1-2. ǀHomǃgāba Jesub ǀhobas tawa ge sī khoede tae-e ge mîba tsî Jesuba tae-i daoǁgausa ge mā di?

ǁGOA ǁAEB ge 33ǁî kuri 16 Nisanni. Khoedi hîna kaise ge ǃoa hâ i di, Eloba ge ǀnam i di ge ǀhobasa ǃoa ra ī. 36 Irga ǃkharu hâseb ge Jesuba ǁnāpa ge ǁhōhe. ǁÎdi ge Jesub sorosa di ǃgâihamxūn ǀkha nî ǂkhau ga ge sī xawe kaise ge buru ǀhobasa di ge ǀkhaiǃnâse a hō o. ǀHomǃgāb ge khoede ra mîba Jesub ǁōba xu ge a khâisa tsî sao ra-e ra mî: “Ai-aiba dub ra Galileaba ǃoa, ǁnāpa du ge nîra mû bi.”​—Mat. 28:1-7; Luk. 23:56; 24:10.

² ǀHobasa xu di ge oa o, ob ge Jesuba khoede ǀhao-ū tsî sao ra daoǁgausa ge mā: “ǃGû î ti ǃgâsaga sī ǂhôa, î gu Galileab ǃoa ǃgû, o gu ge nî ǁnāpa mû te.” (Mat. 28:10) Jesub ge ǀnîsi kaise ǂhâǂhâsa xū-e ge ūhâ i ǁînab gere mîba ǂgao-e nēs ǃaromab ge nēsa ǁîb ǁōb khâis khaoǃgâ ǂgurose ge a dī.

3-4. Mateub 28:19, 20 ǃnâ māsa mîmās ge ǁkhāǁkhāsabena ǃoa ǀgui ge mā-e tama hâ i di da tae-i ǃaroma a mî ǁkhā? (Tsoatsoas ai hâ ai-īsiba mû re.)

³ Khomai re Mateub 28:16-20. Jesub ge ǁnā ǀhaos tawa ǁîb di ǁkhāǁkhāsabena nē ǂhâǂhâsa sîsenni hînan nî dīse ge ib xa ge a mîba, hîna da sada tsîna nētsē ra dība. Jesub ge ge mî: “ǁNā-amaga ǃgûǂoa, î go hoa ǁaede ǁkhāǁkhāsabedī . . . Î go ǁîna ǁkhāǁkhā sago ta gere mîmān hoana ǃkhōǀgaipesa.”

⁴ Jesub ge ǂhâba hâ ǁîb saosaben hoan aoǁnâ sîsenna nî dīsa. ǁÎb ge nēsa ǁîb di ǂgomǂgomsa 11 apostelgu hînab gere ǃhoa-ū gu ǀguiga ge mîmā tama hâ i. Mati da nēsa a ǂan? Jesub ge ǁîb ǁkhāǁkhāsabega nē mîmāsa a mā o, o gu ge ǁîgu  ǀguiga Galileab ǃhommi ai ge hâ tama hâ i. ǂÂihō re ǀhomǃgāb ge tae-e khoede a mîbasa: ‘Galileab ǃnâ du ge nîra mû bi.’ Nēs ǃaroma i ge ǀnîsi ǂgomǂgomsa khoedi tsîna ǁnā ǀhaos tawa ge hâ i. Xawe nēs ǀgui tama ge īs ge. Apostel Paulub ge ge mî Jesub ge ‘ǀgui ǃnās ai korokaidisisa ǃnā hâ ǃgâsan xa ge mûhe.’ (1Kor. 15:6) Nē korokaidisisa ǃnā hâ ǃgâsana mâpa ge ǀhao hâ i?

