1. Jehovaba tae-i ǃaroma daisi ra ǁgûs ǀkha ra ǀgōpeǀnōsen?

“TARASA kha dai ra-i âsa ǀuru ǁkhās a.” Nēs ge dîs hînab ge Jehovaba kēbo-aob Jesajab ǁaeb ǃnâ a dîsa. “Tsî ǁîs ga ǀuru xawe ta ge tita sasa ǀuru tide” tib ge Eloba ǁîb khoena ge mîba. (Jes. 49:15) ǁÎb ge hoaǁae ǁgûs ǀkha ǀgōpeǀnōsen tama hâ. Xaweb ge nē mâsib ǃnâ nēsa ge dī. Jehovab ge ǁîb tsâsiga ǁgûs ǁîs ǀgôa-e ūbâ hâ tsâsigu ǀkha ge ǀgōpeǀnō. ǁÎb ge ǂgao hâ în ǁîb khoena ǂan ǁînab kaise a ǀnam ǃkhaisa. ǂGui ǁgûdi ge Jasmin di ǀon hâ ǃgâsas khami ra tsâ. ǁÎs ge ra mî: “Sadu ǀgôa-e du ga daisi o, o du ge ǀgaisa ǃgaeǁares hîna nî hâhâsa ra om.”

2. Jehovaba mati ra tsâ ǀgui ǃoaba-ao i ǁîb di i ga ǃkhai o?

² Jehovab ge a ǂan ǁîb di ǃoaba-ao i ǀgui i ga aoǁnâ ǀû tsî ǀhaodi ǀkhas tsîna ī ǀû o. Nēs ǃaromab ge kaise ra tsûaǂgao mâ kurib hoaban ga ǂgui ǃoaba-aon ǁîb dina ǃkhai o. *

3. Jehovaba tae-e ǂhāba hâ?

³ ǂGui ǃgâsan hîna ǃkhai hân ǀnîn ge ra oaǀkhī tsî da ge a ǂkhî nēsan ga dī o. Jehovab ge ǂhāba hâ oaǀkhīn nî ǃkhaisa tsî sada tsîn ge nēsa ǂhāba hâ. (1Pet. 2:25) Mati da ǁîna oaǀkhīs ǀkha nî hui? Nē dîsa da nî ǃhoaǃgaos aiǃnâ tae-i ǃaroman ǃgâsana ǀhaodi tsî aoǁnâ sîsenni ǃnâ ra ǁhao ǀûbasa ǂans ge nî ǃgâi.

4. ǀNî khoen di sîsen-e mati ǁîna ra tsâǀkhā?

⁴ ǀNîn ge ǁîn di sîsengu xa a ǂhâǂhâsabahe. Hung di ǀon hâ ǃgâsab hîna ǃkhapagas Asiab dis ǃnâ ra hâb ge ra ǂanǃgâ, “ǃnāsa ǁaeb tsî ǀgâib tsîna ta ge ti sîsen-e gere mā. * ǃGâi tama ǂâiǀgauba ta ga ge ūhâ-i, ǂgui mari-e ta ga ūhâ o, o da Jehovaba ǃgâise nî ǃoaba ti da ge ǂâi o. ǁNā-amaga ta ge ǂgui īrga gere sîsen. Tsî ta ge nēs xa ǃaroma-e hâse ǂgui ǀhaode ge ǁhaoǃnâ ǀû tsî ega hoase ge ī ǀû. Nē ǃhūbaib ge ǁnāti a kurusa în khoena ǂause Eloba ǃoaba ǀû.”

5. ǀGui ǃgâsasa ǂgui ǃgomsin hînas gere hōǃân xa mati ge tsâǀkhā-e?

⁵ ǂGui ǃgâsan ge ǃgomsin hîna ra ǂkhābuǂâi kai nî na ūhâ. Annes ge Britaini ǃnâ ra hâ ǁgûs hîna koro ǀgôana ūhâsa. “ǀGui ǀgôa-i ti i ge sorosi ǃnupusin ǀkha ge ǃnae,” tis ge ra mî. “Egas ge ti ǃnonaǁî ǀgôasa ge ǂnûiǂuihe tsî ǀnî hâ ǀgôab tiba ge danaǀgaru. Nēs ge kaise gere ǂhani te tsî ta ge ǀhaodi tsî aoǁnâ sîsenni ǃnâ ge ǁhao ǀû. Nēs ge ge ǃaroma i ta ǃkhai.” Sada ge Annes tsî ǁkhā ǃnôa ǃgomsina ra hōǃâ ǃgâsana ra tsâba.

