1-2. Mati da ǂKhoamîdi 4:25 ǃnâ māsa ǀapemāsa ra sao ai? Aiǁgau-e mā re.

NĒ ǃNONA aiǁgaudi xa ǂâi re. Kaira ǃgâsas ge ǃgâi ǁaegu hînas ge ǂkhams a hîna ūhâ-i gu xa ra ǂâi. ǁÎs ûib nēsi a ǃgom xawes ge ǁkhās a i hoa-e Jehovaba ra dība. (1Kor. 15:58) Tsēs hoasas ge ǁîs omaris tsî ǀhōsan tsîn ǀkhas paradais ǃnâ hâ ǀgausa ra mûnan-ai. ǀGui ǃgâsas ge ra ǂâihō ǀhaohâb ǃnâ i ge khoe-e, ǁîsa ra tsûaǂgao kai xū-e a mîsa. Xawes ge ǁîsa nēs xa kaise ge ǂâi tama hâ-i. (Kol. 3:13) ǃGâsab ge ǃkharuge ǁaeb ǃnâb ge dī hâ-i dīsādi xa ra ǂâi. Xaweb ge ǁîba ǁkhāb a i hoa-e ra dī tsî Jehovab ǃoa-ai ǂgomǂgomsase hâs ai ǁîb ǂâisa ra ǂnûi.—Psa. 51:10.

² Matin nē ǃnona Xristeǁîna a ǀgui? Hoan ge ǃkharuge ǁae ge ī xū-i xa ra ǂâi. Xawen ge ǁnā xū-i xa ǀgui ǂâi tama hâ. ǁÎn ge “ǂhanuse” hānîǁaeb ǃoa ra “kō.”—Khomai re ǂKhoamîdi 4:25.

3. Tae-i ǃaroma da “ǂhanuse” hānîǁaeb ǃoa nî “kō”?

³ Tae-i ǃaroma i a ǂhâǂhâsa î da “ǂhanuse” hānîǁaeb ǃoa “kō”? Khoe-i hîna hoaǁae ǃgâbǀkhāb ai ra kō i ge ǂhanuse a ǃgû ǁoa. Nēs ge sida ǃoabas Jehovab ǀkhā da ūhâs ǀkhā a ǀgui. Jehovaba da ge ǀoasase a ǃoaba ǁoa, hoaǁae da ga ǀnai ge ī xūn xa ga ra ǂâi o.—Luk. 9:62.

4. Tae-e da nē ǁkhāǁkhāǃâs ǃnâ nî ǃhoaǃgao?

⁴ Nē ǁkhāǁkhāǃâs ǃnâ da ge ǃnona xūn hîna ǃkharuge ǁaeb ǃnâ nî ûi kai dan xa nî ǃhoa. * ǁÎn ge: (1) sida ûib ǀnaib  ge ī i khami ǀgui nî īsa ǂhâbas, (2) ǁaib tsî (3) ǀhapitsâsens tsîna. Mâ ǃnās hoasa da ge nî mû mati i Elobmîs tsoatsoade a hui da ǁkhāsa, î da ‘khaos ai hân ǃoa tā ǂnan’ xawe “aiǃâ hân” ai sida di ǂâisa ǂnûi.—Fil. 3:13.

5. Aoǁnâ-aob 7:10 sa tae-e da tā nî dī ti ra mî?

⁵ Khomai re Aoǁnâ-aob 7:10 sa. ǃGaoǃgâ re nē xoas ge mî tama hâ: “Tarexasa aibekam tsēdi ge nēdi xa ǃgâi isa?” Ti dîs ge tsū tama hâ. ǃGâi ǂâidi ge Jehovaba xū hâ ǀkhaeba. Xawe xoas ge ra mî: ‘Tā mî: ǃkharu ge tsēdi ge nēdi xa ǃgâi isa.’ ǁNā-amaga da ge nî ǂanbasen î da ǃkharuge ûib sida diba, tā nēsi da ūhâ ûib ǀkha ǀgopeǀnō. Tsî tā mî hoa xūn ge nēsisa ra ǁgai ti.

