Marias tsî Johanneb a hâra ge Filipensa xu sîsenni ǃaroma ra sī khoena gere aoǁnâba. Koronas ǁaeb ǃnâs ge Mariasa ǁîs gere hâ ǃnâ ǃhūb ǃnâ ǀgui Elobmîs ǁkhāǁkhāde ge tsoatsoa tama hâ i xawe nau ǃhūgu ǃnâs tsîna. Matis ge nēsa dī?

Marias ge ǁîs Elobmîsas ra ǁkhāǁkhā khoena gere dî Elobmîsa ra ǁkhāǁkhāsen ǂgao khoe-en ǂan tamasa. ǁÎ-i ge î ti gere mî, os ge gere ǂan îs ǁî-i ai mâi-aiǃgâ-e. Nēti ī dîsa dîs ge ǃnāsa ǁaegu ai ǃgâi ǀamǂoasa ge ūhâ i. Mâ ǀgaugu ǃnâ? Elobmîsa xūn ra ǁkhāǁkhāsen xūn xa a ǃgâibahe khoen ge ǁkhāǁkhāsenan ra xūna nau ǀaokhoen tamas ka io ǀhōsan ǀkha ra ǀgoragu ǂgao. Tae-e ge hā Marias ge nē dîsa Elobmîsas ra ǁkhāǁkhā khoena a dî o?

Marias Elobmîsa ra ǁkhāǁkhā khoes Jasmin ti ǀon hâs ge ǁîsa haka khoen Elobmîsa ra ǁkhāǁkhāsen ǂgaon ai ge mâi-aiǃgâ. ǁÎn di ǀguis ge Kristine ti ǀon hâ. ǁÎs ge Elobmîs ǁkhāǁkhās xa kaise ge ǁkhoaxabahe i tsî Mariasa ge ǂgan is ǀgam ǃnāra wekheb ǃnâ sarihe. Marias ge Kristinesa ge dî Elobmîsa ra ǁkhāǁkhāsen ǂgao khoe-es ǂan tama hâsa, os ge ǁîsa “îo, ti ǀhōsadi ai ta ge nî mâi-aiǃâ du di ge mî.” ǃNūbu ǁaeroba ǁnās khaoǃgâs ge Kristinesa ǁîs haka ǀhōsade Marias ai ge mâi-aiǃgâ Elobmîsa gere ǁkhāǁkhāsen ǂgaode. Ēgas ge Kristines tsîna ǁîs ǀnî ǀhōsana Marias ai ge mâ-aiǃgâ tsîn ge ǁîn tsîna ǁkhā xū-e ge dī.

Kristines ge gere ǂhâba în ǁîs ǀaokhoen Filipens ǃnâ hân tsîna Elobmîs xa ǁkhāǁkhāsen. ǁNāpaxus ge ǁîs ǀgôas Andreas ǀkha ge ǃhoa. Andreas ge ǂguro gere ǂâi, ‘Jehovab ǃoaba-aon ǂgoms a ǀāsa ǃkhaisa tsîn Jesub ǃnâ ǂgom tamasa tsîn ǀoro testaments ǀguisa ra sîsenūsa.’ Xawes ge ǁîsa ǀgui Elobmîs ǁkhāǁkhās khaoǃgâ ge mûǂan ǂgoms gere xūn ge ama tama hâ īsa. ǃNās hoasas ge ǀāsa xū-e Elobmîsa xu gere ǁkhāǁkhāsen os ge gere mî “ǁnās ga Elobmîs ǃnâ gara hâ, o i ge a ama.”

