ. (1Jhn. 5:19) ǁNā-amaga da ge kaise ra ǂkhâǃnâ-e ǂkham ǀgôan ǀhaodi ai ǃeream, aoǁnā tsî ǁkhoaǂgaose ǁîn ǂgomsa ra mâba ǃkhaisa da ga mû o. Sadu ǂkham khoedu ge ǂhâǂhâsa ǃâba Jehovab ǀhaohâb ǃnâ ra ǀhuru.—Psa. 8:2.

¹² Xawe ǀnî ǃgâsan ge ǂgom tama hâ ǁîn tsîn ǀhaohâb ǃnâ ǂhâǂhâsa ǃâba ūhâsa. Tae-e nî huida î da mûǂan hoada ǂhâǂhâsa ǃâba ǀhaohâb ǃnâ ra ǀhurusa? Hāre î da kō.

13-14. ǀNî khoena mati io ǂhâǂhâsa ǃâban ǀhaohâb ǃnâ ǀhuru tama khami a tsâ ǁkhā?

¹³ ǀGamǁî xū-i hîna da Paulub ǂkhōsa xu a ǁkhāǁkhāsen ǁkhā-e ǃgaoǃgâ re. ǁÎb ge ǂguin nētsē ra hōǃâ ǃgomsiba ǃoa ra ǁnaeǁgau. ǁÎn ge ǂgom tama hâ ǂhâǂhâsan a sa ǀhaohâb ǃnâ. Paulub ge ge mî: “ǂAis ga mîo: ǃOm tama ta, o ta kom soros di tamao, ǁîs ǃaromas kha soros di tama? Tsî ǂgaes ga mîo: Mû tama ta, o ta kom soros di tamao, ǁîs ǃaromas kha soros di tama?” (1Kor. 12:15, 16) Pauluba tae-e gere ǂâibasen?

¹⁴ ǀHaohâb ǃnâ hâ ǃgâsan ǀkha du ga ǀgopeǀnōsen o, o du ge a ǃgôaǁnāsen tsoatsoa ǁkhā. ǀHaohâb ǃnân ge ǀnî ǃgâsana ǃgâise ra ǁkhāǁkhā, ǃamkuse xūna ra aiǂhomi tamas ka io ǃgâsana ǃgâise ǁkhaeǂgao tsîra ǂkhâǃnâ. ǀNîsi du ge a ǂâi ǁkhā, nē xūna du nau khoen ra dī khami dī hō tide ti. Nēs ge ra ǁgau ǃgamǃgamsenxa du a ǃkhaisa. (Fil. 2:3) Xawe ǂanbasen re. ǃNās hoasa du ga ǁkhāsiba ūhâ khoen ǀkha ǀgopeǀnōsen o du ge nî ǂkhabuǂâi. Paulub ra mî khami du ge ǀhaohâb ǃnâ du xū-i tsîna ǃoaǂui tama khami a tsâ ǁkhā. Tae-e nî huidu î du nē tsâsiga ǃkhamǃoa?

15. 1 Korinteǁîn 12:4-11 ǃoagu da tae-e ū da hâ hōdi xa nî mûǂan?

¹⁵ ǂÂis ǃnâ ūhâ re, Jehovab ge ǂguro Xristeǁîna ǃanu gagab ǃnâ-ū hōde ge mā, xawen ge hoa Xristeǁîna ǀgui hōde ge māhe tama hâ i. (Khomai re 1 Korinteǁîn 12:4-11.) Jehovab ge ǁîna ǃkharagaǃnâgu hōde tamas ka io ǀkhaega ge mā. Xawe i ge mâ Xristeǁî i hoa-e ge ǀō-aisa i. Nētsē da ge ǃanu gagab di buruxa hōde ūhâ tama hâ, xawes ge ǂâisa a ǀgui. Hoa da ǀguitikō ǁkhāsiga ūhâ tama hâ xawe da ge Jehovab mûǁae a ǀō-aisa.

