NĒTSĒN ge ǂgui khoena ǀō-aisa ǀgaub ǃnâ ra hâ-ūhe ǂgao tsî ǀgapi aiǂhanuga ra ǂhâba. Matikō aiǂhanugan ga ūhâ xawen ge noxopa ra ǂhâba. Nēti ī khoen ge ǁîn xa ǀgui ra ǂâi tsî ūn hâ xūna gangan tama hâ. Elobmîs ge ra mî ǀuniga tsēdi ǃnân khoena nēti nî tanisensa.—2Tim. 3:2.

ǂGui kurigan ge khoena ǁîn xa ǀgui ra ǂâi. Aiǁgause Adammi tsî Eva hâra ge tae-i a ǃgâis tsî tae-i a tsūs ǁaegu ǁhûis aiǂhanuba ge ūhâ i. Xawe ra ge ǁîra a dī ǁgai mîǁguib di ǀamǂoasa da ge nēsi ra hōǃâ. ǀNî hâ aiǁgaus ge Judab Gao-aob Usiab disa. ǁÎb ge ge ǂâi hâ i ǀanǀan ǁguibade tempeli ǃnâ dīsab ge mā-amhe hâ isa xawe î ge ti ge ī tama hâ i. (2Kro. 26:​18, 19) ǀNî hâ aiǁgaus tsîn ge hâ, Farisegu tsî Sadusegu tsîn ge gere ǂgom Elob ǁîga ǀō-aisa ǀgaub ǃnâ nî hâ-ūsa, Abrahammi suriba xu gu gere hā amaga.—Mat. 3:9.

Sida tsîn ge nētsē ǁîn xa ǀgui ra ǂâi khoen ǂnamipe ûihâ tsî î ge ǁîn tanisen ǀgauga sada a tsâǀkhā ǁkhā. (Gal. 5:26) Sida tsîn ge a ǂâi tsoatsoa ǁkhā ǀnî aiǂhanuga da anu hâsa tamas ka io da ǀō-aisa ǀgaub ǃnâ nî hâ-ūhesa. Tae-e nî hui da î da tā nēti ī ǀgauba ūhâ? Jehovab nēs xa mati ra ǂâisa da ge nî ǁnâuǃā. ǀGam Elobmîs daoǁgau ra ge nî hui da.

Jehovab ge ra mîǁgui tae-e da nî hōsa. ǀNî aiǁgaude ǃgaoǃgâ re.

• Jehovab ge ra ǂhâba îb aoba ǁîb taras xab ǃgôahe hâse tsâ tsîs ge tarasa ǀnamhes hâ khami nî tsâ. (Efe. 5:33) Jehovab ge  ra ǂhâba î ra ǃgamme hâ khoera ǁîra ǃnâ ǀgui ǀnamma ǁgaugu tsî ǀnî hâ khoe-i ǃoagus ose. (1Kor. 7:3) ǁGûn ge ra ǂhâba în ǀgôana ǁîna ǁnâuǀnam tsîn ge ǁgûna ǀgôana kōǃgâ tsî ǀnamma nî ǁgau.—2Kor. 12:14; Efe. 6:2.

• Jehovab ge ra mî î da ǀhaohâb ǃûi-aoga ǁîgu ra dī sîsenni ǃgao ǃgôasiba ǁgau. (1Tes. 5:12) ǁKhā ǁaeb ai gu ge ǀhaohâb ǃûi-aoga aiǂhanuba ūhâ tama î gu ǃgâsana gaoǂam tsî taenan nî dī tsî dī tidesa mîba.—1Pet. 5:​2, 3.

• Jehovab ge khoesi ǂgaeǂgui-aoga ge mā-am î gu ǁgui-ai marisa ǂgaoǀkhā da tsî sida xa ǃgôasiba ǁgauhe.—Rom. 13:​1, 6, 7.

Jehovab ge anu da hâs xa ǃnāsase ra mā da. ǁŌre-ao da a amaga da ge ǁōsa anu hâ. (Rom. 6:23) Xaweb ge Jehovaba ǂgui ǀkhaega ra mā da ǁîb sida ūba hâ ǂgomǂgomsa ǀnammi ǃaroma. (Psa. 103:​10, 11) Mâ ǀkhaeb hoab tamas ka io aiǂhanub ǁîba xu da ra hōb ge ǁîb ǀkhomxaǂgaosib anu tama da hâba xu ra hā.—Rom. 12:​6-8; Efe. 2:8.

Nē ǃhubaib khoen ǂâiǀgauga xu ǂgōsen re. Hōǃâ tama da hâse da ge nau khoen xa da ǃnāsase anu hâ ti a ǂâi tsoatsoa ǁkhā. Jesub ge ge ǁgau mati i khoe-e supuse ǁnāti ī ǂâiǀgauba a hō ǁkhāsa, sîsen-aogu gere mātarehe ǀgaus di aiǁgausa ra sîsenūs. ǀNî sîsen-aon ge ǁgoaǃaroma ge tsoatsoa tsî hoa tsēsa ǀgamsa sores ǃnâ ge sîsen, naugu ge ǀgui īri ǀguiba sîsen hîna. ǂGurose ge sîsen tsoatsoa gu ge ǀgapise gu nî matarehesa gere ǂgaoǀkhā, dī gu ge sîsenni ǃaroma. (Mat. 20:​1-16) Nē aiǁgausa sîsenūs ǃnâ-ūb ge Jesuba ge ǁgau ǁîb sao-aon Elob xan ra māhen ǀkha nî ǂkhīsa.

Ganganxa, î tā nauna xu xūna ǃâubasen. (1Tes. 5:18) Apostel Paulub aiǁgausa ǁgae re, ǁîb ge Korintes ǃnâ ge hâ i ǃgâsana xu xūna ge ǂgan tama hâ i, nēsab ge dī ǁkhā i xawe. (1Kor. 9:​11-14) Khoen ra mā da xūna da ge nî ǃgôaǃgâ tsî ǁîna xu tā ǃnāsa-e nî ǂgaoǀkhā.

 ǃGamǃgamsenxa. Khoe-i ga ǁî-i xa ǀgui ǂâi o î ge anu i hâs xa ǃnāsase ra ǃâubasen. ǃGamǃgamsenxasib ge nî hui da î da tā ǁnāti ī ǀgaub ǃnâ ǂâi.

Kēbo-aob Danieli ge ǃgamgamsenxa khoe-i di aiǁgausa ǃgâise ge ǁgau. ǁÎb ge ǂhâǂhâsa omarisa xu gere hā. Danieli ge anusa, gaxu tsî ǂgui ǁkhāsigu tsîna ge ūhâ i. ǁNā-amagab ge ǀō-aisa ǀgaub ǃnâ hâ-ūhe tsî ǀō-aisa aiǂhanugab nî māhe khami ga tsâ hâ. (Dan. 1:​3, 4, 19, 20) Danieli ge ǃgamǃgamsenxase ge hâ ǀgara tsîb ge nēs ǀkha Jehovab aiǃâ ge ǀō-aisa i.—Dan. 2:30; 10:​11, 12.

ǁNās ǀkha hā re î da tā sada xa ǀgui ǂâi nē ǃhūbaib di khoen khami. Hā da aiǃgû tsî ǃgâiaǂgao Jehovab ra mā da ǀkhaegu ǃnâ.