Elobmîs ge ǃgāsase ra mî, Jehovab tae-i hānîǁaeb ǃnâ nî īsa a mî ǁkhāsa. (Jes. 45:21) Mati, mâǁaes tsî matikō xūnab a ǂans tsîn ge ǁguiǃāhe tama. ǁNā-amaga da ge Jehovab di ǁkhāsib, hānîǁaeb ǃnâ nî ī xūn hoana mîǁguis diba ǂan tama. Xawe ǃgaoǃgâ re saora xūn hîna da ra ǁnâuǃāna.

Jehovab ge ǂgaob ra xū-i hoa-e a dī ǁkhā, xaweb ge ǀnî ǁaega ra ǁhûi îb tā ǁnāsa dī. ǁÎb gā-aisibab ge a sîsenū ǁkhā îb ǂgaob ra xū-i hoa-e ǁhûi. (Rom. 11:33) ǀOasaseb ǃkhō-aosen ǁkhā amagab ge ra ǁhûi, taenab ra ǂan ǂgaosa.—Jesajab 42:14.

Jehovab ge ǁîb ǂâisa ra īǁkhā kai. Nēsa mati ra hui da, î da ǁîb ǁkhāsib hanîǁaeb ǃnâ nî ī xūn kēbos diba ǁnâuǃā? Jesajab 46:10 ge ra ǁguiǃā: “Tita ge ǀnai tsoatsoas ai ǀams xa ge ǂanǂan; ǀnai ta ge noxopa nî ī xūna nēti ge ǂhôa: ‘Ti ǀapes ge nî hâhâ tsî ta ge ti ǂâibasensa nî dīǀoaǀoa.’”

ǀGui ǃaromas Jehovab hanîǁaeba kēbo ǁkhās ge, ǁîb ge ǀgaiba ūhâ xūna ī kaisa. ǂHâbasa tama i ge hâ ǁîb xūna nî ǃkhaeǃkhaesa, îb tae-i hānîǁaeb ǃnâ nî ī ǃkhaisa mû. Aiǁgause i ge xūna ǀnîsi ǀnai ī hâ i tsîb ǁîna ra kōǃgâ khami. Xawe Jehovab ge a mîǁgui ǁkhā xū-i mîmâisa ǁaeb ai nî īsa tsî ǁnāsa ī kai ǁkhā ǁnā ǁaeb ga hā o.—Eks. 9:​5, 6; Mat. 24:36; ǃNǃkh. 17:31.

ǁNās ǃaromas ge Elobmîsa “aiǂhumi,” “kurus” tsî “ǃaromas” ti hâ mîde ra sîsenū tae-i hânîǁaeb ǃnâ nî īsa ǁguiǃās ǃaroma. (2Gao. 19:25; Jes. 46:11) Nē mîdi ge ǀnî hâ gowaba xu ǂnûiǃkhunisa, hîna “ǂgoakuru-aob” ti hâ mîs ǀkha a ǀguisa. (Jer. 18:4) ǂAnsa ūhâ ǂgoakuru-aob îsa xū-e a kuru ǁkhā khamib ge, Jehovab tsîna xūna a dī-ūnu ǁkhā ǁîb ǂâibasensa dīǀoaǀoas ǃaroma.—Efe. 1:11.

Jehovab ge aitsâma ǁhûibasens ǁkhāsiba ra ǃgôaǃgâ. ǁÎb ge ǀnai ais-ai mîǁgui tama tae-i mâ khoe-i hoa-i ûib ǃnâ nî īsa. Tsîb ge ǁîba ǃaroma tama în ǂkhauǃnâ ǂgaoga ūhâ khoena ǁîn ûiba nî ǁgaiǁgai xūna dī kai. Xaweb ge mâ khoe-i hoa-e ra mā-am î-i ǁhûi mati i ra ûi ǂgaosa. Tsîb ge ra ǁkhāǁkhā nî matin ǂhanu ǀgaub ǃnâ nî ûisa.

ǀGam aiǁgau ra ǃgaoǃgâ re. ǂGuro aiǁgause ge Nineves khoena ǃkhōǂgā hâ. Jehovab ge ge mîmâi ǁnā ǃās khoen ǁîn eloxoresasib ǃaroma nî hîkākāhesa. Xawen ge ǃhōbasen, ob ge Jehovaba “ǁîb di ǂâisa ge ǀkharaǀkhara tsî ǁîna mîb ge hâ i khami ǁkhara tama ge i.” (Jon. 3:​1-10) Jehovab ge ǁîb di ǂâisa ge ǀkharaǀkhara tsî mîmâib ge hâ i xū-e ge dawa. Nineves khoen ge ǁîn aitsâma ǁhûibasens ǁkhāsiba sîsenū. Tsî Jehovab ge sî ǃkhâikhomsa ǃgâ tsî a ǀkharaǀkharasens khaoǃgâ.

ǀGamǁî kēbos ǃnâb ge dan-aob Koresa, Jodeǁîna ǃkhōsisa xu ge ǃnorakai î-i Jehovab tempela om-ūnuhe. (Jes. 44:26–45:4) Gao-aob Koresi ge ǁnā kēbosa ge dīǀoaǀoa. (Esr. 1:​1-4) Xaweb ge Koresa ama Eloba ge ǃoaba tama hâ i. Jehovab ge Koresa ge sîsenū ǁîb kēbosa dīǀoaǀoasa. Koresab ge ge ǁgari tama hâ i xaweb ge ge mā-am îb aitsâma ǁhûibasen ham-eb nî ǃoabasa.—ǂKhm. 21:1.

Nēn ge ǀoro xūn di ǀguin hînab Jehovaba ra ǂâiǃgâna hānîǁaeb xab ga kēbo o. ǁNâuǃāxase i ge khoe-i tsîna Jehovab ǀgauga ǀoasase ǁnâuǃā tide. (Jes. 55:​8, 9) Jehovab xa da ra ǁnâuǃā xūn ge sida ǂgomsa ra ǀgaiǀgai, hoaǁaeb ǂhanu xū-e nî dīsa, hānîǁaeb xa kēbos tsîna ǃkhōǂgā hâse.