1. Mâ amaba du ge Elobmîsa ǁkhāǁkhāsen ǃnâ hō?

 ǂÂI-OA i du ra Elobmîsa du ge ǁkhāǁkhāsen tsoatsoa o? ǀNîsi du ge ge buru ǁkhāǁkhāsen du ge o, Elob ǀonsa ūhâsa. Tsî du ge ǀnîsi ǃgâise gere tsâ ǁkhāǁkhāsen du ge o, Elob khoena ǀamo ǀaeb ǃnâ ǂhupi tama hâsa. ǁŌ ge ǀnamsabena ǁkhawa mûs xas tsîna du ǀnîsi gere ǃgâiaǂgao. Tsî ǁîn ǀkha ǀamosib kōse ǃhūbaib ai Paradis ǃnâ ûisa.

2. Elobmîs amaba ǁkhāǁkhāsens xoǀkhā du mâ ǀkharaǀkharana dī hâ? (Efeseǁîn 5:1, 2)

² Elobmîsa du ra ǁkhāǁkhāsen khami i ge, Jehovaba du ūba hâ ǀnamma nî kai. ǁNā ǀnammi ge ge ǂkhâǃnâ du, i du ǁkhāǁkhāsen du ra xūna ûiǂui. Tsî du ge ǃgâi mîǁguiga Elobmis daoǁgaudi ǃoagu gere dī. Sadu di ǂūb tsî dī du ra xūn tsîna du ge ge dawa, Eloba du ra ǂkhîǂkhî ǂgao amaga. ǂkhari ǀgôaro i ǁî-i di ǀnamǀnamsa ǁgû-e ra ǁgae, khami du ge sadu tsîna sadu ǀhomsi ǁGûba ra ǁgae.—Khomai re Efeseǁîn 5:1, 2.

3. Ma dîna da a dîsen ǁkhā?

³ ǀNîsi da ge a dîsen ǁkhā: ‘Jehovaba ta ūhâba hâ ǀnama, nēsi a ǀgaisa Xristeǁî kai ta nîs aiǃâ ta ge ūhâ ib xa? Ti ǁāǁnâs khaoǃgâ ta ǃnâsase Jehovab khami ǂâi tsî xūna ra dī—ǃgōsase ti ǃgâsana ǀnama ǁgausa?’ ‘Sadu ge ūhâ i ǂguro ǀnammi’ ga ǃkhaiǁnâ o, o tā ǂkhabuǂâi re. ǁKhā xū-i ge ǂgurogam ǁaeb Xristeǁîn ǀkha ge ī. Jesub ge ǁîna ge ǂhābe tama hâ i, tsîb ge sida tsîna ǂhābe tite. (J.ǂHa. 2:4, 7) Elobmîsa da ge ǂgurose ǁkhāǁkhāsen tsoatsoa, o da ge ūhâ i ǀnamma da ge ǁkhawa a omkhâi ǁkhā.

4. Tae-e da nē ǁkhāǁkhāǃâs ǃnâ nî ǃhoaǃgao?

 ⁴ Nē ǁkhāǁkhāǃâs ge mati da Jehovab tsî nau khoena da ūba hâ, ǀnammi ǃnâ a kai ǁkhā ǀgauba nî ǃhoaǃgao. ǁNāpaxu da ge sida ǀnama da ga ǀgaiǀgai, o da sida tsî nau khoen ra hōǃâ ǀkhaegu xa nî ôaǃnâ.

5-6. Pauluba mâ ǃgomsina ǁîb di ǃoabas ǃnâ gere hōǃâ? Xawe tae-e ge huibi aiǃgû tsî Jehovaba ǃoabas ǃnâ?

⁵ Apostel Paulub ge gere ǃgâiaǂgao, Jehovaba ǃoabasa. Xawe î ge ǁnāsa hoaǁae supu tama ge hâ i. Paulub ge ǃnāsa ǁaegu ai gāxu daoga gere ǃgû. Tsî ǁnās ge ǁnā ǁaeb ǃnâ kaise ge ǃgom i. Tsîb ge Pauluba nē ǁaeb ǃnâ, ‘ǁkhōǁkhōsa dâura ǃāgu ǃnâ-ū gere ǃgû. Tsî tsudī-aon ǀkha’ gere ǀhao. ǂGui ǁaegab ge ǁîna gere mâǃoa khoen xa gere ǂnauhe. (2Kor. 11:23-27) Tsîn ge ǁîb di ǃgâsan tsîna ǁîb di dītsâna ge ǃgôaǃgâ tama hâ i.—2Kor. 10:10; Fil. 4:15.

