1. Elob di ǀnamma mati ra tsâ kai du?

“ELOB a ǀnam” tib ge apostel Johaneba ge xoa. (1Jhn. 4:8) ǁNās ge ǂhâǂhâsa xū-e ra hōhōǃnâ da. Elob hîna ûiba ra mādaba xu-i ge ǀnamma ra hā. Jehovab ge sida a ǀnam. ǁÎb ǀnammi ge ǃnorasa tsî ǂkhîse ra tsâ kai da. Tsî da ge ǂâiǂhansen tama hâ.

2. Mateub 22:37-40 ǃoagu i mâ ǀgam kai mîmāra hâ, tsî mati ios ǀgamǁî mîmāsa ǁnâuǀnamsa a ǃgom?

² Xristeǁîn ge ǂgaon ga ra o ǀgui ǀnamma ǁgaugu tama hâ. Nēs ge a mîmā. (Mateub 22:37-40 sa khomai re.) Jehovaba du ra ǂan khami i ge nî supu ǂguro mîmāsa ǁnâuǀnamsa. Nēs ge a supu Jehovab ǀoasa kurusa ūhâ tsî ǁae hâ, tsî ǃgâise ra hâ-ū da amaga. Xawe i ge ǀgamǁî mîmāsa ǁnâuǀnamsa supu tama hâ. Tae-i ǃaroma? Sida ǃgâsan hîna a sida ǀgūkhoen ǀoasa kurusa ūhâ tama hâ amaga. ǀNî ǁaegu ain ge ǁîn mîn tsî dīgu tsîna ra tsûtsûda. Jehovab ge a ǂan nē ǃgomsina da nî ǃkharuǃnâ ǃkhaisa. ǁNā-amagab ge ǀnî khoen hîna ge Elobmîsa xoan ǃnâ-ū ge ǁkhāǁkhāda, mati da ǀnamma nî ǁgaugus tsî tae-i ǃaroma da nî ǀnamgus tsîna. Nē xoa-aogu di ǀguib ge a Johane.—1Jhn. 3:11, 12.

3. Johaneba tae-e gere ǁguiǃgâ?

³ ǁÎb gere xoa xūn ǃnâb ge apostel Johaneba ge ǁguiǃgâ ǀnamma da nî ǁgaugu ǃkhaisa. ǁÎb di ǂkhanis hînab ge Jesub di ûib xa a xoas ǃnâb ge Johaneba, “ǀnam” tsî “ge ǀnam” sa ǃnāsase ra sîsenū Mateub,  Markub tsî Lukab di ǂkhanidi xa. Johaneb ge 100 kurina gere ǀgū, ǁîb ǂkhanis tsî ǃnona sîǂkhanidi tsînab gere xoa o. ǁNā ǂkhanidi ge ra ǁgau Xristeǁî-i ra dī xū-i hoa-i ǀnammi xa nî ǃkhōǂgāhesa. (1Jhn. 4:10, 11) Xawe i ge ǁaeba ge ū, Johaneba ǁnāsa ǁkhāǁkhāsensa.

4. Johaneba hoaǁae nau khoena ǀnamma gere ǁgau?

⁴ Johaneb ge ǂkhami ge i o, hoaǁae ǀnamma ge ǁgau tama hâ-i. Aiǁgause, ǀgui ǃnâ-eb ge Jesuba Galileaba xu Samariab ǃnâ aoǁnâ sîsene gere dī. Xawen ge ǀnî Samariaǁîna Jesub tsî ǁîb ǀkha ge hâ-i khoen tsîna harase ge ǃkhōǃoa tama hâ-i. Johaneba tae-e ge dī? ǁÎb ge ge mî, igu ǀhomma xu ǀaeba ǂgan, în ǁnā khoen hoana dīkākāhe. (Luk. 9:52-56) ǀNî ǃnā-i aib ge ǁîba nau apostelga ǀnamma ge ǁgau tama hâ-i. ǁÎb tsî ǁîb ǃgâb tsîn ge ǁîb di mamasasa ge ǂgan, is Jesuba mîba îkha ǀgapi ǃharosa Gaosib ǃnâ māhe. Nau apostelgu ge Johaneb tsî Jakobub ge dī xū-e ǂanǂui o, o gu ge kaise ge ǁaixa hâ-i. (Mat. 20:20, 21, 24) Xawe nē dīsādi hoadi ǃnâb ge Jesuba Johaneba kaise ge ǀnam i.—Jhn. 21:7.