5. Tae-e da 1 Korinteǁîn 15:6 ǃnâ ra ǁkhāǁkhāsen?

⁵ ǂGom ǁkhā da ge a Paulub ge ǁkhā ǀhaos xa gere ǃhoasa hîna Galileab ǃnâ ge hâ īsa hîna Mateub 28 ǃnâ ra ǁguiǃāhesa. Tae ǃaroma di ǀkha? ǂGurose ǂgui saosaben Jesub din ge ge Galileaǁî ī. Nēs ǃaroma i ge ge supu i Galileab ǃhommi tawa ǂgui khoen ǀkha ǀhaosa, Jerusalems ǃnâ khoe-i oms tawa ǀhaos xa. ǀGamǁîse Jesub hîna ge ǁōba xu khâib ge ǀnai ǁîb di 11 apostelgu ǀkha Jerusalems ǃnâ oms tawa ge ǀhao hâ i. Jesub ga ǂhâba hâ o, îgu ǁîb apostelgu ǀguiga aoǁnâ tsî ǁkhāǁkhāsabedī sîsen-e dī ob ge ǁîgu ǀkha Jerusalems ǃnâ ǀgui ga ǃhoa hâ tsî khoedi tsî ǁîgu tsîna ga ǂgan tama hâ în Galileab ǃnâ sī ǀhao-ū bi.​—Luk. 24:33, 36.

6. Mîmās hîna Mateub 28:20 ǃnâ hâsa mati nētsē ǁkhāǁkhāsabedīsa ǃoa ra ǁnaeǁgau tsî khoena mati nē mîmāsa ra ǁnâuǀnam?

⁶ ǃNonaǁî ǂhâǂhâsa ǃaromasa ǃoa kō re. Jesub ge mā mîmās ǁkhāǁkhāsabena dīs dis ge ǃkharu ge ǁaeb Xristeǁîn ǃgao ǀgui ge māhe tama hâ i. Mati da nēsa a ǂan? Jesub ge sao ra mîdi ǀkha ǁnā mîmāsa ǁîb ǁkhāǁkhāsabena ge mā: “Tsî mû, tita ge hoa tsēde sago ǀkha nîra hâ nē hâ ǁaeb di ǀams kōse.” (Mat. 28:20) Jesub ge mîmā khamin ge ǂgui khoena nētsē ra ǁkhāǁkhāsabedī. Nēs xa ǂâi re. Mâ kurib hoaban ge 300 000 khoena Jehovab di ǀHûǀguitimî-aon ase ra ǁāǁnâhe tsî ra Jesub di ǁkhāǁkhāsabe kai.

7. Tae-e da nēsi nî ǃhoaǃgao tsî tae-i ǃaroma?

⁷ ǂGui khoen hîna Elobmîsa ra ǁkhāǁkhāsen an ge ra aiǃgû ǁāǁnâs kōse. Xawe ǀnîn hîna sada ǀkha Elobmîsa ra ǁkhāǁkhāsen an ge ra ǃao ǁkhāǁkhāsabe kaisa. ǁÎn ge ǁîn Elobmîs ǁkhāǁkhās xa a ǃgâibahe xawen ge ǁāǁnâs kōse sī tama hâ. Khoe-e du ga Elobmîsa ǁkhāǁkhā o, o da ge a ǂan sadu nē khoe-e ra hui ǂgaosa î-i ǁkhāǁkhāsen i ra xūna ûiǂui tsî Xristub ǁkhāǁkhāsabe kai. Nē ǁkhāǁkhāǃâs ge nî ǃhoaǃgao mati da Elobmîsa da ra ǁkhāǁkhā khoen ǂgaoga a tsâǀkhā ǁkhāsa tsî mati da a hui nî ǁkhāsa în gagasise kai. Tae-i ǃaroma da nēsa nî ǃhoaǃgao? Elobmîs ǁkhāǁkhās ǀkha da nî aiǃgû tamas ka io Elobmîs ǁkhāǁkhāsa nî ǀûsa da nî mîǁguise i ī amaga.

