1. Eloǃaoǃgâxasiba a tae tsî ǁnān hîna Jehovaba ǀnamna tae-i ǃaroma nē ǃaoba nî ūhâ?

XRISTEǁÎN ge Eloba ǀnam tsî ra ǃaoǃgâ. ǀNîn ge a mî ǁkhā nē ǀgam ǀgaukha ǃgûǀhao tama hâ di. Xawe da ge nēba ǃaob hîna ra ǀkhū kai daba ǃoa ǁnaeǁgau tama hâ. ǀNî ǃnôa ǃaob xa da ge nî ǃhoaǃgao. Khoen hîna nē ǃnôa ǃaoba ūhân ge Eloba ama ǃgôasiba ra ǁgau. ǁÎn ge ǁîn ǀhomsi ǁGûba ǂkhîoǃnâ kai ǂgao tama hâ tsî ǁîb ǀkhan ūhâ ǀhōsagusis tsîna ǂoaǃnâ ǂgao tama. —Psa. 111:10; ǂKhm. 8:13.

2. Gao-aob Davib mîdi hîna Psalmdi 86:11 ǃnâ hâ di ǃoagu da mâ ǀgam xūna nî ǃhoaǃgao?

² Khomai re Psalmdi 86:11. Nē mîdi xa du ra ǂâiǃgâ khami du ge a mû ǁkhā Gao-aob Davib eloǃaoǃgâxasib di ǂhâǂhâsasiba gere ǁnâuǃā ǃkhaisa. Nēsi da ge Davib ǀgores mîde da mati nî sîsen-ū ǀgauba nî ǃhoaǃgao. ǂGurose da ge tae-i ǃaroma da Elob ǀonsa ǃaoǃgâsiba nî omkhâiba ǃkhaisa nî ǃhoaǃgao. ǀGamǁîse da ge nî ǃhoaǃgao mati da tsēkorobe ûib ǃnâ Elob ǀonsa nî ǃaoǃgâsa.

3. Tae xū-e Moseba ge hui îb Elob ǀonsa ǃaoǃgâsiba omkhâiba?

³ Moseb gere tsâ ǀgaub xa ǂâi re, ǃhommi aib ge Jehovab ǂkhaisiba a mûǃnâ o ǁhapos ǃnâ. “Nē i ge ge ǂoaǂamsa xū-i hîna i khoe-e ge mû ǁkhā i-e” dis ge Insight on the Scriptures di ǀon hâ ǂkhanisa ra mî. Moseb ge  saora mîde ǀhomǃgāba xū ge ǁnâu: “ǃKhūtse, ǃKhūtse Elots ǀkhomxaǂgaoxa tsî ǀkhomxaǃnâts, ǃnūǃnâxa tsî ǃgâidīb tsî amab tsîkha ǃnâ a kaits. ǃGâidība ra sâuts, ǂgui ǀoadisi ǃhaodi kōse, ǂhanuoǃnâsib tsî ǃûǂams tsî ǁoreb tsîna ra ǀûbats.” (Eks. 33:17-23; 34:5-7) Moseb ge nē xū-i xa hoaǁae gere ǂâi, Jehovab ǀonsab gere sîsen-ū ǁaeb hoab ai. Nēs ǃaroma da ge buru tama hâ egab ge Moseba Elob khoen, Israelǁaes dina a mîba o în “nē ǂkhaisa tsî ǃaoǃaosa ǀons, ǃKhūb” disa ǃao.—Deu. 28:58.

4. Mâ ǀgaugu xa ǂâisa nî hui da Jehovaba ǃaoǃgâsiba omkhâibas ǀkha?

⁴ Jehovab ǀons xa da ga ǂâi o, o da ge ǀons di tani aob xas tsîna ra ǂâiǃgâ ǂgao. ǁÎb di ǀgaugu xa da ge ra ǂâi ǂgao aiǁgause, ǁîb ǀgaib, gā-aisib, ǁîb ǂhanu-aisib tsî ǁîb ǀnammi xa. Nē ǀgaugu tsî ǀnîhâgu xa ǂâiǃgâs ge nî hui da i da ǃaoǃgâsiba omkhâi.—Psa. 77:11-15.

5-6. (a) Elob ǀons ǂâibasensa a tae? (b) Eksodus 3:13, 14 tsî Jesajab 64:8 tsîra ǃoagub Jehovaba mati xūna ra īǁkhā kai?