ǁAeroba ǃkharu tsîs ge Andreasa, ǁîs ǀgam ǀhōsa ra tsî sîsenǁare-aora tsîna Marias ai ge mâi-aiǃgâ. Andreas ge Angela ti ǀon hâ mikisasa ge ūhâ i. Nē kaikhoes ge ge ǂgī i xawe hoaǁae Marias tsî Angelas tsîn ge Elobmîs ǁkhāǁkhāsa gere dī, o gere ǃgâ. Marias ge nēs xa ge ǀū-i tsîs ge Angelasa ǀguitsē Andreasa ge mîba, îs Marias ai mâi-aiǃgâ-e tsîs ge ǁnāpaxū Elobmîs ǁkhāǁkhāsa ge tsoatsoa. Angelas ge ǁkhāǁkhāsens gere xūna ge ǀnam-i. ǂGuro ǁkhâb ǃnâs ge ǁîsa ǂgui Elobmîs xoade ge ǃkhōmâi tsî gere ǂhâba î ra haka ǃnāde Elobmîs ǁkhāǁkhāsa dī. Angelas ge Andreas huib ǀkha, internets ǃnâ-ū ǀhaode gere hâǃnâ.

Marias ge ge ǁnâu Kristines aob Josuab ge ǁîra Elobmîs ǁkhāǁkhāsa ra dī ǁaeb ai kaise înganǀgēb  rasa gere ǁgausa. ǁNās ǀkhas ge Mariasa ǁîba ge dî, Elobmîs ǁkhāǁkhās ǃnâb ra ǃâ ǂgaosa. Josuab ge ge ǃeream, ‘tita ge ǃâs ǀguisa nî dī xawe tā tita dîde dî tsî du ga dîde a dî, o ta ge tita nî ǃâ ǀû.” Xaweb ge Josuaba ǃnūbu ǁaeroban ǁkhāǁkhāsa tsoatsoa hâs khaoǃgâ ǂgui dîde ge dî tsoatsoa. ǁÎb ge ǁnās khaoǃgâ Elobmîs ǁkhāǁkhās ǀkha gere aiǃgû ǂgao.

Marias ge dî dîsa xu-i ge ǂgui Elobmîs ǁkhāǁkhāde ge tsoatsoahe. ǂGuin ge dîs ǃnâ-ū Elobmîs ǁkhāǁkhāde a tsoatsoa, amagas ge Mariasa nau ǃgâsana ge ǂgan în ǁîsa hui. ǃGôaǀhaohe ras ǃoagus ge Mariasa 28 Elobmîs ǁkhāǁkhāde haka ǃkharagagu ǃhūgu ǃnâ ge tsoatsoa.

Nē ǁkhāǁkhāǃâs ǃnâ go ǂgurose a ǃhoaǃgaohe khoes, Jasmin ti ǀon hâs ge Aprili 2021 ge ǁāǁnâhe. Kristines ge Meib 2022 ge ǁāǁnâhe tsî Filipensa ǃoa ge oa îs ǁîs omaris ǀkha sī hâ. Kristines xa ge Marias ai mâi-aiǃgâhe ǀgam khoera tsîn ge ge ǁāǁnâhe. Angelas ge ǀoro ǁkhâroga ǃkharu tsî ge ǁāǁnâhe tsî nēsisa ǁnaetisa aimâba-aose ra ǃoaba. Kristines aob Josuab, ǁîra ǀgôas Andreas tsî nau khoen Elobmîs ǁkhāǁkhāsa ge tsoatsoan ge nēsi ǃgâise ra aiǃgû.

ǂGurogam ǁaeb Xristeǁîn ǁaeb ǃnâs tsînas ge ǃgâiǂhôasa ǀaokhoen tsî ǀhōsan ǁaegu gere khoraǂuisen. (Jhn. 1:​41, 42; ǃNǃkh 10:​24, 27, 48; 16:​25-33) Elobmîsa du ra ǁkhāǁkhā khoe-i tsî naun ǃgâiǃgâibasensa ra ǁgaun tsîna du tae-i ǃaroma dî tama hâ, “ǀnîsi du khoe-e a ǂan Elobmîsa ra ǁkhāǁkhāsen ǂgao-e?” Sadu tsîn ga ǀnîsi ǁkhā dîsa a dî, o du ge īǁkhāsib ga hâ o, ǂgui khoena a ǀhao ū ǁkhā Elobmîsa ra ǁkhāǁkhāsen ǂgaona.