1. ǂKhauhesana mâǁae ǀhommi ǃnâ nî hâ?

 JEHOVAB khoen ge ǂgui kuriga ra dîsen: ‘Mâ ǁaeb ain ǃgau hâ ǀuniga ǂkhauhesana ǀhomma ǃoa nî ī?’ ǂGuro da ge gere ǂâi, ǂkhauhesan Armagedons khaoǃgâ ǁaeroba paradais ǃnâ nî hâsa. ǃKhē xu ǂgō-ommi, 15 Julib 2013 nî dib ǃnâ da ge ge ǁkhāǁkhāsen, ǂkhauhesan Armagedons torob nî tsoatsoas aiǃâ ǀnai ǀhomma ǃoa nî ī ǃkhaisa.—Mat. 24:31.

2. Mâ dîsan nauna dîsen ǁkhā tsî tae-e da nē ǁkhāǁkhāǃâs ǃnâ nî ǃhoaǃgao?

² Xawen ge ǀnîna saorase ǀnîsi a dî ǁkhā: Tae-e Xristub di “nau gūn” Jehovaba ǂgomǂgomsase ra ǃoaban ǀkha nî ī “kai ǂōǂōsib” ǁaeb ǃnâ? (Jhn. 10:16; Mat. 24:21) ǀNî ǃâb “nau gūn” dib ge ǀnîsi ra ǂâiǂhansen, tae-i nî īsa ǂkhauhesa Xristeǁîn ga ǀhomma ǃoa īo. Hā re î da ǀgam Elobmîs ǃnaeǃkhai ra ôaǃnâ, nē ǀgaub ǃnâ a ǂâi kai nî ǁkhāna. ǁNās khaoǃgâ da ge nî ǃhoaǃgao, tae-i ǃaroma da nēs xa ǂâiǂhansen tide ǃkhaisa.

TAE-E Ī TIDE?

3-4. ǀNî khoena ǀnîsi tae-e ǂâi ǁkhā tsî tae-i ǃaroma?

³ ǀNîn ge ǀnîsi ra ǂâiǂhansen nau gūn Jehovaba nî ǃoaba ǀûsa, ǂGaeǂguira soros ǃgâsagu ga ǀkhai o ǁîna daoǁgaus ǃgao. Īǁkhā î ga on ge ǁîna ǀnî Elobmîs ǃnaeǃkhaidi xa ǃaromahe hâse ti a tsâ ǁkhā. Hā re î da ǀgam  aiǁgau ra ǃhoaǃgao. ǂGuro ǃnaeǃkhais ge ǀGapi pristeri Jojadab xa hâ. ǁÎb ge ǂgomǂgomsase Jehovaba gere ǃoaba tsî ǀguiba ǁîb taras Jehosebas ǀkha Joasa ge sâu. Tsî ǁîba ge hui îb ǃgâi tsî ǂgomǂgomsa gao-ao kai. Joasi ge Jojadab ge ûitsâma īs kōse ǃgâi xūna gere dī tsî Jehovaba gere ǃoaba. Xawe Jojadab ge ǁōs khaoǃgâb ge Joasa, ǁgai xūna ge dī tsoatsoa. ǁÎb ge eloxoresa gao-aosa ǃgâ tsî Jehovaba ge ǃoaba ǀû.—2Kro. 24:​2, 15-19.