5. Tae-e da nē ǁkhāǁkhāǃâs ǃnâ nî ǃhoaǃgao?

⁵ Nē ǁkhāǁkhāǃâs ǃnâ da ge Johaneb di aiǁgausa nî kō tsî ǁîb ge ǀnammi xa xoa xūn tsîna. ǁNāsa da ra dī khami da ge nî ǂan mati da sida di ǃgâsana ǀnamma nî ǁgau ǀgausa. Tsî da ge nî mû mâ ǂhâǂhâsa ǀgaub ǃnâb omaris danaba ǁîb omarisa ǀnamma nî ǁgau ǀgausa.

6. Jehovaba mati ǀnamdab a ǃkhaisa ge ǁgau da?

⁶ ǂGui ǃnāde da ge khoena ǃgâi mîde mîbas tsî ǃgâise tsâ kais di ǂâi hâ. Xawe ǀnammi ge dīgu ǃnâ-ū ra ǁgau-e. (Jakobub 2:17, 26 ǀkha ǀgopeǀnō re.) Aiǁgause Jehovab ge a ǀnam da. (1Jhn. 4:19) Tsîb ge ǁîb di ǀnamma ra ǁgau, ǃgâi mîdi hîna Elobmîs ǃnâ xoamâisa di ǃnâ. (Psa. 25:10; Rom. 8:38, 39) Xawe da ge a ǂan Elob ge ǁîb di mîdi ǃnâ-ū ǀgui ǁgau tama hâ ǀnam dab asa. Xawe ǁîb di dīgu ǃnâ-ūs tsîna ra ǁgauda. Johaneb ge ge xoa: “Nēs ǃnâb ge ǀnammi Elob diba sada ǃnâ ge ǂhai, Elob ge ǁîb di Ôab ǀguise ǃnae hâba ǃhūbaib ai sî ǃkhaisa, ǁîba xu da nî ûiga.” (1Jhn. 4:9) Jehovab ge ǁîb di ôaba ge mā îb ǃgoma tsâ tsî sida ǃgao ǁō. (Jhn. 3:16) ǁNā-amaga da ge a ǂan Jehovab a ama ǀnamdasa.

7. Jesuba ǀnamdab a ǃkhaisa mati ge ǁgau?

 ⁷ Jesub ge ǁîb di ǁkhāǁkhāsabega ge mîba, ǁîb kaise ǁîga a ǀnam di. (Jhn. 13:1; 15:15) ǁÎb ge ge ǁgau ǁîb ǁîga ǀnam tsî sida tsîna a ǀnam ǃkhaisa. ǁÎb ge mî xūn ǃnâ-ū ǀguis ose, xawe ǁîb di dīxūn ǃnâ-ūs tsîna. “Nē-i ǃgâ-ai kai ǀnam-e i ge khoe-e ūhā tama, khoe-i nî ǁî-i khoen ǃaroma ǁî-i ûiba mā,” tib ge Jesuba ge mî. (Jhn. 15:13) Jehovab tsî Jesub tsîn ge dība da xūna da ra mû o, o da tae-e ra dī ǂgao?

8. 1 Johaneb 3:18 sa tae-e ra mî?

⁸ Jehovab tsî Jesub tsîna da ge ǀnamkha da a ǃkhaisa nî ǁgau, ǁîkha da ga ǁnâuǀnam o. (Jhn. 14:15; 1Jhn. 5:3) Jesub ge ǃgāsase ge mîbada î da ǀnamgu. (Jhn. 13:34, 35) Sida ǃgâsana da a ǀnam ti ǀgui da ge mî ǂgao tama hâ. Xawe da ge dīgu ǃnâ-ūs tsîna ra ǁgau ǂgao. (1 Johaneb 3:18 sa khomai re.) Taena da a dī ǁkhā î da ǁgau ǁîna da ǀnam ǃkhaisa?

