1. Gao-aob Davib khami, ǀnîna mati ra dî?

HOADA ge ǃnomsa tsî ǂkhî ûiba ǂhâba hâ. Tsî sada ge tātsē ǂâiǂhansen ǂgao tama hâ. Xawe da ge ǀnî ǁaegu ai sada tsîna ra ǂâiǂhansen. Tsî ǁnās ǀkhan ge ǀnî khoen hîna Jehovaba ra ǃoaban tsîna Gao-aob Davib ge dî dîsa Jehovaba ra dî: “Matikōse ǂomxase ta nî tsûba tsâ ti ǀoms ǃnâ?”—Psa. 13:2.

2. Tae-e da nē ǁkhāǁkhāǃâs ǃnâ nî ǃhoaǃgao?

² ǂGui ǁaegu ai da ga ǂâiǂhansen xawen ge xūna hâ dī ǁkhā da a na. Nē ǁkhāǁkhāǃâs ge nî huida i da mû taen da ǂâiǂhansen kai dasa. Tsî da ge ǁnapaxū ǃnani xūna nî ǃhoaǃgao hîna a huida ǁkhana î da ǃnomsase sida di ǃgomsina sîsenǂam.

3. Mâ xūn xa da ǂâiǂhansen ǁkhā tsî ǁnā xūna ǁkhae ǁkhā da a?

³ ǂGui xūn ge ra ǂâiǂhansen kai da. ǁNās ǀkha da ge ǀnî xūna a ǁkhae ǁoa. Aiǁgause, saran, ǂûn tsî oms di ǃgôab kurib hoaba ra khâimâ ǀgaus. Tsî da ge ǁnās ǀkha a ǁkhae ǁoa matin sida di skol ǀhōsan, tamas ka io sîsenǁare-aona ra ǃâitsâda î da ǂhomi tsî ǀaiba dī. Tsî da ge sida ǂnamipe hâ ǂkhabadība a ǁkhae ǁoa. Nēti ī ǃgomsiba da ge ra hōǃâ, khoen Elobmîs ra mî khami ǂâi  tama hâ amaga. Nē ǃhūbaib di Elob Satanni ge a ǂan ǀnî khoen ‘ǃhūbaib di ǂhansendi’ xa ǃaromahe hâse Jehovaba nî ǃoaba ǀûsa. (Mat. 13:22; 1Jhn. 5:19) ǁNā-amaga da ge buru tama hâ, nē ǃhūbaib ǃgomsin hînan khoena ra ǂâiǂhansenan xa ǀhoa hâsa.

4. Tae-e a īǁkhâ sida di ǃgomsin xa ǀguida ga ǂâi o?

⁴ ǁNatikose da ge ǃgomsin xa ra ǂâi tsî ǀnîhâ xū-e ǂâi ǁoa. Aiǁgause, mati da ǂâuhâ mari-e nî hō tamas ka io da ǀaesen tsî sîsen-e nî ǂoaǃnâsa. ǀNîsis tsîna da ge ǃâitsâhe da ga o, o da Jehovaba ǁnâuǀnam tidesa ra ǃao. Tsîb ge ǁGâuaba ǀae khoena nî sîsenū, în Elob di khoena ǁnâǂam. Nē khoen ga ǁnâǂam da o da nî tanisen ǀgaub xas tsîna da ge ra ǂâi. ǀNîsi da ge ra dîsen, ‘nē xūn xa ǂâiǂhansensa tsū-e?’

5. “Tā sadu ûib xa ǂhansen” tib ge Jesuba gere mî o, ob ge tae-e gere ǂâibasen?

⁵ “Tā sadu ûib xa ǂhansen” dib ge Jesuba ǁîb di ǁkhāǁkhāsabena ge mîba. (Mat. 6:25) Jesuba gere ǂâibasen î da tā xū-i xas tsîna ǂâiǂhansen? Hî-i, ti tamas ge. ǂAn da ase i ge ǃkharu ge ǁaeb ǃnâ ge Jehovaba gere ǃoaba khoen tsîna gere ǂâiǂhansen. Xaweb ge Jehovaba ǁîna noxoba ge ǀnam i. * (1Gao. 19:4; Psa. 6:3) Jesub ge gere ǂkhâǃnâ da. Tsîb ge ge ǂhâba tama hâ-i î da ǂhâ da hâ xūn xa ǂâiǂhansen tsî Jehovab a ǂguro sida ûib ǃnâsa ǀuru. O, tae-e da nî dī ǂâiǂhansen da ga ra o?—“ Mati da nî dī” ti hâ boksisa mû re.

