Ti ǁgûra ge ge ǂgomǂgomsa katolik-i. Xawe ra ge Elobmîsa ǁkhāǁkhāsen tsî Elob ǀons a Jehovasa ǂan, o ra ge ǁîra ge Jehovab di ǃoaba-ao kai. Jesub di ai-īsiga kuru ǀû tsîb ge ǁîb ǃnaokuru ǂansa sala sida ombas ǃnâ ge sîsenū î da ǁnāpa ǀhaode ūhâ ǁkhā. Nēs ge San Juan del Montes, Manila danaǃās Filipens dis ǃnâ ge isa.

Tita ge 1952 a ǃnaehes khaoǃgâ ra ge ti ǁgûra, ti haka abutigu tsî ǃnona ausidi tsîna ra gere ǁkhāǁkhā khami tita tsîna Jehovab xa ge ǁkhāǁkhā tsoatsoa. Kai ta ra khamib ge ti dadaba gere ǂkhâǃnâ te î ta ǀgui danaǃâs Elobmîs disa tsēs hoasa khomai. Tsîb ge ǃkharagagu ǂkhanin ǀapeǂhumisa xu ra hāna ra sîsenūse gere ǁkhāǁkhā te. Ti ǁgûra ge ǁaeba xu ǁaeb ǀkha ǃnarimâra mûǂam-aogu tsî ǁnâub beros tawa ra ǃoaba ǃgâsan tsîna sida omsa ǃoa gere ǁkhau în sida dawa hâ. Nēs ge sida omarisa kaise ǃgâiaǂgao kai tsî gere ǂkhâǃnâ, nē ǃnaeǃkhaidi xa da gere ǁnâu o. Tsî ge hui da î da gagasi xūna ǂgurose mâi sida ûigu ǃnâ.

Xūna ta ge ti ǁgûra xu ge ǁkhāǁkhāsen ǂgomǂgomsase ge Jehovaba gere ǃoaba ra. Ti mamas ǁōb khaoǃgâ i ge tita tsî ti dadab tsîna aimâba-aose 1971 ǀguiba ge ǃoaba tsoatsoa. Ti dadab ge 1973 ge ǁō, 20 kurixa ta a hîna. Ti ǁgûra ge ǁō o ta ge gere ǀguritsâsen. “ǁAposa tsî ǀgaisa” ǃâubasens Elobmîs ǃnâ ra hōhes ge ge hui te, î ta ǃgâi mûǂûiba ūhâ tsî tā ǂâiǂhansen tsî Jehovab ǀgūse hâ. (Heb. 6:19) ǃNubuse ti dadab ǁōb khaoǃgâ ta ge ǀō-aisa aimâba-aose ǁgaumâisa ge ūǃoa, Koron ti ǀon hâ ailands, Palawans ǀkharib ǃnâ hâsa.

KoronsKorons ǃnâ ta ge 21 kurixa ta a hîna ge sī. Kai ǃāsa xu ra hā axab ase ta ge gere buru ǃnāsa ǁaeba i ge krag-i tsî ǁgammi tsîna ge ǀkhai i tsî i ge ǀoro audon tsîna hâ isa. ǀNî  ǁaega da ge ǀguri gere aoǁnâ ǀoro ǃgâsan ge ǁnāpa hâ i amaga. ǂGuro ǁkhâba ta ge ti ǀaokhoen tsî ǀhōsan tsîna kaise gere ǁkhore. Tsî ta ge ǀgamirode ra kōse gere ā. Ti ǁgaumâisa ǁnāxumâi tsî ta ge gere oa ǂgao.

ǁNā ǁaeb ai da ge Jehovaba ǂâi ta ra xūn tsî tsâ da ra ǀgauba gere mîba. Sida ǀapeǂhumis ǂkhanin ǃnâ ta ge khomai ǂkhâǃnâ ra mîde ta gere ǂâihō. ǁAeba xu ǁaeb ǀkha ta ge Psalmdi 19:14 sa gere ǂâi-oa, Jehovab nî ti ‘ǁhaiǁhâǃkhai tsî ore-aosa’ ǁîba ǃgâiba xūna ta ga ǂâiǃgâ o. Aiǁgause ǁîb dīgu tsî ǀgaugu tsîna. ǃKhē xu ǂgō-ommi “You Are never Alone” a ti ǀon hâb ge ge hui te, nē khomaiǃâsa ta ge ǂguiǃnāde ge khomai. ǀGuri ta ge hâ i xawe ta ge Jehovab tita ǀkha hâ khami gere tsâ. Nēs xa ta ge kaise ge ǀō-aisabahe i tsî ta ge ǀgore, khomai tsî gere ǂâiǃgâ.