⁴ ǀGamǁî aiǁgaus ge 100 kuriga apostelgu ǁōb khaoǃgâ ge ûi hâ i Xristeǁîn disa. Johanneb ge ge ǀuniga apotsel-i ǁō gere ba. ǁÎb ge uitsâma-i ob ge Xristeǁîna gere ǂkhâǃnâ, în ǂgomǂgomsase Jehovab ǃoagu hâ. (3Jhn. 4) Jesub nau apotselgu khamib ge Johanneba ǁnā ǁaeb ǃnâ kaise ǃgarise gere sîsen, îb ǀhaohâb ǃnâ hâ ǃgâsana hui, în tā ǂhumi ǂâi ǀgaugu ǃnâ māǁnâsen. (1Jhn. 2:18; 2Tes. 2:7 di study note sa khomai re.) Xawe Johanneb ge ǁōs khaoǃgân ge ǂgui ǃgâsana Jehovaba ge ǃoaba ǀû. ǁNāpaxu ge sao kurigu ǃnân ge Jehovaba ge ǃoaba ǀûna, ǂhumi ǁkhāǁkhāde khoena gere ǁkhāǁkhā. Tsî ǃgâi tama tanisen ǀgaugu tsîna ǀhaohâgu ǃnâ gere mā-am.

5. ǁNā ǀgam Elobmîs ǃnaeǃkhai ra da mati ǃeream tide?

⁵ Nē ǀgam ǃnaeǃkhaide ra ǁgau, ǁkhā xū-i nî īsa nau gūn ǀkha ǂkhauhesan ga ǀhomma ǃoa īo? Tātsēs tsîna ī tide. ǂGomǃgâsiba da ge ūhâ, ǂkhauhesan ga ǀhomma ǃoa ī, on nau gūna gagasise nî kōǃgâhesa. Tae-i ǃaroma da ǂgomǃgâsiba ūhâ ǁkhā?

AMA ǃOABAS GE DĪKĀKĀHE TIDE

6. Mâ ǃnona ǁaega da nēsi nî ǃhoaǃgao?

⁶ Tae-i ǃaroma da ǂgomǃgâsiba ūhâ ǁkhā, hānî ǃgom ǁaegu ǃnâ i ama ǃoabasa dīkākāhe tidesa? ǀUniga tsēdi Israelǁaes ge ûi hâ ī ǁaeb tsî apostelgu gere ǁō ǃnâ ǁaeb tsîn a ǀkhara tis Elobmîsa ra ǁguiǃā xui-ao. Hā re î da ǃgāsase saora ǁaega kō: (1) Israelǁaes ǁaeb, (2) apostelgu di ǁōb khaoǃgâs, (3) “xūn di ǀasa kaihes.”—ǃNǃkh. 3:21.

7. ǂGomǂgomsa Israelǁîna tae-i ǃaroma ǃâubasensa ge ǂoaǃnâ tama hâ i, gaogu tsî naun tsîn ge eloxoresase tanisen o?

⁷ Israelǁaes ǁaeb. ǁŌb nîs aiǃâb ge Moseba Israelǁaesa ge mîba: “Tita ga ǁōs khaoǃgâ du nî tita ge mîmā du xūn hoana ǂhara tsî ǁgauoǃnâse tanisen ǃkhaisa ta ge a ǂan.” (Deu. 31:29) Moseb ge Israelǁaesa ǃkhâikhom tsî ge mîba, Jehovaban ga mâǃoa ob ǁîna ǃkhōsisa ǃoa nî sîsa. (Deu. 28:​35, 36) Nē mîde ge dīǀoaǀoahe? Îo. ǂGui kuriga ge Israelǁaesa gere ǂgaeǂgui gao-aogu ge ǁgai xūna Jehovab mûǁae gere dī. ǁNās xa ǃaromahe hâses ge Israelǁaesa ama tama eloga gere ǃoaba. ǁNā-amagab ge Jehovaba eloxoresa khoena ge ǁkhara tsî ge mā-am tama hâ i, î gu gao-aoga ǁkhawa ǂgaeǂgui. (Ese. 21:​25-27) Elob ge mî i ge ama kaisan ge mû, on ge ǂgomǂgomsa Israelǁaes khoena ǂgomǃgâsiba ǁgau tsî ǁîba ǂgomǂgomsase ge ǃoaba.—Jes. 55:​10, 11.