6. Filipeǁîn 4:6, 7 ǃoagu i tae-e a huida ǁkhā î da ǃnomsase hâ?

⁶ (1) ǀGoredi ǃnâ hâhâ re. ǂÂiǂhansen du ga o, o du ge Jehovaba ǃoa a ǀgore ǁkhā. (1Pet. 5:7) Jehovab ge sadu ǀgorede ra ǃeream “ǂkhîb” hîna ǁnâuǃāba ǃnāhâba mā dus ǃnâ-ū. (Khomai re Filipeǁîn 4:6, 7.) Jehovab ge ǁnā ǂkhîba nî mā du, ǁÎb ǃanu gagaba ra sîsenūse.—Gal. 5:22.

7. Jehovaba ǃoa da ga ǀgore o, o da tae-e ǂâis ǃnâ nî ūhâ?

⁷ Jehovaba ǃoa du ga ǀgore o, hoa xūna mîba re. Tsî ǃgāsase ǁguiǃā re. Tsî mîba bi re tae-i ra ǂhani du ǃkhaisa tsî mati du ra tsâsa. Nē xū-e sîsenǂams di ǀgaub ga hâ o, gā-aisib tsî ǀgaib tsîna ǂgan re î du nē xū-e dī ǁkhā. Nē ǃgomsiba du nî ūbē ǀgau i ga ǀkhai o, Jehovaba ǂgan re î du tā ǁî-i xa ǀgui ǂâi. Sadu ǀgoredi ǃnâ du ga sadu di tsâsiga ǃgāsase ǁguiǃā o, o du ge nî mû matib Jehovaba sadu ǀgorede ra ǃeream ǀgausa. Sadu ǀgoredi ga ǁnā ǁaeb ǂûb ai ǃeream-e tama io, o tā ǀûsen re. Jehovab ge ra ǂhâba î da ǃgāsase ǁguiǃā tsî ǀûs ose ǀgore.—Luk. 11:8-10.

8. Taena da sida di ǀgoredi ǃnâ a ǃkhōǂgā ǁkhā?

⁸ Jehovaba ǃoa du ga sadu ǂâiǂhansen di xa ǀgore o gangans tsîna mā re. Kaise i ge ǂhâǂhâsa î da sida ǀkhaega ǃgôa, ǃgom mâsin ǃnâ da ga hâ xawes tsîna. ǀNî ǁaegu ai da ga mîde ūhâ tama i, sida di tsâsiga ǁguiǃāsa, xawe da ge nî ǂâihō Jehovab “toxoba hui te re” di hâ ǀgores tsîna ra ǃereamsa.—2Kro. 18:31; Rom. 8:26.

9. Tae-e da nî dī, ǃao da ga o?

 ⁹ (2) Jehovab di gā-aisib ai ǂgomaiǂnûi re, sadu dib ose. Kēbo-aob Jesajab ge ûi hâ i ǁaeb ǃnân ge Jodeǁîna Asiriaǁîn xa ǁnāǂamhesa gere ǃao. Jodeǁîn ge Asiriaǁîn xan gaoǂamhe ǂgao tama hâ amaga Egipteǁîn ai huiba ge ǂgan. (Jes. 30:1, 2) Jehovab ge ge mîba nî Egipteǁîn ǃnâ ǂgoms ǃgâiba hau tide ǃkhaisa. (Jes. 30:7, 12, 13) Jesajab ǃnâ-ūb ge Jehovaba ǁîb khoena ge mîba, matin ama ǃnorasasiba a hōǁkhā ǃkhaisa. ǁÎb ge ge mî: Jehovab ǃnâ ‘ǃnomsase hâs tsî ǂgomaiǂnûis tsîra ge nî ǀgai kai da’ ti.—Jes. 30:15.