Korons tawa ta ge sīs khaoǃgâ ta ge ǃnubu ǁaerob khaoǃgâ ǀhaohâb ǃûi-aob ase ge ǁgaumâihe. ǀGuri ta ge ǁnāpa ǀhaohâb ǃûi-aob ase hâ i amaga ta ge wekheb ǁaegu hâ ǀhaos tsî ǃKhē xu ǂgō-ommi ǁkhāǁkhās tsîna gere dī tsî ta ge ǁnās ǂam-ai mâ wekheb hoaba ǃhoasa gere mā. Gagasi xūna ta gere dī amaga ta ge ǀguritsâsens ǁae-e ge ūhâ tama hâ i.

Aoǁnâ sîsenni ge Korons ǃnâ kaise ge ǁkhoaxa i tsîn ge ǀnî khoen Elobmîsa ta gere ǁkhāǁkhān tsîna ge ǁāǁnâ kaisen. Xawe i ge ǃgom ǁaegu tsîna ge hâ i. ǀNî ǁaega i ge ǃkhare tsēsa gere ū aoǁnâ ǂkharis tawa sīsa tsî ta ge ge ǀū i ǁnāpa ta ga sī o ta mâpa nî ǁgoesa. ǀHaohâb ge ǂkhari ailandi ais tsîna gere aoǁnâ. ǃNāsa ǁaeba ta ge ǂoaxa huriba xu gere ǃnari tsî ta ge tsâs tsîna ge ǀū i. Nē ǃgom ǁaegu ǃnâb ge Jehovaba ǁkhauba te tsî ǀgaiba gere mā te. Ega ta ge ge mûǂan Jehovab ge hānî ǁgaumâis ǃaroma gere aiǂhumitesa.

Tita ge 1978 Papua new Guineasa ǃoa ge ǁgaumâihe, ǁnās ge Australiab nordes ǃnâsa. Papua new Guineab ge ǂgui ǃhomga ūhâ tsî Spanjeb kōse a kai. Kaise ta ge ge buru ǁaubexa i 3 miliuns khoena, 800 xa ǃnāsa gowaga ra ǃhoasa. Xawe ǃgâi ge i ǃkhais ge ǃnāsa khoen ge Melanesian Pidgina gere ǃhoasa, Tok Pisinni ase ge ǂansa i gowaba.

Port Moresby danaǃās ǃnâ ta ge ǀapaǃaogowab ǀhaohâba ǃoa ǁaeroba ge ǁgaumâihe. Tok Pisinni ǀhaohâba ǃoa ta ge ge doe tsî ta ge ǁîn gowaba ge ǁkhāǁkhāsen tsoatsoa. ǁKhāǁkhāsen ta gere xūna ta ge aoǁnâ sîsenni ǃnâ gere sîsenū ǁnās ge ge hui te gowaba ǃkhaese ǁkhāǁkhāsensa. Tsî ta ge Tok Pisinni gowab ǃnâ ǃhoade ge mā ǁkhā i. Kaise ta ge ge buru Papua New Guineas ǃnâ ta kurib tsîna hâ tama hîna ta ge Tok Pisinni ǀhaohâga ǃoa ǁgaumâihesa, ǃnarimâra mûǂam-aob ase ǁnā ǀkharigu ǃnâ.

ǀHaohâgu ge kaise ge ǃnūgu i tsî ta ge ǁnās ǀkha ǂgui ǂkharis ǀhaode gere aiǂhumi. Nēs ge ǃnāsa ǁaeba daob ai ǀgui hâs ti gere ǂâibasen. ǂGurose ta ge gere ǀguritsâsen ǀasa ǃhūb ǃnâ ta ge sī amaga. ǁNāpa hâ khoen ge ǃkharagagu gowaga gere ǃhoa tsî ǀnî hâ ǁnaedīgu tsîna ge ūhâ i tita a ǂanga xu. ǂGui ǃhomgu ge hâ i amaga ta ge ǃnāsa ǁaeba ge ǃnari ǁoa i ǁnās ǀkha ta ge anikunis ǀkha ǀguri  mâ wekheb hoaba gere ǁkhana. ǂGaub ǀkha ta gere ǃnari o ta gere tsâ khami ta ge ǁnā anikunis ǃnâ gere tsâ.

