1. Tae-i ǃaroma da Eloba xu ra hā gā-aisiba ǂhâ hâ? (ǂKhoamîdi 4:7)

 ǂHÂǂHÂSA mîǁguiba du nî dī ge īsa? ǀNîsi du ge gā-aisiba ge ǂgan. ǂHâ du hâ ǃkhaisa du a ǂan amaga. (Jak. 1:5) Gao-aob Salomob ge ge xoa: ‘Gā-aisib ge a ǂhâǂhâsa’ ti. (Khomai re ǂKhoamîdi 4:7 sa.) Salomob ge khoesi gā-aisib xa ge ǃhoa tama hâ i. Xawe gā-aisib hîna Jehovaba xu gere ǀkhīb xa gere ǃhoa. (ǂKhm. 2:6) Xawe Eloba xu hâ gā-aisiba a hui da ǁkhā. Nētsē da ra hōǃâ ǃgomsin ǀkha? Îo, nē ǁkhāǁkhāǃâs ǃnâ da ge ǁnāsa nî mû.

2. Mâba ǀgui ǀgaub gā-aisiba da a hō ǁkhāba?

² ǀGui ǀgaub hîna da gā-aisiba a hō ǁkhāb ge. ǀGam gā-ai khoekha hîna ge ǁîkha di gā-aisib ǃaroma. ǃGôahe hâ i kha xu ǁkhāǁkhāsen tsî ǁnāsa dīsa. ǂGurose da ge Salomob xa nî ǁkhāǁkhāsen. Elobmîs ge ra mî ‘Elob ge Salomoba gā-aisib. Tsî kai ǁnâuǃāb tsî hara ǂâis tsîna ge mā.’ (1Gao. 5:9) ǀGamǁîse da ge Jesub xa nî ǃhaoǃgao. Hîna ge ǀgopeǀnōhe ǁoa gā-aisiba ūhâ iba. (Mat. 12:42) Tsî Jesub xa i ge ge kēbohe: ‘Tsî ǁîb aib ge Gagab Jehovab diba nîra sâ. Gagab gā-aisib tsî ǁnâuǃāb tsîkha diba.’—Jes. 11:2.

3. Tae-e da nē ǁkhāǁkhāǃâs ǃnâ nî ǃhaoǃgao?

³ Jehovab ge Jesub tsî Salomob tsîna gā-aisiba ge mā. Îkha ǃgâi ǀapemāde ǂhâǂhâsa xūn ǃaroma hoada mā. Nē ǁkhāǁkhâǃâs ǃnâ da ge ǃnona ǂhâǂhâsa xūna nî ǃhoaǃgao: ǂHâǂhâsa mûǂuiba mari-i, sîsen-i tsî sida xa ūhâsa.

4. Jesub tsî Salomob di mâsiga mati ge ǃkharagagu i?

⁴ Salomob ge kaise ge ǃkhū hâ i. Tsî îsa oms ǃnâ gere hâ. (1Gao. 10:7, 14, 15) Jesub ge ǀoro xūna ge ūhâ i. Tsî om-i tsîna ge ūhâ tama hâ i. (Mat. 8:20) Hoa ǀgamkha ge ǀnōsa mûǂuiba ǁîkha xūn ǃaroma ge ūhâ i. ǁÎkha di gā-aisib ge Jehova Eloba xu gere hā amaga.

5. Salomaba mâ ǀnōsa mûǂuiba mari-i xa ge ūhâ i?

⁵ Salomob ge ge ǂanǃgâ mari-i “sommi” tamas ka io ǁkhaubas khami īsa. (Aoǁn. 7:12) Mari-i ǀkha da ge ǂhâ da hâ xūn. Tsî ǂhâba da hâ xūn tsîna a hō ǁkhā. Kaiseb ge ǃkhū hâ i xaweb ge Salomoba ge ǁnâuǃā. ǂHâǂhâsa xū-i hâsa mari-i xōǀkhā. Aiǁgauseb ge ge xoa: ‘ǃGâi ǀonsa ūhâs ge ǂhâǂhâsa ǃkhūsib xa.’ (ǂKhm. 22:1) Salomob ge ge mû khoen hîna mari-e ūhân. ǁÎn ūhâ xūn ǀkha ǂkhî tama hâsa. (Aoǁn. 5:10, 12) Tsîb ge ge mî î da tā ǂâi mari-i kaise a ǂhâǂhâsa di. Ū da hâ mari-i ǃhaese a toa ǁkhā amaga.—ǂKhm. 23:4, 5