10. Mâ mâsigu ǃnâ da a ǁgau ǁkhā, Jehovaba da ra ǂgomǃgâ ǃkhaisa?

¹⁰ Mati da Jehovaba da ra ǂgomǃgâsa a ǁgau ǁkhā? Nē aiǁgaude kō re. ǃGâi sîsen-e du ge go hō, hîna ǃgâise ra matare, xawe sadu ǁaeb tsî gagasi ǁaxasiga ra ǁkhae-e. Tamas ka io i ge khoe-e sadu xa a ǃgâibahe. Xawe i ge ǁî-e Jehovaba ǃoaba tama hâ. Tamas ka io i ge omaris ǁani-e ra mîba du, ǁî-i nî ǂhābē dusa, Jehovaba du ga ra ǃoaba ǀgara o. Xawe nē mâsigu hoagu ǃnâ du ge kaise ǃgom mîǁguiba nî dī. Tsî nē xūn hoan ǃnâb ge Jehovaba ǂhâ du hâ daoǁgausa nî mā du. (Mat. 6:33; 10:37; 1Kor. 7:39) Jehovab ǃnâ du nî ǂgomǃgâ tsî ǁîb daoǁgaude nî ǁnâuǀnam?

11. Mâ Elobmîs ǁkhāǁkhāde da a khomai ǁkhā, î da ǁgâiǀāgu ǃnâ ǃnomsase mâǀgai ǁkhā?

¹¹ (3) ǃGâi aiǁgaudi tsî tsūde xu ǁkhāǁkhāsen re. Elobmîs tsîn ge ra ǁguiǃā, matikōse i a ǂhâǂhâsasa î da ǃnomsase Jehovab ai ǂgomaiǂnûi. Nē xūna du ra ǁkhāǁkhāsen ǁaeb ai ǂâi re, matin ge Jehovaba gere ǃoaba khoena ǃnomsase a hâ ǃkhaisa. Aiǁgause, ǀgapi ǁnâuǃgâǃkhaib ge apostelga a mîba o i gu aoǁnâ ǀû, o gu ge ǃao tama ge hâ i. ǁÎgu ge ge mî: “Anu i kom ao, Elob nî khoen ǃgâ-ai ǁnâuǀnamhe ǃkhaisao.” (ǃNǃkh. 5:29) ǂNauhe gu ge xawe gu ge apostelga ge ǃhuri tama hâ-i. Tae-i ǃaroma? ǁÎgu ge ge ǂan i Jehovab ǁîgu ǀkha hâ ǃkhaisa. Tsîb ge ǁîgu ǀkha ge ǂkhîǂâixa i. ǁNā-amaga gu ge ǀûs ose ǃgâi ǂhôasa gere aoǁnâ. (ǃNǃkh. 5:40-42) ǁŌb nîs aiǃâb ge Stefanuba ge ǂhai tsî i ge ǁîb di aisa “ǀhomǃgā-i di ais” axase ge ī i. (ǃNǃkh. 6:12-15) Tae-i ǃaroma? ǁÎb ge ge ǂan i Jehovabab ra ǂkhî kaisa.

12. 1 Petrub 3:14 tsî 4:14, ǃoagu da mati ǁgâiǀāhe da ga o, o a ǂkhî ǁkhā?

¹² Apostelgu ge ǃgâise ge ǂan i Jehovab ǁîgu ǀkha hâ ǃkhaisa. Jehovab ge ǁkhāsiga ge māgu i gu buruxa dīna dī ǁkhā. (ǃNǃkh. 5:12-16; 6:8) Xaweb ge Jehovaba nētsē sida ǁnā ǁkhāsiba mā tama hâ. Xaweb ge ǁîb di mîs ǃnâ-ū ǀnamxaǃnâse ra ǁkhaeǂgao da. Tsî ra mîba da ǁîb mîs ǃaroma da ga ǁgâiǀāhe o, ob sida ǀkha a ǂkhî ǃgaisa, tsîb ǁîb di gagaba nî māda ǃkhaisa. (Khomai re 1 Petrub 3:14; 4:14.) Hānîǁaeb ǃnâ da ga ǃgomsina hōǃâ o da nî tsâ ǀgaub xa ǂâi tama i tsî hāre î da nēsi sida ǂgomǃgâsiba Jehovab ǃnâ omkhâi. Hîna a huida tsî a ǀgaiǀgaida ǁkhāba. Hāre da Jesub mîde ǂguro ǁkhāǁkhāsabegu gere dī khami ǂgomǃgâ: “Tita nîra mîdi tsî gā-aisib tsîna mā du, sado mâǃoa hân hoan ǃhoaǃoa tsî mâǃoa ǁoana xuige.” Jesub ge ge mîmâiba da:  “ǃNūǃnaxasib âdu ǃnâdu nî sadu ûiba hōbasen.” (Luk. 21:12-19) Tsî tā ǀuru re Jehovab mâ xū-i hoa-e ra ǂâihōsa, ǁnān hîna ǁîba ǂgomǂgomsase ra ǃoaban ǃaroma. Tsîb ǁnā ǂansa sîsenū tsî ǁîna nî ǂkhaiǂkhaisa.