Hoa khoen ge telefonga ge ūhâ tama hâ i ǁnā amaga ta ge ǀhaohâga ǃoa sîǂkhanide gere sî. Nē sîǂkhanidi ge ǃnāsa ǁaeba gere ǃonkhao tsî ta ge ǁnāpa ta gere sī o gere dî-oa Jehovab ǃoaba-aon mâpa hâsa. ǃNās hoasa ta ge ǃgâsan ǀkha gere ǀhao, on ge khoexaǃnâse gere ǁkhoreǁhare te ti ǁgūtsâdi hoaden gere ǂâi-oa amaga. Jehovab ǂkhâǃnâsa ta ge ǂgui ǀgaugu ǃnâ ge hōǃâ tsî i ge ǁîb ǀkha ta ūhâ ǀhōsagusisa ge ǀgai.

Ti ǂguro ǀhaos Bougainvilles tawa i ge ǃgamme hâ khoera ge dîde: “Sîma du ra ǂâihō?” ǂÂihō ta ge ra Port Moresbys ǃnâ ta ge sī o ta ge nē khoe-aogura ge aoǁnâba. ǁÎra ta ge Elobmîsa ge ǁkhāǁkhā tsoatsoa tsî ta ge ǁnāpaxu ǀnî ǃgâsaba ge ǂgan îb ǁîra ǀkha aiǃgû. Nēsi ra ge ǁîra ǁāǁnâsa. Nēb ge ǂgui ǀkhaegu di ǀguib hîna ta ge hōǃâba, Papua New Guineas ǃnâ ta gere ǃoaba ǃnona kurigu ǃnâ.

Koronsa xu ta 1978 nî īs aiǃâ ta ge Adel ti ǀon hâ ǃgâsas ǀkha ge ǀhao. ǁÎs ge hoaǁae nau khoen ǂhâsiga ǁîs dī gu aiǃâ gere mâi. ǁÎs ge ǀgam ǀgôara ge ūhâ i Samueli tsî Shelies tsîna tsîs ge ǁnaetisa aimâba-aose gere ǃoaba. Tsîs ge ǁkhā ǁaeb ai ǁîs kaira mamasasa gere kōǃgâ. Tsî ta ge Meib 1981 Filipensa ǃoa oaǀkhī tsî Adelsa ge ǃgamme. Sîm ge ǃgammeb khaoǃgâ ǁnaetisa aimâba-aose ge ǃoaba tsoatsoa tsî sîm omarisa gere kōǃgâ.

Omarisa ta ūhâ xawe ta ge ǁkhawa 1983 ǀō-aisa aimâba-aose ge ǁgaumâihe. Tsî ta ge Linapacan ailandsa ǃoa ge sîhe Palawan ǀkharib ǃnâ. Omaris ase da ge nē ǃāsa ǃoa ge doe, ǁnāpan ge Jehovab di ǃoaba-aona ge ǀkhai i. ǁAubexa kuriba ǃkharu tsîs ge Adels di mamasa ge ǁō. ǁNās ǂam ai da ge aoǁnâ sîsen-e ge dī ǀgara, nēs ge ge hui da î da mâǀgai ǃoab di ǁaeb ǃnâ. ǂGui Elobmîs ǁkhāǁkhādi ǃgâise gere aiǃgûde da ge Linapacans ǃnâ ge tsoatsoa tsîn ge ǀhaode gere hâǃnâ ǂgao. ǁNās ǀkha da ge aitsama sala ge om. ǃNona kuriga da Linapacans ǃnâ hâs khaoǃgân ge 110 khoena Jesub ǁōb ǂâiǂâisensa ge hâǃnâ. ǁNā khoena xūn ge ǂguina ge ǁāǁnâhe sida oa toa hâs khaoǃgâ.

Culion ti ǀon hâ ailandsa ǃoa ta ge 1986 ge ǁgaumâihe, ǁnā ǀhaohâb ǃnân ge khō ǀaeba ūhâ khoena ge ǁan hâ i. ǁNās khaoǃgâs ge Adels tsîna ǀō-aisa aimâba-aose ge ǁgaumâihe. ǂGuro ta ge gere ǃao nē ǁōsa ūhâ khoena aoǁnâbasa. ǁNāpa ge hâ i ǃgâsan ge ge mîba da nē ǁōsa ūhâ khoen gere ǀaeǃkhōhesa tsîn ǂkhī da tidesa. Nē ǀaeba ūhâ khoes ge ǀnî ǃgâsas oms ǃnâ ǀhaode gere hâǃnâ. ǃHae ǁaeb ǃnâ da ge ǁnā khoena aoǁnâbasa ge ǁnaeti, ǁîn ǀkha ǃâubasens xa ǃhoas ge ge ǃgâi i. ǁNā ǁaeb ǃnân ge Elob tsî khoen tsîn xan ǂharaxuhe hâ khami gere tsâ amaga. ǁKhaeǂgaohe da ge gere matin ge ǁîna ǀguitsē  ǃgâi ǂurusiba ūhâs ǃâubasens xa gere tsâǀkhāhe ǀgauba da gere mû-o.—Luk. 5:​12, 13.