8. Tae-i ǃaroma i a ǃgom ǁkhā Elobmîsa da ra ǁkhāǁkhā khoena huisa în Jehovaba ǀnam?

⁸ Jehovab ge ǂhâba hâ în khoena ǁîba ǃoaba, ǁîban a ǀnam amaga. Nēs ǃaroma da ge sada Elobmîsa ra ǁkhāǁkhā khoena ra hui ǂgao în mûǂan Jehovab ǁîna kaise ra tsâba tsî a ǀnam ǃkhaisa. ǁÎna da ge ra hui ǂgao în Jehovaba “ǃoaǀgôan di î, tsî ǃoataradi di ǂhanuǂhanu-aob” ase mû. (Psa. 68:5) Elobmîsa du ra ǁkhāǁkhā khoe-i ga Jehovab ǀnamma ǃgôaǃgâ o, o i ge ǁîn ǂgaoga nî tsâǀkhā-e tsîb ge ǁîn ǀnamma Jehovab ǃoa-ai nî kai. ǀNî khoen hîna da Elobmîsa ra ǁkhāǁkhān ge nî ǃgomba-e Jehovaba ǀnamxa ǁGûb ase mûsa ǁîn di ǁgûgu ge ǀnamma ǁgau nî tama hâ i amaga. (2Tim. 3:1, 3) Elobmîs ǁkhāǁkhāsa du ra mā khami Jehovab di ǃgâi ǀgaugu xa hoaǁae ǃhoa re. Hui nî re în ǁnâuǃā sada ǀnamxaǃnâ Elob ǂhâba hâsa în ǀamo ûiba hō tsîb nēs ǃnâ nî hui nîsa. Tae-e da noxoba a dī ǁkhā?

9-10. Mâ ǂkhani ra da Elobmîsa da ga ǁkhāǁkhā ǁaeb ai nî sîsen-ū tsî tae-i ǃaroma ǁnā ǂkhani ra?

 ⁹ “Elobmîsa tae-e a ǁkhāǁkhā da ǁkhā?” tsî “How to Remain in God’s Love” di hâ ǂkhanira sîsen-ū re. Nē ǀgam ǂkhanira ge sada Elobmîsa ra ǁkhāǁkhā khoen ǂgaoga i nî tsâǀkhā ǀgaub ǃnâ a xoasa. Aiǁgause ǂguro danaǃâs Elobmîsa tae-e a ǁkhāǁkhā da ǁkhā? di hâ ǂkhanis dis ge sao ra dîde ūhâ: Eloba amabes ǃnâ tsâba da i ra tamas ka io karoǂgaoxab a? Eloba mati ra tsâ khoen ga ǃgomma tsâ o? tsî Jehovab ǀhō kai ǁkhā du a? Remain in God’s Love ǂkhanisa tae-e ǃkhōǂgā hâ? Nē ǂkhanis ge Elobmîsa ra ǁkhāǁkhāsen khoe-e ra hui î-i Elobmîs tsoatsoade ǁî-i ûib ǃnâ ûiǂui tsî nēs ǃnâ-ū Jehovaba ǃoa ǀgū ǁkhā. Nē ǂkhanisa du ge ǀnai ǁkhāǁkhāsen xawe Elobmîsa du ra ǁkhāǁkhā khoe-i ǃgao ǃgâise aiǂhomisen tsî nē khoe-i di ǂhâsiga ǂâis ǃnâ ūhâ re.

¹⁰ Xawe i ga sada Elobmîsa ra ǁkhāǁkhā khoe-e sada ǁkhāǁkhās boksis ǃnâ ǀkhai ǂkhani-i ǃnâ hâ xū-i xa ǃhoa ǂgao os. ǁÎ-e du a ǂkhâǃnâ ǁkhā î-i ǁnā ǂkhani-e aitsama  khomai tsî du ge Elobmîs ǁkhāǁkhāsa a aiǃgû ǁkhā nau ǀgam ǂkhanira ǃnâ.