⁶ Tae-e Pauluba ge hui îb Jehovab di ǃoabas ǃnâ aiǃgû? Paulub ge ǃnāsase xoadi ǃnâ Jehovab xa gere ǁkhāǁkhāsen. Tsî ǁîb gere hōǃâ xūn ǃnâ-ūs tsîna. Paulub ge gere ǂgomǃgâ Jehovab a ǀnambisa. (Rom. 8:38, 39; Efe. 2:4, 5) Tsîb ge ǁîb tsîna Jehovaba kaise ge ǀnam tsoatsoa. Paulub ge Jehovabab ūba hâ ǀnamma ‘ǁîb khoena ǃoaba-ū tsî ganupe ra ǃoabab’ ǃnâ ge ǁgau.—Heb. 6:10.

7. Mâpa a ǀgui ǀgau Jehovaba da ūba hâ, ǀnamma da a ǀgaiǀgai ǁkhāba?

⁷ Sida ge Jehovaba da ūba hâ ǀnamma a ǀgaiǀgai ǁkhā. ǁÎb di mîsa da ga ǂōrisase ǁkhāǁkhāsen o. Elobmîsa du ra khomai khami, kō re mâ ǃhoaǃâdi tae-e Jehovab xa ra mîsa. Tsî dîsen re: ‘Nē ǃhoaǃâsa mati ra ǁgau, Jehovab tita a ǀnamsa? Mâ ǃaromade î ra māte î ta Jehovaba ǀnam?’

8. ǀGoresa mati a hui da ǁkhā, î da Eloba da ūba hâ ǀnammi ǃnâ kai?

⁸ ǀKhara ǀgaub hîna da Jehovaba da ūba hâ ǀnammi ǃnâ a ǀgai ǁkhāb ge, ǁîba ǃoa sada ǂgaoba xu ǀgoresa. (Psa. 25:4, 5) Tsîb ge Jehovaba sida di ǀgorede nî ǃeream. (1Jhn. 3:21, 22) Asiab ǃnâ ra hâ ǃgâsas Khan ti ǀon hâs ge ra mî: “Jehovaba ta ūba hâ ǀnammi ge ǂgurose, ti ǂans ai ge ǃgaoǃgaosa i. Xawe i ge ǁnā ǀnamma ge ǀgaisa, mû ta ge o ǁîb ǀgorede ra ǃeream ǀgausa. Nēs ge ge ǂkhâǃnâte î da ǁîba nî ǂkhîǂkhî xūna dī. b

9. Timotueba mati ge ǁgau, ǁîb ǀnamma ǁgaus ǃnâ ra aiǃgûsa?

⁹ ǁÎb ge Xristeǁî kai toas khaoǃgâb ge Pauluba, Timoteub di ǀon hâ ǂkhamkhoeb ǀkha ge ǀhao. Timoteub ge kaise Jehovaba ge ǀnam-i tsî ǁîb di khoen tsîna. Paulub ge Filipeǁîna ge mîba: “ǀGui khoe-i ǁîb khami sadu di mâsigu ǃnâ ǂhauǃnâse nî ǁae-e ta ǂan tama amaga.” (Fil. 2:20) Paulub ge nēba Timoteub di ǃgâi sîsen-i tamas ka io ǁîb mati ǃhoade ra mâ ǀgaus xa ge ǃhoa tama hâ i. Xaweb ge Timoteub mati ǁîb ǃgâsana a ǀnam ǀgaus xa ge tsâǀkhāhe. Ama as ge Timoteub gere ǃoaba ǃnâ ǀhaohâgu ge hoaǁae ǁîb di saride ǃoa gere mûǂui.—1Kor. 4:17.