Sîm ǀgôara mati Culions ǃnâ hâs xa gere tsâǀkhāhe? Tita tsî Adel tsîn ge ǀgam ǂkham ǃgâsara Koronsa xu ge ǁkhau î ra sîm ǀgôara ǀkha ǀguiba hâ ǀhao, nēs ǁîra nî ǂkhâǃnâ xui-ao. Samueli, Shelies tsî ǁnā ǀgam ǃgâsara tsîn ge ǁkhoaxa ǁaeba aoǁnâ sîsenni ǃnâ ge ūhâ i. ǁÎn ge ǂgui ǀgôana Elobmîsa gere ǁkhāǁkhā. Tsîm ge sîma nē ǀgôan ǁgûna Elobmîsa gere ǁkhāǁkhā. Sida ge 11 omaride Elobmîsa gere ǁkhāǁkhā. ǃHae ǁaeb ǃnâ ge Elobmîs ǁkhāǁkhās ǀkha gere aiǃgû khoen ǀkha da ge Elobmîs ǁkhāǁkhāsa gere dī tsî da ge ǀasa ǀhaohâba ge tsoatsoa ǁkhā i.

ǂGuro da ge ǀguri ǁnā ǃās ai ǀhaohâb ǃûi-aob ase gere ǃoaba. ǁNâub beros ge ge ǂgan te î ta Culions ǃnâ hâ 8 ǃgâsan ǃaroma wekheb ǁaegu hâ ǀhaosa dī. Tsî ǁnāpaxu ǁkhā xū-e 9 ǃgâsan Marily ǃgaroǃās ǃnâ hâna dība. ǃNona īrgats ge nē ǃāsa ǃoa ǂgaus ǀkha gere ī. ǀHaodi khaoǃgâ da ge omaris ase ǃkhomxa ǀkharib ǃnâ ǂgui īrga gere ǃgû, î da Elobmîs ǁkhāǁkhāde Halsey ti ǀon hâ ǃgaroǃās ai sī mā.

ǀAms ai i ge Marilis tsî Halses tsî ra ǃnâ ǂgui khoena amaba ge ūǃoa tsî da ge ǁnās ǀkha hoa ǃāra ǃnâ salga ge om. Linapacans ǃnâ ge īs ǁkhās khamin ge ǃgâsan tsî Elobmîs ǃnâ ge ǃgâiǃgâibasensa ge ūhâ în tsîna om ū xūn tsî sîsenni tsîn ǀkha ge hui. Marilis sali ǃnâ i ge 200 khoena gere ǂâu tsî i ge kaikaihe ǁkhās tsîna ge ī-i tsî da ge ǁnāpas tsîna kai ǀhaode gere ūhâ.

Adels tsî tita tsîn ge 1993 ǀgôan ge kai o ǃnarimara sîsenni ǀkha ge tsoatsoa Filipens ǃnâ. Tita ge 2000 ge ǁkhauhe î da ǁgauǃnâ-aob ase sī ǁkhāǁkhāhe. ǁGauǃnâ-aosisa da sīǃnâ ǁoa khami ta ge gere tsâ xawes ge Adelsa hoaǁae gere ǂkhâǃnâ te. ǁÎs ge hoaǁae gere ǂkhâǃnâ te Jehovab hoaǁae ǀgaiba nî mā tesa î da nē ǀasa ǁgaumâisa dī ǁkhā. (Fil. 4:13) Adels ge nēsa ge ǂan i, ǁîs ǁgaumâisas ge sīǃnâ ǁkhā i amaga ǀaeb mâsibas ūhâ xawe.

