“Tita ge ǃnaesa xu a tao xa” tis ge Sarasa ra mî. * “Ti xa ta ge ǃgâi xūna ǂâi tama. ǁNā-amaga ta ge ǁîn xa ǃnāsase ra ǂâi khoen ǀkha ta ga hâ o sausase ra tsâ. Xawe ta ge ǃnomsa tsî tsamtsiǃnâ khoe-i ǀkha ta ga hâ o ǃgâise ra tsâ. Ti ǃgâi ǀhōsan ge nē ǀgauga ūhâ.”

Saras mîdi ge ra ǁgau tsamtsiǃnâsiba da ga ūhâ on nau khoena nî sada ǀhō kai ǂgao ǃkhaisa. Tsamtsiǃnâ khoen ge Jehovaba ra ǂkhî kai. ǁÎb mîs ge ra ǂkhâǃnâ da i da ‘tsamtsiǃnâsib ǀkha anasen.’ (Kol. 3:12) Tsamtsiǃnâsiba a tae? Jesuba mati ge ǁgau tsamtsiǃnâb asa? Tsî nē ǀgauba ūhâsa mati ǂkhîba nî mā da?

ǂKhîba ūhâ khoe-i ge tsamtsiǃnâsiba ra ǁgau. Tsamtsiǃnâ khoe-i ge tsaura tsî khoexaǃnâ ǀgaub ǃnâ nau khoen ǀkha ra hâ. ǁÎ-i ge ǃhaebe nî ǁaixa kai nî mâsib ǃnâ i ga hâ xawes tsîna ra ǃkhō-oasen.

Tsamtsiǃnâsib ge khoe-i ǀgaiba ūhâsa ra ǁgau. Grieke gowab mîs hîna ‘tsamtsiǃnâsib’ di hâs ge ǃgarob hāb hîna ǃnomǃnomhe hâba ǃoa ra ǁnaeǁgau. Nē hāb ge noxopa a ǀgaisa xaweb ge ǁîb ǀgaiba ǃgâise sîsen-ūsa ǁkhāǁkhāhe hâ. ǁKhā ǀgaub ǃnâ da ga tsamtsiǃnâse a tanisen o, o da ge sida ǁgai ǀgauga ǃkhō-oa tsî ǂkhîb ǃnâ nau khoen ǀkha ra hâ.

‘Tita ge tsamtsiǃnâ khoe tama hâ’ di da ge ǀnîsi a ǂâi ǁkhā. ǂGui khoen ge a ǂkhabaxa tsî ǃnūǃnâxa tama hâ, ǁnā-amaga i ge sida a ǃgomba ǁkhā tsamtsiǃnâsiba ǁgausa. (Rom. 7:19) ǃGāsa i ge a, tsamtsiǃnâsiba ūhâs ge ǁguiǂgāsensa ǂhâ hâ. Xawe Jehovab di ǃanu gāgāb ge ra huida i da hoaǁae ǁgūtsâ. (Gal. 5:22, 23) Tae-i ǃaroma da tsamtsiǃnâsiba omkhâis ǃnâ nî ǁguiǂgāsen?

Tsamtsiǃnâsib ge khoena sida ǃoa ra ǂgae. Saras khami da ge sida tsîna tsamtsiǃnâ khoen ǁaegu da ga hâ o hārase ra tsâ. Jesub ge a ǃgâi aiǁgau tsamtsiǃnâ tsî a khoexaǃnâ khoe-i diba. (2Kor. 10:1) ǁÎba ge ǀū-i ǀgôan tsîn ge ǁîb ǀgūse gere hâ ǂgao.—Mrk. 10:13-16.

Tsamtsiǃnâsib ge sada tsî ǁnān sada ǂnamipe hân tsîna ra ǁkhauba. Tsamtsiǃnâ da ga o da ge ǃhaebe ǁaixa tama hâ. (ǂKhm. 16:32)  ǀNam da a khoena da ge tsûtsû tite tsî da ge nēs ǀkha ǀkhapi tsâsen tite. Nēs ge khoena ǃgâiba ǃkhōǂgāba hâ sida ǁgaiǂūba da ra ǃkhō-oa amaga.

Kaiseb ge ǂgui sîsen-e ūhâ i tsî ǀhape-i xaweb ge Jesuba hoa khoena tsamtsiǃnâse gere hâ-ū. ǂGui khoen ge ǃgomsina gere hōǃâ tsî khoakhoahesa ge ǂhâ hâ i. Amasen ge kaise ǃgâise ge tsâ Jesub mîden ge ǁnâu o: ‘Tita ǃoa hā re, tsamtsiǃnâ tsî ta ǂgaob ǃnâ a ǃgamǃgamsen xa’ xuige.—Mat. 11:28, 29.

Mati da Jesub di tsamtsiǃnâsiba ǁgae ǁkha? Elobmîsa da ge nî ôaǃnâ i da mû Jesub ge mati khoen ǀkha gere hâsa tsî ǃgom mâsigu ǃnâ gere tanisen ǀgausa. Tsî da ge ǁnāpaxū sada di tsamtsiǃnâsiba ra ǃâitsâ mâsigu ga hâ o, o Jesub aiǁgausa nî ǁgae. (1Pet. 2:21) ǃNona xūn hîna ge Jesuba tsamtsiǃnâse hâs ǀkha a huina ǃoa kō re.

