31ǁÎ ǁKHĀǁKHĀǃÂS
‘Mâhō tsî ǁnobeǁoasase i’
“ǁNā-amaga, ti ǀnamsa ǃgâsado, mâhō, ǁnobeǁoasase i.”—1KOR. 15:58.
122ǁÎ ǁNAETSANAS Mâǀgai re
ǃKHŌǀHAOS a
1-2. Xristeǁîna mâǀgaub ǃnâ kai ommi ǀkha a ǀgopeǀnōhe ǁkhā? (1 Korinteǁîn 15:58)
TOKYO Japani ǃnâ i ge 1970 xi ǃnâ, kaise ǀgapi oma ge omhe. Tsîn ge ǁnā oma gere mû khoena gere ǂâi, ǁîb mati hoaǁae ǃhūǂgubiga nî mâǃkharusa. Tae-e ge hui îb ǁnā oma mâ hō ǁkhā? ǁNā oma ge kuru khoegu ge ǀgaub ǃnâ ge kuru, î-i kaise ǀgaisa. Xawe ǃhūǂgubib ga hâ o, o ǁkhā ǁaeb ais tsîna gon ǁkhā. Xristeǁîn ge ǁnā kai ommi khami ī. Mâ ǀgaub ǃnâ?
2 Xristeǁîn ge ǁaposase mâs tsî gon ǁkhās ǁaegu ǃgâi ǀgorasa nî ūhâ. ǁÎ-i ge Jehovab di ǂhanugu tsî ǁharagu tsîna ǁnâuǀnams tawa i ga hā, o ǁaposase nî mâǀgai. (Khomai re 1 Korinteǁîn 15:58 sa.) ǁÎ-i ge ‘hoaǁae a ǁnâuǀnamxa’ tsî mâǁnâsen tama hâ. Xawe mâsib ga mā-am o, o î ge ǁî-e a “tsauraǃnâ” tamas ka io a gon ǁkhā. (Jak. 3:17) Xristeǁî-i hîna nē xūn ǁaegu ǀnōsa mûǂuiba ūhâ î ge hoa xūna ǂkhā tide. Tamas ka io hoa xūna mā-am tide. Nē ǁkhāǁkhāǃâs ǃnâ da ge nî ǃhoaǃgao, mati da ǁnobeǁoasase a īǁkhāsa. Tsî da ge ǁGâuab ra sîsenū 5 ǀgaugu xa nî ǃhoaǃgao. Hînab ra sîsenūga sida ǂkhabuǂkhabus ǃaroma î da tā mâǀgai.
MATI DA A MÂǀGAI ǁKHĀ?
3. Jehovaba mâ ǂhanuga ǃNaeǃkhaidi 15:28, 29 ǃnâ ge mâ?
3 Jehovab ge a ǂHanub di mā-ao tsîb ge ǁnās ǃaroma ǃgāsa ǂhanuga ǁîb khoena gere mā. (Jes. 33:22) Aiǁgause, ǂgurogam ǁaeb di ǂGaeǂguira soros ge ǃnona ǀgaugu Xristeǁîn nî mâǀgai ǃnâ ga ge mā: (1) ama tama hâ eloga xu ǂgōsens tsî Jehovab ǀguiba ǃoabas, (2) în ǀaoba ǂhâǂhâsa xū-i ase mû. Tsî (3) în Elobmîs di ǀgapi daoǁgaude ǀoasase sao-ai. (Khomai re ǃNaeǃkhaidi 15:28, 29 sa.) Xristeǁîna nētsē mati nē 3 ǀgaugu ǃnâ a mâǁapo ǁkhā?