10. Annas tsî ǁîs aob tsîna mati ge ǁgau, ǃgâsana ra a ǀnam ǃkhaisa?

¹⁰ Sida tsîn ge ǀgauga ra ôa, î da sida gagasi ǃgâsana hui ǁkhā. (Heb. 13:16) Annas aiǁgausa kō re, hîna go ǃkharugo ǁkhāǁkhāǃâs ǃnâ a ǃhoaǃgaohesa. ǀGaisa  ǂoab khaoǃgâs ge ǁîs tsî ǁîs di aob tsîna ǀnî ǃgâsan di omsa ge sari. Tsî ra ge ge mû, oms di daks ǃnâs āsa hâsa. ǁNās xa ǃaromahe hâse, î ge omarisa ǃanu sarana ge ūhâ tama hâ i. Annas ge ra mî: “ǁÎn di sarana da ge ū, ǁā, stryk tsî ge mā oa nî. Sida ǃaromas ge ǁnāsa ǂkhari xūro i ase ǀgui ge ī-i. Xawes ge ǁnāsa ge ǃaroma î da ǀgaisa ǀhōsagusisa nēsis kōse ūhâ.” Annas tsî ǁîs aob tsîn ge ǃgâsana ūba hâ i ǀnammi ge ge ǂkhâǃnâ ra, î ra ǁîra ǃgâsana huis ǃaroma xūna dī.—1Jhn. 3:17, 18.

11. (a) Nau khoena mati ra tsâ ǁîna da ga ǀnamma a ǁgau o? (b) ǂKhoamîdi 19:17 ǃoagub, Jehovaba mati nî ǃeream ǀnamma da ga ǁgau o?

¹¹ Nau khoena da ga ǀnamxaǃnâ tsî ǃgâi ǀgaub ǃnâ ga ra hâ-ū o. On ge a mû ǁkhā dītsâ tsî da Jehovaba ra ǁgaesa. Tsîn ge ǁnās ǃaroma kaise ra ǃgôaǃgâ da. Khans, hîna go ǃkharugo ǃâb ǃnâ goro ǃhoaǃgaohes ge naun ge huisi ǀgauba ǃgâise ra ǂâihō. ǁÎs ge ra mî: “ǃGâsadi hîna ge aoǁnâ sîsen-e ǃoa gere ǁkhaute de ta ge kaise ra ǃgôaǃgâ. ǁÎdi ge audos ǀkha ūte tsî ge ǁkhaute î da ǁkhoaxa xūna sī ǂû. Tsî ǁnāpaxū ǃnorasase oms tawa ge ǃnaoǁnâ te. Nēsis tsîna ta ge ra mû, ǁnās ge kai sîsen-e ǃkhōǂgā hâ isa. Tsîn ge ǁnāsa ǀnammi ǀkha gere dī. “ Ama as ge hoa khoen sida ra dībani xūn ǃaroma gangan di mî tidesa. Khans ge ǁnān ǁîsa ge huin xa nēti ra mî: “Tita ge gere tsâ ǁîn gere dībate ǂgui ǃgâi xūn ǃaroma ta ge ga gangan nî hâ. Xawe ta ge a ǀū ǁîn hoan mâpa ra hâsa. Xawe Jehovab ge a ǂan. Tsî ta ge ra ǀgore ǁîb ǁîna tita ǃaroma nî mādawamsa.” Khans ge amaba ra mî, Jehovab ge sida nau khoena ra dība ǂkhari ǃgâi xūn tsîna ra mû. ǁÎb ge ǁnāsa ǃgâi ǁguibas ase ra mû. Tsîb ge ra mātare  oa ta ǂgao.—Khomai re ǂKhoamîdi 19:17.

12. ǃGâsaga mati ǀhaohâba gu a ǀnamsa a ǁgau ǁkhā? (Ai-īsiba mû re.)

¹² ǃGâsats ga io, ots nauna mati ǀnamma a ǁgau ǁkhā. Tsî ǃnāsa xūna ǀhaohâb ǃnâ ǁîna huis ǃaroma a dība ǁkhā? ǂKham ǃgâsab Jordan ti ǀon hâb ge ǀhaohâb ǃûi-aoba ge dî, tae-eb a dī ǁkhāsa îb ǃnāsase ǀhaohâba hûi. ǀHaohâb ǃûi-aob ge ǁîb ǀnai ra aiǃgû ǀgaub xa ge koabi. Tsî ge ǀapemābi tae-eb noxoba a dī ǁkhās xa. Aiǁgause ǁîb ge Jordana ge mîba îb ǀhaos tawa ǁaeb aiǃâ sī tsî nau khoena tawede. Tsî ǀhaos tawa ǃereamde mā . Hoaǁae ǁîb aoǁnâ groeps ǀkha ǀguiba sîsen. Tsî ǀgauna ôa nau khoenab a hui ǁkhāna. Jordani ge nē ǀāpemāsa a dī o, ob ge ǀasa xūn ǀguina ge ǁkhāǁkhāsen tama hâ i. Xaweb ge ǁîb ǃgâsanab ūba hâ ǀnammi ǃnâs tsîna ge kai. Jordani ge ge ǁkhāǁkhāsen ǃgâsab ga, ǀhaohâb hui-aob ase a ǁgaumâihe o, ob ge ǃgâsana huis ǀkha tsoatsoa tama hâ. Xaweb ge ra aiǃgû ǃgâsana huis ǀkha.—1Tim. 3:8-10, 13.