6. Jesuba mâ ǀnōsa mûǂuiba ge ūhâ i ǃhūbaisi xūn xa? (Mateub 6:31-33)

⁶ Jesub ge ǀnōsa mûǂuiba ǃhūbaisi xūn xa ge ūhâ i. ǁÎb ge ǂûs tsî ās xa ge ǃgâibahe i. (Luk. 19:2, 6, 7) ǀGui ǃnā i aib ge xûi-e ge dī. Tsî ǁnās ge ge ǁîb di ǂguro buruxa dī i. (Jhn. 2:10, 11) Tsî ǁōb ge tsēs aib ge ǂgui mari-e ra ǂgan saraba ge ana hâ i. (Jhn. 19:23, 24) Xaweb ge Jesuba ge mā-am tama hâ i, în nē xūna ǁîb ûib ǃnâ ǂhâǂhâsa. ǁÎb saosabenab ge nēti ge mîba: ‘Khoe-i xare-i ge ǀgam ǀhonkhoekha a sîsenba ǁoa . . . Elob tsî ǃkhūsib tsîkha du ge a sîsenba ǁoa.’ (Mat. 6:24) Jesub ge ge ǁkhāǁkhā Elob Gaosiba da ga ǂgurose ôa. Ob Jehovaba ǂhâ da hâ xūna nî māda ǃkhaisa.—Khomai re Mateub 6:31-33 sa.

7. Matib ge ǀgui ǃgâsaba ǃgâiba hō, mari-i xa ǀnōsa mûǂuiba ūhâsa xu?

⁷ ǂGui ǃgâsan ge ǃgâiba ge hō. Jehovab di ǀapemās mari-i xa hâsan ge sîsenū  amaga. ǃGamme tama ǃgâsab Daniel di ǀon hâb di aiǁgausa kō re. ǁÎb ge ra mî: “ǂKham ta ge io ta ge ge mîǁgui ǂhâǂhâsa xū-i. Hîna da nî dī i ge, Jehovaba ǃoabasa.” ǀGui ǃgupu ûibab ge ūhâ i amagab ge. Jehovaba ǂgui ǃkharagagu xūna ge dība ǁkhā i. Aiǁgauseb ge tsūkēǃgâb ǃnans tsî Betels tawa gere hui. ǀAro tsîb ge ra mî: “ǂHauǃnâse ta ga ra mî o da ge ti mîǁguiba ǃhausen tama hâ. Ama as ge ti ûib ǃnâ ta ga ǂgui mari-e kuru hâsa. ǃHūbaib ǃnâ sîsensa da ga ǂhâǂhâsase mâi hâ o. Xawe ta ge nēsi ta ūhâ ǃgâi ǀhōsana ga ūhâ tama hâ. Mari-e kurus ai ta ga ǂâisa ǂnûi hâ, o ta ge. Jehovaba ta ra ǃoaba o, ta ra hōǃâ ǂkhîba ga hōǃâ tama hâ. Jehovab ge ǃnāsa ǃgâiaǂgaoba ge mā te mari-i xa.” ǃGāsa i ge a ǃgâiba da ra hōsa. Sida di ǂâisa da ga gagasi xūn ai ga ra ǂnûi o. Tsî mari-i ais ose.

