7ǁÎ ǁKHĀǁKHĀǃÂS
15ǁÎ ǁNAETSANAS Koa re Elob ǂguro ǃnaesabeba!
Mati du Jehovab ǀûbasa xu ǃgâiba ra ǀama?
“Xawe sats tawas ge ǀûbasa hâ.”—PSA. 130:4.
ǁKHĀǁKHĀSEN DA NÎ XŪN
Elobmîs ǃnâ hâ aiǁgaude da ge nî sîsenū î da ǁguiǃā Jehovab mati ra ǀûba dasa. Nē ǁkhāǁkhāǃâs ge nî hui da î da Jehovab “ǀûbaba” ǃgôaǃgâ.
1. Khoe-i ga ǀûbatsi ta ge go ti a mî, o i ǀnî ǁaegu ai tae-i ǃaroma a ǃgom ǁnāsa ǁnâuǃāsa?
ǀNÎSITS ge ǃgâise nî tsâ khoe-i ga mî o, “ǀûbatsi ta ge go.” ǁNās ge ra ǁkhaeǂgao, khoe-ets go tsûtsû i ra xū-e a mî tamas ka io dīsats ga ǂan o. Xawe ǃnāsa ǁaega i ge a ǃgom khoe-i “ǀûbatsi ta ge go” ti ga mî, o i tae-e ra ǂâibasensa ǂansa. ǀNîsi i ge khoe-e ra ǂâibasen noxopa ro a ǃgâi ǀhōsagu ǃkhaisa. Tamas ka io i ra ǂâibasen ǁî-i sats ǀkha ǃhoa ǂgao tamasa? Tamas ka io i ra ǂâibasen khoe-i ī go xū-i xa ǃhoa ǂgao tamasa tsî i saro ǀhōsagusisa ǀgui tama hâ ǃkhaisa? Khoen ge ǃkharagagu xūna ra ǂâibasen, mîn ga o ǀûba tsi ta ge go ti.
2. Xoadi ǃnâ i Jehovab ǀûbasa mati ra ǁguiǃāhe? (ǀGamirosa mû re.)
2 Jehovab ǀoasa kurusa ūhâ tama khoena ra ǀûba ǀgaub ge sada ra ǀûbagu ǀgauba xu ra ǀkhara. Khoe-i ge Jehovab ra ǀûba ǀgaub ǃnâ a ǀûba ǁoa. Psalmdi xoa-aob ge Jehovab xa saora-e ge mî: “Xawe sats tawas ge ǀûbasa hâ, sats nî ǃaoǃgâhe ǁkhāse.” a (Psa. 130:4) Jehovab tawas ge ama “ǀûbasa” hâ. ǁÎb ge ra ǁgauda ama ǀûbas tae-e ra ǂâibasensa. Hebreǁî xoadi ge ǀûbab xa hâ mîsa ra sîsenū, nēs ge Jehovab ǀûbasa ǃoa ra ǁnaeǁgau tsî khoen ra ǀûba ǀgaub ǃoagu a sîsenūhe ǁoa.
3. Mati i Jehovab ra ǀûba ǀgauba sada ǀûba ǀgauba xu ra ǀkhara? (Jesajab 55:6, 7)
3 Jehovab ga khoe-e ǀûba, o i ge ǁî-i ǁoreba ra ǀariǂuihe. Tsî da ge noxoba Jehovab ǀkha ǀgū ǀhōsagusisa a ūhâ ǁkhā. Kaise da ge ra ǃgôaǃgâ Jehovab hoase hoaǁae ra ǀûba dasa.—Khomai re Jesajab 55:6, 7 sa.
4. Matib Jehovaba ra hui da î da ǁnâuǃā ama ǀûbas tae-e ra ǂâibasen ǃkhaisa?
4 Jehovab ra ǀûba ǀgaub ga sada ǀûba ǀgauba xu ǀkhara, o da mati ǀûbas di ama ǂâibasensa ǁnâuǃā ǁkhā? Jehovab ge ǃgâi aiǁgaude ra sîsenū hui dasa, î da ǁnâuǃā matib ra ǀûba da ǃkhaisa. Nē ǁkhāǁkhāǃâs ǃnâ da ge ǀnîna nî ǃhoaǃgao. Mû da ge nî matib Jehovaba ǃhobasen da ga o ǁorena nî ūbēsa. Tsî nî mā-amsa î da ǁîb ǀkha ǁkhapa ǀgū ǀhōsagusisa ūhâ. Nē aiǁgaude da ra ǃhoaǃgao khami i ge sada ǃgâi tsî ǀkhomxaǃnâ ǁGûba da ūba hâ ǀnammi tsî ǃgôaǃgâsib tsîna nî kai. Jehovab ge ǁîb ǀûba ǀnamxasiba ǂguiǃnâgu ǀgaugu ǃnâ ra ǁgau da.