13. ǀNamma mati Christian ti ǀon hâ ǃgâsaba ge ǂkhâǃnâ îb ǀhaohâb ǃûi-aob ase ǁkhawa ǁgaumâihe?

¹³ O matis, ǀhaohâb di hui-ao tamas ka io ǃûi-aob ase du ga ǃoaba ǀû o? Jehovab ge ǃkharuge ǁaeb ǃnâ du ge ūhâ i ǀnamma nî ǂâihō. Tsî ǀnammi hîna ge ǂkhâǃnâ du ba ǁnāsa dīsa. (1Kor. 15:58) ǁÎb ge aiǃgû tsî du ra ǁgau ǀnammi tsîna ra mû. Christian ti ǀon hâ ǃgâsab ge kaise ge tsûaǂgao hâ i, ǀhaohâb ǃûi-aosisa xub ge ūǁnâhe o. Xaweb ge ra mî: “ǁKhā ta i hoa-e ta ge ge dī, î ta Jehovaba ǀnamma xu ǃoaba. ǁGaumâite ta ge ūhâ tama hâ i xawe.” ǁAeb ǀkhab ge ǀhaohâb ǃûi-aob ase ǁkhawa ge ǁgaumâihe. Christiani ge  ra mî: “ǂGurose ta ge gere ǃaoro, ǁkhawa ǀhaohâb ǃûi-aob ase ǃoabasa. Xawe ta ge ge ǂâi, Jehovab ga ǁîb di ǀkhommi ǀkha mā-amte o, î ta ǁkhawa ǀhaohâb ǃûi-aob ase ǃoaba. O ta ge ǁîb tsî ǃgâsan tsîna ta ūba hâ ǀnammi ǃaroma ǁnāsa nî dī.”

14. Tae-e du Georgiab ǃnâ ra hâ ǃgâsas ge mî xū-e xu ra ǁkhāǁkhāsen?

¹⁴ Jehovab di ǃoaba-aon tsîn ge ǁîn ǁanǁare-aona ǀnamma ra ǁgau. (Mat. 22:37-39) Aiǁgause, ǃgâsas Elena ti ǀon hâs Georgiab ǃnâ ra hâs ge ra mî: “Jehovaba ta ūba hâ ǀnammi ge ǂgurose hoaǁae gere ǂkhâǃnâte aoǁnâ sîsenni ǃnâ ǁhaosa. Xawe ti ǀhomsi ǁGûba ta ūba hâ ǀnammi gere kai khami, i ge khoena ta ūba hâ ǀnammi tsîna gere kai. ǁÎn gere hōǃâ ǃgomsin xa ta ge gere ǂâi. Tsî ǁîn ǂgaoga nî tsâǀkhā ǃhoaǃâdi xas tsîna. ǃNāsase ta nē ǀgaub ǃnâ ǁîn xa gere ǂâi khami ta ge ǁîna gere hui ǂgao.”—Rom. 10:13-15.

15-16. Ai-īsib ǃnâ i ra ǁgauhe khami, mâ ǀkhaega nau khoena huisa xu ra hā?