13. ǁNān hîna ge ǃnomsase Jehovab ai ge ǂgomaiǂnûi tama hâ ina xū da tae-e a ǁkhāǁkhāsen ǁkhā?

¹³ ǁNān hîna ge ǃnomsasiba ǂgao tama hâ in tsî Jehovab ai ǂgomaiǂnûi tama hâ ina xūs tsîna da ge a ǁkhāǁkhāsen ǁkhā. ǁÎn di aiǁgaude xu ǁkhāǁkhāsens ge nî hui da, i da tā sida tsîna ǁîn ge dīsa xūna dī. Aiǁgauseb ge Gao-aob Asaba ǁîb di ǂgaeǂguis tsoatsoas ai Jehovab ai ge ǂgomaiǂnûi hâ i, kai ǂnubis xab ge ǁnāǂamhe o. Tsîb ge Jehovaba dans ǀkha ge ǀkhaebi. (2Kro. 14:8-11) Egab ge Gao-aob Basab Israeli diba ǂkhariro ǂnubis ǀkha ge ǁnāǂambi. Xawe nē ǃnās aib ge Asaba Jehovab ai ge ǂgomaiǂnûi tama hâ i ib huihe. (2Kro. 16:1-3) Tsîb ge Siriaǁîna ge ǂgan în ǃkhams ǃnâ huibi. Tsî ǁîb di ûib ǀams aib ge ǀgaisase ǀaesen o, ob ge Jehovab ai ge ǂgomaiǂnûi tama hâ i ib huibi.—2Kro. 16:12.

14. Tae-e da Gao-aob Asab di dīsāde xu ra ǁkhāǁkhāsen?

¹⁴ Tsoatsoas aib ge Asaba ǃgomsinab gere hōǃâ o, Jehovab ai gere kō. Xaweb ge ega ǁnāsa ge dī ǀû. Tsî aitsama ǁîb di xūna gere dī tsoatsoa. Ama as ge ǂguroseb ge Asaba Siriaǁîn ai huiba ǂgan Israelǁîn ǃoagu, o i ge ǃgâise gere mûsen. Xawe ǁîb di dans ge ǁaerob dis ǀguisa ge ī i. Jehovab ge kēbo-aob ǃnâ-ū Asaba ge mîba: “Gao-aob Siriab dib aits ge ǂgomaiǂnûi tsî ǃKhūb, sa Elob aits ge ǂgomaiǂnûi tama ǃkhais ǃaromas ge Siriab gao-aob di ǂnubisa sa ǃomǁaeba xu ge ûiǂoa.” (2Kro. 16:7) Kaise da ge nî ǂanbasen mati da sida di xūna ra dī ǀgausa i da tā ǀuru Jehovab ta māda daoǁgaude, ǁîb di mîs ǃnâ-ū. ǃKhaese da mîǁguina nî dī ǁaeb ǃnâs tsîna da ge ǃnomsase Jehovab ai nî ǂgomaiǂnûi. Ob ge ǁîba nî huida î da ǃgâi mîǁguiga dī.