⁵ Elob ǀons ǂâibasens xa da tae-e a ǂan? ǀGapiǂansa ūhâ khoen ǂguin ge ra ǃkhō-am Jehovab ǀons “Tita ge ī ta a khami nî īta” di ra ǂaibasen ǃkhaisa. Nē ǂâibasens ge ra hui da mûǂansa xū-i xare i Jehovaba a ǁkhae ǁoa ǃkhaisa, dī ǂgaob ta xū-e dīs ǃnâ tsî ǁîb ge ma xū-i hoa-e a ī kai ǁkhā. Nēsa mati a īǁkhā?

⁶ Jehovab ge xūna a ī kai ǁkhā tsî ǀgaiba ūhâ ǂhâb hâ xū-i hoa-e īǁkhā kais ǃaroma ǁîb ǂâisa dīǀoaǀoas ǃnâ. (Khomai re Eksodus 3:13, 14.) Sada ǂkhanin ǃnâ da ge hoaǁae ra ǂkhâǃnâ-e i da Elob ǃgâi ǀgaugu xa ǂâiǃgâ. Jehovab ge ǁîb di ǀoasa kurusa ūhâ tama hâ ǃoaba-aon tsîna a sîsen-ū ǁkhā ǁîb ǂâisa dīǀoaǀoas ǃnâ. (Khomai re Jesajab 64:8.) Nē ǀgaugu ǃnâb ge Jehovaba ǁîb ǂâisa ra dīǀoaǀoa. Xū-i xare i ge ǁîba a ǁkhae ǁoa ǁîb ǂâisa dīǀoaǀoas ǃnâ.—Jes. 46:10, 11.

7. Mati da ǃgôasiba sada ǀhomsi ǁGûba a omkhâiba ǁkhā?

 ⁷ ǃGôaǃgâsiba da ge sada ǀhomsi ǁGûba a omkhâiba ǁkhā dība tab ge xūn tsî xūn hînab ta dīho kai dan ǃgao. Aiǁgause da ga kurub ge xūn hoan xa ǂâi o, o da ge Jehovab kuru hâ xūn hoan xa ra buru kaihe. (Psa. 8:3, 4) Tsî Jehovab ge dīho kai da xūn xa da ga ǂâiǃgâ o, o da ge ǃgam ǃgôasiba ra omkhâi babi. Jehovab ǀons ge amabes ǃnâ ǃaoǃgâsiba nî omkhâibahe. Nē ǀons ge ǁîb a tae ǃnôa khoe, dīb ge xūn tsî dīb nî xūn tsîn hoana ǃkhōǂgā hâ.—Psa. 89:7, 8.

8. Deuteronomium 32:2, 3 ǃoagub Jehovab tae-e da ǁîb ǀons ǀkha nî dī ǃkhaisa ǂhāba hâ?

⁸ Israelǁaes mîmâisa ǃhūb ǃnâ nî ǂgâs aiǃâb ge Jehovaba Moseba amsa ge ǁkhāǁkhā. (Deu. 31:19) Moseb ge nē amsa ǁaesa nî ǁkhāǁkhā ge īs ge. (Khomai re Deuteronomium 32:2, 3.) ǂGuro tsî ǃnonaǁî xoaǀgora ra xa da ra ǂâiǃgâ khami da ge ra mû, Jehovab ǁîb ǀons nî sâuhe tamas ka io ǂgaiǂuihe ǁoa xū-i ase mûhe ǃkhaisa ǂgao tama hâsa. ǁÎb ge ǂhāba hâ mâ khoe-i hoa-i ǁîb ǀonsa nî ǂan ǃkhaisa. Kaise i ge ge ǀō-aisa xu i Moseb xa Jehovab ǀons tsî ǁîb ǀgaugu xa ǁkhāǁkhāhesa. Moseb ge ǁkhāǁkhā nî xūn ge ǁîn ǂgomsa ǀgaiǀgai tsî ge ǂkhâǃnâ, tsaura ǀnanub haina ra khoakhoa khami. Mati da nî ǂanǂui sada ra ǁkhāǁkhā xūn ǁkhā sîsenǂuiba ûhā ǃkhaisa?