16. Mâ ǀapemās apostel Paulub disa da nî sao?

¹⁶ Nau Xristeǁîn ǀkha da nî ǀgopeǀnōsens xa da ge Apostel Paulub ge mā  ǀapemāsa nî sao: “A i mâ-i hoa-e ǁî-i sîsenni ǂhaniba ôaǃnâ, o i ge ǁî-i ǀgui-i tawa koa-e nî ūhâ, tsî nau-i tawa tama.”—Gal. 6:4.

17. Paulub di ǀapemāsa da ga sao-o, o da mati nî ǀama?

¹⁷ Apostel Paulub ǀapemāsa sao tsî da ga sida ra dī xūna ôaǃnâ o, o da ge nî mû sida tsîn ǀō-aisa ǁkhāsigu tsî hōde ūhâsa. Aiǁgause, ǀnîsib ge ǀhaohâb ǃûi-aoba ǁkhoaxa ǃhoade mā tama hâ xawe ǁkhāǁkhāsabedīs ǃnâ a ǃgâi. Tamas ka iob ge ǀnîsi nau ǀhaohâb ǃûi-aogu ǁāxasiga ra aiǂhomi khami dī tama hâ xaweb ge ǁîba a tsaura tsî a ǀnamxaǃnâ tsîn ge ǃgâsana harase ǁîb ǀkhā a ǃhoa ǁkhā, Elobmîsa xu hâ ǀapemāden ga ôa-o. Tamas ka iob ge ǁîba ǀnîsi harase ǃhao khoena ra ǃkhōǃoa khoe-i ase a ǂansa. (Heb. 13:2, 16) Sida ǁkhāsiga da ga mûǂan-o, o da ge ǃgâise nî tsâ sida ǀhaohâb ǃnâ ra ǀhuru ǃâb ǃaroma tsîda ge sida ǃgâsan hîna ǀkhara hōde tamas ka io ǁkhāsiga ūhâna suri tide.

18. Mati da sida ǁkhāsiga nî ǀāǀā?

¹⁸ Mâ ǃâb ǀguiba da ga ǀhaohâb ǃnâ ǀhuru xawe da ge hoada ū da hâ ǁkhāsiga nî omkhâi ǂgao tsî dī da ra xūna nî ǃgâiǃgâi. Jehovab ge ǁîb ǀapeǂhomis ǃnâ-ū ra ǁkhāǁkhā da î da omkhâisen. Aiǁgause, wekheb ǁaegub ǃnâ hâ ǀhaos tawa da ge aoǁnā sîsen-i ǃnâ da nî ǀāǀāsen ǀgauba ra ǁkhāǁkhā-e. ǁNāpa du ra ǁkhāǁkhāsen xūna sîsen-ū i du ra?

19. Matits gaosib aoǁnā-aon di skola a sīǃnâ ǁkhā?

¹⁹ Gaosib aoǁnā-aon skoli tsîn ge hâ. Aore ǃgâsagu tsî tare ǃgâsadi hîna ǀoasase aoǁnā sîsen-i ǃnâ ra sîsen tsî 23 sa xu 65 kurigu ǃnâ hân ge nē skola a ǂgâ ǁkhā. Tātsēs tsîna du nē skola sīǃnâ tide ti du ge ǀnîsi ra ǂâi. ǂGui xūn hîna nē skola ǃoa du a īǁoa tira ǂâi kai du na xoa khâis xa, nē skola ǃoa du ra ība ǂgao ǃaromade xoa khâi re. ǁNapa xu ǀapede dî re î du nē skola sīǃnâ. ǃGarise sîsens tsî Jehovab huib ǀkhats ge sīǃnâ ǁoats a tits go ǂâi hâ i xūna a sīǃnâ ǁkhā.

20. Romeǁîn 12:6-8 ǃnâ da tae-e ra ǁkhāǁkhāsen?

²⁰ ǃNonaǁî xū-i hîna da Paulub ǂkhōsaxu a ǁkhāǁkhāsen ǁkhā i ge Romeǁîn 12:6-8 ǃnâ hâ. (Khomai re.) Nēpab ge Pauluba ǁkhapa ge ǁgau mâ khoe-i hoa-i ǀhaohâb ǃnâ ǃkharagagu ǁkhāsiga ūhâ ǃkhaisa. Xaweb ge nēsisa ra mî î da ū da hâ ǁkhāsiga sîsen-ū tsî ǀhaohâb ǃnâ hâ khoena omkhâi tsî ǀgaiǀgai.