8. Mati da a ǂan Salomob ge ǀnōsa mûǂuiba sîsenni xa ūhâ isa? (Aoǁnâ-aob 5:17, 18)

⁸ Salomob ge ge mî ǃgari sîsenni khoe-e ǃgâiaǂgaoba ra māsa. Salomob ge nēsa ‘Eloba xu hâ ǀkhaeb’ di ge ǂgai. (Khomai re Aoǁnâ-aob 5:17, 18 sa.) ǁÎb ge ge xoa: ‘Mâ ǃgom sîsenni hoab ǃnâs ge ǃnāǂamsib’ tamas ka io ǃgâiba hâ. (ǂKhm. 14:23) Salomob ge ge ǂan i tae-i xab gere ǃhoasa. ǁÎb ge ge ǃgari sîsen ao i. ǁÎb ge omna om, xûi ǃhanaga ǂgā tsî ǃhanaba gere dī. ǃĀdi tsînab ge gere om. (1Gao. 9:19; Aoǁn. 2:4-6) ǁNā i ge ge ǃgari sîsen i. Tsî i ge ǂkhîba gere mā bi. Xaweb ge Salomoba ge ǂan i ama ǂkhîbab ga ôa, ob ǃnāsa-e nî dīsa. Tsîb ge ǂgui xūna Jehovaba gere dība. Aiǁgauseb ge Jehovab ǃoabas ǃaroma gere omhe tempela gere kōǃgâ. ǁNā om sîsenni ge 7 kurina ge ū. (1Gao. 6:38; 9:1) ǂGui ǃkharagagu xūnab ge dīs khaoǃgâb ge Salomoba ge mûǂan. ǂHâǂhâsa xū-i khoe-i nî dī i ge Jehovaba ǃoabasa. ǁÎb ge ge xoa: “ǁNān, hîa da go ǁnâun di danaǃkhais ge nēsa: Eloba ǃao îts ǁîb di mîmāde ǃkhōǀgaipe.”—Aoǁn. 12:13.

9. Jesuba mati ge dī î-i tā ǁîb di sîsen-e, ǁnātikōse ǂhâǂhâsa?

⁹ Jesub ge ge ǃgari sîsen-ao i. ǂKham-i ge i, ob ge ǃnao kuru sîsen-e gere dī. (Mrk. 6:3) ǁÎb ǁgûra ge kaise ǁîb huiba gere ǃgôaǃgâ. Kai omarisa ra gere kōǃgâ amaga. Jesub ge ǀoasa kurusa ge ūhâ i. Tsî ǁnās ǀkha ǃgâi sîsen-e gere dī. Tsîn ge khoena ǀnîsi ǁîb gere dī xūna gere ǂhâba. ǁÎb di sîsenni xab ge ǃgâibahe i. Tsî ǃgari sîsen-ao i xaweb ge. Jesuba ǁaeba gere ǁamaǂui Jehovaba ǃoabas ǃaroma. (Jhn. 7:15) Tsîb ge ega ǀoasa aoǁnâ-aob ase. ǁÎb di ǃgâ-aona ge ǀapemā: “Tā kā ra ǂû-i ǃaroma sîsen, î du ǁnā ǂû-i, ǀamo ûib kōse ra hâhâ-i Khoen Ôab nîra mā du-i ǃaroma sîsen.” (Jhn. 6:27) Jesub ge ǃhommi aoǁnâs ai ge mî: “Î du ǁuiba ǀhommi ǃnâ ǀhaoǀhaobasen.”—Mat. 6:20.

10. Mâ ǃgomsigan ǀnîna sîsenni tawa a hōǃâ ǁkhā?

¹⁰ Jehovab gā-ai ǀapemāsa da ga sîsenū. O da ge ǀnōsa mûǂuiba sîsenni xa nî ūhâ. Xristeǁî da ase da ge ra ǁkhāǁkhāhe î da ǃgarise sîsen. Tsî ‘ǃomkha ǀkha ǃgâi xū-e dī.’ (Efe. 4:28) Sida ra sîsenba khoen ge ǃnāsa ǁaeba ra mû. ǂHauǃnâ tsî da ǃgarise ra sîsensa. Tsîn ge a mîba da ǁkhā matikōsen sida sîsen-e ra ǃgôaǃgâsa. Tsî nēs ge a ǃaroma ǁkhā î da gaxu īrga sîsenni tawa ūhâ. Tsî ǃgâi ǀonsa Jehovab di ǃaoba-aona kuruba ǁkhā. Tsî ǁnāsa da ga dī, o da ge ǁaeba omaris ǃoabas. Tamas ka io Jehovaba xū-e dībasa ūhâba tide. ǀKharaǀkharana da ge nî dī, î da ǁaeba ǂhâǂhâsa xūna ūhâba.