4. Mati da Jehovaba ǀoasa ǃoabasa ra mā? (ǂHaiǂhais 4:11)
4 Ama tama ǃoabade xu da ge ra ǂgōsen tsî Jehovab ǀguiba ra ǃoaba. ǁÎb ge Israelǁaesa ge mîmā, ǁîb ǀoasase ra ǃoabahe ǂgaosa. (Deu. 5:6-10) Tsî Jesub ge ǁGâuab xa a ǃâitsâhe o, ob ge Jesuba ge ǃgāsa kai Jehovab ǀguiba da nî ǃoabasa. (Mat. 4:8-10) ǁNā-amaga da ge tā ǁgoatsuiǁgoa eolga nî ǃoaba. Tsî da ge khoen tsîna ǃoaba tama hâ. Nēsin ga kerkheb di ǂgaeǂgui-ao, polotiks ǂgaeǂgui-ao tamas ka io ǂamǂamsen ǀhurugu tsî ǂanǂansa khoe-i xawes tsîna. ǁÎna da ge elogu ase mû tama hâ. Jehovab ǀkhab ai da ge ra mâǀgara ǁîb ge “hoaraga xūna kuru xui-ao” tsî da ge ǁîb ǀguiba ra ǃoaba.—Khomai re ǂHaiǂhais 4:11 sa.
5. Tae-i ǃaroma da ǀaob ǂhâǂhâsasib tawa i ga hā o, Jehovab di mîmāsa ra ǁnâuǀnam?
5 Jehovab ǂhanub ǀaob ǂhâǂhâsasib xa hâba da ge ra ǁnâuǀnam. Tae-i ǃaroma? Jehovab ra mî amaga ǀaob ge ûiba ra ǂnûǁkhaeba. Tsî nēb ge ǀō-aisa ǀkhaeba ǁîba xu. (Lev. 17:14) Jehovab ge ǂgurose khoena a mā-am o, în ǁgan-e ǂû ob ge ǁîna ge mîba în tā ǀao-e ǂû. (Gen. 9:4) ǁKhawab ge nē xū-e ge mî, Israelǁaesab ge Moseb ǂhanuba a mā o. (Lev. 17:10) Tsîb ge ǁkhawa ǂgurogam ǁaeb ǂGaeǂguira sorosa ge mîba, î-i hoa Xristeǁîna mîbahe în “ǀaoba āsa xū ūdawasen.” (ǃNǃkh. 15:28, 29) Nē mîmāsa da ge kaise ra ǁnâuǀnam ǀaeǃkhōs mâsib tawa î ga hā os tsîna. b
6. Taena da ra dītsâ î da Jehovab di ǂhanuga ǁnâuǀnam?
6 Jehovab ǂhanuga da ge ra ǁnâuǀnam, ǁgoe-ūgub tawa ī ga hā o. (Heb. 13:4) Apostel Paulub ge ge mî, î da sada sorosi ǃâga “ǃgam.” ǁNās ge xū-e dīsa î da ǃgâi tama hâ tsâsiga ūbe. ǀAi kai da nî xūna da ge kō tamas ka io dī tide. (Kol. 3:5; Job. 31:1) ǃÂitsâhe da ga, o da ge xū-i hîna sada ǀhōsagusis Elob ǀkha da ūhâsa nî ǁgaiǁgai-e dī tamas ka io ǂâi tide.
7. Tae-e da nî dī? Tsî tae-i ǃaroma?
7 Jehovab ge ra ǃâubasen, î da “ǂgaob hoaba xu ǁnâuǀnam.” (Rom. 6:17) ǁÎb daoǁgaus ge hoaǁae sida ǃaroma a ǃgâi. Tsî da ge ǁîb daoǁgaude a dawa ǁoa. (Jes. 48:17, 18; 1Kor. 6:9, 10) Dītsâ da ge ra Jehovaba ǂkhîǂkhîsa tsî Psalmdi xoa-aob ǀgauga ūhâsa, xoab ge o: “Ti ǂgaoba ta ge sa ǁguiǂamde dīǀoaǀoas ai ra ǃammâi ǀamosiba xu, ǀunis kōse.” (Psa. 119:112) Xawe ǁGâuab ge ra dītsâ îb ǂkhabuǂkhabu da, dī ǂgao da ra xūn ǃnâ. ǁÎba mâ ǀgauga ra sîsenū?