JEHOVAB GE ǁORENA RA ŪBĒ
5. Tae-e ra ī Jehovab ga sada ǁorena ǀûba o?
5 Elobmîs ǃnâ i ge ǃnāsa ǁaeba ǁorena kai ǃgommi ǀkha ra ǀgopeǀnōhe. Gao-aob Davidi ge ǁîb di ǁorena saora ǀgaub ǃnâ ge ǁguiǃā: “ǂHanuoǃnâsib ge ti danasa go ǃnā tsî kaise ǃgom ǃnaob khami a ǃgomba te.” (Psa. 38:4) Xawe Jehovab ge ǃhobasen ran di ǁorena ra ǀûba. (Psa. 25:18; 32:5) Hebreǁî mîs ǀûbas ǃaroma ra sîsenūhes ge “ūkhâi” tamas ka io “tani” ti ra ǂâibasen. ǀNîsi da ge Jehovaba ǀgaisa khoeb ǁorena sada di ǃhōde xu ra ūǁnâb ase a mûnan-ai ǁkhā.
“ǀÛbab” (Psa. 32:5)
6. Jehovaba matikō ǃnūse sada di ǁorena ra ūbē?
6 Elobmîs ge ǀkhara aiǁgaude sîsenū tsî ra ǁgau matikō ǃnūseb Jehovaba sada ǁorena ra ūbēsa. Psalmdi 103:12 ge ra mîba da: “Aiǂoas huriǂoasa xu ǃnūs ǁkhās khamib ge ǁîba ǁoren âda sada xu ǃnūse ra ūbē.” Sores ǂoas tsî sores ǂgâs tsîn ge ǀgam ǃkharagagu ǁaegu ai ra ī tsî tātsē ǀgui ǁaeb ai ī tide. ǁNās ge ra ǂâibasen Jehovab sada di ǁorena kaise ǃnūse ra ūbēsa. Nēs ge ra ǂgomǃgâ kai da, Jehovab sada di ǁorena hoase ra ǀûba ǃkhaisa.
“Aiǂoas huriǂoasa xu ǃnūs ǁkhās” khami (Psa. 103:12)
7. Elobmîsa mati ra ǁguiǃā Jehovab sada di ǁoren ǀkha tae-e ra dīsa? (Mixab 7:18, 19)
7 Jehovab ga sada ǁorena ǃnūse ūbē xaweb noxopa ǂâis ǃnâ ra ūhâ ǀgara? Hî-î, Gao-aob Hiskiab ge sao rase Jehovab xa ge xoa: “Ti ǁoren hoanats ge sa ǃgâb ai a sâusâu xui-ao.” (Jes. 38:9, 17) Nēs ge ra ǂâibasen Jehovab ǃhobasen ran di ǁorena ǃnūse āxū tsî ǁkhapa kō tamasa. Nē mîdi ge sao rases tsîna a mîhe ǁkhā: “Sats ge ti ǁorena ī tama i ge hâ i khami ra ūǃoa.” Elobmîs ge nē ǂâibasensa ǀnî hâ xoadi ǃnâs tsîna ǃamkuse ra ǁguiǃā. Jehovab ge ǁkhā mîde Mixab 7:18, 19 ǃnâ ra mî. (Khomai re.) ǁNā xoadi ǃnâb ge Jehovaba ra mî, sada di ǁorenab ǃgamse hurib ǃnâ ra aoǂgāsa. ǀOrokam ǁaeb ǃnâ i ga xū-e hurib ǃnâ ǃgamse ǁnā, o i ge ǁkhapa ge hō-e tama hâ i.
“Ti ǁoren hoanats ge sa ǃgâb ai a” sâu xui-ao (Jes. 38:17)
“Sats ge sida ǁoren hoana hurib di ǃgamsib ǃnâ nî aoǂgā” (Mix. 7:19)
8. Tae-e da go nēs kōse ǁkhāǁkhāsen?
8 Elobmîs ge ǃgāsase ra ǁgau Jehovab ga sada ǁorena ǀûba, ob hoase ra ūbēsa î da tā ǀhapitsâsen. Davidi ge mî khami i ge ī: “ǀKhaehen ge hâ ǁnān ǃûǂamde ǀûbahe tsî ǁoren âna ǃgū-aibahe hâna; ǀkhaeheb ge hâ ǁnā khoeb, Elob xa ǁîb di ǁore-i xare-e ǃgôabahe tamaba.” (Rom. 4:7, 8) ǁNās ge ama ǀûbasa.