9. Johaneba khoenab a ǀnam amaga taena ge dī?

⁹ Johaneb ge dadasab ǀkha hâ tsî ǁauǃkhō sîseni ǃnâ mari-e ga kuru hâ. Xaweb ge ǁîb di ǁaeba ge sîsenū îb nau khoena Jehovab tsî Jesub tsîn xa ǁkhāǁkhā. Nēb ge ǁhûibasen ûib ge supu tama ge hâ-i. ǁÎb ge aoǁnâb ra ǃkhais ǃaroma gere mâǃoahe. Tsî kairab hâ hîna tronkhes ǃnâ ge aoǂgāhe. (ǃNǃkh. 3:1; 4:1-3; 5:18; J.ǂHa. 1:9) Jesub xa aoǁnâs ǃaromab ge ǂganamǂgāhe hâ-i, hînas tsînab ge nau khoen xa gere ǂâi. Aiǁgauseb ge Patmos ǃnâb hâ hîna ǂhaiǂhaisa ge hō, tsî ge xoa tsî ǀhaohâga ǃoa ge sî. În ǂan “ǃhaese nîra” ī xūna. (J.ǂHa. 1:1) Tsîb ge Patmosa xu a ǃnora kaihe o, ob ge Johaneba Jesub di ûib tsî aoǁnâ sîseni xa hâ ǂkhanisa ge xoa. Tsîb ge ǁnapaxu ǃnona sîǂkhanide ge xoa, îb ǁîb di ǃgâsana ǂkhâǃnâ. Johaneb ge ûib ǃnâ nau khoen ǃgao gere māsen ǀgausa da mati nî ǁgae?

10. Mati du a ǁgau ǁkhā khoena du a ǀnamsa?

¹⁰ Khoena du a ǀnamsa du ge ra ǁgau sadu ûib ǀkha du tae-e ra dīs ǃnâ-ū. ǁGâuab ǃhūbaib ge ra ǂhâba î du sadu xa ǀgui ǂâi. Tsî mari-e kuru tsî ǀonsa aitsama dībasen. Xristeǁî aoǁnâ-aon ge ǃhūbaib ǂhawase ǁîn di ǁaeba ra sîsenū în aoǁnâ sîseni ǃnâ ǃgarise sîsen. Tsî khoena ra hui în Jehovaba ǂan. ǀNîn ge ǀoasase aoǁnâ tsî ra ǁkhāǁkhā.

11. Matin ǂgomǂgomsa ǃgâsana ra ǁgau ǁîn Jehovab tsî ǁîn ǃgâsana ǀnamsa?

¹¹ ǂGui Xristeǁîn ge ra sîsen în ǁîn di omaridi tsî ǁîn tsîna ǂûmasen. Xawen ge nē ǂgomǂgomsa aoǁnâ-aona Jehovab di organisasisa ra ǂkhâǃnâ mâǀgaub hoab ǃnâ. ǀNîn ge tsūgeǃgâb ga hâba ra hui tsî om sîsengu tawas tsîna ra hui. Tsî hoada ge marina mās ǃnâ-ū a ǂkhâǃnâ ǁkhā. Elob tsî nau khoen tsînan a ǀnam amagan ge nēna ra dī. Mâ wekheb hoaba da ge sida ǃgâsana ra ǁgau ǀnam nî da asa, ǀhaohâb ǀhaode hâǃnâ tsî da ga ǁîn tawa a ǃeream o. Tsauda ga xawe da ge ǁnā ǀhaode ǃoa ra ī. ǀNîsi da ga tao xawe da ge ra ǃeream. Hoada ǃgomsina ūhâ xawe da ge ǀhaos aisis tsî khaos ais tsîna ra ǂkhâǃnâgu. (Heb. 10:24, 25) Sida ǀnamǀnamsa ǃgâsan da dī sîsen-e da ge kaise ra ǃgôaǃgâ.

12. Mâ ǀgaub ǃnâs tsînab ge Johaneba ǁîb di ǃgâsanab ǀnamsa ge ǁgau?

 ¹² Johaneb ge ǁîb di ǃgâsana koas ǃnâ-ū ǀgui ǀnamma ge ǁgau tama hâ i, xawe ǁîna huis ǃnâ-ūs tsîna. Aiǁgause ǁîb di sîǂkhanis ǃnâb ge Johaneba ǁîb di ǃgâsana ǁîn di ǂgoms tsî ǃgâi sîseni ǃgao gere koa. Xawe ǀgaisa ǃkhâikhomsa ge mā ǀaib xa. (1Jhn. 1:8–2:1, 13, 14) ǁNās khami da ge sida tsîna sida ǃgâsana nî koa ǃgâi xūnan ga dī o. Xawe i ga khoe-e ǃgâi tama ǀgauba ga ra omkhâi o, o da ge ǃgâi ǀgaub ǃnâ ǁî-e nî mî-ūnuba. Sida ǀhōsana da ga mî-ūnuba ǂgao o, o da ge ǁkhoaǂgaosiba ǂhâhâ. Xawe Elobmîs ge ra mî ama ǀhōsan ge ra ǁnāmagu tsî ra ǀāǀāgu ti.—ǂKhm. 27:17.