¹⁵ Sida ǃgâsana da ga ǀnamma ǁgau o, on ge ǁîn ǀguina ǃgâiba ǁnāsa xu hō tama hâ. CORONAS ge tsoatsoas khaoǃgâ î ge, Paolo ti ǀon hâ ǃgâsab tsî ǁîb kaikhoes tsîna. Kaira hâ ǂgui ǃgâsana ge ǁkhāǁkhā matin selfonga a sîsenū ǁkhāsa în aoǁnâ sîsen-e dī. ǀGui ǃgâsas hîna ge ǂguro selfona sîsenūs ǃgomsiba  gere hōǃâs tsîn ge ēga sī ge ǃgâiǃgâ. Jesub ǁōb di ǂÂiǂâisensa ǃoas ge ǁîs omarisa ge ǁkhau ǁkhā i. Tsî î ge 60 omaris ǁanina zooms ǃnâ-ū ǂÂiǂâisensa ge hâ ǃnâ. ǃGâsas tsî ǁîs omaris tsîn ge Paolob tsî ǁîb taras tsîn ge dī xūna xu ǃgâiba ge hō. Ēgas ge ǃgâsasa nēti Paoloba ǃoa ge xoa: “Kai gangans sida hîna a kaira da du ge ǁkhāǁkhā amaga. Tātsēs tsîna ta ge Jehovab sida ǀkha ǁae hâ ǀgauba ǀuru tide. Tsî sadu ǃgarise ra sîsen ǀgaub tsîna.”

¹⁶ Nēti-ī aiǁgaudi ge Paoloba ǂhâǂhâsa xū-e ge ǁkhāǁkhā. ǁÎb ge ge ǂâiǂâiǃnâhe, ǀnammi ǂans xa tamas ka io ūts hâ ǁkhāsib xa ǃnāsase a ǂhâǂhâsasa. ǁÎb ge ra ǂâi oa: “ǃNarimâra mûǂam-aob ase ta gere ǃoaba xawe ta ge nēsi go ǁkhāǁkhāsen. ǃGâsan ge ǀnîsi ti ǃhoade a ǀuru xawen ge tita ge ǁîna a hui ǀgauba ra ǂâihō.”

17. Ham hân tsîna ǃgâiba ra hō ǀnamma da ga ra ǁgau o?

¹⁷ Nau khoena da ga ǀnamma ǁgau, o da ge sida tsîna ǃâubasen tama da hâ ǀgaub ǃnâ ǃgâiba ǁnāpa xu ra hō. Jonathani, New Zealandi ǃnâ ra hâb ge nēti ra mî: “ǀGui Satertaxtsēgam karab ai, kaise i a ǀgamsa hîna ta ge aimâba-ao-i hîna daob xōǀkhā gere aoǁnâ-e ge mû.” Jonathani ge ge mîǁgui, îb ǁnā aimâba-ao-i ǀkha Satertaxtsēdi ai ǀguiba sîsen. ǁNā ǁaeb aib ge ǁîba ge ǀū-i, ǁîb ge dī ǃgâi xū-e xūb matikō ǃgâi xūna nî hōsa. Jonathani ge ra mî: “Tita ge ǁnā ǁaeb ǃnâ ti ûib ǃnâ, aoǁnâ sîsenni xa ge ǁkhoaxabahe tama hâ i. Xawe ta ge ǁnā aimâba-ao-i ra ǁkhāǁkhā ǀgauba gere ǃgâ khami. Tsî mati-i ǁîb aoǁnâ sîsen-e ǃgâi sîsenǂuiba ūhâsa a mû o. Os ge ǁnāsa ge ǂkhâǃnâte î ta aoǁnâ sîsen-e ǀnam tsoatsoa. Tsî ta ge ǀhōsab tsîna ge hō hîna ge huite ba. î ta gāgasise kai, aoǁnâ sîsenn-i xa ǁkhoaxabahe tsî Jehovab ǀgūse hā.”

18. Tae-e da nî dīsab Jehovaba ra ǂhawa?

¹⁸ Jehovab ge ra ǂhawa î da sida hoada ǁîb tsî nauna da ūbahâ ǀnammi ǃnâ kai. ǁKhāǁkhāsen da go khami, Jehovaba da ūbahâ ǀnamma da ge a ǀgaiǀgai ǁkhā ǁîb di mîsa khomais ǃnâ-u. Tsî ǁîs xa ǂâiǃgâsa, hoaǁaes tsîna da ge ǁîb ǀkha ǀgores ǃnâ nî ǃhoa. Sida di ǃgâsana da ūbahâ ǀnamma da ge a ǀgaiǀgai ǁkhā ǁîna da ga hui o. Sida ǀnammi ra kai khami da ge Jehovab tsî sida gāgasi omaris ǀgūse nî hā. Tsî da ge ǁîn ǀkha da ūhâ ǀhōsagusis ǃnâ ǀamosib kōse nî ǂkhî-i.