JEHOVAB GE ǁORENA RA ǀARIǂUI
9. Matis Elobmîsa ra hui da î da mû Jehovab hoase ra ǀûba da ǃkhaisa?
9 Xoremarib ǁguibas ǃnâ-ūb ge Jehovaba ǃhobasen ran di ǁorena ra ǀariǂui. Kō re matis Elobmîsa ra ǁguiǃāsa Jehovab ra dī xū-e. Elobmîs ǃnâ da ge ra khomai Jehovab sada ǁorena ǁābē tsî ra ǀariǂuisa. Nēs ǃnâ-ū i ge ǁore ao-e ra ǃanuǃanuhe. (Psa. 51:7; Jes. 4:4; Jer. 33:8) Jehovab ǂûb ge sao rase nēsa ra ǁguiǃā: “Sadu ǁoren ga ǀaob khami ǀapa, xawen ge tsamaros khami nî ǃuri. ǁÎn ga ǀapase mûsen xawen ge gūǀûn khami nî ǃuri.” (Jes. 1:18) Kaise i ge a ǃgom ǀgaisase a ǀapa xū-e ǃuri xū-e xu ǁāǂuisa. Jehovab ge ra hōhōǃnâ da sada ǁoren a ǁā ǃanuǃanuhe ǁkhāsa tsîn ǁkhapa mûsen tidesa.
“Sadu ǁoren ga ǀaob khami ǀapa, xawen ge tsamaros khami nî ǃuri” (Jes. 1:18)
10. Jehovab ra ǀûba da ǀgaub xas Elobmîsa mati ra ǁguiǃā?
10 ǃKharugo ǁkhāǁkhāǃâs ǃnâ da go ǃhoaǃgao khami i ge, sada ǁorena ‘suruden’ ǀkha a ǀgopeǀnōhe ǁkhā. (Mat. 18:32-35) Sada ǁoren ge ra ǀarosen ǃnās hoasa da ga ǁore o. ǁÎba da ge kaise surude hâ. Jehovab ga sada ǁorena ǀûba, o i ge sada surudenab ra ǀariǂui khami ī. ǁÎb ge ǀnai ǀûbahe hâ ǁoren ǃaroma matare kai da tama hâ. Suruden ga ǀariǂuihe o i khoe-e ra ǃgâiaǂgao, khami da ge ra ǃgâiaǂgao Jehovab ga ǀûba da o.
“Î sida ǀhapina ǀûba da” (Mat. 6:12)
11. Elobmîs ga mî o Jehovab ge sada di ǁorena ra “ǀariǂui,” os ǁnāsa tae-e ra ǂâibasen? (ǃNaeǃkhaidi 3:19)
11 Jehovab ge sada ǁorena ǀûbas ǀguisa di tama, ǁînab ge ra ǀariǂui. (Khomai re ǃNaeǃkhaidi 3:19 sa.) Surudeb ga ǀariǂuihe, o i ge ǁnā maris go ǂkhanib ǃnâ a ǂgaeǀarihe khami ī. Xawe i ge khoe-e noxopa ǁnā marisa a mû ǁkhā. Xawe xū-e ǀariǂuis ge a ǀkhara. Nēsa ǁnâuǃās ǃaroma da ge nî ǂâi oa, ǃkharuge ǁaeb ǃnâ gere sîsenūhe ink-i ge supuse ǁgam-i ǀkha ge ǀarihe ǁkhā i. Khoe-i ge ǀâ lapihe ū tsî xoahe hâ xūna ge ǀaribē ǁkhā i. ǁNā-amaga i ge suruden gere ǀariǂuihe, o hoase gere bē. Nau khoen ge ǂguro go xoahe hâ i xū-e ge mû tama hâ i. ǁNā surudeb ge tātsē ī tama hâ i khami i ge ge ī-i. Kaise da ge ra ǃgôaǃgâ ǂansa Jehovab ga sada ǁorena ǀûba, o i ī tama i ge hâ i khami ra mûsen ǃkhaisa.—Psa. 51:9.