6. Tae-i ǃaroma i ǃgâi tama hâ sida di ûib ge ǃkharu gere ǁaeb ǃnâ ge ǃgâi i ti ǀgui ǂâisa? Aiǁgau-e mā re.

⁶ Tae-i ǃaroma i ǃgâi tama hâ, sida ûib ǃkharugeb ge ǃgâi i ǀgaus xa ǀgui ǂâisa? ǃKharuge xūna ǁkhores ge ǃgâi xūn xa ǀgui ra ǂâi kai da. Tsî da ge kai-amse ī ge ǁgai xūna ra ǀuru. Israelǁaes di aiǁgausa kō re. Egipte ǃhūba xūn ge ī on ge ǃkhaese ge ǀuru ûib ge matikōse ǁnapa ǃgom isa. Tsîn ge ǃgâi ǂûn ǁnapan gere hōn ai ǁîn ǂâisa ge ǂnûi. ǁÎn ge ra mî: “ǂÂi da kom rao ǁnā ǁaun Egipteb ǃnâ da ge xū-i ama tamase gere ǂûn xa; tôan xa tsî ǃhanatsaman xa tsî ǀoran xa tsî ǃhān xa.” (Num. 11:5) Xawe ‘xū-e matare tamasen’ ge nē ǂûna gere ǂû? Hî i. Israelǁaes ge ǁnā ǁaeb ai kai ǃgoma gere tsâ. ǁÎn ge ǃgāse Egipteb ǃnâ ge hâ-i. (Eks. 1:13, 14; 3:6-9) Xawen ge ǃkharuǃnân gere ǃgoma ǀuru tsî ǁnā tsēdi xa gere ǂâi. ǁÎn ge ǃgâi ge i ǀoro tsēdi ai ǂâisa gere ǂnûi tsî Jehovab gere dība nî xūna ge mû tama hâ-i. ǁÎb ge ǁîn tanisen ǀgaub xa ge ǂkhî tama hâ-i.—Num. 11:10.

7. ǃKharuge ǁaeb xa ǀgui ǂâi tama i sa mati ǀgui ǃgâsasa ge hui?

⁷ ǃKharuge xūn xa ǀgui ǂâisa da mati nî ǂanbasen? 1945ǁÎ kuri ge Brooklyn  Bethels tawa ǁgaumâihe ǃgâsas di aiǁgausa kō re. Kurina ǃkharu tsîs ge ǁîs ǀkha ge Bethels tawa hâ-i ǃgâsaba ge ǃgamme. Tsîra ge ǀguiba ǂgui kurina gere sîsen. Xawe i ge 1976ǁî kuri ǁîs aoba ge ǀaesen. ǁÎs ge ra mî, ǁîb ǁōb ge ǀgū toasab ge mû ob ge ǃgâi ǀapemāsa ge māsi, ǁîb ǁōb khaoǃgâ nî huisiba. ǁÎsa ǃoab ge ge mî: “ǃGâi ǃgammebam ge ge ūhâ-i. ǂGui khoen ge nēsa ge hōǃâ tama hâ i.” ǁÎsa ǀapemā tsîb ge ge mî: “Tā ǃkharuge ǁaeb ǃnâ ûi re. ǂGui ǃgâi xūn hînam ge ǀguiba a dīnas ge ǀuru tide, xawe tā ǁîn xa ǀgui ǂâi re. ǁAeb ra ǃkharu khami i ge sa ǃoaba nî ǀoro. Tā kaise ǃoa tsî ǂkhabuǂâi re sas ǀkha go ī xū i xa. . . . ǃGâi ǂâidi ge Eloba xū hâ ǀkhaeba.” Nē ǀapemās ge kaise ge ǃgâi i.

8. Sida di ǃgâsasa mati ǃgâiba ge hō ǁîs di aob di ǀapemāsa ǃgâs ǃnâ-ū, is tā ǃkharuge ǁaeb xa ǀgui ǂâi?

⁸ Sida ǃgâsas ge ǁîs aob ge māsi ǀapemāsa ge sao ai. ǁÎs ge Jehovaba ǂgomǂgomsase ge ǃoaba tsî 92 kurin ǀkha ge ǁō. ǁŌs nîs aiǃâs ge gere mî: “63 Kurin, Jehovaba ta ge ǀoasase gere ǃoaban ǃnâ ta ge a mî ǁkha, kaise ta ge ǂkhî ûib, ǂâibasensa ūhâba ge ūhâ-i.” Tae-i ǃaroma? ǁÎs ge ra mî: “Hoa ǃgâsan ǃhūbaib ǂhawase hân ge a ǀgui omaris di ǁani. ǁNā-amaga da ge ǂkhîsa ûiba a ūhâ ǁkhā. Tsî da ge ǁîn ǀkha paradais ǃnâ ǃhūbaib ai hâs di ǃâubasensa ūhâ tsî Jehovaba ǀamosib kōse ǃoabasa.” * Nē ǃgâsasa xū da ge a ǁkhāǁkhāsen ǁkhā mati da Jehovab di mîmâidi ai nî ǂgomaiǂnûisa.

