Tita ge St. Paul ti ǀōn hâ ǃās Minnesotas Amerikab ǃnâ 1954ǁî kuri ge ǃnae. Ti ǁgûra ge ǃkhū tama-i tsî ge ǀgâsa tama hâ i tsîra ge ge Katolis di i. Koro ǀgôan ǁaegu ta ge tita a ǀgamǁî. ǂKhariro ta ge i o ta ge tita katolis skoli ai gere ǂgâ tsî ta ge pristera kerkheb ǃnâ gere hui. Xawe ta ge ǀgaisa ǂan-e ge ūhâ ta ma hâ i Elobmîs xa. ǂAn ta ge ge i kuru-aob hâsa xawe ta ge kerkheb ǃnâ ǂgomǃgâsiba ge ūhâ ta ma hâ i.

Jehovab ǀhûǀguitimî-aon ge ti oms ai ge ǀkhī ǂguro kurib hîna ta William Mitchell skoli ǂhanub dib xa hâb ai ra ǁkhāǁkhāsen hîna. Sarana ta mā ra ǁā hîna ra ge ǀhao-ū te amaga ra ge ǁnā khoe-aogura ega ra nî oa ǀkhī ti ge mî. Oa ǀkhī ra ge o, o ta ge nē ǀgam dîra ge dî: “ǃGâi khoena mati io aiǃgû tama hâ nē ǃhūbaib ai?” tsî “khoena mati ama ǂkhîba ǁîn ûib ǃnâ ni hō?” The Truth That Leads to Eternal Life ti ǀōn hâ ǂkhanis tsî New World Translation of the Holy Scriptures hîna ge ǃam i sa ta ge ge ūǃoa. Elobmîs ǁkhāǁkhās tsîna ta ge  ge ūǃoa. Nēs ge ti mûra ge ǁkhopa-am. Kaise ta ge ge ǃgâiaǂgao ǁkhāǁkhāsen ta ge o Elob gaosib khoena nî ǂgaeǂguisa ǃhūbaib ai. Mûǂan ta ge ge khoen ga aitsama ǂgaeǂguisen o i tsûb tsî ǁgâiǀāb ǀguiba ra hausa.

1982ǁÎ kurib ǃnâ ta ge mâǁnâsen tsî ge ǁāǁnāhe “Kingdom Truth” ti ge hâ i kai ǀhaos hîna ge St. Paul Civic Centers ǃnâ hâ is tawa. Saora wekhe ta ge Civic Centersa ǃoa ge oasī i ta Minnesotas ǂhanuǂansabegu eksamensa xoa. Oktoberi tsoatsoas ai ta ge ge ǁnâu ǃgâise ta ge eksamens ǃnâ dīsa tsî ta ge ǁnā ǁaeba xu ǂhanu ǂansabebase ge sīsen ǁkhā i.

ǁNā “Kingdom Truth” kai ǀhaos ai ta ge Mike Richardsoni Brooklyn Bethels ai ge hâ ib ǀkha ge ǀhao. ǁÎb ge ge mîba te ǂhanu ǂansa ūhâ khoe-i nēsisa dana beros ai a sîsen ǁkha ti. ǁNā ǁaeb ai ta ge Etiopiab ti ǁuiǃhōmâi-aob ge ǃNāeǃkhaidi 8:36 ǃnâ a mî mîde ǂâi tsî ge dîsen, ‘tae ra ǂhanî te nē ǂhanuǂans di beros ǃnâ si sîsensa?’ ǁNās xa ǃaromahe hâse ta ge Bethels ǃgao ge ǂgānamsen.

Ti îra ge ge ǂkhîoǃnâ i Jehovab di ǀhûǀguitimî-ao kai ta ge o. Ti dab ge ge dî te ǀapeǂhomisa ta ra dība sîsen i ti ǂhanuǂans di sîsen-e nî aiǃgû kai ǃkhaisa. Māsenxase ra dīhe sîsen-e ta nî dī ti ta ge ge mîba bi tsî ta Bethels di ǁanin naun khama ǂkhari marirosa nî māhesa.