ǁGÂUABA MATI RA ǂKHABUǂKHABU DA ǂGAO?
8. ǁGâuaba mati ǃgôaǃgonsa ra sîsenū îb sida ǂkhabuǂkhabu?
8 ǃGoaǃgonhes. ǁGâuab ge sorosise tsî emosioneelse ra ǂkhabuǂkhabu da ǂgao. ǁÎb ge ra “hapu” da ǂgao îb Jehovab ǀkha da ūhâ ǀhōsagusisa dīkākā. (1Pet. 5:8) ǂGurogam ǁaeb Xristeǁîn ge ǃkhâikhomhe, ǂnauhe tsî ge ǃgamhe ǁîn ge mâǀgai ǃkhais ǃaroma. (ǃNǃkh. 5:27, 28, 40; 7:54-60) ǁGâuab ge nētsē ra aiǃgû ǃgôaǃgonsa sîsenūsa. Russiab tsî ǀkhara ǃhūgu ǃnâs tsîna da ge nēsa ra mû. ǁÎn sida ǃgâsana ǁgaise ra mâǃoa amaga. Xawe nēs tsîna da ge ǃhūbaib ǂhawase ra mû. Mâǃoa-aon ǀnî hâ ǀgaugu ǃnâ sida ǃgâsana ra ǃgôaǃgon amaga.
9. Tae-i ǃaroma da ǁgâiba nî ǂanbasensa, ǁguiǃā re.
9 ǁGâib. ǁGâuab ge ‘ǀapena’ ra sîsenū îb ǁnāǂamda. (Efe. 6:11) Bob ti ǀon hâ ǃgâsab aiǁgausa kō re. Hîna ge kai ǃhôas ǃaroma ǀaeǃkhō-oms ǃnâ a ǁgoe kaiheba. ǁÎb ge ǀaeǃkhō-aoba ge mîba, mâsib ga mati ī xaweb ǀaoba ǁaihe tidesa. ǃHôasa ga dī hâ ǀaeǃkhō-aob ge ǁnās ǀkha ǃgomsiba ge ūhâ tama hâ i. Xawe ǃgâsab nî ǃhôahe ǃuis aiǃâb ge ǀkhara ǀaeǃkhō-aoba Boba ge sari. ǁÎb omaris ge oa o. Tsî Boba ge mîba ǀaob ǀnîsi māhe tidesa xawen ǀaoba ǁîn ǀgūse nî ūhâsa xū-i ga ǀnîsi īo. ǀAeǃkhō-aob ge ǀnîsi ge ǂâi, Bobi ǁîb ǂâisa nî dawasa ǁîb omaris a ǀkhai amaga. Xaweb ge Boba mâǀgai tsî ge mîǁgui ǁîb tātsē ǀaohe māhe tidesa.
10. Tae-i ǃaroma i khoesi ǂâiǀgauba a ǁkhōǁkhōsa? (1 Korinteǁîn 3:19, 20)
10 Khoesi ǂâiǀgaub. Xūna da ga khoen di mûǂuib ǃoagu kō o. O da ge Jehovab tsî ǁîb di ǂhanugu tsîna a ǁnāxu ǁkhā. (Khomai re 1 Korinteǁîn 3:19, 20 sa.) “Nē ǃhūbaib di gā-aisib” ǃnāsa ǁaegu ai khoena ra ǂkhâǃnâ, în tā Eloba ǁnâuǀnam. ǀNî Xristeǁîn hîna Pergamums tsî Tiatiras tsîn ǃnâ gere hân ge nē ǃgâi tama hâ ǀgauga ge omkhâi. Jesub ge nē 2 ǀhaohâga ǀgaisase ge ǃkhâikhom, ǁîn ge ǃgâi tama hâ ǁgoe-ūgu ǀgauga gere ūǃoa amaga. (J.ǂHa. 2:14, 20) Nētsēn ge khoena a ǁgari da ǁkhā, î da ǃgâi tama hâ ǂâi ǀgauga ūǃoa. Omaris ǁanin tamas ka io ǀhōsan ge a ǂgom kai da ǁkhā, tsū tama i hâsa Jehovab ǂhanuga ǃgûǂamsa. Aiǁgause, ǁÎn ge ra mî sida turagu ǃnâ mâǁnâsens tsū tama hâsa. Tsî Elobmîs di ǁharagu a ǃgomsa.