6. Khoena tae-i ǃaroma Jehovab khoena xu a ǂgae-oasen ǁkhā Koloseǁîn 3:13 ǃnâ hâ mîden ga ûiǂui tama i o?

⁶ Khomai re Koloseǁîn 3:13. ǀNî ǃoaba-aon Jehovab din ge ǁîn ǃgâsa-i ǁî-i ǃoa-ai ge dī xū-i xa ge tsûtsûhe. Apostel Paulub ge nēsa ge mûǂan ǁaen ai da “ǀauxū-e” sada ǃgâsan ǃoa-ai a ūhâ ǁkhā ǃkhaisa. Tamas ka io da ge ǂhanuoǃnâse ge hâ-ūhe. ǂAnbasen tama da ga io da ge ǁaiba a omkhâi ǁkhā. Nē ǁaib hîna da ra omkhâib ge a ǃaroma ǁkhā i da Jehovaba xu ǂgae-oasen. Pablo di ǀon hâ ǃgâsab hîna Suid Amerikab ǃnâ ra hâb aiǁgausa ǃoa kō re. Khoe-i ge ama tama xūna Pablob xa ge ǃhoa. Pablob ge ge ǀhapixa tama hâ i. Xawe gu ge ǀhaohâb ǃûi-aoga ǁîb a ǀhapixa ǃkhaisa ǂgom tsî ge ǁnama bi. ǁÎba mati ge tanisen? “Kaise ta ge nēs xa ge ǁaixa tsî ǀhaohâba xu ge ǂgae-oasen,” tib ge Pabloba ra mî.

7. ǀHapitsâsen ra khoe-i ǀkha i tae-e a īǁkhā?

⁷ Khoe-i ga ǃkharu ge ǁaeb ǃnâ ǁgai ǁore-e dī o, o i ge nēs xa gaixu ǁaeba ǃgâi tamase a tsâ ǁkhā tsî a ǂâi ǁkhā Elob ǁî-e a ǀnam ǁoa ti. ǃHausen tsî i ga Elob ǀkhomma hō xawe i ge Elob khoen di ǃâsa i anu tama khami a tsâ ǁkhā. Francisco ti ǀon hâ ǃgâsab ge nēti gere tsâ. “ǀAib ǃgao ta ge ge ǁgau-oa-e” tib ge ra mî. “ǁAerob ǀgaiba ta ge ǀhaode ǃoa gere i xawe ta ge kaise nēs xa ge tsâǀkhāhe tsî Jehovab khoen ǀkha hâsa ta anu tama hâ khami gere tsâ. ǀHapitsâsen ta ge gere tsî ta ge Jehovab xa ta ǀûbahe hâsa ge ǂgom tama hâ i. ǁAeb ǀkha ta ge aoǁnâ sîsenni ǃnâ ǂoa ǀû tsî ǀhaodi tsîna ge ǁhaoǃnâ ǀû.” Nē da go ǃhoaǃgao mâsigu ǃnâ ra ǃkharu ǃgâsan xa da mati ra tsâ? Tsâbaǁhaoxasiba da ǁîna ūba hâ? Tsî ǂhâǂhâsase, Jehovaba mati ǁîn xa ra tsâ?