9. Mati da Jehovab ǀons ǃanuǃanus ǀkha a hui ǁkhā?

⁹ Omsa xu oms aoǁnâ sîsenna da ga dī o, o da ge sada Elobmîde sîsen-ū tsî khoena Jehovab ǀonsa ra ǁgau ǂgao. ǃGâi ǂkhanin, vidiogu tsî sada internets ǂhaweb ai hâ xūn hîna Jehovab ǀonsa ǃgôasiba ǁgaus ǀkha ra hui dana da ge a mā nî ǁkhā. Sîsenni, skoli tamas ka io ǃnari da ra ǁaeb ai da ge ǃēsa da ga hō o, sada ǀnamxa Elob xa a ǃhoa ǁkhā. ǀHao-ū da ra khoena da ga Jehovab tsî ǁîb ǂâibasens hînab ǃhūbaib ǀkha ūhâs xa a mîba o, on ge nē xūn xa a ǀasabahe. Tsîn ge ra mûǂan matikōseb Jehovaba a ǀnam da ǃkhaisa. Khoena da ga Jehovab xa hâ amaba mîba o, o da ge ǁîb ǀons ǃanuǃanus ǀkha ra hui. Khoena da ge nî hui în mûǂan ǂgui ama tama xūnan Jehovab xa ge ǁkhāǁkhāhe ǃkhaisa. Elobmîsa xu da khoena ra ǁkhāǁkhā xūn ge ǁîna nî khoakhoa.—Jes. 65:13, 14.

10. Khoena da ga Elobmîsa ǁkhāǁkhā o, o da tae-i ǃaroma ǃnāsa-e nî dī, ǁîna Elob mîǁguigu xa ǀgui ǁkhāǁkhās xa?

¹⁰ Elobmîsa da ga khoena ǁkhāǁkhā o, o da ge ǁîna ra hui ǂgao în Jehovab ǀonsa ǂan tsî sîsen-ū. Hui nî ǂgao da ge ra în mû Jehovab ǀons taen hoana ǃkhōǂgā hâsa. Nēsa da ǁîna mîǁguigu, daoǁgaudi tsî ǁgaragu tsîn ǀguina a ǁkhāǁkhā o, o a dī ǁkhā? ǃGâi Elobmîs ôaǃnâ-ao i ge Elob di mîǁguiga ǃgôasiba a omkhâiba ǁkhā. Xawe i ǀnammi xa ǁgari-e hâse Jehovaba nî ǁnâuǀnam? ǂÂiho re, Evas ge Elob mîǁguiga ge ǂan i xawes ge ǁnā mîǁguigu mā-aoba ama ǀnamma ge ūhâba tama hâ i. Adammi tsîn ge Eloba ge ǀnam tama hâ i. (Gen. 3:1-6) Nēs ǃaroma da ge ǃnāsa-e nî dī khoena Elob mîǁguigu xa ǀgui ǁkhāǁkhās xa.

11. Elob mîǁguigu tsî ǁgaragu xa da ga khoena ǁkhāǁkhā o, o da mati nî hui nî în nēs mā-aob tsîna ǀnamma omkhâiba?

¹¹ Jehovab mîǁguigu tsî ǁgaragu ge  hoaǁae sada ǃaroma a ǃgâi. (Psa. 119:97, 111, 112) Xawe sada Elobmîsa ra ǁkhāǁkhā khoen ge nēsa ǁnāti mû tide, Jehovab ǀnammi nēs ǃgâb ai hāban ga mû tama io. Nēs ǃaroma da ge a dî nî ǁkhā: “Tae-i ǃaromab ge Jehovaba ǁîb khoena ǂgān în ǀnî xūna dī tsî saorana xu ǂgōsen di du ra ǂâi? Nēsa tae-e ǁîb xa ra mîba da?” Elobmîsa da ra ǁkhāǁkhā khoena da ga hui o în Jehovab xa ǂâi tsî ǁîb ǀonsa ǃgam ǃgôasiba omkhâiba o, o da ge ǁîn ǂgaoga a tsâǀkha ǁkhā. Tsîn ge Elobmîsa da ra ǁkhāǁkhā khoena Elob mîǁguigu ǀguiga ǀnam tide xawe mā-aob tsîna. (Psa. 119:68) ǁÎn ǂgoms ge nî kai tsîn ge ǃgom mâsigu ǃnâ mâǀgais ǀkhas tsîna nî hui-e.—1Kor. 3:12-15.