9. Levitikus 19:18 ǃnâ ra ǂoaxase, mâ ǁaeb ai i a ǃgom ǁkhā khoe-i hîna go tsûtsû da-e ǀūbasa?

⁹ Khomai re Levitikus 19:18 sa. ǀNî ǁaega i ge kaise a ǃgom ǀhaohâb ǃnâ hâ khoe-i hîna ge tsūdī da-e ǀûbasa. ǁÎn a  sada di ǀhō tamas ka io omaris di ǁani amaga. Aiǁgauses ge ǀhaohâb ǃnâ hâ ǃgâsasa ǀgui ǃgâsasa mari-es ge ǁîsa xu a ǃnari ti ge ǀhapiǂgā-am. Nēs ama tama tis ge ǂan os ge ǁîs ai ǀûbaba ge ǂgan. Xawes ge ǂgari-amhe ge ǃgâsasa kaise nēs xa ge ǁaixa hâ-i. Tsî nēs xa ge ǂâi ǀû ǂgao tama hâ-i. Sadu tsîna nēti i mâsib ǃnâ ge ǃkharu? Nēti ī mâsib ǃnâ du ge ǃkharu tama i, xawe i ge ǃnāsa da hoada ǀgui ǁae ge ǁaexa hâ-i. Tsî gere ǂgom tsūdī da go khoe-e da ǀūba tide di.

10. Tae-e a huida ǁkhā ǁaixa da ga ra o?

¹⁰ Tae-e nî huida ǁaixa da ga ra o? ǀGui xū-i hîna da ǂâis ǃnâ nî ūhâ-i ge, Jehovab ge hoa xūna ra mû. ǁÎb ge ǃkharu ǃnâ da ra xūn hoana a ǂan. Aiǁgause khoe-i ga sida ǃgâi tamase ga ra hâ-ū o. (Heb. 4:13) ǁÎb ge ǁgaise ra tsâ ǃgoma ga ra tsâ o. (Jes. 63:9) Tsîb ge ra mîmâi hoa tsûn hîna da ra ǃkharu ǃnânab ge nî ūbē ti.—J.ǂHa. 21:3, 4.

11. Mati da ǃgâiba nî hō ǁaixa tama da ka io?

¹¹ ǂÂis ǃnâ da ge nî ūhâ, nau khoena da ga ǀūba o da ǃgâise nî tsâsa. Ais ai da go ro ǃhoaǃgao ǃgâsas tsîn ge nēsa ge mûǂan. Tsîs ge ǁaeb ra ī khami ǃnari ǂgā-amsi ge ǃgâsasa ge ǀūba tsî ǁîsa ge ǁaixaba ǀû. ǁÎs ge ge mûǂan nau khoena da ga ǀūba o, ob Jehovab tsîna sada ra ǀūbasa. (Mat. 6:14) ǁÎs ge ge ǂan i nau ǃgâsas ge dī xū-i ge tsū-i ǃkhaisa. Xawes ge ǁîsa ge ǀūba. Nēs xa ǃaromahe hâses ge sida ǃgâsasa kai ǂkhîba ge hōǃâ tsî Jehovaba ǃoabas ai ǁîs ǂâisa gere ǂnûi.

12. 1 Johaneb 3:19, 20 sa xu tae-e da ra ǁkhāǁkhāsen?

¹² Khomai re 1 Johaneb 3:19, 20 sa. Hoada ge ǁae-i ai ra ǀhapitsâsen. Aiǁgausen ge ǀnîna amab ǃnân nî ǂgāxas aiǃgân ge dī xūn ǃgao ra ǀhapitsâsen. Tsî ǀnîn ge ǁāǁnâs khaoǃgân ge dī xūn ǃgao ra ǀhapitsâsen. (Rom. 3:23) Ama as ge hoada ge ǃgâi xūna ra dī ǂgao. Xawe ‘da kom kaise xūn hoan ǃnâ ra ǃnôao.’ (Jak. 3:2; Rom. 7:21-23) ǀHapitsâsens ge ǃgâiaǂgao kai da tama hâ. Xawe i ge ǃgâi xū-e ra dī. Tae-i ǃaroma? ǀHapitsâsens ge ra huida î da ûib ǃnâ ǀkharaǀkharana dī. Tsî dīsā da go xūna tā ǁkhapa dī.—Heb. 12:12, 13.