11. Tae-eb ge ǀgui ǃgâsaba ǁkhāǁkhāsen ǀnōsa mûǂuiba sîsenni xa ūhâs xa?

 ¹¹ ǂKham ǃgâsab William di ǀon hâb ge sîsen-e. ǁÎ-i di ǃkhais ai ūhâs ǂhâǂhâsasiba ge mû. ǀHaohâb ǃûi-aob hînab gere sîsenbab xab ge nēti ra mî: “[Nē ǃgâsab] ge ǃgâi aiǁgaus ase i. ǁÎb ge ǀnōsa mûǂuiba sîsenni xa ūhâ. ǁÎb ge ǃgarise ra sîsen tsî ǃgâi ǀhōsagusis tsîna ǁama-aon ǀkha ūhâ. ǃGâi sîsen-eb ra dī ǃkhais ǃaroma. Xawe tsēs di ǀams ai, sîsenni ga toa o. Ob ge a ǂan mâ ǃkhais aib nî sîsen-e mâisa. Tsî omaris tsî ǃoabas ǃnâ nî ǁhao ǀgausa. ǁÎb ge kaise ǂkhî khoeb hîna ta a ǂanba.” *

12. Salomoba mati ge ǁgau ǃgâi mûǂuibab ge ūhâ isa. Tsî matib ge ǁnāsa ǂoaǃnâ?

¹² Jehovab ǂgomǂgomsa ǃoa-aob ge i o, ob ge. Salomoba ǀnōsa mûǂuiba ǁîb xa ge ūhâ i. ǂKham i ge i ob ge ge ǂanǃgâ ǀnî xūnab ge dī ǁoa īsa. Tsî Jehovab ai huiba gere ǂgan. (1Gao. 3:7-9) ǂGaeǂgui tsoatsoab ge ob ge Salomoba ge ǂan i. ǃAorosa i ge isa ǃguriǂgaoxasiba ūhâsa. ǁÎb ge ge xoa: “ǃGuriǂgaoxasib [ǀgapiǂâixasib] ge khôaǂkhūs aiǃâ ra hā, tsî ǀgapisib gagas diba ǁnās aiǃâ.” (ǂKhm. 16:18) Xaweb ge ega Salomoba ǁîb ge mā ǀapemāsa ge sîsenū ǁoa i. ǁÎb gaosis ǂgaeǂguis di tsoatsoas ǃnâb ge ge ǀgapiǂâixa tsoatsoa. Tsî Elob di ǂhanuga ge ǁnâuǀnam tama hâ i. Aiǁgause ǀgui ǂhanub Hebreǁî gao-aogu ǃaroma ge hâ îb ge gere mî. ‘ǂGui tarade gu ǀhaoǀhaobasen tidesa, ǂgaob ǂgaeǂhapuhe tidega.’ (Deu. 17:17) Salomob ge ǁnā ǂhanuba ge sao tama hâ i. Tsî 700 taradi tsî 300 khoedi (xoǀkhā hâ taradi) tsîna ge ūhâ i. ǂGui di ge ama tama ǃoabade xu gere hā. (1Gao. 11:1-3) Salomob ge ǀnîsi ge ǂâi hâ i, nē i ge ǃgomsi tama hâ i ǃkhaisa. Xaweb ge ega Salomoba ǃgomsina ge hōǃâ.  Jehovabab ge ǁnâuǀnam tama hâ i ǃkhais ǃaroma.—1Gao. 11:9-13.

13. Tae-e da Jesub di ǃgamǃgamsenxasiba xu ǁkhāǁkhāsen ǁkhā?

¹³ Jesub ge ǀnōsa mûǂuiba ge ūhâ i. Tsî ǃgamǃgamsenxase gere tanisen. Jesub ǃhūbaiba ǃoa nî ǀkhīs aiǃâb ge. Kaise ǂgui ǃgâi xūna Jehovaba ǃoabas ǃnâ gere dī. Jesub ǃnâ-ūn ge ‘xūn hoana ge kuruhe. ǀHommi ǃnâ hân tsî ǃhūbaib ai hân hoana.’ (Kol. 1:16) ǁĀǁnâheb gere ǁaeb aib ge Jesuba. ǁÎb di ǁGûb ǀkhab ge hâ i. Okha ge dīǀoaǀoa xūn xa gere ǂâi. (Mat. 3:16; Jhn. 17:5) Xawe Jesub ge ge ǀgapiǂâixa tama hâ i. ǁNā xūnab gere ǂâi ǁaeb ai. Tsîb ge ǁîba tātsē nau khoen xab a. ǀGapi khama ge tanisen tama hâ i. ǁÎb di ǁkhāǁkhāsabegab ge ge mîba. ǃHūbaiba ǃoab ge a ǀkhīsa, khoen xab ǃoabahe tidese. ‘Xaweb nî ǃoaba tsî ǁîb di ûiba māse ǂguin di oresa ǃoa.’ (Mat. 20:28) ǁÎb ge ge mî xū-eb aitsamaba xu a dī ǁoasa. (Jhn. 5:19) Kaiseb ge ǃgamǃgamsenxasiba ge ǁgau. Jesub ge ǃgâi aiǁgausa sida ge mâiba î da ǁîba sao.