ǀNai ta ge ǁnâuǃgâ ǃkhaib ai ta aipe nî sîsen ti mî hâ i amaga ta ge ǁnā sîsen-e aipe dī toa tsî 1984ǁî kuri ǀgui Brooklyn New Yorki Bethelsa ǃoa ge ī. Sī ta ge o, o ta ge ǂhanuǂansa ūhâ beros tawa ge sîsen tsoatsoa. ǁNâuǃgâǃkhaib ai ta gere sîsen o ta ge om khâi ǂans ge saorase ge ī xū-i ǀkha kaise ge huide.

Stanley ti ǀōn hâ Sali hîna Jersey City ti ǀōn hâ ǃās hîna New Jerseys ǃnâ hâs ge Novemberi 1983ǁî kurib ǃnâ ge ǁamahe. ǃGâsagu ge ge ǂgan ī gu nē sali di kragi tsî ǁgami pygu tsîna hî-unu. ǃĀǃkhōmâis tawa gu ge sī o, o gu ge nē ǃgâsaga ge ǁguiǃā nē sala gu kai ǀhaodi ǃgao ra sîsen-ū ǂgao sa. Nēs ge ge ǃgomsi i. ǁNā ǃās di ǂhanugu ge gere mî, ǃoaba ǃkhaigu khoen ta hâ ai ǂkharidi ǁaegu ǀgui a hâ ǁkha ǃkhaisa. Nē Stanley Sali ge ǂharugu ǃkhaigu ǁaegu ge mâ i. ǁNā-amagas ge nē ǃāǃkhōmaisa ge mā-am ǂgao tama hâ i, i gu ǁnāpa kai ǀhaode ūhâ. ǃGâsagu ge nē mîǁguiba dî ǃgâ,  xawes ge berosa nē mîǁguiba ge dawa ǂgao ta ma hâ i.

Ti ǂguro wekheb bethels ai ta hâb ais ge ǀapeǂhomisa nē kai ǃgomsiba ǁnâuǃgâǃkhaiba ǃoa ge ī-ū. ǀGam kurikha ta ge St. Pauls, Minnesotas ǁnâuǃgâǃkhaib ai a sîsen toa amaga ta ge nēti ī ǁhōga ge ǂanǃgao ī. ǀApeǂhomis ti ǂhanu ǂansabeb ǀguib ge ge mî nē Sali ǃkharagagu xūn ǃgao gere sîsen-ūhesa, aiǁgause, muvin tsî musik konsertan. O i mati io nē Sali ǃnâ ǃoabasa nî tsū? Nē ǁnauǃgâǃkhaib ge ge mî ǃāǃkhōmâi-aogu ge sida ǃoabas di aiǂhanuba ǃgôa tama hâ i ti tsîb ge ǁnauǃgâǃkhaiba ge mî în sida ǂganamsa mā-am. ǁNās ge ge mû ǂan kaide Jehovab mati ǁîb ǀapeǂhomisa ra ǀkhaesa nē ǂhanub ǂansa ra sîsen-ūse. Kaise ta ge ge ǂkhî i tita tsîn ge nēs ǃnâ ǃâ-e ūhâ-i sa.

ǃGâsagu ge kai hî-unus sîsen-i ǀkha ge tsoatsoa tsî i ge 79ǁî Gilead klas di ǀams ǁāxasiba 8 Septemberi 1985ǁî kurib ai Jersey City ǀhaos sali ǃnâ ge ūhâ-e. Kurib tsîn ǃkharu tama hâ hîna hî-unu toahes hâs khaos ai. Kai aiǂhanub ase ta ge ībahē gaosiba ǂkhâǃnâsa nē ǂhanu ǂans beros ǃâb ase tsî ta ge ǁnapa xu tara hō ǂkhîba ǁnâuǃgâǃkhaib ai ta gere sîsen ǁaeb ǀkha a ǀgopeǀnō ǁoa. ǁNā ǁaeb ai ta ge ge ǀū i Jehovab noxopa ǂgui ǁhōgu ǃnâ nî sîsen-ūte sa.