11. Mâǀgai da ra hîna da tae-e xū nî ǂgōsen?
11 ǀNî ǁaegu ai da ge a ǂâi ǁkhā, Jehovab ra māda daoǁgaudi ǃgāsa tama hâsa. ǀNîsi da ge nî ǃâitsâhe î da tā “xoahe gena ǁnâuǀnam.” (1Kor. 4:6) Jesub di ǁaeb ǃnâ ge hâ-i kerkheb di ǂgaeǂgui-aogu ge nē ǁoreb ǃnâ ge ǀhapixa i. ǁÎgu ge khoesi ǂhanuga, Elob ǂhanub ai gere ǀaro tsî-i ge ǁnāsa khoena kaise gere ǃgomba. (Mat. 23:4) Jehovab ge ǃgāsa daoǁgauna ǁîb Mîs tsî ǀapeǂhomis ǃnâ-ū ra māda. ǃAroma î ge a ǀkhai ǁîb di daoǁgaudi ai ǀarosa. (ǂKhm. 3:5-7) ǁNā-amaga da ge xoahe gena ra ǁnâuǀnam. Tsî Elobmîs ǂgaoǀkhā tama hâ xūn ai ǂhanuga ǁgui tama hâ.
12. ǁGâuaba nētsē mati ‘xū tama gāxaǃnâde’ ra ǂkhâǃnâ?
12 Gāxaǃnâsib. ǁGâuab ge “xū tama gāxaǃnân tsî khoesi gā-ai ǃhoaxūn” ǃhūbaib din tsîna ra sîsenū, îb khoena gāxaǃnâ tsî ǀgora. (Kol. 2:8) ǂGurogam ǁaeb ǃnâ î ge nē khoesi gā-aisiba khoen di ǂâi ǀgaub ai ge ǃgaoǃgaosa-i. Xoas ai ge ǃgaoǃgaohe tama hâ i Jodeǁîn ǁkhāǁkhādi tsî ǁkhāǁkhās hîna gere mîsa Xristeǁîn ge Moseb di ǂhanuba nî ǁnâuǀnam. Nē ǁkhāǁkhādi ge khoena gere gâre mû. Khoen di ǂâide î ge Jehovaba xu gere ūbe amaga, ǁîb hîna a gā-aiba. Nēstēb ge ǁGâuaba internetsa ra sîsenū îb ama tama hâ ǂhôana ǂhôaǂui, hîna ǀnî ǁaegu ai polotiks ǂgaeǂgui-aona xū ra hāna. ǂGui ama tama ǂhôan tsîna ge Coronas ǁaeb ǃnâ ge hâ i. c Jehovab di ǃoaba-aon hîna ge ǀapeǂhomisa xu gere hā, ǂhôana gere ǃgân ge khoen gere hōǃâ ǂâiǂhansende ge ūhâ tama hâ i.—Mat. 24:45.