8. Jesub ǁōb khaoǃgâ î ge ǀhaohâb ǃnâ ǁgaoǁgaosiba ǀoa ǃkhaisa ra buru kai da? ǁGuiǃā re.

⁸ Apostelgu di ǁōb khaoǃgâs. ǁNā ǁaeb Xristeǁîn ǀhaohâb ǃnâ î ge ǁgaoǁgaosiba ǀoa ǃkhaisa ra buru kai da?  Tātsēs tsîna. Jesub ge ge mî, ǁnā ǁaeb ǃnân Jehovaba nî ǃoaba ǀûna nî hâsa. (Mat. 7:​21-23; 13:​24-30, 36-43) Apostel Paulub, Petrub tsî Johanneb tsî gu ge ǀnai Jesub kēbos ra dīǀoaǀoahe ǀgauba ge mû, ǁîgu a ûitsâma ǁaeb ǃnâ. (2Tes. 2:​3, 7; 2Pet. 2:1; 1Jhn. 2:18) Jesub ǁōb khaoǃgâb ge ǀhaohâba ǁgaoǁgaosib xa ge ǀoahe. Jehovaba ge ǃoaba ǀû khoen ge kaise ge ǀoa tsî ǂhumi ǂgomde ge tsoatsoa, Babilons kais ti a ǂansade. ǁNās ge ǁkhawa ra ǁgau, Jesub ge mî kēbos ge dīǀoaǀoahesa.

9. Nēsi da ûiǃnâ hâ ǁaeba mati Israelǁaes tsî ǂgurokham ǁaeb Xristeǁîna xu ra ǀkhara?

⁹ “Xūn di ǀasa kaihes.” Israelǁaes ge ûiǃnâ hâ i ǁaeb tsî Jesub khaoǃgâs tsîna xu i ge sida ûiǃnâ hâ ǁaeba ra ǀkhara. Sida ûiǃnâ hâ ǁaeba mati a ǂansa? Nē ǁaeba da ge “ǀuni tsēdi” eloxoresa ǃhūbaib dib ase a ǂan. (2Tim. 3:1) Xawes ge Elobmîsa ra ǁgau nē ǁaeb ǃnâ da gaxuse nî ûisa. Nē ǁaeb ge Mesiab Gaosib ǃnāgan khoena ǀoasa kurusa nî ūhâs kōse nî hâ. Tsî ǃhūbaib paradais ǃnâ nî ǀkharaǀkharahes kōse. Nē ǁaeb ge “xūn di ǀasa kaihes” ti a ǂansa. (ǃNǃkh. 3:21) Nē ǃgôaǁaeb ge 1914 Jesub ǃnaes khaoǃgâ ge tsoatsoa. Mâǁae i ge ǀasa kaihe? Jesub ge ǀhommi ǃnâ Gaob ase ǂnûiǂgāhe o. Nēsisab ge Jehovaba ǂnûǁkhaeba bi nî ǂgaeǂgui-aoba ge ūhâ i, gao-aob Davidi suriba xu. Jehovab ge ǁnā gaosis ǀguisa ge ǀasa kai tama hâ i. Jehovab ge ǁîb ǃoaba-aon tsîna ge hui în ǁîba ǂhanu ǀgaub ǃnâ ǃoaba ǁkhā. (Jes. 2:​2-4; Ese. 11:​17-20) Nēsa ǁkhawa nî ǁgaoǁgaohe?

10. (a) Elobmîsa tae-e sida ǁaeb di ama ǃoabas xa ra mî? (Jesajab 54:17) (b) Nē kēbode tae-i ǃaroma ǁnātikose ra ǂgomǃgâ kai da?