1980 Kurigu ǃnâ gu ge ǀaeǃkhō-aoga ǀao i ose ǀaeǃkhōhes ti aiǂhanuba ge ǃgôa tama hâ i. ǀGoraǃgâ aogu ge gere mî ǀgamǀkha khoedi ǀaopa ǁaihesa ǂkhās di aiǂhanuba ūhâ tama hâ ti. ǁÎgu ge gere mî ǀaob ga ǁaihe tama io i ǁgûsa nî ǁō tsî i ǀgôa-e ǁgûs ose nî kai ti.

29 Desemberi 1988ǁî kurib ǃnâs ge ǃgâsas Denise Nicoleausa ǀgôabas ge hōtoas khaoǃgâ kai ǀaoba ge ǂoaǃnâ. ǁÎs ûib ge kaise ǁkhōǁkhōsa masib ǃnâ mâ-i amagab ge ǀaeǃkhō-aoba gere ǂhâba is ǀaoba ǁaihe. ǃGâsas Nicoleaus ge ge ǂkhā. Saora tsēs ais ge hospitalsa ǀgoraǃgâ-aob ai mā-amsa ge ǂgan in nē ǃgâsasa ǀaoba ǁai. ǀGoraǃgâ-aob ge ǃgâsas Nicoleaus tsî ǁîs kai khoeb tsîna ge mā-am tama hâ-i, i ra ǁîra nēs xa ra tsâ ǀgauba mîǃāba bi. Tsîb ge hospitalsab ge mā-am is ǃgâsasa ǀaoba ǁaihe ǃkhais xas tsîna ǁîra ge mîba tama hâ i.

Vrytaxtsēs Desemberi 30 ain ge ǀaeǃkhō-aona ǃgâsas Nicoleausa ǀaoba ge ǁai, ǁîs kai khoeb tsî omaris ra ǂkhā hîna. ǁNā ǃuia i ge ǁîs ǀao khoen tsî ǀnî ǀhaohâb ǃûi-aoga ǃkhōsis ǃnâ ge ūhe ǁîs kharoban ge mâǂgân amaga. Saora tsēs ain ge New York Citys di ǂhôa ǂkhinigu, tv’s tsî ǂhôaǂgaredi tsîna nē  khoen hîna go ǃkhōsis ǃnâ ūhen xa gere ǂhôa.

Mantaxtsēkam ǁgoaga ta ge ǀgapi ǁnâuǃgâǃkhaib di ǀgoraǃgâ-aob, Milton Molleni ǀkha ge ǃhoa. Nē ǁhōb xa ǁguiǃāba bi tsî ta ge ǁîba ge mîba nau ǀgoraǃgâ aob ge ǃgâsasa dî tamase ǀaoba ǁaihesa a mā-am ǃkhaisa. ǀGoraǃgâ-aob Molleni ge ge mî ita ǁnā karab ai sī, ige ǁnā ǁhōb ǃnâ a sisen-ūhe ǁkhā ǂhanugu xa ǃhoa. Ti mûǂam aob Philip Brumleyb ge ǁnā karab ai ǀgoraǃgâ-aob Molleni berosa ǃoa ge saote. ǀGoraǃgâ-aob ge hospitals di ǂhanuǂansabeb tsîna ge ǁkhau. Kaise ge ge ǀgaisase nē ǁhōba gere ǃhoaǃgao. ǁAe-i aib ge ǃgâsab Brumleyba ǁîb ǂkhanib ai ge xoabate, “okha, ǂaurose.” Kē oa ta ra o, os ge ǁnāsa ge ǃgâi ǁnama i kaise ta ge ǁaixa tsî hospitals di ǂhanu ǂansabeb ge ǂhanu tama xū-e a dīsa gere ǁgau ǂgao amaga.