8. Jehovaba ǁnān hîna gere ǃoaba bina ra ǀuru? ǁGuiǃā re.

⁸ Jehovab ge ǁîb ǃoaba-aon hîna ǁîba gere ǃoaba xawe ǁaeroba ge a ǀûna ǀuru tama hâ. Tsîb ge ǁîn ge ǁîb ǃoabas ǃnâ dība bi sîsenni tsîna ǀuru tama hâ. (Heb. 6:10) Kēbo-aob Jesajab ge ǃgâi  aiǁgaus matib Jehovaba ǁîb khoena ra tsâba ǀgausa ra ǁgausa ge xoamâi. “ǁÎb ge gūn âba ǃûi-ao-i khami nîra ǃûsi” tib ge Jesajaba ge xoa. “ǁÎb ge ǁkhaon âba ǁîb ǁôakha ǃnâ ǀhaoǀhao tsî tîǂams âb ǃnâ nîra tani.” (Jes. 40:11) Jehovab kai ǃûi-aoba mati ra tsâ ǁîb di ǃoaba-ao-i ǀgui i ga ǁîba ǃoaba ǀû o? Jesub ge Jehovab ǀgauga ge ǂanǂan ǁîb ǁkhāǁkhāsabegab ge dî o: “Mati go ra ǂâi? Khoe-i ga ǀguikaidisi gūna ūhâo, tsî i ga ǀgui-i ân xa kāheo, khoesedisikhoeseǀana i ǁnāxū tsî ǃgû tsî kā hâ-e ǃhomgu ai ôa tide? Tsî hō i kao, amase ta ra mîba go, ǁî-i ǃaroma i kom khoesedisikhoeseǀan kā tama ge hâ in ǃgâ-ai ra ǃgâiaǂgao-o.”—Mat. 18:12, 13.

9. Mati gu ǃgâi ǃûi-aoga Elobmîs ǁaeb ǃnâ ǁîgu gūn ǀkha gere hâ. (Tsoatsoas ai hâ ai-īsiba mû re.)

⁹ Tae-i ǃaroma da Jehovaba ǃûi-aob ǀkha a ǀgōpeǀnō ǁkhā? Elobmîs ǁaegu ǃnâgu ǃgâi ǃûi-aoga ǁîgu gūna amabes ǃnâ gere tsâba amaga. Davib ge aiǁgause, bēri tsî xammi tsîn ǀkha gere ǃkham ǁîb gūna ǁkhaubas ǃaroma. (1Sam. 17:34, 35) ǃGâi ǃûi-aob ge ǀgui gū-i ga kā xawe a ǂan. (Jhn. 10:3, 14) ǁNā ǃûi-aob ge ǃgau hâ gūna ǃharas ǃnâ mâi tamas ka io ǀnî hâ ǃûi-aoba kōǃgâ kai tsî kā hâ gū-e sī nî ôa. Jesub ge nē aiǁgausa ge sîsen-ū sada xū-e ǁkhāǁkhās ǃaroma: ‘ǁNās ǁkhās khami i ge sago Îb, ǀhommi ǃnâ hâb di ǂâi tama hâ, ǀgui-i nē ǂkhariron di-i nî kā ǃkhaisa.’—Mat. 18:14.

10. Esegieli 34:11-16 ǃoagub Jehovaba tae-eb ǁîb kā hâ gūna nī dība di ge mî?

¹⁰ Jehovab ge mâ ǀgui-i hoa-i âda a ǀnam, ǁnān hîna ge amab daoba xu a ǁgôan tsîna. Kēbo-aob Esegieli ǃnâ-ūb ge Eloba ra mîba da ǁîb kā hâ gūnab ôaǂui tsî gagasise ǁkhawa nî hui di. Tsîb ge matib nî ǁkhauba nî ǃkhaisa ge ǁgau. Nēb ge ǀgaugu hînab Israelǁaes ǃûi-aoba  ra sîsen-ūga ǁîb gū-i ga kā o. (Khomai re Esegieli 34:11-16.) ǂGurob ge ǃûi-aoba gū-e nî ôa. Nēs ge ǂgui ǁaeb tsî sîsenni tsîna ǃkhōǂgā hâ. Kā hâ gū-eb ga ǀhao-ū o, ob ge nau gūna ǃoa ra sī-ū. Tsî i ga kā go hâ i gū-e ǃâ tsî tsû o, ob ge ǁî-e nî hui, tsûhâ ǃkhai-e kōǃgâs tsî ǂûmās ǀkha. ǀHaohâb ǃûi-aogu, “Elob gūn” kōǃgâ-aogu ge ǁkhā ǀgauga nî sao tsî ǀhaohâba xu kā hâ gūna nî hui. (1Pet. 5:2, 3) ǀHaohâb ǃûi-aogu ge ǁîna ôa tsî ra hui în oaǀkhī. Nēs khaoǃgâ gu ge gagasise ra hui nî în ǁkhapa Jehovab ǀhōsa kai. *

11. ǃGâi ǃûi-aoba tae-e gere ǁnâuǃā?