14. Tae-e da Jesuba xu a ǁkhāǁkhāsen ǁkhā. ǃGâi mûǂuiba sida xa ūhâs xa?

¹⁴ Jesub ge ǁîb di saosabena ge mîba, în ǃgâi mûǂuiba ǁîn xa ūhâ. ǀGui ǃnās aib ge ǁîb khoena nēti ge mîba: “Tsîn ge ǁkhāti danaǀûn sago din hoana ǃgôahe hâ.” (Mat. 10:30) ǁNā mîdi ge sida ra khoakhoa. ǃNāsase da ga ǃgâi tama ǂâiǀgauba sida xa ūhâ o. O i ge ra ǂÂibasen sida di ǀhomsi ǁGûb. Sida ǃnâ ǃgâiǃgâibasensa ūhâsa. Tsî da kaise ǁîb di mûǁae a ǀō-aisa ǃkhaisa. Tātsē da ge Jehovab di ǀgoraǃgâsa dîǃnâ ǂgao tama hâ. Tsî mî ǂgao tama hâ xū tama ǃoaba-ao da a ǃkhaisa. Tsî da anu tama hâsa ǀasa ǃhūbaib ǃnâ ûisa.

15. (a) The Watchtower ǂkhaniba mâ ǀgauba da nî ūhâsa ra ǂkhâǃnâ da? (b) Sida xa da ga ǃnāsase ǂâi o. O da tae ǀkhaega nî ǂoa ǃnâ. 24ǁÎ ǂhaweb ai i ra ǁgauhe khami?

¹⁵ The Watchtower ǂkhanib ge 15 kurina ǃkharu. Tsî ge mî î da, ǀnōsa mûǂuiba sida  xa ūhâ: “Tā da ge nau khoen xa da ǀgapi di nî ǂâi. Î da tā ǀgapiǂâixa. Xawes tsîna da ge tā nî ǃgôaǁnâsen, î da tā ǁgaise tsâ. ǂKhâǃnâs hîna hâs ge î da sida xa ǂhanu mûǂuiba ūhâ. Nēs ge ra ǂâibasen, î da sida ǂkhabusasigu tsî ǀgaigu tsîna ǁnâuǃā. Xristeǁî taras ge nēti ra mî: ‘Tita ge ǁgai khoe tama hâ. Xawes tsîna ta ge hoa khoen xa ǃgâi tama hâ. ǀGaigu tsî ǂkhabusasigu tsîna ta ge ūhâ. Tsî hoa khoen ge nēti ī.’” * ǃGāsase da ge ra mû tae-i ǃaroma i a ǃgâisa. ǀNōsa mûǂuiba sida xa ūhâsa.

16. Tae-i ǃaromab Jehovaba gā-ai ǀapemāsa ra mā da?

¹⁶ ǁÎb di mîs ǃnâ-ūb ge Jehovaba, gā-ai daoǁgausa ra mā da. ǁÎb ge ǀnam da tsî ra ǂhâba î da ǂkhî. (Jes. 48:17, 18) ǃGâi xū-i hîna da a ǁhûi ǁkhā i ge. ǂKhîba ra mā da xū-e ǁhûisa. Tsî ǁnās ge Jehovaba ra ǂkhî kai xūna dī ǀgarasa. Nēsa da ga dī, o da ge. ǂGui ǃgomsina xu ra ǂgōsen, khoen ra hōǃâna. Aiǁgause mari-i, sîsen-i tsî ǁîn xa ǀgui ǃnāsase ǂâis xa. Ada hoa da gā-ai tsî Jehovab di ǂgaoba ǃgâiaǂgao kai re.—ǂKhm. 23:15.