13. Taena da dī tide?

¹³ ǀNî ǁaega da ge sida ǃgâsana da ǀnamsa ra ǁgau xū-e da ga dī tama io. Aiǁgause da ge ǁaixa tama hâ ǁîn da mî xū-i ǃaroma. Jesub di ǀuni tsēdi hînab ge ǃhūbaib ai ūhâ i di xa ǂâi re. ǀNî ǁaeb aib ge Jesuba ǁîb di ǁkhāǁkhāsabega ge mîba ǁîb sorosa ǂû tsîgu ga ǁîb di ǀaoba ao, o ǀguigu ûiba nî hō ǃkhaisa. (Jhn. 6:53-57) ǀNî ǁkhāǁkhāsaben Jesub din ge nē mîdi xa ge ǃgâibahe tama hâ i. Tsî ge sao bi ǀû xawe, ǁîb di ama ǀhōsan ge gere sao bi Johaneba ǃkhōǂgā hâse. Jesub ge mî xūnan ge ge ǁnâuǃā tama hâ i, tsîn ge ǁîn tsîna ǀnîsi gere buru. Xawen ge Jesub di ǂgomǂgomsa ǀhōsana ǁîb ge mî xū-i ǃgâi tama ti mî tsî ge ǁaixa tama hâ i. ǁÎn ge ǁîba ge ǂgomǃgâ, amabab ta ǃhoa ǃkhaisan ge ǂan i amaga. (Jhn. 6:60, 66-69) Kaise i ge a ǂhâǂhâsa i da sida ǀhōsan da mî xūn xa tā ǃhaese ǁaixa. Xawe da ge ra mā-am nî, în ǁguiǃā tae-en ta ǂâibasensa.—ǂKhm. 18:13; Aoǁn. 7:9.

14. Tae-i ǃaroma da mā-am tide i ǃhuisa ǂâide sida di ǂgaob ǃnâ om?

¹⁴ Johaneb tsîn ge ge ǂkhâǃnâ da i da tā sida di ǃgâsana ǃhui. ǁNā ǀapemāsa da ga sao tama io, o da ge Satanni xa nî ǂgaeǂhapuhe. (1Jhn. 2:11; 3:15) Nēs ge ǂguro Xristeǁîn di ǁaeb ǃnâ ge ī. ǁNā ǁaeb aib ge Satanna ge dītsâ în Elob di khoena ǃhuigu tsî ǁnapaxu  ǀgora. Johaneb ge sîǂkhanide gere xoa ǁaeb ǃnâ i ge Satanni di ǀgauba ūhâ khoega ǀhôakaose ǀhaohâb ǃnâ ge ǂgâ. Aiǁgause Diotrefesi ge ǀhaohâgu ǃnâ ǀgaisa ǀgorasa gere dī. (3Jhn. 9, 10) ǁÎb ge ǃgôasi-e ǂgaeǂgui ra sorosa ra ǂnūǁkhaeba khoega ge ūhâba tama hâ i. ǁÎb tsîn ge ǁîba ge ǃgâiba tama hâ i khoena gere ǃkhōǃoa ǃgâsana ǀhaohâba xu gere ǃhaeǂui. ǁNā i ge ǃgâi tama ge hâ i xū-e. ǁGâuab ge nētsēs kōse ra dītsâ ib Jehovab di khoena ǀgora.

15. Oms di danaba tae ǂâis ǃnâ nî ūhâ?

¹⁵ ǁÎb omarisa kōǃgâs ǃnâ-ūb ge oms danaba ǁîb omarisab a ǀnamsa ra ǁgau. (1Tim. 5:8) Xaweb ge ǂâis ǃnâ nî ūhâ ǁîb omarisa Jehovab ǀgūse ūhâs ge a ǂhâǂhâsa. (Mat. 5:3) ǃGâi aiǁgaus hînab ge Jesuba omaris danaga māsa kō re. Johaneb di ǂkhanis ge ra mîba da Jesub gere ǁō ǁaeb ais tsînab ge omaris xa gere ǂâisa. Johaneb ge Jesub di mamas marias ǀkha Jesub gere ǃgam-e ǃkhais ai ge mâ i. Kaiseb mâ gere tsû xaweb ge Jesuba Johaneba ge ǂgan ib Mariasa kōǃgâ. (Jhn. 19:26, 27) Jesub ge ǃgâsana ge ūhâ i Mariasa ga kōǃgâ tsî ǂhâs hâna mâ hâna xawen ge noxoba ge Jesub ǁkhāǁkhāsabe tama hâ i. ǁNā-amagab ge Jesuba Mariasa gagasise tsî sorosise nî kōǃgâ khoe-e ge ǂhâ hâ-i.