13. Tae-i ǃaroma da tā kaise nî ǀhapitsâsen?

¹³ Īǁkhā a ǃkhais ge kaise da ge ǁgaise a tsâ ǁkhā. Nēs ge ra ǂâibasen sida di ǁorena xu da ǃhobasen tsîb Jehovaba ǀūbadab hâsa ǁgauda hâ xawes tsîna da ge nox a ǀhapitsâsen ǁkhā. Nē ame ǀhapitsâsen ǀgaub ge kaise a ǃaoroxa. (Psa. 31:10; 38:3, 4) Tae-i ǃaromas ǁnāsa ti ī? ǀGui ǃgâsas hîna ge ǃkharuge ǁaes ge dīsā hâ-i xū-i xa ra ǀhapitsâsens di aiǁgausa kō re. ǁÎs ge ra mî: “Tida ge ra tsâ Jehovab di ǃoabas ǃnâ ǃgarise sîsens hui tamasa, sâuhe tā tide amaga.” ǂGuida hoade ge nē ǃgâsas khami ra tsâ. ǁNā-amaga da ge nî ǃûisen î da tā kaise ǀhapitsâsen. Tae-e-i ǃaroma? Jehovab sida a ǀnam tsî ǀūba hâs khaoǃgâ da ga ǁîba a ǃoaba ǀū, o da ge ǁGâuaba ra ǂkhîǂkhî.—2 Korinteǁîn 2:5-7, 11 sa ǀgopeǀnō re.

14. Mati da a ǂan Jehovab ra ǀūbada ǂgao ǃkhaisa?

¹⁴ Dîsen ǁkhā da ge a, ‘mati ta a ǂan ǁkhā Jehovab ǀurute tama hâsa?’ Ti da ga ra dîsen o da ge a ǂan Jehovab a ǀūbada ǁkhā ǃkhaisa. ǂGui kurina ǃkharu hâse i ge The Watchtower ǂkhanib ǃnâ ge mîhe: “ǂGui ǃnāde da ge ǀnai da ge dīsā hâ-i xū-i ai a ǃnôa ǁkhā. Īǁkhā i ge a kaise i ǃgombada ǁkhāsa, Jehovaba da nî ǃoabas aiǃgâ da ge ūhâ-i ǁgai ǁnaetiga ǀûsa. . . . Xawe  tā ǂkhabuǂâi re. Tā Jehovab a ǀūba ǁoa ǁore-e du ge dī ti ǂâi re. ǁGâuab ge ra ǂhâba î du di ǂâi. Kaise du ge ǃoa tsî ǁgaise ra tsâ tsū xū-e du ga dī o. Nēs ge ra ǁgau, ǁgai khoe tama du hâsa tsîb Jehovaba ǀūba du hâ ǃkhaisa. ǃGamǃgamsen re i Jehovaba ǃoa ǀgore tsî ǂgan îb ǀūba du. Îb huidu î du ǃanu ǃgâi ǂâisa ūhâ tsî sadu xa ǃgâisa tsâ. Tsî huidu î du nē dīsāna tā ǁkhapa dī. Matikōse i ga ra ǂkhari ǀgôaro-e ǂgui ǃgomsina ga ra ūhâ xawe i ge ǁî-e hoaǁae ǁî-i dadasab di huiba ra ǂgan. ǁNā-amaga du hoaǁae Jehovaba huiba ǂgan re, ob ge ǁîba nî huidu.” *

15-16. ǀNîna mati gere tsâ Jehovab ǁîna ǀuru tama hâsan ge ǁnâuǃā o?

¹⁵ ǂGui khoen Jehovaba ra ǃoaban ge ǁkhaeǂgaosa ge hō. Jehovab ǁîna ǀuru tama hâsan ge mûǂan amaga. Aiǁgause kurina ǃkharu hâseb ge ǀnî ǃgâsaba The Watchtower ǂkhanib ǃnâb ge khomai xū-i xa ge ǂkhâǃnâhe. ǁNā ǁkhāǁkhāǃâs ǃnâs ge ǃgâsasa ra mî, ǂgui xūn hîna ge ǁîs ûib ǃnâ gere īn ge gere ǃaroma îs Jehovab ǁîsa a ǀnam ǃkhaisa tā ǂgom. ǁÎs ge nēti ǂgui kurina gere tsâ. ǁÂǁnāhes ge khaoǃgâs tsîna. Xoremarib xa ǂâiǃgâs ge ǁîsa ge hui îs Jehovab ǁîsa a ǀnam ǃkhaisa ǂgom. *