“Ob ge ǁîba sa ǁorena nî ǀariǂui” (ǃNǃkh. 3:19)
12. Jehovab ǃâusa ra sîsenū ǀgaub di aiǁgaus xa da tae-e ra ǁkhāǁkhāsen?
12 ǀKhara ǀgaub ge noxopa hâ Jehovab matib sada ǁorena ra ǀûbasa ra ǁguiǃāsa. ǁÎb ge ra ǁguiǃā: “ǃÂus khami ta ge sadu dīsāde ge ǃgombē tsî sadu ǁorena tsamaros khami.” (Jes. 44:22) Jehovab ga ǀûba o i ge ǁîb kai ǃâusa sîsenū tsî sada dīsāde ra ǁkhaes khami ī în ǁorena tā mûsen.
“ǃÂus khami ta ge sadu dīsāde ge ǃgombē” (Jes. 44:22)
13. Jehovab ga sada ǁorena ǀûba, o da mati ra tsâ?
13 Nē aiǁgausa tae-e ra ǁkhāǁkhā da? Jehovab ga sada ǁorena ǀûba, o da ge tā nî ǀhapitsâsen sada di ǁoren ǃaroma. Jesub Xristub di ǀaob ǃnâ-ū i ge sada di surudena hoase ge ǀariǂuihe. Jehovab ga ǁnā ǁorena ǀûba, o i ge ǁnā ǁorena da go dī tama hâ i khami ī. Sada ǁorena xu da ga ǃhobasen, o i ge ra ǁgau Jehovab go ǀûba dasa.
JEHOVAB GE ǁÎB ǀGŪ ǀHŌSAN ASE ǁKHAPA RA ŪǃOA DA
Jehovab ra māda ǀûbas ge ra mā-am î da ǃgâi ǀhōsagusisa ǁîb ǀkha ūhâ (14ǁÎ xoaǀgorasa mû re)
14. Mati da a ǂgomǃgâ ǁkhā Jehovab nî ama ǀûba dasa? (Ai-īsiba mû re.)
14 Jehovab ga sada ǁorena ǀûba, o da ge ǂgomǃgâsiba ūhâ ǁîb nî ǁkhapa sada ǀhōsa kaisa. Nēs ge nî hui da î da tā kaise ǀhapitsâsen. Tā da ge nî ǂâi Jehovab noxopa sada ǀkha ǁaixa tsî ǀgauga ra ôasa îb ǁkhara da. ǁNāti ī xū-i ge tātsē ī tide. Tae-i ǃaroma da a ǂgomǃgâ ǁkhā Jehovab ga ǀûba dab go ti mî o? Jehovab ge kēbo-aob Jeremiaba ge mîba: “Tita ǁîna ǁoren âna nî ǀûba tsî ǃûǂamdi ân xa ǃaruǀî ǂâi tide xui-ao.” (Jer. 31:34) Paulub ge ǁkhā mîde gere sîsenū mîb ge o: ‘ǁÎn di ǁoren xa ǃaruǀî ǂâi tide xui-ao.’ (Heb. 8:12) ǁNāsa amabes ǃnâ tae-e ra ǂâibasen?
“Tsî ǃûǂamdi ân xa ǃaruǀî ǂâi tide xui-ao” (Jer. 31:34)
15. Mâ ǀgaub ǃnâb Jehovaba sada di ǁorena ǂâihō tide?
15 Elobmîs ǃnâ i ge “ǂâihō” ti hâ mîsa, khoe-i ǃkharuge ǁaegu ǃnâ ge ī xū-i xa ra ǂâi-e ǃoa ǀgui ǁnaeǁgau tama. Xawe i ge xū-e ra dī khoe-e ǃoas tsîna a ǁnaeǁgau ǁkhā. Eloxoresa khoeb Jesub xōǀkhā ge ǃgâuhe hâ îb ge sao rase ge ǂgan: “ǂÂis ǃnâ ūhâ te re Jesutse, sa gaosib ǃnâts ga sīo.” (Luk. 23:42, 43) ǁÎb ge Jesuba ge ǂgan tama hâ i, îb ǁîb xa ǁnā ǁaeb ai ǂâi. Jesub ǃereams ge gere ǁgau ǁnā khoebab khâisa nî mā ǃkhaisa. ǁNā-amagab ga Jehovaba mî o sada di ǁorenab ge ǂâihō tide ti, o i ge ra ǂâibasen sadab ǀûba tsî xū-e dī tidesa îb ǁkhara da sada di ǁoren ǃaroma hānîǁaeb ǃnâ.
16. Elobmîsa mati ra ǁguiǃā ama ǀûbasa xu ra hā ǃnorasasiba?
16 Elobmîs ge ǀkhara aiǁgaus tsîna ra sîsenū tsî ra hui da, î da ǁnâuǃā ama ǀûbasa xu ra hā ǃnorasasiba. ǀOasa kurusa da ūhâ tama hâ amaga da ge a “ǁoreb di ǃgā.” Xaweb ga Jehovaba ǀûba da, o da ge ǃgān “ǁoreba xu ǃnoraǃnorahe” hân khami ī. (Rom. 6:17, 18; J.ǂHa. 1:5) Jehovab sada ǁorena ǀûba hâsa da ga ǂan, o da ge ǃnoraǃnorahe hâ ǃgān khami a ǂkhî.