¹⁰ Khomai re Jesajab 54:17 sa. Saora kēbos xa ǂâi re: “Sas ǃoagu ra kuruhe ǁâtani-i hoa-i ge ǃgâiǃgâ tide.” ǁNā kēbos ge nētsē ra dīǀoaǀoahe. Sao ra ǁkhaeǂgaos mîdi ge sida ǁaeb ǃnâs tsîna ra sîsenūhe: “Sa ôagu hoagu ge ǃKhūb xa nî ǁgauǃnâhe tsî sa ôan di ǂûtanib ge nî kai. ǂHanu-aisib ǃnâs ge nî ǃgaoǃgaohe . . ǃaos tide xui-ao, tsî ǃaorosasib ge sas tawa ǀgūse hā tide.” (Jes. 54:​13, 14) Nē ‘ǃhūbaib di elob’ ǁGâubab tsîn ge Jehovab di ǁgauǃnâs sîsen-e mâ kai tide. (2Kor. 4:4) Ama ǃoabas ge ge  ǀasa kaihe tsî i ge tātsēs tsîna ǁgaoǁgaohe tide. Nēs ge ǀamosib kōse nî hâhâ. Sada ǃoagu ra sîhe ǃkham gôagu ge ǃgâiǃgâ tide.

TAE-E NÎ Ī?

11. Tae-e ra ǁgau ǂkhauhesan ga ǀhomma ǃoa ī ǁaeb ǃnân nau gūna nî kōǃgâhesa?

¹¹ ǂKhauhesan ga ǀhomma ǃoa īo, o i tae-e nî ī? ǂÂis ǃnâ ūhâ, Jesub ge a sida ǃûi-ao tsîb ge a ǀhaohâb di dana. Jesub ge ǃgāsase ge mî: ‘Xristub ǀguib a ǂhanu ǂgaeǂgui-aosa.’ (Mat. 23:10) Jesub ge ǀhommi ǃnâ ra ǂgaeǂguise ǁîb di saosabena nî kōǃgâ. Jehovab ǀGôab Jesub Xristub xan ra daoǁgauhe, amagan ge Xristub di saosabena ǃao tide. Amase da ge a ǀū ǁîb mati nî daoǁgaudasa. Hā re î da nēsi Elobmîs aiǁgaude ǃhoaǃgao, ǂgomǃgâsiba omkhâis ǀkha a hui ǁkhāde.

12. Jehovaba mati ǁîb khoena gere kōǃgâ (a) Moseb ǁōb khaoǃgâ? (b) Eliab ǁōb khaoǃgâ? (Ai-īsib tsîna mû re.)

¹² Israelǁaes mîmâisa ǃhūb ǃnâ nî sīs aiǃâb ge Moseba ge ǁō. Tae-e Elob khoen ǀkha ge ī? ǁNā ǂgomǂgomsa-aob ǁōb khaoǃgâb ge Jehovaba ǁîb khoena hui ǀû? Hî-i. ǁÎn ge ǂgomǂgomsase Jehovab ǃoagu gere hâs kōseb ge ǁîba ǁîna gere hui. Moseb nî ǁōs aiǃâb ge Jehovaba ǁîba ge mîmā, îb Josuaba ǁgaumâi khoena nî daoǁgause. Moseb ge Josuaba ǂgui kuriga gere ǁkhāǁkhā. (Eks. 33:11; Deu. 34:9) ǁNās ǂam-ais tsîna i ge ǀoadisidi, kaidisidi, korodisidi tsî disidi ǃgôab khoega ge hâ ī khoena gere kōǃgâ ga. (Deu. 1:15) Elob khoen ge ǃgâi ǀgaub ǃnâ gere kōǃgâ-e. ǁKhā aiǁgausa da ge Eliaba xu ra mû. ǁÎb ge ǂgui kuriga ǃgarise ge sîsen, îb Israelǁaesa hui Jehovaba ǃoabasa. Xaweb ge Jehovaba ǁîba ge ǁgaumâi, îb Judab ǃnâ sī ǃoaba. (2Gao. 2:1; 2Kro. 21:12) Nē ǁaeb ǃnâs ge Israelǁaesa ǀguri hâ i? Hî-î. Eliab ge Elisaba ǂgui kuriga gere ǁkhāǁkhā. ǁNāpa î ge ‘kebo-aogu di ǀgôagu’ tsîna ge hâ i, ǁîgu tsîn ge ge ǁkhāǁkhāhe hâ i. (2Gao. 2:7) ǂGui ǂgomǂgomsa khoegu ge ge hâ i, Elob khoena gere daoǁgauga. Jehovab ge aiǃgû tsî ǁîb ǂâibasensa ge dīǀoaǀoa tsî ǁîb ǂgomǂgomsa ǃoaba-aon tsîna ge kōǃgâ.