21-22. Tae-e da Felici tsî Roberta xu a ǁkhāǁkhā- sen ǁkhā?

²¹ Robert * ti ǀōn hâ ǃgâsab di aiǁgausa du kō re. ǀKhara ǃhūb ǃnâb ra ǃoaba hînab ge ǁîba ǁîb ǃhūb Bethelsa ǃoa ge sî oahe. Xū-eb dīsa tama tib ge ǃgâsagu xa a mîbahe xaweb ge ǁîba ge mî: “ǂGui ǁkhâga ta ge ǃgâi tamase gere tsâ, ti ǁgaumâisa ta ǃgâise dī tama ti da gere ǂâi amaga. ǀNî ǁaegu ai ta ge Bethelsa xū gere oa ǂgao.” ǁÎb di ǂkhîbab ge mati hō oa? ǀNî hâ ǀhaohâb ǃûi-aob ge ǁîba ge mîba Jehovab ǀnai da ge ūhâ i ǁgaumâidi ǃnâ gere ǁkhāǁkhāda sa, î da ǁnā da go ǁkhāǁkhāsen xūna nē da ūhâ ǁgaumâis ǃnâ sîsen-ū. ǁNā ǁaeb aib ge Roberta ge mûǂan ǀnai ge ǃkharu xūnab nî xū tsîb nēsib a dī ǁkhā xūn ai ǁîb ǂâisa nî mâisa.

²² ǃGâsab Felice Episcopob tsîn ge ti gere tsâ. ǁÎb tsî ǁîb taras tsîn ge 1956ǁî  kuri Gilead skoli ai ge hâ-i tsîra ge Boliviab ǃnâ ra ǃnarimara mûǂam-ao sîsen-e nî dī ga ge ǁgaumâihe. 1964ǁÎ kurib ǃnâ ra ge aore axaba ge hō. Felici ge ra mî: “Kaisem ge ge ǃgombahe i nē sîsen-i hînam a ǀnam-e xūsa. Ama-e ta ga mî o, o ta ge kurib ǀgaiba ǁkhoa-ose gere tsâ tsî gere ǂkhabuǂâi. Xawe ta ge ti ǂâiǀgauba Jehovab huib ǀkha ge dawa tsî ǁgû-i ase ti ǀasa ǁgaumâisa ge ūǃoa.” Sada tsîna Roberti tsî Felici khama ra tsâ? ǀNai du ge ūhâ i aiǂhanuga du nētsē ūhâ tama ǃkhais ǃaroma du ra ǂkhabuǂâi? ǁNati-i ga ra io sadu di ǂâiǀgauba dawa re, i du nēsi du tae-e Jehovaba a diba ǁkhās ai ǂâisa ǂnûi. Nēs ge sado kaise nî ǂkhî kai. Sa hōdi tsî ǁkhāsigu tsîna sîsen-û ǀgara re îts nau khoena hui. Nēsats ga dī ots ge ǂkhîba ra omkhâi ǀhaohâb ǃnâ.

23. Tae-e da ǁaeba ǁāmaǂui tsî nî dī tsî sao ra ǃhoaǃâs ǃnâ da tae-e nî ǃhoaǃgao?

²³ Mâ ǀguiǀguibe khoe-i hoa-i ge Jehovab ǃoa-ai a ǀō-aisa. ǁÎb ge ra ǂhâba î da ǁîb omaris ǃâ kai. ǁAeba ū tsîda ge nî ǂâiǃgâ tae-e da nî dīsa, î da sida di ǃgâsana omkhâi. Tsî da ge ǁnapa xu ǃgarise nî sîsen î da aiǁgau-i ase ī. Nēsa da ga dī o, o da ge ǀhaohâb ǃnâ da ǃâ-e ra ǀhuru khami nî tsâ. Xawe tae-e da a mî ǁkhā nau khoena da ǀhaohâb ǃnâ ra mû ǀgaub xa? Mati da ǁîna ǀnammi tsî ǃgôasiba nî ǁgau? Nēsa da ge saora ǃhoaǃâs ǃnâ nî ǃhoaǃgao.