Īri khaoǃgâb ge ǀgoraǃgâ-aob Mollena ge mî nē ǁhōb saora ǁgoa ǂgurose nî ǃhoaǃgaohe ti. Berosa xū ge ra ǂoa hînab ge ǀgoraǃgâ-aob Mollena ge mî hospitals ǂhanu ǂansab “saora tsēs ai kai sîsen-e nî ūhâ” ti. ǁNās ge gere ǂâibasen hospitals di ǂhanuǂansab ǃgarise nî sîsensa īb ǁgau ǂhanu xū-e gu ge dīsa ǃgâsas Nicoleausa gu ge ǀaoba a mā o. ǁNās ge gere ǁgau te Jehovab ta mîba ge sa nē ǁhōba ge nî dan ti. Kaise i ge ge ǀō-aisaba te ī mûsa, Jehovab sīge ra sîsen-ūse ǁîb ǂâisa ra dī ǀoaǀoasa.

ǁNā ǃoē ge ge saora tsēs ai ge sī nî mî xūna gere aiǂhomi. ǁNâuǃgâǃkhaib ge Brooklyn Bethels ǀgūse hâ, ǁnā-amagan ge ǃnāsa khoen sīda beros di na ge ǀnowa sī. Haka ǀgoraǃgâ-aogu ge sige ra mî xūna a ǃgâ toas khaoǃgâ gu ge ge mûǂān ǀaoba ǁais di mā-ams ga mā-amhe tama hâ ǃkhaisa. ǀGapi ǁnâuǃgâ ǃkhaib ge ǃgâsas Nicoleaus ǀkhaba ge ū tsî ge mî ǂhanu tama ī hâ ǃkhaisa ǀaesen hâ khoe-e ǃgâ tamase ǀaoba māsa.

ǁNās khaoǃgâb ge New Yorki ǀgapi ǁnâuǃgâǃkhaiba ge mî ǃgâsas Nicoleaus di aiǂhanub a ǃkhaisa ǀaob ose ǀaeǃkhōhesa. ǀGapi ǁnâuǃgâǃkhaib ai ge sī-ūhe haka ǁhōgu hîna ǀaob xa ge hâ ī ǂguro ge īb ge hîna ta ge tita ǃâ-e ūhâ ība. (“ ǀGapi ǁnâuǃgâǃkhaigu ai ge danhe ǁhōgu” ti hâ boksisa mûre.)  Bethels ai ta ge ǀnîhâ ǂhanuǂansaben ǀkhā ǁhōgu ais tsîna gere sîsen. Nē ǁhōgu ge ǃgamme ǀgoras, ǃgamme ǀgoras khaoǃgân ǀgôana nî kēǃgâhe ǀgaus tsî oman xa hâ ǂhanugu tsîna ge ǃkhōǂga hâ ī.

Ti taras Dawnsa ta ge ǀhao-ū ǁaeb ais ge ǁîsa ǃnona ǀgôana ǀguri gere kaikai ǃgammebas ge ǀgōra hâ ī xui-ao. ǁÎs ge ge aimâba ao ī tsî gere sîsen. ǁÎs ge kaise ǃgom ǁaeba gere hōǃâ ûib ǃnâ tsî ta ge kaise ge ǃgâibahe ī Jehovabas ge nēn hoan ǃnâ ge re ǃoaba ǀgaub xa. 1992ǁÎ kurib ai ge New Yorki ǃnâ hâ ī kai ǀhaos “Light Bearers” aim ge ǀguipa ge hâ ī tsî ta ge ǁnapa ge dî amsi. Kurib khaoǃgam ge ge ǃgamme. Gagasi xūna ǂgurose ra mâi tarasa ūhâs ge Jehovaba xu hâ ǀkhaeb ase ība te. Dawns ge amabes ǃnâ sîm ûi tsēdi hoade ǃgâi dī te hâ.—ǂKhm. 31:12.