Jesub ge ǃgamǃgamsenxasiba ge ūhâ i. Jesub ge ge mî ‘tsamtsiǃnâ tsî ǃgamǃgamxa ǂgaobab’ ūhâ ti. (Mat. 11:29) Elobmîs ge nē ǀgauga ra ǂgaiǀhao, tsamtsiǃnâsib ǃgamǃgamsenxasib ǀkha ǃgaeǀhaosa ūhâ amaga. (Efe. 4:1-3) Tae-i ǃaroma da ti ra mî?

ǃGamǃgamsenxasiba da ga ūhâ o, o da ge nau khoen sida xa ra mî xūn xa ǃhaebe ǁaixa tite. “Ō tsî ǂauxûi ā khānukhānusen-aob” ti ge ǁîba gere ǂgai khoenab ge Jesuba mati ǃeream? ǁÎb ûiǀgaub ǀkhab ge ge ǁgau ǁîn gere mî xūn ge ama tama hâ isa. Tsîb ge tsaura ǀgaub ǃnâ ge mî ‘gā-aisib ǁîb di ôan xa ǂhanu-ai kaihe hâsa.’—Mat. 11:19.

Khoe-i ga ǃgâi tama xuna sida ǃhaos tamas kai o khaoǃhūb xa mî o, o da ge tsaura ǀgaub ǃnâ nî ǃeream. Pieteri hîna Suid Afrikab ǃnâ a ǀhaohâb ǃûi-aob ge ra mî: “Khoe-i ga ǁaixa kai te ra xu-e a mî o, o ta ge ra dîsen ‘Jesuba mati ga tanisen hâ?’” ǀAro tsîb ge ra mî: “Ti ǁaiba ǃkhō-oasa ta ge ge ǁkhāǁkhāsen.”

Jesub ge khoesi ǂkhabusasiga gere ǁnâuǃā. Jesub di ǁkhāǁkhāsabegu ge ǃgâi xūna gere dī ǂgao, xawe ǀoasa kurusa gu ge ūhâ tama hâ i amaga ǁnāsa ge dī hō ǁoa i. Aiǁgause, Jesub nî ǁōs aiǃâ gu ge Petrub, Jakobub tsî Johaneb tsîga ǂhâb ge hâ i mâxōǀkhāsa ge mā bi ǁoa i. Jesub ge ge mûǂan “gagas a māsenxa, xawes ge ǁgansa a ǂkhabusa” ǃkhaisa. (Mat. 26:40, 41) Kaise ge ǃgâi i ǃkhais ge Jesub ge ǁîgu ǂkhawusasiga ǁnâuǃā ǁkhā isa.

Mandies ge ǃnāsa-e khoena xu gere ǃâubasen xawes ge nēsisa ǃgarise ra sîsen Jesub tsamtsiǃnâsib aiǁgausa ǁgaesa. ǁÎs ge ra mî: “Khoen ǃnubusiga ūhâsa ta ge ra ǁnâuǃā tsî ta ge ǁîn ǃgâi ǂūgu ai ra kō, Jehovab ra dī khami.” Jesub ge khoen di ǂkhabusasiga gere ǁnâuǃā ǀgaub ge sida nî hui i da nau khoen ǀkha tsamtsiǃnâse hâ.

Jesub ge Elob ai gere ǂgom-aiǂnûi. Jesub ge ǃhūbaib aib ge ǂhanu tama ǀgaub ai gere hâ-ūhe xawe ge ǃkham ǃoa tama hâ i. ǀNî khoen ge ǁîb gere mî xuna ge ǁnâuǃā tama hâ i tsî ge ǃhuisa bi i tsî gere ǂnaubi. Nēn hoan ǃnâb ge tsamtsiǃnâse hâ tsî ‘ǂhanuse ra ǀgoraǃgâba ge māǁnâ.’ (1Pet. 2:23) Jesub ge ge ǂan i ǁîb ǀhomsi ǁGûb mâǀgais ǀkha nî hui bi tsî nē ǁgai xūna ra dī khoena nî ǁkhāra ǃkhaisa.

ǁGaise da ra hâ ūhe ǁaeb ai da ga ǁaixa tsî xu-e nēs xa dī o, o da ge mâsiba a ǁgaoǁgao ǁkhā. ǁNā-amagas ge Elobmîsa ra mî: “Khoeb di ǁaib Elob di ǂhanu-aisiba sîsen tama xuige.” (Jak. 1:20) ǃGâi ǃaromasa da ga ūhâ ǁaixaba ǁkhā da asa xaweb ge sida ǃnubusib tsîna ǁgai xū-e a dī kai da ǁkhā.