¹¹ ǃGâi ǃûi-aob ge a ǂan gū-i a kā ǁkhā ǃkhaisa. Tsî gū-i ga nau gūna xu ǃgūbe o, os ge nēsa ǂâibasen tama hâ ǃûi-aob ǁî-e ǃgâi tamase ra hâ-ū dī. Elob mā hâ aiǁgausa ǃoa kō re khoe-i ga ǁaeroba ǁîba ǃoaba ǀû o ǁî-e huisa ra ǁgaus di-e.

12. Jehovaba mati Jonab ǀkha gere hâ?

¹² Kēbo-aob Jonab ge Jehovaba ǁnâuǀnamoǃnâ tsî ǁîb ǁgaumâisa xu ge ǃkhoebē. Xaweb ge Jehovaba Jonaba ǃhaese ge ǂhābē tama hâ i. ǃGâi ǃûi-aob aseb ge Jehovaba ǁîba hui tsî gagasise ge ǂkhâǃnâ ǁîb ǁgaumâisa dīs ǀkha. (Jon. 2:7; 3:1, 2) Egab ge Jehovaba buruxa haisa ge sîsen-ū Jonaba huis ǃnâ îb mû mâ khoe-i hoa-i a ǂhâǂhâsa ǃkhaisa. (Jon. 4:10, 11) Tae-e da nepa xu ra ǁkhāǁkhāsen? ǀHaohâb ǃûi-aogu ge tā ǃhaese nî ǀûsen ǃkhai hâ khoena gu ga hui o. Xawe gu ge ra dītsâ ǁnâuǃāsa tae-i ǃaroma i nē gū-e nauna xu ge ǃgûbēsa. Nē gū i ga Jehovab ǃoa oaǀkhî o, o gu ge ǀhaohâb ǃûi-aoga ǁî-e ǀnammi tsî tsâbaǁhaoxasiba ra ǁgau.

13. Psalmdi 73ǁî danaǃâs xoa-aob mîdi ǃoa-aib ge Jehovaba tanisen ǀgauba xu da tae-e a ǁkhāǁkhāsen ǁkhā?

¹³ Psalmdi 73ǁî danaǃās xoa-aob ge ǃhūbaib khoen ǃgâib ǃnâ ra ûi ǀgausab  gere mû o ǁnās xa gere ǂkhabuǂâi kaihe. ǁÎb ge gere dîsen Elob ǂâisa dīs a ǃgâisa. (Psa. 73:12, 13, 16) Jehovaba nēs xa tae-e ge dī? ǁÎb ge nē aob ǀkha ǁaixa tama ge hâ i. Elob ge nē aob di mîde Elobmîs ǃnâ ge xoamâi kai. Psalmdi xoa-aob ge ega ge mûǂan Jehovab ǀkha ǀhōsagusisa ūhâs hoa xūn ǂam-ai a ǂhâǂhâsa ǃkhaisa. (Psa. 73:23, 24, 26, 28) Tae-e da nepa xu ra ǁkhāǁkhāsen? ǀHaohâb ǃûi-aogu ge tā nî ǃnoe ǁnān hîna Jehovaba ǃoabasa ra dîǃnâna ǀgoraǃgâs ǀkha. ǁÎna ǀgoraǃgâ tama i tsî gu ge nî ǁnâuǃā tae-i ǃaroman ǁnā xūn xa ǁnāti ra tsâsa. Nēsa gu ga dī, o ǀgui gu ge Elobmîs ǀkha ǁîna a ǂkhâǃnâ ǁkhā.