12. Daviba mati ǀgui ǃnās ai ǀguiǀguisa ǂgaoba ūhâsa ge dīhō tama hâ i tsî mā ǀamǂoas ǀkha?

¹² ǃGâi mîdi hîna da Psalmdi 86:11 ǃnâ ra hō di ge “ǀguiǀgui re ti ǂgaoba” di hâ. Gao-aob Davib ge nē mîde xoasa ge ǂkhâǃnâ-e. ǁÎb ûiǁaeb ǃnâb ge ge mû mati i a supusa khoe-i ǂgaoba ǀgorahesa. ǀGui ǃnās aib ge ǁîb oms ǀgapiga ge hâ i tsî ǀnî hâ khoeb khoesa ǁāsens ra hîna ge mû. ǁNā ǁaeb aib Davib ǂgaoba ge ǀguiǀguisa tamas ka io ǀgorasa i? ǁÎb ge Jehovab ǁgaraga ge ǂan i: “Sa ǀgūkhoeb tarasats ge tura tide.” (Eks. 20:17) Xaweb ge ǁîsa kōs ǀkha ge aiǃgû. ǁÎb ǂgaob ge ge ǀgorasen tsoatsoa Batsebasab ge omkhâi ba turab tsî Jehovaba ǂkhîǂkhî ǂgaos ǃnâs tsîna. Davib ge Jehovaba gaxuse ǀnam hâ i tsî ǃaoǃgâsiba omkhâiba xaweb ge ǁîb ti ǁgansi turab ǃnâ ge māǁnâsen. Nēs ǃaromab ge Daviba kaise tsū xū-e ge dī. Jehovab ǀons ge nēs ǃnâ-ū ge ǁgaiǁgaihe. Tsîb ge Daviba nēs ǃnâ ge ǃâ tama hâ i khoen ais tsîna tsūba ge hau-ū, ǁîb omaris tsîna ǃkhōǂgā hâse.—2Sam. 11:1-5, 14-17; 12:7-12.

13. Mati da a ǂan Davib ǂgaob ge ǀguiǀguihe ǃkhaisa?

¹³ Jehovab ge Daviba ge ǁnama tsîb ge ǁîb ǃgâi ǀhōsagusisa Jehovab ǀkha ge hō-oa. (2Sam. 12:13; Psa. 51:2-4, 17) Davib ge ǃgomsin tsî tsûaǂgaob tsîna ra ǂâihō ǁîb ǂgaobab ge ǀgorahesa mā-am ǁaeb ǃnâ. ǁÎb mîdi hîna Psalmdi 86:11 ǃnâ mâdi ge sao rases tsîna a mîhe ǁkhā: ‘ǀOasa’ ǂgaoba mā te re. Jehovaba Daviba ge hui îb ǁîb ǂgaoba ǀguiǀgui tamas ga io ǀgora? ǁÎb ge Daviba ǁîb ǂgaoba  ǀguiǀguis ǀkha ge hui, Elobmîs Davib xa ra mî amaga ‘ob ge ǂgaob âba ǀoasase Elob ǀkha ge hâ.’—1Gao. 11:4; 15:3.

14. Tae-e da nî dîsen tsî tae-i ǃaroma?

¹⁴ Davib aiǁgaus ge ra ǂkhâǃnâ da tsî ǁkhā ǁaeb ai a ǃkhâikhom. ǁÎb di ǁgai ǁoreb hînab ge dīb ge ǃkhâikhoms ase nētsē Elob khoena a ība. Nēsi da ga Eloba ǃnubu ǁaerob tamas ka io kurina ǃoaba xawe da ge nî dîsen, ‘Satanni ǁgūtsâdi ti ǂgaoba ǀgoras tide ta ra mâǃoa?’

15. Eloǃaoǃgâxasiba mati nî hui da ǁgai ai-īsiga da ga mû o?

¹⁵ Aiǁgause du ga TVs ai, ǁgâi ǂâina ra omkhâi ai-īsi-e mû o, o du tae-e ra dī? Supuse du ge a mîbasen ǁkhā nē ai-īsib ge ǁgoe-ūgus ai-īsi tama hâ di. Xaweb Satanna ǀnîsi nē xū-e ra sîsen-ū? (2Kor. 2:11) Nē ai-īsib ge ǂkhari ǃōs hîna kai haiba ra ǁhā-ūhes khami ī. ǂGuros ge ǂkhari amros ǃōs disa ra ǂgâ. Tsî nēs ǃgamse ra ǂgâ khamis ge asa ra kai. Nē ai-īsiba nē ǂkhari ǀā ǃōros khami a īǁkhā? ǂKharirose ra tsoatsoa xū-i ge ǃhaese kai tsî khoe-e a ǁore kai ǁkhā tsî ǁî-i ǂhauǃnâsiba a khôa ǁkhā. Nēs ǃaroma ǁgai ǂâide sadu ǂgaob ǃnâ ra ǃaroma xūna xu ǂgōsen. Sadu ǂgaoba ǀguiǀgui tsî Jehovab ǀonsa ǃaoǃgâsiba omkhâiba re.