16. Tae ǃereamsab ge Johaneba tani hâ-i?

¹⁶ Johaneb ge kai ǃereamsa ge tani hâ i. Aposteli ge i amagab ge ôasase gere aoǁnâ. ǀNîsib ge ǃgammes tsîna ge hî hâ i, tsî ǁîb omaris ǂhâsiga kōǃgâ tsî gagasises tsîna gere kōǃgâ tsî ǁîna Elob ǀgūse gere ūhâ. (1Kor. 9:5) Oms danaga tae-e nēba xu ra ǁkhāǁkhāsen?

17. Tae-i ǃaroma i a ǂhâǂhâsa ib omaris di danaba ǁîna gagasise kōǃgâ?

¹⁷ ǃGâsab hîna omaris di danab ge ǀnîsi ǂgui ǃereamde ūhâ. Aiǁgauseb ge ǁîb di sîsen-i ai kaise ǃkharise nî sîsen, ib Jehovab ǀons ai koasa hā-ū. (Efe. 6:5, 6; Tit. 2:9, 10) Aiǁgauses tsînab ge ǀnîsi ǀhaohâb ǃnâ ǃereamde tani hâ. ǃGâsana ǂkhâǃnâ tsî aoǁnâ sîsen-i ǃnâ aiǁgaus ase nî iba. Tsî i ge a ǂhâǂhâsa  ib ǁîb di omaris ǀkha Elobmîsa ǁkhāǁkhāsen. ǁÎn ge nî gangan ǁîb da ǂuruse tsî ǂkhîse ūhâ nî ǃgais ǃgao. Tsî ǁnās ǀkha Jehovab ǀgūse ra ūhâ nî ǃkhais ǃaromas tsîna.—Efe. 5:28, 29; 6:4.

18. Johaneba tae-e ge ǂan i?

¹⁸ Johaneb ge kaise gaxuse ge ûi. Tsî i ge ǂgui xūna ǁîb ǁaeb ǃnâ ge ī ǃkharagaǃnâgu ǃgomsin hîna ǁîb di ǂhomsa ǂhapuǂhapu hân tsînab ge ge hōǃgâ. Xaweb ge gere dītsâ ib Jesub di mîmās hîna ǁîb di ǃgâsana ǀnamsa ǃkhōǂgā hâsa dī. ǁNā-amagab ge Johaneba ge ǂan i Jehovab tsî Jesub tsîn a ǀnam bi ǃkhaisa, tsîga ǀgaiba nî mâ bi ǃkhaisa ib hâ ga ǃgomsi i hoa-e mā ǃkharu. (Jhn. 14:15-17; 15:10; 1Jhn. 4:16) ǁGâuab tsî ǁîb di ǃhūbaib tsîn ge Johaneba ge ǁkhaeǁgoa-i, ib ǀnamma ǁîb di ǃgâsan ǃoagu mîdi tsî dīgu ǃnâ-ū ǁgau.

19. Tae-es 1 Johaneb 4:7 sa ra ǂkhâǃnâda dīsa tsî tae-i ǃaroma?

¹⁹ Johaneb khami da ge sada tsîna ǁGâuab xa ra ǂgaeǂgui-e ǃhūbaib ǃnâ ra hâ, hîna khoe-e ǀnam tamaba. (1Jhn. 3:1, 10) Sida ǃgâsana da nî ǀnam ǀûsab ge ra ǂhâba xawe da ga sida ǁnāsa mā-am o, o ǀguis ge ǁnāsa nî ī. A da dītsâ re i da sida di ǃgâsana ǀnamma ǁgau. Mî da ra xūn ǃnâ-ūs ǀguis ose xawe dī da ra xūn ǃnâ-ūs tsîna. ǀNamma da ga ǁgau o, o da ge kai ǃgâiaǂgaoba nî ūhâ Jehovab di omaris di ǃgâda a amaga tsî da ge ǂkhî ûiba nî ūhâ.—1 Johaneb 4:7 sa khomai re.