13. Tae-i ǃaroma da sida ǂâisa a ǂgaeǂhapu ǁkhā xūna xu nî ǂgōsen?
13 Sida ǂâide ra ǂgae xūn. Tā da ge ‘ǂhâǂhâsa’ xūna xu sada ǂâisa nî ūbe. (Fil. 1:9, 10) Sida ǂâis ga ǀkhara ǃkhai-i tawa hâ o, o da ge ǂgui ǁaeb tsî ǀgaib tsîna ra ǂoaǃnâ. Tsēkorobe ûib di xūn ǂûs, ās, ǁkhoaxa ǁaeba ūhâs tsî sîsenni tsîn ge sida ǂâisa a ūbe ǁkhā mā-am da ga o. (Luk. 21:34, 35) ǁNās xōǀkhā da ge tsēs hoasa polotiks ǂhôan tsî mâǃoadi xa ra ǁnâu. Tā da ge nî mā-am în nē xūna sida ǂâisa ǂgae. ǁNāsa da ga dī, o da ge sida ǂâis tsî ǂgaob tsîn ǃnâ ǀkhā-e a ǁhûi ǁkhā. ǁGâuab ge nē xoaǀgoras ǃnâ ge ǃhoaǃgaohe xūna ra sîsenū, îb sida ǂgaeǂhapu ǃgâi xū-e dīsa xu. Hā re î da ǃhoaǃgao mati da ǁîba a mâǃoa ǁkhā ǀgaub tsî nî mâǀgai ǀgaub xas tsîna.
MATI DA A MÂǀGAI ǁKHĀ?
Mâǀgai ǂgao da ga, o da ge sada mâǁnâsens tsî ǁāǁnâs tsîn xa nî ǂâiǃgâ. Elobmîsa ǁkhāǁkhāsen tsî da ge nî ǂâiǃgâ. Mâǀgai nî ǂgaoba omkhâi tsî Jehovab ai nî ǂgomǃgâ (14-18ǁÎ xoaǀgorade mû re)
14. Mâ ǀgui xū-e a hui du ǁkhā, î du Jehovab ǀkhāb ai mâǀgai?
14 Sadu mâǁnâsens tsî ǁāǁnâs tsîn xa ǂâi re. Mâǁnâsen tsî du ge ǁāǁnâ kaisen o, o du ge ge ǁgau Jehovab ǀkhāb ai du mâsa. ǂÂi-oa re tae-i ge hui du sa î du ǂgom, amaba du ge hōsa. Jehovaba du ge ge ǂan tsoatsoa tsî î ge ǁîba du ūba hâ ǃgôasiba ge kai. Tsî du ge ǁîba sadu ǀnamxaǃnâ ǁgûb ase ge ǀnam tsoatsoa. ǂGomsa du ge ge omkhâi tsî ge ǂkhâǃnâhe î du ǃhausen. Sadu ǂgaob ge ge ǂkhâǃnâ du, î du Elob ǂâis ǀkha ǃgûǀhao tama hâ ǁnaetiga ǁnāxu. ǃGâise du ge ge tsâ Elob ǀûbaba du ge hôǃâ o. (Psa. 32:1, 2) ǀHaode hâǃnâ tsî du ge ǁkhāǁkhāsen du ra xūna naun ǀkha ge ǀgoragu tsoatsoa. Mâǁnâsen tsî ǁāǁnâhe hâ Xristeǁî-i ase du ge nēsi ûib di daob ai ra ǃgû. Tsî du ge ǂgomǃgâsiba ūhâ ǁîba du tātsēs tsîna ǂoaǃnâ tidesa.—Mat. 7:13, 14.
15. ǁKhāǁkhāsens tsî ǂâiǃgâs tsîna tae-i ǃaroma a ǃgâi?
15 Elobmîsa ǁkhāǁkhāsen tsî ǂâiǃgâ. Hais ge a mâǀgai ǁkhā, ǃgam ǃnomagas ga ūhâ o. ǁKhā ǀgaub ǃnâ da ga sada ǀgaisa ǂgomsa Jehovab ǃnâ ga ūhâ, o da ge sida tsîna nî mâǀgai ǁkhā. Hais ra kai khami î ge ǃnomaga ǃgamse ǃhūb ǃnâ ra ǂgâ tsîs ge ra kai. Elobmîsa ǁkhāǁkhāsen tsî da ga ǁîs xa ga ǂâiǃgâ. O da ge sida ǂgomsa ra ǀgaiǀgai tsî ra ǂgomǃgâ Elob xūna ra dī ǀgaub a ǃgâisa. (Kol. 2:6, 7) Jehovab ge ǃkharuge ǁaeb ǃnâ mati ǁîb khoena ǁkhāǁkhā, daoǁgau tsî ǁkhauba ǀgaus xa ǂâiǃgâ re. Aiǁgause, Esegieli ge ǂōrisase gere kō ǀhomǃgāb ge ǁhapos ǃnâ tempela gere ǀē-o. Nē ǁhapos ge Esegiela ge ǀgaiǀgai. Tsî î ge ǀgauga ra ǁgauda, mati da Jehovab di ǂhanuga ama ǃoabas ǃnâ a sao-ai ǁkhā ǀgausa. d (Ese. 40:1-4; 43:10-12) Sida tsîn ge ǃgâiba ra hō ǁaeba ǁamaǂui, tsî da ga Mîs di ǃgam xūn xa ǁkhāǁkhāsen tsî ǂâiǃgâ o.