11. Mâǁae da Elobmîs ǁkhāǁkhāsa ǀgores ǀkha ǁkhowam tsî nî ǂganam tsî nēsa da mâǁae nî ǃhoaǃgao?

¹¹ Elobmîs ǁkhāǁkhāsa ǀgores ǀkha ǁkhowa-am re. ǂHâǂhâsa i ge a Elobmîs ǁkhāǁkhāsa da ǀgores ǀkha tsoatsoa tsî nî ǂganamsa, nēsa da ge ǂguro wekheb hîna da Elobmîs ǁkhāǁkhās ǀkha ra tsoatsoas ǃnâ a dī ǁkhā. Elobmîsa da ra ǁkhāǁkhā khoe-e da ge nî hui î-i mûǂan Elobmîsa da Elob di ǃanu gagab huib ǀkha ǀgui a ǁnâuǃā ǁkhā ǃkhaisa. ǀNî Elobmîs ǁkhāǁkhā-aon ge ǀgores xa ra ǃhoa Jakobub 1:5 sa ǃoa ra ǁnaeǁgause hîna ra mîsa: “Tsî ǀgui-i â du ga gā-aisiba tôasio, a-i Elob tawa ǂganbasen.” Elobmîs ǁkhāǁkhā-ao i ge ǁnās khaoǃgâ Elobmîsa i ra ǁkhāǁkhā khoe-e ra dî: “Mati da gā-aisiba Elob tawa a ǂgan ǁkhā?” Elobmîsa da ra ǁkhāǁkhā khoe-i ge ǃeream tsî nî mî Eloba ǃoa da ge nî ǀgore di.

12. Mati da Psalmdi 139:2-4 sa a sîsen-ū ǁkhā i da sada Elobmîsa ra ǁkhāǁkhā khoe-e hui ǁkhā ǁî-i ǀgorede ǃgâiǃgâis ǃnâ?

¹² Elobmîsa du ra ǁkhāǁkhā khoe-e ǁkhāǁkhā re mati i nî ǀgoresa. Hui nî re în mû Jehovab ǁîn ǀgoredi hîna ǂgaoba xu ra ǂoaxade ra ǁnâu ǂgao ǃkhaisa. Mîba nî re ǁîn ǀgoredi hînan ra dī di ǃnâ-ūn Jehovaba hoa xūna a mîba ǁkhāsa hînan nau khoen ǀkha ǀgoragu ǂgao tama hâna. ǂÂis ǃnâ da ge ra ūhâ ǂgao Jehovab sada ǂgaogu ǃnâ hâ xūna ǀnai a ǂansa. (Khomai re Psalmdi 139:2-4.) Elobmîsa da ra ǁkhāǁkhā khoe-i tsîna da ge a ǂkhâǃnâ ǁkhā î-i Eloba ǂgan î-i hui-e ǁî-i ǃgâi tama ǂâi ǀgaugu tsî ǃgâi tama dīxūn tsîna ǀûs ǀkha. Aiǁgause Elobmîsa du ǁaeroba ra ǁkhāǁkhā khoe-i ge noxoba Xristeǁî-i ǁhaoǃnâ tide ǁaxasi-e ǁhaoǃnâs xa a ǃgâibahe. ǁÎ-i ge a ǂan nēs ǂhanu tama hâsa xawe i ge ǀnî xūn nē ǁaxasib ǃnâ hân xa noxoba a ǃgâibahe. ǂKhâǃnâ nî re în Jehovaba mîba matin nēs xa ra tsâsa tsî ǀkhomma bi îb hui nî, în Elob a ǀnam xūn ǀguina ǀnam.​—Psa. 97:10.

13. (a) Tae-i ǃaroma da Elobmîsa da ra ǁkhāǁkhā khoena ǃhaese ǀhaode ǃoa nî ǁkhau? (b) Mati da nē khoena ǃnorasase Gaosib ǀHû-ommi tawa a tsâ kai ǁkhā?

¹³ Elobmîsa du ra ǁkhāǁkhā khoe-e ǁkhau re î-i ǀhaode ǃhaese ǁhaoǃnâ. Xristeǁî ǀhaodi tawa i ra ǁnâu xūn ge ǁî-i ǂgaoba a tsâǀkhā ǁkhā tsîs ge nēsa a hui i ǁkhā i-i aiǃgû. Tae-e Gaosib ǀHû-omi tawa ra ī? di hâ vidioba ǁgau i tsî ǁnāpaxū ǀhaosa ǃoa ǁkhau i re. ǀHaode ǃoas tsîna du ge ī-ū nî ǁkhā. ǃKharagagu aoǁnâ-aon ǀkha sadu Elobmîsa ra ǁkhāǁkhā khoena ǃoa ī re. Nēs ǃnâ-ū i ge sadu Elobmîsa ra ǁkhāǁkhā khoe-e ǃgâsan ǀkha ǂangusa kuru tsî ǀhaodi tawa i ga sī o ǃnorasase nî tsâ.