ǃGammem ge ǁaeb ai ī ge ǀgôana 11, 13 tsî ge 16 kurixa ī. Nē ǀgôana ta ǃgâi ǁgûb ase ra ība ǂgao amaga ta ge ôaǃgâǁgûn xa hâ xūn hîna ǀapeǂhumis ǂkhinin ǃnâ hâna khomai tsî ǁkhāǁkhāsen ta gere xūna gere dī tsâ. ǂGui ǃgomsin ge kurin ta ī khama ge hā xawe ta ge kaise ra ǃgâiaǂgao ǀgôan ge tita ǀhōsab tsî ǀnamǀnamsa ǁgûb ase a ūǃoasa. Sîm ǀgôan ǀhōn ge hoaǁae ge ǁkhoreǁharesa ī sîm oms ai tsîm ge ge ǃgâibahe ī nē ôasa khoen ǁaegu hâsa.

2013ǁÎ kurib ǃnâm ge Dawn hâma Wisconsinsa ǃoa ge doe îm sîm kaira ǁgûra sī kēǃgâ. ǁKhauhe ta ge ge īta ǀapeǂhumisa ǂhanuǂans sîsen ī ǀkha hui. Kaise ta ge ge buru, mû ta ge o Bethels noxoba ra sîsen-ū te ǃkhaisa.

Septemberi 2018ǁî kurib ǃnâ ta ge ge hōǃâ xū-i ti dommi ǀkha ǃgâi tama hâsa. ǀAeǃkhō-aob ge ge ôaǃnâ te xawe ǃgomsib a tae ǃkhaisa ge hō tama hâ ī. Ēgab ge ǀnî ǀaeǃkhō-aoba ge mî ita ǂkhûs ǀkha ra sîsen ǀaeǃkhō-aoba sī mû. ǂKhûs di ǀaeǃkhō-aob ge Januarib 2019ǁî kurib ǃnâ ge mîba te kaise ǁkhōǁkhōsa ǂkhûs ǀaeba ta ūhâ ǃkhaisa tsî ī nē-e ti soros hoasa nî tsâǀkhasa. (Progressive supranuclear palsy-PSP)

ǃNona tsēdi khaoǃgâ ta tita a ǁkhoaxaba ǂgâmǂgâmsen ǀhuru-i ǀkha a ǁaxa hîna ta ge ǁnā tsî ti ǃomǃarosa ge khôa. Nē sorosi ǂgâmǂgâmsen ǀhuruba ta ge ti ûib hoaba ge ǀhuru tsî ta ge ǁnās ǃnâ kaise ge ǃgâi i. ǁNā ta ge o, o ta ge ge mûǂan ti soros ra ǂkhabusa. Nē ǀaeb ge ǃhaese ge ǁgaoǂgâ tsî ta ge ǃhoas, gons tsî haras tsîn xa ge ǃgombahe tsoatsoa.

Kaise ta ge a ǂkhî Jehovab di ǀapeǂhumisa ta ge ti sîsen i ǀkha hui ǁkha ī ǃkhaisa. ǀAeǃkhō-aon, ǂhanuǂansan tsî ǀgoraǃgâ-aon xa ra khomaihe ǂkhinigu ǃnâ ta ge ǃâga xoa ǃkhais tsîn ge ra ǂkhî kaite. ǃHoaǃân tsîna ta ge gere mâ ǃhūbaib ǂhawase Jehovab khoena ra ǁkhaubana în ǀaob ose ǀaeǃkhōhe. Xawe ta ge Lukab 17:10 ǃnâ ra hō-e mîde ra ǃkhō-am, ‘tita ge anu tama ǃgā ta, dīsa anuba te hân ǀguina ta kom ge dī o.’