¹⁶ Nē ǃgâsas di aiǁgausa mati nē ǃgâsaba ge hui? ǁÎb ge ra xoa: “ǂKham ta ge io ta ge ǀōǀkhā khoen fotode gere kō. Nēsa dī ǀûs ge kaise ge ǃgombade i. Tsî ta ge nēsa ǁkhapa ge dī. ǀHaohâb ǃûi-aogu ai ta ge huiba ge ǂgan. Tsî ta ge nē ǃgomsiba ge dan. ǁÎgu ge ge huite, î ta Jehovab a ǀnam te tsî ra ǀūbate ǂgao ǃkhaisa ǂgom. Xawe ta ge ǀnî ǁaegu ai xū-ose ra tsâ tsîb Jehovab ǀnîsi ǀnam te tama ǃkhaisa. Nē ǃgâsas di aiǁgausa khomais ge kaise ge huite. Nēsisa ta ge ra ǁnâuǃā, Jehovab ge ǀūbate tide ti ta ga ra mî o, o da ge ra ǂgom ǁîb Ôab di ǁguibas ge ti ǁoren ǃgao ǂâu tama hâ ti. Nē ǁkhāǁkhāǃâsa ta ge ge  ǁaraǂui î da ǁîsa khomai tsî ǂâiǃgâ, xū-ose ta ga tsâ ǁaeb hoaba.”

17. Apostel Pauluba mati io kaise ge ǀhapitsâsen tama hâ-i?

¹⁷ Nē ame aiǁgaudi ge ra huida i da apostel Paulub xa ǂâi. Xristeǁî kaib nîs aiǃgâb ge ǁîba ǂgui ǁorena ge dī. Paulub ge ǁîb ge dī ǁorena ǀuru tama hâ xaweb ge ǁîn xa ǀgui ge ǂâi tama hâ-i. (1Tim. 1:12-15) ǁÎb ge xoremarib ǁguibasa ǀkhaeb ase Elob xa a māhe ǃkhais ǃaroma. (Gal. 2:20) Apostel Paulub ge ge ǀhapitsâsen tama hâ-i xaweb ge ǁîba dī ǁkhāb a xūna Jehovaba dības ai ǂâisa gere ǂnûi.

18. Nē ǁkhāǁkhāǃâs ǃnâ da go tae-na ǁkhāǁkhāsen?

¹⁸ Tae-e da nē ǁkhāǁkhāǃâs ǃnâ ǃnuide oaǃnâs ǃnâ-ū go ǁkhāǁkhāsen? (1) ǃGâi ǂâidi ge Jehovaba xu hâ ǀkhaeba. Sida di ûib ge matikōse ǃkharuge ǁae ǃgâi i, xawe i ge hā nî ûiba nēs xa ǃnāsase nî ǁoaxa. (2) Khoen ge a tsûtsûda ǁkhā. Xawe da ga ǁîna a ǀūba o, o da ge Jehovaba nēsi ǃoabas ai sida di ǂâisa nî ǂnûi. (3) Kaise ǀhapitsâsens ge Jehovaba ǂkhîb ǀkha ǃoabasa nî ǂkhāda. ǁNā-amaga da ge Paulub khami nî ǂgom Jehovab sida ra ǀūba ǃkhaisa.

19. Mati da a ǂan ǀasa ǃhūbaib ǃnâ da ǃkharu ge xūn xa ǂâi tide ǃkhaisa?

¹⁹ ǀAmose ûis di ǃâubasensa da ge ūhâ. ǀAsa ǃhūbaib ǃnâ da ge xūn hîna ǁgaise ra tsâ kai dan xas tsîna ǂâi tide. ǁNā ǁaeb xas ge Elobmîsa ra mî: “Aibekam xūn xa i ge ǃaruǀî ǂâihe tide.” (Jes. 65:17) ǂÂi re: ǀNîda â da ge Jehovab di ǃoabas ǃnâ ge kaira. Xawe ǀasa ǃhūbaib ǃnâ da ge ǁkhapa nî ǂkham. (Job 33:25) ǁNā-amaga hā re î da ǀasa ǃhūbaiba ǃoa kō. Tsî ǁkhā da a xūn hoana dī î da ǁnapa hâ.