14. Tae-e Elobmîsa du ra ǁkhāǁkhā khoe-e a ǂkhâǃnâ ǁkhā i-i gagasise kai?

¹⁴ Sada mîǁguib ge î da Elobmîsa da ra ǁkhāǁkhā khoena hui în gagasise kai. (Efe. 4:13) Elobmîs ǁkhāǁkhāsa i ga khoe-e ūǃoa, o i ge ǁî-i mati nēsa xu nî ǀamas ǃnâ ǀgui ǃgâiǃgâibasensa ūhâ. ǁÎn ǀnammi Jehovab ǃoa-ai ra kai khamin ge matin nau khoena nî huis xa a ǂâi tsoatsoa ǁkhā, nēs ge ǀhaohâb ǃgâsan tsîna ǃkhōǂgā hâ. (Mat. 22:37-39) ǁAeb ga ǂhanu o tā ǃkhō-oa re sadu Elobmîsa ra ǁkhāǁkhā khoe-e mîbasa sada aiǂhanuba ūhâsa ǀapeǂhomisa marisise ǂkhâǃnâsa.

15. Mati da sada Elobmîsa ra ǁkhāǁkhā khoe-e a hui ǁkhā î-i ǃgomsina i ga hōǃâ o, ǂhanu xū-e dī?

¹⁵ Sadu Elobmîsa ra ǁkhāǁkhā khoe-e hui re mati i ǃgomsina nî sîsenǂamsa. Nē aiǁgaus xa ǂâi re sadu Elobmîsa ra ǁkhāǁkhā khoe-i ǁāǁnâsa tama aoǁnâ-ao i ga mî o  ǀhaohâb ǃnâ hâ ǃgâsa i xa i ge go tsûtsû-e di. Tā mîba i re ham-i a ǂhanu tamas ka io ǂhanu tama hâsa xawe ǁguiǃāba i re Elobmîs tae-e i ǁî-e nî dīsa ra mîsa. ǁÎ-i ge ǃgâsa-e ǀûba tsî nēsa a ǀuru ǁkhā tamas ka io i ga nēsa dī ǁoa o, o i ge ǃgâsa i ǀkha a ǃhoa ǁkhā ‘ǃgâsaba hōbasens’ ǃaroma. (ǀGopeǀnō re Mateub 18:15) Sadu Elobmîsa ra ǁkhāǁkhā khoe-e hui re tae-e i sī nî mîsa. ǁGau i re mati i ôaǃnâsa nî dīsa JW Librarib, Research Guide for Jehovah’s Witnesses tsî jw.orgs ais tsîna ǃgomsina i ga hōǃâ ǁaeb ai. Sadu Elobmîsa ra ǁkhāǁkhā khoe-e hui re ǁāǁnâ-e i nîs aiǃâ ǃgomsin hîna i naun ǀkha ra hōǃâna sîsenǂamsa. Nēs ǀkha i ge ǃgâi ǀhōsaguside ǀhaohâb ǃnâ hâ ǃgâsan ǀkha nî ūhâ ǁāǁnâ toa-e i ga o.