14. Eliaba tae-i ǃaroma huiba ge ǂhâ hâ-i tsî Jehovaba mâ ǀgaub ǃnâ ge hui bi?

¹⁴ Kēbo-aob Eliab ge Gao-aos Isabelsa xu ge ǃkhoe. (1Gao. 19:1-3) ǁÎb ge ǀgurib Jehovaba kēbo-aob ase ra ǃoaba di ge ǂâi hâ i. ǁNā-amagab ge ǁîb sîsen-i ǂhâǂhâsa tama khami gere tsâ. ǁNātikōseb ge Eliaba ge ǂkhabuǂâi îb ǁō ǂgao. (1Gao. 19:4, 10) Eliab ǀkha ǁaixas xab ge Jehovaba ǀgurib hâ tama, ǁîb ǀgaib aib a ǂgomaiǂnûi ǁkhās tsîb noxoba ǂgui sîsen-e nî dīse ī di ge mîba bi. Jehovab ge Eliab ǃgomsina ǃgâise ǃgâ tsî ǀasa ǁgaumâide ge mâ bi. (1Gao. 19:11-16, 18) Tae-e da nepa xu ra ǁkhāǁkhāsen? Hoa da ge Jehovab ǃoaba-aona ǃgâise nî hâ-ū, ǃgōsase gu ge ǀhaohâb ǃûi-aoga  nēsa nî dī. Khoe-i ga kaise ǁaixasa tamas ka io Jehovab xa i ǀûbahe tide khami i ra tsâ ti mî o ,o gu ge ǀhaohâb ǃûi-aoga ǃhoa-i ra ǁaeb ai nî ǃgâ. ǁNāpaxu gu ge kā hâ gū-e nî ǁgau Jehovab xa i a ǀnam-e ǃkhaisa.

15. Johaneb 6:39 ǃoagub Jesuba Jehovab gūna mati gere mû?

¹⁵ Kā hâ gūn xa da mati nî tsâsab Jehovaba ra ǂgao? Jesub aiǁgausa xu da ge a ǁkhāǁkhāsen ǁkhā. ǁÎb ge ge ǂan i Jehovab gūn ǁîb ǃoa-ai a ǂhâǂhâsa ǃkhaisa. Nēs ǃaromab ge Jesuba “kā hâ gūn Israeli ommi” dina gere hui, în Jehovaba ǃoa oa hā. (Mat. 15:24; Luk. 19:9, 10) ǃGâi ǃûi-aob aseb ge Jesuba ǁkhāb an hoana gere dītsâ în tā Jehovab gūna kā.—Khomai re Johaneb 6:39.

16-17. ǀHaohâb ǃûi-aoba mati ǃgâsan hîna ge ǀhaohâba xu a ǃgûbēn xa ge tsâ? (“ Kā hâ gū-i a tsâ ǁkhā ǀgaub” di hâ boksisa mû re.)

¹⁶ Apostel Paulub ge Efeseǁî ǀhaohâb ǃûi-aoga ge ǂkhâǃnâ i gu Jesub aiǁgausa sao. “ǁKhā tamana ǃkhōǃoa tsîts nî ǃKhūb Jesub di mîs, mîb geres xa ǂâi: Mās ge ūs ǃgâ-ai a ǃgâi.” (ǃNǃkh. 20:17, 35) Nē xoas ge ra ǁgau ǀhaohâb ǃûi-aogu ǀō-aisa ǁgaumâisa ūhâsa Jehovab khoena ǃûis disa. “Jehovab kā hâ gūn xa ra tsâ ǀgaub xa ta ga ǂâi o, o ta ge ǁkhā ta a i hoa-e ra dī ǂgao ǁîna huis ǃnâ,” tib ge Spaini ǃnâ ra hâ ǀhaohâb ǃûi-aob Salvadora ra mî. “Gagasi ǃûi-aob ase ta ge ra mûǂan Jehovab ǁîna ta nî kōǃgâsa ǂhâba hâsa.”

¹⁷ Hoan hîna nē ǁkhāǁkhāǃâs ǃnâ ra ǃhoaǃgaohen ge ge hui-e tsî Jehovaba ǃoa ge oaǀkhī. Nēsis tsînan ge ǂguin hîna ge ǃgûbēna ǁkhā xū-e ra dī ǂgao. Saora ǁkhāǁkhāǃâs ge nî ǁgau da mati da ǁîna Jehovaba ǃoa oaǀkhīs ǀkha a hui ǁkhāsa.