16. ǂHomisa ǂgaoba mati Boba ge hui? (Psalmdi 112:7)
16 Sadu ǂgaoba ǀgaiǀgai. Gao-aob Davib ge ge mî tātsēs tsînab Jehovabab ūba hâ ǀnamma ǂoaǃnâ tidesa. Nētib ge ǁnae o: “Ti ǂgaob ge a ǂhomisen hâ Elotse.” (Psa. 57:7) Sida tsîn ge ǂhomisa ǂgaoba a ūhâ ǁkhā, Jehovab ǃnâ ǀoasase ǂgomaiǂnûis ǃnâ. (Khomai re Psalmdi 112:7 sa.) Kō re nēs ge mati Bobi ǃhoaǃgaohe go ba a hui ǀgausa. ǁÎb ge mîbahe o ǀaob ǀgūse nî uhâhesa, ǀnîsi i ga ǂhâbasa o. Ob ge ǁîba ǃkhaese ǃeream tsî ge mî, ǀaobab ga ǀnîsi māhe ob ǁîba ǁnā ǀaeǃkhō-omsa xu nî īsa. Ēgab ge Boba ge mî, “tātsēs tsîna ta ge ge ǂâiǂhansen tama hâ i.”
ǀGaisa ǂgomsa da ga omkhâi, o da ge nî mâǀgai hō ǃgomsin ga hā xawe (17ǁÎ xoaǀgorasa mû re)
17. Tae-e da Bobi ǀkha ge ī xū-e xu a ǁkhāǁkhāsen ǁkhā? (Ai-īsiba mû re)
17 Bobi ge ge mâǀgai, ǀnaib ge ǁîb mîǁguiba dī hâ-i amaga ǀaeǃkhō-oms tawab nî sīs aiǃâ. ǂGuroseb ge turaba ge ūhâ i Jehovaba ǂkhîǂkhîsa. ǀGamǁîseb ge Elobmîs tsî ǁîs ai ǃgaoǃgaosa ǂkhanin tae-e ǀaob tsî ûib xa ra mîs xa ge ǁkhāǁkhāsen. ǃNonaǁîseb ge ǂgomǃgâsiba ge ūhâ i Jehovab nî mādawa-ambisa ǁîb daoǁgausab ge ǁnâuǀnam amaga. Sida tsîn ge ǁkhā ǀgaub ǃnâ a mâǀgai ǁkhā ǃgomsiga da ga hōǃâ o.
Baraki tsî ǁîb di khoegu tsîn ge Siserab toroǂnubisa ra sauru (18ǁÎ xoaǀgorasa mû re)