16. Tae-i ǃaroma i a ǃgâi nau ǁkhāǁkhā-aona sadu Elobmîsa ra ǁkhāǁkhā khoe-i di ǁkhāǁkhāsa ǃoa ǁkhausa?

¹⁶ ǀHaohâb khoena ǁkhau re tsî !narimâra mûǂam-aob tsîna ǁkhau re sarib ga o, îb sadu Elobmîsa ra ǁkhāǁkhā khoe-i di Elobmîs ǁkhāǁkhās tawa ǂnûǂgâ. Tae-i ǃaroma da nēsa nî dī? ǀGapiga da goro ǃhoaǃgao ǃaromade ǃoa da ga kō o, on ge nau Elobmîs ǁkhāǁkhā-aona sada Elobmîsa ra ǁkhāǁkhā khoe-e ǁî-e da a mā ǁoa huiba a mā ǁkhā. Aiǁgause ǂâi re sadu Elobmîsa ra ǁkhāǁkhā khoe-i ga ǂgae ǀû ǂgao xawe nēsa ǃoa hoaǁae a ǁnā-oa o. ǃGâsa-i hîna ge nē ǃnôa ǃgomsiba gere hōǃâ-e sadu Elobmîsa ra ǁkhāǁkhā khoe-i di Elobmîs ǁkhāǁkhāsa ǃoa ǁkhau re. ǁNā Elobmîs ǁkhāǁkhā-ao i ge sadu Elobmîsa ra ǁkhāǁkhā khoe-e ǃgâi daoǁgausa a mā ǁkhā. ǀNîsi du ge sausase ra tsâ ǃnāsa ǂansa ūhâ ǃgâsab ǀkha sadu Elobmîsa ra ǁkhāǁkhā khoe-i Elobmîs ǁkhāǁkhāsa sī dīsa, nēb ga mâsi o, o ǁnā ǃgâsaba ǂgan re îb ǁîba ǁnā Elobmîs ǁkhāǁkhāsa dī. ǃNāsa ǂansa ūhâ aoǁnâ-ao-e du ga sadu Elobmîsa ra ǁkhāǁkhā khoe-i di Elobmîs ǁkhāǁkhāsa ǃoa ǁkhau o, o i ge nē ǃgâsa-i ǂansa xu a ǀama ǁkhā. ǂÂis ǃnâ ūhâ re sada ǂâibasens ge i da Elobmîsa da ra ǁkhāǁkhā khoe-e hui î-i gagasise kai.

17-18. Taen xa da nî ǂâi khoe-i Elobmîs ǁkhāǁkhāsa da ga ǀam kai ǂgao o?

¹⁷ Elobmîsa du ra ǁkhāǁkhā khoe-i ga ǀkharaǀkharana dī tama ī o, o du ge nî dîsen, ‘nē Elobmîs ǁkhāǁkhāsa da nî ǀam kai?’ Nē mîǁguiba du nî dīs aiǃâ du ge khoe-i di ǁkhāsib xa nî ǂâi. ǀNî khoen hîna Elobmîsa ra ǁkhāǁkhāsen an ge ǃhaese ǀkharaǀkharana ra dī xawe ǀnîn ge gaxuse ra ū. Dîsen re: ‘Tita Elobmîsa ra ǁkhāǁkhā khoe-e ǁî-i ǁkhāsib ra mā-am i ǀkharaǀkharana ǂhanu ǁaeb ai ra dī?’ ‘ǁKhāǁkhāsen i ra xūna i ra ‘ǃkhōǀgaipe’ tamas ka io i ra ǁî-i ûib ǃnâ nē xūna ûiǂui?’ (Mat. 28:20) Elobmîsa du ra ǁkhāǁkhā khoe-e ǁkhāǁkhāsabe kais ge ǁaeba nî ū xawe i ge ǁî-i ûib ǃnâ ǀkharaǀkharana nî dī.

¹⁸ Xawe da tae-e nî dī Elobmîsa da ǁae-e ǁkhāǁkhā hâ khoe-i ga Elobmîs ǁkhāǁkhāsa ǃgôaǃgâsiba ǁgau tama i o? Nēs xa ǂâi re Elobmîsa du ra ǁkhāǁkhā khoe-i  ga Elobmîsa tae-e a ǁkhāǁkhā da ǁkhā? di hâ ǂkhanis ǀkha toa tsî ǀnîsi Remain in God’s Love di hâ ǂkhanis ǀkha tsoatsoa xawe noxoba ǀhaohâb ǀhaode ǁhaoǃnâ tama i tamas ka io Jesub ǁōb ǂÂiǂâis ǃoas tsîna ī tama ios. Tsî ǃnāsa ǁaegu ai Elobmîs ǁkhāǁkhāsa mâiǂui o ǂhâǂhâsa tama hâ xūn ǃaroma. Nēti ī mâsib ǃnâ du ge Elobmîsa du ra ǁkhāǁkhā khoe-e ǂhauǃnâse nî ǃhoa-ū. *

