ELOBMÎS xoa-aogu ge hoaǁae ǁkhā mîde gere ǁguiǃā. ǃNona xūna ǃoa kō re hîna gu ge xoa-aoga nēsa gere dībasa:

Xoahe gere ǁaeb. ǃKharuge ǁaeb ǃnân ge ǂgui Israelǁîna Elobmîsa ge ūhâ tama hâ i. ǃNasa ǁaeban ge ǂguina Elobmîsa gere ǁnâu tempeli tawa ǀhao tsî i gere khomaihe ǁaeb ai. (Deu. 31:​10-12) Xawen ge ǀnîsi ǂhani ra xūna ge hâ i ǃgân gere ǁaeb ai tsîn ge gāxu īrga gere mâ. (Neh. 8:​2, 3, 7) ǁNā ǁaeb ai ǂhâǂhâsa mîde ǁguiǃgâs ge gere hui în xoade ǂâihō tsî ûiǂui. Aiǁgause Jehovab ge mā ǂhanuga.—Lev. 18:​4-22; Deu. 5:1.

Xoa ǀgaub. ǀNî ǃâgu Elobmîs digu ge amdi ase a xoasa. Aiǁgause Psalmdi, ǀGapiǁnaetsanas tsî ǃGae-amdi. ǀNî ǁaegu ai di ge amde ǁguiǃgāhe ra mîde ūhâ, nēs ge ams di xoaǂamsa gere mâǂoa kai. Tsî ǃgâ-aona gere hui în ne mîde ǃkhomai ǁkhā. Aiǁgause, Psalmdi 115:​9-11 ǃoa kō re: “Israelse, ǃKhūb ai ǂgomaiǂnûi re! ǁÎb ge a ǁîn di hui tsî ǁkhaukhō. Aronni ommi dido, ǃKhūb ai ǂgomaiǂnûi re, ǁîb ge ǁîn di hui tsî ǁkhaukhō. Sadu ǃKhūba ra ǃaoǃgâdo, ǃKhūb ai ǂgomaiǂnûi re; ǁîb ge a ǁîn di hui tsî ǁkhaukhō.” Ne mîde ǁguiǃgās ge ǁnae-aona gere hui în nē ǂhâǂhâsa mîde ǁîn ǂâidi tsî ǂgaogu ǃnâ ūhâ.

ǂHâǂhâsa xūna ǁguiǃās di ǂhâǂhâsasib. Elobmîs xoa-aogu ge ǀnî ǁaega ǂhâǂhâsa xūna gere ǁguiǃgâ. Aiǁgauseb ge Jehovaba Israelǁaesa a mîba în tā ǀaoba ǂû, ob ge Moseba ǁnāsa ǀguis xa ǃnāsa ǃnāde ge ǁguiǃgâ kai. Elob ge gere mâǂoa kai ǂgao, ûib ǀaob ǃnâ hâsa tsî i ûiba ra ǂnûǁkhaebasa. (Lev. 17:​11, 14) Ega gu ge apostelgu tsî Jerusalems ǃnâ hâ ǀhaohâb ǃûi-aogu tsîna ǂhâǂhâsa xūn hînan Xristeǁîna nî hâbē xūna xoakhâi, o gu ge ǁkhapa ǂhâǂhâsasib ǀaoba xu hâbēs diba ge ǁguiǃā.—ǃNǃkh. 15:​20, 29.

Elobmîs ǃnâ i xūna ǀguis xa ǃnāsa ǃnāde xoasa xaweb ge Jehovaba nēsa da hoaǁae nî dīsa ǂgao tama. Aiǁgauseb ge Jesuba ge mî: “Tsî ǀgorets kao, tā ǀhomaxase ǀgore.” (Mat. 6:7) Tsîb ge ǁnās khaoǃgâ ǀgoreba ǁkhā da a xūn hîna Elob ǂâis ǀkha hâna ge mî. (Mat. 6:​9-13) Sida ǀgoredi ǃnâ da ǂguiǃnāde ǀgui mîsa mî tama, xawe da ge ǀgui xū-i xa ǂguiǃnāde a ǀgore ǁkhā.—Mat. 7:​7-11.

ǃGâi ǃaromas ǃgaos ge Elobmîsa ǀnî mîde ra ǁguiǃā. Nēn ge ǀgaun sada Kai ǁkhāǁkhā-aob ra sîsenūna, î da ǃgâiba nēsa xu hō.—Jes. 48:​17, 18.