 Adels ge ǁkhōǁkhōsa ǂhûs ǀaeba ge hō, 2006 ta noxopa ra ǁkhāǁkhā hîna. Kaisem ge nēs xa ge buru hâ i. Sîm ǁgaumâisa ǀamǀams xa ta ge dîsi os ge Adelsa ge mî, “ǀaedi-ao-e ôaba te re ti ǀaeb ǀkha nî hui te-e. ǂAn ta ge a Jehovab nî hui mîsa îm aiǃgû sîm ǁgaumâis ǃnâ.” Sao ra ǃnani kurigu ǃnâs ge Adelsa Jehovaba ǁîs ǁgaumâis ǃnâ ǃgae tamase ge ǃoaba. Egas ge ǃgû ǁoa i xawes ge ǁîs rolstoelsa xu gere aoǁnâ tsîs ge ǃgāsase ǃhoa ǁoa i xawes ge ǀgui tamas ka io ǀgam mîdi ǃnâ ǀhaos tawa gere ǃeream. Adels ge ǃgâsana xu sms te gere hō matikōsen ǁîs mâǀgaisa ra ǃgôaǃgâ ǃkhais xa, 2013 ǃnâs ge ǁōs kōse. Ti ǂgomǂgomsa tsî ǀnamxaǃnâ taras Adels ǀkha ta ge 30 xa ǃnāsa kuriga ge ǃgamme hâ i. ǁÎs ge ǁō, o ta ge ǁkhawa ǃoab tsî ǀguritsâsens tsîna gere hōǃâ.

Adels ge ge ǂhâba hâ i, î ta ti ǁgaumâis ǃnâ aiǃgû tsî ta ge ǁnāsa ge dī. ǂGui xūna ta ge gere dī tsî nēs ge ge hui te î ta tā ǀguritsâsen. Tagalog gowaga ra ǃhoa ǀhaohâga ǃoa ta ge 2014 na xu 2017 ge ǁgaumâihe, ǁnā ǃhūb ǃnâ i ge aoǁnâ sîsenna ge ǂkhāsa i. ǁNās khaoǃgâ ta ge Tagalog ǀhaohâga Taiwanni, Amerikab tsî Kanadab ǃnâ gere sari. Indiab tsî Thailandi ǃnâ ta ge ǀapaǃao gowab klade gere mā, Gaosib aoǁnâ-aon skoli ǃaroma, 2019 ǃnâ. Kai ǃgâiaǂgaoba ta ge gere hōǃâ nē ǁgaumâidi ǃnâ. Kaise ta ge ge ǂkhî i Jehovaba nē ǀgaub ǃnâ ǃoabasa.

Mâ ǁgaumâis haos ǃnâ ta ge ǃgâsan ǀhao-ū ta rana ge ǀnam, ǁnā-amaga i ge ǁîna ǁnāxusa supu tama. ǁNāti ī ǁaegu ǃnâ ta ge Jehovab ǃnâ ǀoasa ǂgomǃgâsiba ra ūhâ. ǁÎb ǂkhâǃnâsa ta ge hoaǁae gere hōǃâ tsî nēs ge ge hui te î ta ǃkhōǃoa ta ra ǀkharaǀkharana māsenxase ūǃoa. Filipens ǃnâ ta ge nēsisa ǀō-aisa aimâba-ao i ase ra ǃoaba. Ti ǀasa ǀhaohâb ǃnâ ta ge harase ra tsâ. ǁÎn ge ǂkhâǃnâ tsî ra kōǃgâ te. ǁKhā ǁaeb ai ta ge kaise Samueli tsî Sherlys ai a ǂnīsa, ǁîra ge ǁîra mamas ǂgomsa ra ǁgae.—3Jhn. 4.

ǂGui ǃgomsina ta ge ti ûib ǃnâ ge hōǃâ nēs ge ti ǀnamǀnamsa taras ǃgomma tsâ tsî ǁkhōǁkhōsa ǀaeba xu ra ǁōs tsîna ǃkhōǂgā hâ. ǂGui ǀasa ǀkharaǀkharan tsîna ta nî ǁnaeti ge īs ge. Xawe ta ge ge mû Jehovab “kaise ǃnūse hâ tama hâ” ǃkhaisa. (ǃNǃkh. 17:27) Jehovab “ǃommi ge . . ǃnūbu tama” ǁîb ǃoaba-aona ǂkhâǃnâ tsî ǀgaiǀgaisa ǀgurin ga hâ xawe. (Jes. 59:1) Jehovab ti ǃgareǀuib ge tita ǀkha hoaǁae ge hâ i tsî ta ge ǁnāsa kaise ra ǃgôaǃgâ. Tāstē ta ge ǀguri ge hâ tama hâ i.