19. Khoe-i hîna ǁî-i Elobmîs ǁkhāǁkhāsa ǂhâǂhâsase mû tama-e du tae-e nî mîba tsî tae-i xa du nî ǂâiǃgâ?

¹⁹ ǁÎ-e du ge ǀnîsi nē dîsa a dî ǁkhā, ‘Tae-e ra ǁkhae du Jehovab di ǀHûǀguitimî-ao kaisa?’ Elobmîsa du ra ǁkhāǁkhā khoe-i ge a mî ǁkhā, ‘Elobmîsa ǁkhāǁkhāsens ge a ǃgâi xawe ta ge tātsē Jehovab di ǀHûǀguitimî-aon di ǀgui kai tide.’ ǁNāb ga ǁîn tanisen ǀgau o ǁaeba i ǁkhāǁkhāsen hâ hîna o i ge ǂhâbasa tama hâ Elobmîs ǁkhāǁkhās ǀkha noxoba aiǃgûsa. Tamas ka io i ge Elobmîsa du ra ǁkhāǁkhā khoe-e ǂguro ǃnās ase a mîba du ǁkhā tae-i ǁî-e ra ǃkhō-oa ǃkhaisa. Aiǁgause i ge a tsâ ǁkhā ǁî-i omsa xu oms ǀkha aoǁnâ sîsena dīhō tide di. ǁNâuǃā du ga o ǁî-i mati ra tsâsa o du ge ǁî-e ǃgâi ǀgaub ǃnâ a hui ǁkhā.

20. ǃNaeǃkhaidi 13:48 sa mati ra hui da mûǂansa Elobmîs ǁkhāǁkhās ǀkha da nî aiǃgû tamas ka io nēsa ǀam kaisa?

²⁰ Tsûtsusa i ge a xawen ge ǀnî khoen hîna da Elobmîsa ra ǁkhāǁkhāna Esegieli ǁaeb ǃnâ ge ûi hâ i Israelǁîn khami ī. Jehovab ge ǁîn xa Esegiela ge mîba: “Tsî mû, sats ge ǁîna ǁâsab di ǁnaetsanas axase ība, ǀguib ǃgâidommi tsî ǃgâise ra ǀkhōb axase; ǁnā-amagan mîdi âtsan ra ǁnâu xawe ǁîde dī tama.” (Ese. 33:32) Kaise i ge a ǃgomba da ǁkhā Elobmîsa da ra ǁkhāǁkhā khoe-e mîbasa Elobmîs ǁkhāǁkhāsa da ra ǀam kai ǂgaosa. Xawe da ge nî ǂan ‘ǁaeb hîna ǃau hâb ge a ǃnubu.’ (1Kor. 7:29) Sada ǁaeba ǀkharaǀkharana dī ǂgao tama hâ khoen ǀkha ǁores xa da ge “ǀamo ûiba ǃoa ǃkhōǂuibasenhe hâ” khoena nî ôa.​—Khomai re ǃNaeǃkhaidi 13:48.

21. 2020ǁÎ kurib xoasa mati hâ tsî nē xoasa tae-e dīs ǀkha nî hui da?

²¹ 2020ǁÎ kurib di xoas ge ǁkhāǁkhāsabedīs di sîsen-e ǃgâiǃgâis ǀkha nî hui da. Nēs ge Jesub ge Galileab ǃhommi ai ge hâ i ǀhaos tawa mî mîde ǃkhōǂgā hâ: “ǁNā-amaga ǃgûǂoa, î go . . . , ǁkhāǁkhāsabedī, î go ǁîna ǁāǁnâ.”​—Mat. 28:19.