13. Hebreǁîn 13:5 ǃoagub Jehovaba tae-e ra mîmâiba da? (Ai-īsib tsîna mû re.)

 ¹³ Nē ǂâiǀgauba ǂâis ǃnâ ūhâse, tae-e nî hā ǂkhauhesan di ǀuniga i ga ǀhomma ǃoa īo? Nēs xa da ge ǂâiǂhansen tide. Elobmîs ge sao ra mîdi ǃnâ-ū ǂgomǃgâsiba ra mā da: Jehovab ge tātsē ǁîb khoen ǃhūbaib ai hâna ǁnāxūǃnâ tide. (Khomai re Hebreǁîn 13:5 sa.) Moseb tsî Eliab khami î ge ǂkhauhesa Xristeǁîgu hîna gagasise ra kōǃgâ da ga, nauna ǁkhāǁkhāsa kaise ǂhâǂhâsase ra mû. ǂGui kuriga gu ge ǂgaeǂguira soros ǃgâsaga nau gūn di ǃâb ǃnâ hâ aoga ra ǁkhāǁkhā, î gu gagasise khoena kōǃgâ. Aiǁgause gu ge ǂgaeǂguira soros ǃgâsaga, ǀhaohâb ǃûi-aogu, ǃnarimâra mûǂam-aogu, ǁnâub bēros komitegu, betels mûǂam-aogu tsî nau nî hâ skolgu tsîna ge ǂnûiǂgā, î gu ǃgâsaga ǁkhāǁkhā. ǂGaeǂguira soros ge ǃkharagagagu komites hui-aogu tsîna ra ǁkhāǁkhā. Nē hui-aogu ge nēsi ǂgomǂgomsase ǁnā ǁgaumâidi ǃnâ ra ǃoaba. ǁÎgu ge a aiǂhomisa Xristub di gūna kōǃgâsa.

14. Tae-e nē ǁkhāǁkhāǃâs ǃnâ ra mâǂoa?

¹⁴ Mâǂoa ra ǂâis nē ǁkhāǁkhāǃâs dis ge: ǂKhauhesan di ǀgui-i ga kai ǁgâiǀāb ǀams aiǃâ ǀhomma ǃoa ī, ǁaeb ai î ge noxoba ama ǃoabasa nî aiǃgû ǃhūbaib ǂhawase. Jesub Xristub di ǂgaeǂguis ǃnāgan ge Jehovab di khoena tātsē ǀû tide ǁîba ǂgomǂgomsase ǃoabasa. ǂAn da ase i ge ǁnā ǁaeb ai Gogi Magogi, ti Elobmîs ǃnâ a ǂansa ǃhaode ǀhaohâse Elob khoena nî ǁnāǂam. (Ese. 38:​18-20) Xawe ǁnā ǁnāǂams ge ǁaerob ǀguiba nî hâ tsî Elob khoena ǁkhae tide ǁîba ǃoabasa xu. Jehovab ge amase ǁîb khoena nî sâu. ǁKhapos ǃnâb ge apostel Johaneba “kai ǂnubis” Xristub di nau gūna ge mû. Johaneb ge ge mîbahe nē “kai ǂnubis . . kai ǁgâiǀāba” ûiǃkharu hâsa. (J.ǂHa. 7:​9, 14) ǂGomǃgâsiba da ge a ūhâ ǁkhā Jehovab ǁîna nî huisa.