15. Tae-e da nî dī Elobmîsa da ga khomai o?

¹⁵ (4) Elobmîs di xoade ǃkhōmâi re. Elobmîsa du ra khomai hîna du ga ǃnomsase Jehovab ai ǂgomaiǂnûis tawa ga ra sī o, o dītsâ re i mâǂoara xoade ǁnapaxu ǃkhōmâi. ǀNîsi du ge ǃgarisa a khomai ǁkhā tamas ka io a xoaǁnâ ǁkhā î du ǁaeba xu ǁaeb ǀkha kō. Jehovab ge Josuaba ge mîba îb Elobmîs di ǂkhanuga ǃnomsase tsî ǃgāsase khomai, ib gā-ai. Tsî ǁnapab gere khomain ge gere huibi ib ǂan matib nî Elob di khoena ǂgaeǂgui ǀgausa. (Jos. 1:8, 9) ǂGui xoadi hîna Elobmîs ǃnâ hâ di ge a huida ǁkhā ǂâiǂhansen tsî da ga ǂkhabuǂâi ǁaeb ai.—Psa. 27:1-3; ǂKhm. 3:25, 26.

16. Matib Jehovaba ǀhaohâba ra sîsenū î da huihe, î da ǃnomsa tsî ǁîb ǃnâ ǂgomaiǂnûi ǁkhā?

¹⁶ (5) Elob khoen ǀkha hâ ǀhao re. Jehovab ge sida ǃgâsana ra sîsenū, în huida i da ǃnomsase hâ tsî ǁîb ai ǂgomaiǂnûi. Sida ǀhaodi tawa da ra hō ǃhoadi, ǃgâsan di ǃereamdi tsî omkhâi ra ǁgamǀhaodi ge sida ǃaroma a ǃgâi. (Heb. 10:24, 25) ǀHaohâb ǃnâ da ūhâ ǃgâi ǀhōsa-e da ga sida ra ǂhani xū-e mîba o, o da ge kaise ra ǂkhâǃnâhe. “ǃGâi mîs” hîna ǃgâi ǀhōsa-e xu ra ǀkhīs  ge sida di ǂâiǂhansende a ǀoro kai ǁkhā.—ǂKhm. 12:25.

17. Hebreǁîn 6:19 ǃoagu i mati Gaosib di ǃâubasensa a huida ǁkhā î da ǃnomsase hâ, ǃgom ǁaegu ǃnâs tsîna?

¹⁷ (6) Sadu di ǃâubasensa omkhâi re. Elob Gaosib ǃnâ da ūhâ ǃâubasens ge sida “ǀoms di ǃkhōmâixūse” ī. Nēs ge ra huida i da ǃgom mâsin ǃnâ da ga hâ tsî ǂkhabuǂâi xawe ǃnomsase hâ ǁkhā. (Khomai re Hebreǁîn 6:19.) ǂÂi re hānîǁaeb hînab Jehovaba mîmai hâb xa. ǁNā ǁae da ge ǁgai xūn xa ǂâi tide. (Jes. 65:17) Mûnanaisen re, ǃhūbaib hîna ǂkhîb xa ǀoa hâb ǃnâ, ǃgomsi-i tātsē ǁkhawa hâ tideb ǃnâ. (Mix. 4:4) Sadu ūhâ ǃâubasesansa du ga nau khoen ǀkha ǀgoragu o, o du ge ǁnā ǃâubasensa ra ǀgaiǀgai. Dī ǁkhā du an hoana aoǁnâ sîseni tsî khoena ǁkhāǁkhās ǃnâ dī re. Ti du ga dī o, o du ge “ǃâubasensa ǀoa hâse ǀunis kōse nî sâu.”—Heb. 6:11.

18. Taena hānîǁaeb ǃnâ a īǁkhā tsî tae-e da ǁnās xa a dī ǁkhā?

¹⁸ Nē ǃhūbaib di ǀams ta ǀgu khami da ge ǃgomsin hîna ǂâiǂhansen kai da ra na nî hōǃâ. 2021ǁÎ kurib di xoas ge nî huida î da sida di ǃgomsina sîsenǂam tsî ǃnomsase hâ. Tsî sida di ǁkhāsib ai ǂgomaiǂnûi tama i tsî Jehovab ai ǂgomaiǂnûi. A da nē kurib ǃnâ ǁgau re Jehovab di mîmâis hîna “ǃnomsase hâs tsî ǂgomaiǂnûis tsîra ge nî ǀgai kai da” ti hâsa da ra ǂgomǃgâsa.—Jes. 30:15.