Cathy ti ǀon hâ ǃgâsas hîna Duitslands ǃnâ ra hâs ge gere mî: ‘Sats ga mâbasen tama io, o i ge hukas tsîna nau khoe-e mâbatsi tite’. Jehovab ais ge ǂgom-aiǂnûi tsoatsoa ǁaeb ais ge ǁîs ǂâiǀgauba ge dawa. “Nēsisa ta ge hoaǁae ǁkhaubasen tama hâ” tis ge ra mî. “Tsamtsiǃnâse ta ge a tanisen ǁkhā, Jehovab hoaraga ǃgomsin nē ǃhūbaib ai hâna nî dī-unu ǃkhaisa ta a ǂan xui-ao.” ǂHanu tamasets ga ǀgoraǃgâhe ǁaeb aits ga Jesub aiǁgausa sao  tsî Elob ai a ǂgom-aiǂnûi ots ge tsamtsiǃnâse nî hâ ǀgara.

Jesub ge ge ǁgau ǂkhî ûiba da ga ǂkhaba o, o da nî tsamtsiǃnâsa. “ǃGâiǃōn ge hâ tsamtsiǃnâna” tib ge ge mî. (Mat. 5:5) Tsamtsiǃnâsib saora mâsigu ǃnâ a huida ǁkhā ǀgauba kō re.

ǁKhamasa mâsib ga ǃgameb ǃnâ hâ o, ob ge tsamtsiǃnâsiba nēsa tanis ǀkha a hui ǁkhā. “ǂGui xūn hîna ge ti kaikhoesa a tsûtsûna ta ge ge mî” tib ge Roberti hîna Australiab ǃnâ ra hâba ra ǂanǃgâ. “Xawe ǁaib ǃnâ ra ǃhoahe mîdi ge a ū-oahe ǁoa. ǁÎsa ta ge tsâ kai ǀgaub xa ta ge ǃgâi tamase gere tsâ.”

“Kaise da kom xun hoan ǃnâ ra ǃnôa o,” sida ǃhoa ǀgaub ǃnâs tsîna. Tsî ǂâi tamase da ra ǃhoa mîdi ge ǃgomsina ǃgameb ǃnâ a hau ǁkhā. (Jak. 3:2) Nēti i mâsigu ǃnâb ge tsamtsiǃnâsiba nî huida i da sida mîde ǃkhō-oa.—ǂKhm. 17:27.

Roberti ge ǃgarise ge sîsen ib ǃnomsasib tsî ǃkhō-oasens tsîna ūhâ. Nēsa xub mati ge ǀama? “ǁNâusāgum ga o ta ge ra dītsâ ǃamkuse ǃgâ tsî tsamtsiǃnâ ǀgaub ǃnâ ǃhoasa tsî ti ǁaiba ra ǃkhō-oa” tib ge ra mî. “Ti kaikhoes ǀkha ta ūhâ ǀhosagusis ge nēsisa a ǃgâi.”

Tsamtsiǃnâsib ge nau khoen ǀkha ǃgâise hâǀhaos ǀkha ra huida. ǃHaebe ra ǁaixa khoen ge ǀoro ǀhōsana ūhâ. Tsamtsiǃnâsib ge nî huida “ǀguiǃnâxasiba ǃkhōǀgaibesa” ǂkhîba ūhâs ǃaroma. (Efe. 4:2, 3) Cathys ge ra mî: “Tsamtsiǃnâsiba ta ga ūhâ o i ge a supu nau khoen ǀkha sîsenǀhaosa, ǀnî khoen ǀkha sîsenǀhaos supu tama hâ xawe.”

Tsamtsiǃnâsib ge ǂkhîba ra mā da. Elobmîs ge ra ǁgau “ǀgawiseba xu hâ gā-aisib” tsamtsiǃnâsib tsî ǂkhîb tsîn ǀkha ra ǃgûǀhaosa. (Jak. 3: 13, 17) Tsamtsiǃnâ khoe-i ge ‘ǂuru ǂgaoba’ ūhâ. (ǂKhm. 14:30) Martini ge ǃgarise ge sîsen tsamtsiǃnâsiba omkhâisa tsî ra mî: “Nēsisa ta ge ǃnāsase ǁnâuǃāxa tsî ǃhaebe ǁaixa tama tsî nēs ǃaroma ǂkhîba ra hōǃâ.”

Ama as ge ǃgarise da nî sîsensa tsamtsiǃnâsiba omkhâis ǃaroma. “Ama-e ta ga mî o ta ge nēsis kōse ǀnî ǁaega kaise ra ǁaixa” tib ge ǀnî ǃgâsaba ra mî. Xawe Jehovab hîna tsamtsiǃnâsiba da nî ūhâsa ra ǂkhabab ge nî huida i da nē ǃkhamsa dan. (Jes. 41:10, 1Tim. 6:11) ǁÎb ge nî “dīǀoaǀoa” da tsîn nî “ǁawoǁawo” da. (1Pet. 5:10) ǁAeb ra ī khama da ge Apostel Paulub ge dī khami “Xristub ti tsamtsiǃnâsib tsî khoexasib” tsîna nî ǁgae.—2Kor. 10:11.