15-16. ǂHaiǂhais 17:14 ǃoagun, Xristub ǂkhauhesana Armagedons torob ǃnâ tae-e nî dī? Tsî nēsa tae-i ǃaroma ra ǂkhâǃnâ da?

 ¹⁵ Xawen ge ǀnîna ǀnîsi ra ǂâi: ‘ǂKhauhesana tae-e ǀhommi ǃnâ sī nî dī?’ Elobmîs ge ǁnā dîsa nî ǃeream. ǁGau rase nē ǃhūbaib di ǂgīǂgōsi ǃnandi “ǁkhaoba nî ǁnāǂam” sa. ǁÎn ge nē ǃkhamsa nî ǂoaǃnâ. Saorase da ge ra khomai: “ǁKhaob . . ǁîga nî ǃkhamdan” ǃkhaisa. Ham-e ǁîba nî hui? ǁĀraǃās ge ra ǃeream. ǁNān ‘ǃkhōǂuisaben tsî ǂgomsaben ti ra ǂgaihen’ ge ǁîba nî hui. (Khomai re ǂHaiǂhais 17:14 sa.) Nēna a ham? ǁÎn ge khâisa māhe hâ ǂkhauhesa Xristeǁîna. Kai ǁgâiǀāb nî toas aiǃâ ǀhomma ǃoa nî ī ǂkhauhesan ge ǂguro ǁgaumâis ase, Jesuba nî ǃkham hui. Nē ǁgaumâis ge kaise nî ǀō-aisa. ǀNî ǂkhauhesan ge Xristeǁî kain nîs aiǃâ ge ǃkham-ao i tsî ǀnîn ge torob ǃnâ gere ǃkham. Xristeǁî kain ge on ge ǂkhîb di daoba ge ǁkhāǁkhāsen. (Gal. 5:22; 2Tes. 3:16) Nē ǂkhauhesan ge toroga ge ǂkhâǃnâ ǀû. ǀHommi khâisan ga hō, on ge Xristub tsî ǀhomǃgāgu tsîn ǀkha ǀuniga torob ǃnâ nî ǁhao Elob di khākhoen ǃoagu.

¹⁶ Sao ra î xa ǂâi re: ǃHūbaib ai hâ ǂkhauhesa Xristeǁîn ge nēsi kaira hâ. Xawen ga ǀhomma ǃoa ī tsî Xristub ǀkha ǀguiba sī ǂgaeǂgui, on ge ǁîna nî ǁō ǁoa gagasi kurusabe kai. ǁÎn ge amase ǃgâsana ǃnāǂamsase nî hui ǀhomma xu.

17. Mati da a ǂan Elob di ǃoaba-aon Armagedons torob ǁaeb ǃnâ ǃnorasase nî tsâsa?

¹⁷ Sado a nau gūn di ǃâ? Tae-e du a dī ǁkhā Armagedons torob ga tsoatsoa o? Jehovab ai ǂgomaiǂnûi tsî ǁîb daoǁgaude sao. ǁNāsa tae-e ǃkhōǂgā hâ? Elobmîs ge saorase ra mî: “Ti khoedo, sadu omdi ǃnâ ǂgâ, î dao-amde sadu ǃgâb ai ǂganam. ǁAero-e gaugausen, ǃKhūb ǁaib nî toas kōse.” (Jes. 26:20) Elob di ǃoaba-aon hoan ge ǁnā ǁaeb ǃnâ ǃnorasase ǀhommi tsî ǃhūbaib ais tsîna nî tsâ. Apostel Paulub khami da ge ǂgomǃgâsiba ūhâ, “ǀgaigu kas, nēsi hân tsî ǃgoaxan kas” hoasa i Elob ǀnamma xu a ǀgora da ǁoasa. (Rom. 8:​38, 39) Hoaǁae da ge ǂâis ǃnâ nî ūhâ: Jehovab ge kaise ǀnamda tsîb ge ǁîba tātsē ǁnāxuǃgâ da tide.