“Tsî ǁoreba xu ǃnoraǃnorahe” (Rom. 6:18)
17. ǀÛbaba mati ra ǂgauǂgau da? (Jesajab 53:5)
17 Khomai re Jesajab 53:5 sa. Elobmîs ge ra mî, ǁore-aoda a amaga da ge ǁkhōǁkhōsa ǀaeba ūhâ khoe-i khami ī. Xoremarib ǁguibas Jehovab ge ǁîb ôab ǃnâ-ū a mādas ge ra ǂgauǂgau da. (1 Pet. 2:24) ǁOre da ga, o da ge Jehovab ǀkha da ūhâ ǀhōsagusisa ra khôa. Xoremarib ǁguibas ǃnâ-ūb ge ra ǀûba da tsî da ge ǁkhapa ǀgū ǀhōsagusisa ǁîb ǀkha ūhâ ǁkhā. ǁKhōǁkhōsa ǀaeba xu ra ǂgauǂgauhe khoe-i ra ǂkhî khami da ge sada tsîna ra ǂkhî, Jehovab ǀkha da ūhâ ǀhōsagusis ga ǃgâiǃgâihe tsî da ga ǁîb xa ūǃoahe o.
“ǁÎb ǂnauǀhapidi ge ge ǂuruǂuru da” (Jes. 53:5)
JEHOVAB ǀÛBAS SADA ÛIGA RA TSÂǀKHĀ ǀGAUB
18. Tae-e da go ǁkhāǁkhāsen Elobmîs ǃnâ hâ aiǁgaude xu Jehovab ǀûbas xa? (Boksisa mû re “Jehovab ra ǀûba da ǀgaub” ti hâsa.)
18 Tae-e da go ǁkhāǁkhāsen nē aiǁgaude xu Jehovab ǀûbas xa? Jehovab ga sada di ǁorena ǀûba, o i ge sada ǁoren ge tātsē ī tama hâ ī khami ī. Tsî da ge ǂgomǃgâsiba ūhâ hānîǁaeb ǃnâb ǁnā ǁoren ǃaroma ǁkhara da tide ǃkhaisa. Nēs ge ra īǁkhā kai, î da ǃgâi ǀhōsagusisa sada ǀhomsi ǁGûb ǀkha ūhâ. Xawe da ge a ǂan Jehovaba xu ra hā ǀûbab a ǀkhae ǃkhaisa tsîb nēsa ǀnamda tsîb a māxa amaga ra dīsa, anu tama da hâ ǃkhais ǃaromas ose.—Rom. 3:24.
19. (a) Tae-i ǃoagu da ǃgôaǃgâxasiba nî ǁgau? (Romeǁîn 4:8) (b) Tae-e da saora ǁkhāǁkhāǃâs ǃnâ nî ǃhoaǃgao?
19 Khomai re Romeǁîn 4:8 sa. Kaise da ge ra ǃgôaǃgâ Jehovab ra ǀûba ǃkhais ǃaroma. (Psa. 130:4) Xawe da ga Jehovab nî ǀûba dasa ǂhâba, o da ge ǂhâǂhâsa xū-e nî dī. ǃGaoǃgâ re Jesub ge tae-e a mîsa: “ǁNān sa ǃoagu ra tsūdīnats ga ǀûba, ob ge sa Îb ǀhommi ǃnâ hâb tsîna nî ǀûba tsi.” (Mat. 6:14, 15) ǁNā-amaga da ge Jehovaba ǁgae tsî nauna nî ǀûba. Xawe ǁnāsa da mati a dī ǁkhā? Saora ǁkhāǁkhāǃâs ge nî ǁgau da nēs tae-e ǃkhōǂgā hâsa.
46ǁÎ ǁNAETSANAS Gangan da ge ra Jehova
a Hebreǁî gowab mîs ge ǀûbab ti hâ mîsa ra sîsenū, ǀgui ama ǀûbab ǀguib hâsa ǃoa ra ǁnaeǁgausa, ǃkharagagu ǀûba ǀgaugu hâ xawe. ǂGui Elobmîdi ge Psalmdi 130:4 ǃnâ hâ ǂhâǂhâsa ǂâisa sîsenū tama hâ.