16. ǃÂitsâhe da ga ǁaeb ai da mâ dîde nî dîsen?

¹⁶ ǁGai ai-īsigu xōǀkhāb ge Satanna noxoba ǀnî hâ xūna ra sîsen-ū ǃnôa kai das ǃnâ. Nē xūn ǃoa-ai da mati ra tanisen? Supu i ge a ǂâisa nē xūn ǁnātikōse tsū tama hâ di. Aiǁgause da ge a ǂâi ǁkhā: ‘Nē xū-e dīs ǃaroma ta ge ǂnûiǂuihe tide tsî i ge ǁnātikōse tsū tama.’ Nēti i ǂâiǀgaub ge kaise a tsū. ǃGâise da ge nî dī saora dîde da ga dîsen o: ‘Satanna nē ǃâitsâba ra sîsen-ū ti ǂgaoba ǀgoras ǃaroma?  Nēs ǃnâ ta ga māǁnâsen o, o da Jehovab ǀonsa nî ǀuriǀuri? Nē xū-e ta ga dī o, os nēsa Elob ǀgūse tamas ka io ǃnūse nî ūhâ te?’ Nē dîde ǂâiǃgâ re. Tsî ǁnāpaxū gā-aisiba ǀgoreba tsî nē dîde ǂhanu-aisib ǀkha ǃeream re. (Jak. 1:5) Nēsa dīs ge nî ǁkhauba da. Tsî nî hui da i da ǃâitsâgu ǃnâ mâǀgai tsî Jesub ge mî khami mî: “Bēxū te, Satantse.”—Mat. 4:10.

17. Sada ǂgaoba ǀgorahesa tae-i ǃaroma ǃgâi tama hâ? Aiǁgau-e mā re.

¹⁷ Sada ǂgaob ga ǀgorasa o, os ge nēsa a tsū ǁkhā. ǂGamǂgamsen ǀhuru-i ǃnâ ra ǀguiba ǀhuru khoen xawe sîsenǀhao taman xa ǂâi re. ǀNîn ge ǀguri ra koahe ǂgao, ǀoron ge ǁgaraga sao tama hâ tsî ǀnîn ge mûǂam-aoba ǃgôasiba ǁgau tama hâ. Nēti i ǀhuru-aon ge dan tide. Xawe ǀguiba ra sîsenǀhao ǀhuru-aon ge nî dan. Sada ǂgaob ge sîsenǀhao ra ǀhuru-aon khami a īǁkhā, turagu tsî tsâsigu tsîn ge Jehovaba ǀguiba ǃoabas ǃnâ a ǃgaeǀhaosa. ǂÂis ǃnâ ūhâ re Satanni ge sada ǂgaoga ra ǀgora ǂgao. ǁÎb ge ǂhāba hâ is sada ǂâis, turagu tsî tsâsigu tsîna tā sîsenǀhao tsî Jehovab ǁgaraga sao. Xawe da ge sada ǂgaob nî ǀguiǀguisa ǃkhaisa ǂhāba hâ Jehovaba ǃoabas ǃaroma. (Mat. 22:36-38) Tā Satanna mā-am re îb sadu ǂgaoga ǀgora.

18. Mixab 4:5 ǃoagu da tae-e dīsa ra mîǁgui?

¹⁸ Davib ge dī khami Jehovab ǃoa ǀgore re: “ǀGuiǀgui re ti ǂgaoba, î ta sa ǀonsa ǃao.” Tsî hoa xūna dī re nē ǀgores ǃoagu ûisa. Mâ tsēs hoasa mîǁgui re sadu mîǁguigu ǂkhariron tsî kain hoan ǃnâ du Jehovab ǀonsa ǃaoǃgâsiba ūba hâsa. Nēsa da ga Jehovab di ǀHûǀguitimî-aon di ǀgui i ase dī o, o da ge Jehovab ǀonsa ǀgapise ra tani. (ǂKhm. 27:11) O da ge hoada Mixab ǀkha a mî ǁkhā: “Xawe sida ge nîra ǃgû ǃKhūb sida Elob di ǀons ǃnâ ǀamose tsî hugaǀgui”.—Mix. 4:5.