18. Baraki aiǁgausa tae-e ra ǁkhāǁkhāda Jehovab ǃnâ ǂgomaiǂnûis xa? (Tsoatsoas ai hâ ai-īsiba kō re.)
18 Jehovab ai ǂgomaiǂnûi. Kō re Baraki ge mati a dansa, Jehovab daoǁgausab ge ǂgomǃgâ amaga. ǁNā ǁaeb ai i ge Israelǁîna ge aiǂhomisa tama hâ i ǃkhams ǃaroma. Xaweb ge Jehovaba Baraka ge mîba, îb ī tsî Kannani ǂgaeǂgui-aob Siserab tsî ǁîb khoen ǃoagu sī ǃkham. Hîna ge ǂgui xūna ǃkhams ǃgao ūhâ îba. (ǂHǂh. 5:8) Kēbo-aos Deboras ge Baraka ge mîba, îb ǃhomga xu ǁgôa tsî ǂhāba ǃhūba ǃoa ī. Îb Siserab tsî ǁîb 900 toro kunidi ai hâ khoegu ǀkha sī ǃkham. ǁNā kunidi ǃoagu ǂhāba ǃhūb ai ǃkhams ge kaise Israelǁaesa ga ǃgomba hâ. Nēsab ge Baraka ǂan-i xaweb ge ge ǁnâuǀnam. ǃKham-aogu Taborǃhomma xu ra ǁgôaxa hînab ge Jehovaba ǀgaisa ǀanusa ge tsoatsoa kai. Siserab di kunidi ge ǂgoab xa ge ǃkhōhe tsîb ge Jehovaba Baraka dansa ge mā. (ǂHǂh. 4:1-7, 10, 13-16) ǁkhā ǀgaub aib ge Jehovab tsîna sida dansa a mā ǁkhā, ǁîb tsî ǁîb daoǁgaudi ǃnâ da ga ǂgomaiǂnûi o. Hînab ǁîb ǂnûǁkhaeba aogu ǃnâ-ū ra māda na.—Deu. 31:6.
MÂǀGAISA MÎǁGUI
19. Tae-i ǃaroma da nî mâǀgai?
19 Nē ǃhūbaib ǃnâ da ûi hâs kōse da ge mâǀgais ǃaroma nî ǃkham ǀgara. (1Tim. 6:11, 12; 2Pet. 3:17) ǂGomǃgâsiba da ge nî ūhâ, î da tā ǃgôaǃgonhes, ǁgâib, khoesi ǂâiǀgaub, gāxaǃnâsib tsî sada ǂâi ǀgauba a ǂhani ǁkhā xūn xa ǃombehe. (Efe. 4:14) A da mâǀgai tsî hoaǁae Jehovaba ǀnam tsî ǁnâuǀnam. Xawe ǁkhā ǁaeb ais tsîna da ge nî ǁnâuǃāxasiba nî ūhâ. Saora ǁkhāǁkhāǃâs ǃnâ da ge nî ǃhoaǃgao, Jehovab tsî Jesub mati ǃgâi aiǁgausa ǃnâuǃāxasib tawa ī ga hā o ra ǁgausa.
129ǁÎ ǁNAETSANAS Mâǁapo da ge nî
a Adammi di tsēdi xub ge ǁGâuaba khoena ra ǂkhâǃnâ, în aitsâma tae-i a ǂhanus tsî tae-i ǂhanu tama hâs ǁaegu ǁhûi. ǁÎb ge ra ǂhâba, î da sida tsîna ǁkhā ǂâi ǀgauba Jehovab daoǁgaudi ǃoagu ūhâ. Tsî ǁîb di ǀapeǂhumis ra māda daoǁgaudi ǃoagu tsîna. Nē ǁkhāǁkhāǃâs ge nî huida, î da tā Jehovab di ǂhanuga ǃkharaxu. ǁGâuab di khoen ra dī khami. Tsî î ge nî huida, î da hoaǁae Jehovaba ǁnâuǀnam ǂgao.
b Xristeǁî-e mati ǀaob di ǂhâǂhâsasiba a mû ǁkha ǀgauba ǃnāsa ǃgāsasib ǃaroma ǀAmosib kōse ǃgâiaǂgao re ti ǀon hâ ǂkhanis ǃnâ 39ǁî ǁkhāǁkhāǃâsa mû re.
c “Protect Yourself From Misinformation” ti hâ khomaiǃâsa jw.orgs ai mû re.
d ǃNāsa ǃgāsasib ǃaroma Pure Worship of Jehovah—Restored At Last ti ǀon hâ ǂkhanis ǃnâ, 13-14ǁÎ ǁkhāǁkhāǃâde mû re.