BIBLE lands meseums hîna Jerusalems ǃnâ hâs ǃnâ i ge 700ǁî kurib tsî 600ǁî kurib ǁaegub ǃnâ ge hâ i ǀuisa hâ, Jesub aiǃgâ ge xoa-aihesa. Nē ǀuis ge ǃnū tama ǃās Hebrons hîna Israeli ǃnâ hâsa xu ge ūhe. Nēti i ge xoasa: “Ab Hagafi, Hagavi ôaba Yahweh Sabaoti xa ǀâxare-e.” Nē mîde mati Elobmîsa ra ǂkhâǃnâ? Nēs ge ra ǁgau Elob ǀons, Jehova di hâs hîna YHWH di hebreǁî gowab ǃnâ xoasas ge Elobmîs di ǁaeb ǃnâ ǃgāsase ǂansa isa. Nē xoamâihe hâ xūn ge ra ǁgau ǁnān hîna ge ǁnapa si gere gaun tamas ka io gere ǀhaon ge Elob di ǀons tsî ǁîn di ǀondi tsîna ǁnapa gere xoamâi ǃkhaisa.

Dr. Rachel Nabulsi, Georgiab ǁkhāǁkhāsen ǃkhaib ǃnâ hâs ge nē xoamûdi xa nēti ge mî: “YHWH ti hâ ǀons ge ǂgui ǃnāde nēti-i ǃkhaigu ai ra hō-e. ǁNās ge xū-e ra ǁgauda. . . . Nē xoadi ge ra ǁgau matikōse i ge Israeli tsî Judab tsîn ǃnâ YHWH ti hâ ǀonsa sîsenūsa kaise ǂhâǂhâsa isa.” Tsîn ge nēn hoana Elobmîsa ra ǂkhâǃnâ. ǁÎs ǃnâ da ge Elob ǀons YHWH sa ǂgui ǃnāde ra mû.

Nē mîdi hîna “Yahweh Sabaot” ti xoamâisa di ge Jehovab “ǂnubidi” dib ti ra ǂâibasen. Nēs ge ra ǁgau Elobmîs ǁaeb ǃnâ i ge Jehovab di ǀons ǀguisa sîsenūhe tama hâ-i, xawe Jehovab “ǂnubidi” dib di hâs tsîna gere sîsenūhesa. Nēs ge Elobmîs ǃnâ ǃnāsase ra hōhe mîsa ra ǂkhâǃnâ, Jehovab “ǂnubidi” dib di hâsa. ǁNā mîdi ge 283 ǃnāde Hebre xoadi ǃnâ ra hōhe tsî ǃnāsase Jesajab, Jeremiab tsî Saxariab di xoadi ǃnâ.